Cossa che Dio el farà?

Se te sì drio infrontar una dificoltà, sicuro che te volarissi che un amigo el te giutesse. Ma tanti no i vede Dio come un amigo cossita. Fursi i pensa: ‘Se Dio el fusse me amigo el ndaria giutarme.’ Ma in verità, Dio el ga belche fato tante robe par noantri e ancora el ndarà far par finir fora cole nostre dificoltà e sofrimento. Ma cossa che Dio el farà?

EL NDARÀ FINIR CON TUTE LE ROBE BRUTE

La Biblia la ne dise de ndove vien tute le brute robe che ghen’è ancoi. La dise: “Tuto el mondo l’è soto el poder del Perverso.” (1 Gioani 5:19) El “Perverso” l’è la medèsima persona che Gesù el ga dito che l’è el governante del mondo, o sia, Sàtana, el Diaol. (Gioani 12:31) L’è Sàtana che el ga el controle del mondo. Par quela, Dio el ndarà finirlo fora, anca con tute le brute robe che el fà. Ma come che Dio lo farà?

Par meso de Gesù, Geovà el ndarà finir fora col Diaol, ‘quel che el fà le persone morir’. (Ebrei 2:14; 1 Gioani 3:8) La Bìblia la dise che Sàtana el sa che “el ga sol una scianta de tempo” e presto el sarà finio fora. (Apocalisse 12:12) Dio anca el finirà con tuti i rugni. — Salmo 37:9; Proverbi 2:22.

EL NDARÀ FAR LA TERA DEVENTAR UN PARADISO

Dopo de finir fora con tute le brute robe, el nostro Creador el ndarà far quel che el ga sempre volesto par la Tera e par le persone. Cossa che ndarà suceder?

Pace e tranquilità par sempre. “I mansi i sarà paroni dela tera, e i gavarà tanta alegria par via dela granda pace.” — Salmo 37:11.

Bon magnar par tuti. “Ghen sarà tanti grani nela tera. Anca su i monti se ndarà tor su tanto de magnar.” — Salmo 72:16.

Bele case e un bon laoro. “Lori i ndarà far su case e i ndarà de star in lore. I ndarà piantar vignai e i ndarà magnar i so fruti. . . . E i me scoliesti i ndarà goder de tuto el laoro dele so man.” — Isaia 65:21, 22.

Sito premoso de veder tute queste robe? Suito la nostra vita la sarà cossita.

EL NDARÀ FINIR COLE MALATIE E LA MORTE

Ancoi, tute le persone le resta malade e le pol morir. Ma presto sarà difarente. Dio el ndarà far tante robe bone par causa del sacrifìssio de risgate de Gesù “cossita tuti quei che i dimostra fede in lu no i sìpia destruti, ma i possa viver par sempre”. (Gioani 3:16) Alora cossa che ndarà suceder? Vedemo.

No ghen sarà pi malatie. “Nissuni i ndarà dir: ‘Son malà.’ Le persone che le ze de star nela tera le riceverà el perdon dei so pecati.” — Isaia 33:24.

No ghen sarà pi la morte. “Lu el finirà cola morte par sempre, e el Sovrano Signor Geovà el sugarà le làgrime de tute le fàcie.” — Isaia 25:8.

Le persone le ndarà viver par sempre. “El presente che Dio el dà l’è la vita eterna par meso de Cristo Gesù, el nostro Signor.” — Romani 6:23.

I morti i tornarà a viver. “Ghen sarà una ressuression tanto dei giusti come dei ingiusti.” (Ati 24:15) Questo sol sucederà par causa dela morte de Gesù.

Ma come che Dio el farà tuto questo?

UN GOVERNO PERFETO IN TUTA LA TERA

Dio el ndarà far quel che el ga volesto par le persone e par la Tera par meso del so governo nel cielo. E el governante che Dio el ga scoliesto l’è Gesù Cristo. (Salmo 110:1, 2) Gesù el ga insegnà ai so seghidori a domandar questo governo in orassion: “Pare nostro che te sì nel cielo, . . . vegna el to Regno.” — Mateo 6:9, 10.

Questo Regno l’è el meio governo che se pol gaver qua ntela Tera. El Regno de Dio el ndarà finir fora con tute le dificoltà e el sofrimento che le persone le infronta. L’è stà par quela che Gesù, quando l’era qua ntela Tera, el ga seità a predicar “le bone notìssie del Regno” e el ga dito ai so dissìpoli de far compagno a lu. — Mateo 4:23; 24:14.

Geovà el ndarà far tute queste bele robe parché el ne ama tanto. Alora, cognosser meio a Dio e esser so amigo sarà tanto bon par ti. Ma parché sarà bon par ti? Varda la risposta nel pròssimo artìcolo.