23-تەتقىق ماقالىسى
138-ناخشا يەھۋا — سېنىڭ ئىسمىڭ
يەھۋانىڭ ئىسىمى سىز ئۈچۈن قانچىلىك مۇھىم؟
«‹سىلەر مېنىڭ گۇۋاھچىلىرىم›،— دەيدۇ يەھۋا» .—يەشايا 43:10.
مەركىزى ئىدىيە
يەھۋانىڭ ئىسىمىغا چۈشۈرۈلگەن داغ چىقىرىلىپ تاشلىنىپ، ئۇنىڭ ئىسىمى مۇقەددەس قىلىنىشى ئۈچۈن ئۆز ھەسسىمىزنى قانداق قوشالايدىغانلىقىمىزنى كۆرۈپ چىقىمىز.
1، 2. ئەيسا ئۈچۈن يەھۋانىڭ ئىسىمى مۇھىم بولغانلىقىنى قەيەردىن بىلىمىز؟
ئەيسا مەسىھ نىسپەتەن يەھۋانىڭ ئىسىمىدىن مۇھىمراق ھېچنەرسە بولمىغان. يەھۋانىڭ ئىسىمىنى باشقىلارغا بىلدۈرۈشتە، ھېچبىر ئىنسان ئەيساغا ئوخشاش ئەجىر سىڭدۈرمىگەن. ئالدىنقى ماقالىدە مۇھاكىمە قىلغىنىمىزدەك، يەھۋانىڭ مۇقەددەس ۋە ئادىل خۇدا ئىكەنلىكىنى ئىسپاتلاش ئۈچۈن، ئەيسا ئۆز جېنىنى پىدا قىلىشقا تەييار بولغان (ماركۇس 14:36؛ ئىبرانىي. 10:7–9). يەھۋانىڭ ئىسىمىنى مۇقەددەس قىلىش ئۈچۈن، ئەيسا مەسىھنىڭ مىڭ يىل ھۆكۈمرانلىقى ئاخىرلاشقاندا، ئۇ بارچە ھوقۇقنى ئاسماندىكى ئاتىسىغا تاپشۇرۇپ بېرىدۇ (1-كورىنت. 15:26–28). ئەيسانىڭ بۇ قىلغان بارچە ئىشلىرى ئاتىسىغا بولغان سۆيگۈ-مۇھەببىتىنىڭ نەقەدەر چوڭقۇرلۇقىنى ئىسپاتلايدۇ.
2 ھەزرىتى ئەيسا يەر يۈزىگە ئاتىسىنىڭ ئىسىمى بىلەن كەلگەن (يۇھاننا 5:43؛ 12:13). ئۇ ئۆز ئەگەشكۈچىلىرىگە يەھۋانىڭ ئىسىمىنى بىلدۈرگەن (يۇھاننا 17:6، 26). ئەيسا يەھۋانىڭ ئىسىمى بىلەن تەلىم بېرىپ، مۆجىزىلەرنى كۆرسەتكەن (يۇھاننا 10:25). يەنە ئەيسا ئۆز شاگىرتلىرى ئۈچۈن دۇئا قىلغاندا، «ماڭا بەرگەن ئىسىمىڭ بىلەن ئۇلارنى قوغدىغىن» دېگەنىدى (يۇھاننا 17:11). كۆرگىنىمىزدەك، ئەيسا ئۈچۈن يەھۋانىڭ ئىسىمى ئەڭ مۇھىم بولغان. دېمەك، مەسىھنىڭ ئەگەشكۈچىلىرى يەھۋانىڭ ئىسىمىنى بىلمىسە ۋە ئۇنى قوللانمىسا، ئۆزىنى قانداقمۇ «مەن ئەيسانىڭ شاگىرتى» دېيەلەيدۇ؟
3. بۇ ماقالىدە، بىز نېمىلەرنى مۇھاكىمە قىلىمىز؟
3 بىز ئەيسانىڭ ھەقىقىي ئەگەشكۈچىلىرى سۈپىتىدە، ئۇنى ئۈلگە قىلىپ، يەھۋانىڭ ئىسىمىغا سۆيگۈ-مۇھەببەت ۋە ئىززەت-ھۆرمەت كۆرسىتىمىز (1-پېتر. 2:21). بۇ ماقالىدە، خۇدا پادىشاھلىقى توغرۇلۇق خۇش خەۋەرنى ۋەز قىلىۋاتقانلارنى نېمە ئۈچۈن يەھۋا ئۆز ئىسىمى بىلەن ئاتالغان خەلق دەپ ئاتايدىغانلىقىنى مۇھاكىمە قىلىمىز (مەتتا 24:14). ئۇنىڭدىن باشقا، بىز ئۈچۈن خۇدانىڭ ئىسىمى قانچىلىك مۇھىم بولۇشى كېرەكلىكىنى كۆرۈپ چىقىمىز.
«ئۆز ئىسمى بىلەن ئاتىلىدىغان خەلق»
4. (1) ئەيسا ئاسمانغا قايتىپ كېتىشتىن ئاۋۋال شاگىرتلىرىغا قانداق ۋەزىپىنى تاپشۇرغان؟ (2) بۇنىڭدىن قانداق سوئال پەيدا بولىدۇ؟
4 ئەيسا ئاسمانغا كۆتىرىلىشتىن ئاۋۋال شاگىرتلىرىغا مۇنداق دېگەن: «مۇقەددەس روھ ئۈستۈڭلارغا چۈشكەندە، سىلەر كۈچ-قۇدرەتكە تولۇپ، يېرۇسالىم، پۈتۈن يەھۇدىيە ۋە سامارىيە، ھەتتا يەر يۈزىنىڭ چەت ياقىلىرىغىچە مېنىڭ گۇۋاھچىلىرىم بولىسىلەر» (ئەلچى. 1:8). دېمەك، خۇش خەۋەر پەقەت ئىسرائىل زېمىنىدا ئەمەس، پۈتكۈل يەر يۈزىدە يەتكۈزۈلۈپ، بارچە مىللەت كىشىلىرى ئەيسانىڭ شاگىرتلىرى بولۇش پۇرسىتىگە ئىگە بولاتتى (مەتتا 28:19، 20). بىراق، ئەيسا شۇنداق دېگەن: «مېنىڭ گۇۋاھچىلىرىم بولىسىلەر». ئۇنداقتا، يېڭىدىن ئەيساغا ئەگەشكەن شاگىرتلار پەقەت ئەيسانىڭ گۇۋاھچىلىرى بولۇشى كېرەكمۇ ياكى يەھۋانىڭ ئىسىمىنى بىلىپ، ئۇنىڭمۇ گۇۋاھچىلىرى بولۇشى كېرەكمۇ؟ بۇ سوئالغا ئەلچىلەر كىتابى 15-بابتا يېزىلغان ۋەقەلەر جاۋاب بېرىدۇ.
5. يېرۇسالىمدىكى ئەلچىلەر بىلەن ئاقساقاللار مەسىھنىڭ ئەگەشكۈچىلىرىنىڭ ھەممىسى يەھۋانىڭ ئىسىمىنى بىلىشى كېرەكلىكىنى قانداق كۆرسەتكەن؟ (رەسىمگە ھەم قاراڭ).
5 مىلادى 49-يىلى، يېرۇسالىمدىكى ئەلچىلەر ۋە ئاقساقاللار بىر يەرگە جەم بولۇپ، «ئەيسانىڭ شاگىرتى بولۇشنى خالايدىغان يات مىللەت كىشىلىرى خەتنە قىلدۇرۇشى كېرەكمۇ؟» دېگەن مۇھىم بىر سوئال ئۈسىتدە مۇھاكىمە قىلىشقان. مۇھاكىمە ئاخىرلاشقاندا، ئەيسانىڭ ئىنىسى ياقۇپ مۇنداق دېگەن: «سىمون ھېلىلا خۇدانىڭ تۇنجى قېتىم يەھۇدىي ئەمەسلەرگىمۇ كۆڭۈل بۆلگەندە، ئۆز ئىسىمى ئۈچۈن ئۇلار ئارىسىدىن بىر خەلقنى قانداق تاللىغانلىقىنى تەپسىلىي بايان قىلىپ ئۆتتى». ياقۇپ سۆزىدە كىمنىڭ ئىسىمىنى نەزەردە تۇتقان؟ ياقۇپ ئارقىدىنلا ئاموس پەيغەمبەرنىڭ سۆزلىرىنى نەقىل كەلتۈرۈپ مۇنداق دېگەن: «‹باشقا بارچە مىللەتلەردىن چىققان ۋە مېنىڭ ئىسىمىم بىلەن ئاتالغان ئىنسانلار بىرلىكتە ئىخلاس بىلەن يەھۋانى ئىزدەيدۇ›، دەپ . . . يەھۋا ئېيتىدۇ» (ئەلچى. 15:14–18). بۇنىڭدىن شۇنى كۆرۈۋېلىشقا بولىدۇكى، يېڭى شاگىرتلار پەقەت يەھۋانى تونۇپ قالماي، شۇ ئىسىم بىلەن ئاتىلىشى كېرەك ئىدى. دېمەك، ئۇلار كىشىلەرگە خۇدانىڭ ئىسىمى توغرۇلۇق گۇۋاھلىق بېرىشى ۋە كىشىلەرمۇ ئۇلارنى شۇ ئىسىم بىلەن تونۇشى كېرەك ئىدى.
بىرىنچى ئەسىردىكى يېتەكچى كېڭەشنىڭ يىغىلىشىدا بۇرادەرلەر مەسىھ ئەگەشكۈچىلىرى چوقۇم يەھۋانىڭ ئىسىمى بىلەن ئاتىلىدىغان خەلق بولۇش كېرەكلىكىنى ئېنىق چۈشەنگەن (5-ئابزاسقا قاراڭ)
6، 7. (1) ئەيسا يەر يۈزىگە نېمە ئۈچۈن كەلگەن؟ (2) ئەيسانىڭ يەر يۈزىگە كېلىشىنىڭ قانداق باشقا مۇھىمراق سەۋەبى بولغان؟
6 ئەيسانىڭ ئىسىمىنىڭ مەنىسى «يەھۋا — قۇتقۇزۇلۇش». يەھۋا ھەقىقەتەن ئەيسا مەسىھ ئارقىلىق دۇنيانى قۇتقۇزماقچى بولغان. شۇڭلاشقا، ئەيسا يەر يۈزىگە كېلىپ، ئۆز جېنىنى تۆلەم قۇربانلىقى سۈپىتىدە بەرگەن (مەتتا 20:28). دېمەك، ئەيسا تۆلەم ئارقىلىق ئىنسانىيەتنى قۇتقۇزۇلۇش ۋە مەڭگۈلۈك ھاياتقا ئېرىشىش ئىمكانىيىتىگە ئىگە قىلغانىدى.—يۇھاننا 3:16.
7 بىراق، نېمە ئۈچۈن ئىنسانىيەت تۆلەم موھتاج بولغان؟ ئېرەم بېغىدا يۈز بەرگەن ۋەقەدىن بۇ سوئالغا جاۋاب تاپالايمىز. ئالدىنقى ماقالىدە مۇھاكىمە قىلغىنىمىزدەك، ئادەم-ئاتا بىلەن ھاۋا-ئانا خۇداغا قارشى ئىسيان كۆتۈرۈپ، مەڭگۈلۈك ھاياتلىقتىن مەھرۇم قالغان (يارىت. 3:6، 24). ئەمما، ئەيسا گۇناھكار ئىنسانلارنى قۇتقۇزۇشتىنمۇ مۇھىمراق سەۋەب بىلەن يەرگە يۈزىگە كەلگەن. يەھۋانىڭ ئىسىمىغا داغ چۈشۈرۈلگەن ئىدى (يارىت. 3:4، 5). شۇڭا، ئادەم-ئاتا بىلەن ھاۋا-ئانىنىڭ ئەۋلادلىرىنىڭ قۇتقۇزۇلۇشى ناھايىتى مۇھىم بىر ئىش بىلەن باغلىنىشلىق بولغان. ئۇ بولسىمۇ، يەھۋانىڭ ئىسىمىنىڭ مۇقەددەس قىلىنىشى. ئەيسا مەسىھ يەھۋانىڭ ئىسىمى بىلەن كېلىپ، ئۇنىڭغا ۋاكالىتەن سۆزلىگەچكە، ئۇ يەھۋانىڭ ئىسىمىنىڭ مۇقەددەس قىلىنىشىدا ناھايىتى مۇھىم رول ئوينىغان.
بىر كىشى خۇدانىڭ ئىسىمىنى بىلمىسە ۋە ئۇنى قوللانمىسا، قانداقمۇ ئەيسانىڭ ھەقىقىي ئەگەشكۈچىسى بولالايدۇ؟
8. ئەيسانىڭ ھەممە شاگىرتلىرى نېمىنى ئېتىراپ قىلىشى شەرت؟
8 مەيلى يەھۇدىيلار ياكى يات مىللەتلەر بولسۇن، ئەيساغا ئىشەنگەنلەرنىڭ ھەممىسى قۇتقۇزۇلۇش يەھۋا خۇدادىن كېلىدىغانلىقىنى ئېتىراپ قىلىشى شەرت (يۇھاننا 17:3). ئۇلار ئەيساغا ئوخشاش يەھۋانىڭ ئىسىمى بىلەن ئاتىلىشى كېرەك. ئۇنىڭدىن باشقا، يەنە ئۇلار يەھۋانىڭ ئىسىمىنى مۇقەددەس قىلىشنىڭ ئىنتايىن مۇھىملىقىنى ئىكەنلىكىنى تونۇپ يېتىشى لازىم. ئۇلارنىڭ قۇتقۇزۇلۇشى بۇلار بىلەن زىچ باغلىنىشلىق (ئەلچى. 2:21، 22). شۇڭلاشقا، ئەيسانىڭ بارلىق ساداقەتمەن شاگىرتلىرى يەھۋا خۇدا ۋە ئۇ ئەۋەتكەن ئەيسا مەسىھ توغرۇلۇق بىلىم ئېلىشى كېرەك. شۇڭا، ئەيسانىڭ دۇئاسىدا مۇنداق سۆزلەرنى قىلغانلىقى ھەيران قالارلىق ئەمەس: «مەن سېنىڭ ئىسىمىڭنى ئۇلارغا بىلدۈردۈم، يەنە داۋاملىق بىلدۈرىمەن. بۇنىڭ بىلەن، سەن ماڭا كۆرسەتكەن مۇھەببىتىڭ ئۇلاردا بولسۇن ۋە مەن ئۇلار بىلەن بىرلىك ئىچىدە بولاي».—يۇھاننا 17:26.
«سىلەر مېنىڭ گۇۋاھچىلىرىم»
9. يەھۋانىڭ ئىسىمى بىز ئۈچۈن مۇھىم ئىكەنلىكىنى قانداق كۆرسىتەلەيمىز؟
9 ئەيسانىڭ ھەقىقىي شاگىرتلىرى سۈپىتىدە، يەھۋانىڭ ئىسىمىنىڭ مۇقەددەس قىلىنىشىغا كۆڭۈل بۆلۈشىمىز كېرەك (مەتتا 6:9، 10). بىز يەھۋانىڭ ئىسىمى ھەرقانداق نەرسىدىن مۇھىم دەپ قارىشىمىز لازىم. بۇ پەقەت كۆز قارىشىمىز ياكى ئوي-پىكىرىمىزدە ئەمەس، بەلكى ئەمەلىي ئىش-ھەرىكىتىمىزدە ئىپادىلىنىشى زۆرۈر. ئۇنداقتا، يەھۋانىڭ ئىسىمىنىڭ مۇقەددەس قىلىنىپ، شەيتاننىڭ يالغانچىلىقى ئىسپاتلىنىشى ئۈچۈن ئۆز ھەسسىمىزنى قانداق قوشالايمىز؟
10. بىز يەشايا 42–44-بابلاردىن نېمىنى ئۆگىنىمىز؟ (يەشايا 43:9؛ 44:7–9؛ رەسىمگە ھەم قاراڭ).
10 يەشايا 42—44-بابلاردىن يەھۋانىڭ ئىسىمى قىلىش نېمە قىلالايدىغانلىقىمىزنى ئۆگىنەلەيمىز. بۇ بابلاردا كۆچمە مەنىدە سوت ئېچىلىپ، يەھۋا ئۇنىڭغا ئىبادەت قىلمىغان كىشىلەرنى ئۆزلىرى چوقۇنىدىغان ئىلاھلارنىڭ ھەقىقىي خۇدا ئىكەنلىكىنى ئىسپات بېرىشكە چاقىرغان. يەھۋا يەنە ئۇلارنىڭ سۆزلىرىنى تەستىقلايدىغان گۇۋاھچىلارنى ئېلىپ كېلىشنى ئېيتقان. بىراق، بىرمۇ گۇۋاھچى چىقمىغان!—يەشايا 43:9؛ 44:7–9-نى ئوقۇڭ.
بىز ئېيتقان سۆزلىرىمىز بىلەن قىلغان ئىشلىرىمىز ئارقىلىق يەھۋانىڭ ھەقىقىي خۇدا ئىكەنلىكىنى دەلىللەيمىز (10، 11-ئابزاسقا قاراڭ)
11. يەشايا 43:10–12-ئايەتلەردە، يەھۋا ئۆز خىزمەتچىلىرىگە نېمە دەيدۇ؟
11 يەشايا 43:10–12-نى ئوقۇڭ. يەھۋا ئۆزى خەلقىگە: «سىلەر مېنىڭ گۇۋاھچىلىرىم، . . مەن بولسام خۇدامەن»،— دېگەن. يەھۋا ئۇلاردىن مۇنۇ سوئالنى سورىغان: «مەندىن باشقا يەنە ئىلاھ بارمۇ؟» (يەشايا 44:8). بۇ سوئالغا جاۋاب بېرىش بىز ئۈچۈن چوڭ شان-شەرەپ! بىز گەپ-سۆزلىرىمىز ۋە ئىش-ھەرىكەتلىرىمىز بىلەن يەھۋانىڭ بىردىنبىر ھەق خۇدا ئىكەنلىكىگە گۇۋاھلىق بېرەلەيمىز. ئۇنىڭ ئىسىمى ئەڭ ئۇلۇغدۇر. بىز ئۇنىڭ ئىسىمىنى مۇقەددەس قىلىش ئۈچۈن پۈتۈن كۈچىمىز بىلەن تىرىشىمىز. شەيتان قانداق قىيىنچىلىقلار بىلەن بىزگە بېسىم قىلىشىدىن قەتئىينەزەر، بىز ئۆمۈر بويى يەھۋاغا سادىق بولۇپ، چىن قەلبىمىزدىن ياراتقۇچىمىزنى سۆيىدىغانلىقىمىزنى ئىسپاتلىيالايمىز. شۇنداق قىلىپ، بىز يەھۋانىڭ ئىسىمىنىڭ مۇقەددەس بولۇشىغا ئۆز ھەسسىمىزنى قوشالايمىز.
12. يەشايا 40:3، 5-ئايەتلەردىكى سۆزلەر قانداق ئەمەلگە ئاشقان؟
12 بىز يەھۋانىڭ ئىسىمى ياكى نام-ئابرويىنى قوغدىساق، ئەيسانى ئۈلگە قىلغان بولىمىز. يەشايا پەيغەمبەر يەنە «يەھۋانىڭ يولىنى [ئاچىدىغان ياكى تەييارلايدىغان] بىر كىشى كېلىدىغانلىقىنى بېشارەت قىلغان ئىدى (يەشايا 40:3). بۇ بېشارەت قانداق ئەمەلگە ئاشقان؟ چۆمۈلدۈرگۈچى يەھيا شۇ يولنى تەييارلىغان، ئۇ كىشىلەرنى ئەيساغا ئەگىشىشكە تەييارلىغان. ئەيسا ئۆزى ئەۋەتكەن يەھۋانىڭ ئىسىمى بىلەن كېلىپ، ئۇنىڭغا ۋاكالىتەن سۆز قىلغان. شۇڭلاشقا يەھيا ئەمەلىيەتتە يەھۋانىڭ يولىنى تەييارلىغان (مەتتا 3:3؛ ماركۇس 1:2–4؛ لۇقا 3:3–6). يەنە شۇ بېشارەتتە «يەھۋانىڭ ئۇلۇغلىقى جەزمەن نامايان بولىدۇ» دېيىلگەن (يەشايا 40:5). بۇ سۆزلەر قانداق ئەمەلگە ئاشقان؟ ئەيسا يەر يۈزىگە كەلگەندە، يەھۋانى ئۇنىڭ ئېسىل پەزىلەتلىرىنى شۇنچىلىك مۇكەممەل ئۈلگە قىلىپ، ئۇنىڭ ئۇلۇغلىقىنى ئەكس ئەتتۈرگەن. شۇڭا، ئەيسانى كۆرگەن ئىنسانلارغا يەھۋا ئۆزى يەر يۈزىگە كەلگەندەك كۆرگەن.—يۇھاننا 12:45.
13. ئەيسانى قانداق ئۈلگە قىلالايمىز؟
13 ئەيساغا ئوخشاش، بىزمۇ يەھۋانىڭ گۇۋاھچىلىرى. بىز يەھۋانىڭ ئىسىمى بىلەن ئاتىلىپ، بارچە ئىنسانلارغا ئۇنىڭ ئاجايىپ ئىشلىرىنى توغرۇلۇق ۋەز ئېيتىمىز. يەھۋا ئۈچۈن تەلتۆكۈس گۇۋاھلىق بېرىش ئۈچۈن، بىز ئەيسا ئۈچۈنمۇ گۇۋاھلىق بېرىپ، كىشىلەرنىڭ ياراتقۇچى يەھۋانىڭ ئىسىمى مۇقەددەس قىلىنىش ئۈچۈن ئەيسانىڭ قانداق مۇھىم رول ئوينايدىغانلىقىنى چۈشىنىشىگە ياردەم بېرىشىمىز كېرەك (ئەلچى. 1:8). يەھۋا ئۈچۈن ئەيسا ئەڭ ياخشى گۇۋاھلىق بەرگەن. شۇڭا، بىز ئۇنىڭ ئۈلگىسىگە ئەگىشىشىمىز كېرەك (ۋەھىي. 1:5). ئۇنداقتا، يەھۋانىڭ ئىسىمى بىز ئۈچۈن مۇھىم ئىكەنلىكىنى قانداق كۆرسىتەلەيمىز؟
يەھۋانىڭ ئىسىمى بىز ئۈچۈن بەك مۇھىم
14. زەبۇر 105:3-ئايەتكە ئاساسلانغاندا، بىز يەھۋانىڭ ئىسىمىغا قارىتا قانداق ھېس-تۇيغۇدا بولىمىز؟
14 بىز يەھۋانىڭ ئىسىمىدىن پەخىرلىنىمىز (زەبۇر 105:3-نى ئوقۇڭ). بىز يەھۋانىڭ ئىسىمى بىلەن پەخىرلىنىپ ماختانساق، يەھۋا چوقۇم بەك خۇشال بولىدۇ (يەرەم. 9:23، 24؛ 1-كورىنت. 1:31؛ 2-كورىنت. 10:17). «يەھۋا بىلەن ماختىنىش» دېگەن سۆزلەر، بىز يەھۋا خۇدايىمىز بولغانلىقىدىن پەخىرلىنىدىغانلىقىمىزنى بىلدۈرىدۇ. شۇڭلاشقا، باشقىلارنىڭ ئالدىدا يەھۋانىڭ ئىسىمىدىن نومۇس قىلماي، ئەكسىچە ئاشۇ مۇقەددەس ئىسىمىنى جاكارلاش ۋە ئۇنىڭ نام-ئابرويىنى قوغداشنى چوڭ شان-شەرەپ دەپ بىلىپ، خىزمەتداشلىرىمىز، سىنىپداشلىرىمىز، قولۇم-قوشنىلىرىمىز ۋە باشقىلارغا ئۆزىمىزنىڭ يەھۋا گۇۋاھچىلىرى ئىكەنلىكىنى ئېيتىشىمىز كېرەك! بىراق، شەيتان بىزنىڭ باشقىلارغا يەھۋانىڭ ئىسىمى توغرۇلۇق ئېيتىشىمىزنى قەتئىي خالىمايدۇ (يەرەم. 11:21؛ ۋەھىي. 12:17). شەيتان ۋە ئۇنىڭ ساختا پەيغەمبەرلىرى ھەتتا ئىنسانلارنىڭ يەھۋانىڭ ئىسىمىنى ئۇنتۇپ كېتىشىنى خالايدۇ (يەرەم. 23:26، 27). بىراق، بىز يەھۋانىڭ ئىسىمىغا بولغان چوڭقۇر سۆيگۈ-مۇھەببىتىمىز سەۋەبلىك، ئۇنى مەدھىيىلەش پۇرسىتىنى ھەرگىزمۇ قولدىن بەرمەيمىز.—زەبۇر 5:11؛ 89:16.
15. يەھۋانىڭ ئىسىمىنى چاقىرىش دېگەن نېمىنى بىلدۈرىدۇ؟
15 بىز داۋاملىق يەھۋانىڭ ئىسىمىنى چاقىرىمىز (يوئېل 2:32؛ رىملىقلار 10:13، 14). يەھۋانى ئىسىمىنى چاقىرىش پەقەت ئۇنىڭ ئىسىمىنى بىلىش ياكى شۇ ئىسىم بىلەن ئۇنى ئاتاشنى ئەمەس، كۆپ نەرسىلەرنى ئۆز ئىچىگە ئالىدۇ. يەنى يەھۋا زادى قانداق خۇدا ئىكەنلىكىنى چۈشىنىش، ئۇنىڭغا ئىشىنىش ۋە ئۇنىڭدىن ياردەم ۋە يوليورۇق سوراش قاتارلىقلارنىمۇ ئۆز ئىچىگە ئالىدۇ. (زەبۇر 20:7؛ 99:6؛ 116:4؛ 145:18). ئۇنىڭدىن باشقا، يەھۋانىڭ ئىسىمى ۋە ئېسىل پەزىلەتلىرى ھەققىدە باشقىلارغا ۋەز قىلىپ، ئۇلارنى توۋا قىلىشقا دەۋەت قىلىشىمىز ۋە ئۇلارنىڭ ھاياتىدا ئۆزگەرتىشلەرنى قىلىشىغا ياردەم بېرىشىمىز لازىم. شۇنداق قىلساق، ئۇلار خۇدانىڭ رەھىم-شەپقىتىگە ئېرىشىپ، قۇتقۇزۇلۇپ قالالايدۇ.—يەشايا 12:4؛ ئەلچى. 2:21، 38.
16. بىز شەيتاننىڭ يالغانچى ئىكەنلىكىنى قانداق ئىسپاتلىيالايمىز؟
16 بىز يەھۋانىڭ ئىسىمى ئۈچۈن ئازاب-ئوقۇبەت چېكىشكە تەييار (ياقۇپ 5:10، 11). بىز قىيىنچىلىقلارغا دۇچ كەلگەندە، يەھۋاغا ساداقەتمەنلىكنى قالساق، شەيتاننىڭ يالغانچى ئىكەنلىكىنى ئىسپاتلايمىز. ئايۇپ پەيغەمبەرنىڭ زامانىدا شەيتان خۇدانىڭ خىزمەتچىلىرىنى ئەيىبلەپ مۇنداق دېگەن: «ئادەم ھەممە بار نەرسىلىرىنى ئۆز جېنىنى ساقلاپ قېلىش ئۈچۈن بېرىدۇ» (ئايۇپ 2:4). شەيتان بۇ سۆزلەرنى قىلىش ئارقىلىق، ئىنسان پەقەت ئۆزىگە قولاي بولغان يەھۋاغا خىزمەت قىلىدۇ، بىراق تۇرمۇشىدا قىيىنچىلىقلارغا دۇچ كەلسە، ئۇنى تاشلاپ كېتىدىغانلىقىنى ئېيتقانىدى. ئايۇپ پەيغەمبەر ساداقەتمەنلىكىنى ساقلاپ، شەيتاننىڭ يالغانچى ئىكەنلىكىنى ئىسپاتلىغانىدى. شەيتان قانداق ئۇسۇلدا بىزگە ھۇجۇم قىلىشىدىن قەتئىينەزەر، بىزمۇ يەھۋاغا خىزمەت قىلىشنى توختاتماي، شەيتاننىڭ ئەيىبلىشىگە جاۋاب قايتۇرالايمىز. يەھۋا چوقۇم ئۆز ئىسىمى ئۈچۈن بىزنى قوغدايدىغانلىقىغا قەتئىي ئىشەنچ قىلالايمىز.—يۇھاننا 17:11.
17. 1-پېترۇس 2:12-ئايەتكە ئاساسلانغاندا، بىز قايسى ئۇسۇلدا يەھۋانىڭ ئىسىمىغا شان-شەرەپ كەلتۈرەلەيمىز؟
17 پۈتۈن كۈچىمىز بىلەن يەھۋانىڭ ئىسىمىنى مەدھىيىلەيمىز (پەند ن. 30:9؛ يەرەم. 7:8–11). بىز يەھۋا گۇۋاھچىسى سۈپىتىدە، ئۇنىڭ ئىسىمى بىلەن تونۇلغاچقا، گەپ-سۆز ۋە ئىش-ھەرىكىتىمىزدە يەھۋانىڭ ئىسىمىنى مەدھىيىلەيمىز، ياكى ئەكسىنچە ئۇنىڭ ئىسىمىغا داغ چۈشۈرىمىز (1-پېترۇس 2:12-نى ئوقۇڭ). شۇڭا، گەپ-سۆزلىرىمىزگە ۋە يۈرۈش-تۇرۇشىمىزغا دىققەت قىلىشىمىز كېرەك. گەرچە بىز نامۇكەممەل بولساقمۇ، پۈتۈن كۈچىمىز بىلەن تىرىشچانلىق كۆرسەتسەك، يەھۋانىڭ ئىسىمىغا شان-شەرەپ كەلتۈرەلەيمىز.
18. يەھۋانىڭ ئىسىمى بىز ئۈچۈن مۇھىم ئىكەنلىكىنى ئىسپاتلاش ئۈچۈن يەنە نېمە قىلالايمىز؟ (رەسىمگە ھەم قاراڭ).
18 ئۆز نام-ئابرويىمىزغا قارىغاندا يەھۋانىڭ ئىسىمى تېخىمۇ مۇھىم (زەبۇر 138:2). نېمە ئۈچۈن بىز ھەمىشە بۇنى ئەستە تۇتۇشىمىز لازىم؟ چۈنكى، يەھۋانىڭ ئىسىمىغا بولغان چوڭقۇر سۆيگۈ-مۇھەببىتىمىز سەۋەبلىك، ئادەملەر بىزنى ئۆچ كۆرۈشى ۋە يامان گەپ-سۆزلەر بىلەن ھاقارەتلىشى مۇمكىنa. خۇدانىڭ ئىسىمىنى مۇقەددەس قىلىش ئۈچۈن ئەيسا جىنايەتچى قاتارىدا مۇئامىلىگە ئۇچراپ خورلۇق تارتىشقا، ئازاب-ئوقۇبەت چېكىپ ئۆلۈشكە رازى بولغان. ئۇ شەرمەندە قىلىنىشقا پەرۋا قىلمىغان، يەنى ئادەملەرنىڭ ئۆزىگە قانداق قاراشتا بولۇشىدىن ئەنسىرىمىگەن (ئىبرانىي. 12:2–4). ئۇ دىققىتىنى يەھۋانىڭ ئىرادىسىنى ئورۇنلاشقا قاراتقان.—مەتتا 26:39.
19. سىز يەھۋانىڭ ئىسىمىغا قارىتا قانداق ھېس-تۇيغۇدا بولىسىز ۋە نېمە ئۈچۈن؟
19 بىز يەھۋانىڭ ئىسىمى بىلەن يەھۋا گۇۋاھچىسى دەپ ئاتالغانلىقىمىزدىن پەخىرلىنىمىز. بۇ بىز ئۈچۈن چوڭ شان-شەرەپ! شۇڭا، خۇدانىڭ ئىسىمى ئۈچۈن ھاقارەتلەنسەكمۇ، داۋاملىق ئۇنىڭ ئىسىمىنى مەدھىيىلەيمىز. ئۆز نام-ئابرويىمىزغا قارىغاندا يەھۋانىڭ ئىسىمىنى مۇھىم دەپ ھېسابلايمىز. شۇڭا، شەيتان مەيلى قانداق ئۇسۇلنى قوللىنىپ، بىزنى توسۇشقا ھەرىكەت قىلسا-قىلسۇن، يەھۋانىڭ ئىسىمىنى مەدھىيىلەشكە قەتئىي بەل باقايلى. شۇنداق قىلساق، بىزمۇ ئەيسا مەسىھنى ئۈلگە قىلىپ، ھاياتىمىزدا يەھۋانىڭ ئىسىمى بىز ئۈچۈن ئەڭ مۇھىم ئىكەنلىكىنى ئىسپاتلاپ كۆرسىتىمىز.
9-ناخشا ئالقىشلاڭ خۇدايىمىز يەھۋانى!
a ئۈچ دوستى ئايۇپ پەيغەمبەرنى ئەيىبلىگەندە، ئۇ ئۆز نام-ئابرويى توغرۇلۇق كۆپ ئويلىغاچقا، خۇدانىڭ ئىسىمىنى قوغدىمىغانىدى. دەسلەپتە، ئايۇپ پەرزەنتلىرى ۋە مال-دۇنياسىدىن ئايرىلىپ قالغاندا، ئۇ «گۇناھ قىلمىدى ۋە خۇدانى ئەيىبلىمىدى» (ئايۇپ 1:22؛ 2:10). بىراق، كېيىنرەك ئۈچ دوستى ئۇنى يامان ئىش قىلدىڭ دەپ ناھەق ئەيىبلىگەندە، ئۇ ئۆزىنى قوغداپ، قوپال گەپ-سۆزلەرنى قىلغان. ئۇ خۇدانىڭ ئىسىمىنى مۇقەددەس قىلىشقا قارىغاندا، ئۆزىنىڭ نام-ئابرويىنى قوغداشنى مۇھىمراق ھېسابلىغانىدى.—ئايۇپ 6:3؛ 13:4، 5؛ 32:2؛ 34:5.