Fìdate nel Regno de Dio, la cità che la restarà

1. Cossa che Gesù el ga dito che sucederia in Gerusalen?

UN PER de giorni vanti dela so morte, Gesù el ga parlà coi so dissìpoli sora una professia. Lu el ga dito che el esèrsito romano ndaria ‘acampar intorno de Gerusalen’ e che dopo la cità e el témpio i saria finidi fora. (Luc. 21:20) Gesù anca el ga dito che quando i so dissìpoli i vedesse quel esèrsito, lori suito i gavaria de scampar via. Questo ga pròpio sucedesto quando el esèrsito romano ga acampà intorno de Gerusalen. — Luc. 21:21, 22.

2. Che consìlio Paolo el ga dato ai fradei che i era de star nela Giudea e in Gerusalen?

² Arquanti ani vanti che el esèrsito romano el acampesse intorno de Gerusalen, el apòstolo Paolo el ga scrito una carta ai so fradei giudei. Ancoi la cognossemo come el libro de Ebrei. In questa carta, Paolo el ga dato consìlio ai so fradei che li giutaria a infrontar le dificoltà che le vegnaria. Cossa che ndaria suceder? Gerusalen la saria finida fora. Alora, quei giudei i gavaria de assar indrio la so casa e i so laori se i volea seitar vivi. Par quela che Paolo el ga scrito: ‘Noantri no ghemo qua una cità che la restarà, ma spetemo premosi par quela che la vegnarà.’ — Ebr. 13:14.

3. Cossa che la ze “la cità che la ga una vera fondassion”, e parché che se fidemo in questa cità?

³ In quela època le persone le ga ridesto drio i dissìpoli de Gesù che i ga scampà de Gerusalen e dela Giudea. Ma quei dissìpoli i ga salvà la so vita parché i ga obedio. Ancoi, pol esser che i altri i ne ride drio parché no se fidemo nei soldi gnanca se fidemo che le persone le finirà coi nostri problemi. Noantri spetemo “la cità che la ga una vera fondassion” e che la vegnarà, o sia, el Regno de Dio.a (Ebr. 11:10; Mat. 6:33) Ma parché che pensemo cossita? Parché savemo che presto el Regno de Dio ndarà finir fora con questo bruto mondo. In questo stùdio ndaremo imparar: (1) come che i consili de Paolo i ga giutà i dissìpoli de Gesù del passà a fidarse nela ‘cità che la vegnaria’, (2) come che Paolo li ga giutadi a scampar dela destrussion de Gerusalen, e (3) come che i consili de Paolo pol giutarne ancoi.

FÌDATE IN QUEL CHE MAI NDARÀ ABANDONARTE

4. Parché che Gerusalen la era una cità importante par i primi dissìpoli de Gesù?

⁴ Gerusalen la era una cità tanto importante par i primi dissìpoli de Gesù. Parché? Parché la prima congregassion la gavea scominsià in quela cità, nel ano 33, e i fradei del corpo governante i era de star lì. Arquanti dissìpoli de Gesù i gavea case e i gavea imucià su capital in quela cità. Ma ancora cossita, Gesù el gavea dito ai so dissìpoli che lori i gavaria de scampar via de Gerusalen e anca dela Giudea. — Mat. 24:16.

5. Come che Paolo el ga parecià i so fradei par quel che ndaria suceder in Gerusalen?

⁵ Paolo el volea pareciar i so fradei giudei par quel che ndaria suceder in Gerusalen. Par quela, lu li ga giutadi a capir cossa che Geovà el pensea sora quela cità. Par esémpio, lu li ga ricordadi che Geovà no’l acetea pi el laoro che i sasserdoti i fea nel témpio gnanca i sacrifissi che i fea lì. (Ebr. 8:13) Quasi tute le persone de quela cità no le gavea credesto nel Messia, e anca nissun gavaria pi de ndar a Gerusalen par adorar a Geovà. Alora, Gerusalen e el témpio i saria finidi fora. — Luc. 13:34, 35.

6. Parché che i dissìpoli de Gesù i gavea bisogno dei consili che Paolo ghe gavea dato in Ebrei 13:5, 6?

⁶ Quando Paolo el ga scrito la so carta ai Ebrei, tante persone le ghe piasea visitar Gerusalen e ndar de star lì. Un scritor romano de quela època el ga dito che Gerusalen ‘la era la cità pi bela de quel posto e che tante persone la cognossea’. Tuti ani, giudei de tanti posti difarenti i ndea lì nela època dele festività e i guastea tanti soldi. Alora, pol esser che fin arquanti dissìpoli de Gesù i ga impienio le scarsele de soldi. Fursi l’è stà par quela che Paolo el ghe ga scrito: “La vostra maniera de viver la ga de mostrar che no amé mia i soldi. Sté contenti cole robe che valtri gavé.” Dopo, Paolo el ghe ga ricordà dela bela promessa che Geovà el gavea fato: “Mi mai vao assarte e mai vao abandonarte.” (Ledi Ebrei 13:5, 6;b Deu. 31:6; Sal. 118:6) I dissìpoli de Gesù che i era de star in Gerusalen e nela Giudea i gavea de esser sicuri de questa promessa. Parché? Parché presto lori i gavaria de assar indrio le so case, i so laori e quasi tute le robe che i gavea, e scominsiar una nova vita in nantro posto. Questo no saria mia fàcile.

7. Parché che ghemo de imparar a fidarse del tuto in Geovà belche adesso?

⁷ Cossa che noantri imparemo? Presto scominsiarà la “granda tribolassion” e questo bruto mondo de ancoi el sarà finio fora. (Mat. 24:21) Compagno i primi dissìpoli de Gesù, noantri ghemo de star atenti e esser pareciadi. (Luc. 21:34-36) Parché? Parché nela granda tribolassion fursi ne tocarà assar indrio la nostra casa e tuto quel che ghemo, e gavaremo de fidarse del tuto che Geovà mai el ndarà abandonar el so pòpolo. Ma belche adesso podemo mostrar che se fidemo in Geovà. Alora, domàndate: ‘Sarà che le me dessision e quel che mi penso de far nel futuro mostra che mi me fido in Geovà invesse nei soldi?’ (1 Tim. 6:17) L’è vero che podemo imparar tanto coi primi dissìpoli de Gesù. Ma ghemo de ricordarse che la granda tribolassion la sarà ancora pi bruta de quel che lori i ga infrontà. Alora, come savaremo cossa far quando la scominsiarà?

OBEDISSI A QUEI CHE GEOVÀ EL GA SCOLIESTO PAR TENDERNE

8. Cossa che Gesù el ga dito che i so dissìpoli i gavaria de far?

⁸ Un per de ani dopo che Paolo el ga scrito la carta ai Ebrei, i esèrsiti de Roma i ga acampà intorno la cità de Gerusalen. I dissìpoli de Gesù i savea che i gavaria de scampar via parché Gerusalen la saria finida fora. (Mat. 24:3; Luc. 21:20, 24) Gesù el ghe gavea dito: “Quei che i ze nela Giudea i gavarà de scampar via par i monti.” (Luc. 21:21) Ma come ghen’era tanti monti intorno a Gerusalen, par ndove lori i gavaria de ndar?

9. Parché fursi i dissìpoli de Gesù i se domandea par ndove i gavaria de scampar via? (Varda anca el mapa.)

⁹ Ghen’era tanti monti ndove i dissìpoli de Gesù i era de star. Par esémpio, ghen’era i monti dela Samaria, i monti dela Galilea, el monte Ermon, i monti del Lìbano e anca ghen’era tanti monti de quel’altra banda del Rio Giordon. (Varda el mapa.) Alora, ghen’era tante cità che par i giudei ghe parea bei posti par scampar via. Par esémpio, la cità de Gamla la era sora un grando monte che l’era fadiga de rivarghe. Arquanti giudei pensea che i gavaria protession in quela cità. Ma i romani i ga atacà Gamla e la ga finio fora, e tante persone le ze state copade.c

10-11. (a) Come che Geovà el ga mostrà ai primi dissìpoli cossa che i gavaria de far? (Ebrei 13:7, 17) (b) Cossa che ga sucedesto coi dissìpoli che i ga obedio? (Varda anca la ilustrassion.)

¹⁰ Eusèbio, un studioso del passà, el ga scrito sora quel che ga sucedesto in quela època. Lu el ga dito che Dio el ga doperà arquanti bravi òmini in Gerusalen par dir a tuti i dissìpoli de Gesù che lori i gavaria de scampar via e ndar a Pela, una cità dela Perea. Cossita capimo che Geovà el ga doperà arquanti bravi fradei che i tendea dele congregassion par dir cossa che i dissìpoli de Gesù i gavaria de far. Pela l’è stà un bel posto par quei dissìpoli sconderse. Come quela cità la era darente de Gerusalen, l’è stà fàcile de rivarghe. E come Pela no la era una cità de giudei, i romani no i la ga atacada. — Varda el mapa.

¹¹ I dissìpoli de Gesù che i gavea scampà via par i monti i gavea metesto in pràtica el consìlio de Paolo de ‘obedir a quei che i liderea intrà de lori’. (Ledi Ebrei 13:7,d 17.e) Quei dissìpoli i i ga seità vivi parché i ga obedio. Geovà no li ga abandonadi parché lori i se fidea nela “cità che la ga una vera fondassion”, o sia, el Regno de Dio. — Ebr. 11:10.

12-13. Come che Geovà el tende del so pòpolo quando ghen’è dificoltà?

¹² Cossa che noantri imparemo? Geovà el dopera bravi òmini par dir al so pòpolo quel che i ga de far. Nela Bìblia, vedemo tanti esempi de òmini leai che lu el ga doperà par giutar i so servi quando ghen’era dificoltà. (Deu. 31:23; Sal. 77:20) Ancoi, vedemo che Geovà el seita a tender de noantri dela medèsima maniera.

¹³ Par esémpio, in meso la pandemia del COVID-19, ‘quei che i lidera intrà de noantri’ i ne ga dito cossa gavarìssino de far. Questi fradei che i tende del pòpolo de Dio in tuto el mondo i ga dito ai ansiani come seitar a adorar a Geovà e a far le riunion. Poco tempo dopo che ga scominsià la pandemia, ghemo bio congressi par la internet, television e ràdio in de pi de 500 léngue. In quela bruta època ghemo bio quel che ne ocorea par seitar a adorar a Geovà. Cossita, semo stati boni de seitar unidi. Alora, ghemo de esser sicuri che no importa le dificoltà che vegnarà fora, Geovà el seitarà doperar òmini leai par giutarne a saver cossa che ghemo de far. Par esser pareciadi par la granda tribolassion, ne ocore fidarse in Geovà e obedirghe ale so orientassion. Ma che altre qualità ne ocore mostrar?

MOSTRA BONTÀ E AMOR COME DE FRADEI

14. De acordo con Ebrei 13:1-3, che qualità i primi dissìpoli de Gesù i gavaria de mostrar vanti dela destrussion de Gerusalen?

¹⁴ Quando scominsiarà la granda tribolassion, gavaremo bisogno de mostrar ancora de pi amor un al altro. Gavaremo de far compagno i primi dissìpoli de Gesù che i era de star in Gerusalen e nela Giudea. Lori sempre i ga mostrà amor un al altro. (Ebr. 10:32-34) Ma prima che Gerusalen la fusse finida fora, quei dissìpoli i gavaria de mostrar bontà e amarse ancora de pi, con “amor come quel de fradei”.f (Ledi Ebrei 13:1-3.g) Suito, anca noantri gavaremo de far la medèsima roba quando scominsiarà la granda tribolassion.

15. Come che i dissìpoli giudei i ga mostrà amor e bontà dopo che i ga scampà via?

¹⁵ El esèrsito romano gavea acampà intorno a Gerusalen e de colpo el ze ndato via. Alora, i dissìpoli de Gesù i ga podesto scampar via, ma no i ze stati boni de portar tante dele so robe. (Mat. 24:17, 18) Lori i ga bio el aiuto un del altro par far quel viaio fin i monti e scominsiar la so vita là. Tanti de quei fradei e sorele i ga bio bisogno de magnar, robe de meter su e aiuto par catar un posto de star. Lori i ga mostrà che el so amor l’era tanto forte parché i se ga giutà un al altro quando i ga spartio intrà de lori quel che i gavea. — Tito 3:14.

16. Come che podemo mostrar amor ai nostri fradei e sorele quando i ga de bisogno? (Varda el ritrato.)

¹⁶ Cossa che noantri imparemo? Noantri amemo i nostri cari fradei e sorele e volemo giutarli quando ghe ocore. Par esémpio, quando sucede una desgràssia dela naturesa o guere, giutemo de volentiera quei che i ga de scampar via de ndove i ze. Noantri ghe demo le robe che i ga de bisogno e anca li incoraiemo a seitar servir a Geovà. Una sorela dela Ucrània che la ga bio de scampar via dela so casa par causa dela guera, la ga dito: “Go visto che Geovà el ga doperà i me fradei par giutarme con quel che me ocorea. Lori me ga ricevesto tanto ben quando ero nela Ucrània, nela Ungria e anca adesso che son qua nela Alemagna.” Noantri laoremo insieme a Geovà quando mostremo bontà ai nostri fradei e sorele e li giutemo con quel che i ga de bisogno. — Pro. 19:17; 2 Cor. 1:3, 4.

17. Parché che ghemo de imparar a mostrar amor e bontà ai nostri fradei adesso?

¹⁷ Sicuro che nela granda tribolassion gavaremo bisogno de giutarse un al altro ancora de pi. (Aba. 3:16-18) Par quela che belche adesso Geovà l’è drio insegnarne a mostrar amor, bontà e altre qualità che le sarà tanto importante nel futuro.

COSSA CHE NDARÀ SUCEDER?

18. Come che podemo ndar drio el esémpio dei dissìpoli de Gesù?

¹⁸ I dissìpoli de Gesù che i ga obedio, i ze stati boni de scampar via par i monti quando Gerusalen la ze stata finida fora. Lori i ga abandonà quela cità e tuto quel che i gavea, ma Geovà no li ga abandonadi. Come che podemo ndar drio el so esémpio? No savemo de tuto quel che ndarà suceder nel futuro, ma se ricordemo che Gesù el ga dito che ghemo de esser pareciadi e pronti par obedir. (Luc. 12:40) Ghemo anca de obedir i consili che Paolo el ga scrito nela so carta ai Ebrei e podemo ricordarse che Geovà el ga prometesto che mai el ndarà abandonarne. (Ebr. 13:5, 6) Semo sicuri che se seitemo fidarse nel Regno de Dio, gavaremo tante benedission adesso e par sempre. — Mat. 25:34.