La verità sora Dio e Gesù

Chi che l’è Dio?

Qual che l’è el nome de Dio? Lu pròpio el dise: “Mi son Geovà. Questo l’è el me nome.” (Isaia 42:8) Nela Bìblia, ghen’è de pi de 7 mila volte el nome de Dio. Magari in arquante Bìblie i ga cavà via el so nome e i ga metesto un tìtolo, come “Signor”. Ma Dio el ga caro che doperemo el so nome parché el vol esser nostro amigo. — Salmo 105:1.

Geovà el ga tanti tìtoli. La Bìblia la parla de Geovà come “Dio”, “Tuto Poderoso”, “Creador”, “Pare”, “Signor” e “Sovrano”. Quando persone del passà le preghea a Dio, le doperea queste parole de rispeto e anca el so nome, Geovà. Queste orassion le ze state scrite nela Bìblia. — Daniel 9:4.

Come che l’è Dio? Dio l’è un spìrito e par quela no se pol vederlo. (Gioani 4:24) La Bìblia la dise che “nissuni mai i ga visto a Dio”. (Gioani 1:18) Anca la dise che quel che le persone le fà pol assar Dio triste o ‘contentar el so cuor’. — Proverbi 27:11; Salmo 78:40, 41.

Le bele qualità de Dio. Dio el trata tute le persone compagno, no importa le so culture o de ndove le ze. (Ati 10:34, 35) Lu anca “el ga misericòrdia, compassion, l’è passiente e pien de amor leal e el parla sempre la verità”. (Ésodo 34:6, 7) Dio el ga tante qualità, ma ghen’è quatro che le ze pi importante.

Poder. Geovà el ga dito: “Mi son el Dio Tuto Poderoso”. Alora, lu el ga poder par far tuto quel che el ga prometesto. — Génesi 17:1.

Sabedoria. Dio l’è la persona pi sàbia che ghen’è e, par quela, la Bìblia la dise che “lu l’è el ùnico che el ga el saver.” — Romani 16:27.

Giustìssia. Tuto quel che Dio el fà l’è giusto e perfeto. “Lu mai l’è ingiusto.” — Deuteronómio 32:4.

Amor. Dio no sol el mostra amor, ma la Bìblia la dise che “Dio l’è amor”. (1 Gioani 4:8) Tuto quel che lu el fà l’è con amor e questo ne giuta de tante maniere.

La amicìssia de Dio cole persone. Dio l’è nostro Pare nel cielo. (Mateo 6:9) Podemo esser so amighi se ghemo fede in lu. (Salmi 25:14) Dio el vol che rivemo darente de lu in orassion e el ne dise par ‘butar sora lu tute le nostre preocupassion parché el tende de noantri’. — 1 Piero 5:7; Tiago 4:8.

Sarà che Gesù e Dio i ze la medèsima persona?

Gesù no l’è mia Dio. Gesù l’è stà el ùnico che Geovà el ga creà lu sol. Par quela, Gesù l’è tanto spessial e la Bìblia lo ciama de Fiol de Dio. (Gioani 20:31) Geovà el ga doperà Gesù come “un laorador speriente” e insieme lori i ga creà tute le altre robe e persone. — Proverbi 8:30, 31; Colossensi 1:15, 16.

Gesù mai el ga dito che l’era Dio. Invesse, el ga dito che el rapresentea a Dio e che l’è stà Lu che lo gavea mandà. (Gioani 7:29) Quando Gesù l’era insieme a un dei so dissìpoli, lu el ga dito: ‘Geovà l’è el me Pare, che anca l’è el vostro Pare’, e el ‘me Dio, che anca l’è el vostro Dio’. (Gioani 20:17) Dopo che l’è morto, Geovà lo ga ressussità par viver nel cielo dela so banda e ghe ga dato tanta autorità. — Mateo 28:18; Ati 2:32, 33.

Gesù el pol giutarte a esser amigo de Dio

Gesù l’è vegnesto ala Tera par insegnar sora el so Pare. Geovà el ga dito: ‘Questo l’è el me Fiol, el amà. Scoltélo’. (Marco 9:7) Nissuni i cognossi a Dio come Gesù lo cognosse. Lu el ga dito: “Sol el Pare el cognosse el Fiol e sol el Fiol el cognosse el Pare e a quel che el Fiol el vol che i lo cognossa.” — Luca 10:22.

Gesù el ga le medèsime qualità de Dio. Lu el ga fato pròpio compagno ale qualità de so Pare. Gesù el ga dito: “Quel che el ga visto a mi el ga visto anca al Pare.” (Gioani 14:9) Gesù el mostrea pròpio el amor del so Pare in quel che el fea e disea e, par quela, el giutea le persone a esser amighe de Dio. El ga dito: “Mi son la strada, la verità e la vita. Nissun riva al Pare se nò par meso de mi.” (Gioani 14:6) Lu anca el ga dito: “I veri adoradori i adorarà el Pare con spìrito e in verità, parché el Pare l’è drio ndar in serca de questi par adorarlo.” (Gioani 4:23) Geovà l’è drio ndar in serca de persone che vol imparar la verità sora lu, come ti!