I pi veci i giuta la congregassion de tante maniere

Fursi anca ti no te sì bon de far tuto quel che te fei quando te eri pi gióveno. Pol esser che te sì leal a Geovà fà tanto tempo. Ma quando te pensi in tuto quel che te fei par lu nel passà e in quel che te fè adesso, fursi te te senti desanimà. Ma cossa che pol giutarte a gaver alegria? Cossa che Geovà el vol che te fae?

COSSA CHE GEOVÀ EL VOL CHE TE FAE?

Domandate: ‘Cossa che Geovà el vol che mi fao?’ Quel che l’è scrito in Deuteronómio 6:5 pol giutarte tanto. El testo el dise cossita: “Te ghè de amar a Geovà el to Dio con tuto el to cuor, con tuta la to ànima e con tuta la to forsa.”

De acordo con questo versìcolo, Geovà el vol che te servi a lu con tuto el to cuor, con tuta la to ànima e con tuta la to forsa. Saver de questo ndarà giutarte a no far comparassion coi altri o con quel che te eri bon de far nel passà.

Pensaghe sora: Quando te eri pi gióveno, te fei el to meio par Geovà de acordo cola to situassion in quel tempo. E te sì ancora drio far el to meio par Geovà, ma de acordo con quel che te sì bon de far adesso. Se te pensi de questa maniera, te ndarè capir che te fei el to meio par Geovà nel passà e te sì drio far el to meio par lu adesso.

QUEL CHE TE GHÈ IMPARÀ NELA VITA POL GIUTAR I ALTRI

Varda nantra roba che l’è bon pensarghe sora. Invesse de pensar in quel che no te sì pi bon de far par causa dela to età, proa catar fora maniere de giutar i altri. Come te sì un servo de Geovà pi speriente, adesso te pol far robe che no te eri bon de far quando te eri pi gióveno. Varda quel che te pol far.

Parla ai altri quel che te ghè imparà nela vita. Pensaghe sora quel che la Bìblia la dise in questi versìcoli:

El Rè Davi: “Mi ero gióveno e adesso son vècio, ma mai go visto un giusto abandonà gnanca i so fioi drio ndar in serca de pan.” — Sal. 37:25.

Giosuè: “Romai son drio morir, e valtri savé ben, de tuto el vostro cuor e de tuta la vostra ànima, che Geovà, el vostro Dio, no’l ga assà de far gnanca una dele bone robe che el ve ga prometesto. Tute le promesse le se ga realisà par el vostro ben. Gnanca una la ga assà de realisarse.” — Gios. 23:14.

Fursi anca ti te ghè dito robe cossita quando te eri pi gióveno par incoraiar i altri. Ma Davi e Giosuè i gavea visto tante de queste robe suceder nela so vita. Par quela, quel che i ga dito gavea de pi valor.

Se te sì drio servir a Geovà fà tanti ani, anca ti te ghè visto tante bele robe che Geovà el ga fato par ti e par i altri. Fursi te te ricordi de un colpo che te ghè visto come Geovà el ga giutà i so servi o a ti stesso. Alora, contaghe ai altri! Cossita, te sarè bon de incoraiar i to fradei e le to sorele. — Rom. 1:11, 12.

Nantra maniera che te pol incoraiar i altri la ze ndar ale riunion nel Salon del Regno, se te sì bon. Connie, che ghemo parlà prima, la ga dito: “Ndar ale riunion nel Salon del Regno me giuta tanto a no restar desanimada. Come che mi podaria restar desanimada con tuto el amor che mi ricevo dei fradei e dele sorele? Mi proo mostrar che ghe dao valor ai altri quando ghe dao pìcoli presenti. Cossita, son bona de incoraiar i fradei e anca lori i me incoraia.”

GEOVÀ EL GHE DÀ VALOR A TUTO QUEL CHE TE FÈ PAR LU

Nela Bìblia, ghen’è tanti esempi de persone che Geovà el amea, anca se no le podesse far tuto quel che le volea par lu. Pensa par esémpio in Simeon, un israelita pi vècio. Quando Simeon el ndea al témpio, pol esser che lu el vedea gióveni drio far laori importanti. Fursi Simeon el pensea che lu no’l gavea tanto valor par Geovà parché no’l podea far tuto quel che i gióveni i fea. Ma Geovà no’l pensea cossita. Lu el vedea Simeon come un omo giusto che adorea a Dio e el ghe ga benedio col privilègio de veder el bambin Gesù. Geovà anca el ga doperà Simeon par far una professia sora el Messia! (Luc. 2:25-35) Sicuro che Geovà no’l vedea quel che Simeon no l’era bon de far par lu, ma el vedea la so fede forte.

Anca ti te pol esser sicuro che Geovà el ghe dà tanto valor a quel che te fè par lu e ala to fidelità. Par Geovà, se la persona la ga una ‘bona disposission, lu el resta contento che la dae quel che la ga, e nò quel che no la ga’. — 2 Cor. 8:12.

Alora, consentrate in quel che te sì bon de far. Par esémpio, pensaghe sora maniere difarente che te pol predicar, anca se te sì bon de restar sol poco tempo in predicassion. Te pol incoraiar i to fradei e sorele quando te parli con lori par telèfono o quando te ghe mandi un carton. Sicuro che i restarà tanto contenti de ricever el amor de una persona che la serve a Geovà fà tanto tempo come ti.

Arquanti no i ga tanta forsa come una volta. Varda una speriensa dela Àfrica nel quadro “Par meso dela Bìblia, una sorela la ga salvà una vita”.

Te sì leal a Geovà fà tanti ani e te pol incoraiar i altri. Te sì un bel esémpio de perseveransa e te pol esser sicuro che “Dio no l’è mia ingiusto par desmentegarse del vostro laoro e del amor che gavé dimostrà par el so nome, par servir i santi e par continuar a servirli”. — Ebr. 6:10.

DOPERA EL TO TEMPO PAR GIUTAR I ALTRI

Studiosi i dise che una persona pi vècia che la dopera el so tempo par giutar i altri la ga una salute meio, la capisse meio le robe e la vive de pi.

L’è vera che giutar i altri no vol dir che no te gavarè pi problemi che i vien par causa dela età. Savemo che sol el Regno de Dio el ndarà cavarne via el pecato e farne deventar gióveni e sani nantra volta. — Rom. 5:12.

Alora, seita a predicar e a far le altre robe che Geovà el te domanda. Questo ndarà far la to speransa restar sempre pi forte e pol giutar anca nela to salute. Nostri cari fradei pi veci, Geovà e la congregassion ghe dà tanto valor al vostro esémpio de fede.