48-تەتقىق ماقالىسى
48-ناخشا ھەر كۈنى يەھۋا بىلەن يۈر!
ئەيسانىڭ نان بىلەن قىلغان مۆجىزىسىدىن نېمىلەرنى ئۆگىنەلەيمىز؟
«ھاياتلىق بېرىدىغان نان ئۆزۈمدۇرمەن! كىمكى ماڭا كەلسە، ھەرگىز ئاچ قالماس».—يۇھاننا 6:35.
مەركىزى ئىدىيە
يۇھاننا بايان قىلغان خۇش خەۋەر 6-بابتا، ئەيسانىڭ مۆجىزە كۆرسىتىپ، نان ۋە بېلىقنى كۆپەيتىپ، نۇرغۇن كىشىلەرنى تويدۇرغانلىقىنى كۆرۈپ چىقىمىز ۋە ئۇنىڭدىن نېمىلەرنى ئۆگىنەلەيدىغانلىقىمىز ھەققىدە مۇھاكىمە قىلىمىز.
1. قەدىمقى زاماندا نان قانچىلىك مۇھىم بولغان؟
قەدىمكى زاماندا، نان ئىنسانلار ئۈچۈن ئاساسىي يېمەكلىك بولغانلىقى مۇقەددەس كىتابتا تىلغان ئېلىنغان (يارىت. 14:18؛ لۇقا 4:4). نان كىشىلەرنىڭ كۈن كەچۈرۈشى ئۈچۈن ناھايىتى مۇھىم يېمەكلىك بولغاچقا، مۇقەددەس كىتابتا بەزىدە يېمەكلىك سۆزىنىڭ ئورنىغا «نان» سۆزى ئىشلىتىلگەن (مەتتا 6:11). ئۇنىڭدىن باشقا، ئەيسا ئىككى قېتىم ناننى ئىشلىتىپ مۆجىزە كۆرسەتكەن (مەتتا 16:9، 10). شۇ مۆجىزىلەردىن بىرى يۇھاننا 6-بابتا خاتىرىلەنگەن. ھازىر بىرلىكتە شۇ مەزمۇننى مۇھاكىمە قىلىپ، نېمىلەرنى ئۆگىنەلەيدىغانلىقىمىزنى كۆرۈپ چىقايلى.
2. قايسى ۋاقىتتا مىڭلىغان ئادەملەرنىڭ يېمەكلىككە ئېھتىياجى بولغان؟
2 ئەيسانىڭ شاگىرتلىرى قىزغىن ۋەز ئېيتىپ، سەپەردىن ھېرىپ-چارچاپ كەلگەندىن كېيىن، ئۇلار ئارام ئېلىشى كېرەك ئىدى. شۇڭا، ئەيسا ئۇلارنى كېمىگە ئولتۇرغۇزۇپ، جەلىلىيە دېڭىزىنىڭ قارشى قىرغىقىغا يۈرۈپ كەتتى (ماركۇس 6:7، 30–32؛ لۇقا 9:10). ئۇلار بەيتسايداغا يېقىن ئەتراپتىكى تىنچ بىر يەرگە كەلدى. ئۇزۇن ئۆتمەي، ئۇلارنىڭ يولغا چىققانلىقىنى كۆرگەن ۋە ئاڭلىغان بىرنەچچە مىڭ كىشى ئەيسا بىلەن كۆرۈشۈش ئۈچۈن توپ-توپ بولۇپ كېلىشتى. ئەيسا ئۇلارنىڭ ئېھتىياجلىرىغا كۆڭۈل بۆلمەي تۇرالمىدى. ئۇ كېسەللەرنى ساقايتىپ، پادىشاھلىق ھەققىدە تەلىم بېرىشكە باشلىدى. كەچ كىرىپ قالغاچ، ئەيسانىڭ شاگىرتلىرى خالايىق قەيەرگە بېرىپ يېمەكلىك سېتىۋالسا بولىدىغانلىقى ھەققىدە غەم قىلاتتى. چۈنكى، بەزىلەرنىڭ ئازغىنە يېمەكلىكى بولسىمۇ، كۆپىنچە كىشىلەرنىڭ يوق بولۇپ، يېقىن ئەتراپتىكى يېزا-كەنتلەرگە بېرىپ يېمەكلىكلەرنى سېتىۋېلىشى كېرەك ئىدى (مەتتا 14:15؛ يۇھاننا 6:4، 5). شۇ چاغدا، ئەيسا نېمە قىلغان؟
نان بىلەن بىرقانچە مىڭ كىشىنى تويغۇزۇش مۆجىزىسى
3. ئەيسا خالايىققا تاماق بېرىش ئۈچۈن شاگىرتلىرىغا نېمە قىلىشنى بۇيرىدى؟ (مۇقاۋىدىكى رەسىمگە قاراڭ).
3 ئەيسا شاگىرتلىرىغا: «ئۇلارنىڭ كېتىشىنىڭ ھاجىتى يوق، ئۆزۈڭلار ئۇلارغا تاماق بېرىڭلار»،— دېدى (مەتتا 14:16). ئەمما، بۇ قانداقمۇ مۇمكىن بولسۇن؟! چۈنكى، ئۇ يەرگە توپلانغانلار ئارىسىدا تەخمىنەن 5000 ئەر كىشى بار بولۇپ، ئاياللار بىلەن بالىلارنى ھېسابقا ئالساق، تەخمىنەن 15 000 كىشىگە تاماق بېرىش كېرەك ئىدى (مەتتا 14:21). شۇ ۋاقىتتا، ئەندەر مۇنداق دېگەن: «بۇ يەردە بىر كىچىك بالىدا بەش ئارپا نېنى بىلەن ئىككى بېلىق بار، لېكىن بۇنچىۋالا كۆپ كىشىلەر ئۈچۈن بۇ نېمە بولىدۇ؟!» (يۇھاننا 6:9). ئارپا نان شۇ زامانلاردا، كەمبەغەل ۋە باشقىلار ئۈچۈن ئاساسىي يېمەكلىك بولۇپ، كىچىك بېلىق بەلكىم تۇزلاپ قۇرۇتۇلغان. ئەمما، بۇ ئازغىنە يېمەكلىك بىلەن شۇنچە كۆپ ئادەمنىڭ قورسىقىنى تويغۇزۇش مۇمكىنمۇ؟
ئەيسا ئادەملەرنىڭ روھىي ۋە جىسمانىي ئېھتىياجلىرىنى تەمىنلىگەن (3-ئابزاسقا قاراڭ)
4. يۇھاننا 6:11–13-ئايەتلەردىن نېمىنى ئۆگىنەلەيمىز؟ (رەسىملەرگە ھەم قاراڭ).
4 ئەيسا مېھماندوستلۇق كۆرسەتمەكچى بولغاچقا، خالايىقنى توپ-توپ بولۇپ چىم ئۈستىدە يانپاشلاپ ئولتۇرۇشقا بۇيرىدى (ماركۇس 6:39، 40؛ يۇھاننا 6:11–13-نى ئوقۇڭ). ئاندىن كېيىن، ئەيسا نان بىلەن بېلىق ئۈچۈن مىننەتدارلىقىنى بىلدۈرۈپ، ئاتىسىغا دۇئا قىلدى. ئۇ شۇنداق قىلىش ئارقىلىق، ئەمەلىيەتتە يېمەك-ئىچمەك خۇدادىن كەلگەنلىكىنى كۆرسەتكەن. ئۇنىڭ بۇ ئۈلگىسى بىز ئۈچۈن ياخشى ئەسكەرتىش! بىز يالغۇز بولايلى ياكى ئەتراپىمىزدا باشقا ئادەملەر بولسۇن، تاماق يېيىش ئالدىدا خۇداغا دۇئا قىلىشىمىز كېرەك. ئەيسا دۇئا قىلىپ بولغاندىن كېيىن، شاگىرتلىرىغا نان بىلەن بېلىقنى خەلققە تارقىتىپ بېرىشنى ئېيتقانىدى. خەلق بولسا تويغىچە يەپ، ھەتتا ئېشىپ قالغان. ئېشىپ قالغان يېمەكلىكلەر ئىسراپ بولماسلىقى ۋە كېيىنرەك ئىستىمال قىلىنىشى ئۈچۈن، ئەيسا شاگىرتلىرىنى شۇ يېمەكلىكلەرنى يىغىۋېلىشقا بۇيرىغان. بىز ئەيسانىڭ ئۈلگىسىدىن قولىمىزدا بار نەرسىنى ئىسراپ قىلماي، دانالىق بىلەن ئىشلىتىشنى ئۆگىنىمىز. ئاتا-ئانىلار، بالىلىرىڭلار بىلەن مۇشۇ ئۈزۈندىلەرنى بىللە ئوقۇپ، ئۇلارغا دۇئا قىلىش، مېھماندوست ۋە سېخىي بولۇشنىڭ مۇھىملىقىنى ئۆگىتىڭلار.
ئۆز-ئۆزىڭىزدىن سوراپ كۆرۈڭ: «مەن ئەيسادىن ئۈلگە ئېلىپ تاماقنىڭ ئالدىدا دۇئا قىلىمەنمۇ؟» (4-ئابزاسقا قاراڭ)
5. خەلق ئەيسانىڭ قىلغان مۆجىزىسىنى كۆرگەندىن كېيىن قانداق ئىنكاس قايتۇرغان؟ لېكىن، ئەيسا بۇنىڭغا قانداق يول تۇتقان؟
5 خالايىق ئەيسانىڭ بەرگەن تەلىمى ۋە كۆرسەتكەن مۆجىزىلىرىگە ھەيران قېلىشتى. مۇسا پەيغەمبەر نۇرغۇن زامانلار ئىلگىرى، خۇدانىڭ ئۇلۇغ بىر پەيغەمبەرنى ئەۋەتىش ۋەدىسىنى ئالدىن ئېيتقان. بۇنى بىلگەن خەلق «ئەجەبا، ئۇ كىشى ئەيسامىدۇ؟» دەپ ئويلىغان (تەكرار. قا 18:15–18). ھەتتا، ئىسرائىل خەلقى ئەيسانى ياخشى پادىشاھ بولۇپ، يەھۇدىيلارغا ئۇزۇق-تۈلۈك تەمىنلەپ بېرەلەيدۇ دەپ قارىغاچقا، ئۇنى ئۆزلىرىنىڭ پادىشاھى قىلماقچى بولۇشقانىدى (يۇھاننا 6:14، 15). شۇ چاغدا، ئەيسا خالايىقنىڭ سۆزىگە كىرىپ، پادىشاھ بولغان بولسا، رىم ھۆكۈمرانلىقى ئاستىدا بولغان يەھۇدىيلارنىڭ سىياسىي ئىشلىرىغا ئارىلىشالايتتى. ئۇ شۇنداق قىلغانمۇ؟ ياق. مۇقەددەس كىتابتا ئەيسانى تاغقا چېچىپ كەتكەنلىكى ئېيتىلغان. خەلقنىڭ ئەيساغا بېسىم قىلىشىغا قارىماي، ئۇ سىياسەتكە ئارىلاشمىغان. ئۇ بىز ئۈچۈن ياخشى ئۈلگە قالدۇرغان!
6. بىز ئەيسانى قانداق ئۈلگە قىلالايمىز؟ (رەسىمگە ھەم قاراڭ).
6 ئەلۋەتتە، ھېچكىم بىزدىن مۆجىزە كۆرسىتىپ، ناننى كۆپەيتكىن، كېسەللەرنى ساقايتقىن دەپ تەلەپ قىلمايدۇ ياكى بىزنى پادىشاھ تىكلىمەيدۇ. شۇنداق بولسىمۇ، ئادەملەر ئۆزلىرى ياخشى ھۆكۈمران بولىدۇ دەپ ئويلىغان كىشى ئۈچۈن بىزنى سايلامدا ئاۋاز بېرىشكە ياكى ئۇنى باشقىچە ئۇسۇلدا قوللاپ-قۇۋۋەتلەشكە دەۋەت قىلىپ، بىزنى سىياسەتكە ئارىلىشىشقا مەجبۇرلىشى مۇمكىن. ئەمما، ئەيسا بىز ئۈچۈن ياخشى ئۈلگە قالدۇردى. ئۇ سىياسىي ئىشلارغا ئارىلىشىشنى رەت قىلىپ، مۇنداق دېگەن: «مېنىڭ پادىشاھلىقىم بۇ دۇنيادىن ئەمەس» (يۇھاننا 17:14؛ 18:36). بۈگۈنكى كۈندە خۇدانىڭ خىزمەتچىلىرى خۇددى ئەيساغا ئوخشاش ئويلاپ، ئۇنى ئۈلگە قىلىدۇ. بىز ئەيساغا ئوخشاش ساداقەتمەنلىك بىلەن خۇدانىڭ پادىشاھلىقىنى قوللاپ-قۇۋۋەتلەيمىز. بىز بۇ پادىشاھلىق ھەققىدە باشقىلارغا ۋەز قىلىمىز ۋە بۇ پادىشاھلىقىنىڭ كېلىشىنى تىلەپ دۇئا قىلىمىز (مەتتا 6:10). ئەمدى ئەيسانىڭ كۆرسەتكەن مۆجىزىسىدىن يەنە نېمىلەرنى ئۆگىنەلەيدىغانلىقىمىزنى كۆرۈپ باقايلى.
ئەيسا سىياسەتكە ئارىلاشمىغان. بۇ بىز ئۈچۈن ياخشى ئۈلگە! (6-ئابزاسقا قاراڭ)
ناننىڭ مەنىسى
7. ئەيسا نېمە قىلغان ۋە بۇنىڭغا ئەلچىلەر قانداق ئىنكاس قايتۇرغان؟ (يۇھاننا 6:16–20)
7 ئەيسا خالايىقنى تويدۇرۇپ بولغاندىن كېيىن، ئەلچىلىرىنى كېمىگە ئولتۇرغۇزۇپ، قارشى قىرغاقتىكى كەپەرناھۇمغا ئەۋەتىۋەتتى. ئاندىن ئۆزى بولسا پادىشاھ قىلماقچى بولغان خەلقتىن ئۆزىنى قاچۇرۇپ، تاغقا كېتىپ قالدى (يۇھاننا 6:16–20-نى ئوقۇڭ). ئەلچىلەر كېمىدە كېتىپ بارغاندا قاتتىق شامال چىقىپ، دېڭىزدا دولقۇنلار پەيدا بولدى. كېيىن، ئۇلار ئەيسانىڭ سۇ ئۈستىدە مېڭىپ ئۆزلىرىگە قاراپ كېلىۋاتقانلىقىنى كۆردى. ئەيسا پېترۇسنى سۇ ئۈستىدە مېڭىشقا چاقىردى ۋە ئۇمۇ سۇ ئۈستىدە ماڭدى (مەتتا 14:22–31). ئەيسا كېمىگە چىققاندا، بوران-چاپقۇن دەرھال توختىدى. بۇنى كۆرگەن ئەلچىلەر ناھايىتى ھەيران بولۇپ: «سىز ھەقىقەتەن خۇدانىڭ ئوغلى ئىكەنسىز» دېيىشتىa (مەتتا 14:33). قىزىقارلىق يېرى شۇكى، ئەيسا مۆجىزە كۆرسىتىپ ناننى كۆپەيتكەن ۋاقىتتا ئەمەس، بەلكى سۇ ئۈستىدە ماڭغاندىن كېيىن، ئەلچىلەر بۇ سۆزلەرنى ئېيتقان ئىدى. ماركۇس ھەم بۇ ئوخشاش ۋەقە توغرىسىدا مۇنداق يازغان: «ئۇلار ناھايىتى ھەيران قېلىشتى. چۈنكى، ئۇلار نانلار توغرىسىدىكى مۆجىزىنىڭ مەنىسىنى چۈشەنمىگەنىدى، ھازىرچە ئۇلارنىڭ ئەقلى چۈشىنىشكە يەتمەيتتى» (ماركۇس 6:50–52). دېمەك، شاگىرتلار يەھۋانىڭ پەقەت ئەيساغا نان بىلەن تەمىنلەش ئەمەس، باشقا تۈرلۈك مۆجىزىلەرنى كۆرسىتىش كۈچ-قۇدرىتىنى بەرگەنلىكىنى چۈشەنمىگەنىدى. لېكىن، بۇنىڭدىن كۆپ ئۆتمەي، ئەيسا ئۆزى نان بىلەن قىلغان مۆجىزىسى ھەققىدە قايتا سۆزلەپ، مۇھىم بىر ھەقىقەتنى چۈشەندۈرگەن.
8، 9. خالايىق نېمە ئۈچۈن ئەيسانى ئىزدىگەن؟ (يۇھاننا 6:26، 27)
8 ئەيسا تويدۇرغان خالايىق ئۆزلىرىنىڭ جىسمانىي ئېھتىياجلىرىنى ۋە ئارزۇ-ئىستەكلىرىنى قاندۇرۇشقا كۆڭۈل بۆلگەنىدى. بۇنى قەيەردىن بىلىمىز؟ چۈنكى، ئەتىسى ئۇلار ئەيسا ۋە ئۇنىڭ ئەلچىلىرىنىڭ كېتىپ قالغانلىقىنى كۆرگەن. شۇڭا، ئۇلار تىبېرىيەدىن كېمىگە ئولتۇرۇپ، ئەيسانى تېپىش ئۈچۈن كەپەرناھۇمغا قاراپ ماڭغانىدى (يۇھاننا 6:22–24). ئۇلار خۇدانىڭ پادىشاھلىق توغرىسىدىكى خۇش خەۋەرنى كۆپرەك ئاڭلاشنى خالىغاچقا، شۇنداق قىلغانمۇ؟ ياق. ئۇلارنىڭ پۈتۈن ئوي-خىيالى قورساق تويغۇزۇش بولۇپ، ئەيسانىڭ ئۇلارغا نان بېرىشىنى ئۈمىد قىلىشقانىدى. بۇنى قەيەردىن بىلىمىز؟
9 خەلق كەپەرناھۇم ئەتراپىدىن ئەيسانى تاپقاندا، نېمە ئىش يۈز بەرگەنلىكىگە دىققەت قىلايلى. ئەيسا ئۇلارنىڭ ئارزۇ-ئىستىكى پەقەت قورساق تويغۇزۇش ئىكەنلىكىنى ئوچۇق كۆرسىتىپ مۇنداق دېگەن: «نان يەپ تويغانلىقىڭلار ئۈچۈن ئىزدىدىڭلار». ئەيسا بۇ «ۋاقتىنچە بولىدىغان تاماق» ئىكەنلىكىنى تەكىتلىگەن ۋە ئۇلارنى «مەڭگۈ ھاياتلىققا ئېرىشتۈرىدىغان تاماق ئۈچۈن تىرىشىپ» ئىشلەشكە ئۈندىگەن (يۇھاننا 6:26، 27-نى ئوقۇڭ). ئۇ شۇنداق يېمەكلىكنىڭ مەنبەسى خۇدا ئىكەنلىكىنى كۆرسەتكەن. خەلق مەڭگۈ ھاياتلىققا ئېرىشتۈرىدىغان يېمەكلىك بارلىقىنى ئاڭلىغاندا، ناھايىتى ھەيران قالغان بولۇشى مۇمكىن. ئۇ قانداق يېمەكلىك ۋە ئۇلار ئۇنىڭغا قانداق ئېرىشەلەيتتى؟
10. خەلق مەڭگۈلۈك ھاياتلىققا ئېرىشىش ئۈچۈن نېمە قىلىش كېرەك ئىدى؟
10 قارىماققا، ئاشۇ يەھۇدىي خەلقى شۇنداق يېمەكلىككە ئېرىشىش ئۈچۈن بەزى خىزمەتلەرنى ياكى ئىشلارنى قىلىش زۆرۈر دەپ قارىغان. بەلكىم، ئۇلار مۇسا قانۇنىدا بەلگىلەنگەن ئىشلارنى قىلىشىمىز كېرەك دەپ ئويلىغان. لېكىن، ئەيسا ئۇلارغا مۇنداق دېگەن: «خۇدا ئەۋەتكەن كىشىگە ئىشىنىڭلار، خۇدانىڭ ئىشى بۇدۇر»،— دەپ جاۋاب بەردى (يۇھاننا 6:28، 29). مەڭگۈلۈك ھاياتقا ئېرىشىش ئۈچۈن خۇدانىڭ ۋەكىلى ئەيسا مەسىھكە ئىشىنىش كېرەك. ئەسلىدە، ئەيسا ئىلگىرى بۇ توغرۇلۇق سۆزلىگەن ئىدى (يۇھاننا 3:16–18، 36). كېيىنرەك، ئەيسا يەنە مەڭگۈلۈك ھاياتلىققا ئېرىشىش ھەققىدە كۆپرەك سۆزلەپ بېرەتتى.—يۇھاننا 17:3.
11. يەھۇدىيلارنىڭ پۈتۈن ئوي-خىيالى پەقەتلا قورساق تويغۇزىدىغان ناندا ئىكەنلىكى، ئەيسا قانداق ئېنىق كۆرسەتكەن؟ (زەبۇر 78:24، 25)
11 بۇ يەھۇدىيلار ئەيسانىڭ «خۇدانىڭ ئىشى» توغرۇلۇق بەرگەن تەلىمىنى قوبۇل قىلمىغان. ئۇلار ئەيساغا: «ئۇنداقتا، سىزگە ئىشىنىشىمىز ئۈچۈن بىر مۆجىزە كۆرسىتىپ بېرىڭ؟ قېنى، نېمە ئىش قىلىپ بېرىسىز؟»— دېگەن. ئارقىدىنلا، ئۇلار مۇسانىڭ زاماندا ئاتا-بوۋىلىرىنىڭ ئاسماندىن چۈشكەن ماننانى يېگەنلىكىنى تىلغا ئالغان (يۇھاننا 6:30؛ نەھەم. 9:15؛ زەبۇر 78:24، 25-نى ئوقۇڭ). ناھايىتى ئېنىقكى، ئۇلارنىڭ پۈتۈن ئوي-خىيالى پەقەتلا قورسىقىنى تويغۇزىدىغان ناندا ئىدى. كېيىن، ھەزرىتى ئەيسا ئاسماندىن چۈشكەن ھەقىقىي نان توغرۇلۇق سۆز قىلغاندا، ئۇلار ھەتتا ئۇنىڭ مەنىسىنى چۈشەندۈرۈپ بېرىشنىمۇ سورىمىغانىدى (يۇھاننا 6:32). ئۇلار پەقەت جىسمانىي ئېھتىياجلىرىغا كۆڭۈل بۆلگەچكە، ئەيسانىڭ مەڭگۈلۈك ھاياتلىققا ئېرىشىش توغرۇلۇق ئېيتقان ھەقىقەتلەرگە پەرۋاسىزلىق قىلغان. بۇ ئۈزۈندىدىن نېمىلەرنى ئۆگىنەلەيمىز؟
بىز ئۈچۈن ئەڭ مۇھىمى نېمە بولۇشى كېرەك؟
12. ھاياتىمىزدا ئەڭ بىرىنچى ئورۇندا نېمە بولۇشى كېرەكلىكىنى، ئەيسا قانداق كۆرسەتكەن؟
12 يۇھاننا بايان قىلغان خۇش خەۋەر 6-بابتىن مۇھىم بىر ھەقىقەتنى ئۆگىنەلەيمىز. بىز ئۈچۈن يەھۋاغا سادىق بولۇش ۋە ئۇنىڭ يېقىن مۇناسىۋەتنى ساقلاش ھاياتىمىزدا بىرىنچى ئورۇندا تۇرۇشى كېرەك. شەيتان مەسىھ ئەيسانى ئېزىقتۇرغاندا، «ئادەم پەقەت نان بىلەنلا ئەمەس، بەلكى يەھۋانىڭ ئېغىزىدىن چىققان ھەربىر سۆز بىلەن ياشايدۇ»،— دېيىش ئارقىلىق، بۇ مۇھىم ھەقىقەتنى كۆرسىتىپ ئۆتكەن (مەتتا 4:3، 4). ئۇنىڭدىن باشقا، ئەيسا تاغدىكى ۋەز-نەسىھىتىدە ھەم خۇدا بىلەن بولغان مۇناسىۋەتنىڭ مۇھىملىقىنى تەكىتلەپ ئۆتكەن (مەتتا 5:3). شۇڭا، ئۆز-ئۆزىمىزدىن مۇنداق دەپ سوراپ كۆرسەك بولىدۇ: «ھاياتىمدا جىسمانىي ئېھتىياجلىرىم بىرىنچى ئورۇندا تۇرامدۇ ياكى يەھۋا بىلەن بولغان مۇناسىۋىتىم بىرىنچى ئورۇندا تۇرامدۇ؟
13. (1) نېمىشقا يەپ-ئىچىپ ھۇزۇرلىنىشنىڭ ھېچقانداق خاتا يېرى يوق؟ (2) ئەلچى پاۋلۇس نېمە توغرۇلۇق ئاگاھلاندۇرغان؟ (1-كورىنتلىقلار 10:6، 7، 11)
13 ئەلۋەتتە، جىسمانىي ئېھتىياجلىرىمىز توغرۇلۇق دۇئا قىلىپ، ئۇلاردىن ھۇزۇرلىنىپ، كۆڭلىمىزنى قانائەتلەندۈرۈشنىڭ ھېچقانداق خاتا يېرى يوق (لۇقا 11:3). مۇقەددەس كىتابتا، ئەجىر-مېھنەت قىلغاندىن كېيىن، «ئىنسان ئۈچۈن يەپ-ئىچىپ، … ھۇزۇرلىنىشتىن ئارتۇق ياخشى ئىش يوق … بۇ ھەم ھەق خۇدانىڭ قولىدىن كېلىدۇ» دەپ يېزىلغان (ۋەز 2:24؛ 8:15؛ ياقۇپ 1:17). شۇنداقتىمۇ، ماددىي نەرسىلەرنىڭ ھاياتىمىزدا بىرىنچى ئورۇننى ئىگىلىۋېلىشىغا يول قويماسلىقىمىز كېرەك. ئەلچى پاۋلۇس 1-ئەسىردە ياشىغان مەسىھ ئەگەشكۈچىلىرىگە خەت يازغاندا، قەدىمقى ئىسرائىل خەلقىنىڭ تارىخىنى تىلغا ئېلىپ، ئۇلار سىناي تېغىدا قانداق يامان ئىشلارنى قىلغانلىقىنى ئەسلىتىپ ئۆتكەن. كېيىن، پاۋلۇس مەسىھ ئەگەشكۈچىلىرىنى «خۇددى [ئىسرائىللارغا] ئوخشاش زىيانلىق ئارزۇلارغا مايىل بولماسلىققا» ئاگاھلاندۇرغان (1-كورىنتلىقلار 10:6، 7، 11-نى ئوقۇڭ). يەھۋا مۆجىزە كۆرسىتىپ، ئىسرائىللارغا يېمەكلىك بەرگەن، لېكىن ئىسرائىل خەلقى ئاچكۆزلۈك قىلىپ، نەتىجىدە ئۆزلىرىگە زىيان كەلتۈرگەن (سانلار 11:4–6، 31–34). بۇنىڭدىن ئىلگىرى ئىسرائىل خەلقى ئالتۇن موزايغا سەجدە قىلىپ، يەپ-ئىچكەن، ئويۇن-تاماشا قىلىشقان (چىق. 32:4–6). ئەلچى پاۋلۇس ئەينى زاماندىكى مەسىھ ئەگەشكۈچىلىرىنى ئاگاھلاندۇرۇپ ناھايىتى ياخشى قىلغان، چۈنكى شۇ چاغ مىلادى 70-يىلى يېرۇسالىمدىكى ئىبادەتخانىنىڭ ۋەيران قىلىنىدىغان ۋاقتى يېقىنلاپ قالغانىدى. ھازىر بىزمۇ بۇ دۇنيانىڭ ئاخىرقى كۈنلىرىدە ياشاۋاتىمىز. شۇنىڭ ئۈچۈن، ئەلچى پاۋلۇسنىڭ ئاگاھلاندۇرۇشىغا بىپەرۋالىق قىلماي، جىددىي مۇئامىلە قىلىشىمىز لازىم.
14. مۇقەددەس كىتابتا يېمەكلىكلەر توغرۇلۇق قانداق بېشارەتلەر يېزىلغان؟
14 ھەزرىتى ئەيسا «كۈندىلىك نېنىمىزنى بەرگەيسەن» دەپ دۇئا قىلىشنى ئۆگەتكەندە، يەنە خۇدانىڭ ئىرادىسى «ئاسماندا ئەمەلگە ئاشقاندەك، يەر يۈزىدىمۇ ئەمەلگە ئاشسۇن» دەپ دۇئا قىلىشمىز كېرەكلىكىنى ئېيتقان (مەتتا 6:9–11). شۇ ۋاقىت كەلگەندە، بۇ دۇنيانىڭ قانداق بولىدىغانلىقىنى كۆز ئالدىڭىزغا كەلتۈرۈپ باققانمۇسىز؟ يەشايا 25:6–8-ئايەتلەردە يېزىلغاندەك، خۇدانىڭ ئىرادىسى يەر يۈزىدە ئەمەلگە ئاشقاندا، لەززەتلىك يىمەك-ئىچمەكلەر مول بولىدۇ. يەنە زەبۇر 72:16-ئايەتتە: «يەر يۈزىدە زىرائەتلەر مول بولار، تاغ چوقىلىرىغىچە تولۇپ تاشار»،— دەپ يېزىلغان. شۇ ۋاقىت كەلگەندە، ئۆزىڭىز ياخشى كۆرىدىغان نانلارنى پىشۇرۇپ، يېڭى تائاملارنى ئېتىپ ھۇزۇرلىنىپ يەۋاتقان كۆرۈنۈشنى كۆز ئالدىڭىزغا كەلتۈرەلەمسىز؟ ئۇنىڭدىن باشقا، ئۆز ئۈزۈمزارلىقىڭىزنى بەرپا قىلىپ، بەرگەن شىرىن-تاتلىق مېۋىلىرىنى يەيسىز (يەشايا 65:21، 22). شۇ چاغدا، يېقىن دوست-يارەنلىرىڭىز بىلەن شۇ ئاجايىپ نازۇنېمەتلەردىن ھۇزۇرلىنىسىز!
15. تىرىلگەن كىشىلەر نېمە توغرۇلۇق بىلىم ئېلىشى كېرەك؟
15 يۇھاننا 6:35-نى ئوقۇڭ. ئەيسا مۆجىزە ئارقىلىق تەمىنلىگەن نان بىلەن بېلىقنى يېگەن كىشىلەر ھەققىدە يەنە بىر قېتىم ئويلىنىپ كۆرەيلى. ھەتتا شۇ كىشىلەر ئەينى زاماندا ئەيساغا ئىشەنمىگەن بولسىمۇ، كېلەچەكتە ئۇلارنىڭ بەزىلىرى تىرىلىپ، بىز ئۇلار بىلەن كۆرۈشىشىمىز مۇمكىن (يۇھاننا 5:28، 29). شۇ چاغدا، ئۇلار ئەيسانىڭ: «ھاياتلىق بېرىدىغان نان ئۆزۈمدۇرمەن! كىمكى ماڭا كەلسە، ھەرگىز ئاچ قالماس» دېگەن سۆزلىرىنىڭ مەنىسىنى چۈشىنىدۇ. ئۇلار ئەيسانىڭ تۆلەم قۇربانلىقىغا، يەنى ئۆز جېنىنى ئۇلار ئۈچۈن پىدا قىلغانلىقىغا ئىشىنىشى كېرەك. شۇ ۋاقىتتا، تىرىلگەنلەرگە ۋە يېڭى دۇنيادا تۇغۇلغان بالىلارغا ھەقىقەتنى ئۆگىتىش تەلىم-تەربىيە خىزمىتى ئۇيۇشتۇرۇلىدۇ. بىز ئۇلارنىڭ ھەق خۇدا يەھۋا ۋە ئۇنىڭ ئىرادىسى ھەققىدە بىلىم ئېلىشىغا ياردەم بېرىمىز. باشقىلارنىڭ خۇدا بىلەن دوستلۇق ئورنىتىشىغا ياردەم بېرش ھەرقانداق لەززەتلىك تائاملاردىن ھۇزۇرلىنىشتىنمۇ ئارتۇقراق شاد-خۇراملىق بېغىشلايدۇ!
16. كېيىنكى ماقالىدە نېمىنى مۇھاكىمە قىلىمىز؟
16 بىز يۇھاننا بايان قىلغان خۇش خەۋەر 6-بابتىن قىسقا بىز ئۈزۈندىنى مۇھاكىمە قىلىپ چىقتۇق. بىراق، ئەيسا مەسىھ مەڭگۈلۈك ھاياتلىق توغرىسىدا تېخىمۇ كۆپ تەلىملەرنى بەرگەن. ئەينى چاغدا، يەھۇدىيلار ئەيسانىڭ ئېيتقان ھەقىقەت سۆزلىرىنى كۆڭۈل قويۇپ ئاڭلىشى كېرەك ئىدى. شۇنىڭدەك، بۈگۈن كۈندە بىزمۇ شۇنداق قىلىشىمىز كېرەك. كېيىنكى ماقالىدە يۇھاننا بايان قىلغان خۇش خەۋەر 6-بابنىڭ مەزمۇنىنى داۋاملىق مۇھاكىمە قىلىمىز.
148-ناخشا يېگانە ئوغلۇڭنى بەردىڭ
a بۇ ھەيران قالارلىق ۋەقە توغرۇلۇق كۆپرەك بىلىش ئۈچۈن «ئەيسا — يول، ھەقىقەت ۋە ھاياتلىق» (باشقا تىلدا) ناملىق كىتابنىڭ 131-بېتىگە ۋە «ئۇلارنىڭ ئېتىقادىدىن ئۈلگە ئېلىڭلار» (باشقا تىلدا) ناملىق كىتابنىڭ 185-بېتىگە قاراڭ.