يەھۋا خۇدانىڭ ھېسداشلىقىنى ئۈلگە قىلىڭ
«يەھۋا، يەھۋا — رەھىملىك ھەم ھىممەتلىك [ھىسداش] خۇدا» (چىقىش 34:6).
1. يەھۋا خۇدا ئۆزىنى مۇسا پەيغەمبەرگە قانداق نامايان قىلدى؟ بۇ نېمىشقا بىز ئۈچۈن مۇھىم؟
بىر قېتىم خۇدا مۇسا پەيغەمبەرگە ئۆز ئىسمىنى، ۋە بەزى خىسلەتلىرىنى نامايان قىلىپ، ئۆزىنىڭ قانداق شەخس ئىكەنلىكىنى كۆرسەتكەن. يەھۋا خۇدا شۇ چاغدا ئۆزىنىڭ كۈچىنى ياكى دانالىقىنى تەكىتلىسە بولاتتى، لېكىن ئۇ ئاۋۋال ئۆزىنىڭ رەھىمدىلىقىنى ۋە ھېسداشلىقىنى تىلغا ئالغان (چىقىش 34:5—7نى ئوقۇڭ). خۇدانىڭ مۇسانى قوللاپ-قۇۋۋەتلەيدىغانلىقىنى بىلىش مۇسا ئۈچۈن مۇھىم بولغان. شۇڭا، يەھۋا ئۆزىنىڭ خىزمەتچىلىرىگە ھەقىقەتەن ياردەم بەرگۈسى كېلىدىغانلىقىنى كۆرسىتىدىغان خىسلەتلىرىگە ئالاھىدە دىققەت ئاغدۇردى (چىقىش 33:13). يەھۋا خۇدانىڭ بىزگە شۇنچىلىك غەمخورلۇق قىلىدىغانلىقىنى بىلگىنىڭىزدە سىزدە قانداق ھېس-تۇيغۇلار بولىدۇ؟ بۇ ماقالىدە بىز ھېسداشلىق، يەنى باشقىلارنىڭ ئازابىنى ھېس قىلىپ، ئىچ ئاغرىتىش ۋە ئۇلارغا ياردەم قولىنى سۇنۇشقا دەۋەت قىلىدىغان خىسلەت ھەققىدە گەپ قىلىمىز.
2، 3. ئا) ھېسداشلىق ئادەملەرگە خاس خىسلەت ئىكەنلىكى نېمىدىن كۆرىنىدۇ؟ ئە) مۇقەددەس كىتابتا ھىسداشلىق ھەققىدە ئېيتىلغانلارغا نېمىشقا كۆڭۈل قويۇشىمىز كېرەك؟
2 يەھۋا — ھېسداشلىقى مول خۇدا ۋە ئادەملەر ئۇنىڭغا ئوخشاش قىلىپ يارىتىلغان. شۇنىڭ ئۈچۈن ئادەملەرنىڭ باشقىلارغا غەمخورلۇق قىلىشى تەبىئىي نەرسە. ھەتتا يەھۋانى تونۇمايدىغان ئادەملەرمۇ پات-پات ھېىسداشلىق قىلىدۇ (يارىتىلىش 1:27). مۇقەددەس كىتابتا بۇ خىسلەتنى كۆرسەتكەن ئادەملەرنىڭ كۆپ مىسالى بار. مەسىلەن، بىر قېتىم سۇلايمان پادىشاھنىڭ ئالدىغا كەلگەن ئىككى ئايالنىڭ قايسىسى بوۋاقنىڭ ھەقىقىي ئانىسى ئىكەنلىكىنى ئېنىقلاش كېرەك بولغان. ئۇ ھېلىقى ئاياللارنى سىنىماقچى بولۇپ، بالىنى ئوتتۇرىدىن ئىككىگە پارچىلاشنى بۇيرۇق قىلغان. شۇ چاغدا ھەقىقىي ئانا بالىسىغا ئىچى ئاغرىپ، بوۋاقنى ئىككىنچى ئايالغا بېرىشنى ئۆتۈنگەن (پادىشالار 1-يازما 3:23—27). ھېسداشلىق قىلىشنىڭ يەنە بىر مىسالى — مۇسانىڭ ھاياتىنى ساقلاپ قالغان پىرەۋننىڭ قىزى. ئۇ بوۋاقنىڭ ئىبرانىي ئىكەنلىكىنى ۋە ئۆلتۈرۈلۈشكە بۇيرۇلغانلىقىنى بىلگەن. ئەمما «ئۇنىڭغا ئىچى ئاغرىغانلىقتىن»، بوۋاقنى ئۆز بالىسىدەك بېقىۋېلىشنى قارار قىلغان (چىقىش 2:5، 6).
3 نېمىشقا ھىسداشلىق توغرىسىدا كۆپرەك بىلىشىمىز كېرەك؟ سەۋەبى يەھۋا بىزنىڭ ئۇنى ئۈلگە قىلىشىمىزنى خالايدۇ (ئەفەسلىكلەرگە 5:1). ھېسداشلىق بىلدۈرەلەيدىغاندەك يارىتىلساقمۇ، بىز نامۇكەممەل ۋە ئۆزۈمىزنىلا ئويلاشقا مايىل. بەزىدە بىر كىشىگە ياردەم بېرىش ياكى ئۆز مەنپەئىتىمىزنى ئويلاش كېرەكلىكىنى بىلمەي قالىمىز. ئادەملەرگە كۆپرەك كۆڭۈل بۆلۈشكە نېمە ياردەم بېرەلەيدۇ؟ ئەڭ ئاۋۋال، يەھۋانىڭ ۋە باشقىلارنىڭ قانداقلارچە ھېسداشلىق بىلدۈرگەنلىكىنى قاراپ چىقايلى. ئاندىن كېيىن ھېسداش خۇدايىمىز يەھۋانى قانداق ئۈلگە قىلالايدىغانلىقىمىزنى ۋە نېمىشقا بۇنىڭ ئۆزۈمىزگە پايدىلىق ئىكەنلىكىنى كۆرۈپ چىقايلى.
يەھۋا — ھېسداشلىقنىڭ مۇكەممەل ئۈلگىسى
4. ئا) يەھۋا خۇدا سودومغا پەرىشتىلىرىنى نېمە ئۈچۈن ئەۋەتكەن؟ ئە) لۇتنىڭ ئائىلىسى باشتىن كەچۈرگەن ۋەقەدىن قانداق ساۋاق ئالىمىز؟
4 مۇقەددەس كىتابتا يەھۋانىڭ ھېسداشلىق بىلدۈرگەنلىكىنىڭ كۆپ مىسالى كەلتۈرۈلگەن. مەسىلەن، ئۇنىڭ لۇت ئۈچۈن نېمە قىلغانلىقىنى ئەسكە ئالايلى. سودوم ۋە گوموررىدىكى رەزىل ئادەملەرنىڭ قىلىقلىرىدىن لۇت يىرگىنىپ ھەسرەت چەككەن. شۇ ئادەملەر خۇدانى رەت قىلغان، شۇڭا يەھۋا ئۇلارنى ھالاك قىلىشنى قارار قىلغان (پېترۇسنىڭ 2-خېتى 2:7، 8). يەھۋا لۇتقا پەرىشتىلىرىنى ئەۋەتىپ، سودوم ۋە گومورانىڭ ۋەيران قىلىنىدىغانلىقىنى، شۇ سەۋەبتىن شەھەردىن قېچىشى كېرەكلىكىنى ئېيتقانىدى. مۇقەددەس كىتابتا: «لېكىن [لۇت] ئالدىرىمىغانلىقتىن، ھېلىقى [پەرىشتىلەر] ئۇنى، ئايالىنى ۋە ئىككى قىزىنى قوللىرىدىن ئېلىپ، شەھەرنىڭ سىرتىغا ئاچىقىپ قويدى، چۈنكى يەھۋا لۇتنى ئايىغان ئىدى»،— دەپ يېزىلغان (يارىتىلىش 19:16). يەھۋا لۇتنىڭ ئەھۋالىنى چۈشەنگەندەك، بىزنىڭمۇ ھەرقانداق قىيىنچىلىقىمىزنى چۈشىنىدىغانلىقىغا ئىشەنچىمىز كامىل (يەشايا 63:7—9؛ ياقۇپ 5:11؛ پېترۇسنىڭ 2-خېتى 2:9).
يەھۋا ھەرقانداق قىيىنچىلىقىمىزنى چۈشىنىدۇ
5. خۇدا سۆزى ھېسداشلىق قىلىش ھەققىدە نېمىنى ئۆگىتىدۇ؟
5 يەھۋا ئۆز خەلقىگىمۇ ھېداشلىق قىلىشنى ئۆگەتكەن. ئىسرائىللىقلارغا بېرىلگەن قانۇنلارنىڭ بىرسىنى كۆرۈپ چىقايلى. ئەگەر بىر كىشى كىمدۇ بىرسىدىن قەرزگە پۇل ئالسا، پۇلنى قايتۇرىدىغانلىقىنىڭ كاپالىتى سۈپىتىدە ئۈستىدىكى كىيىمىنى بېرىشى كېرەك ئىدى (چىقىش 22:26، 27نى ئوقۇڭ). بىراق قەرز بەرگۈچى شۇ كىيىمنى كۈن پاتقىچە ئېگىسىگە قايتۇرۇپ بېرىشى كېرەك ئىدى، چۈنكى ئۇ ئۇنىڭسىز تۈندە مۇزلاپ قالاتتى. ھىسداشلىقى يوق ئادەم كىيىمنى قايتۇرۇشنى خالىمىغاندۇ. ئەمما يەھۋا بۇ قانۇننى بېرىش ئارقىلىق ئۆز خىزمەتچىلىرىگە ھېسداشلىق قىلىشنى ئۆگەتتى. بۇ قانۇننىڭ ئاساسىدىكى پرىنسىپ بىزگە نېمىنى ئۆگىتىدۇ؟ قېرىنداشلارنىڭ ئېھتىياجلىرىنى ھەردائىم ئەستە تۇتۇشىمىز كېرەك. قىيىنچىلىقلارغا دۇچ كەلگەن قېرىندىشىمىزغا قولۇمىزدىن كەلگىنىچە ياردەم بېرىشنى خالايمىز (كولوسىلىقلارغا 3:12؛ ياقۇپ 2:15، 16؛ يوھاننانىڭ 1-خېتى 3:17نى ئوقۇڭ).
6. يەھۋانىڭ گۇناھكار ئىسرائىللىقلارغا ئىچ ئاغرىتقانلىقىدىن قانداق ساۋاق ئالىمىز؟
6 ئىسرائىللىقلار يەھۋاغا قارشى گۇناھ قىلغان چاغدىمۇ، ئۇ ئۇلارغا ئىچ ئاغرىتقان. مۇقەددەس يازمىلاردا: «ئۇلارنىڭ ئاتا-بوۋىلىرىنىڭ تەڭرىسى خۇداۋەندە ئۆز خەلقى بىلەن ماكانىغا رەھىم قىلىپ، پات-پات ئۆز پەيغەمبەرلىرىنىڭ ۋاسىتىسى بىلەن خەۋەر ئەۋەتەتتى»،— دېيىلگەن (تارىخنامە 2-يازما 36:15). بىزمۇ يەھۋانى تونۇمايدىغان، لېكىن قىلغانلىرىغا توۋۋا قىلىپ، ئۇنىڭ دوستى بولالايدىغان ئادەملەرگە ھېسداشلىق بىلدۈرۈشىمىز كېرەك. يەھۋا يېقىنلىشىۋاتقان سوت كۈنىدە ھېچكىمنىڭ ھالاك بولۇشىنى خالىمايدۇ (پېترۇسنىڭ 2-خېتى 3:9). تېخى ۋاقىت بار چاغدا بىز ھېچبىر پۇرسەتنى قولدىن بەرمەي، ئادەملەرنى ئاگاھلاندۇرۇپ، ئۇلارغا خۇدانىڭ ھېسداشلىقىنىڭ پايدىسىنى كۆرۈشكە ياردەم بېرىشنى خالايمىز.
7، 8. نېمىشقا بىر ئائىلە يەھۋانىڭ ئۇلارغا ھىسداشلىق بىلدۈرگەنلىكىگە تولۇق ئىشەندى؟
7 بۈگۈنكى كۈندىمۇ يەھۋانىڭ كۆپ خىزمەتچىسى ئۇنىڭ ھىسداشلىقىنى سەزگەن. مەسىلەن، 1990-يىللىرى بوسنىيەدە مىللەتلەر ئارىسىدا قىرغىنچىلىق بولغاندا، ئادەملەر بىر-بىرىنى ئۆلتۈرگەن. شۇ يەردە ياشىغان بىر ئائىلىدە 12 ياشلىق بىر بالا بولغان. ئۇنى مىلان دەپ ئاتايلى. مىلان، ئىنىسى، ئاتا-ئانىسى ۋە باشقا گۇۋاھچىلار بوسنىيەدىن سېربىيەگە ئابتۇبۇس بىلەن چوڭ يىغىلىشقا كېلىۋاتاتتى. ئاتا-ئانىسى شۇ يىغىلىشتا چۆمدۈرۈلۈشتىن ئۆتۈشى كېرەك ئىدى. چېگرادا ئەسكەرلەر بۇ ئائىلىنىڭ باشقا مىللەتتىن ئىكەنلىكىنى بايقاپ، ئابتۇبۇستىن چۈشۈرۈۋالدى. ئابتۇبۇستا قالغان قېرىنداشلارنى بولسا، چېگرىدىن ئۆتكۈزدى. بۇ ئائىلىنى ئىككى كۈن تۇتقاندىن كېيىن، ئوفىيسېر ئاخىرى باشلىقىنى چاقىرىپ، ئۇلارنى قانداق قىلىشنى سورايدۇ. بۇ بىر ئائىلە كىشىلىرى شۇ يەردە، باشلىقنىڭ: «ئۇلارنى سىرتقا ئېلىپ چىقىپ، ئېتىۋېتىڭلار!»— دېگىنىنى ئاڭلىدى.
8 ئەسكەرلەر ئۆزئارا سۆزلىشىپ تۇرغاندا، ھېلىقى ئائىلىنىڭ يېنىغا ئىككى ناتونۇش كىشى كېلىدۇ. ئۇلار ئۆزلىرىنىڭ گۇۋاھچىلار ئىكەنلىكىنى ۋە بولغان ۋەقەنى ئابتۇبۇستىكى قېرىنداشلاردىن بىلگەنلىكىنى پىچىرلاپ ئېيتقان. ئەسكەرلەر بالىلارنىڭ ھۆججەتلىرىنى تەكشۈرمىگەنلىكتىن، بۇ ئىككى قېرىنداش مىلان بىلەن ئىنىسىغا ئۇلارنىڭ ماشىنىسىغا ئولتۇرۇپ، چېگرادىن بىرگە ئۆتۇشنى ئېيتتى. ئاتا-ئانىسىغا بولسا، چېگرا قاراۋۇلخانىسنىڭ كەينىدىن ئۆتۈڭلار، باشقا تەرەپتە ئۇچرىشايلى دېدى. مىلان قاتتىق قورققانلىقتىن، يە يىغلىشىنى، يە كۈلىشىنى بىلمەي تۇردى. ئاتا-ئانىسى: «ئۇلار بىزنى مۇشۇنداقلا قويۇۋېتىدۇ دەپ ئويلامسىلەر؟»— دەپ سورىدى. بىراق، ئۇلارنىڭ كېتىۋاتقانلىقىنى ھەتتا ئەسكەرلەر بايقىمىغان ئوخشايدۇ. شۇنداق قىلىپ، مىلان ۋە ئىنىسى، ئاتا-ئانىسى بىلەن كېلىشكەن يەردە ئۇچرىشىپ، چوڭ يىغىلىشقا بارىدۇ. ئۇلار يەھۋانىڭ دۇئالىرىغا جاۋاب بەرگەنلىكىگە تولۇق ئىشىنىدۇ. مۇقەددەس كىتابتىن يەھۋا خۇدانىڭ خىزمەتچىلىرىنى ھەردائىم ئۇدۇل ھىمايە قىلمايدىغانلىقىنى بىلىمىز (ئەلچىلەر 7:58—60). لېكىن بۇ ۋەزىيەت توغرىسىدا مىلان مۇنداق دېگەن: «مېنىڭچە، پەرىشتىلەر ئەسكەرلەرنىڭ كۆزىنى كۆرمەيدىغان قىلىپ، يەھۋا بىزنى شۇ ئارقىلىق قۇتقازدى» (زەبۇر 97:10).
9. ئەيسا كەينىدىن ئەگەشكەن ئادەملەرنى كۆرگەندە قانداق ھېسداشلىق قىلىدى؟ (ماقالىنىڭ بېشىدىكى رەسىمگە قاراڭ.)
9 ئەيسا ھېسداشلىقنىڭ ئاجايىپ ئۈلگىسىنى قالدۇردى. ئۇ جەم بولغان خەلىقنى كۆرگەندە، ئۇلارغا ئىچى ئاغرىدى، چۈنكى ئۇلار «پادىچىسىز قالغان قويلاردەك قىينىلىپ ھەم تارىلىپ كەتكەن ئىدى». شۇ چاغدا ئۇ نېمە قىلدى؟ ئۇلارغا «كۆپ نەرسىلەرنى ئۆگىتىشكە باشلىدى» (مەتتا 9:36؛ ماركۇس 6:34نى ئوقۇڭ). پەرىسىيلەر بولسا، ئەكسىچە، تاش يۈرەك بولۇپ، خەلقكە ياردەم بېرىشنى ھېچ خالىمىغان (مەتتا 12:9—14؛ 23:4؛ يوھاننا 7:49). سىزچۇ، ئادەملەرگە ئەيساغا ئوخشاش ياردەم بېرىپ، ئۇلارغا يەھۋا ھەققىدە تەلىم بېرىشكە تەشنامۇسىز؟
10، 11. ھېسداشلىق قىلىش ھەرقاچان ئورۇنلۇقمۇ؟ چۈشەندۈرۈپ بېرىڭ.
10 ئەمما بۇ ھەرقانداق ۋەزىيەتتە ھېسداشلىق قىلىشنىڭ ئورۇنلۇق ئىكەنلىكىنى بىلدۈرمەيدۇ. مەسىلەن، سائۇل پادىشاھ خۇدا خەلقىنىڭ دۈشمىنى بولغان ئامالەك پادىشاھى ئاگاگنى ئۆلتۈرمەي ھېسداشلىق بىلدۈردۈم، دەپ ئويلىغان. شۇنىڭ بىلەن، سائۇل ئامالەك خەلقىنىڭ ھەممە ھايۋاناتلىرىنى ئۆلتۈرمىگەن. لېكىن، يەھۋا ئۇنىڭغا خەلقنى مال-چارۋىلىرى بىلەن بىللە قوشۇپ پۈتۈنلەي يوق قىلىشقا بۇيرىغان. سائۇل ئىتائەتسىزلىك قىلغانلىقتىن، يەھۋا ئۇنىڭ پادىشاھلىق ھوقۇقىنى بىكار قىلغان (سامۇئىلنىڭ 1-يازمىسى 15:3، 9، 15). يەھۋا خۇدا — ئادىل سوتچى. ئۇ ئادەملەرنىڭ يۈرىكىدە نېمە بار ئىكەنلىكىنى كۆرەلەيدۇ، شۇ سەۋەبتىن قاچان ھىسداشلىق قىلماسلىق كېرەكلىكىنىمۇ بىلىدۇ (يەرەمىيانىڭ يىغىسى 2:17؛ ئەزەكىيال 5:11). پات ئارىدا يەھۋا ئۇنىڭغا بويسۇنۇشنى رەت قىلغانلارنىڭ ھەممىسىنى سوتقا تارتىدۇ (سالونىكىلىقلارغا 2-خەت 1:6—10). بۇ ۋاقىت يەھۋا ئۈچۈن رەزىللەرگە ھىسداشلىق قىلمايدۇ. بىراق، ئۇ ھەققانىيلارنى قۇتقۇزىدۇ ۋە رەزىل ئادەملەرنى ھالاك قىلىش ئارقىلىق ھەققانىي ئادەملەرگە ھىسداشلىق بىلدۈرىدۇ.
11 ئەلۋەتتە، بىز باشقىلارنى سوتلاپ، كىمنى جازاغا تارتىپ، كىمنى ئامان قالدۇرۇشنى قارار قىلمايمىز. ئەكسىچە، بىز ئادەملەرگە ياردەم بېرىش ئۈچۈن ھازىر قولۇمىزدىن كەلگەننىڭ ھەممىسىنى قىلىمىز. ئۇنداقتا، باشقىلارغا قانداق ھېسداشلىق قىلالايمىز؟ ھازىر بۇنىڭ بىرنەچچە ئۇسۇلىنى قاراپ چىقايلى.
ھېسداشلىقنى بىلدۈرۈشنىڭ ئۇسۇللىرى
12. باشقىلارغا ھېسداشلىقىمىزنى قانداق كۆرسىتەلەيمىز؟
12 كۈندىلىك ھاياتتا ياردەم بېرىشكە تەييار بولۇڭ. يەھۋا ئۆز خىزمەتچىلىرىدىن يېقىنلىرىغا ۋە ئېتىقادداشلىرىغا ھېسداشلىق قىلىشنى تەلەپ قىلىدۇ (يوھاننا 13:34، 35؛ پېترۇسنىڭ 1-خېتى 3:8). ھېسداشلىق سۆزىنىڭ بىر مەنىسى «بىللە ئازاب چېكىش» دېگەننى بىلدۈرىدۇ. دېمەك، ھېسداش ئادەم ئازاب چەككەنلەرگە ياردەم بېرىشكە تىرىشىدۇ. شۇنىڭ ئۈچۈن بىز باشقىلارغا ياردەم بېرىشنىڭ پۇرستىنى ئىزدىشىمىز كېرەك. ئېھتىمال، باشقىلارغا ئۆي ئىشلىرىنى قىلىشقا ياردەم بېرىش ياكى ھاجىتى چۈشكەن ئىشلارنى قىلىشىپ بەرسەك بولىدۇ (مەتتا 7:12).
باشقىلارغا ئەمەلىي ياردەم بېرىش ئارقىلىق ھېسداشلىق بىلدۈرۈڭ (12-ئابزايسقا قاراڭ)
13. خۇدا خەلقى تەبئىي ئاپەتلەردىن كېيىن نېمە قىلىدۇ؟
13 تەبئىي ئاپەتلەردە قىيىنچىلىق تارتقانلارغا ياردەم بېرىڭ. تەبئىي ئاپەتلەر تۈپەيلىدىن قىينىلىپ يۈرگەن ئادەملەرنى كۆرگەندە، ئۇلارغا ھېسداشلىق بىلدۈرۈشنى خالايمىز. مۇنداق چاغلاردا يەھۋانىڭ خەلقى باشقىلارغا ياردەم بېرىدىغانلىقى ھەممىگە مەلۇم (پېترۇسنىڭ 1-خېتى 2:17). مەسىلەن، بىر قېرىندىشىمىز ياپونىيەدىكى 2011-يىلى بولغان يەر تەۋرەش بىلەن دېڭىز تاشقىنىدا بالايىئاپەتكە ئۇچرىغان رايوندا ياشىغان. ئۇ ياپونىيەنىڭ بۇلۇڭ-پۇشقاقلىرىدىن ۋە باشقا دۆلەتلەردىن ئۆيلەر ۋە ئىبادەت ئۆيلىرىنى ئوڭشاپ تۈزەشكە كەلگەن پىدائىي خىزمەتچىلەرنى كۆرگىنى «ئۇنىڭغا تەسەللى بېرىپ، ئۇنى بەك ئىلھاملاندۇرغانلىقىنى» ئېيتقان. شۇنىڭ بىلەن، ئۇ: «بۇ ۋەقەدىن مەن يەھۋانىڭ بىزنىڭ غېمىمىزنى يەيدىغانلىقىنى كۆردۈم. گۇۋاھچىلارمۇ بىر-بىرىگە غەمخورلۇق قىلىدۇ. پۈتۈن دۇنيادىكى قېرىنداشلارىمىز بىز ئۈچۈن دۇئا قىلماقتا»،— دېگەن.
14. سالامەتلىكى ناچارلارغا ۋە ياشانغانلارغا قانداق ياردەم بېرەلەيسىز؟
14 سالامەتلىكى ناچارلارغا ۋە ياشانغانلارغا ياردەم بېرىڭ. ئاغرىق ياكى قېرىلىق سەۋەبلىك ئازاب-ئوقۇبەت چەككەنلەرنى كۆرگەندە، ئۇلارغا ئىچىمىز ئاغرىيدۇ. بۇ قىيىنچىلىقلارنىڭ يوق بولۇشىنى تاقەتسىزلىك بىلەن كۈتكەنلىكتىن، خۇدا پادىشاھلىقى كەلسۇن، دەپ دۇئا قىلىمىز. شۇ ۋاقىت كەلگىچە، ياشانغان ياكى ئاغرىۋاتقان ئادەملەرگە ياردەم بېرىش ئۈچۈن بار كۈچىمىزنى چىقىرىمىز. بىر يازغۇچى ئاليسگېيمېر (قېرىلىقتا ئەس-ھوشۇنى يۇقۇتۇش) كېسىلىگە گىرىپتار بولغان ئانىسى بىلەن يۈز بەرگەن ۋەقەنى يازغان. بىر كۈنى ئانىسى كىيىمىنى پاسكىنا قىلىۋاپتۇ. كىيىمىنى قىينىلىپ تازىلاۋاتقان چاغدا، ئادەتتە كېلىپ تۇرىدىغان ئىككى گۇۋاھچى ئىشىكنىڭ قوڭغۇرىغىنى جىرىڭلاتتى. ئۇلار ياردەم بىرىشكە تەييار ئىكەنلىگىنى بىلدۈرگەندە، ئۇ: «خىجالەت بولساممۇ، ياردىمىڭلار كېرەك»،— دىدى. قېرىنداشلار ئۇنىڭ كىيىمىنى يۇيۇپ-تازىلاشقا ياردەم بەردى. كېيىن چاي دەملەپ، ئۇنىڭ بىلەن بىراز پاراڭلىشىپ ئولتاردى. شۇ ئايالنىڭ ئوغلى بۇنىڭدىن قاتتىق رازى بولۇپ، گۇۋاھچىلارنىڭ «ئىشلىرى سۆزلىرىگە ماس» ئىكەنلىكىنى ئېيتتى. سالامەتلىكى ناچارلارغا ۋە ياشانغانلارغا بولغان ھىسداشلىقىڭىز سىزنى ئۇلارغا ياردەم بېرىش ئۈچۈن بار كۈچىڭىزنى چىقىرىشقا دەۋەت قىلامدۇ؟ (فىلىپپىلىقلارغا 2:3، 4).
15. ۋەز خىزمىتىمىز باشقىلارغا قانداق ياردەم بېرىدۇ؟
15 ئادەملەرگە يەھۋانى تونۇپ-بىلىشكە ياردەم بېرىڭ. ئادەملەرگە ياردەم بېرىشنىڭ ئەڭ ياخشى ئۇسۇلى — ئۇلارغا خۇدا ۋە ئۇنىڭ پادىشاھلىقى ھەققىدە تەلىم بېرىش. يەنە بىر ئۇسۇل — ئۇلارنىڭ يەھۋانىڭ قائىدە-ئۆلچەملىرىگە ئەمەل قىلغانلىقى نېمىشقا ئۆزلىرى ئۈچۈن پايدىلىق ئىكەنلىكىنى چۈشەندۈرۈش (يەشايا 48:17، 18). راست، ۋەز خىزمىتى — يەھۋانى مەدھىيىلەشنىڭ ۋە باشقىلارغا ھېسداشلىق بىلدۈرۈشنىڭ ئاجايىپ ئۇسۇلى. سىز كۆپرەك ۋەز قىلالامسىز؟ (تىموتىيغا 1-خەت 2:3، 4).
ھېسداشلىق ئۆزىڭىزگىمۇ پايدىلىق
16. ھېسداشلىق كۆرسىتىشنىڭ قانداق پايدىسى بار؟
16 پسىخىكىلىق سالامەت ساھەسىدە مۇتەخەسسىلەرنىڭ ئېيتىشىچە، ھېسداشلىق بىلدۈرۈش ئادەمنىڭ سالامەتلىكىگە ۋە باشقىلار بىلەن بولغان مۇناسىۋىتىگە ئىجابىي تەسىر قىلىدۇ. ئازاب-ئوقۇبەت چەككەنلەرگە ياردەم بەرگەندە، ئۆزىڭىزنى شاد-خورام ھېس قىلىسىز، ئىجابىي كۆزقاراشتا بولىسىز ۋە يالغۇزلۇق ياكى يامان ھېس-تۇيغۇلارغا بېرىلمەيسىز. ھېسداش بولۇش ئۆزىڭىزگە كۆپ پايدا ئەكېلىدۇ (ئەفەسلىكلەرگە 4:31، 32). مېھىر-مۇھەببىتىمىز بىزنى باشقىلارغا ياردەم قولىمىزنى سۇنۇشقا دەۋەت قىلغاندا، ۋىجدانىمىز پاك بولىدۇ، چۈنكى يەھۋانى خۇرسەن قىلىدىغان ئىشنى قىلىۋاتقانلىقىمىزنى بىلىمىز. ھېسداشلىق بىزگە ياخشى ئاتا-ئانا، ياخشى ئەر ياكى ئايال ۋە ياخشى دوست بولۇشقا ياردەم بېرىدۇ. بۇنىڭدىن تاشقىرى، ئادەتتە ھېسداشلىق كۆرسىتىدىغان ئادەمگە باشقىلارمۇ كېرەك چاغدا ياردەم بېرىشكە تەييار (مەتتا 5:7؛ لۇقا 6:38نى ئوقۇڭ).
17. نېمىشقا سىز ھېسداشلىق بىلدۈرۈشنى خالايسىز؟
17 ھېسداش بولۇشنىڭ ئۆزۈمىزگە ياخشى بولۇشى، ھېسداشلىق كۆرسىتىشنى يىتىلدۈرۈشنىڭ ئاساسى سەۋەبى بولماسلىقى كېرەك. بەلكى، بىز مېھىرى-مۇھەببەت ۋە ھېسداشلىقنىڭ مەنبەسى يەھۋا خۇدانى ئۈلگە قىلىش ۋە ئۇنى مەدھىيلەشنى مەقسەت قىلىشىمىزكېرەك (پەندى-نەسىھەت 14:31). ئۇ بىزگە مۇكەممەل ئۈلگە كۆرسىتىدۇ. ئۇنداقتا، ھېداشلىق كۆرسىتىش ئارقىلىق خۇدانى ئۈلگە قىلايلى. شۇ چاغدا قېرىنداشلار ۋە ئەتراپىمىزدىكى باشقا ئادەملەر بىلەن تېخىمۇ يېقىن مۇناسىۋەتتە بولالايمىز (گالاتىلىقلارغا 6:10؛ يوھاننانىڭ 1-خېتى 4:16).