Нуһ пәйғәмбәр заманида, Худа Сөзигә кимләр қулақ салди? Кимләр қулақ салмиди?

Нуһ пәйғәмбәрниң заманида, көп кишиләр яман ишларни қилған (Яритилиш 6:5).

Адәм ата билән Һава аниниң балилири туғулди вә йәр йүзидә адәмләрниң сани барғансири көпәйди. Шу заманда, бәзи периштәләр Шәйтанниң исияниға қошулди.

Улар әр кишиләрниң сияқидики тән билән йәр йүзигә чүшүп, аяллар билән той қилди. Шу аяллар адәттики инсанларға охшимайдиған явуз вә күчлүк оғулларни туғди.

Йәр йүзи барғансири яманлиқ қилғучилар билән толуп кәтти. Муқәддәс Китап: “Пәрвәрдигар инсанларниң рәзиллигини, нийитиниң һәр қачан яманлиғини [көрди]”, дәйду.

Нуһ Худаниң сөзигә қулақ селип, кемә ясиған (Яритилиш 6:13, 14, 18, 19, 22).

Нуһ тоғра иш қилидиған адәм еди. Йәһва Худа яманлиқ қилғучиларни топан сүйи билән йоқ қилмақчи болғанлиғини Нуһқа ейтти.

Худа йәнә Нуһ пәйғәмбәрни чоң бир кемә ясап, аилисидикиләр билән һәр түрлүк җан-җаниварларни шу кемигә елип чиқишни буйруди.

Нуһ пәйғәмбәр инсанларни топан сүйи келиду, дәп агаһландурди. Бирақ, улар қулақ салмиди. Бәзиләр Нуһни заңлиқ қилип күлсә, башқилири уни өч көрди.

Кемә пүткәндә, Нуһ пәйғәмбәр җан-җаниварларни кемә ичигә елип кирди.