STÙDIO 30
CÀNTICO 97 La Parola de Dio la ne giuta a viver
Come che le prime robe che ghemo imparà pol giutarne anca ancoi?
“Mi vui sempre farve ricordar de queste robe, anca se valtri belche le savé e sì forti nei insegnamenti dela verità che gavé imparà.” — 2 PIE. 1:12.
COSSA CHE NDAREMO IMPARAR?
In questo stùdio, ndaremo veder come che le prime robe che ghemo imparà nel nostro stùdio dela Bìblia le pol seitar a giutarne.
1. Come le prime robe che ghemo imparà dela Bìblia ga cambià la nostra vita?
LE PRIME robe che ghemo imparà dela Bìblia ga cambià la nostra vita. Par esémpio, quando ghemo imparà che el nome de Dio l’è Geovà, ghemo scominsià a esser so amighi. (Isa. 42:8) Quando ghemo imparà cossa che sucede dopo dela morte, no semo pi restadi preocupadi se i morti i ze drio sofrir. (Ecl. 9:10) E quando ghemo savesto che la Tera la deventarà un paradiso, no se ghemo pi preocupà col futuro e se ndemo sol viver 70 o 80 ani. Invesse, ghemo scominsià a gaver la speransa de viver par sempre. — Sal. 37:29; 90:10.
2. Parché che Piero el ga ricordà i fradei le prime robe che i gavea imparà dela Bìblia? (2 Piero 1:12, 13)
2 Ma noantri no ghemo mai de desmentegarse dele prime robe che ghemo imparà nel stùdio dela Bìblia. Piero el savea che questo l’era tanto importante. Lu el ga scrito a fradei che i era belche “forti nei insegnamenti dela verità”, o sia, persone che servia a Geovà fea tanto tempo. (Ledi 2 Piero 1:12, 13.a) In quela època, ghen’era persone nela congregassion che le insegnea busie par proar intrigar i fradei de servir a Geovà. (2 Pie. 2:1-3) Alora, Piero ghe ga ricordà dele prime robe che i gavea imparà dela Bìblia. Parché? Parché el savea che queste verità ndaria giutar i fradei a gaver una fede pi forte, a dàrghene fora con quela situassion e a seitar leai a Geovà.
3. Parla de una ilustrassion che ne giuta capir come che le prime robe che ghemo imparà pol giutarne anca ancoi.
3 Anca se noantri servimo a Geovà fà tanti ani, podemo seitar a imparar cole prime verità dela Bìblia. Par capir meio femo una ilustrassion. Proa pensar nte una persona che la ze belche brava de far de magnar e una che ga scominsià adesso. Lore le pol doperar le medèsime robe par far de magnar. Ma, quela che la ze belche brava la ze bona de far magnar ancora pi boni e difarenti. La medèsima roba la sucede con quei che i serve a Geovà fà tanti ani e quei che i ga scominsià adesso. Tuti i due i ga imparà le medèsime verità, ma quei che i serve a Geovà fà ani i ga belche imparà tante lession de quele prime verità. Dopo che semo stati batesadi, pol esser che la nostra vita la ga cambià tanto e che ghemo belche fato tanti laori nela organisassion. Ma queste prime verità che ghemo imparà le ga seità a giutarne in tute queste situassion. Adesso, ndaremo veder tre verità dela Bìblia che ghemo imparà là nel scomìnsio e cossa che le ne insegna.
GEOVÀ L’È EL CREADOR
4. Come te te senti de saver che l’è stà Geovà che te ga fato?
4 Noantri savemo che la Tera e tute le robe che ghen’è qua le ze state fate par una persona che ga sabedoria e poder. La Bìblia la dise che l’è stà ‘Dio che ga fato tute le robe’. (Ebr. 3:4) Ma noantri podemo imparar tante altre bele robe de questa verità. Par esémpio, capimo che Dio el ne cognosse tanto ben, el se preocupa con noantri e el sa quel che ne fà felici. Alora, capir che Geovà el ne ga creà ga cambià la nostra vita par meio e ne ga fato esser felici.
5. Che verità dela Bìblia ne giuta a esser ùmili? (Isaia 45:9-12)
5 Saver che Geovà el ne ga creà anca ne giuta a esser ùmili. Par esémpio, par un tempo, Giò el ga pensà tanto in lu stesso e in quel che i altri i disea che el ga fin parlà robe sbaliade sora Geovà. Alora, Geovà el ghe ga ricordà che lu l’era el Dio Tuto Poderoso. (Giò 38:1-4) Cossita, Giò el ga capio che Geovà sempre el fà tuto giusto. E quel che Isaia el ga scrito un tempo dopo ne giuta a capir che mai ghemo de pensar che savemo de pi che Dio. Lu el ga scrito: “Sarà che el baro el pol dir al Olero: ‘Cossa sito drio far?’” — Ledi Isaia 45:9-12.b
6. Quando che fursi un fradel el ga de fermarse e pensar che l’è Geovà che el ga sabedoria e poder? (Varda anca la ilustrassion.)
6 Quando un fradel o una sorela serve a Geovà fà tanti ani, pol scominsiar a fidarse tanto in quel che el pensa invesse de ndar drio a quel che Geovà e la Bìblia dise. (Giò 37:23, 24) Se una roba cossita sucede con noantri, ghemo de fermarse e ricordarse che l’è Geovà la persona che ga de pi sabedoria e poder. (Isa. 40:22; 55:8, 9) Alora, questa verità ndarà giutarne a seitar ùmili e a fidarse che l’è Geovà che el sa tute le robe.
Cossa che pol giutarte a ricordarte che quel Geovà el pensa l’è meio de quel che ti te pensi? (Varda el paràgrafo 6.)g
7. Cossa che Rahela la ga fato par acetar una nova orientassion dela organisassion?
7 Ricordarse che Geovà l’è el Creador ga giutà Rahela, che la ze de star nela Slovénia, a acetar una nova orientassion dela organisassion. Ela la ga dito: “Dele volte, no l’è fàcile acetar le orientassion nove. Par esémpio, me ga sucedesto una roba cossita quando go visto el Relatòrio del Corpo Governante (2023) — n.º 8 che parlea sora la barba. La prima volta che go visto che un fradel l’era drio far un discorso de barba me parea una roba sbaliada. Alora, mi go pregà a Geovà e ghe go domandà che el me giutesse a acetar questo cambiamento.” Rahela la ga capio che Geovà, che l’è el Creador del cielo e dela Tera, el sa la meio maniera de orientar la so organisassion. Anca par ti, dele volte l’è fadiga acetar una nova orientassion dela organisassion? Alora, te toca esser ùmile e torte el tempo par pensar sora el poder e la sabedoria de Geovà. — Rom. 11:33-36.
DIO NO’L FÀ LE PERSONE SOFRIR
8. Parché che l’è stà bon par ti capir che Dio no’l fà le persone sofrir?
8 Tanti no i capisse parché Dio el assa che le persone le sofre. Par quela, lori i resta cativi con lu o fin i assa de creder che ghen’è un Dio. (Pro. 19:3) Ma noantri ghemo imparà nela Bìblia che sofrimo parché ghemo el pecato e semo imperfeti. Noantri anca ghemo imparà che Dio l’è drio mostrar passiensa e l’è drio darghe tempo ale persone par cognosserlo e imparar che no ghen sarà pi sofrimento nel futuro. (2 Pie. 3:9, 15) Imparar queste verità ne consola tanto e ne fà gaver una forte amicìssia con Geovà.
9. Quando che l’è bon pensar parché che Geovà el assa le persone sofrir?
9 Noantri savemo che ghemo de portar passiensa intanto che spetemo che Geovà el finissa col sofrimento. Ma quando infrontemo dificoltà, podemo restar disgustadi e pensar che Geovà l’è drio meterghe massa par finir col sofrimento. (Aba. 1:2, 3) Par esémpio, podemo sentirse cossita quando qualchedun che amemo more, o noantri o una persona dela nostra fameia sofre o l’è tratà sensa giustìssia. Alora, noantri gavarìssino de ricordarse parché che Geovà el assa che le persone bone le sofra.c (Sal. 34:19) Noantri anca ghemo de pensar sora la promessa de Geovà de finir fora con tute le robe che ne fà tribolar.
10. Cossa che ga giutà Anne quando la so mare la ze morta?
10 Quando capimo parché che Geovà el ne assa sofrir, semo boni de dàrghene fora cole dificoltà. Varda cossa che Anne, che la ze de star nela ìsola de Mayotte, la ga dito: “Un per de ani indrio, la me mama la ze morta e mi son restada tanto triste. Ma mi seito a pensar che Geovà no’l ga mia la colpa, che lu l’è premoso de finir fora con tuto quel che ne fà sofrir e che el va ressussitar quei che amemo. Pensar in queste verità me fà sentir tanta pace.”
11. Cossa ghemo voia de far dopo de capir parché Geovà l’è drio portar passiensa?
11 Quando capimo parché Geovà l’è drio portar passiensa e l’è drio assar le persone sofrir, ghemo ancora pi voia de predicar. El apòstolo Piero el ga dito che tanti i pol ciamarse grami e esser salvi par causa dela passiensa che Geovà l’è drio mostrar. Dopo lu el ga dito: “Penséghe sora che tipo de persone valtri gavé de esser. Gavé de comportarve de una maniera santa e far robe che dimostre che sì fedeli a Dio.” (2 Pie. 3:11) Noantri podemo mostrar che semo fedeli a Dio quando predichemo. Geovà el ama le persone e el vol che lore le viva par sempre. Alora, lu l’è drio darghe tempo par imparar sora lu. E anca noantri amemo le persone. Par quela, laoremo con Dio nela predicassion par giutar tute le persone che podemo vanti che vegna el fin. — 1 Cor. 3:9.
SEMO DRIO VIVER NEI “ÙLTIMI GIORNI”
12. De cossa semo sicuri dopo de capir che semo nei “ùltimi giorni”?
12 La Bìblia la ga dito come che saria le persone nei “ùltimi giorni”. (2 Tim. 3:1-5) Quando pensemo nela maniera che le persone le fà le robe, vedemo che questa professia la ze drio realisarse. Capir questa verità ne assa sicuri che la Bìblia la ze la Parola de Dio. — 2 Tim. 3:13-15.
13. Che domande ghemo de farse? (Luca 12:15-21)
13 Capir che semo drio viver nei ùltimi giorni ne fà voler doperar el nostro tempo dela meio maniera. In Luca 12:15-21, Gesù el ga contà una ilustrassion che ne giuta a capir questo. (Ledi.d) In questa ilustrassion, el omo sior l’è stà ciamà de “sensa giudìssio”. Sarà che lu l’è stà ciamà cossita parché el gavea tanti soldi? Nò, l’è stà parché lu el metea i soldi in primo posto nela so vita. Lu el ‘imuciea su richesse par lu stesso, ma no l’era sior ai oci de Dio’. Parché che lu no’l gavea mia de far cossita? Dio el ga dito a quel omo: “Questa note te vè morir.” Cossa che imparemo con questa ilustrassion? El fin de questo bruto mondo l’è darente. Alora, ghemo de domandarse: ‘Sarà che quel che mi vui far dela me vita mostra che capisso quel che l’è pi importante? Cossa che incoraio i me fioi a far dela so vita? Mi dopero el me tempo, la me forsa e i me soldi sol par imuciar su capital o par far el me meio a Dio?’
14. (a) Parché che l’è bon pensar nele prove che semo nei ùltimi giorni? (b) Come che pensar che semo nei ùltimi giorni ga giutà Miki?
14 Quando pensemo nele prove che semo drio viver nei ùltimi giorni, volemo doperar la nostra vita dela meio maniera. L’è stà pròpio questo che ga sucedesto con una sorela de nome Miki. Ela la ga dito: “Quando go finio la scola, mi volea studiar tanto sora le bèstie e laorar con quel lì. Ma mi anca volea esser pioniera regolar e laorar nela predicassion ndove ghe ocorea de pi. Alora, bravi amighi i me ga dito de pensarghe se mi saria bona de far tuti i due laori. Lori i me ga ricordà che el fin l’è darente e che mi podaria studiar sora le bèstie par sempre in Paradiso. Alora, mi go dessidio far corsi che no i tolea tanto del me tempo. Cossita, son stata bona de esser pioniera regolar e dopo cambiarme par el Ecuador par giutar ndove ghe ocorea de pi nela predicassion.” Ancoi, el omo de Miki l’è superintendente e lori due i visita le congregassion in questo paese.
15. Come che el esémpio de Tiago ne giuta a capir che ghemo de seitar a predicar ale persone. (Varda anca la ilustrassion.)
15 Pensar che semo nei ùltimi giorni ne giuta a meterghela tuta nela predicassion, anca quando le persone no le vol mia scoltarne. Noantri savemo che le persone le pol cambiar. Varda el esémpio de Tiago, el fradel de Gesù. Come lu l’è stà slevà con Gesù, lu el ga visto tuto quel che el ga fato e la so bela maniera de insegnar. Ma par tanti ani, Tiago no’l ga volesto esser un dissìpolo. Sol dopo che Gesù l’è stà ressussità che lu l’è deventà so dissìpolo.e (Gio. 7:5; Gàl. 2:9) Alora, no stà desister de predicar a quei dela to fameia e ale persone che fin adesso no le te ga scoltà. Pol esser che lore ancora le cambiarà, fursi dopo che scomìnsia la granda tribolassion.f
Cossa che pol incoraiarte a no desister de predicar ai to parenti? (Varda el paràgrafo 15.)h
SEITA A DAR VALOR A QUEL CHE GEOVÀ EL NE INSEGNA
16. Come che tuto quel che Geovà ne insegna pol giutarne? (Varda anca el quadro “Dopera le verità dela Bìblia par giutar i altri”.)
16 La organisassion la parecia i discorsi che i ze fati nele riunion de fin de stimana, le reviste par el pùblico e arquanti artìcoli e vìdei del jw.org e cossita avanti. Tante de queste robe le ze state fate par persone che le sa pròpio poco sora Bìblia. Ma tuto quel che la organisassion la fà pol giutar anca a noantri a gaver de pi amor par Geovà, pi fede nela Bìblia e a insegnar meio. — Sal. 19:7.
17. Quando che ghemo de ricordarse dele prime robe che ghemo imparà dela Bìblia?
17 Noantri, che servimo a Geovà, restemo contenti quando capimo meio una verità dela Bìblia. Ma noantri anca ghe demo tanto valor ale prime robe che ghemo imparà dela Parola de Dio. Come ghemo visto in questo stùdio, se ne par che quel che pensemo l’è meio che le orientassion che ricevemo, ne ocore esser ùmili e ricordarse che el nostro Creador el ga sabedoria, poder e l’è drio tender dela so organisassion. Ghemo anca imparà che, se noantri o qualchedun che amemo l’è drio infrontar una dificoltà, ghemo de portar passiensa e ricordarse parché che Geovà el assa le persone sofrir. E ghemo anca visto che, quando ndemo scòlier come doperar i nostri soldi e el nostro tempo, ghemo de ricordarse de cossa l’è pi importante nela vita e che semo nei ùltimi giorni. Se femo cossita, gavaremo cada volta de pi sabedoria e seitaremo a servir leai a Geovà.
CÀNTICO 95 Capimo cada volta meio la verità
a (2 Piero 1:12, 13) Par quela che mi vui sempre farve ricordar de queste robe, anca se valtri belche le savé e sì forti nei insegnamenti dela verità che gavé imparà. 13 Ma, intanto che mi son ancora in questo corpo de carne, mi cato giusto farve ricordar de questi consili.
b (Isaia 45:9-12) Guai de quel che el fà una discussion con quel che lo ga fato parché lu l’è sol un toco de un vaso de baro spacà insieme a altri tochi par tera! Sarà che el baro el pol dir al Olero: “Cossa sito drio far?” O sarà che el baro el pol dir: “No te ghè mia le man”? 10 Guai de quel che el dise a un pare: “Cossa che te sì stà bon de far?” e a so mare: “Cossa che l’è drio nasser qua?” 11 Cossita, Geovà, el Santo de Israel, quel che lo ga fato, el dise: “Sarà che valtri podé dir che quel che ndarà suceder l’è sbalià, e dir cossa go de far ai me fioi e come go de far i me laori? 12 Mi go fato la tera e anca el omo par viver sora la tera. Mi go stirà el cielo cole me man e comando tuto el so esèrsito.”
c Varda el stùdio “Speta in Geovà”, nela Sentinela de giugno de 2022, pàg. 20 a 25.
d (Luca 12:15-21) Alora, lu el ghe ga dito: “Mantegné i oci verti e sté atenti a tuti i tipi de ganànsia. Parché anca quando qualchedun el ga tante robe, la so vita no la vien de quel che el ga.” 16 E el ghe ga contà una stòria: “La tera de un omo sior la ga produsio tanto. 17 Par quela el ga scominsià a pensar cossita: ‘Cossa fao adesso che no go ndove meter via quel che togo su dele me racolte?’ 18 Lu el ga dito: ‘Vao far cossita: Trao do i posti ndove meto via i grani, e fao su altri pi grandi par starghe rento tuti i grani e tuto quel che mi go. 19 E vao dir a mi stesso: “Te ghè tante robe bone meteste via par tanti ani. Riposa, magna, bevi, gòdete.’” 20 Ma Dio el ghe ga dito: ‘Sensa giudìssio! Questa note te vè morir. Alora, chi che va gaver le cose che te ghè imucià?’ 21 Cossita sucede cola persona che la imùcia su richesse par ela stessa, ma no la ze siora ai oci de Dio.”
f Varda el stùdio “Come che Geovà el ndarà giulgar le persone nel futuro?”, nela Sentinela de maio de 2024, pàg. 8 a 13.
g ILUSTRASSION: Un ansiano el parla quel che el pensa, ma i altri ansiani no i ze de acordo. Dopo, quel ansiano l’è lu lu sol e el varda le stele in cielo e el se ricorda che quel che Geovà el vol l’è pi importante che quel che lu el vol.
h ILUSTRASSION: Una sorela la stùdia la Bìblia e ela la ze drio leder publicassion che le parla che semo nei ùltimi giorni. Dopo, ela la ciama la so sorela par telèfono par parlarghe sora la Bìblia.