10-تەتقىق ماقالىسى
26-ناخشا خۇدا بىلەن يۈر!
يەھۋا ۋە ئەيساغا ئوخشاش ئوي-پىكىر قىلىشنى ئۆگىنەيلى!
«مەسىھ جىسمانىي جەھەتتىن ئازاب-ئوقۇبەت چەككەن ئىكەن، دېمەك، سىلەرمۇ ئۇنىڭغا ئوخشاش ئىرادە بىلەن ئۆزۈڭلارنى قوراللاندۇرۇڭلار».—1-پېتر. 4:1.
مەركىزى ئىدىيە
ئەلچى پېترۇس ئەيسا مەسىھكە ئوخشاش ئوي-پىكىر قىلىشنى قانداق ئۆگەنگەن ۋە بىزمۇ شۇنداق قىلىشنى قانداق ئۆگىنەلەيمىز؟
1، 2. يەھۋانى سۆيۈش نېمىلەرنى ئۆز ئىچىگە ئالىدۇ ۋە ئەيسا مەسىھ ئاتىسىنى سۆيىدىغانلىقىنى قانداق كۆرسەتكەن؟
«خۇدايىڭ يەھۋانى پۈتۈن قەلبىڭ، پۈتۈن جېنىڭ، پۈتۈن كۈچۈڭ ۋە پۈتۈن زېھنىڭ بىلەن سۆيگىن» (لۇقا 10:27). ئەيسا مەسىھ ئېيتقاندەك، بۇ تەۋرات قانۇنىدىكى ئەڭ مۇھىم ئەمر. يەھۋا خۇدانى پۈتۈن قەلبىمىز، يەنى ئارزۇ-ئىستەكلىرىمىز، ھېس-تۇيغۇلىرىمىز بىلەن سۆيۈشىمىز لازىم. يەنە خۇداغا پۈتۈن جېنىمىز ۋە پۈتۈن كۈچىمىز بىلەن ئۇنىڭغا خىزمەت قىلىشىمىز كېرەك. بۇنىڭدىن باشقا، بىز يەھۋا خۇدانى پۈتۈن زېھنىمىز بىلەن سۆيۈشىمىز لازىم. بۇنىڭ ئۈچۈن، بىز ھەممە ۋەزىيەتلەردە يەھۋادەك ئويلاشقا تىرىشىشىمىز كېرەك. ئەلۋەتتە، بىز خۇدانىڭ ئوي-پىكىر قىلىش تەرزىنى ھېچقاچان تولۇق چۈشىنەلمەيمىز. لېكىن، بىز مەسىھنىڭ ئوي-پىكىرىنى بىلىۋالساق، ئاسماندىكى ئاتىسىنىڭمۇ ئوي-پىكىر قىلىش تەرزىنى چۈشىنىپ يېتەلەيمىز. چۈنكى، ئۇ ئاتىسىنىڭ كۆز قارىشىنى مۇكەممەل ئەكس ئەتتۈرگەن.—1-كورىنت. 2:16.
2 ئەيسا مەسىھ پۈتۈن زېھنى بىلەن يەھۋا خۇدانى سۆيگەن. ئۇ ئاتىسىنىڭ ئۆزى ئۈچۈن نېمىنى ئىرادە قىلغانلىقىنى بىلگەن ۋە ھەتتا ئازاب چېكىشكە توغرا كەلسىمۇ، ئاشۇ ئىرادىنى ئەمەلگە ئاشۇرۇشقا تەييار بولغان. ئەيسا پۈتۈن زېھنىنى ئاتىسىنىڭ ئىرادىسىنى ئورۇنلاشقا قاراتقان بولۇپ، ئۇ ھېچنەرسىنىڭ دىققىتىنى باشقا ئىشلارغا بۇرىۋېتىشىگە يول قويمىغان.
3. ئەلچى پېترۇس ئەيسا مەسىھتىن نېمىنى ئۆگەنگەن ۋە پېترۇس ئېتىقادداشلارنى نېمە قىلىشقا ئۈندىگەن؟ (1-پېترۇس 4:1)
3 پېترۇس بىلەن باشقا ئەلچىلەر دائىم ئەيسانىڭ يېنىدا بولغان. شۇڭا، ئۇلار ئەيسانىڭ گەپ-سۆزلىرى ۋە ئىش-ھەرىكەتلىرىدىن ئۇنىڭ ئوي-پىكىرىنى چۈشەنگەن. پېترۇس بىرىنچى خېتىدە ئېتىقادداشلىرىنى ئەيساغا ئوخشاش ئوي-پىكىر ياكى ئىرادە بىلەن قوراللىنىشقا ئۈندىگەن (1-پېترۇس 4:1-نى ئوقۇڭ). پېترۇس خېتىدە «قوراللاندۇرۇڭلار» دېگەن ھەربىي ئىشلاردا ئىشلىتىدىغان ئاتالغۇنى قوللانغان. دېمەك، بىز ئەيسا مەسىھنىڭ ئوي-پىكىرىنى تونۇپ يېتىپ، ئۇنى ئۈلگە قىلساق، بىزدە كۈچلۈك بىر قورال بار بولىدۇ. شۇنىڭ بىلەن، بىز گۇناھكار تەبىئىتىمىز ۋە شەيتاننىڭ قول ئاستىدىكى بۇ دۇنيانىڭ تەسىرىگە قارشى كۈرەش قىلالايمىز.—2-كورىنت. 10:3–5؛ ئەفەس. 6:12.
4. بۇ ماقالىدە نېمىلەرنى مۇھاكىمە قىلىمىز؟
4 بۇ ماقالىدە، ئەيسانىڭ ئوي-پىكىر قىلىش ئۇسۇلىنى مۇلاھىزە قىلىپ، ئۇنى قانداق ئۈلگە قىلىشنىڭ ئۇسۇللىرىنى ئۆگىنىمىز. (1) يەھۋانىڭ ئوي-پىكىرى قىلىش ئۇسۇلىنى ئۈلگە قىلىشنى، (2) كەمتەر بولۇشنى ۋە (3) يەھۋاغا دۇئا قىلىپ، ساغلام پىكىرلىك بولۇشنى ئۆگىنىمىز.
يەھۋاغا ئوخشاش ئوي-پىكىر قىلىش
5. قايسى ۋەزىيەتتە پېترۇسنىڭ ئوي-پىكىرى يەھۋانىڭكى ئوي-پىكىرىگە ئوخشىمىغان؟
5 پېترۇسنىڭ يەھۋاغا ئوخشاش ئوي-پىكىر قىلىشنىڭ ئورنىغا ئۆز چۈشەنچىسىگە ئاساسلانغانلىقى توغرىسىدىكى بىر ۋەقەنى كۆرۈپ چىقايلى. ئەيسا مەسىھ ئەلچىلىرىگە ئۆزىنىڭ يېرۇسالىمغا بارىدىغانلىقى ۋە ئۇ يەردە دىنىي رەھبەرلەرنىڭ قولىغا تاپشۇرۇلۇپ، خورلۇققا ئۇچراپ قىينىلىپ، ئاخىرىدا ئۆلتۈرۈلىدىغانلىقىنى ئېيتقان (مەتتا 16:21). پېترۇس ئەيسانىڭ خۇدا خەلقىنى قۇتقۇزىدىغان مەسىھ ئىكەنلىكىنى بىلگەن. شۇ سەۋەبتىن، بەلكىم ئۇ يەھۋا ئۇنىڭ ئۆلۈشىگە يول قويمايدۇ دەپ ئويلىغاندۇ (مەتتا 16:16). شۇنىڭ ئۈچۈن، ئۇ ئەيسانى بىر چەتكە تارتىپ: «ھەزرىتىم، خۇدا سىزنى ساقلاپ، بۇ ئىشلار بېشىڭىزغا ئەسلا كەلمىسۇن»،— دېگەن (مەتتا 16:22). بۇ ۋەزىيەتتە، پېترۇس يەھۋاغا ئوخشاش ئويلىمىغاچقا، ئەيسا بىلەنمۇ ئوي-پىكىرى بىر يەردىن چىقمىغان.
6. ئەيسا ئۆز ئوي-پىكىرىنىڭ يەھۋانىڭ ئوي-پىكىرىگە ئوخشاشلىقىنى قانداق كۆرسەتكەن؟
6 ئەيسانىڭ ئوي-پىكىر قىلىش تەرزى ئاتىسىنىڭكىگە ئوخشاش بولغان. شۇڭا، ئۇ پېترۇسقا: «كۆزۈمدىن يوقال، شەيتان! سەن ماڭا پۇتلىكاشاڭ تاش. چۈنكى سېنىڭ ئويلىغانلىرىڭ خۇدانىڭ ئەمەس، بەلكى ئىنسانلارنىڭ ئوي-پىكىرلىرىدۇر»،— دېگەن (مەتتا 16:23). يەھۋا خۇدانىڭ ئىرادىسىنى ئورۇنداش ئۈچۈن، ئەيسا ئازاب چېكىپ ئۆلۈشى كېرەكلىكىنى بىلگەن، شۇڭلاشقا، ئۇ پېترۇسنىڭ ياخشى نىيەت بىلەن ئېيتقان سۆزلىرىنى رەت قىلغان. پېترۇس بۇنىڭدىن قانداق ساۋاق ئالغان؟ ئۇ يەھۋاغا ئوخشاش ئويلاش كېرەكلىكىنى چۈشەنگەن. بۇ بىز ئۈچۈنمۇ مۇھىم بىر ساۋاق.
7. پېترۇس ئۆزىنىڭ ئوي-پىكىرىنى ئۆزگەرتىپ، يەھۋانىڭكى بىلەن ئوخشاش ئوي-پىكىردە بولۇشنى خالايدىغانلىقىنى قانداق كۆرسەتكەن؟ ( رەسىمگە قاراڭ).
7 ۋاقىت ئۆتۈپ، پېترۇس ئۆزىنىڭ يەھۋا بىلەن ئوخشاش ئويلاشنى خالايدىغانلىقىنى ئېنىق كۆرسەتكەن. يەھۋا باشقا مىللەت كىشىلىرىنىڭ ئۆز خەلقىگە قوشۇلۇشىنى قارار قىلىپ، پېترۇسنى كورنىلىينىڭ ئۆيىگە ئەۋەتكەن. ئادەتتە ئىسرائىللار باشقا مىللەتتىن چىققان ئادەملەر بىلەن ئارىلاشمىغان، شۇڭا خۇدانىڭ بۇ تاپشۇرۇقىنى ئورۇنلاش ئۈچۈن، پېترۇس ئوي-پىكىرىنى ئۆزگەرتىشى كېرەك ئىدى. پېترۇس يەھۋانىڭ باشقا خەلقلەرگە قانداق قارايدىغانلىقىنى چۈشەنگەندە، شۇ ھامان كۆز قارىشىنى ئۆزگەرتكەن. نەتىجىدە، پېترۇس دەرھال خۇدا ئەۋەتكەن يەرگە بارغان (ئەلچى. 10:28، 29). ئۇ كورنىلىي ۋە ئۇنىڭ ئۆيدىكىلىرىگە ۋەز قىلىپ، ئۇلار چۆمدۈرۈلۈشتىن ئۆتكەن.—ئەلچى. 10:21–23، 34، 35، 44–48.
پېترۇس كورنىلىينىڭ ئۆيىگە كىرىۋاتىدۇ (7-ئابزاسقا قاراڭ)
8. يەھۋاغا ئوخشاش ئوي-پىكىردە بولغانلىقىمىزنى قانداق كۆرسىتەلەيمىز؟ (1-پېترۇس 3:8)
8 يىللار ئۆتۈپ، پېترۇس قېرىنداشلارغا «ھەممىڭلار بىر نىيەت-مەقسەتتە بولۇڭلار» دەپ يازغان (1-پېترۇس 3:8-نى ئوقۇڭ). ھەربىرىمىز خۇدانىڭ ئوي-پىكىر قىلىش تەرزىنى ئۆزلەشتۈرسەك، ھەممىمىزنىڭ ئوي-پىكىرى بىر يەردىن چىقىدۇ. بىز خۇدانىڭ ئوي-پىكىرلىرىنى ئۇنىڭ سۆزلىرىنى ئۆگىنىش ئارقىلىق بىلەلەيمىز. مەسىلەن، ئەيسا مەسىھ ئۆز ئەگەشكۈچىلىرىنى ھاياتىدا خۇدا پادىشاھلىقىنى بىرىنچى ئورۇنغا قويۇشقا دەۋەت قىلغان (مەتتا 6:33). جامائىتىڭىزدىكى بىر قېرىنداش تولۇق ۋاقىتلىق خىزمەتنى باشلىماقچى بولدى دەيلى. شۇ چاغدا، سىز ئۇنىڭغا ئۆزىڭىزنى قىينىماڭ دەپ قىزغىنلىقىغا سۇ چاچامسىز ياكى ئۇنى ماختاپ، قولۇڭىزدىن كېلىشىچە قوللاپ-قۇۋۋەتلەمسىز؟
كەمتەر بولۇڭ
9، 10. ئەيسا كەمتەرلىكنىڭ ئاجايىپ ئۈلگىسىنى قانداق كۆرسەتكەن؟
9 ئۆلۈمىنىڭ ئالدىدىكى كېچىدە ئەيسا مەسىھ پېترۇس ۋە باشقا ئەلچىلەرگە كەمتەر بولۇشنىڭ مۇھىملىقىنى ئۆگەتكەن. ئۇ ئەلچىلىرى بىلەن ئاخىرقى قېتىم بىللە تاماق يېيىش ئۈچۈن، پېترۇس بىلەن يۇھاننانى كەچلىك داستىخاننى تەييارلاشقا ئەۋەتكەن. قارىماققا، ئۇلار داستىخانغا ئولتۇرۇشتىن ئىلگىرى، مېھمانلارنىڭ پۇتلىرىنى يۇيۇش ئۈچۈن داس ۋە لۆڭگىلەرنىمۇ تەييارلىغان. ئۇنداقتا، كىم كەمتەرلىك بىلەن كۆپچىلىكنىڭ پۇتلىرىنى يۇيىدۇ؟
10 ئەيسا ھېچ ئىككىلەنمەي بۇ ئىشنى قىلىپ، كەمتەرلىكنىڭ ئاجايىپ ئۈلگىسىنى كۆرسەتكەن. ئۇ ئادەتتە قۇللار قىلىدىغان بۇ ئىشنى قىلىپ، ئەلچىلەرنى ھەيران قالدۇرغان. ئەيسا مەسىھ تونىنى كىيىمىنى يېشىپ، لۆڭگىنى بېلىگە باغلاپ، ئاندىن داسقا سۇ قۇيۇپ، شاگىرتلىرىنىڭ پۇتلىرىنى يۇيۇشقا باشلىغان (يۇھاننا 13:4، 5). 12 ئەلچىنىڭ پۇتلىرىنى يۇيۇشقا بىراز ۋاقىت كەتسىمۇ، ئەيسا بۇ ئىشنى كەمتەرلىك بىلەن ئاخىرغىچە قىلغان. ئۇ ھەتتا ئۇنىڭغا ساتقۇنلۇق قىلماقچى بولۇۋاتقان يەھۇدا ئىشقارىيوتنىڭ پۇتىنى يۇيغان. كېيىن، ئۇ شاگىرتلىرىغا سەۋرچانلىق بىلەن مۇنداق دېگەن: «سىلەرگە نېمە قىلغانلىقىمنى چۈشەندىڭلارمۇ؟ سىلەر مېنى ‹ئۇستاز› ۋە ‹ھەزرىتىم› دەپ ئاتايسىلەر. راست ئېيتىسىلەر، ھەقىقەتەنمۇ شۇنداق. دېمەك، ئەگەر مەن ھەزرەت ۋە ئۇستاز بولۇپ تۇرۇقلۇق سىلەرنىڭ پۇتلىرىڭلارنى يۇغاندىكىن، سىلەرمۇ بىر-بىرىڭلارنىڭ پۇتلىرىنى يۇيۇشۇڭلار كېرەك».—يۇھاننا 13:12–14.
ھەقىقىي كەمتەرلىك قەلبىمىزدە ئۆزىمىزگە ۋە باشقىلارغا قانداق كۆز قاراشتا بولۇش بىلەنمۇ ئىپادىلىنىدۇ
11. پېترۇس كەمتەرلىكنى ئۆگەنگەنلىكىنى قانداق كۆرسەتكەن؟ (1-پېترۇس 5:5) (رەسىمگە ھەم قاراڭ).
11 پېترۇس ئەيسادىن كەمتەر بولۇشنى ئۆگەنگەن. ئەيسا مەسىھ ئاسمانغا قايتىپ كەتكەندىن كېيىن، پېترۇس تۇغۇلۇشىدىن توكۇر بولغان بىر كىشىنى ساقايتقان (ئەلچى. 1:8، 9؛ 3:2، 6–8). بۇ مۆجىزىگە پۈتۈن خەلق ھەيران بولۇپ، ئۇلارنىڭ يېنىغا يۈگۈرۈپ كېلىشكەن (ئەلچى. 3:11). پېترۇس بۇنىڭغا قانداق ئىنكاس قايتۇرغان؟ ئۇ خەلقنىڭ ئىززەت-ھۆرمىتىگە ئېرىشىشنى ئويلىغانمۇ؟ نام-ئابرويغا ئالاھىدە كۆڭۈل بۆلۈنگەن ئادەملەرنىڭ ئارىسىدا چوڭ بولسىمۇ، پېترۇس ھەممە شان-شەرەپنى پەقەت يەھۋاغا ۋە ئەيسا مەسىھكە بەرگەن. ئۇ مۇنداق دېگەن: «ئۇنىڭ [ئەيسانىڭ] ئىسىمى ئارقىلىق، يەنى ئۇنىڭ ئىسىمىغا بولغان ئىشەنچىمىز ئارقىلىق سىلەر كۆرۈپ تۇرغان ۋە تونۇيدىغان بۇ ئادەمگە كۈچ كىردى» (ئەلچى. 3:12–16). كېيىنرەك، پېترۇس ئۆز خېتىدە ئېتىقادداشلارنى كەمتەرلىكنى يېتىلدۈرۈشكە ئۈندىگەن. بەلكىم، ئۇ شۇ سۆز-ئىبارىنى يازغان پەيتتە، ئەيسانىڭ بېلىگە لۆڭگىنى باغلاپ، ئەلچىلەرنىڭ پۇتلىرىنى يۇيغان چاغدىكى ھالىتىنى ئېسىگە ئالغاندۇ.—1-پېترۇس 5:5-نى ئوقۇڭ.
مۆجىزە قىلغاندىن كېيىن، پېترۇس كەمتەرلىك بىلەن شان-شەرەپنى ياراتقۇچى يەھۋا ۋە ئەيسا مەسىھكە بەرگەن. بىزمۇ كۆز-كۆز قىلىش ئۈچۈن ياكى پايدىغا ئېرىشىش ئۈچۈن ئەمەس، بەلكى چىن كۆڭلىمىزدىن ياخشىلىق قىلىش ئارقىلىق كەمتەرلىكنى كۆرسىتەلەيمىز (11، 12-ئابزاسلارغا قاراڭ)
12. پېترۇسقا ئوخشاش كەمتەر بولۇشنى قانداق ئۆگىنەلەيمىز؟
12 پېترۇسنى ئۈلگە قىلىپ، بىزمۇ كەمتەر بولۇشنى ئۆگىنەلەيمىز. ئادەم ئۆزىنىڭ كەمتەرلىكىنى سۆزلىرى بىلەن كۆرسەتسە، بۇ يېتەرلىك ئەمەس. ھەقىقىي كەمتەرلىك قەلبىمىزدە ئۆزىمىزگە ۋە باشقىلارغا قانداق كۆز قاراشتا بولۇش بىلەنمۇ ئىپادىلىنىدۇ. بىز باشقىلار ئۈچۈن ياخشىلىق قىلساق، ياراتقۇچىمىز يەھۋانى ۋە ئىنسانلارنى سۆيگەنلىكىمىز ئۈچۈن قىلىمىز. ھەتتا ھېچكىم بايقىمىغان چاغدىمۇ خۇداغا ۋە قېرىنداشلىرىمىزغا خۇشاللىق بىلەن خىزمەت قىلساق، بۇ ھەقىقىي كەمتەر كىشى ئىكەنلىكىمىزنى كۆرسىتىدۇ.—مەتتا 6:1–4.
ساغلام ئوي-پىكىرلىك بولۇڭ
13. ساغلام ئوي-پىكىرلىك بولۇش نېمىنى بىلدۈرىدۇ؟ چۈشەندۈرۈپ بېرىڭ.
13 ساغلام ئوي-پىكىرلىك بولۇش دېگىنىمىز نېمە؟ (1-پېتر. 4:7) ساغلام ئوي-پىكىرلىك مەسىھ ئەگەشكۈچىسى قارار چىقارغاندا، ئۆزىنىڭ ئەقىل-پاراسىتىگە ئەمەس، يەھۋاغا تايىنىدۇ. چۈنكى، ئۇ ھاياتىدا يەھۋا بىلەن بولغان مۇناسىۋەتنى ھەممە نەرسىدىن مۇھىم ئورۇنغا قويىدۇ. ئۇ ئۆزىنىڭ ھەممىنى بىلمەيدىغانلىقىنى ئېتىراپ قىلىدۇ ۋە ئۆز-ئۆزىگە ھەددىدىن زىيادە ئىشىنىپ كېتىشتىن ساقلىنىدۇ. بۇنىڭدىن باشقا، ساغلام ئوي-پىكىرلىك مەسىھ ئەگەشكۈچىسى دائىم كەمتەرلىك بىلەن يەھۋاغا دۇئا قىلىپ، ئۆزىنىڭ ئۇنىڭغا تايىنىدىغانلىقىنى كۆرسىتىدۇ.
14. بىر قېتىم پېترۇس يەھۋاغا ئەمەس، ئۆزىگە تايانغانلىقىنى قانداق كۆرسەتتى؟
14 ئۆلۈمىنىڭ ئالدىدىكى كېچىسى، ئەيسا مەسىھ شاگىرتلىرىنى: «بۈگۈن كېچە ھەممىڭلار مېنىڭ بېشىمغا كېلىدىغان ئىشلار سەۋەبلىك مېنى تاشلاپ كېتىسىلەر»،— دەپ ئاگاھلاندۇرغان. شۇ چاغدا، پېترۇس دەرھال: «ھەممىسى سىزنى تاشلاپ كەتسىمۇ، مەن سىزنى ئەسلا تاشلىمايمەن»،— دەپ جاۋاب قايتۇرغان. شۇ كېچىسى ئەيسا يېنىدىكى بىرنەچچە شاگىرتىغا: «ئېزىقتۇرۇلۇشتىن ساقلىنىش ئۈچۈن داۋاملىق سەگەك تۇرۇپ، دۇئا قىلىڭلار»،— دەپ ئېيتقان (مەتتا 26:31، 33، 41). ئەگەر پېترۇس ئەيسانىڭ بۇ سۆزلىرىگە قۇلاق سېلىپ، دۇئا قىلغان بولسا، يۈرەكلىك ھالدا ئۆزىنى ئەيسانىڭ شاگىرتى ئىكەنلىكىنى ئېتىراپ قىلالىغان بولاتتى. ئەپسۇس، ئۇ سەگەك تۇرۇپ، دۇئا قىلمىغاچقا، ئۈچ قېتىم ئەيسادىن تانغان ۋە كېيىن ۋىجدان قاتتىق ئازابلىنىپ، پۇشايمان قىلغان.—مەتتا 26:69–75.
15. ئەيسا ئۆلۈمىدىن ئاۋۋالقى كېچىسى ساغلام ئوي-پىكىرىنى ساقلىغانلىقىنى قانداق كۆرسەتتى؟
15 ئەيسا مەسىھ مۇكەممەل بولغان بولسىمۇ، ھېچقاچان ئۆزىگە تايانمىغان. ئۇ پۈتۈنلەي يەھۋاغا ئىشەنچ باغلاپ، قايتا-قايتا دۇئا قىلغان. شۇ سەۋەبتىن، ئۇ جاسارەت بىلەن خۇدانىڭ ئىرادىسىنى ئورۇندىيالىغان (مەتتا 26:39، 42، 44؛ يۇھاننا 18:4، 5). شەك-شۈبھىسىزكى، ئەيسانىڭ ئۆلۈمىنىڭ ئالدىدىكى كېچىسى قايتا-قايتا دۇئا قىلىپ، يەھۋاغا تايانغانلىقى، بىر ئۆمۈر پېترۇسنىڭ ئېسىدىن چىقمىغان.
16. پېترۇس ساغلام ئوي-پىكىرلىك بولۇشنى ئۆگەنگەنلىكىنى قانداق كۆرسەتتى؟ (1-پېترۇس 4:7)
16 ۋاقىت ئۆتۈشىگە ئەگىشىپ، پېترۇسمۇ دائىم دۇئا قىلىپ، كۆپرەك يەھۋاغا تايىنىشنى ئۆگەنگەن. تىرىلگەندىن كېيىن، ئەيسا مەسىھ پېترۇس ۋە باشقا ئەلچىلەرگە كۆرۈنۈپ، ئۇلارنىڭ ئۈستىگە ۋەز قىلىش ۋەزىپىسىنى ئورۇنداشقا ياردەم بېرىدىغان مۇقەددەس روھ چۈشىدىغانلىقىنى ۋەدە قىلغان. لېكىن، ئەيسا ئۇلارغا شۇ ئىش يۈر بەرمىگۈچە يېرۇسالىمدىن كەتمەي، كۈتۈپ تۇرۇشنى بۇيرىغان (لۇقا 24:49؛ ئەلچى. 1:4، 5). كۈتۈپ تۇرغان شۇ مەزگىلدە، پېترۇس نېمە ئىش قىلغان؟ پېترۇس ۋە باشقا ئېتىقادداشلار دائىم بىللە جەم بولۇپ، بىرلىكتە دۇئا-تىلاۋەت قىلىشقان (ئەلچى. 1:13، 14). كېيىنرەك، پېترۇس بىرىنچى خېتىدە قېرىنداشلارنى ساغلام ئوي-پىكىرلىك بولۇپ، دائىم خۇداغا دۇئا قىلىشقا دەۋەت قىلغان (1-پېترۇس 4:7-نى ئوقۇڭ). ھەقىقەتەن، پېترۇس يەھۋاغا تايىنىشنى ئۆگىنىپ، جامائەتنىڭ مۇستەھكەم تۈۋرۈكىگە ئايلانغان.—گالاتىيا. 2:9.
17. مەيلى قانداق تۇغما قابىلىيىتىمىز بار بولۇشىدىن قەتئىينەزەر، ھەممىمىز نېمە قىلىشىمىز كېرەك؟ (رەسىمگە ھەم قاراڭ).
17 ساغلام-ئوي-پىكىرلىك بولۇش ئۈچۈن، ھەردائىم يەھۋاغا دۇئا قىلىشىمىز لازىم. مەيلى قانداق تۇغما قابىلىيىتىمىز بولۇشىدىن قەتئىينەزەر، داۋاملىق دۇئا قىلىپ يەھۋانىڭ ياردىمىگە مۇھتاج ئىكەنلىكىمىزنى ئېتىراپ قىلىشىمىز كېرەك. بولۇپمۇ، بىز مۇھىم قارارلارنى چىقىرىشقا توغرا كەلگەندە، چوقۇم يەھۋاغا دۇئا قىلىپ، ئۇنىڭدىن يوليورۇق سورىشىمىز لازىم. چۈنكى، ياراتقۇچىمىز يەھۋا بىز ئۈچۈن نېمىنىڭ ئەڭ پايدىلىق ئىكەنلىكىنى بىلىدۇ.
پېترۇس دۇئا قىلىپ، يەھۋاغا تايىنىشنى ئۆگەنگەن. بىزمۇ يەھۋادىن، بولۇپمۇ مۇھىم قارارلارنى قىلغاندا ياردەم سورىساق، ئەقىل-پاراسەتلىك ئىكەنلىكىمىزنى كۆرسىتەلەيمىز (17-ئابزاسقا قاراڭ)a
18. يەھۋانىڭ ئوي-پىكىر قىلىش ئۇسۇلىنى تېخىمۇ ياخشىراق چۈشىنىشىمىزگە نېمە ياردەم بېرەلەيدۇ؟
18 خۇدايىمىز بىزنى ئۆزىنىڭ ئېسىل-پەزىلەتلىرىنى ئۈلگە قىلالايدىغان قابىلىيەت بىلەن ياراتقان، بۇنىڭ ئۈچۈن ئىنتايىن مىننەتدارمىز! (يارىت. 1:26) ئەلۋەتتە، بىز ئۇنى مۇكەممەل ھالەتتە ئۈلگە قىلالمايمىز (يەشايا 55:9). لېكىن، بىزمۇ پېترۇسقا ئوخشاش، يەھۋانىڭ ئوي-پىكىر قىلىش ئۇسۇلىنى ئۈلگە قىلىش، كەمتەر ۋە ساغلام ئوي-پىكىرلىك بولۇش ئۈچۈن تىرىشچانلىق كۆرسىتەيلى!
51-ناخشا يېپىش چىڭ يەھۋاغا!
a رەسىمدە: قېرىندىشىمىز ئىشقا قوبۇل قىلىش يۈز تۇرانە سۆھبىتىگە كىرىشتىن ئاۋۋال ئۈنسىز دۇئا قىلىۋاتىدۇ.