Geovà el scolta le nostre orassion

1-2. Cossa che fursi se domandemo?

FURSI noantri se ghemo belche domandà: ‘Sarà che Geovà l’è drio risponder ale me orassion?’ Quando semo drio infrontar dificoltà, pol esser ancora pi fadiga veder come Geovà l’è drio risponderne. Par quela, tanti i se ga belche domandà se Geovà l’è drio risponderghe.

² Alora, ndemo veder parché podemo esser sicuri che Geovà el risponde ale orassion dei so servi. (1 Gio. 5:15) E anca ndaremo veder la risposta a queste domande: ‘Parché che dele volte ne par che Geovà no l’è drio risponder ale nostre orassion? Come che Geovà el ne risponde ancoi?’

FURSI GEOVÀ NO’L NE RISPONDE COME SPETEMO

3. Parché che Geovà el vol che ghe domandemo aiuto?

³ Geovà el vol che ghe domandemo aiuto quando ghemo de bisogno. (1 Pie. 5:6, 7) Parché? Parché la Bìblia la mostra che Geovà el ne ama tanto e che el ne dà tanto valor. (Ageo 2:7; 1 Gio. 4:10) Geovà anca el vol restar sempre dela nostra banda e giutarne a dàrghene fora cole nostre dificoltà.

4. Come che podemo esser sicuri che Geovà el risponde ale orassion dei so servi? (Varda anca la ilustrassion.)

⁴ La Bìblia la mostra che Geovà el ga rispondesto ai so servi tante volte. Ricòrdito de qualche esémpio? Fursi te ghè pensà sora Davi. Lu el ga bio tanti nemighi e sempre el domandea el aiuto de Geovà. Una volta, Davi el ga pregà: “Ò Geovà, scolta la me orassion. Scoltame quando suplico par domandarte aiuto. Rispondeme, parché te sì fedele e giusto.” (Sal. 143:1) Geovà lo ga scoltà e lo ga salvà. (1 Sam. 19:10, 18-20; 2 Sam. 5:17-25) Par quela, Davi l’era sicuro che “Geovà l’è darente de tuti quei che i lo ciama”. Anca noantri podemo esser sicuri che Geova l’è sempre darente dei so servi. — Sal. 145:18.

5. Sarà che Geovà sempre risponde ale nostre orassion dela maniera che spetemo? Parla de un esémpio. (Varda anca la ilustrassion.)

⁵ Ma sarà che questo vol dir che Geovà sempre el ne risponde dela maniera che spetemo? Nò. Varda, par esémpio, quel che ga sucedesto col apòstolo Paolo. Lu el ga domandà tre volte che Geovà el cavesse via el so “spin nela carne”, o sia, che el finissesse col so problema. E Geovà ghe ga rispondesto, ma nò dela maniera che Paolo el volea. Invesse de finir fora col so problema, Geovà el ga dato a Paolo la forsa che ghe ocorea par seitar fedele. — 2 Cor. 12:7-10.

6. Parché che fursi ne par che Geovà no l’è drio risponder ale nostre orassion?

⁶ Anca se, dele volte, Geovà no’l ndarà risponderne dela maniera che spetemo, podemo esser sicuri che lu el sa la meio maniera de giutarne. Geovà “el pol far pròpio tanto de pi de tuto quel che ghe domandemo o che podemo imaginar”. (Efe. 3:20) Par quela, pol esser che lu el ndarà risponderne nte una ora e de una maniera che no spetemo mia.

7. Parché che dele volte ghemo de cambiar quel che domandemo a Dio? Parla de un esémpio.

⁷ Pol esser che, quando capimo meio cossa che Geovà el vol, ne tocarà cambiar quel che ghe domandemo. Varda el esémpio del fradel Martin Poetzinger. Pena dopo de esser maridà, i nazisti i lo ga metesto in preson. Alora, el fradel Poetzinger el ga domandà che Geovà lo assesse ndar via dela preson. Cossita, lu el saria bon de tender dela so dona e de seitar a predicar. Magari, dopo due stimane, lu el ga visto che no l’era mia quel che Geovà el volea. Cossita, lu el ga pregà: “Ò, Geovà, mostrame cossa gonti de far.” El fradel Poetzinger el ga scominsià a pensar sora altri fradei che i era preson insieme a lu. Anca lori i era tanto preocupadi cola so fameia. Par quela, el fradel Poetzinger el ga pregà: “Geovà, gràssie par questo laoro che te me ghè dato de incoraiar i me fradei.” Lu l’è restà nove ani in preson e l’è stà bon de incoraiar i so fradei in tuto questo tempo!

8. Cossa ghemo de ricordarse quando ghe domandemo qualcossa a Geovà?

⁸ Geovà el vol tanto finir fora con tuti i sofrimenti che ghemo ancoi. Par quela, lu el ndarà finir fora cole malatie, cola morte e cole desgràssie dela naturesa. (Dan. 2:44; Apo. 21:3, 4) Ma, quando preghemo a Geovà, ghemo de ricordarse che lu sol el ndarà far quel che el ga prometesto nela ora giusta. Parché? Parché ancoi l’è Sàtana che el governa el mondo.b (Gioani 12:31; Apo. 12:9) Par quela, se Geovà el finissesse fora con tuti i problemi che ghemo, tanti i ndaria pensar che Sàtana l’è drio governar ben. Cossita, ne ocore spetar fin che Geovà el fae tuto quel che el ga prometesto. Ma lu l’è belche drio giutarne ancoi. Ndemo veder come.

COME CHE GEOVÀ EL RISPONDE ALE NOSTRE ORASSION ANCOI?

9. Come che Geovà pol giutarne quando ghemo de far una dessision? Parla de un esémpio.

⁹ Geovà el ne dà sabedoria. Dio el ga prometesto darne sabedoria par far bone dessision. E ne ocore ancora de pi el so aiuto quando ghemo de far dessision importante, come de maridarse o nò. (Tia. 1:5) Varda quel che ga sucedesto con una sorela de nome Maria.c Ela la era contenta parché la laorea come pioniera regolar. Alora, ela la ga cognossesto un fradel, lori due i ze deventadi amighi e i ga scominsià a volerse tanto ben. Ela la ga dito: “Mi savea che me ocorea dessider cossa far. Par quela, go pregà tanto a Geovà par domandar el so aiuto, ma savea che lu no’l ndaria dirme cossa far.” Magari, Geovà el ghe ga dato sabedoria. Come? Ela la ga catà fora tante publicassion che la ga giutada e la ga scoltà i boni consili dela so mama, che la ze una brava serva de Geovà. Questi consili la ga giutada a pensarghe sora quel che la era drio sentir. Cossita, Maria la ga fato una bona dessision.

10. De acordo con Filipensi 4:13, come che Geovà el giuta i so servi? Parla de un esémpio. (Varda anca el ritrato.)

¹⁰ Geovà el ne dà forsa par perseverar. Compagno Geovà el ga giutà el apòstolo Paolo, lu el ne dà forsa par dàrghene fora cole dificoltà. (Ledi Filipensi 4:13.d) Varda come Geovà el ga giutà un fradel dela Àfrica de nome Benjamin. Quando l’era gióveno, lu e la so fameia i stea nei posti ndove vivea le persone che le gavea scampà via del so paese. Benjamin el ga dito: “Mi sempre preghea a Geovà e domandea che el me desse forsa par far quel che l’è giusto. E lu el me ga dato pace e coraio par seitar a predicar. Lu anca el me ga dato tante publicassion che le me ga giutà a esser cada volta pi amigo suo. Leder sora come Geovà el ga giutà anca altri fradei me ga dato ancora pi forsa par seitar leal.”

11-12. Come che Geovà el dopera i nostri fradei par risponder ale nostre orassion? (Varda anca el ritrato.)

¹¹ Geovà el ne giuta par meso dei nostri fradei. Nela note vanti de morir, Gesù el ga pregà tanto. Lu el ga domandà che Geovà no’l assesse che i altri pensesse che lu el gavea bestemà contra el nome del so Pare. Alora, cossa che Geovà el ga fato? Lu el ga doperà un àngelo par consolar Gesù. (Luc. 22:42, 43) Ancoi, Geovà el doperà i nostri fradei e sorele par incoraiarne. Lori i ne giuta quando i vien catarne o quando i parla con noantri par telèfono. Magari, tuti noantri ghemo de pensar come podemo giutarse un al altro. — Pro. 12:25.

¹² Varda quel che ga sucedesto con una sorela de nome Miriam. Fea poche stimane che so omo l’era morto e la era ela sola casa, triste e desanimada. Ela no la era mia bona fermarse de piander e ghe ocorea discorer con un amigo. Miriam la ga dito: “Mi no gavea gnanca forsa de ciamar qualchedun. Par quela, go pregà a Geovà. Intanto che mi piandea e preghea, el me telèfono ga sonà. L’era un caro amigo che l’è ansiano.” Quel ansiano e la so dona i ze stati boni de consolar Miriam. Ela la ze sicura che l’è stà Geovà che li ga doperadi par giutarla.

13. Parla de un esémpio de come Geovà el pol doperar una persona che no lo serve par risponder ale nostre orassion.

¹³ Geovà el pol doperar persone che no lo serve. (Pro. 21:1) Dele volte, Geovà el pol doperar persone che no lo adora par risponder la orassion dei so servi. Par esémpio, Neemia el volea tornar a Gerusalen par far su la cità nantra volta. Alora, Geovà el ga fato che el rè Artaxerxes el assesse che Neemia el fesse questo laoro. (Nee. 2:3-6) Anca ancoi Geovà el pol doperar qualchedun par giutarne quando ghemo de bisogno.

14. Cossa che te ga piasesto de pi de quel che ga sucedesto cola sorela Soo Hing? (Varda anca el ritrato.)

¹⁴ Varda quel che ga sucedesto con una sorela de nome Soo Hing. So fiol el gavea tante brute malatie ancora de picinin. Ma la so situassion la ze restada ancora pedo quando lu el ga bio un assidente. Alora, Soo Hing e so omo ghe ga tocà assar el laoro par tender del so fiol. Par quela, ghe ga mancà soldi e lori i ga bio tante dificoltà. Ela la ga dito che la sentia che no la saria mia pi bona de ndar avanti. Cossita, la ga domandà el aiuto de Geovà e la ga ghe parlà tuto quel che la sentia. Cossa ga sucedesto? Lori i ga ricevesto aiuto del governo e un bon posto de star. Parché? Parché el dotor che l’era drio tender del so fiol l’è ndato in serca de una maniera de giutarli. Soo Hing la ga dito: “Ghemo visto Geovà giutarne. Sicuro che lu el scolta le orassion.” — Sal. 65:2.

NE OCORE FEDE PAR VEDER E ACETAR EL AIUTO DE GEOVÀ

15. Cossa ga giutà una sorela a nicorderse che Geovà l’era drio risponder ale so orassion?

¹⁵ Gnanca sempre Geovà el ndarà risponder ale nostre orassion de una maniera de maraveiarse. Ancora cossita, lu sempre el ndarà darne pròpio quel che ghemo de bisogno par seitar fedeli. Par quela, ne ocore star atenti par capir come che Geovà l’è drio risponderne. Varda quel che ga sucedesto con una sorela de nome Yoko. Ela la pensea che Geovà no l’era drio risponder ale so orassion. Alora, ela la ga scominsià a meter par scrito tuto quel che la ghe domandea a Geovà. Dopo de un tempo, Yoko la ga visto quel che la gavea scrito e la ze nicorta che Geovà el gavea rispondesto a quasi tute le so orassion. E ghen’era tante robe che gnanca la se pensea pi. Par quela, tuti noantri ghemo de sempre torse el tempo par pensarghe sora come Geovà l’è drio risponderne. — Sal. 66:19, 20.

16. De che maniera podemo mostrar che ghemo fede? (Ebrei 11:6)

¹⁶ Mostremo che ghemo fede quando preghemo a Geovà e quando acetemo la maniera che lu el risponde ale nostre orassion. (Ledi Ebrei 11:6.e) Varda el esémpio de Mike e Chrissy, un casal che el volea tanto laorar in Betel. Mike el ga dito: “Ghemo fato la petission tante volte e ghemo pregà par tanti ani par domandar che Geovà el ne assesse ndar. Ancora cossita, mai semo stati ciamadi.” Magari, lori i era sicuri che Geovà el savea la meio maniera de doperarli. Alora, cossa gali fato? Mike e Chrissy i ga seità a laorar come pionieri ndove ghen’era bisogno de aiuto, i ga giutà nela costrussion e ancoi i laora come superintendenti. Mike el ga dito: “Anca se dele volte Geovà no’l ne risponde dela maniera che spetemo, lu sempre el ne risponde de una maniera ancora meio.”

17-18. De acordo con Salmo 86:6, 7, de cossa che podemo esser sicuri?

¹⁷ Ledi Salmo 86:6, 7.f Compagno a Davi, anca noantri podemo esser sicuri che Geovà el scolta e el risponde ale nostre orassion. Come ghemo visto in questo stùdio, Geovà el pol darne sabedoria e forsa par perseverar. E par giutarne, lu el pol doperar i nostri fradei o fin persone che no lo adora mia.

¹⁸ Podemo esser sicuri che Geovà el ndarà risponder ale nostre orassion, anca se no l’è mia dela maniera che spetemo. E lu sempre el ndarà darne quel che ne ocore nela ora giuta. Par quela, ghemo de seitar a pregar con fede. Podemo esser sicuri che Geovà el ndarà tender de noantri fin el novo mondo, quando lu ‘ndarà darne tuto quel che volemo’. — Sal. 145:16.