Sarà che Geovà el ndarà risponder le me orassion?

1-2. Parché che fursi pensemo che Geovà no l’è drio risponder ale nostre orassion?

“FÀ DE Geovà la to pi granda alegria e lu el te darà quel che el to cuor el vol.” (Sal. 37:4) Questa la ze una bela promessa, mia vera? Ma no vol mia dir che Geovà el ndarà darne quel che ghemo domandà nela ora che volemo. Varda un per de esempi. Un pare e una mare i domanda che Geovà el giute el so fiol a seitar fedele. Ma dopo un tempo, lu el se ferma de servir a Geovà. Un gióveno che l’è malà el domanda che Geovà lo guarissa parché el vol far de pi nela congregassion. Ancora cossita, la so salute no la resta meio. Una sorela la ze drio domandar fà tanti ani che Geovà la giute a far la Scola de Vangelisadori. Ma, no la ze stata gnancora ciamada.

² Fursi anca ti te ghè domandà qualcossa a Geovà che no la ga gnancora sucedesto. Alora, fursi te pensi che Geovà no l’è drio scoltarte o che te ghè fato qualcossa de sbalià. Varda el esémpio de una sorela de nome Janice.b Ela e so omo i volea ndar a Betel. Ma lori i ga spetà fin arquanti ani sensa esser convidadi. Ela la ga dito: “Mi ero sicura che presto ndeino a Betel. Alora, son restada disgustada. Mi pensea che gavea fato qualcossa de sbalià. Mi gavea domandà tante volte che Geovà ne assesse ndar a Betel. Parché che lu no’l ne gavea gnancora rispondesto?”

3. Cossa che ndaremo imparar in questo stùdio?

³ Dele volte, pol esser che se domandemo se Geovà l’è drio scoltarne, compagno a tanti servi fedeli del passà. (Giò 30:20; Sal. 22:2; Abac. 1:2) Questo stùdio el ndarà giutarte a esser sicuro che Geovà el ndarà risponder ale to orassion. (Sal. 65:2) Adesso, ndaremo veder la risposta a queste domande: (1) Cossa che Geovà el fà quando ghe domandemo qualcossa? (2) Cossa che Geovà el vol che noantri femo? (3) Parché che fursi ghemo de cambiar quel che semo drio domandar a Geovà?

COSSA CHE GEOVÀ EL FÀ QUANDO GHE DOMANDEMO QUALCOSSA?

4. De acordo con Geremia 29:12, cossa che Geovà el ga prometesto far?

⁴ Geovà el ga prometesto che sempre el ndarà scoltarne. (Ledi Geremia 29:12.c) Savemo che le nostre orassion le ze importante par Geovà parché lu el ne ama tanto. (Sal. 10:17; 37:28) Ma, questo no vol mia dir che Geovà el ndarà far tuto quel che ghe domandemo. Fursi ne tocarà spetar fin el novo mondo par ricever quel che volemo.

5. Cossa che Geovà el vede quando ghe domandemo qualcossa? Spiega.

⁵ Geovà el vede se quel che ghe domandemo l’è de acordo cola so volontà. (Isa. 55:8, 9) E quala che la ze la volontà de Geovà? Lu el vol che tute le persone le sìpia perfete e lo adore insieme con alegria. Ma, Sàtana el ga dito che podemo far quel che volemo e che no ne ocore obedir a Geovà. (Gén. 3:1-5) Alora, par mostrar che Sàtana l’è un busier, Geovà l’è drio assar che i òmini i governe a lori stessi. Par quela che ghen’è tanti problemi. (Ecl. 8:9) E parché che Geovà no’l finisse fora coi problemi ancoi? Parché se el fesse cossita, le persone le ndaria pensar che no ghe ocore mia obedirghe e che le ze bone de finir fora coi so problemi lore sole.

6. Parché che ghemo de esser sicuri che Geovà sempre el ndarà risponderne con amor e dela meio maniera?

⁶ Geovà el pol risponderne de diverse maniere. Varda par esémpio quel che ga sucedesto col rè Ezechia e col apòstolo Paolo. Quando Ezechia el ga domandà che Geovà lo giutesse a dàrghene fora con una bruta malatia, lu l’è stà curà. (2 Rè 20:1-6) Ma, quando Paolo el ga domandà che Geovà el cavesse via el so spin nela carne, che fursi l’era una malatia, Geovà no lo ga curà. (2 Cor. 12:7-9) Varda anca quel che ga sucedesto coi apòstoli Piero e Tiago. Quando el rè Erode el ga perseghio lori due, i fradei i ga pregà che Geovà li giutesse. Piero l’è stà molà par meso de un miràcolo, ma Tiago l’è stà copà. (Ati 12:1-11) Par quela, fursi pensemo: ‘Parché che Geovà el ga salvà Piero ma el ga assà che Tiago el fusse morto?’ La Bìblia no la dise.d Ma podemo esser sicuri che Geovà “mai l’è ingiusto”. (Deu. 32:4) E savemo che Geovà el amea tanto Piero e Tiago. (Apo. 21:14) Alora, pol esser che gavaremo dificoltà che no spetemo mia e che Geovà no’l ndarà far quel che ghemo domandà a lu. Ma sempre saremo sicuri che lu el ndarà risponderne con amor e dela meio maniera. — Giò 33:13.

7. Cossa che mai ghemo de far, e parché?

⁷ Mai ghemo de far comparassion coi altri. Parché? Parché fursi ti e nantro fradel sì drio domandar la stessa roba a Geovà, ma quel che domandé sucede sol con un de valtri. Varda el esémpio de una sorela de nome Anna. El so omo, Matthew, e altre due sorele pi vècie i gavea un càncaro. Alora, ela la ga pregà che Geovà el giutesse el so omo e anca quele due sorele. Dopo de un tempo, le due sorele le ze state bone de curarse, ma el so omo de Anna l’è morto. Ela la ga pensà che, se l’era stà Geovà che el gavea giutà quele due sorele a restar meio, parché che no’l gavea giutà anca so omo? Noantri no savemo parché quele due sorele le ze restade meio. Ancora cossita, savemo che Geovà el ndarà finir pròpio con tuto el sofrimento nel futuro e che el ndarà ressussitar i nostri cari che i ze morti. — Giò 14:15.

8. (a) De acordo con Isaia 43:2, come che Geovà el ne giuta? (b) Come che pregar a Geovà pol giutarne quando semo drio infrontar una dificoltà? (Varda el vìdeo Pregar a Dio giuta a infrontar dificoltà.)

⁸ Geovà sempre el ndarà giutarne. Lu l’è el nostro Pare e ghe despiase tanto vederne sofrir. (Isa. 63:9) Ancora cossita, dele volte, gavaremo dificoltà che le sarà come ‘rii’ o come el ‘fogo’. (Ledi Isaia 43:2.e) Geovà el ga prometesto giutarne a infrontar tute queste dificoltà. Lu el ndarà darne el so spìrito santo par esser boni de seitar leai e no’l assarà che gnanca un problema ne intrighe de servirlo. (Luc. 11:13; Fil. 4:13) Alora, podemo esser sicuri che Geovà sempre el ndarà darne pròpio quel che ne ocore par seitar leai a lu.f

COSSA CHE GEOVÀ EL VOL CHE NOANTRI FEMO?

9. De acordo con Tiago 1:6, 7, parché che ghemo de esser sicuri che Geovà sempre el ndarà giutarne?

⁹ Geovà el vol che se fidemo del tuto in lu. (Ebr. 11:6) Ma dele volte, ne par che no saremo mia boni de dàrghene fora con una dificoltà. Ancora cossita, invesse de domandarse se Geovà el ndarà pròpio giutarne, ghemo de esser sicuri che lu sempre el ndarà darne la forsa che ne ocore. (Sal. 18:29) Alora, ghemo de pregar con fede e esser sicuri che Geovà sempre el ndarà risponderne. — Ledi Tiago 1:6, 7.g

10. Cossa ghemo de far dopo che domandemo qualcossa a Geovà? Parla de un esémpio.

¹⁰ Geovà el vol che femo el nostro meio dopo che ghe domandemo qualcossa. Par esémpio, pol esser che un fradel el domande a Geovà che lo giute a esser lìbero del laoro par ndar al congresso. Come che Geovà el podaria risponder a questa orassion? Fursi lu el ghe daria coraio par parlar col so paron. Alora, ghe tocaria al fradel domandar al so paron che lo assesse ndar nel congresso. Fursi, lu el gavaria de domandar diverse volte, dir che el podaria laorar in nantro giorno o fin acetar ciapar manco soldi nel fin del mese.

11. Parché che ghemo de seitar a domandar el aiuto de Geovà?

¹¹ Geovà el vol che seitemo a pregar par parlarghe dei nostri pensieri. (1 Tes. 5:17) Gesù el ga dito che arquante robe che ghe domandemo a Geovà no le ndarà suceder nela ora che volemo. (Luc. 11:9) Ancora cossita, no stà mia desister. Pitosto, seita a pregar a Geovà. (Luc. 18:1-7) Quando seitemo a domandar el aiuto de Geovà, mostremo che quel che domandemo l’è importante e che se fidemo che lu el pol giutarne.

PARCHÉ CHE FURSI GHEMO DE CAMBIAR QUEL CHE SEMO DRIO DOMANDAR A GEOVÀ?

12. (a) Cossa ghemo de pensar sora quel che domandemo a Geovà, e parché? (b) Cossa che ghemo de far par esser sicuri che quel che semo drio domandar a Geovà l’è giusto? (Varda el quadro “Sarà che le me orassion le mostra che mi rispeto a Geovà?”.)

¹² Se quel che ghemo domandà a Geovà no ga sucedesto, podemo farse tre domande. La prima la ze: ‘Sarà che quel che son drio domandar l’è la meio roba?’ Parché? L’è vera che pensemo che savemo quel che l’è meio. Ma pol esser che quel che ghemo domandà a Geovà no sarà mia bon par noantri o par i altri. Par esémpio, fursi volemo finir fora con un problema dela nostra maniera, e volemo che Geovà el ne giute. Ma, no se nicordemo che ghen’è una maniera ancora meio. E pol esser che domandemo a Geovà qualcossa che no la ze mia de acordo cola so volontà. (1 Gio. 5:14) Pensa in quel pare e in quela mare che i seita a domandar che Geovà el giute so fiol a seitar a servirlo. Pol esser che ne par giusto quel che lori i domanda. Ma, Geovà el vol che tuti noantri lo servimo de volentiera, anca i nostri fioi. (Deu. 10:12, 13; 30:19, 20) Alora, saria meio che quei genitori i domandesse che Geovà li giutesse a esser boni de tocar el cuor de so fiol e giutarlo a amar a Geovà. — Pro. 22:6; Efe. 6:4.

13. De acordo con Ebrei 4:16, quando che Geovà el ne giuta? Spiega.

¹³ Podemo anca domandarse: ‘Sarà che la ze la ora giusta par Geovà risponder ala me orassion?’ Fursi pensemo che saria meio che Geovà el ne rispondesse pi presto che se pol. Ma, l’è Geovà che el sa la ora giusta de far le robe. (Ledi Ebrei 4:16.h) Alora, se no ga mia sucedesto quel che te ghè domandà a Geovà, no stà pensar che la so risposta la ze: “Nò.” Invesse, te pol pensar che la risposta la ze: “Nò gnancora.” Par esémpio, pensa in quel fradel che l’è drio pregar che Geovà lo giute a restar meio dela so malatia. Se Geovà el fesse un miràcolo par curarlo, Sàtana el podaria dir che el fradel sol el seitaria a servir a Geovà par causa de quel miràcolo. (Giò 1:9-11; 2:4) E savemo che Geovà el ga la ora giusta par finir fora con tute le malatie. (Isa. 33:24; Apo. 21:3, 4) Par quela, fin che rive quel tempo, no ghemo mia de spetar che lu fae un miràcolo. Alora, invesse de domandar che Geovà lo curesse, quel fradel el podaria domandar che Geovà ghe desse forsa e pace. Cossita, lu el saria bon de dàrghene fora con quela dificoltà e seitar a servir a Geovà. — Sal. 29:11.

14. Cossa che te ghè imparà cola speriensa de Janice?

¹⁴ Pensa sora quel che ga sucedesto con Janice, quela sorela che la domandea a Geovà che la ndesse a Betel. Dopo sinque ani, ela la ga capio che Geovà ghe gavea belche rispondesto, ma de una maniera difarente de quel che la spetea. Ela la ga dito: “Geovà el ga doperà quel tempo par insegnarme a adorarlo de una maniera ancora meio e par mostrarme che me ocorea de pi fede. Mi go anca visto che gavea de studiar meio la Bìblia e imparar a gaver alegria de servir a Geovà, no importa el laoro o el posto.” Dopo, Janice e so omo i ze stati convidadi par servir nel sircuito. Ela la ga dito: “Geovà el ga rispondesto le me orassion de una maniera difarente de quel che spetea. E me ga metesto un tempo par capir che lu me ga rispondesto de una maniera tanto bela. Son tanto contenta de gaver sentio el so amor e bontà.”

15. Cossa che fursi saria meio domandar a Geovà? (Varda anca la ilustrassion.)

¹⁵ La tersa domanda che te pol far la ze: ‘Sarà che mi gavaria de domandar altre robe a Geovà?’ Tante volte, preghemo e domandemo quel che volemo e quel che ne par meio. Ma, par saver quel che Geovà el vol par noantri, saria meio parlar a lu quel che ne ocore, e assar che lu el ne dae quel che el vol. Pensa in quela sorela che la vol far la Scola par Vangelisadori. Ela la ze drio pregar che Geovà la giute parché la vol servir ndove ghen’è de pi bisogno. Alora, ela la podaria anca domandar che lu la giutesse a pensar in altre robe che la podaria far par giutar la organisassion. (Ati 16:9, 10) Ela anca la podaria parlar col superintendente de sircuito e domandar se ghen’è qualche posto che ghe ocore de pionieri o scriver a Betel par saver ndove la podaria ndar de star par giutar nela predicassion.i

16. Ghemo de esser sicuri de che?

¹⁶ Come ghemo visto, ne ocore esser sicuri che Geovà sempre el ndarà risponderne dela maniera giusta e con amor. (Sal. 4:3; Isa. 30:18) Ma, dele volte Geovà no’l ndarà risponderne dela maniera che spetemo. Ancora cossita, lu sempre el sarà atento a quel che ghe domandemo parché lu el ne ama e mai el ndarà abandonarne. (Sal. 9:10) Alora, fìdate sempre in Geovà e pàrlaghe tuto quel che te senti. — Sal. 62:8.