Худа тәшкилати немә үчүн керәк?

1. Немә үчүн Худа қедимий Исраил хәлқини тәшкил қилған?

Худа Ибраһим пәйғәмбәрниң әвладидин хәлиқ қуруп, униңға қанун-қаидиләрни бәргән. Худа бу хәлиқни «Исраил» дәп атап, уларға һәқ динни қоғдашни вә Униң Сөзини сақлашни буйруған (Зәбур 147:19, 20). Нәтиҗидә ят хәлиқләрниң барлиғи Исраил хәлқи арқилиқ Худаниң бәрикәтлиригә егә болуш мүмкинчилигини алди (Яритилиш 22:18 оқуп чиқиң).

Худа исраиллиқларни Униң гувачилири болуши үчүн таллиди. Қедимий Исраилниң тарихи Худаниң қанунлири бойичә яшашниң қанчилик дана екәнлигини көрсәтти (Қанун шәрһи 4:6). Исраиллиқларға қарап ят хәлиқләргиму һәқиқий Худани тонушқа мүмкин болди (Йәшая 43:10, 12 оқуп чиқиң).

2. Худа немә үчүн һәқиқий мәсиһийләрниң жиғинини уюштурди?

Кейинирәк Исраил хәлқи Худаниң илтипатидин айрилди. Шу сәвәптин Йәһва Худа мәсиһийләр җамаитини уюштурди (Мәтта 21:43; 23:37, 38). Әгәр бурун исраиллиқлар Йәһва гувачилири болған болса, әнди һәқиқий мәсиһийләр Йәһва гувачилири болуп хизмәт қилмақта (Әлчиләр 15:14, 17 оқуп чиқиң).

Һакимдар Әйса избасарлириға хуш хәвәрни вәз қилип, барлиқ хәлиқләрдин шагиртларни тәйярлашни буйруди (Мәтта 10:7, 11; 24:14; 28:19, 20). Мошу заманниң ахирида бүгүнки күндә вәзилик иши кәң тарқалмақта. Йәһва Худа тарихта биринчи қетим һәқиқий ибадәттә барлиқ хәлиқләрдин миллионлиған адәмләрни бирләштүрди (Вәһий 7:9, 10). Мәсиһийләр бир-бирини қоллап-қувәтләш һәм илһамландуруш үчүн бир тәшкилатта җәм болди. Пүткүл дунияда улар Муқәддәс китапни бир программа бойичә үгиниватиду (Ибранийларға 10:24, 25 оқуп чиқиң).

3. Йәһва гувачилириниң заманивий тарихи қандақ башланди?

1870-жилларда кичик бир гуруһтин ибарәт болған Муқәддәс китап тәтқиқатчилири узундин бери унтулуп кәткән Худа Сөзиниң һәқиқәтлирини аста-аста рошән қилди. Улар мәсиһийләр җамаити Падишалиқ һәққидики хуш хәвәрни вәз қилиши үчүн тәшкил болғанлиғини билип, пүткүл йәр йүзидә вәзилик ишини жүргүзиватиду. 1931-жилдин башлап улар Йәһва гувачилири дәп атилидиған болди (Әлчиләр 1:8; 2:1, 4, 11; 5:42 оқуп чиқиң).

4. Йәһва гувачилириниң тәшкилати қандақ қурулған?

Биринчи әсирдә көплигән мәмликәтләрдики мәсиһий җамаәтләр Әйсани җамаәтниң Беши дәп санайдиған Рәһбирий Кеңәшкә беқинатти (Әлчиләр 16:4, 5). Бүгүнму Йәһва гувачилириниң тәҗрибилик ақсақаллардин ибарәт болған Рәһбәрлик кеңиши бар. Рәһбәрлик кеңәш Йәһва гувачилириниң филиаллириға назарәт қилиду. Филиалларда әдәбиятларни Муқәддәс китапни үгиниш үчүн 600дин артуқ тилларға тәрҗимә қилип, бесип чиқириду. Шуңа Рәһбәрлик кеңәш дуния бойичә бирләшкән 100 000дин артуқ җамаәтләрдики мәсиһийләргә роһий тәлимни берәләйду. Һәр бир җамаәттә роһий йетилгән әрләр ақсақал болуп хизмәт қиливатиду. Улар җамаәтниң әзалириға сәмимий ғәмхорлуқ қилиду (Петрусниң 1-хети 5:2, 3 оқуп чиқиң).

Йәһва гувачилири хуш хәвәрни вәз қилип, шагиртларни тәйярлаш үчүн бирләшкән тәшкилатқа жиғилди. Әлчиләрдин үлгә елип биз өйму-өй вәз қиливатимиз (Әлчиләр 20:20). Биз һәқиқәтни билгүси кәлгәнләрниң һәммисигә Муқәддәс китапни һәқсиз үгинишкә тәклип қилимиз. Лекин Йәһва гувачилири аддий тәшкилат әмәс. Биз меһриван Атиси бар инақ аилә. Шуңа биз бир-биримизгә қериндашчилиқ қилимиз (Салоникилиқларға 2-хәт 1:3). Худа хизмәтчилири Униң ирадисини орунлап рази қилиш вә башқиларға ярдәм бериш мәхситидә тәшкил қилинғанлиқтин, улар йәр йүзидә әң бәхитлик хәлиқтур (Петрусниң 1-хети 2:9; Әлчиләр 20:35 оқуп чиқиң).