ئېسىڭىزدە بارمۇ؟
سىز بۇ يىلقى «كۈزىتىش مۇنارى» ژۇرناللىرىنى كۆڭۈل قويۇپ ئوقۇدىڭىزمۇ؟ تۆۋەندىكى سوئاللارغا جاۋاب بېرەلەمسىز؟
ياراتقۇچى يەھۋا بىلەن سۆزلىشىپ، ئۇنى تىڭشاپ ۋە ئۇ توغرۇلۇق چوڭقۇر ئويلىنىشقا ۋاقىت چىقارساق، قانداق بەرىكەتلەرگە ئېرىشىمىز؟
بىز توغرا قارارلارنى چىقىرىمىز، ياخشى تەلىم بەرگۈچى بولىمىز ۋە ئىمان-ئېتىقادىمىز كۈچىيىپ، يەھۋاغا بولغان سۆيگۈ-مۇھەببىتىمىز چوڭقۇرلىشىدۇ.—كم01.22، 30، 31-ب.
يەھۋاغا ۋە ئۇ ئىشىنىپ مەسئۇلىيەتنى تاپشۇرغان قېرىنداشلارغا ئىشىنىشنى ئۆگەنسەك، بۇنىڭ بىز ئۈچۈن قانداق پايدىسى بار؟
ھازىر ئاقساقاللارنىڭ كۆرسەتمىلىرى ۋە قارارلىرىدىن گۇمانلانماي، يەھۋانىڭ ئىش قىلىش ئۇسۇلىنىڭ توغرىلىقىغا ئىشىنىشنى ئۆگىنىدىغان ۋاقىت. شۇنداق بولغاندا، چوڭ بالايىئاپەت كەلگەندە، بىزگە بېرىلىدىغان يول-يۇرۇقلار ھېچ ئەقىلگە مۇۋاپىق ئەمەستەك كۆرۈنسىمۇ، ئۇلارغا بويسۇنۇش قىيىن بولمايدۇ.—كم02.22، 4–6-ب.
پەرىشتىنىڭ ھاكىم زەرۇبابىلنىڭ قولىدىكى تىك ئۆلچەم تېشى توغرۇلۇق ئېيتقان سۆزلىرى نېمىنى بىلدۈرىدۇ؟ (زەكەرىيا 4:8–10)
بۇ ۋەھىي گەرچە ئىبادەتخانا ئاددىيدەك كۆرۈنسىمۇ، ئاخىرىغىچە سېلىنىدىغانلىقىنى ۋە يەھۋانىڭ ھەققانىي ئۆلچەملىرىگە ماس كېلىدىغانلىقىنى كۆرسەتكەن.—كم03.22، 16، 17-ب.
بىز سۆزلىرىمىزدە باشقىلارغا قانداق ئۈلگە بولالايمىز؟ (1-تىموت. 4:12)
بىز ۋەز خىزمىتىدە مېھرىبانلىق ۋە ئىززەت-ھۆرمەت بىلەن سۆزلەيمىز، جامائەت يىغىلىشلىرىدا چىن يۈرەكتىن مەدھىيە ناخشىلىرىنى ئېيتىمىز، دائىم جاۋابلارنى بېرىپ تۇرىمىز ۋە ھەرقاچان راست سۆزلەپ، باشقىلارنى ھاقارەتلەيدىغان ئەمەس، بەلكى ئىلھام-مەدەت بېرىدىغان سۆزلەرنى قىلىمىز.—كم04.22، 6–9-ب.
دانىيال 7-بابتىكى تۆت ۋەھشىي ھايۋان ياكى پادىشاھلىقنىڭ ئالاھىدىلىكلىرى نېمە ئۈچۈن ۋەھىيلەر 13:1، 2-ئايەتلەردە، بىر ھايۋاندا ئىپادىلەنگەن؟
ۋەھىيلەر 13-بابتىكى ھايۋان رىمغا ئوخشاش بىرلا پادىشاھلىقنى بىلدۈرمەيدۇ. ئەكسىچە، ئىنسانىيەتكە ھۆكۈمرانلىق قىلىپ كېلىۋاتقان ھەممە سىياسىي كۈچلەرگە سىمۋوللۇق قىلىنىدۇ.—كم05.22، 9-ب.
خۇدانىڭ ئادىللىقىغا ئىشىنىدىغانلىقىمىزنى كۆرسىتىشنىڭ ئەڭ ئاساسىي يولى قانداق؟
بىرسى بىزنى ھاقارەتلىسە، خاپا قىلسا ياكى بىزگە قارشى گۇناھ قىلسا، ھەممىنى يەھۋانىڭ قولىغا تاپشۇرۇپ، ئاچچىقلانمايمىز ۋە ئۆچ-ئاداۋەت ساقلىمايمىز. يەھۋا گۇناھ سەۋەبلىك پەيدا بولغان بارلىق يامانلىقنى يوق قىلىدۇ.—كم06.22، 10، 11-ب.
جامائەتنىڭ نامىدىن دۇئا قىلغان بۇرادەر نېمىنى ئەستە ساقلىشى كېرەك؟
دۇئا جامائەتتىكىلەرگە نەسىھەت بېرىش ياكى ئۇقتۇرۇشلارنى قىلىش ئۈچۈن ئېيتىلمايدۇ. دۇئا قىلىدىغان بۇرادەر بولۇپمۇ يىغىلىشنىڭ بېشىدا كۆپ سۆزلەپ كېتىشتىن پەخەس بولۇشى لازىم (مەتتا 6:7).—كم07.22، 24، 25-ب.
قايسى مەنىدە «يامانلىق قىلغانلار ھۆكۈم ئۈچۈن تىرىلدۈرۈلىدۇ؟» (يۇھاننا 5:29)
ئۇلار ئۆلۈشتىن بۇرۇن قىلغان ئىش-ھەرىكەتلىرىگە ئاساسەن سوتلانمايدۇ. ئۇلار كەلگۈسىدە تىرىلگەندىن كېيىن قىلغان ئىشلىرى ۋە كۆزقارىشىغا ئاساسەن ھۆكۈم قىلىنىدۇ.—كم09.22، 18-ب.
ج. ف. رۇتېرفورد 1922-يىل، سېنتەبىردە ئۆتكۈزۈلگەن چوڭ يىغىلىشتا قاتناشقۇچىلارنى قانداق مۇھىم ئىشنى قىلىشقا ئۈندىگەن؟
سىدار-پوينتتا (ئوخايو شتاتى، ئامېرىكا) ئۆتكۈزۈلگەن چوڭ يىغىلىشتا، ئۇ: «مانا، پادىشاھ ھۆكۈمرانلىق قىلماقتا. بىز ئۇنىڭ ۋەكىللىرى. شۇڭا، پادىشاھنى ۋە ئۇنىڭ پادىشاھلىقىنى جاكارلاڭلار، جاكارلاڭلار، جاكارلاڭلار!»— دېگەنىدى.—كم10.22، 3–5-ب.
يەشايا 30-بابتا يېزىلغاندەك، يەھۋا قىيىنچىلىقلارغا قارشى تۇرۇشىمىزغا قانداق ئۈچ ئۇسۇلدا ياردەم بېرىدۇ؟
بۇ بابتا يەھۋا (1) دۇئالىرىمىزنى تىڭشاپ، جاۋاب بېرىدىغانلىقى، (2) بىزنى يېتەكلەيدىغانلىقى، (3) ھازىر ۋە كېلەچەكتە بىزنى بەرىكەتلەيدىغانلىقى ھەققىدە ئېيتىلغان.—كم11.22، 9-ب.
نېمە ئۈچۈن زەبۇر 37:10، 11-ئايەتلەردىكى بېشارەتلىك سۆزلەر قەدىمدە ئەمەلگە ئاشۇرۇلدى ۋە كېلەچەكتىمۇ ئەمەلگە ئاشىدۇ دېيەلەيمىز؟
داۋۇتنىڭ بۇ سۆزلىرى ئىسرائىل خەلقى بەرىكەتكە ئېرىشكەن سۇلايمان پادىشاھ زامانىدىكى تىنچلىق-خاتىرجەملىكنى كۆرسىتىدۇ. ئەيسا مەسىھ بولسا، 11-ئايەتنى كەلتۈرۈپ، كەلگۈسى جەننەت توغرۇلۇق ئېيتقان (مەتتا 5:5؛ لۇقا 23:43).—كم12.22، 8–10، 14-ب.