Йәрни мирас елишқа тәйярмусиз?
ҺӘММИМИЗ Әйсаниң «Мулайимлар бәхитлик, чүнки улар йәрниң мирасхорлири болиду» дегән вәдисиниң әмәлгә ешишини тәқәзалиқ билән күтиватимиз (Мәт. 5:5). Майланғанлар асманда падишалар болуп, Әйса Мәсиһ билән бирликтә һөкүмранлиқ қилғанда йәр йүзини мирас алиду (Вәһ. 5:10; 20:6). Худаниң һәқиқий хизмәтчилириниң көпинчиси йәр йүзини мирас елип, мукәммәл һаләттә, теч-аманлиқ, шат-хорамлиқ ичидә мәңгү яшашни төрт көзи билән күтиватиду. Шундақ яшаш имканийитигә еришиш үчүн, улар муһим хизмәтни қилиши керәк. Мәсилән, улар йәрни җәннәткә айландуруши, тирилгәнләрниң еһтияҗлирини тәминләп бериши вә уларға тәлим бериши лазим. Биз бу ишларға қатнишишни халайдиғанлиғимизни һазирниң өзидә қандақ көрситәләйдиғанлиғимизни көрүп бақайли.
ЙӘРНИ ҖӘННӘТКӘ АЙЛАНДУРУШҚА ТӘЙЯРМУСИЗ?
Пәрвәрдигар Йәһва адәмләргә: «Йәр йүзини толтуруңлар, уни асраңлар»,— дегәндә, пүтүн йәр йүзини аста-аста җәннәткә айландурушни буйриған (Ярит. 1:28). Худаниң әсли нийәт-мәхситини әнди йәрни мирас алидиғанлар әмәлгә ашуралайду. Улар һәммини бешидин башлайду, чүнки һазир Ерәм беғи йоқ. Армагедондин кейин уларға йәр йүзиниң вәйран қилинған җайлирини тазилашқа тоғра келиду. Буниң үчүн көп күч чиқирип ишләш керәк!
Бабилдин жутиға қайтқан исраилларғиму буниңға охшаш бир иш тапшурулған. Уларниң жутида 70 жил адәм яшимиған еди. Лекин Йәшая пәйғәмбәр улар Йәһваниң ярдимидә жут-маканини әслигә кәлтүрәләйдиғанлиғини алдин-ала ейтқан еди. Бәшарәттә шундақ дейилгән: «У чоқум униң җаңгаллирини Ерән бағчисидәк, униң чөл-баяванлирини Пәрвәрдигарниң беғидәк қилиду» (Йәшая 51:3, КТ). Исраиллар Йәһваниң ярдимидә гөзәл жут-маканини қуруп чиқалиған еди. Кәлгүсидә йәрни мирасқа алидиғанларму охшашла Йәһва Худаниң ярдими билән йәр йүзини гөзәл җәннәткә айландуралайду. Сиз бу ишқа қатнашмақчи болғанлиғиңизни һазир көрситәләйсиз.
Мәсилән, өйүңизни вә өйүңизниң өп-чөрисини пакиз-рәтлик вә сәрәмҗан туталайсиз. Хошнилириңиз пакизлиқни анчә яхши көрмисиму, өз адитиңизни ташлимаң. Шундақла Ибадәт өйи вә Конгресслар сарийини асраш вә пакиз тутуш ишлириға қатнишиң. Әгәр мүмкинчилигиңиз болса, сизниң райониңиздики тәбиий апәткә учриғанларға ярдәм бериш үчүн пидаий хизмәтчи болуш илтимасини толдуруң. Шу чағдила, қериндашлар керәк болғанда сизниң ярдәм қолуңизни сунушқа тәйяр екәнлигиңизни билиду. Ойлинип көрүң: «Әгәр йәрни мирас алсам, қандақ ярдәм беришим мүмкин? Бәзи һүнәр яки маһарәтләрни һазир үгинәләймәнму?»
ТИРИЛГӘНЛӘРГӘ ЯРДӘМ БЕРИШКӘ ТӘЙЯРМУСИЗ?
Әйса Яирниң қизини тирилдүргәндин кейин дәрһал униңға тамақ беришни ейтқан (Марк 5:42, 43). Әлвәттә, 12 яшлиқ қизни қосуғини тойдуруш қийин әмәс. Амма ойлап көрүң, «хатирә қәбирләрдики һәммиси» Әйсаниң авазини аңлап, қәбирдин чиққанда, иш қанчилик көп болиду! (Йоһ. 5:28, 29). Муқәддәс китапта бу вақит тоғрилиқ нурғун тәпсилатлар болмисиму, тирилдүрүлгәнләрниң йәйдиған тамақ, туридиған җай, кийидиған кийим-кечәккә еһтияҗи болидиғанлиғи шәк-шүбһисиздур. Уларға ярдәм беришкә тәйяр екәнлигиңизни һазирниң өзидә көрситәләмсиз? Мошу нәрсиләр һәққидә ойлинип көрүң.
Йәрни мирас елишқа тәйяр екәнлигиңизни бүгүн қандақ көрситәләйсиз?
Районға җавапкар ақсақал җамаитиңизгә келидиғанлиғини елан қилғанда, уни чүшлүк тамаққа чақираламсиз? Бәйтәлдин мәхсус толуқ вақитлиқ хизмәтчи сизниң җамаитиңизгә тәйинләп әвәтилсә яки районға җавапкар ақсақал хизмитини ахирлаштурса, уларниң туридиғанға җай тепишиға ярдәм берәләмсиз? Сиз туридиған җайда регионлуқ яки мәхсус конгресс өткүзүлмәкчи болса, конгресстин бурун яки униңдин кейин пидаий болуп хизмәт қилаламсиз? Яки болмиса, кәлгән қериндашларни қарши елишқа ярдәм берәләмсиз?
ТИРИЛГӘНЛӘРГӘ ТӘЛИМ БЕРИШКӘ ТӘЙЯРМУСИЗ?
Әлчиләр 24:15-айәткә асасланғанда, биз миллиардлиған адәмләр тирилиду дәп үмүт қилимиз. Уларниң арисида Һәқ Худа Йәһва тоғрилиқ билмәйдиғанлар көп болиду. Шу чағда улар һәқиқәт тоғрисида билим елиш пурситигә еришидуa. Йәһваниң садиқ, тәҗрибилик хизмәтчилири уларға тәлим бериду (Йәшая 11:9). Европа, Җәнубий Америка вә Африкида хизмәт қилған Шарлот исимлиқ қериндаш бу вақитни төрт көзи билән күтиватиду. У мундақ дәйду: «Тирилдүрүлгәнләргә тәлим беридиған вақитни тәқәзалиқ билән күтиватимән. Қедимда яшиған бири тоғрилиқ оқуғанда, бу киши Йәһвани билгән болсиғу, һаяти тамамән башқичә болған болатти дәп ойлаймән. Мән тирилгәнләргә Яратқучи Йәһвани тонуп, Униңға хизмәт қилса, һаятиниң қанчилик әһмийәтлик өтидиғанлиғини ейтип беришкә тәшна!»
Һәтта Әйсаниң заманидин бурун яшиған Худаниң садиқ хизмәтчилири көп нәрсиләрни үгинишкә тоғра келиду. Мәсилән, Даниял пәйғәмбәргә өзи язған, лекин ахириғичә чүшәнмигән бәшарәтләрниң қандақ әмәлгә ашқанлиғини ейтип бериш немә дегән чоң шан-шәрәп! (Дан. 12:8) Яки Рут билән Наомиға уларниң әвладидин вәдә қилинған Мәсиһ чиққанлиғини ейтип бериш кишини бәк һаяҗанландуриду! Шу чағда биз бу рәзил дунияниң бесимиға учримай, шат-хорамлиқ ичидә пүтүн йәр йүзидә тирилдүрүлгәнләргә тәлим-тәрбийә беримиз. Бундинму артуқ хошаллиқ болмас кишигә!
Бу тәлим-тәрбийә ишлириға қатнишиш үчүн һазирдин башлап қандақ тәйярлиқ қилалайсиз? Бир йоли — тәлим бериш маһаритиңизни ашуруш вә дунияниң җай-җайлирида елип бериливатқан вәз ейтиш хизмитигә дайим қатнишиш (Мәт. 24:14). Һазирқи вәзийитиңиз яки йешиңиз сәвәплик, бу ишқа толуқ қатнишишқа имканийитиңиз яр бәрмисә, қолуңиздин кәлгиничә хизмәт қилишқа тиришиң, бу сизниң тирилгәнләргә тәлим беришкә тәйяр екәнлигиңизни көрситиду.
Ундақта, сиз һәқиқәтән йәрни мирас алидиған вақитни тәшналиқ билән күтүватамсиз? Йәрни җәннәткә айландуруп, тирилгәнләрниң еһтияҗлирини тәминләп, уларға тәлим беришкә тәққазармусиз? Йәрни мирасқа алғанда қилмақчи болған ишларни һазирдин башлап қилишни үгәнсәк, шу вақитқа өзүмизниң тәйяр екәнлигини көрситимиз.
a «Күзитиш мунариниң» 2022-жил, сентябрь санидики «Кишиләргә тоғра йолни көрситиңлар» намлиқ мақалигә қараң.