49-تەتقىق ماقالىسى
12-ناخشا ۋەدە قىلىنغان مەڭگۈ ھاياتلىق
مەڭگۈلۈك ھاياتلىققا ئېرىشىش ئۈچۈن نېمە قىلالايسىز؟
«ئوغلىنى ئېتىراپ قىلىپ، كۆرگەن، ئۇنىڭغا ئىشەنگەن ھەربىر كىشىنى مەڭگۈلۈك ھاياتقا ئېرىشتۈرۈشتۇر».—يۇھاننا 6:40.
مەركىزى ئىدىيە
ئەيسا مەسىھنىڭ تۆلەم قۇربانلىقى ئارقىلىق مەسىھ قىلىنغان ئېتىقادچىلار ۋە باشقا قويلارنى قانداق بەرىكەتلەرگە ئېرىشەلەيدۇ؟
1. بەزى ئادەملەر مەڭگۈلۈك ھايات توغرىسىدا نېمە ئويلايدۇ؟
نۇرغۇن ئادەملەر تەن-ساغلام ۋە ئۆمرى ئۇزۇن بولۇشى ئۈچۈن توغرا ئوزۇقلىنىش ۋە تەنتەربىيە بىلەن شۇغۇللىنىشقا تىرىشىدۇ. ئەمما، ئۇلار شۇ تىرىشچانلىقلىرى ئۆزلىرىنىڭ قېرىپ، ئاخىرىدا ئۆلۈپ كېتىشتىن ساقلاپ قالالمايدىغانلىقىنى بىلىدۇ. شۇڭا، مەڭگۈ ياشاشنى ئۈمىد قىلىش ئۇلار ئۈچۈن خام خىيالدەك بىلىنىدۇ. يۇھاننا 3:16 ۋە 5:24-ئايەتلەردە، ئەيسا مەسىھ ئىنسانلارنىڭ «مەڭگۈلۈك ھاياتقا» ئېرىشىشى مۇمكىنلىكىنى ئېيتقانىدى.
2. يۇھاننا 6-بابتا، مەڭگۈلۈك ھايات توغرۇلۇق نېمە يېزىلغان؟ (يۇھاننا 6:39، 40)
2 ئالدىنقى ماقالىدە مۇھاكىمە قىلغىنىمىزدەك، ئەيسا مۆجىزە كۆرسىتىپ، نۇرغۇن ئادەملەرنى نان ۋە بېلىق بىلەن تويدۇرغانa. ئۇ كىشىلەرنى ھەيران قالدۇرغانىدى. بىراق، ئەتىسى ئەيسانىڭ ئېيتقان سۆزلىرى خالايىقنى تېخىمۇ بەكرەك ھەيران قالدۇردى. خەلق ئەيساغا ئەگىشىپ، جەلىلىيە دېڭىزى بويىغا يېقىن جايلاشقان كەپەرناھۇم شەھىرىگە كەلگەن. شۇ يەردە ئەيسا ئۇلارغا ئۆلگەنلەرنىڭ قايتا تىرىلدۈرۈلىدىغانلىقىنى ۋە مەڭگۈ ياشىيالايدىغانلىقىنى ئېيتقان (يۇھاننا 6:39، 40-نى ئوقۇڭ). شۇڭا، ئۆلۈپ كەتكەن يېقىن دوست-بۇرادەرلىرىڭىز ياكى ئۇرۇق-تۇغقانلىرىڭىز توغرۇلۇق ئويلاپ كۆرۈڭ. ئەيسانىڭ سۆزلىرى شۇ ئۆلۈپ كەتكەن نۇرغۇن ئىنسانلار تىرىلدۈرۈلۈپ، سىز ۋە يېقىنلىرىڭىزنىڭ مەڭگۈ ھايات كەچۈرەلەيدىغانلىقىڭلارنى كۆرسىتىدۇ. بىراق، يۇھاننا بايان قىلغان خۇش خەۋەر 6-بابتىكى ئەيسانىڭ ئېيتقان سۆزلىرىنى چۈشىنىش نۇرغۇن ئادەملەر ئۈچۈن قىيىن بولغان. بۈگۈنكى كۈندىمۇ ئوخشاشلا كۆپلىگەن كىشىلەر چۈشەنمەيدۇ. بىرلىكتە، ئەيسانىڭ شۇ چاغدا نېمە دېگەنلىكىنى كۆرۈپ باقايلى!
3. يۇھاننا 6:51-ئايەتتە، ھەزرىتى ئەيسا ئۆزى توغرۇلۇق نېمە دېگەن؟
3 ئەيسا مۆجىزە كۆرسىتىپ، نان بىلەن خالايىقنى تويدۇرغاندا، ئۇلار يەھۋا خۇدانىڭ ئۆتمۈشتە ئاتا-بوۋىلىرىغا چۆل-باياۋاندا ماننا بەرگەنلىكىنى ئېسىگە ئالغان. مۇقەددەس يازمىلاردا ماننانى «ئاسماندىن چۈشەرگەن نان» دەپ ئاتىغان (زەبۇر 105:40؛ يۇھاننا 6:31). ئەيسا ماننانى مىسال كەلتۈرۈش ئارقىلىق ئۇلارغا مۇھىم بىر ھەقىقەتنى ئۆگەتمەكچى بولغان. گەرچە خۇدا مۆجىزە قىلىپ، ماننانى چۈشۈرۈپ بەرسىمۇ، ئۇنى يېگەنلەر ئاخىرى ئۆلۈپ كەتكەن ئىدى (يۇھاننا 6:49). ئەكسىچە، ئەيسا ئۆزىنى «ئاسماندىن چۈشكەن ھەقىقىي نان»، «خۇدانىڭ نېنى» ۋە «ھاياتلىق بېرىدىغان نان» دەپ ئاتىغان (يۇھاننا 6:32، 33، 35). ئەيسا ئۆزى بىلەن ماننا ئارىسىدىكى مۇھىم پەرقنى كۆرسىتىپ ئۆتكەن. ئۇ: «ئاسماندىن چۈشكەن ھاياتلىق بېرىدىغان نان ئۆزۈمدۇرمەن. كىمكى بۇ ناندىن يېسە، مەڭگۈ ياشايدۇ»،— دېگەن (يۇھاننا 6:51-نى ئوقۇڭ). بۇ سۆزلەرنى ئاڭلىغان يەھۇدىيلار گاڭگىراپ، نېمە ئۈچۈن ئەيسا ئۆزىنى ئاسماندىن چۈشكەن «نان» دەپ ئاتايدۇ؟ ئۇ قانداقمۇ خۇدا مۆجىزە كۆرسىتىپ ئۇلارنىڭ ئاتا-بوۋىلىرىغا بەرگەن ماننادىن ياخشىراق «نان» بولىدۇ؟ دەپ، ھاڭ-تاڭ بولۇپ قېلىشقان. ئەيسا سۆزىنى داۋاملاشتۇرۇپ: «مەن بەرمەكچى بولغان نان مېنىڭ تېنىمدۇر»،— دەپ چۈشەندۈرگەن. ئۇ نېمە دېمەكچى بولغان؟ بۇ سوئالنىڭ جاۋابىنى تېپىش بەك مۇھىم! چۈنكى، بىزنىڭ ۋە يېقىنلىرىمىزنىڭ مەڭگۈ ھاياتلىققا ئېرىشىشى ئۈچۈن، ئەيسانىڭ سۆزلىرىنى توغرا چۈشىنىشىمىز لازىم. بىرلىكتە ئەيسانىڭ نېمە دېمەكچى بولغانلىقىنى مۇھاكىمە قىلىپ باقايلى.
ھاياتلىق بېرىدىغان نان ۋە ئەيسانىڭ تېنى
4. خەلق نېمە ئۈچۈن ئەيسانىڭ سۆزلىرىنى ئاڭلاپ گاڭگىراپ قالغان؟
4 ئەيسا ئۆز تېنى توغرىلىق: «مەن ئۇنى دۇنيادىكى ئىنسانلارغا ھاياتلىق بەرسۇن دەپ بېرىمەن»،— دېگەندە، ئۇنىڭ سۆزىنى ئاڭلىغانلار گاڭگىراپ قالغان. ئۇلار ئەيسانى ئۇدۇل مەنىدە ئۆز تېنىنى ئۇلارغا يېيىشكە بېرىدۇ دەپ قارىغانمۇ؟ (يۇھاننا 6:52). ئەيسا سۆزىنى داۋاملاشتۇرۇپ، ئۇلارنى تېخىمۇ بەكرەك ھەيران قالدۇرىدىغان گەپنى قىلغان. ئۇ: «ئىنسان ئوغلىنىڭ تېنىنى يېمىگۈچە ۋە قېنىنى ئىچمىگۈچە، سىلەر ھاياتقا ئېرىشەلمەيسىلەر».—يۇھاننا 6:53.
5. ئەيسا ئۇدۇل مەنىدە كىشىلەرنى ئۇنىڭ قېنىنى ئىچىشكە دەۋەت قىلمىغانلىقىنى قەيەردىن بىلىمىز؟
5 نۇھ پەيغەمبەرنىڭ زامانىدا، خۇدا ئىنسانلارنىڭ قاننى ئىستىمال قىلىشنى مەنئىي قىلغان ئىدى (يارىت. 9:3، 4). ئەسىرلەر ئۆتكەندىن كېيىن، يەھۋا مۇسا پەيغەمبەر ئارقىلىق تەۋراتتا ئىسرائىللارغا قان توغرىسىدىكى مەنئىي قىلىش بۇيرۇقىنى تەكرارلىغان. كىمكى قاننى ئىستىمال قىلسا، ئۇ چوقۇم ئۆلتۈرۈلۈشى كېرەك ئىدى (لاۋى. 7:27). ئەيسامۇ يەھۇدىيلارنى تەۋرات قانۇنىنى ئورۇنلاشقا دەۋەت قىلغان (مەتتا 5:17–19). شۇڭا، ئەيسانىڭ توپلاشقا خالايىقنى ئۆزىنىڭ ھەقىقىي تېنىنى يەپ، قېنىنى ئىچىشكە دەۋەت قىلىشى ئەقىلگە سىغمايدىغان ئىش. ئەسلىدە، ئەيسا مۇشۇ كىشىنى چۆچۈتىدىغان سۆزلەرنى قىلىپ، مەڭگۈلۈك ھاياتلىققا ئېرىشىش ئۈچۈن نېمە قىلىش كېرەكلىكىنى ئۆگەتمەكچى بولغان ئىدى.—يۇھاننا 6:54.
6. ئەيسانىڭ سۆزلىرىنى قانداق چۈشىنىشىمىز كېرەك؟
6 ئۇنداقتا، ئەيسا نېمە دېمەكچى بولغان؟ ئەسلىدە، ئەيسانىڭ بۇ سۆزلەرنى كۆچمە مەنىدە ئېيتقانلىقى ئېنىق. چۈنكى، ئۇنىڭدىن ئىلگىرى سامارىيىلىك ئايال بىلەن سۆزلەشكەندە، ئۇ كۆچمە مەنىدە سۆزلەرنى قىلغان. ئەيسا سامارىيىلىك ئايالغا: «ئەمما، كىمكى مەن بېرىدىغان سۇنى ئىچسە، مەڭگۈ ئۇسسىمايدۇ، ئەكسىچە مەن بېرىدىغان سۇ، شۇ سۇنى ئىچكەن كىشىنىڭ ۋۇجۇدىدا ئېتىلىپ چىقىدىغان بۇلاققا ئايلىنىپ، ئۇنىڭغا مەڭگۈلۈك ھاياتلىق بېرىدۇ»،— دېگەن (يۇھاننا 4:7، 14)b. ئەيسا بۇ ئايالغا مەڭگۈلۈك ھاياتلىققا ئېرىشىش ئۈچۈن نېمە قىلىش كېرەكلىكىنى ئېيتقاندا، ئۇدۇل مەنىدىكى سۇنى ئىچىش توغرۇلۇق سۆز قىلمىغان. خۇددى شۇنىڭغا ئوخشاش، كەپەرناھۇم شەھىرىدە توپلاشقان خالايىققا تەلىم بەرگەندە، ئەيسا بىر كىشى مەڭگۈلۈك ھاياتلىققا ئېرىشىش ئۈچۈن ئۇنىڭ ئۇدۇل مەنىدىكى تېنىنى يەپ، قېنىنى ئىچىش كېرەكلىكىنى ئېيتمىغان.
ئىككى ۋەزىيەت ئېيتقان سۆزلىرى ئارىسىدىكى پەرقلەر
7. يۇھاننا 6:53-ئايەتلەردىكى ئەيسانىڭ سۆزلىرىنى بەزىلەر قانداق چۈشىنىدۇ؟
7 ئۆزىنى مەسىھنىڭ ئەگەشكۈچىلىرى دەپ ئاتايدىغان بەزى دىندار كىشىلەر، يۇھاننا 6:53-ئايەتتىكى ئەيسانىڭ سۆزلىرىنى، مەسىھنى خاتىرىلەش كەچلىك داستىخىنىدا بولىدىغان ئىشلارنىڭ ئالدىن ئېيتىلغان بېشارىتى دەيدۇ. چۈنكى، شۇ كەچلىك داستىخاندا ھەم ئەيسا ئوخشاش گەپ-سۆزلەرنى قىلغان (مەتتا 26:26–28). ئۇلارنىڭ ئېيتىشىچە، كەچلىك داستىخان يىغىلىشىغا كەلگەن ئادەملەرنىڭ ھەممىسى ناندىن يەپ، شارابتىن ئىچىشى كېرەك. شۇنداق قىلىش توغرىمۇ؟ بۇ سوئالنىڭ جاۋابىنى تېپىش بىز ئۈچۈن بەك مۇھىم. چۈنكى، ھەر يىلى دۇنيانىڭ جاي-جايلىرىدا مىليونلىغان ئادەملەر بۇ خاتىرىلەش يىغىلىشىغا قاتنىشىدۇ. ئەمەلىيەتتە، يۇھاننا 6:53-ئايەتتىكى ئەيسانىڭ سۆزلىرى بىلەن خاتىرىلەش كەچلىك داستىخىنىنى ئورۇنلاشتۇرغاندا قىلغان سۆزلىرىنىڭ پەرقلىق مەنىسى بار. ھازىر بۇ ئىككى ۋەزىيەتتە ئېيتىلغان سۆزلەرنىڭ قانداق پەرقى بارلىقىنى كۆرۈپ باقايلى.
8. بۇ ئىككى ۋەزىيەت ئارىسىدا پەرقلەر بار؟ (رەسىملەرگە ھەم قاراڭ).
8 ئاۋۋال، بۇ ۋەزىيەتلەر قايسى ئىككى جەھەتتىن پەرقلىنىدىغانلىقىغا دىققەت قىلايلى. بىرىنچى، ئەيسا مەسىھ، يۇھاننا 6:53–56-ئايەتتىكى سۆزلەرنى قەيەردە ۋە قاچان ئېيتقان؟ يېرۇسالېمدا خاتىرىلەش داستىخىنىنى ئورۇنلاشتۇرۇشتىن تەخمىنەن بىر يىل بۇرۇن، ئەيسا جەلىلىيىدە، مىلادى 32-يىلى يەھۇدىيلارغا شۇ سۆزلەرنى ئېيتقان ئىدى. ئىككىنچى، كىمگە قارىتا بۇ سۆزلەرنى ئېيتقان؟ جەلىلىيەدە بىر توپ كىشىلەرگە شۇ سۆزلەرنى ئېيتقان ئىدى، لېكىن كۆپىنچە كىشىلەر خۇدا پادىشاھلىقى توغرۇلۇق تەلىم ئېلىشقا ئەمەس، قورساق تويغۇزۇشقا بەكرەك كۆڭۈل بۆلگەن (يۇھاننا 6:26). ناھايىتى ئەپسۇسكى، ئەيسا مەسىھنىڭ سۆزلىرىنى چۈشىنىش قىيىن بولغاندا، ئۇلار دەرھال ئۇنىڭدىن ئۈمىد ئۈزۈپ، ئىشەنچىسىنى يوقاتقان. ھەتتا بەزى شاگىرتلار ئۇنىڭغا ئەگەشمەيدىغان بولغان ئىدى (يۇھاننا 6:14، 36، 42، 60، 64، 66). ئەمدى شۇنىڭدىن بىر يىل ئۆتۈپ، ئەيسا مىلادى 33-يىلى 11 سادىق ئەلچىسى بىلەن خاتىرىلەش داستىخىنىنى ئورۇنلاشتۇرغاندا نېمە بولغانلىقىنى كۆرۈپ باقايلى. گەرچە ئۇلار ھەزرىتى ئەيسانىڭ بارچە تەلىملىرىنى پۈتۈنلەي چۈشەنمىگەن بولسىمۇ، ئەيساغا سادىق بولۇپ قالغان ۋە ئۇنىڭ ئاسماندىن كەلگەن خۇدانىڭ ئوغلى ئىكەنلىكىگە ئىشەنگەن. ئۇلار جەلىلىيەدە توپلاشقان كۆپىنچە كىشىلەردىن پەرقلىق بولغان (مەتتا 16:16). ئەيسا ئۇلارنى ماختاپ: «مەن سىناقلارغا دۇچ كەلگەندە، سىلەر مەن بىلەن بىللە بولغانسىلەر»،— دېگەن (لۇقا 22:28). بۇ ئىككى پەرق شۇنى ئېنىق كۆرسىتىپ بېرەلەيدۇكى، ئەيسا مەسىھ يۇھاننا 6:53-ئايەتتىكى سۆزلەرنى قىلىش ئارقىلىق ھەرگىزمۇ كەچلىك داستىخاننىڭ قانداق ئورۇنلاشتۇرۇلۇشىنى چۈشەندۈرمەكچى بولغان ئەمەس. بۇ ئىككى ۋەزىيەت ئارىسىدا يەنە باشقا پەرقلەرمۇ بار. بىرلىكتە كۆرۈپ باقايلى.
سول تەرەپتە: يۇھاننا 6-بابتا، ئەيسا مەسىھنىڭ جەلىلىيەدە خالايىققا ئېيتقان سۆزلىرى يېزىلغان. ئوڭ تەرەپتە: ئەيسا بىر يىلدىن كېيىن يېرۇسالىمدا سادىق ئەلچىلىرى تەشكىل قىلغان بىر كىچىك توپقا سۆزلەۋاتىدۇ (8-ئابزاسقا قاراڭ)
ئەيسا شۇ سۆزلەرنى سىزگىمۇ قارىتا ئېيتقان
9. ئەيسا خاتىرىلەش داستىخىنىنى ئورۇنلاشتۇرغاندا، ئۇ كىمگە قارىتا سۆز قىلغان؟
9 خاتىرىلەش داستىخىنىنى ئورۇنلاشتۇرغاندا، ئەيسا پېتىر ناننى شاگىرتلارغا سۇنۇپ بەرگەندىن كېيىن، ئۇلارغا: «ناننى ئېلىڭلار، يەڭلار. بۇ مېنىڭ تېنىمنى بىلدۈرىدۇ»،— دېگەن. كېيىن، ئۇ شارابنى شاگىرتلىرىغا بېرىپ: «مېنىڭ ئەھدە قېنىمنى بىلدۈرىدۇ»،— دېگەن (ماركۇس 14:22–25؛ لۇقا 22:20؛ 1-كورىنت. 11:24). ئەيسانىڭ «ئەھدە» توغرۇلۇق ئېيتقانلىرى ناھايىتى مۇھىم. ئەيسا بۇ ئەھدىنى ھەممە ئادەملەر بىلەن ئەمەس، پەقەت «[روھىي] ئىسرائىل خەلقى» بىلەن، يەنى «خۇدا پادىشاھلىقىدا» بولىدىغانلار بىلەن تۈزگەن (ئىبرانىي. 8:6، 10؛ 9:15). گەرچە شۇ ۋاقىتتا ئۇ يەردە بولغان ئەلچىلەر بۇ سۆزلەرنى پۈتۈنلەي چۈشەنمىگەن بولسىمۇ، ئۇزاق ئۆتمەي، ئۇلار مۇقەددەس روھ ئارقىلىق مەسىھ قىلىناتتى. شۇ چاغدا، يېڭى ئەھدە كۈچكە ئىگە بولۇپ، ئۇلار ئاسماندا ئەيسا بىلەن پادىشاھ بولۇش پۇرسىتىگە ئېرىشەتتى.—يۇھاننا 14:2، 3.
10. ئەيسا مەسىھنىڭ جەلىلىيەدە ئېيتقان سۆزلىرى بىلەن كەچلىك داستىخاننى ئورۇنلاشتۇرغاندا ئېيتقان سۆزلىرى ئارىسىدا قانداق پەرقلەر بار؟ (رەسىمگە ھەم قاراڭ).
10 خاتىرىلەش داستىخىنىدا، ئەيسا مەسىھنىڭ «كىچىك پادىغا» قارىتا ئېيتقان سۆزلىرىگە دىققەت قىلىپ كۆرەيلى. ئۇنىڭ بىلەن بىر داستىخاندا ئولتۇرغان سادىق ئەلچىلەر مۇشۇ كىچىك توپنىڭ بىرىنچى ئەزالىرى ئىدى (لۇقا 12:32). خاتىرىلەش داستىخىنىغا قاتناشقان بۇ كىچىك توپ سادىق ئەلچىلەر ۋە كېيىنرەك ئۇلارغا قوشۇلىدىغان باشقا كىشىلەر كىچىك پادىنى تەشكىل قىلاتتى. شۇڭلاشقا، پەقەت كىچىك پادىنى تەشكىل قىلغۇچىلارلا ناندىن يەپ ۋە شارابتىن ئىچىشى كېرەك ئىدى. چۈنكى، ئۇلار ئاسماندا ئەيسا بىلەن ھۆكۈمرانلىق قىلىدۇ. لېكىن ئەيسا جەلىلىيەدە، ئۇ توپ-توپ كىشىلەرگە قارىتا سۆز قىلغان.
نان بىلەن شارابقا ئېغىز تەگكۈزىدىغانلارنىڭ سانى چەكلىك، لېكىن ھەرقانداق ئادەم ئەيساغا ئىشىنىپ، مەڭگۈلۈك ھاياتقا ئېرىشەلەيدۇ (10-ئابزاسقا قاراڭ)
11. ھەزرىتى ئەيسانىڭ جەلىلىيەدە ئېيتقان سۆزلىرىنىڭ سان-ساناقسىز ئىنسانلارغا قارىتا ئېيتىلغانلىقىنى قانداق بىلىمىز؟
11 مىلادى 32-يىلى، ئەيسا جەلىلىيەدە سۆز قىلغاندا، ئۇنى تىڭشاپ تۇرغانلارنىڭ ھەممىسى نانغا ئېرىشىشىنى خالىغان. بىراق، ئەيسا مەسىھ ئۇلارنىڭ دىققىتىنى ئۇدۇل مەنىدىكى يېمەكلىككە ئەمەس، ئۇنىڭدىنمۇ مۇھىمراق ھەقىقەتكە قاراتقان. شۇ ئارقىلىق، ئۇلار مەڭگۈلۈك ھاياتلىققا ئېرىشەلەيتتى. شۇنىڭ بىلەن بىرگە، ھەزرىتى ئەيسا ئۇلارغا ئۆلگەنلەرنىڭ قايتا تىرىلىپ، مەڭگۈ ياشاش ئۈمىدى بارلىقىنى چۈشەندۈرگەن. شۇ ۋەزىيەتتە بولسا، ئەيسا كەچلىك داستىخاننى ئورۇنلاشتۇرغان ۋاقىتتىكىدەك، ئۇ كىچىك بىر توپ كىشىگە سۆز قىلمىغان. ئەكسىچە جەلىلىيەدە پۈتۈن ئىنسانلارنى كۈتۈپ تۇرغان بەرىكەت توغرۇلۇق سۆز قىلغان ئىدى. ئۇ مۇنداق دېگەن: «كىمكى بۇ ناندىن يېسە، مەڭگۈ ياشايدۇ. مەن بەرمەكچى بولغان نان مېنىڭ تېنىمدۇر. مەن ئۇنى دۇنيادىكى ئىنسانلارغا ھايات بەرسۇن دەپ بېرىمەن».—يۇھاننا 6:51.
12. مەڭگۈلۈك ھاياتلىققا ئېرىشىش ئۈچۈن نېمە قىلىش كېرەك؟
12 جەلىلىيەدە، ئەيسا يەھۇدىيلارغا بۇ دۇنيادا ياشىغان ھەربىر ئىنسان مەڭگۈلۈك ھاياتلىققا ئېرىشىدۇ دېمىگەن. ئەكسىچە، پەقەت كىمكى «بۇ ناندىن يېسە»، يەنى ئەيسا مەسىھكە ئىشەنسە، مەڭگۈ ھاياتلىققا ئېرىشەلەيدىغانلىقىنى ئېيتقان. ئۆزىنى مەسىھنىڭ ئەگەشكۈچىلىرى دەپ ئاتايدىغان كىشىلەرنىڭ قارىشىچە بولغاندا، پەقەت ئەيسا مەسىھكە ئىشىنىپ، ئۇنى ئۆزىنىڭ قۇتقازغۇچىسى دەپ قارىسا، مەڭگۈلۈك ھاياتلىققا ئېرىشەلەيدۇ (يۇھاننا 6:29). ئەمما، پەقەت ئەيساغا ئىشىنىش، بۇ يېتەرلىك ئەمەس. چۈنكى، جەلىلىيەدە نۇرغۇن كىشىلەر دەسلەپتە ئەيساغا ئىشىنىشكەن، لېكىن كېيىنرەك ئۇنىڭغا داۋاملىق ئىشىنىشتىن ۋاز كەچكەن ئىدى. نېمە ئۈچۈن؟
13. ئەيسانىڭ ھەقىقىي شاگىرتى بولۇش ئۈچۈن نېمە قىلىش كېرەك؟
13 ئەيساغا ئەگەشكەن كىشىلەرنىڭ كۆپىنچىسى ئۆزلىرى ئېھتىياج بولغانلار نەسىلەرگە ئېرىشەلىگەنلىكى ئۈچۈنلا، ئەيسانىڭ كەينىدىن ماڭغان ئىدى. ئۇلارنىڭ كېسەللىرى ساقايتىلغان، ھەقسىز تاماققا ئېرىشكەن ياكى قولىغا خۇش ياقىدىغان تەلىملەرنى ئاڭلىغان. ئەمما، ئەيسا شۇنى ئېنىق كۆرسەتكەنكى، ئۇ يەر يۈزىگە پەقەت ئىنسانلارنىڭ ئېھتىياجلىرىنى قانائەتلەندۈرۈش ئۈچۈن كەلمىگەن. بەلكى، ئۇلارغا ھەقىقىي شاگىرت بولۇش ئۈچۈن نېمە قىلىشى كېرەكلىكىنى ئۆگىتىشكە كەلگەن. كىشى ئەيسا ئۆگەتكەن بارچە تەلىملەرنى قوبۇل قىلىپ، ئۇنىڭغا بويسۇنۇپ ياشىسا، شۇندىلا ئەيسانىڭ ھەقىقىي شاگىرتى بولالايدۇ.—يۇھاننا 5:40؛ 6:44.
14. ئەيسانىڭ تېنى بىلەن قېنى ئېرىشتۈرىدىغان مەڭگۈلۈك ھاياتلىققا ئېرىشىش ئۈچۈن نېمە قىلىشىمىز كېرەك؟
14 ئەيسا توپلاشقان خەلققە ئىشەنچىنى كۆرسىتىشنىڭ مۇھىملىقىنى تەكىتلىگەن. ئۇنداقتا، نېمىگە ئىشىنىشى كېرەكتى؟ ئەيسا پات يېقىندا تېنى بىلەن قېنىنى قۇربان قىلاتتى. ئاشۇ كىشىلەر بۇ تۆلەم قۇربانلىقىنىڭ ئۇلارنى قۇتقۇزىدىغانلىقىغا ئىشىنىشى كېرەكتى. دېمەك، ئەينى زاماندىكى يەھۇدىيلارنىڭ ئىشەنچ قىلىشى ناھايىتى مۇھىم بولغاندەك، بۈگۈنكى كۈندە بىزنىڭمۇ ئىشەنچ باغلىشىمىز ناھايىتى مۇھىم (يۇھاننا 6:40). شۇڭلاشقا، يۇھاننا 6:53-ئايەتتىكى سۆزلەردە ئېيتىلغاندەك، مەڭگۈلۈك ھاياتلىققا ئېرىشىش ئۈچۈن ئەيسا مەسىھنىڭ تۆلەم قۇربانلىقىغا ئىشىنىشىمىز شەرتتۇر. بۇ ئىلتىپاتقا سان-ساناقسىز ئىنسانلار ئېرىشەلەيدۇ.—ئەفەس. 1:7.
15، 16. يۇھاننا بايان قىلغان خۇش خەۋەر 6-بابتىن قانداق مۇھىم ھەقىقەتلەرنى ئۆگەندۇق؟
15 يۇھاننا بايان قىلغان خۇش خەۋەر 6-بابنىڭ مەزمۇنى، بىز ۋە يېقىنلىرىمىز ئۈچۈن ئىنتايىن مۇھىم. ئۇ ئەيسانىڭ ئىنسانلارغا بولغان چوڭقۇر سۆيگۈ-مۇھەببىتىنى كۆرسىتىپ بېرىدۇ مەسىلەن، ئۇ جەلىلىيەدە بولغاندا، ئاغرىقلارنى ساقايتقان، خۇدا پادىشاھلىقى توغرۇلۇق تەلىم بەرگەن ۋە ئاچ قورساق كىشىلەرنىڭ ئېھتىياجىنى قاندۇرۇپ، ئۇلارنىڭ قورسىقىنى تويغۇزغان (لۇقا 9:11؛ يۇھاننا 6:2، 11، 12). ئەڭ مۇھىمى، ئۇ ئۆزىنىڭ «ھاياتلىق بېرىدىغان نان» ئىكەنلىكىنى ئۆگەتكەن.—يۇھاننا 6:35، 48.
16 ھەر يىلى مەسىھنى خاتىرىلەش كەچلىك داستىخىنى يىغىلىشى ئۆتكۈزۈلگەندە، «باشقا قويلارغا» نان بىلەن شارابقا ئېغىز تەگكۈزمەسلىكى لازىم (يۇھاننا 10:16). ئەمما، ئۇلار ئەيسا مەسىھنىڭ تۆلەم قۇربانلىقىغا ئىشىنىش ئارقىلىق، ئۇ «تېنى» ۋە «قېنى» ئېرىشتۈرىدىغان ئاجايىپ ئىلتىپاتقا ئېرىشەلەيدۇ (يۇھاننا 6:53). ئەكسىچە، يېڭى ئەھدە ئاستىدا بولغانلار، كەلگۈسىدە ئاسماندىكى پادىشاھلىقتا ئەيسا بىلەن بىرلىكتە ھۆكۈمرانلىق قىلىدىغانلار بولغاچقا، كەچلىك داستىخان يىغىلىشىدا نان بىلەن شارابقا ئېغىز تەگكۈزۈشى لازىم. لېكىن، شۇنى ئەستىن چىقارماسلىق كېرەككى، مەيلى مۇقەددەس روھ ئارقىلىق مەسىھ قىلىنغان ئېتىقادچىلار بولسۇن ياكى «باشقا قويلار» قاتارىدىكى ئېتىقادچىلار بولسۇن، يۇھاننا بايان قىلغان خۇش خەۋەر 6-بابتىكى مەزمۇن ھەممىمىز ئۈچۈن بەك مۇھىم! بۇ بىزگە، مەڭگۈلۈك ھاياتقا ئېرىشىش ئۈچۈن چوقۇم ئەيسا مەسىھكە ۋە ئۇنىڭ تۆلەم قۇربانلىقىغا قەتئىي ئىشىنىدىغانلىقىمىزنى كۆرسىتىشىمىز كېرەكلىكىنى تەكىتلەيدۇ.
49-ناخشا يەھۋا — بىزنىڭ پاناھگاھىمىز
a ئالدىنقى ماقالىدە، يۇھاننا 6:5–35-ئايەتلەر مۇھاكىمە قىلىنغان ئىدى.
b ئەيسا تىلغا ئالغان «سۇ»، يەھۋا ئىنسانلارنى مەڭگۈلۈك ھاياتقا ئېرىشتۈرۈش ئۈچۈن ئىلگىرى قىلغان ۋە ھازىر قىلىۋاتقان بارچە ئىشلىرىنى بىلدۈرىدۇ.