Momo Lie Kukasilili Elambalalo Liatavo?

OVE hẽ o tava okuti omanu va sesamẽla oku lambalaliwa omo lietavo liavo? Ocili okuti ove ku tava kocisimĩlo eci nda ovo ka va lingile cimue cĩvi ci lekisa elaviso komanu. Elambalalo liatavo li kuete esapulo limue liosimbu, pole cilo handi haiko li kasi. Olombangi via Yehova kolofeka vialua viocifuka co Europa kuenda kolofeka vikuavo violuali luosi via lambalaliwile calua loku tatiwa lãvi vokuenda kueci ci pitahãla 20 kovita vianyamo.

Kotembo yaco, Olombangi via Yehova via tala ohali yalua poku tipuiwa loku kangisiwa kuenda oku lambalaliwa calua peka liolombiali viatiamẽla kopulitika yo Socialismu Nacional lo komunismu ko Europa. Nye tu pondola oku lilongisila kovitangi va pita lavio viatiamẽla kelambalalo liatavo? Kuenda nye tu pondolavo oku lilongisila konjila ovo va kuama poku liyaka lovitangi viaco?

‘Ka Vatiamẽlele Koluali’

Olombangi via Yehova vi likolisilako loku pokola kovihandeleko, oku kala vakuambembua kuenda oku kala omanu vana vakuavituwa via sunguluka. Handi vali, ovo ka va lavisa olombiali ale oku sanda elambalalo oco va lekise okuti va yongola oku fila etavo. Akristão va yuvula oku litenga vovitangi violuali. Eci oco ci lomboloka olondaka via Yesu eci a popia hati: “Ovo havakualualiko ndeci ame siukualualiko.” (Yoano 17:16) Olombiali vialua via siata oku limbuka okuti Olombangi via Yehova ka vi litengi vovitangi violuali. Pole, olombiali vimue viatiamẽla kopulitika yo Totalitarismu ka via siatele oku lekisa esumbilo lialua kovihandeleko vi sangiwa Vembimbiliya vina vi lekisa okuti Akristão oku litenga vovitangi violuali ka ca sungulukile.

Ocitangi caco ceya oku lomboluiwa vokuenda kuohongele yimue ya lingiwila vosikola ya velapo yo Heidelberg kofeka yo Alemanya, kosãi ya Kuvala kunyamo wo 2000. Ohongele yaco ya kala losapi ya linga hati: “Episo Kuenda Oku Litumbika: Olombangi Via Yehova Vuviali wo Nacional​—⁠Socialismu Kuenda Ovihandeleko Vio Komunismu.” Yimue ondotolo yo kosikola ya velapo yi konomuisa ovitangi viosi viatiamẽla kopulitika yo Totalitarismu ya lombolola hati: “Olombiali vina viatiamẽla kopulitika yo Totalitarismu ka va kisika lika omanu oku tiamẽla kopulitika yavo, pole va kisikavo komanu vaco oku tiamẽla kokuavo lomuenyo wavo wosi.”

Ocili okuti, Kakristão vocili ka ci tava oku eca ‘omuenyo wavo wosi’ kolombiali, momo ovo va likuminya lika oku pokola ku Yehova Suku lomuenyo wavo wosi. Olombangi via Yehova vi kasi volofeka vina okuti olombiali viofeka viatiamẽla kopulitika yaco, via siata oku limbuka okuti ekisika liolombiali viofeka kuenda ovihandeleko viatiamẽla ketavo liavo, via litepa kuenje ca siata oku nena ovitangi vialua. Oco hẽ nye ovo va siata oku linga poku liyaka lovitangi viaco? Olombangi via Yehova via siata oku kapako onumbi yina olondonge via Yesu Kristu via lombolola poku popia hati: “Cetu oku pokola ku Suku, komanu hakoko.”​—⁠Ovilinga 5:⁠29.

Olohulukãi vialua Violombangi via Yehova, via siata oku amamako loku pandikisa kuenda ka vi litengi vovitangi violuali lulo ndaño lelambalalo lialua. Ndamupi ovo va tẽla oku pandikisa? Pi hẽ ovo va sanga evetiyo lioku amamako lekolelo? Tu eceleli okuti ovo muẽle va eca atambululo kapulilo a lingiwa ndeti. Kuenje, tu kũlĩhĩhĩsi eci omunu lomunu, cikale Olombangi via Yehova ale omanu vana okuti Halombangiko va pondola oku lilongisila kueci ovo va linga.

[Etosi lia velapo kemela 4]

Vokuenda kuocita 20, Olombangi via Yehova kofeka yo Alemanya via tipuiwa calua loku lambalaliwa lolombiali vina viatiamẽla kopulitika yi tukuiwa hati, Totalitarismu vokuenda kuotembo yalua

[Etosi lia velapo kemela 4]

Ndotolo umue o tukuiwa okuti: Clemens Vollnhals wa litumbika koku konomuisa Asapulo, wa lombolola hati:

“Olombiali vina viatiamẽla kopulitika yi tukuiwa okuti, Totalitarismu ka va kisika lika omanu vavo oku tiamẽla kopulitika yavo, pole va kisika komanu vaco oku tiamẽla kokuavo lomuenyo wavo wosi.”

[Elitalatu kemela 4]

Omanu vosi vatiamẽla kepata lia va Kusserow va kapiwile vokayike momo ka va tavele oku yapuisiwa kekolelo liavo

[Elitalatu kemela 4]

Johannes Harms wa pondiwila vocitumãlo cupange wovikonde kofeka yo Alemanya omo lietavo liaye