Nye Omõlove a Sukila Oku Popia?

ALONJALI: Vutala Wondavululi 15 ya Susu wo 2010, kamẽla 16-20, mua sandekiwa ovipama via loña komãla. Ocipama cilo, ci lekisa ovina vi kuatisa omõlove ndomo a liyaka lovitangi vio kosikola. Tu yongola okuti o kuama ovipama vilo Kefendelo Liepata koñolosi.

OMÃLA vana okuti Olombangi via Yehova, va siata oku liyaka lovitangi vialua. Olonjanja vimue akamba vo kosikola va va pulisa esunga lieci ka va pangela onepa kovipito vimue ndeci, oku sivaya epandela, oku ivaluka eteke lioku citiwa kuenda ateke owusa. Nda omõlove vo linga apulilo aco, o ka tambulula ndati?

Omãla vamue Akristão va tambulula ndoco: “Ame si yongola. Etavo liange ka li ecelela oku ci linga.” Omãla vaco va sesamẽla epandiyo omo liutõi wavo. Pole, atambululo aco a pondola oku votola apulilo akuavo. Embimbiliya li tu vetiya ndoco: “Lipongiyi okuti vu tẽla oku kumbulula komunu wosi o pula” ekolelo lietu. (1 Pet. 3:15) Voku ci linga ka mua kongelele lika oku tambulula hati, “Ame si yongola.” Ndaño vakuetu ka va tava kovisimĩlo vietu, pole, vamue va yongola oku kũlĩha esunga lieci ka tu tavela oku linga ocina cimue.

Amalẽhe valua okuti Olombangi via Yehova, va siata oku lomboluila akamba vavo ovolandu Embimbiliya poku va tangela elivulu Aprenda do Grande Instrotur. Ovolandu aco a va kuatisa oku lombolola esunga lieci amalẽhe Olombangi via Yehova va tavela oku linga ovina vimue, ale sio. Olondonge vimue vi sole oku yevelela asapulo Embimbiliya, kuenje kua siata oku fetikiwa alilongiso alua Embimbiliya. Pole, olondonge vikuavo kosikola, ka vi tava oku yevelela ovolandu Embimbiliya. Ocili okuti, nda ovolandu Embimbiliya ka a lomboluiwa ciwa komãla, ovo ka va ka tẽla oku kuata elomboloko liavio. Kafeko umue o tukuiwa hati, Minhee o kuete 11 kanyamo, eci a lalekiwile lekamba liaye kocipito coku citiwa, wa tambulula ndoco: “Embimbiliya ka li tu vetiya oku ivaluka ocipito coku citiwa. Embimbiliya li sapula okuti, Yoano Upapatisi, wa pondiwa kocipito cimue coku ivaluka eteke lioku citiwa.” Minhee ivaluka okuti ekamba liaye ka lia kuatele elomboloko lietambululo a eca.

Olonjanja vimue, oku lekisa kondonge oviluvialuvia valivulu etu, ale oku lombolola ulandu umue, ci kuatisa. Nye ci popiwa nda asongui vo kosikola ka va yongola okuti omãla va lekisa kakamba vavo vo kosikola alivulu etavo? Anga hẽ omãla va pondola oku eca uvangi ndaño ka va kuete alivulu? O kuatisa ndati omõlove oku teyuila ekolelo liaye?

Pongiyi Ovindekaise vi va Kuatisa

Nda olonjali poku pongiya ovindekaise konjo, vi kala ndu okuti akamba vo kosikola, ci kuatisa calua. Eci omãla va seteka oku teyuila ekolelo liavo, olonjali vi ka pandiya alikolisilo avo loku va kuatisa kolonepa va sukila oku mioñoloha kuenda oku va lekisa esilivilo lioku ci linga. Tukula olondaka vina okuti olondonge vikuavo vi kuata elomboloko liavio. Kakuenje umue o tukuiwa hati Joshua, o kuete anyamo ecea, wa popia hati, akamba vange vo kosikola olondaka “owanji wutima,” kuenda “esunguluko,” ka vi va lomboloka. Omo liaco, eye wa siata oku vangula lavo olondaka vina via leluka.—1 Va Kor. 14:9.

Amalẽhe vamue vo kosikola, poku linga apulilo nda etambululo liaco li sõvi calua ka va lekisa vali onjongole yoku linga apulilo akuavo. Pole nda amalẽhe Olombangi via Yehova va sapela lavo loku va lomboluila ciwa, va pondola oku vetiya onjongole yavo. Haneul, umalẽhe umue o kuete ekũi kanyamo wa popia hati, “Akamba vange kosikola, va sole oku sapela, pole ka va yongola oku va lomboluila cimue.” Oco o fetike ombangulo, linga apulilo, kuenda yevelela ciwa atambululo avo.

Olondaka vi kuãimo vi lekisa ndomo amalẽhe Akristão va pondola oku sapela ciwa lakamba vavo kosikola. Ka ci sukila oku patekela olondaka viaco, momo omõla lomõla o kuete ocisimĩlo ca litepa, lekalo lia litepa. Omo liaco, umalẽhe umue Ombangi ya Yehova, citava okuti eci a kuata ocisimĩlo cimue, o ci lekisila kolondaka viaye lo kovilinga, kakamba vaye vo kosikola. Nda o kuete omãla va tanga kosikola, seteka oku sapela lavo.

Oku pindisa omãla, ci sukila otembo loku likolisilako. Olonjali vina okuti Akristão, vi sukila oku longa omãla vavo lolonumbi Viembimbiliya loku va vetiya oco va vi kapeko komuenyo wavo.— Esin. 6:7; 2 Tim. 3:14.

Kefendelo liene Liepata koñolosi, seteki oku linga ovindekaise via tukuiwa vocipama cilo. Tala onima yi pondola oku iyililako. Kũlĩhĩsa okuti ocimãho cavio hakupatekelako atambululo, ale olondaka. Olonjanja vimue lingi ovindekaise viokuti olonjali vieca atambululo a litepa kuenje tala ndomo omãla vove va pongolola ombangulo ketambululo letambululo li eciwa. Osimbu ovo va lombolola ekolelo liavo, va vetiyi oku ci linga lesumbilo kuenda utate. Vokuenda kuotembo, o ka longisa omãla vove ndomo va teyuila ekolelo liavo eci va pulisiwa lakamba vo kosikola, pamue omanu vakuavo, ale alongisi vavo.

[Olondaka vielitalatu kemẽla 3]

“Momo lie ku imbila ocisungo cofeka?”

[Olondaka vielitalatu kemẽla 4]

“A Kapitango. Njongola oku ku laleka kocipito coku ivaluka eteke liange lioku citiwa”

OCIPITO CETEKE LIOKU CITIWA

_______

Njambela: Ota a Kapitango, njongola oku ku laleka kocipito ceteke liange lioku citiwa.

Kapitango: Nda pandula muẽle a Njambela, omo wa ndi sokolola. Citava hẽ, okuti hu pula esunga lieci o lingila ocipito caco?

Njambela: Ndi ci lingila oku ivaluka eteke lioku citiwa kuange. Ove hẽ ku lingainga ocipito caco?

Kapitango: Sio, si ci lingainga.

Njambela: Momo lie ku ci lingila? Eci nda citiwa epata liange lia kuata esanju lialua.

Kapitango: Ndeci ca pita love, eteke nda citiwa epata liange lia sanjukilevo. Pole, ndi sima okuti eli halioko esunga lieci ndi lingila ocipito ceteke lioku citiwa unyamo lunyamo. Poku linga ocipito caco, omanu valua va sima okuti keteke liaco va velapo vakuavo. Anga hẽ Suku ka velelepo vali? Ka tu vetiyiwa hẽ oku eca olopandu Kokuaye omo liomuenyo a tu ĩha?

Njambela: Eci ci lekisa okuti ame si lingi vali ocipito ceteke lioku citiwa kuange?

Kapitango: Ove o panga nda o linga ale sio. Pole, momo lie ku sokoluila ondaka yaco? Ndaño omanu valua va sanjukila oku tambula olombanjaile vieteke lioku citiwa, Embimbiliya li popia okuti, esanju li tunda koku eca olio lialua, eli li tunda koku tambula li sule. Momo lie ka tu ecela olopandu ku Suku, loku kapako vakuetu poku va lingila ovina viwa okuti ka tu tiamisila lika utima kokuetu muẽle, ale keteke lietu lioku citiwa?

Njambela: Haka! ondaka eyi sia la yi sokolola. Anga hẽ kua la tambula ombanjaile yolonjali viove?

Kapitango: Ndi tambola. Pole, olonjali viange ka vi kevelela lika eteke liocipito coku citiwa kuange. Ovo va siata oku nyĩha olombanjaile olonjanja viosi. A Njambela, o yongola oku kũlĩha ndomo ovipito vieteke lioku citiwa via fetikiwa?

Njambela: Citava hẽ okuti o ndi sapuilako?

Kapitango: Ciwa, ame hẽla hu sapuilako ulandu umue wa pita kosimbu, watiamẽla keteke liocipito coku citiwa.

OKU IMBA OCISUNGO COFEKA

_______

Citula: A Ngeve, momo lie ku imbila ocisungo cofeka?

Ngeve: A Citula, nda pandula omo liepulilo wa ndinga. Puãi tete ndi yongola oku kũlĩha esunga lieci ove imbila ocisungo cofeka?

Citula: Ame nda siata oku ci linga, momo ndi sole ofeka yange.

Ngeve: A Citula, ame nda sanjukilavo ofeka yange. Pole, ka ca sungulukile oku sima okuti ofeka yimue ya velapo okuti yikuavo yi sule.

Citula: Ciwa. Pole, ame ndi sima okuti ofeka yange ya velapo.

Ngeve: Ndi likolisilako oku linga eci ci sanjuisa Suku. Kuenda Embimbiliya li popia okuti Suku ka kuete ocame. Eye o sole omanu vakualofeka viosi. Eli olio esunga lieci ame si imbila ocisungo cofeka.

Citula: Ove mbi o kasi oku sevula, ale?

Ngeve: Sio, hameko lika ndi kuete ocisimĩlo caco. Embimbiliya li lombolola ulandu wamalẽhe vamue va liyaka locitangi ndeci. Ovo va kisikiwa oku fendela ociñumañuma cimue, pole, ovo va likala ndaño okuti oku ci linga va kapele omuenyo wavo kohele.

Citula: Puãi ococo? Sia la ci yeva.

Ngeve: Nda o yongola, ndi ka ku lomboluila ulandu wavo kelivala lionanya.

OVINA VIATIAMẼLA KOPULITIKA

_______

Cikete: A Hosi, nda ove wa kuatele utunga woku imba ocela, nda wa nõla elie?

Hosi: Ame si yongola oku nõla omunu laumue.

Cikete: Momo lie? Anga hẽ kua sakalalele loviyaneke?

Hosi: Ame nda sakalala. Pole nda nõla ale usoma umue wa velapo.

Cikete: Usoma waco upi?

Hosi: Usoma umue u vialiwa la Yesu. Ndi sima okuti eye wa velapo. Ove hẽ o yongola oku kũlĩha esunga liaco?

Cikete: Sio.

Hosi: Ciwa, eteke o sukila ekuatiso ndi ka sanjuka calua oku ku sapuilako.