8-دەرس
خۇدا نېمە ئۈچۈن يامانلىق ۋە ئازاب-ئوقۇبەتلەرگە يول قويىدۇ؟
1. يامانلىق قانداق باشلانغان؟
خۇدا ئادەمزاتقا شۇنچە ۋاقىت ھاكىمىيەت قىلىشىغا يول قويغانلىقتىن، ئادەملەرنىڭ ئۆز قىيىنچىلىقلىرىنى يېشەلمەيدىغىنى روشەن بولدى
شەيتان تۇنجى يالغاننى ئېيتقاندىن باشلاپ يەر يۈزىدە يامانلىق پەيدا بولغان. شەيتان ئەسلىدە مۇكەممەل بىر پەرىشتە ئىدى. بىراق، «ئۇ ھەقىقەتتە چىڭ تۇرمىغان» (يۇھاننا 8:44، ي د). شەيتان پەقەت خۇداغىلا خاس ئىبادەتكە كۆز قىزارتىپ، قەلبىدە خاتا ئارزۇ-ھەۋەسنى يېتىلدۈرگەن. ئۇ تۇنجى ئايال ھاۋا-ئانىغا يالغان سۆزلەپ، خۇداغا ئىتائەت قىلىشنىڭ ئورنىغا ئۆزىگە بويسۇنۇشقا كۆندۈرگەن. ئادەم-ئاتا ھاۋا-ئانىغا ئەگىشىپ خۇداغا ئىتائەتسىزلىك قىلغان. ئادەم-ئاتىنىڭ قارارى ئازاب-ئوقۇبەت ۋە ئۆلۈم يولىغا باشلىغان.— يارىتىلىش 3:1–6، 19-ئايەتلەرنى ئوقۇڭ.
شەيتان ھاۋا-ئانىنى خۇداغا ئىتائەتسىزلىك قىلىشقا قۇتراتقىنىدا، خۇدانىڭ ئەڭ ئالىي ھۆكۈمرانلىق ھوقۇقىغا قارشى بىر ئىسياننى باشلىغان. شۇنىڭدىن بۇيان، كۆپلىگەن ئىنسانلار شەيتانغا ئەگىشىپ، خۇدانىڭ ئۆزلىرىگە ھۆكۈمران بولۇشىنى رەت قىلىپ كەلدى. شۇڭا، شەيتان «بۇ دۇنيانىڭ ھۆكۈمدارى» بولۇپ كەلمەكتە.— يۇھاننا 14:30؛ 1-يۇھاننا 5:19-ئايەتلەرنى ئوقۇڭ.
2. خۇدانىڭ ياراتقانلىرىدا نۇقسان بارمۇ؟
خۇدانىڭ بارلىق ئىشلىرى مۇكەممەلدۇر. شۇڭا، خۇدا ياراتقان ئىنسانلار ۋە پەرىشتىلەرنىڭ ئۇنىڭغا مۇكەممەل دەرىجىدە ئىتائەت قىلىشىغا قۇربىتى يېتەتتى (تەكرار قانۇن 32:4، 5). خۇدا بىزنى ياخشى بىلەن ياماننى تاللاش ئەركىنلىكىگە ئىگە قىلىپ ياراتقان. شۇ ئەركىنلىك بىزگە خۇداغا بولغان سۆيگۈ-مۇھەببىتىمىزنى ئىپادىلەش پۇرسىتىنى بەرگەن.— ياقۇپ 1:14، 15؛ 1-يۇھاننا 5:3-ئايەتلەرنى ئوقۇڭ.
3. خۇدا نېمە ئۈچۈن ئازاب-ئوقۇبەتلەرنى ھازىرغىچە يوق قىلمايدۇ؟
يەھۋا ئۆزىنىڭ ھۆكۈمرانلىق ھوقۇقىغا قارشى كۆتۈرۈلگەن ئىسيانغا ۋاقتىنچە رۇخسەت قىلغان. نېمە ئۈچۈن؟ خۇدانىڭ ھۆكۈمرانلىقىدىن باشقا، ھەرقانداق ھۆكۈمرانلىقنىڭ ئىنسانلارغا پايدا-مەنپەئەت ئېلىپ كېلەلمەيدىغانلىقىنى كۆرسىتىش ئۈچۈن (ۋەز 7:29؛ 8:9). ئىنسانىيەتنىڭ باشتىن ئۆتكۈزگەن 6000 يىللىق تارىخى شۇنى روشەن ئىسپاتلىدىكى: ئىنسانلارنىڭ ھۆكۈمرانلىقى ئۇرۇش، جىنايەت، ناھەقلىق ۋە كېسەللىكلەرنى تۈگىتەلىگىنى يوق.— چىقىش 9:16 ب ج؛ يەرەمىيا 10:23-ئايەتلەرنى ئوقۇڭ.
ئىنسانلارنىڭ ھۆكۈمرانلىقىغا ئوخشىمايدىغان يېرى، خۇدانىڭ ھۆكۈمرانلىقى بۇ ھۆكۈمرانلىقنى قوبۇل قىلغۇچىلارغا پايدا-مەنپەئەت ئېلىپ كېلىدۇ (يەشايا 48:17، 18). پات-ئارىدا، يەھۋا ئىنسانلار قۇرغان بارلىق ھۆكۈمرانلىقلارنى يوق قىلىدۇ. پەقەت خۇدانىڭ ھۆكۈمرانلىقىنى قوبۇل قىلغۇچىلارلا يەر يۈزىدە ياشىيالايدۇ.—يەشايا 11:9. — دانىيال 2:44-ئايەتنى ئوقۇڭ.
«خۇدا نېمە ئۈچۈن ئازاب-ئوقۇبەتلەرگە يول قويىدۇ؟» ناملىق فىلىمنى كۆرۈڭ
4. خۇدانىڭ سەۋرچانلىقى بىزنى قانداق پۇرسەتكە ئىگە قىلىدۇ؟
شەيتان ئىنسانلارنىڭ يەھۋاغا ئىبادەت قىلىشى ئۆزلىرىنىڭ شەخسىي مەنپەئەتلىرى ئۈچۈن، دەپ جاكارلىغان. شەيتاننىڭ يالغانچى ئىكەنلىكىنى ئىسپاتلىيالايسىز! شۇنداق قىلىشنى خالامسىز؟ خۇدانىڭ سەۋرچانلىقى — بارلىق ئىنسانلارنى خۇدانىڭ ھۆكۈمرانلىقىنى ياكى ئىنسانلارنىڭ ھۆكۈمرانلىقىنى قوللايدىغانلىقىنى كۆرسىتىش پۇرسىتىگە ئىگە قىلغان. بىزنىڭ ياشاش يولىمىز، قايسى بىرىنى تاللايدىغانلىقىمىزنى كۆرسىتىدۇ.— ئايۇپ 1:8–12؛ پەندى-نەسىھەت 27:11-ئايەتلەرنى ئوقۇڭ.
5. قانداق قىلىپ خۇدانى ئۆز ھۆكۈمرانىمىز سۈپىتىدە تاللىيالايمىز؟
بىزنىڭ قارارلىرىمىز خۇدا بىزنىڭ ھۆكۈمران بولۇشىنى خالايدىغىنىمىزنى كۆرسىتىدۇ
خۇدا سۆزى بولغان مۇقەددەس كىتابقا ئاساسەن، ھەق خۇدا توغرۇلۇق بىلىم ئېلىش ۋە ئۇنىڭغا توغرا ئىبادەت قىلىش ئارقىلىق، ئۇنى ئۆز ھۆكۈمرانىمىز سۈپىتىدە تاللىيالايمىز (يۇھاننا 4:23). سىياسىي ئىشلار ۋە ئۇرۇشقا قاتناشماسلىق ئارقىلىق شەيتاننىڭ ھۆكۈمرانلىقىنى رەت قىلالايمىز.— يۇھاننا 17:14-ئايەتنى ئوقۇڭ.
شەيتان ئۆز كۈچىنى ئىشلىتىپ، ئەخلاقسىز، زىيانلىق ئىش-ھەرىكەتلەرنى تەشۋىق قىلىدۇ. شۇنداق ئىش-ھەرىكەتلەردىن يىراق تۇرساق، بەزى دوست ۋە تۇغقانلار مەسخىرە قىلىشى ياكى قارشى تۇرۇشى مۇمكىن (1-پېترۇس 4:3، 4). شۇڭا، بىز بىر تاللاشقا دۇچ كېلىمىز. شۇنداق مەسخىرە قىلىپ، قارشى تۇرىدىغانلارنى دوست تۇتىمىزمۇ ياكى خۇدانى سۆيىدىغانلارنىمۇ؟ خۇدانىڭ ئەقىل-پاراسەت ۋە مېھىر-مۇھەببەتكە تولغان قانۇن-پەرمانىغا ئىتائەت قىلىمىزمۇ؟ ئەگەر شۇنداق قىلساق، شەيتاننىڭ ئىنسانلار قىيىن ئەھۋالغا دۇچ كەلگەندە، خۇداغا ئىتائەت قىلمايدۇ، دېگەن سۆزىنىڭ يالغان ئىكەنلىكىنى ئىسپاتلىيالايمىز.— 1-كورىنتلىقلار 6:9، 10؛ 15:33-ئايەتلەرنى ئوقۇڭ.
خۇدانىڭ ئىنسانلارغا بولغان سۆيگۈ-مۇھەببىتى چوڭقۇر بولغاچ، ئۇ بارلىق يامانلىق ۋە ئازاب-ئوقۇبەتلەرنى يوق قىلىدۇ. بۇنىڭغا ئىشەنگەن ۋە ئىشەنچىنى ئەمەلىيىتىدە كۆرسەتكۈچىلەر، يەر يۈزىدە مەڭگۈلۈك ھاياتتىن بەھرىمەن بولىدۇ.— يۇھاننا 3:16-ئايەتنى ئوقۇڭ.