40-تەتقىق ماقالىسى
51-ناخشا يېپىش چىڭ يەھۋاغا
يەھۋا «كۆڭلى سۇنغانلارنى داۋالايدۇ»
«ئۇ كۆڭلى سۇنغانلارنى داۋالايدۇ، ئۇلارنىڭ يارىلىرىنى تېڭىپ قويىدۇ».—زەبۇر 147:3.
مەركىزى ئىدىيە
يەھۋا كۆڭلى سۇنۇق كىشىلەرگە غەمخورلۇق قىلىدۇ. بۇ ماقالىدە ياراتقۇچى يەھۋانىڭ دەردىمىزگە دەرمان بولىدىغانلىقى ۋە بىزنىڭ باشقىلارغا تەسەللى بېرىشىمىزگە ياردەم بېرىدىغانلىقىنى كۆرۈپ چىقىمىز.
1. يەھۋا ئۆز خىزمەتچىلىرىگە قانداق مۇئامىلە قىلىدۇ؟
يەھۋا يەر يۈزىدىكى خىزمەتچىلىرىنىڭ نېمىلەرنى باشتىن كەچۈرۈۋاتقانلىقىنى كۆرۈپ تۇرىدۇ. ئۇ خۇشاللىقىمىز ۋە غەم-قايغۇلىرىمىزدىن خەۋەردار (زەبۇر 37:18). بەزىدە قەلبىمىز قايغۇ-ھەسرەتكە تولۇپ، ئىچ-ئىچىمىزدىن ئۇھ تارتىپ يۈرىمىز، ھەتتا شۇنداق ۋەزىيەتتە قولىمىزدىن كېلىشىچە ياراتقۇچىمىزغا خىزمەت قىلىش ئۈچۈن تىرىشىمىز. يەھۋا بۇنى كۆرگەندە، ئۇنىڭ كۆڭلى سۆيۈنۈپ خۇرسەن بولىدۇ! ئۇنىڭدىن باشقا، ئۇ بىزگە يار-يۆلەك بولۇپ، تەسەللى بېرىشكە ئالدىرايدۇ.
2. يەھۋا كۆڭلى سۇنۇقلارغا قانداق ياردەم بېرىدۇ ۋە قەلب يارىمىز ساقىيىپ كېتىشى ئۈچۈن نېمە قىلىشىمىز كېرەك؟
2 زەبۇر 147:3-ئايەتتە، يەھۋا كۆڭلى سۇنغانلارنىڭ قەلب «يارىلىرىنى تېڭىپ قويىدۇ» دەپ يېزىلغان. بۇ ئايەت ياراتقۇچىمىزنىڭ دىلى ئازار يېگەن كىشىلەرگە مېھرىبانلىق بىلەن غەمخورلۇق قىلىدىغانلىقىنى تەسۋىرلەيدۇ. ئۇنداقتا، يەھۋا غەمخورلۇق قىلىشقا تەييار ئىكەن، بىز چوقۇم نېمە قىلىشىمىز كېرەك؟ مەسىلەن، تەجرىبىلىك دوختۇر يارىلانغان كىشىنى داۋالاش ئۈچۈن كۆپ ئىشلارنى قىلىدۇ. شۇنداقتىمۇ، دوختۇرنىڭ داۋالىشى ئۈنۈملۈك بولۇشى ئۈچۈن، ئەلۋەتتە يارىلانغان كىشى چوقۇم دوختۇرنىڭ كۆرسەتمىسى بويىچە ئىش قىلىشى كېرەك. بۇ ماقالىدە، يەھۋا ئۆز سۆزى بولغان مۇقەددەس كىتاب ئارقىلىق كۆڭلى سۇنۇقلارغا قانداق كۆرسەتمە بېرىدىغانلىقى ۋە ئاشۇ كۆرسەتمىلەر بويىچە نېمە قىلىشىمىز كېرەكلىكىنى كۆرۈپ چىقىمىز.
يەھۋا خۇدا بىزنى قەدىرلەيدىغانلىقىغا ئىشەندۈرىدۇ
3. نېمە ئۈچۈن بەزىلەر ئۆزىنى ئەرزىمەس ھېس قىلىدۇ؟
3 بەكمۇ ئەپسۇس، بىز ئادەملەر ئارىسىدا مېھىر-مۇھەببەت سوۋۇپ كەتكەن بىر زاماندا ياشاۋاتىمىز. شۇڭلاشقا، نۇرغۇن ئادەملەر ئۆزلىرىنى ھېچنېمىگە ئەرزىمەس، كېرەكسىز ھېس قىلىشىدۇ. خېلېنa ئىسىملىك قېرىنداش مۇنداق دەيدۇ: «مەن ئاتا-ئانامنىڭ مېھرىنى كۆرمەي چوڭ بولدۇم. دادامنىڭ ئاچچىقى كەلسە، بىزنى ئۇراتتى. ھەر كۈنى بىزنى يارىماس دەپ تىللاپ ھاقارەتلەيتتى». بەلكىم، سىزمۇ خېلېنغا ئوخشاش، ھەردائىم تەنقىد قىلىنىپ، ھەتتا ناچار مۇئامىلىگە ئۇچراپ، نەتىجىدە ئۆزىڭىزنى ھېچنېمىگە ئەرزىمەس ھېس قىلىپ كېلىۋاتقانسىز. ئەگەر شۇنداق بولسا، سىزگە ھەقىقىي كۆڭۈل بۆلىدىغان بىرىنىڭ بارلىقىغا ئىشىنىش بەلكىم سىز ئۈچۈن ئاسان ئەمەس.
4. زەبۇر 34:18-ئايەتكە ئاساسلانغاندا، يەھۋا بىزنى نېمىگە ئىشەندۈرىدۇ؟
4 گەرچە باشقىلار كۆڭلىڭىزگە ئازار بەرگەن بولسىمۇ، يەھۋانىڭ سىزگە بولغان سۆيگۈ-مۇھەببىتى چوڭقۇر ۋە ئۇ سىزنى قەدىرلەيدۇ. بۇنىڭغا ئىشىنىڭ! ئۇ «كۆڭلى سۇنۇقلارغا يېقىندۇر» (زەبۇر 34:18-نى ئوقۇڭ). ئەگەر ئۆزىڭىزنى يۈرىكىڭىز ئېزىلگەندەك ھېس قىلسىڭىز، يەھۋا سىزنىڭ ئارتۇقچىلىق تەرىپىڭىزنى كۆرۈپ، سىزنى ئۆزىگە جەلپ قىلغانلىقىنى ئۇنتۇماڭ (يۇھاننا 6:44). سىز ئۇنىڭ ئۈچۈن ئەزىز ۋە ئۇ سىزنى بەك قەدىرلەيدۇ، شۇڭا سىزگە ياردەم بېرىش ئۈچۈن ھەردائىم تەييار.
5. ئەيسا مەسىھنىڭ باشقىلار كۆزگە ئىلمىغان كىشىلەرگە قىلغان مۇئامىلسىدىن نېمىلەرنى ئۆگىنەلەيمىز؟
5 ئەيسانىڭ قالدۇرغان ئۈلگىسىدىن يەھۋا خۇدانىڭ ھېس-تۇيغۇلىرى توغرۇلۇق ئۆگىنەلەيمىز. يەر يۈزىدە ۋەز قىلىپ يۈرگەندە، ئەيسا باشقىلار كۆزگە ئىلمىغان كىشىلەرگە كۆڭۈل بۆلۈپ، ئۇلارغا مېھرىبانلىق ۋە مۇلايىملىق بىلەن مۇئامىلە قىلغان (مەتتا 9:9–12). مەسىلەن، ئۇزۇن مەزگىل كېسەل ئازابى تارتىپ يۈرگەن بىر ئايال ساقىيىپ كېتىشنى ئۈمىد قىلىپ، ئەيسانىڭ كىيىمىگە قولىنى تەگكۈزگەنىدى. ئەيسا بۇنى بىلىپ، ئايالغا تەسەللى بەرگەن ۋە ئۇنىڭ ئىشەنچىسىنى ماختىغان (ماركۇس 5:25–34). بۇنىڭدىن كۆرۈۋالالايمىزكى، ئەيسا ئاسماندىكى ئاتىسىنى ئۈلگە قىلىپ، ئۇنىڭ گۈزەل پەزىلەتلىرىنى مۇكەممەل ئەكس ئەتتۈرگەن (يۇھاننا 14:9). شۇڭا، يەھۋانىڭ سىزنى ئەزىز كۆرۈپ قەدىرلەيدۇ ۋە ئۇنىڭغا بولغان ئىمان-ئېتىقادىڭىز، سۆيگۈ-مۇھەببىتىڭىزنى ئۆز ئىچىگە ئالغان ياخشى پەزىلەتلىرىڭىزگە دىققەت ئاغدۇرىدۇ. بۇنىڭغا چوقۇم ئىشىنىڭ!
6. ئەگەر ئۆزىڭىزنى ئەرزىمەس ھېس قىلسىڭىز، نېمە قىلسىڭىز بولىدۇ؟
6 ئەگەر دائىم ئۆزىڭىزنى ھېچنېمىگە ئەرزىمەس كىشىدەك ھېس قىلسىڭىز، نېمە سىزگە ياردەم بېرەلەيدۇ؟ مۇقەددەس كىتابتىن كۆڭلىڭىزگە تەسەللى بېرىدىغان ئايەتلەرنى ئوقۇپ، ئۇلار ئۈستىدە چوڭقۇر ئويلىنىڭ. شۇ ئايەتلەر يەھۋانىڭ سىزنى ئىنتايىن قەدىرلەيدىغانلىقىغا بولغان ئىشەنچىڭىزنى كۈچەيتىشىڭىزگە ياردەم بېرەلەيدۇb (زەبۇر 94:19). بەلكىم، بەزى مەقسەتلەرگە يېتەلمەي، روھىڭىز چۈشۈپ كېتىشى ياكى باشقىلارغا ئوخشاش كۆپرەك خىزمەت قىلالماي ئۈمىدسىزلىنىشىڭىز مۇمكىن. شۇنداق چاغلاردا، ئېسىڭىزدە بولسۇنكى ئۆزىڭىزنى باشقىلار سېلىشتۇرماڭ ۋە قىلالمايدىغان ئىشقا كىرىشىۋالماڭ. يەھۋا ھەرگىزمۇ قولۇڭىزدىن كەلمەيدىغان ئىشلارنى قىلىشنى تەلەپ قىلمايدۇ (زەبۇر 103:13، 14). ئەگەر ئىلگىرى خورلاشقا ياكى زىيانكەشلىككە ئۇچراپ، كۆڭلۈڭىز ئازار يېگەن بولسا، ھەرگىزمۇ باشقىلارنىڭ قىلغان ئىشى ئۈچۈن ئۆزىڭىزنى ئەيىبلىمەڭ! شۇنى ئۇنتۇماڭكى، يەھۋا زىيانكەشلىككە ئۇچرىغان ئەمەس، زىيانكەشلىك قىلغان كىشىدىن ھېساب سورايدۇ (1-پېتر. 3:12). بالىلىق چاغلىرىدا خورلۇققا ئۇچرىغان ساندىرا مۇنداق دەيدۇ: «مەن دائىم يەھۋاغا دۇئا قىلىپ، ئۇ مېنى قانداق كۆرسە، مەنمۇ ئۆزۈمنى شۇنداق كۆرۈشنى خالايدىغانلىقىمنى ئېيتىپ، ئۆز-ئۆزۈمنىڭ ياخشى تەرەپلىرىنى كۆرۈپ يېتىش ئۈچۈن ياردەم سورايمەن».
7. يەھۋاغا خىزمەت قىلغاندا، ئىلگىرى باشتىن كەچۈرگەن قىيىنچىلىقلارنىڭ بىز ئۈچۈن قانداق پايدىسى بار؟
7 يەھۋانىڭ سىزنى ئىشلىتىپ، باشقىلارغا ياردەم بېرىدىغانلىقىدىن ھەرگىزمۇ گۇمانلانماڭ. يەھۋا ئاللىقاچان سىزگە ۋەز خىزمەتتە ئۇنىڭ بىلەن خىزمەتداش بولۇش شان-شەرىپىنى بەرگەن (1-كورىنت. 3:9). ئىلگىرى ئېغىر قىيىنچىلىقلارنى باشتىن ئۆتكۈزگەچ، بەلكىم باشقىلارنىڭ ھېس-تۇيغۇلىرىنى تېخىمۇ ياخشى چۈشىنەلەيسىز. شۇڭا، ۋەز خىزمەتتە باشقىلارغا ياردەم بېرەلەيسىز. يۇقىرىدا تىلغا ئېلىنغان خېلېن ئىلگىرى ئۆزى ياردەمگە ئېرىشكەنىدى، شۇڭا ئۇ ھازىر باشقىلارغا قانداق ياردەم بېرىشنى بىلىدۇ. ئۇ مۇنداق دەيدۇ: «مەن ئۆزۈمنى ئەرزىمەس ۋە باشقىلارغا ھېچقانداق پايدا يەتكۈزەلمەيمەن دەپ يۈرگەن. يەھۋا مېھىر-مۇھەببىتى بىلەن مېنى باغرىغا باستى ۋە ھازىر مېنى ئىشلىتىپ باشقىلارغا ياردەم بېرىۋاتىدۇ». خېلېن ھازىر پىدائىي ۋەز ئېيتقۇچى بولۇپ، خۇشال-خۇرام خىزمەت قىلىۋاتىدۇ.
يەھۋا بىزنى كەچۈرگەنلىكىگە ئىشىنىشىمىزنى خالايدۇ
8. يەشايا 1:18-ئايەتتىكى سۆزلەر نېمە ئۈچۈن كۆڭلىمىزگە تەسەللى بېرىدۇ؟
8 يەھۋانىڭ بەزى خىزمەتچىلىرى چۆمۈلدۈرۈلۈشتىن ئاۋۋال ياكى كېيىن ئۆتكۈزگەن گۇناھلىرى ئۈچۈن ھازىرغىچە پۇشايمان قىلىپ، ئازابلىنىپ يۈرىدۇ. بىراق، شۇنى ئۇنتۇماسلىقىمىز كېرەك، يەھۋا بىزنى شۇقەدەر سۆيىدۇكى، بىز ئۈچۈن تۆلەم بەرگەن. ئۇ بىزنىڭ تۆلەم سوۋغىسىنى قوبۇل قىلىشىمىزنى خالايدۇ. يەھۋا ئەگەر بىز ئاللىقاچان ئارىدىكى مەسىلىنى ئۇنىڭ بىلەن ھەلc قىلىپ بولغان بولساق، ئۇ يەنە گۇناھلىرىمىزنى قايتا سۈرۈشتۈرۈپ ئولتۇرمايدىغانلىقىنى ئېيتقان (يەشايا 1:18-نى ئوقۇڭ). لېكىن، ئۇ بىزنىڭ قىلغان ياخشى ئىشلىرىمىزنى مەڭگۈ ئۇنتۇمايدۇ.—زەبۇر 103:9، 12؛ ئىبرانىي. 6:10.
9. نېمە ئۈچۈن دىققىتىمىزنى ئۆتمۈشكە ئەمەس، ھازىر ۋە كېلەچەككە قارىتىشىمىز كېرەك؟
9 ئەگەر ئۆتمۈشتە ئۆتكۈزگەن خاتالىقلار ئۈچۈن ھازىرغىچە پۇشايمان قىلىپ يۈرگەن بولسىڭىز، دىققىتىڭىزنى ھازىر قىلىۋاتقان ياكى كەلگۈسىدە قىلىدىغان ئىشلارغا قارىتىڭ. ئەلچى پاۋلۇسنى ئالساق، ئۇ ئۆتمۈشتە ئەيسانىڭ شاگىرتلىرىغا زىيانكەشلىك قىلغىنى ئۈچۈن، پۇشايمان قىلىپ ئۆكۈنگەن. لېكىن، يەھۋانىڭ ئۇنى كەچۈرگەنلىكىنى پاۋلۇس چۈشەنگەن (1-تىموت. 1:12–15). ئۇنداقتا، پاۋلۇس يەنە ئۆتمۈشتە ئۆتكۈزگەن گۇناھلىرى توغرۇلۇق ئويلىنىپ يۈرگەنمۇ؟ ياق، ئۇ ئۆز ۋاقتىدا پەرىسىي سۈپىتىدە قازانغان ئۇتۇقلىرىنى ئۇنتۇپ كەتكەندەك، ئۆتكۈزگەن خاتالىقلىرىنى ھەم ئويلاپ يۈرمىگەن (فىلىپى. 3:4–8، 13–15). ئۇ جان كۆيدۈرۈپ ۋەز خىزمىتىگە ئۆزىنى ئاتىغان ۋە كۆزىنى كېلەچەككە تىككەن. سىزمۇ پاۋلۇسقا ئوخشاش، ئۆتۈپ كەتكەن ئىشلارنى ئۆزگەرتەلمەيسىز. ئەمما، ھازىر ئۆزىدە ياراتقۇچىڭىز يەھۋانى مەدھىيىلەپ، ئۇنى خۇرسەن قىلالايسىز ۋە ئۇنىڭ كېلەچەك ھەققىدىكى ئاجايىپ ۋەدىلىرى ھەققىدە ئويلىنالايسىز.
10. ئەگەر ئۆتمۈشتە قىلغان ئىشلىرىمىز باشقىلارنىڭ كۆڭلىگە ئازار بەرگەن بولسا، نېمە قىلساق بولىدۇ؟
10 بەلكىم، ئۆتمۈشتە باشقىلارنىڭ كۆڭلىگە ئازار بەرگەچ، ھازىر ئۆزىڭىزنى ئەيىبلەپ يۈرۈۋاتقانسىز. ئەگەر شۇنداق بولسا، نېمە قىلىشىڭىز كېرەك؟ شۇ خاتالىقىڭىزنىڭ ئورنىنى تولدۇرۇشقا تىرىشىڭ، ئاشۇ كىشىدىن چىن كۆڭلىڭىزدىن كەچۈرۈم سوراڭ (2-كورىنت. 7:11). ئۆزىڭىز زىيان يەتكۈزگەن كىشى ئۈچۈن ياردەم سوراپ، يەھۋاغا دۇئا قىلىڭ. ئاشۇ كىشىنىڭ ۋە سىزنىڭ داۋاملىق يەھۋاغا خىزمەت قىلالىشىڭلار ئۈچۈن، ئۇ ھەر ئىككىڭلارنى قايتا كۆڭۈل خاتىرجەملىكىگە ئېرىشىشىگە ياردەم بېرەلەيدۇ.
11. يۇنۇس پەيغەمبەرنىڭ مىسالىدىن نېمىلەرنى ئۆگىنەلەيمىز؟ (مۇقاۋىدىكى رەسىمگە ھەم قاراڭ).
11 ئۆتمۈشتىكى خاتالىقلاردىن ساۋاق ئېلىڭ ۋە يەھۋا سىزگە قانداق ۋەزىپىنى تاپشۇرسا، ئۇنى قوبۇل قىلىشقا تەييار تۇرۇڭ. يۇنۇس پەيغەمبەرنىڭ مىسالىنى كۆرۈپ چىقايلى. خۇدا يۇنۇسنى نىنەۋى شەھىرىگە بېرىشقا بۇيرۇغان، ئۇ قارشى يۆلىنىشكە قېچىپ كەتكەن. كېيىنرەك، خۇدا ئۇنىڭغا تەربىيە بەرگەن، ئۇ خاتالىقىنى تونۇپ، ئۇنىڭدىن ساۋاق ئالغان (يۇنۇس 1:1–4، 15–17؛ 2:7–10). يەھۋا يۇنۇس پەيغەمبەردىن ۋاز كەچتىمۇ؟ ياق. ئۇ يۇنۇس پەيغەمبەرنى قايتا نىنەۋى شەھىرىگە ئەۋەتكەن. بۇ قېتىم يۇنۇس دەرھال بۇيرۇققا بويسۇنغان. يۇنۇس پەيغەمبەر ئىلگىرى ئۆتكۈزگەن خاتالىقى ئۈچۈن پۇشايمان قىلغان، ئەمما يۇنۇس بۇ قېتىم يەھۋا تاپشۇرغان ۋەزىپىنى قوبۇل قىلىشتىن باش تارتمىغان.—يۇنۇس 3:1–3.
يۇنۇس پەيغەمبەر غايەت زور بېلىقنىڭ قورسىقىدىن ئامان-ئېسەن چىققاندىن كېيىن، يەھۋا ئۇنىڭغا يەنە بىر قېتىم نىنەۋى شەھىرىگە بېرىپ، ئۇنىڭ ھۆكۈم خەۋىرىنى يەتكۈزۈشنى ئېيتتى (11-ئابزاسقا قاراڭ)
يەھۋا مۇقەددەس روھى ئارقىلىق بىزگە تەسەللى بېرىدۇ
12. ئەگەر ئېغىر سىناقلارغا دۇچ كەلسىڭىز، يەھۋا سىزنى تىنچ-خاتىرجەملىككە قانداق ئېرىشتۈرىدۇ؟ (فىلىپىلىكلەر 4:6، 7)
12 ھاياتىمىزدا پاجىئەلىك ئىشلار يۈز بەرسە ياكى يېقىنلىرىمىزدىن ئايرىلىپ ھەسرەت چېكىپ يۈرسەك، يەھۋا مۇقەددەس روھى ئارقىلىق بىزگە تەسەللى بېرىدۇ. رون ۋە كارول ئىسىملىك ئەر-ئايالنىڭ مىسالىنى كۆرۈپ باقايلى. ئۇلارنىڭ ئوغلى ئۆزىنى ئۆلتۈرۈۋالغان ئىدى. ئۇلار مۇنداق دەيدۇ: «بىز ئىلگىرى نۇرغۇن قىيىنچىلىقلارنى باشتىن كەچۈرگەن ئىدۇق، ئەمما ئوغلىمىزنىڭ ئۆلۈمى ئىنتايىن ئېغىر كەلدى. ئۇيقۇسىز كېچىلەردە يەھۋاغا دۇئا قىلىپ، فىلىپىلىكلەر 4:6، 7-ئايەتلەردە (ئوقۇڭ) تىلغا ئېلىنغان تىنچ-خاتىرجەملىكنى ھەقىقىي ھېس قىلدۇق». ئەگەر يۈرىكىڭىزنى زېدە قىلىدىغان ئېغىر سىناققا دۇچ كەلسىڭىز، خۇداغا دۇئا قىلىپ، ئىچ-باغرىڭىزنى تۆكۈڭ. مەيلى كۈندە قانچە قېتىم ۋە ھەر قېتىم قانچە ئۇزۇن ۋاقىت دۇئا قىلماڭ، يەھۋا سىزنى تىڭشايدۇ (زەبۇر 86:3؛ 88:1). قايتا-قايتا يەھۋادىن مۇقەددەس روھنى سوراڭ، ئۇ ھەردائىم سىزگە ياردەم بېرىدۇ.—لۇقا 11:9–13.
13. مۇقەددەس روھ يەھۋاغا سادىق خىزمەت قىلىشىمىزغا قانداق ياردەم بېرەلەيدۇ؟ (ئەفەسلىكلەر 3:16)
13 باشتىن كەچۈرگەن قىيىنچىلىقلار تۈپەيلى ھالسىزلىنىپ، ئۆزىڭىزنى كۈچ-ماغدۇرسىز ھېس قىلامسىز؟ مۇقەددەس روھ سىزگە كۈچ بېرىپ، داۋاملىق يەھۋاغا خىزمەت قىلىشىڭىزغا ياردەم بېرەلەيدۇ (ئەفەسلىكلەر 3:16-نى ئوقۇڭ). فىلورا بىلەن ئېرى بىرلىكتە ياتئەل خەلقى ئارىسىدا ۋەز ئېيتقۇچى (مىسسىئونېر) بولۇپ خىزمەت قىلغاندا، ئېرى زىنا قىلغان. كېيىن، ئۇلار ئاجرىشىپ كەتكەن. فىلورا مۇنداق دېگەن: «ئېرىمنىڭ ۋاپاسىزلىقىنى ئويلاپ، قەلبىم زېدە بولۇپ، ئاچچىق ھەسرەتكە تولۇپ كەتتى. ئوي-پىكىرىمنى باشقا ئىشلارغا قارىتىش بەك قىيىن بولدى. دۇئا قىلىپ، بۇ قىيىنچىلىققا بەرداشلىق بېرىش ئۈچۈن يەھۋادىن مۇقەددەس روھنى سورىدىم. دەسلەپتە قەددىمنى رۇسلاش مۇمكىن ئەمەستەك كۆرۈنسىمۇ، يەھۋا خۇدانىڭ ياردىمى بىلەن، فىلورا ئورنىدىن تۇرغان». ئۇ يەھۋانىڭ ئۇنىڭغا ياردەم بېرىپ كەلگەنلىكىنى ھېس قىلغان ۋە بۇ ئۇنىڭ ئىمان-ئېتىقادىنى كۈچەيتكەن. كېيىن، ئۇ مۇنداق دېگەن: «زەبۇر 119:32-دىكى سۆزلەر مېنىڭ ھېس-تۇيغۇلىرىمنى تەسۋىرلەيدۇ: «بۇيرۇقلىرىڭغا بويسۇنۇش ئۈچۈن يۈگۈرەيمەن. چۈنكى، سەن كۆڭلۈمنى تەسەللى تاپقۇزىسەن»».
14. مۇقەددەس روھنىڭ سىزگە تەسىر قىلىشى ئۈچۈن نېمىلەرنى قىلىشىمىز كېرەك؟
14 خۇدادىن مۇقەددەس روھنى سوراپ دۇئا قىلغاندىن كېيىن، يەنە نېمە قىلىشىڭىز كېرەك؟ خۇدانىڭ روھى سىزگە تەسىر قىلىدىغان ئىشلار بىلەن بەنت بولۇڭ. مەسىلەن، جامائەت ئىبادەت يىغىلىشلىرىغا قاتنىشىڭ ۋە خۇش خەۋەرنى ۋەز قىلىڭ. ھەر كۈنى مۇقەددەس كىتابنى ئوقۇڭ. بۇ يەھۋانىڭ ئوي-پىكىرى ئۈستىدە چوڭقۇر ئويلىنىشىڭىزغا ياردەم بېرىدۇ (فىلىپى. 4:8، 9). مۇقەددەس كىتابنى ئوقۇۋاتقاندا، قىيىنچىلىقلارغا دۇچ كەلگەن خۇدا خىزمەتچىلىرى توغرىسىدىكى بايانلارغا ئالاھىدە دىققەت قىلىڭ ۋە يەھۋانىڭ ئۇلارغا قانداق ياردەم بەرگەنلىكىنى كۆز ئالدىڭىزغا كەلتۈرۈپ، چوڭقۇر ئويلىنىڭ. يۇقىرىدا تىلغا ئېلىنغان ساندىرا نۇرغۇن جاپا-مۇشەققەت، دەرد-ئەلەملەرنى باشتىن كەچۈرگەن. ئۇ مۇنداق دەيدۇ: «يۈسۈپ توغرىسىدىكى بايانلار دائىم ماڭا ئىلھام-مەدەت بېرىپ كەلدى. ئۇ ئادالەتسىزلىك ۋە باشقا سىناقلارنىڭ باشتىن كەچۈرگەن بولسىمۇ، ئۇ ھېچنەرسىنىڭ ئۆزىنى يەھۋادىن يىراقلاشتۇرۇشىغا يول قويمىغان».—يارىت. 39:21–23.
يەھۋا ئېتىقادداشلىرىمىز ئارقىلىق بىزگە تەسەللى بېرىدۇ
15. كىملەر بىزگە تەسەللى بېرىدۇ؟ ئۇلار بىزگە قانداق ياردەم قىلىدۇ؟ (رەسىمگە ھەم قاراڭ).
15 بېشىمىزغا ئېغىر كۈنلەر كەلگەندە، ئېتىقادچى قېرىنداشلىرىمىز بىزگە تەسەللى بېرىدۇ (كولوسى. 4:11). ئۇلار ئارقىلىق يەھۋا بىزگە بولغان چوڭقۇر سۆيگۈ-مۇھەببىتىنى ئىسپاتلىغان. قېرىنداشلىرىمىز بىزگە ھەمراھ بولىدۇ، ئىچ-باغرىمىزنى تۆكۈپ دەرد ئېيتساق، دىققەت بىلەن تىڭشاپ، دەردىمىزگە ھەمدەرد بولىدۇ. بىز بىلەن بىرلىكتە دۇئا قىلىشى ياكى كۆڭلىمىزگە تەسەللى بېرىدىغان ئايەتلەر بىلەن بىزگە ئىلھام-مەدەت بېرىشى مۇمكىنd (رىملىقلار 15:4). بەزىدە قېرىنداشلار يەھۋانىڭ ۋەزىيىتىمىزگە قانداق كۆز قاراشتا بولىدىغانلىقىنى ئېسىمىزگە سېلىپ، كۆڭلىمىزنى تىنچ-خاتىرجەم قىلىدۇ. ئۇنىڭدىن باشقا، ئۆزىمىزنى كۈچ ماغدۇرسىز ھېس قىلىپ تۇرغاندا، قېرىنداشلار تاماق ئېتىپ ئەكېلىشى ياكى باشقا ئىشلىرىمىزغا ياردەم بېرىشى مۇمكىن.
ھەقىقىي، ئىمان-ئېتىقادتا يېتىلگەن دوستلار ياردەم ۋە تەسەللى بېرەلەيدۇ (15-ئابزاسقا قاراڭ)
16. باشقىلار بىزگە ياردەم بېرەلىشى ئۈچۈن نېمە قىلىشىمىز كېرەك؟
16 بەزىدە قېرىنداشلارنىڭ بىزگە ياردەم بېرەلىشى ئۈچۈن، خىجىل بولماي ئۇلاردىن ياردەم سورىشىمىز كېرەك. قېرىنداشلارنى بىزنى ياخشى كۆرىدۇ ۋە ياردەم بېرىشكە ھەرقاچان تەييار (پەند. نە 17:17). لېكىن، ئۇلار قانداق ھېس-تۇيغۇدا بولۇۋاتقانلىقىمىزنى ۋە نېمىگە مۇھتاجلىقىمىزنى بىلمەسلىكى مۇمكىن (پەند. نە 14:10). ئەگەر كۆڭلىمىز ئازار يەپ، ھەسرەت چېكىپ يۈرسەك، ئىمان-ئېتىقادتا يېتىلگەن يېقىن دوستلىرىڭىزغا ھېس-تۇيغۇلىرىڭىزنى ئېيتىپ، ئۇلارغا قانداق ياردەمگە مۇھتاج بولغانلىقىڭىزنى بىلدۈرۈڭ. ئۆزىڭىز يېقىن كۆرگەن بىر-ئىككى ئاقساقال بىلەن پاراڭلاشسىڭىزمۇ بولىدۇ. بەزى ئايال قېرىنداشلار پىشىپ يېتىلگەن ئايال قېرىنداش بىلەن پاراڭلىشىپ، كۆڭلى تەسەللى تېپىپ قالغان.
17. باشقىلارنىڭ ياردىمىگە ئېرىشىشىمىزگە نېمە توسالغۇ بولۇشى مۇمكىن؟
17 ئۆزىڭىزنى باشقىلاردىن قاچۇرماڭ. بەزىدە كۆڭلۈڭىز بەك يېرىم بولغاچقا، باشقىلار بىلەن ئارىلىشىشنى خالىماي، ئۆزىڭىزنى قاچۇرۇشقا ھەرىكەت قىلىدىغانسىز. بەزىدە ئېتىقادچى قېرىنداشلار سىزنى ناتوغرا چۈشىنىپ قېلىشى ياكى كۆڭلۈڭىزنى ئاغرىتىپ قويىدىغان سۆزلەرنى ئېيتىپ قويۇشى مۇمكىن (ياقۇپ 3:2). لېكىن، ئۇلار بىلەن ئارىلىشىشتىن ئۆزىڭىزنى ئېلىپ قاچماڭ. ئېسىڭىزدە بولسۇن، يەھۋا ئۇلار ئارقىلىق سىزگە ئىلھام-مەدەت بېرەلەيدۇ. چۈشكۈنلۈك ئازابىنى تارتقان گېۋىن ئىسىملىك ئاقساقال مۇنداق دەيدۇ: «كۆپىنچە ۋاقىتلاردا دوستلىرىم بىلەن پاراڭلىشىشنى ياكى ئۇلار بىلەن ۋاقىت ئۆتكۈزۈشنى خالىمايمەن». ئەمما، گېۋىن يەنىلا دوستلىرى بىلەن ئارىلىشىپ ئۆتۈش ئۈچۈن كۈچ چىقارغان. شۇنداق قىلغاندىن كېيىن، ئۇ ئاستا-ئاستا ئۆزىنى ياخشىراق ھېس قىلغان. ئامىي ئىسىملىك قېرىنداش مۇنداق دەيدۇ: «ئىلگىرى باشتىن كەچۈرگەن ئىشلار سەۋەبلىك، مەن باشقىلارغا ئاسانلىقچە ئىشەنمەيمەن. لېكىن، مەن تىرىشىپ، يەھۋاغا ئوخشاش قېرىنداشلارنى سۆيۈشنى ۋە ئۇلارغا ئىشىنىشنى ئۆگىنىۋاتىمەن. شۇنداق قىلغىنىمدا، يەھۋا خۇدانى خۇرسەن قىلىمەن، ئۆزۈممۇ خۇشال بولىمەن».
يەھۋانىڭ ۋەدىلىرىدىن تەسەللى تېپىڭ
18. كېلەچەكتە بىزنى قانداق ئىشلار كۈتمەكتە ۋە ھازىرنىڭ ئۆزىدە بىز نېمە قىلالايمىز؟
18 بىزنى ئاجايىپ گۈزەل كېلەچەك كۈتمەكتە! مەيلى كېسەل ئازابى تارتقان تەنلىرىمىز ياكى قايغۇ-ھەسرەتتە زېدە بولغان يۈرەكلىرىمىز بولسۇن، يەھۋا پات-يېقىندا ھەممىسىنى پۈتۈنلەي ساقايتىدۇ (ۋەھىي. 21:3، 4). شۇ چاغدا، بېشىمىزدىن ئۆتكەن ئازابلىق كۈنلەر ئېسىمىزگە كەلمەيدۇ (يەشايا 65:17). بىراق، يەھۋا ھەتتا ھازىرنىڭ ئۆزىدە كۆڭۈل يارىلىرىمىزنى تېڭىپ قويۇۋاتىدۇ. ئۇ تۈرلۈك يوللار بىلەن بىزگە تەسەللى ۋە ياردەم بېرىۋاتىدۇ. بۇنىڭدىن ياخشى پايدىلىنىڭ. شۇنى ئەستىن چىقارماڭكى، ئۇ سىزگە كۆڭۈل بۆلىدۇ. ھەرگىزمۇ ئۇنىڭغا سىزگە بولغان سۆيگۈ-مۇھەببىتىدىن گۇمانلانماڭ!—1-پېتر. 5:7.
23-ناخشا يەھۋا — بىزنىڭ كۈچىمىز
a بەزى ئىسىملار ئۆزگەرتىلگەن.
b «يەھۋا سىزنى قەدىرلەيدۇ» دېگەن رامكىغا قاراڭ.
c يەھۋا بىلەن مەسىلىنى ھەل قىلىشنى خالىساق، گۇناھلىرىمىزغا ئاللىقاچان چىن كۆڭلىمىزدىن توۋا قىلغانلىقىمىزنى كۆرسىتىش ئۈچۈن، يەھۋاغا دۇئا قىلىپ، گۇناھىمىزنى ئىقرار قىلىپ، ئۇنىڭدىن كەچۈرۈم سورىشىمىز ۋە ئۆزىمىزنى ئۆزگەرتىشىمىز لازىم. ئېغىر گۇناھ ئۆتكۈزۈپ قويغان بولساق، جامائەتتىكى ئاقساقاللاردىن ھەم ياردەم سورىشىمىز كېرەك.—ياقۇپ 5:14، 15.
d «ھاياتىمىزنى يېتەكلەيدىغان ئايەتلەر» (باشقا تىلدا) «غەم-ئەندىشە» ۋە «تەسەللى» دېگەن ماۋزۇلارغا قاراڭلار.