كىرىش سۆز
پەرۋەردىگار يەھۋانىڭ سۆيۈملۈك خىزمەتچىسى:
ھەزرىتى ئەيسا: «ھەقىقەتنى بىلىسىلەر ۋە ھەقىقەت سىلەرنى ئەركىنلىككە ئېرىشتۈرىدۇ»، دېگەن (يۇھاننا 8:32). بۇ نەقەدەر ئىلھامبەخش ئېتىدىغان سۆزلەر، ھە! گەرچە «ئاخىر زاماندا» ئېغىر كۈنلەر بولۇپ، دۇنيا يالغان- ياۋىداق سۆزلەرگە تولغان بولسىمۇ، ئەمما ھەقىقەتنى بىلىشكە ئىمكانىيەت بار (2-تىموتىي 3:1). دەسلىپىدە خۇدا سۆزىنى ھەقىقەت، دەپ تونۇپ يەتكىنىڭىزدە، قانداق ھېسسىياتتا بولغانلىقىڭىز ھېلىھەم يادىڭىزدىمۇ؟ خۇشاللىققا چۆمگەن ئاشۇ چاغلارنى ئۇنتۇش مۇمكىن ئەمەس، ئەلۋەتتە!
بىراق، ھەقىقەت توغرىسىدا توغرا بىلىمگە ئىگە بولۇش ۋە ئاشۇ ھەقىقەت توغرىسىدا دائىم باشقىلارغا ۋەز ئېيتىش مۇھىم بولغىنىدەك، بىزنىڭ چوقۇم ھەقىقەتكە ئۇيغۇن ئىش-ھەرىكەت قىلىشىمىز بەكمۇ مۇھىم. شۇنداق قىلىش ئۈچۈن، بىزنىڭ خۇدانىڭ مېھىر-مۇھەببىتى ئىچىدە ياشىشىمىز زۆرۈر. ئۇنداقتا، قانداق قىلىپ خۇدانىڭ مېھىر-مۇھەببىتى ئىچىدە ياشىيالايمىز؟ مۇشۇ سوئالغا ھەزرىتى ئەيسانىڭ ئۆلۈشتىن ئىلگىرىكى ئاخشىمى قىلغان سۆزلىرى جاۋاب بېرىدۇ. ئۇ، ئۆز ساداقەتمەن ئەلچىلىرىگە مۇنداق دېگەن: «ئەمرلىرىمگە ئەمەل قىلساڭلار، خۇددى مەن ئاتامنىڭ ئەمرلىرىگە ئەمەل قىلغان ۋە ھەمىشە ئۇنىڭ مېھىر-مۇھەببىتىدە بولغىنىمدەك، سىلەرمۇ ھەمىشە مېنىڭ مېھىر-مۇھەببىتىمدە بولىسىلەر». — يۇھاننا 15:10.
دىققەت قىلسىڭىز، ئەيسا مەسىھ ئۆز ئاتىسى يەھۋانىڭ ئەمرلىرىگە بويسۇنۇپ، ئۇنىڭ مېھىر-مۇھەببىتىدە بولغان. بۈگۈنكى كۈندە بىزمۇ شۇنداق قىلىشىمىز لازىم. بىز خۇدانىڭ مېھىر-مۇھەببىتى ئىچىدە ياشاش ئۈچۈن مۇقەددەس كىتاب ھەقىقىتىنى كىشىلىك تۇرمۇشىمىزغا ئەمەلىي تەتبىقلاپ ياشىشىمىز زۆرۈر. ئاشۇ ئاخشىمى ئەيسا يەنە مۇنداق دېگەن: «بۇ ئىشلارنى بىلگەنىكەنسىلەر، سىلەرمۇ شۇنداق قىلساڭلار، نەقەدەر بەختلىكسىلەر!». — يۇھاننا 13:17.
شۇنى چىن دىلىمىزدىن ئۈمىد قىلىمىزكى، ئۇشبۇ كىتاب سىزنىڭ داۋاملىق مۇقەددەس كىتاب ھەقىقىتىنى كىشىلىك تۇرمۇشىڭىزغا تەتبىقلاپ، «مەڭگۈلۈك ھاياتقا» ئېرىشىش ئۈچۈن «خۇدانىڭ مېھىر-مۇھەببىتى ئىچىدە» ياشىشىڭىزغا ياردەم بەرگەي! — يەھۇدا 21.
يەھۋا گۇۋاھچىلىرىنىڭ يېتەكچى كېڭەش ئەزالىرى