49-تەتقىق ماقالىسى
يەھۋا دۇئالىرىمغا جاۋاب بېرەمدۇ؟
«سىلەر مېنى چاقىرىسىلەر، كېلىپ ماڭا دۇئا قىلىسىلەر ۋە مەن سىلەرگە قۇلاق سالىمەن».—يەرەم. 29:12.
6-ناخشا خۇدا خىزمەتچىسىنىڭ دۇئاسى
بۇ ماقالىدە:a
1، 2. نېمە ئۈچۈن يەھۋا دۇئالىرىمىزغا جاۋاب بەرمەيدۇ دەپ ئويلىشىمىز مۇمكىن؟
«سەن شاد-خۇراملىقنى يەھۋادىن ئىزدە، شۇندا ئۇ كۆڭلۈڭدىكى ئارزۇ-ئارمانلىرىڭنى ئاشۇرار ئەمەلگە» (زەبۇر 37:4). بۇ نەقەدەر كىشىگە خۇشاللىق بېغىشلايدىغان ۋەدە-ھە! بىز دۇئادا خۇدادىن سورىغان نەرسىلەرنىڭ ھەممىسىگە ئېرىشىمىز دەپ ئۈمىد قىلىشىمىز كېرەكمۇ؟ بۇ سوئال نېمە ئۈچۈن بەك مۇھىم؟ بىر قانچە مىساللارنى كۆرۈپ باقايلى. توي قىلمىغان بىر قېرىنداش پادىشاھلىق ۋەز ئېيتقۇچىلىرىنى تەربىيىلەش مەكتىپىدە ئوقۇش توغرۇلۇق دۇئا قىلىدۇ. ئەمما، بىر نەچچە يىل ئۆتۈپ كەتكەن بولسىمۇ، ئۇ تېخىغىچە مەكتەپكە تەكلىپ قىلىنمىغان. بىر ياش بۇرادەر جامائەتتە كۆپرەك خىزمەت قىلىش ئۈچۈن كېسىلىدىن ساقىيىپ كېتىشىنى يەھۋادىن دۇئادا سورايدۇ. ئەمما، ئۇنىڭ سالامەتلىكى ياخشىلىنىشقا قاراپ ئۆزگەرمەيدۇ. ئاتا-ئانا بالىسىنىڭ ھەقىقەتتە قېلىشى ئۈچۈن دۇئا قىلىدۇ. بىراق، بالىسى يەھۋا خۇداغا خىزمەت قىلىشنى توختىتىدۇ.
2 بەلكىم، سىزمۇ يەھۋاغا مەلۇم بىر ئىش ئۈچۈن دۇئا قىلىپ كېلىۋاتىسىز، بىراق دۇئالىرىڭىز جاۋابسىز قالماقتا. بۇنىڭدىن يەھۋا باشقىلارنىڭ دۇئاسىغا جاۋاب بېرىپ، سىزنىڭ دۇئالىرىڭىزغا جاۋاب بەرمەيدۇ دەپ خۇلاسە چىقىرىشىڭىز مۇمكىن. جەنېسb ئىسىملىك بىر قېرىنداش دەل شۇنداق ھېس-تۇيغۇدا بولغان. ئۇ يولدىشى بىلەن بەيتەلدە خىزمەت قىلىش ئارزۇ-ئىستىكى توغرۇلۇق يەھۋاغا دۇئا قىلغان. ئۇ مۇنداق دەيدۇ: «مەن پات-يېقىندا بەيتەلدە خىزمەت قىلىدىغانلىقىمىزغا ئىشەنگەن ئىدىم». ئەمما، ئايلار ئۆتتى، يىللار ئۆتتى، ئۇلار بەيتەلگە تەكلىپ قىلىنمىدى. جەنېس مۇنداق دەيدۇ: «كۆڭلۈم يېرىم بولۇپ، گاڭگىراپ قالدىم. مەن يەھۋانى ئۈمىدسىزلەندۈرىدىغان بىرەر ئىش قىلىپ قويدۇممۇ دەپ ئويلىدىم. مەن بەيتەلدە خىزمەت قىلىش توغرۇلۇق ئېنىق دۇئا قىلدىم. ئۇ نېمە ئۈچۈن دۇئايىمغا جاۋاب بەرمىدى؟»
3. بۇ ماقالىدە نېمىلەرنى مۇھاكىمە قىلىمىز؟
3 بەزى ۋاقىتلاردا، يەھۋا دۇئالىرىمىزنى ئاڭلاۋاتامدىغاندۇ دەپ ئەنسىرىشىمىز مۇمكىن؟ ھەتتا قەدىمقى زاماندا بەزى سادىق خىزمەتچىلەرمۇ شۇنداق ئويلىغان (ئايۇپ 30:20؛ زەبۇر 22:2؛ ھاباق. 1:2). يەھۋانىڭ دۇئالىرىڭىزغا جاۋاب بېرىدىغانلىقىغا سىزنى نېمە قايىل قىلالايدۇ؟ (زەبۇر 65:2) مۇشۇ سوئالغا جاۋاب بېرىش ئۈچۈن تۆۋەندە بىرقانچە سوئاللارنى مۇھاكىمە قىلىپ چىقىمىز: (1) بىز يەھۋادىن نېمىلەرنى كۈتىمىز؟ (2) يەھۋا بىزدىن نېمىنى كۈتىدۇ؟ (3) نېمە ئۈچۈن بەزى ئارزۇ-تىلەكلىرىمىزنى ئۆزگەرتىشىمىز كېرەك؟
بىز يەھۋادىن نېمىنى كۈتىمىز؟
4. يەرەمىيا 29:12-ئايەتكە ئاساسەن، يەھۋا نېمە قىلىشقا ۋەدە بېرىدۇ؟
4 يەھۋا دۇئالىرىمىزغا قۇلاق سالىدىغانلىقىنى ۋەدە قىلغان (يەرەمىيا 29:12-نى ئوقۇڭ). خۇدا ئۆزىنىڭ ساداقەتمەن خىزمەتچىلىرىنى ياخشى كۆرىدۇ ۋە ئۇلارنىڭ دۇئالىرىغا ھەرگىزمۇ بىپەرۋالىق قىلمايدۇ (زەبۇر 10:17؛ 37:28). بىراق، بۇ ھەرگىزمۇ بارلىق ئارزۇ-تىلەكلىرىمىزنى ئەمەلگە ئاشۇرىدىغانلىقىنى بىلدۈرمەيدۇ. بىز سورىغان بەزى نەرسىلەرنىڭ جاۋابىغا ئېرىشىشتىن بۇرۇن، يېڭى دۇنيانىڭ كېلىشىنى ساقلىشىمىزغا توغرا كېلىدۇ.
5. يەھۋا دۇئالىرىمىزنى ئاڭلىغاندا، نېمىلەرگە دىققەت ئاغدۇرىدۇ؟ چۈشەندۈرۈپ بېرىڭ.
5 يەھۋا ئارزۇ-تىلەكلىرىمىزنىڭ، ئۇنىڭ ئىرادىسى بىلەن قانداق باغلىنىشى بارلىقىغا كۆڭۈل بۆلىدۇ (يەشايا 55:8، 9). خۇدانىڭ ھۆكۈمرانلىقى ئاستىدا ئادەملەرنىڭ يەردە بەختلىك ياشىشى ئۇنىڭ ئىرادىسىنىڭ بىر قىسىمى. ئەمما، شەيتان ئىنسانلار ئۆز-ئۆزىنى باشقۇرسا، تېخىمۇ خۇشال-خۇرام بولىدىغانلىقىنى جاكارلىغان (يارىت. 3:1–5). ئىبلىسنىڭ بۇ تەشەببۇسى يالغان ئىكەنلىكىنى ئىسپاتلاش ئۈچۈن، يەھۋا ئىنسانلارنىڭ ئۆز-ئۆزىگە ھۆكۈمرانلىق قىلىشىغا يول قويغان. بىراق، ئىنسانلارنىڭ ھۆكۈمرانلىقى بۈگۈن دۇچ كېلىۋاتقان نۇرغۇن قىيىنچىلىقلارنى كەلتۈرۈپ چىقارغان (ۋەز 8:9). ياراتقۇچى يەھۋا نېمە ئۈچۈن دەل ھازىر قىيىنچىلىقلىرىمىزنىڭ ھەممىسىنى يوق قىلمايدىغانلىقىنى چۈشىنىمىز. ئەگەر ئۇ يوق قىلسا، بەزىلەر ئىنسانلار ئۆز-ئۆزىگە ھۆكۈمرانلىق قىلالايدۇ ۋە ئىنسانىيەتنىڭ قىيىنچىلىقلىرىنى ئۆزلىرى ھەل قىلالايدۇ دەپ يەكۈن چىقىرىشى مۇمكىن.
6. نېمە ئۈچۈن يەھۋا دائىم سۆيگۈ-مۇھەببەت ۋە ئادالەت بىلەن جاۋاب قايتۇرىدىغانلىقىغا ئىشىنىشىمىز كېرەك؟
6 يەھۋا ئوخشاش ئارزۇ-تىلەكلەرگە تۈرلۈك يوللار بىلەن جاۋاب قايتۇرۇشى مۇمكىن. مەسىلەن، پادىشاھ ھىزقىيا ئېغىر كېسەل بىلەن ئاغرىغاندا، يەھۋاغا دۇئا قىلىپ، كېسىلىدىن ساقىيىپ كېتىشكە ياردەم بېرىشنى ئۆتۈنگەن. يەھۋا ئۇنىڭ دۇئاسىغا جاۋاب بېرىپ، ئۇنى ساقايتقان (2-پادىشاھ. 20:1–6). ئەلچى پاۋلۇس يەھۋادىن تېنىدىكى «تىكەن»نى ئېلىۋېتىشنى ئۆتۈنگەن. بەلكىم، بۇ جىسمانىي جەھەتتىكى بىر كېسەل بولغان. لېكىن، يەھۋا ئۇنى ساقايتمىغانىدى (2-كورىنت. 12:7–9). ئەلچى ياقۇپ بىلەن پېترۇسنىڭ مىسالىنى كۆرۈپ باقايلى. پادىشاھ ھىرود ئۇلارنىڭ ئىككىلىسىنى ئۆلتۈرۈشىنى خالىغان. جامائەتتىكىلەر ھەر ئىككىلىسى ئۈچۈن دۇئا قىلغان. لېكىن، ياقۇپ ئۆلتۈرۈلگەن، پېترۇس بولسا مۆجىزىلىك يول بىلەن قۇتقۇزۇلغان (ئەلچى. 12:1–11). بىز بەلكىم، «يەھۋا نېمىشقا پېترۇسنى قۇتقۇزىدۇ، لېكىن ياقۇپنى قۇتقۇزمايدۇ؟» دەپ ئويلىشىمىز مۇمكىن. مۇقەددەس كىتابتا بۇ توغرۇلۇق ھېچنېمە دېيىلمىگەنc. بىراق، بىز شۇنىڭغا ئىشىنەلەيمىزكى، يەھۋانىڭ « يوللىرى ئادالەتلىكتۇر» (تەكرار. قا 32:4). بىز يەھۋا خۇدانىڭ پېترۇس ۋە ياقۇپ ھەر ئىككىسىنى ياخشى كۆرگەنلىكىنى بىلىمىز (ۋەھىي. 21:14). بەزى ۋاقىتلاردا، يەھۋا دۇئالىرىمىزغا ئۆزىمىز ئۈمىد قىلغان يول بىلەن جاۋاب بەرمەسلىكى مۇمكىن. بىراق، ئۇ ھەردائىم سۆيگۈ-مۇھەببەت ۋە ئادالەت بىلەن جاۋاب قايتۇرىدىغانلىقىغا ئىشەنگەچ، ئۇنىڭ دۇئالىرىمىزغا قانداق يول بىلەن جاۋاب بېرىشنى تاللىشىدىن گۇمان قىلمايمىز.—ئايۇپ 33:13.
7. بىز نېمە قىلماسلىقىمىز كېرەك ۋە نېمە ئۈچۈن؟
7 بىز ئۆز ۋەزىيىتىمىزنى باشقىلارنىڭ ۋەزىيىتى بىلەن سېلىشتۇرۇشتىن ساقلىنىشقا تىرىشىمىز. مەسىلەن، يەھۋادىن ئېنىق بىر نەرسىنى سورىشىمىز مۇمكىن، بىراق تىلىگەن نەرسىگە ئېرىشەلمەسلىكىمىز مۇمكىن. كېيىن، باشقىلارنىڭمۇ يەھۋادىن ئوخشاش نەرسىنى سورىغانلىقى ۋە يەھۋا ئۇنىڭ دۇئاسىغا جاۋاب بەرگەنلىكىنى ئاڭلايمىز. مەسىلەن، ئاننا ئىسىملىك بىر قېرىندىشىمىزنىڭ باشتىن كەچۈرگەن مىسالىنى كۆرۈپ باقايلى. ئۇ يولدىشى مەتتىيۇنىڭ راك كېسىلىدىن ساقىيىپ كېتىشىنى تىلىگەن. شۇنىڭ بىلەن بىر ۋاقىتتا، ئىككى ياشانغان ئېتىقادچى قېرىنداشلارنىڭمۇ راك كېسىلىگە قارشى كۈرەش قىلىۋاتقانلىقىنى بىلگەن. ئاننا دائىم يولدىشى مەتتىيۇ ۋە شۇ ئىككى قېرىنداش ئۈچۈن دۇئا قىلغان. شۇ ئىككى قېرىنداش راك كېسىلىدىن ساقىيىپ كەتكەن، ئەمما مەتتىيۇ ساقايماي ئۆلۈپ كەتكەن. دەسلەپتە ئاننا شۇ ئىككى قېرىنداشنىڭ ساقىيىپ كەتكەنلىكىنى ئويلىغاندا، يەھۋا ئۇلارغا ياردەم بەرگەن دەپ قارىغان. ئەگەر يەھۋا ئۇلارغا ياردەم بەرگەن بولسا، نېمە ئۈچۈن يولدىشى ئۈچۈن قىلغان دۇئاسىغا يەھۋا جاۋاب بەرمىدى؟ ئەلۋەتتە، شۇ ئىككى قېرىنداشنىڭ قانداق ساقىيىپ كەتكەنلىكىنى بىلمەيمىز. بىراق، شۇنى ئېنىق بىلىمىزكى، يەھۋا بارلىق ئازاب-ئوقۇبەتلىرىمىزنى مەڭگۈگە يوق قىلىدۇ ۋە ئۇ ئۆزىنىڭ ئۆلۈپ كەتكەن دوستلىرىنى تىرىلدۈرۈشكە تەشنا بولۇپ، تۆت كۆزى بىلەن كۈتىۋاتىدۇ.—ئايۇپ 14:15.
8. (1) يەشايا 43:2-ئايەتكە ئاساسلانغاندا، يەھۋا بىزنى قانداق قوللاپ-قۇۋۋەتلەيدۇ؟ (2) سىناقلارغا دۇچ كەلگەندە، دۇئا بىزگە قانداق ياردەم بېرەلەيدۇ؟ («دۇئا ئېغىر كۈنلەردە بەرداشلىق بېرىشىمىزگە ياردەم قىلىدۇ» ناملىق فىلىمنى كۆرۈڭ)
8 يەھۋا بىزنى ھەردائىم قوللاپ-قۇۋۋەتلەيدۇ. ئۇ كۆيۈمچان ئاتىمىز بولغاچ، ئازاب-ئوقۇبەت چېكىشىمىزنى خالىمايدۇ (يەشايا 63:9). شۇنداقتىمۇ، ئۇ بىزنى ھەممە قىيىنچىلىقلاردىن قۇتۇلدۇرمايدۇ (يەشايا 43:2-نى ئوقۇڭ). ئەمما، ئۇ سىناقلاردىن ‹ئۆتۈشىمىزگە› ياردەم بېرىدىغانلىقى ھەققىدە ۋەدە بېرىدۇ. يەھۋا بىز ئۇچرىغان سىناقلارنىڭ بىزگە مەڭگۈ زىيان يەتكۈزۈشىگە يول قويمايدۇ. ئۇ يەنە داۋاملىق بەرداشلىق بېرىشىمىز ئۈچۈن بىزگە كۈچلۈك مۇقەددەس روھىنى بېرىدۇ (لۇقا 11:13؛ فىلىپى. 4:13). خۇلاسە قىلساق، سىناقلارغا بەرداشلىق بېرىپ، يەھۋا خۇداغا سادىق قېلىشىمىز ئۈچۈن، ئۇ دەل ۋاقتىدا، مۇھتاج بولغان نەرسىنى بېرىدىغانلىقىغا ئىشەنچ قىلالايمىزd.
يەھۋا بىزدىن نېمىنى كۈتىدۇ؟
9. ياقۇپ 1:6، 7-ئايەتلەردە يېزىلغاندەك، يەھۋا بىزگە ياردەم بېرىدىغانلىقىغا نېمە ئۈچۈن ئىشىنىشىمىز كېرەك؟
9 يەھۋا بىزنىڭ ئۇنىڭغا ئىشىنىشىمىزنى كۈتىدۇ (ئىبرانىي. 11:6). بەزىدە قىيىنچىلىقلار بىزنى چىرمىۋالغاندەك ھېس قىلىشىمىز مۇمكىن. بىز ھەتتا يەھۋانىڭ بىزگە ياردەم بېرىدىغانلىقىغا گۇمان قىلىشىمىز مۇمكىن. ئەمما، مۇقەددەس كىتابتا يېزىلغاندەك، خۇدانىڭ كۈچى بىلەن بىز «سېپىل تامدىن ئاتلاپ» ئۆتەلەيمىز (زەبۇر 18:29). شۇڭا، گۇمان قىلىشنىڭ ئورنىغا، يەھۋانىڭ دۇئايىمىزغا جاۋاب بېرىدىغانلىقىغا تولۇق ئىشەنچ قىلىشىمىز كېرەك.—ياقۇپ 1:6، 7-نى ئوقۇڭ.
10. دۇئالىرىمىزغا ماس قانداق ھەرىكەت قىلالايمىز؟
10 يەھۋا دۇئالىرىمىزغا ماس ئىش-ھەرىكەت قىلىشىمىزنى كۈتىدۇ. مەسىلەن، بىر بۇرادەر چوڭ يىغىلىشقا قاتنىشىش ئۈچۈن ئىش ئورنىدىن رۇخسەت سورىماقچى بولۇپ، يەھۋادىن ياردەم سورايدۇ. يەھۋا بۇ دۇئاغا قانداق جاۋاب بېرىشى مۇمكىن؟ ئۇ بۇرادەرگە خوجايىنىنىڭ ئالدىغا كىرىشى ئۈچۈن جاسارەت بېرىشى مۇمكىن. ئەمما، بۇ بۇرادەر دۇئاسىغا ماس ھەرىكەت قىلىشى كېرەك. بەلكىم، خوجايىندىن قايتا-قايتا سوراشقا توغرا كېلىدۇ. ھەتتا باشقا بىر خىزمەتچى بىلەن ئىش ۋاقتىنى ئالماشتۇرۇشنى سوراپ كۆرۈشكە توغرا كېلىشى مۇمكىن. ياكى زۆرۈر بولسا، مائاش ئالماي دەم ئېلىش تەكلىپىنى ئوتتۇرغا قويۇش كېرەك بولىدىغاندۇ.
11. غەم-ئەندىشىلىرىمىز توغرۇلۇق نېمە ئۈچۈن قايتا-قايتا دۇئا قىلىشىمىز كېرەك؟
11 يەھۋا بىزدىن غەم-ئەندىشىلىرىمىز توغرۇلۇق قايتا-قايتا دۇئا قىلىشىمىزنى كۈتىدۇ (1-سالونىكا. 5:17). ئەيسا بەزى دۇئا تىلەكلىرىمىزنىڭ دەرھال ئەمەلگە ئاشمايدىغانلىقىنى ئېيتقان (لۇقا 11:9). شۇڭا، داۋاملىق دۇئا قىلىڭ! چىن كۆڭلۈڭىزدىن قايتا-قايتا دۇئا قىلىپ سوراڭ (لۇقا 18:1–7). مەلۇم بىر ئىش توغرۇلۇق داۋاملىق دۇئا قىلغىنىمىزدا، ئارزۇ-تىلەكلىرىمىزنىڭ بىز ئۈچۈن ئىنتايىن مۇھىم ئىكەنلىكىنى يەھۋاغا كۆرسىتىمىز. ئۇنىڭدىن باشقا، ئۇ بىزگە ياردەم بېرىشكە قادىر ئىكەنلىكىگە ئىشەنچ قىلغانلىقىمىزنى كۆرسىتىمىز.
دۇئالىرىمىزدا ئۆتۈنگەن بەزى نەرسىلەرنى ئۆزگەرتىشىمىز كېرەك
12. (1) خۇدادىن سورىغان ئارزۇ-تىلەكلىرىمىز ھەققىدە ئۆزىمىزگە قانداق سوئال قويۇشىمىز كېرەك؟ (2) دۇئالىرىمىز يەھۋانى ھۆرمەتلەيدىغانلىقىمىزنى كۆرسىتىشى ئۈچۈن نېمە قىلىشىمىز كېرەك؟ («ئارزۇ-تىلەكلىرىم يەھۋاغا بولغان ھۆرمىتىمنى كۆرسىتەمدۇ؟» دېگەن رامكىغا قاراڭ)
12 ئەگەر دۇئادا سورىغان نەرسىلىرىمىزگە دەرھال ئېرىشەلمىسەك، ئۆزىمىزدىن مۇنداق ئۈچ سوئالنى سوراپ كۆرسەك بولىدۇ. بىرىنچى، «مەن سورىغان نەرسىلەر خۇدانىڭ ئىرادىسىگە ماس كېلەمدۇ؟». بىز ھەمىشە ئۆزىمىزگە نېمىنىڭ پايدىلىق ئىكەنلىكىنى بىلىمىز دەپ ئويلايمىز. ئەمما، تىلىگەن نەرسىلەرنىڭ بىز ئۈچۈن ھەقىقىي پايدىلىق بولۇشى ناتايىن. مەسىلەن، بىر قىيىنچىلىقنىڭ ھەل قىلىنىشى توغرۇلۇق دۇئا قىلىۋاتىمىز، بىراق ھەل قىلىشنىڭ بىز سورىغاندىنمۇ ياخشىراق يولى بار. بەلكىم، بىز سورىغان بەزى نەرسىلەر يەھۋانىڭ ئىرادىسىگە ماس كەلمەيدۇ (1-يۇھاننا 5:14). تىلغا ئېلىنغان ئاتا-ئانىنىڭ مىسالىنى قاراپ باقايلى. ئۇلار يەھۋادىن بالىسىنىڭ ھەقىقەت يولىدا قېلىشىنى سورىغان. بۇ ئۆتۈنۈش خۇدانىڭ ئىرادىسىگە مۇۋاپىق. لېكىن، يەھۋا ھېچكىمنى ئۇنىڭغا خىزمەت قىلىشقا مەجبۇرلىمايدۇ. ئۇنىڭغا ئىبادەت قىلىش ئۆزىمىزنىڭ شەخسىي تاللىشى بولۇشىنى خالايدۇ (تەكرار. قا 10:12، 13؛ 30:19، 20). شۇڭا، ئۆز پەرزەنتىنىڭ يۈرىكىگە تەسىر قىلىپ، ئۇنىڭ چىن قەلبىدىن خۇدانى سۆيۈشنى ۋە ئۇنىڭ دوستى بولۇشنى تاللىشىغا ياردەم بېرەلىشى ئۈچۈن، ئاتا-ئانىلار دۇئا قىلىپ، يەھۋادىن ئۆزلىرىگە ياردەم بېرىشنى سورىيالايدۇ.—پەند. نە 22:6؛ ئەفەس. 6:4.
13. ئىبرانىيلار 4:16-ئايەتكە ئاساسلانغاندا، يەھۋا بىزگە قاچان ياردەم بېرىدۇ؟ چۈشەندۈرۈڭ.
13 ئىككىنچى سوئال: «ھازىر يەھۋا دۇئالىرىمغا جاۋاب بېرىدىغان ۋاقتىمۇ؟» بەلكىم، بىز دۇئالىرىمىزغا دەرھال جاۋاب ئېلىشنى ئۈمىد قىلىمىز. ئەمەلىيەتتە، يەھۋا قاچان جاۋاب بەرسە، ئەڭ ياخشى بولىدىغانلىقىنى ئوبدان بىلىدۇ (ئىبرانىيلار 4:16-نى ئوقۇڭ). ئەگەر دۇئالىرىمىزغا دەرھال جاۋاب ئالالمىساق، بەلكىم يەھۋانى «ياق» دەپ جاۋاب بەردى دەپ ئويلىشىمىز مۇمكىن. بىراق، ئۇ تېخى جاۋاب بەرمىدى. كېسىلىدىن ساقىيىپ كېتىشى ئۈچۈن دۇئا قىلىپ كەلگەن بىر ياش بۇرادەرنىڭ مىسالىنى ئالايلى. ئەگەر يەھۋا ئۇنى مۆجىزە ئارقىلىق ساقايتقان بولسا، شەيتان «بۇ بۇرادەر ساقايغانلىقى ئۈچۈنلا يەھۋاغا داۋاملىق خىزمەت قىلىۋاتىدۇ» دەپ ئەيىبلىيەلەيتتى (ئايۇپ 1:9–11؛ 2:4). ئۇنىڭدىن باشقا، يەھۋا بارلىق ئاغرىقلارنى داۋالاپ ساقايتىدىغان ۋاقىتنى ئاللىقاچان بەلگۈلەپ قويغان (يەشايا 33:24؛ ۋەھىيلەر 21:3، 4). شۇ ۋاقىت كەلگىچە، بىز مۆجىزىلىك يول بىلەن ساقىيىپ كېتىشىنى ئۈمىد قىلالمايمىز. شۇڭا، بۇرادەر بەرداشلىق بېرىپ، خۇداغا ساداقەتمەنلىك بىلەن خىزمەت قىلىشنى داۋاملاشتۇرۇش ئۈچۈن يەھۋادىن كۈچ-مەدەت ۋە تىنچ-خاتىرجەملىك بېرىشنى سورىيالايدۇ.—زەبۇر 29:11.
14. جەنېسنىڭ مىسالىدىن نېمىنى ئۆگەندىڭىز؟
14 بەيتەلدە خىزمەت قىلىش توغرۇلۇق دۇئا قىلغان جەنېس ئۆز دۇئاسىغا يەھۋانىڭ قانداق جاۋاب بەرگەنلىكىنى بەش يىلدىن كېيىن چۈشىنىپ يەتكەن. ئۇ مۇنداق دەيدۇ: «يەھۋا شۇ ۋاقىتتىن پايدىلىنىپ، ماڭا كۆپ نەرسىلەرنى ئۆگىتىپ، تېخىمۇ ياخشىراق خىزمەتچى بولۇشۇمغا ياردەم بەردى. يەھۋاغا بولغان ئىشەنچىم تېخىمۇ كۈچەيدى. شەخسىي تەتقىق ئۆگىنىش ئۆتكۈزۈش ئادىتىمنى ياخشىلاشقا مۇھتاج ئىدىم. ئۇنىڭدىن باشقا، مەيلى قەيەردە يەھۋاغا خىزمەت قىلساممۇ، خۇشال بولۇشقا ئۆگىنىشىم كېرەكتى». كېيىنرەك، جەنېس يولدىشى بىلەن جامائەتلەرنى زىيارەت قىلىپ خىزمەت قىلغان. ئۆتمۈشىنى ئەسلەپ، جەنېس مۇنداق دەيدۇ: «يەھۋانىڭ دۇئايىمغا شۇنداق ئۇسۇلدا جاۋاب بېرىدىغانلىقىنى ئويلاپمۇ باقمىغان ئىدىم. ئۇ ماڭا قىممەتباھا سوۋغات بەرگەنلىكىنى چۈشىنىپ يېتىش ئۈچۈن ۋاقىت كېرەك بولدى. بىراق، مەن ئۇنىڭ سۆيگۈ-مۇھەببىتىنى ۋە مېھرىبانلىقىنى ھېس قىلغانلىقىم ئۈچۈن ئىنتايىن مىننەتدارمەن».
ئەگەر يەھۋا دۇئايىڭىزغا جاۋاب بەرمەيۋاتقاندەك ھېس قىلسىڭىز، باشقا نەرسىلەر توغرۇلۇق دۇئا قىلىڭ (15-ئابزاسقا قاراڭ)f
15. نېمە ئۈچۈن دۇئالىرىمىزنىڭ مەزمۇنىنى مەلۇم بىر ئارزۇ-ئىستەك بىلەن چەكلەپ قويماسلىقىمىز كېرەك؟ (رەسىمگە ھەم قاراڭ)
15 ئۈچىنچى سوئال بولسا: «مەن باشقا بىر نەرسە ئۈچۈن دۇئا قىلىشىم كېرەكمۇ؟» نېمىگە مۇھتاجلىقىمىزنى دۇئادا ئېنىقراق ئېيتىش ياخشى. بىراق، يەھۋانىڭ بىز ئۈچۈن نېمىنى ئىرادە قىلغانلىقىنى ياخشىراق بىلىش ئۈچۈن، بەزىدە دۇئالىرىنىڭ مەزمۇنىنى مەلۇم بىر ئارزۇ-ئىستەك بىلەن چەكلەپ قويماسلىقىمىز لازىم. ماقالىنىڭ بېشىدا تىلغا ئېلىنغان توي قىلمىغان قېرىنداشنىڭ مىسالىنى كۆرۈپ باقايلى. ئۇ پادىشاھلىق ۋەز ئېيتقۇچىلىرى مەكتىپىدە ئوقۇش ھەققىدە يەھۋاغا داۋاملىق دۇئا قىلغان. ئۇ ۋەز ئېيتقۇچىلارغا مۇھتاج يەرلەردە خىزمەت قىلىشنى خالىغاچ، ئۇنىڭ شۇ مەكتەپتە ئوقۇش ئارزۇسى بار ئىدى. شۇڭا، ئۇ داۋاملىق مەكتەپ توغرۇلۇق ۋە يەھۋاغا كۆپرەك خىزمەت قىلىشنىڭ باشقا يوللىرى توغرۇلۇق ھەم دۇئا قىلسا بولىدۇ (ئەلچى. 16:9، 10). كېيىن، ئۇ دۇئاسىغا ماس ھەرىكەت قىلىپ، رايونغا مەسئۇل ئاقساقالدىن يېقىن ئەتراپتىكى قايسى جامائەتلەر پىدائىي ۋەز ئېيتقۇچىلارغا مۇھتاجلىقىنى سورىسا بولىدۇ ياكى بەيتەلگە خەت يېزىپ، قەيەردە ۋەز ئېيتقۇچىلارغا ئېھتىياج بارلىقىنى سورىيالايدۇe.
16. نېمىگە ئىشەنچ قىلالايمىز؟
16 بۇ ماقالىدە ئۆگىنىپ ئۆتكىنىمىزدەك، يەھۋا دۇئالىرىمىزغا كۆيۈمچانلىق ۋە ئادالەت بىلەن جاۋاب بېرىدۇ (زەبۇر 4:3؛ يەشايا 30:18). بەزىدە ئۆزىمىز ئويلىغاندەك جاۋابقا ئېرىشەلمەسلىكىمىز مۇمكىن، بىراق يەھۋا ھەرگىزمۇ دۇئالىرىمىزغا بىپەرۋالىق قىلمايدۇ. ئۇ بىزنى ئىنتايىن ياخشى كۆرىدۇ ۋە بىزنى ھەرگىزمۇ تاشلىمايدۇ (زەبۇر 9:10). شۇڭلاشقا، «ھەردائىم ئۇنىڭغا ئىشىنىڭلار!» دېگەن نەسىھەتكە قولاق سېلىپ، دۇئادا ئىچ باغرىڭىزنى ئۇنىڭغا تۆكۈپ بېرىڭ.—زەبۇر 62:8.
13-ناخشا شۈكۈر دۇئاسى
a بۇ ماقالە، نېمە ئۈچۈن يەھۋا خۇدا دۇئالىرىمىزغا سۆيگۈ-مۇھەببەت ۋە ئادالەت بىلەن جاۋاب بېرىدىغانلىقىغا ئىشەنچ قىلساق بولىدىغانلىقىنى چۈشەندۈرۈپ بېرىدۇ.
b بەزى ئىسىملار ئۆزگەرتىلگەن.
c «كۈزىتىش مۇنارى» 2022-يىل، 2-ئاي سانىدىكى «يەھۋانىڭ دائىم توغرا ئىش قىلىدىغانلىقىغا ئىشىنەمسىز؟» دېگەن ماقالىنىڭ 3–6-ئابزاسلىرىغا قاراڭ.
d قىيىن سىناقلارغا بەرداشلىق بېرىشىمىزگە يەھۋانىڭ قانداق ياردەم بېرىدىغانلىقى توغرىسىدا كۆپرەك بىلىش ئۈچۈن، jw.org تور بېكىتىدىكى «دۇئا ئېغىر كۈنلەردە بەرداشلىق بېرىشىمىزگە ياردەم قىلىدۇ» ناملىق فىلىمنى كۆرۈڭ.
e باشقا بەيتەلنىڭ ۋەز خىزمەت تېررىتورىيىسىدە خىزمەت قىلىش توغرۇلۇق كۆپرەك مەلۇمات ئېلىش ئۈچۈن، «يەھۋانىڭ ئىرادىسىنى ئورۇنلاش ئۈچۈن تەشكىللەش» ناملىق كىتابنىڭ 10-باب، 6–9-ئابزاسلارغا قاراڭ.
f سۈرەتتە:. ئىككى قېرىنداش پادىشاھلىق ۋەز ئېيتقۇچىلىرىنى تەربىيىلەش مەكتىپىدە ئوقۇش ئىلتىماسىنى تولدۇرۇۋاتىدۇ. كېيىن بىر قېرىنداشنى تەكلىپ قىلىندى، باشقىسى تەكلىپ قىلىنمىدى. تەكلىپ قىلىنمىغان قېرىنداش ئۈمىدسىزلىنىشنىڭ ئورنىغا، كۆپرەك خىزمەت قىلىش ئۈچۈن باشقىمۇ پۇرسەتلەرنى ئىزدەپ يەھۋاغا دۇئا قىلىۋاتىدۇ. كېيىن، ئۇ بەيتەلگە خەت يېزىپ، قەيەردە ئېھتىياج بارلىقىنى سوراۋاتىدۇ.