«Һаятимиз вә хизмитимиз. Иш дәптири» үчүн мәлумат мәнбәлири
4—10 ноябрь
ХУДА СӨЗИДИКИ ҒӘЗНӘ | ЙОҺАННИҢ 1-ХЕТИ 1—5
Бу дунияни вә бу дуниядики нәрсиләрни сөймәңлар
w05 1.1. 10-б., 13-абз.
Мәсиһниң изида меңиңлар
13 Бәзиләр дуниядики һәммә нәрсә яман әмәс дәп ейтиду. Бу шундақ, бирақ дуния вә униң һәвәслири бизниң диққитимизни Йәһваға болған хизмәттин башқа тәрәпкә буриветиши мүмкин. Шундақла, бу дуниядики һечнемә Йәһваға йеқинирақ болушқа дәвәт қилмайду. Шуңа бу дуниядики нәрсиләрни сөйсәк, һәтта улар яман болмисиму, хәтәрлик йолға чүшүп қелишимиз мүмкин (Тимотийға 1-хәт 6:9, 10). Буниңдин башқа, бу дуниядики нәрсиләрниң көпинчиси һәқиқәтән яман вә бизни тоғра йолдин буриветиши мүмкин. Әгәр биз зораванлиқ, пулпәрәслик яки җинсий әхлақсизлиққа бағлиқ киноларни яки телевизийә программилирини көрүшкә адәтлинип қалсақ, кейинирәк бу тузақ болиду. Бай болушнила ойлайдиғанлар яки тиҗарәттә утуқларға интилидиған кишиләр билән арилашсақ, бизму уларға охшаш мошу нәрсиләрни биринчи орунға қоюшни башлаймиз (Мәтта 6:24; Коринтлиқларға 1-хәт 15:33).
w13 8.15. 27-б., 18-абз.
Қандақ адәм екәнлигиңизни тәкшүрүң
18 Худаниң күчи билән йезилған Йоһанниң 1-хети 2:17тики сөзләр бизни «дуниядики нәрсиләргә» қарши турушқа ярдәм бериду. Бу айәттә: «Дунияму һәм униң һәвәслириму өтүп кетиду, амма Худаниң ирадисини орунлиғучи мәңгү яшайду»,— дәп йезилған. Шәйтанниң дунияси мәңгү вә чин болуп көрүниду. Амма һаман бир күни униң ахири келиду. Шәйтанниң дуниясида һечнәрсә мәңгү әмәслигини есимиздә тутсақ, униң тузиғиға чүшүп қалмаймиз.
Роһий гөһәрләрни издәйли
w13 9.15. 10-б., 14-абз.
Йәһваниң әскәтрмилири ишәнчликтур
14 Инҗилда бир-биримизгә меһир-муһәббәтни көрситиш һәққидә көп йезилған. Әйса, әң муһим әмирләрниң бири: «Өз йениңдики кишини өзәңдәк сөйгүн»,— дегән (Мәт. 22:39). Әйсаниң иниси Яқуп меһир-муһәббәтни «падишаниң қануни» дәп атиған (Яқуп 2:8). Әлчи Йоһан: «Қәдирданлирим, мән силәргә йеңи әмир әмәс, бәлки авалдин силәрдә болған кона әмирни йезиватимән»,— дегән (Йоһ. 1-х. 2:7, 8). «Авалдин силәрдә болған кона» әмир, қандақ әмир болған? Бу меһир-муһәббәт көрситиш һәққидики әмир болған. Әйса бу әмирни «авалдин», йәни онлиған жиллар бурун бәргәнликтин, у кона дәп аталған. Бирақ бу әмир «йеңи әмир» дәпму аталған, чүнки шагиртлар бир-биригә йеңи шараитларда меһир-муһәббәтни пидакарлиқ билән көрситиши керәк еди. Шуңа биз Мәсиһниң шагиртлири болғачқа, йеқинлиримизға болған меһир-муһәббитимизни аҗизлаштуридиған бу дунияниң шәхсийәтчилик роһидин өзүмизни қоғдашқа ярдәм беридиған әскәртмиләрни қәдирлишимиз керәк.
it «Кәчүрүм», 10-абз.
Бир етиқатчи башқилар, һәтта җамаәттики һәммиси үчүн Худадин кәчүрүм тиләп дуа қилишқа болиду, бу бәкму орунлуқ. Муса пәйғәмбәр исраилларға вакаләтән Худа алдида пүткүл хәлиқниң гунасини иқрар қилип, улар үчүн кәчүрүм тилигән. Худа униң дуасиға қулақ салған (Сн 14:19, 20). Униңдин башқа, Сулайман падиша ибадәтханини Худаға атап дуа қилғанда, гуна қилған, амма хата йолидин йенип, Йәһваға қайтип кәлгән хәлиқни кәчүрүшини өтүнгән (П1я 8:30, 33—40, 46—52). Әзра пәйғәмбәр қуллуқтин жутиға қайтқан йәһудийларға вакаләтән Йәһва алдида өткүзгән гуналирини етирап қилған. Хәлиқ униң чин қәлбидин қилған сәмимий вә илһам-мәдәт беридиған дуалиридин қаттиқ тәсирлинип, әмәлий һәрикәт қилишқан, нәтиҗидә хәлиқ Худаниң кәчүрүмигә еришкән (Әзр 9:13—10:4, 10—19, 44). Яқуп язған хетидә, роһий җәһәттин ағриқ болғанларни җамаәт ақсақаллириға берип өзлири үчүн дуа қилишни сорашқа буйриған. Әгәр ағриқ гуна қилған болса, кәчүрүм қилиниду (Яқ. 5:14—16). Амма, мәңгүлүк «өлүмгә апиридиған гунаму бар», йәни билип туруп муқәддәс роһқа қарши қилинған гуна үчүн кәчүрүм йоқтур. Шуңа, бир етиқатчи шундақ қәстән гуна қилғучи үчүн дуа қилмаслиғи керәк (Й1х 5:16, Мт 12:31, Иб 10:26, 27).
11—17 ноябрь
ХУДА СӨЗИДИКИ ҒӘЗНӘ | ЙОҺАННИҢ 2-ХЕТИ 1 БАП — ЙӘҺУДА
Һәқиқәттә мәһкәм туруш үчүн күришиш керәк
w04 9.15. 11, 12-б., 8, 9-абз.
Йәһвадин күч-қувәт елиң
8 Биз Шәйтанниң һийлә-микирлирини яхши билимиз, чүнки Муқәддәс китапта униң алдаш усуллири ашкарә ейтилған (Коринтлиқларға 2-хәт 2:11). Һәққаний Аюпниң бешиға Шәйтан көп қийинчилиқларни чүшәргән. Мәсилән, у көплигән маддий қийинчилиқларға дуч кәлгән, йеқинлиридин айрилған, униңға аилиси қарши чиққан, еғир кесәлгә гириптар болған һәм ялған достлириниң адаләтсиз әйиплишигә учриған. Аюпниң роһи чүшүп, Худа уни ташлап кәткәндәк һис қилған (Аюп 10:1, 2). Бүгүнки күндә мошундақ қийинчилиқларға һәр дайим Шәйтан сәвәпчи болмисиму, шундақ қийинчилиқларға һәммә мәсиһийләр дуч келиду вә Шәйтан буниңдин пайдилинип бизгә тәсир қилалайду.
9 Ахирқи күнләрдә һәммә йәрдә етиқадимиз хәвп-хәтәр астида болмақта. Биз роһий ишларниң орниға маддий нәрсиләрни биринчи орунға қойидиған дунияда яшаватимиз. Аммивий әхбарат васитилири қанунсиз җинсий алақини қайғуға әмәс, бәхит әкелидиғандәк қилип көрситиду. Көп адәмләр «Худани әмәс, һузурлинишни яхши көриду» (Тимотийға 2-хәт 3:1—5). Шуңа бундақ ой-пикирләр бизни тоғра йолдин аздуруп кәтмәслиги үчүн, «етиқат үчүн күрәш» қилишимиз керәк (Йәһуда 3).
Роһий гөһәрләрни издәйли
it «Достанә зияпәт», 1-абз.
Достанә зияпәт
Достанә зияпәт (муһәббәтлик зияпәт) қандақ өткүзүлгәнлиги вә қанчә вақитта бир рәт өткүзүлидиғанлиғи һәққидә Муқәддәс китапта һечнәрсә йезилмиған (Йәһуда 12). Әйса Мәсиһ вә әлчиләр достанә зияпәт өткүзүш һәққидә тәлим бәрмигән, шуңа бу зияпәтни өткүзүш чоқум зөрүр болмиған, һәм мәңгү давам етиши керәк әмәс еди. Бәзиләр шундақ дәйду, достанә зияпәтни қол илкидә бар бай етиқатчилар өткүзгән, зияпәткә чақирилғанлар кәмбәғәл етиқатчилар, тул аял, житим балилар болуп, бай-намрат бирликтә мол дәстиханда җәм болуп һузурланған.
it «Қорам таш»/«Көчмә мәнада», 4-абз.
Қорам таш
Грек тилидики йәнә бир сөз спилас наһайити ениқки, су астидики йошурун қорам таш яки хада ташни көрсәткән. Йәһуда мисал арқилиқ Мәсиһ әгәшкүчилири җамаитигә соқунуп киришкә урунидиған қара нийәтлик адәмләрни көрсәткән. Йошурун хада ташлар кемиләргә хәтәрлик тәһдит болғандәк, яман нийәтлик адәмләр җамаәт үчүн хәтәрликтур. Йәһуда әшу адәмләр һәққидә мундақ дегән: «Улар силәр билән биллә достанә меһир-муһәббәт ичидә зияпәтлинидиған су астиға йошурунған хада ташлардур» (Йәһуда 12, ЙД).
wp17.01 12-б., 1-абз.
Худа униңдин рази болған
Һанух қандақ пәйғәмбәрлик сөзләрни ейтқан? У мундақ дегән: «Мана, Йәһва Худа түмән-түмән муқәддәс пәриштилири билән кәлди, һәммисини сотқа тартиш үчүн вә Униңға қарши сөзлигән рәзил гунакарларниң барлиқ исиянкар гәплирини, барлиқ рәзил адәмләрниң һәммә рәзил ишлириниң рәзил қилғанлирини паш қилиш үчүн кәлди» (Йәһуда 14, 15). Қизиқарлиқ йери шуки, Һанух кәлгүсидә болидиған ишни өтүп кәткән заман шәклидә ейтқан вә башқа көп пәйғәмбәрләрму шуниңға охшаш сөзләрни дегән. Хулләс чиқарсақ: Һанух пәйғәмбәр техи йүз бәрмигән нәрсиләр һәққидә аллиқачан орунланғандәк ейтип, уларниң чоқум йүз беридиғанлиғини көрсәткән (Йәшая 46:10).
wp17.01 12-б., 3-абз.
Худа униңдин рази болған
Һанухниң етиқади һәққидә мулаһизә қилиш, бизни бу дунияға Худаниң көзқариши билән қарашқа дәвәт қилиду. Һанухниң ейтқан һөкүм хәвири техичә күчини йоқатмиған. Шу вақитта ейтилған хәвәр бизниң күнлиримизгиму тегишлик. Һанухниң ейтқан хәвиригә мас, Йәһва Худа Нуһ пәйғәмбәрниң заманида топан сүйини әвәтип, дунияни вәйран қилған. Бу келәчәктә Худа рәзил дунияни йоқ қилидиғанлиғини көрситиду (Мәтта 24:38, 39; Петрусниң 2-хети 2:4—6). Шу вақитта болғандәк, келәчәктиму Худа көплигән пәриштилири билән бу рәзил дунияға һөкүм чиқириду. Шуңа һәрбиримизгә Һанухниң сөзлиригә қулақ селип, келәчәктә болидиған апәт һәққидә башқиларға ейтишимиз керәк. Бәлким бизниң туққанлиримиз вә достлиримиз бизгә қарши чиқидиғанду. Шуңа өзүмизни ялғуз қалғандәк һис қилишимиз мүмкин. Бирақ Йәһва Һанухни ялғуз ташлимиғандәк, бизниң күнлиримиздиму, У садиқ хизмәтчилирини ялғуз қоймайду.
18—24 ноябрь
ХУДА СӨЗИДИКИ ҒӘЗНӘ | ВӘҺИЙ 1—3
«Мән сениң ишлириңни билимән»
w12 10.15. 14-б., 8-абз.
Сизгә қандақ роһ тәсир қилиду?
8 Ақсақалларға қарши чиқмай, яман роһниң бизгә тәсир қилишиға йол қоймас үчүн, Әйсаниң «оң қолида йәттә юлтуз» барлиғини әстә тутушимиз керәк. «Юлтузлар» майланған ақсақалларни, шу җүмлидин һәммә җамаәтләрдики ақсақалларни өз ичигә алиду. Әйса қолида тутуватқан юлтузларға йетәкчилик қилишқа һоқуқи бар (Вәһ. 1:16, 20). Демәк, ақсақаллар кеңишиниң һәммиси җамаәт беши Әйсаниң нәзәри астида. Әгәр ақсақалларниң бирини түзитиш керәк болса, «көзлири отлуқ ялқундәк» болған Әйса буни көрүп, бурадәрни өз вақтида вә лайиқ түрдә түзитиду (Вәһ. 1:14). Шуңа буниң йүз беришидин авал биз муқәддәс роһ билән тәйинләнгәнләрни һөрмәтлишимиз керәк. Әлчи Паул мундақ дәп язған: «Араңларда өзлиригә рәһбәрлик алидиғанларға итаәтчан болуп, беқиниңлар, чүнки улар һесават бәргүчиләр болуп, силәрниң җанлириңлар һәққидә тохтимай ғәмхорлуқ қилмақта; буни улар уһ тартмай, хурсәнлик билән қилсун, болмиса бу силәргә зиян елип келиду» (Ибр. 13:17).
w12 4.15. 29-б., 11-абз.
Йәһва қутулдуруш үчүн бизни сақлайду
11 Вәһийләр китавиниң 2 вә 3-баплирида шан-шәрәпкә еришкән Әйса Кичик Асиядики йәттә җамаәтниң әһвалини тәкшүргәнлиги йезилған. Бу вәһийләрдин көрүмизки, Әйса пәқәт умумий әһвалини көрүпла қоймай, мәлум бир вәзийәтләрни байқиған. Һәтта у бәзилирини исимлири билән атап, һәрбир вәзийәттә қилған мәлум бир иши үчүн махтиған вә керәклик мәслиһәт бәргән. Бу немини испатлайду? Йәттә җамаәт 1914-жилдин кейин яшиған майланған мәсиһийләрни билдүриду. Бирақ йәттә җамаәткә берилгән мәслиһәтләр умумән йәр йүзидики һәммә җамаәтләргә қарита ейтилған. Хуласә чиқарсақ, Йәһва Оғли Әйса билән Өз хәлқини йетәкләватиду. Буниңдин пайда елиш үчүн немә қилишимиз керәк?
w01 1.15. 20-б., 20-абз.
Йәһваниң тәшкилати билән бир сәптә келиватимиз
20 Йәһваниң гүллинип алға бесиватқан тәшкилати билән бир сәптә болуш үчүн, Худа «җамаәтниң беши» қилип тәйинлигән Әйсаниң ролини етирап қилишимиз керәк (Әфәсликләргә 5:22, 23). Йәшая 55:4тә (КТ) немә дейилгәнлигигә диққәт ағдуруң: «Мана, Мән уни әл-жутларға гувачи сүпитидә, әл-жутларға йетәкчи һәм сәркәрдә сүпитидә тәқдим қилдим». Әйса һәқиқәтән һөкүмранлиқ қилишни яхши билиду. У өз қойлирини һәм уларниң ишлирини билиду. Мәсилән, у Кичик Асиядики җамаәтләрни тәкшүргәндә, бәш қетим «мән сениң ишлириңни билимән» дегән (Вәһий 2:2, 19; 3:1, 8, 15). Әйса Атисиға охшаш, бизниңму еһтияҗлиримизни билиду. У үлгилик дуасини қилиштин авал мундақ дегән: «Силәрниң Атаңлар, силәр соришиңлардин авал еһтияҗиңларни билиду» (Мәтта 6:8—13).
Роһий гөһәрләрни издәйли
kr 226-б., 10-абз.
Худа Падишалиғи дүшмәнлирини йоқ қилиду
10 Һөкүмниң җакалиниши. Худа Падишалиғиниң һәммә дүшмәнлири бир вақиәни өз көзи билән көрүшкә мәҗбур болуп, техиму көп һәсрәт чекиду. Әйса: «Шу чағда булутларда улуқ күч-қудрәт һәм шөһрәт билән келиватқан инсан Оғлини көриду»,— дәп ейтқан (Марк 13:26). Бу ғәйритәбиий күчләрниң көрүнүши Әйсаниң һөкүм чиқириш үчүн кәлгәнлигини көрситиду. Ахирқи күнләр тоғрилиқ башқа бир пәйғәмбәрлик сөзлиридә, Әйса бу һөкүм һәққидә тәпсилий ейтқан. Бу қойлар билән өшкиләр тоғрисидики тәмсил (Мәтта 25:31—33, 46-ни оқуң). Шу вақитта Худа Падишалиғиниң садиқ тәрәпдарлири «қойлар» дәп елан қилиниду. Улар қутқузулушқа аз қалғанлиғини чүшинип, башлирини көтириду (Луқа 21:28). Худа Падишалиғиға қарши чиққучилар болса, «өшкиләр» дәп елан қилиниду. Улар мәңгүгә йоқ қилинидиғанлиғини чүшинип, «қайғуруп, мәйдилиригә уриду» (Мәт. 24:30; Вәһ. 1:7).
w09 1.15. 31-б., 1-абз.
Вәһий китавидики пайдилиқ ой-пикирләр
2:7: «Худаниң җәннити» дегән немә? Гәрчә бу сөзләр майланғанларға қарита ейтилған болсиму, бу йәрдә җәннәт, чоқум җәннәт кәби асмандики макан, йәни Худаниң һузурини көрситиду. Садиқлиғини сақлап қалған майланғанлар «һаятлиқ дәриғиниң мевилирини» йәп, мукапатқа вә өлмәсликкә еришиду (Кор. 1-х. 15:53).
25-НОЯБРЬ — 1-ДЕКАБРЬ
ХУДА СӨЗИДИКИ ҒӘЗНӘ | ВӘҺИЙ 4—6
Йолға чиққан төрт чавандаз
wp17.03 4-б., 3-абз.
Төрт чавандаз кимләрни билдүриду?
Ақ атта олтарған ким? Вәһий китавида асмандики чавандаз «Худаниң Сөзи» дәп атилиду (Вәһий 19:11—13). «Сөз» дегән унван Әйсаға қаритилған, чүнки у Худаниң намидин сөзләйду (Йоһан 1:1, 14). Шундақла, Вәһий китавида у «Падишаларниң Падишаси», «Һакимларниң Һакимдари» вә Худаниң «садиқ вә һәқиқий гувачиси» дәп аталған (Вәһий 19:16). Көргинимиздәк, Әйса җәңчи падиша сүпитидә чоң һоқуққа егә болған вә у өз һоқуқини сүйистимал қилмайду. Бирақ бирнәччә соал пәйда болиду.
wp17.03 4-б., 5-абз.
Төрт чавандаз кимләрни билдүриду?
Чавандазлар қачан йолға атланди? Биринчи чавандаз Әйса асманда таҗни кийип, Падиша болғандин кейин йолға атланди (Вәһий 6:2). Бирақ Әйса қачан Падиша болған? Дәрру асманға көтирилгәндиму? Яқ. Муқәддәс китапта у асманға көтирилгәндин кейин бираз вақит өтүш керәклиги йезилған (Ибранийларға 10:12, 13). Әйса шагиртлириға шу вақитниң қачан түгигәнлигиниң вә асманда қачан Падиша болғанлиғиниң бәлгүлирини атап өткән. У һөкүмранлиқ қилишини башлиғанда, йәрдики әһвал дәрһал начарлишип, урушлар, ачарчилиқ вә жуқумлуқ кесәлләр болидиғанлиғини тилға алған (Мәтта 24:3, 7; Луқа 21:10, 11). 1914-жили Биринчи дуниявий уруш башлинип, көп өтмәй, «адәттин ташқири қийин вақитлар» башланғанлиғи ениқ көрүнди. Бу вақит Муқәддәс китапта «ахирқи күнләр» дәп аталған (Тимотийға 2-хәт 3:1—5).
wp17.03 5-б., 2-абз.
Төрт чавандаз кимләрни билдүриду?
Бу чавандаз урушларни билдүриду. Униңға «течлиқни» пәқәт бирнәччә хәлиқләрдин әмәс, пүткүл йәр йүзидин «елип кетишкә» һоқуқ берилди. 1914-жили тарихта биринчи қетим дуниявий уруш болған. Кейин униңдинму вәһший Иккинчи дуниявий уруш башланди. Бәзи һесаватларға асасланғанда 1914-жилдин башлап, урушлардин 100 миллиондин ошуқ адәм қаза болди вә көплигән адәмләрниң қәлбидә сақаймас җараһәтләрни қалдурди.
wp17.03 5-б., 4, 5-абз.
Төрт чавандаз кимләрни билдүриду?
«Қариведим, бир қара атни көрдүм. Атқа мингүчиниң қолида бир тараза бар еди. Төрт тирик мәхлуқниң арисидин: “Бир күнлүк иш һәққи үчүн пәқәт бир тавақ буғдай яки болмиса үч тавақ арпила берилиду. Зәйтун дәриғи билән үзүм ғолиға тәгмә!” дегәндәк бир авазни аңлидим» (Вәһий 6:5, 6, УМКҖ).
Бу чавандаз ачарчилиқни билдүриду. Айәттә озуқ-түлүкниң баһаси бәк жуқури болғанлиғи шунчә, бир тавақ (0,7 кг) буғдайни бир күнлүк иш һәққигә сетивелишқа болидиғанлиғи йезилған (Мәтта 20:2). Шундақла үч тавақ (2,1 кг) арпиниму бир күнлүк иш һәққигә сетивелишқа болатти. Шундақ шараитта чоң аилини қандақ тәминләшкә болиду? Пулни теҗәш үчүн, қедимий заманда асасий озуқ болған зәйтун мейи вә үзүм шаравидин баш тартишқа тоғра кәлгән.
wp17.03 5-б., 8—10 абз.
Төрт чавандаз кимләрни билдүриду?
Төртинчи чавандаз ағриқтин яки башқа сәвәптин болған өлүмни билдүриду. 1914-жилидин кейин испанка кесилидин онлиған миллион адәм һаятидин айрилди. Бу кесәлгә тәхминән 500 миллион адәм гириптар болған. Демәк, йәр йүзидики һәрбир үчинчи адәм ағриқ болған.
Бирақ бу пәқәт башлиниши еди. Бәзи һесаватларға асасланғанда, 20-әсирдә йүз миллион адәм чечәк (оспа) кесилигә гириптар болған. Шуңа бүгүнки күндә тиббий тәрәққий әткән болсиму, миллионлиған адәм әйдиз (СПИД), сил вә бәзгәк кесилидин вапат болмақта.
Урушлар, ачарчилиқ вә җуқумлуқ кесәлләрниң нәтиҗиси — өлүм. Гөр-қәбирә рәһимсизлик билән зиянкәшликкә учриғучиларни өзигә жиғип, кишиләрни үмүтсиз қоймақта.
Роһий гөһәрләрни издәйли
re 76-б., 8-абз.
Йәһваниң асмандики улуқ тәхти
8 Әлчи Йоһан қедимий заманда муқәддәс чедирда хизмәт қилиш үчүн роһанийларниң тәйинләнгәнлигини билгән. Шуңа у вәһий көргәндә һәйран қалған болуши керәк: «Тәхтниң әтрапида йәнә 24 тәхт туратти, тәхтләрдә ақ кийимләр вә башлириға алтун таҗ кийгән 24 ақсақал олтириду» (Вәһий 4:4). Демәк, роһанийларниң орниға тәхтләрдә бешиға таҗ кийгән 24 ақсақаллар олтарған. Бу ақсақаллар кимләр? Улар асмандики һаятқа тирилдүрүлгән һәм Йәһва вәдә қилған чоң орунларни егилигән майланғанлар. Биз буни қәйәрдин билимиз?
re 80-б., 19-абз.
Йәһваниң асмандики улуқ тәхти
19 Мәхлуқлар кимләрни билдүриду? Бу соалниң җававини Әзәкиял пәйғәмбәрниң көргән вәһийидин биләләймиз. Әзәкиял асмандики һарвуда олтарған Йәһвани һәм униң йенида болған мәхлуқларни тәсвирлигән. Йоһанму шуниңға охшаш вәһий көргән (Әзәкиял 1:5—11, 22—28). Кейинирәк Әзәкиял йәнә бир қетим вәһийдә шу һарвуни көргән вә униң қешида мәхлуқлар болған. Амма у бу мәхлуқларни керублар дәп атиған (Әзәкиял 10:9—15). Йоһан көргән бу йоған төрт мәхлуқ Худаниң асмандики тәшкилатида чоң дәриҗигә егә болған көплигән керубларни билдүриду. Қедимий заманда чедирда Йәһваниң тәхтини билдүридиған келишим сандуғиниң ағзиниң үстидә икки алтун керуб орунлаштурулған еди. Шу сәвәптин керубларниң Йәһваға бәк йеқин турғанлиғи Йоһанни һәйран қалдурмиған. Бу керубларниң арисидин әмирләрни бериватқан Йәһваниң авази аңлинип туратти (Чиқиш 25:22; Зәбур 80:1).
cf 36-б., 5, 6-абз.
Йәһуданиң қәбилисидин чиққан Шир
5 Ширлар адәттә қорқумсиз вә күчлүк. Сиз шир билән үзму-үз учрашқанму? Бәлким уни һайванатлар бағчисида сизни шир билән айрип туридиған тосақта учратқансиз. Амма буниңға қаримастин, шундақ вәзийәттә жүригиңиз дүпүлдәп, тениңиз шүркинип кетидиғанду. Бу йоған, күчлүк һайванниң көзигә қариғиниңизда, у сизгиму тиклинип қарап турғинини көрсиңиз, униң бирәр нәрсидин қорқуп қачқинини тәсәввур қилиш мүмкин әмәс. Муқәддәс китапта: «Һайванлар арисидики әң қувәтлиги — ширдур вә у һечкимдин чекинмәйду»,— дәп йезилған (Пәнд-нәсиһәтләр 30:30). Әйса ширға охшаш җасур болған.
6 Әнди Әйсаниң үч вәзийәттә, йәни һәқиқәтни һимайә қилғанда, адаләтликни орнатқанда вә қаршилиқларға дуч кәлгәндә ширға хас җасурлуқни қандақ көрсәткәнлигини көрүп бақайли. Һәрбиримиз туғулуштин җасур болуш яки болмаслиққа қаримастин, Әйсадин үлгә елип җасур болуш үчүн немә қилиш керәклигини билимиз.