Gheto bio voia de leder la Bìblia, ma te sì stà desanimà come Jovy, Queennie e Ezekiel? Tante persone le pensa che no le sarà mai bone de leder la Bìblia. Ma se te savessi che la Bìblia la pol darte una vita pi felice? E se te savessi che ghen’è maniere de far la to letura dela Bìblia pi interessante? Te gavarissi la voia de saver cossa che la Bìblia la ga par dirte?

Tante persone le ga volesto leder la Bìblia e l’è stà bon par lore. Vedi quel che le ga dito:

Ezekiel, che el ga poco de pi de 20 ani, el ga dito: “Vanti no savea cossa far, l’era come guidar un auto sensa saver ndove ndar. Leder la Bìblia me ga giutà a saver cossa far. I so consili i me giuta tuti i giorni.”

Frieda, che anca la ga 20 e pochi ani, la conta: “Mi era sempre stufa e inrabiada. Ma, quando go scominsià a leder la Bìblia, go imparà a controlarme. Son deventada una persona meio e adesso go de pi amighi.”

Eunice, che la ga de pi de 50 ani, la ga dito cossita dela Bìblia: “Ela la ze drio giutarme a esser una persona meio. Mi gavea de far arquanti cambiamenti, adesso son bona de farli.”

La letura dela Bìblia la ga giutà milioni de persone. Ela la pol giutarte anca ti a gaver una vita meio. (Isaia 48:17, 18) Par esémpio, la pol giutarte a (1) far bone dessision, (2) gaver veri amighi, (3) gaver una vita pi tranquila e (4) el pi importante, saver la verità sora Dio. I consili che ghen’è nela Bìblia i ze de Dio. Se te fè come ela la dise, no te sbaliarè mai. Dio no’l dà mai un consìlio sbalià.

Alora, el importante l’è scominsiar! Cossa che pol giutarte a scominsiar a far questo? Vedi adesso arquante maniere pràtiche che le pol assar la to letura dela Bìblia pi interessante.

Come che ti te pol gaver piaser de leder la Bìblia? E come che te pol imparar tanto de quel che te ledi? Vedemo sinque consili che tanti i ga doperà.

Cata fora un posto tranquilo. Proa catar un posto tranquilo sensa robe che le te disturbe. Giuta tanto leder la Bìblia nte un posto ben ciaro e con ària fresca.

Gàpia voia de imparar. La Bìblia l’è el libro che el nostro Pupà nel cielo el ne ga dato. Par quela, quando te ledi la Bìblia, te ghè de esser come un tatin che scolta el so pupà contarghe una stòria. Se te ghè idee negative dela Bìblia assele de banda. Cossita te vè assar che Dio el te insegne. — Salmo 25:4.

Fà una orassion vanti de leder. Nela Bìblia ghen’è i pensamenti de Dio. Par quela ghemo de bisogno del so aiuto par capir quel che ledemo. El spìrito santo de Dio el pol giutarne. Dio el promete dar “spìrito santo a quei che i ghe lo domanda”. (Luca 11:13) El spìrito santo el pol giutarte a capir come che Dio el pensa e, col tempo, el va giutar la to mente a capir “fin le cose profonde de Dio”. — 1 Corinti 2:10.

Pensa in quel che te ledi. No stà leder sol par leder. Proa imparar de quel che te sì drio leder. Par esémpio, ti te pol domandarte: ‘Che qualità posso imparar de questa persona dela Bìblia? Come che posso meter in pràtica nela me vita quel che go ledesto?’

Gàpia ogetivi. Proa imparar sempre qualcossa dela to letura. Par far questo, te pol gaver arquanti ogetivi. Par esémpio, te podarissi imparar de pi sora la personalità de Dio. Fursi te vol esser una persona meio, un sposo o una sposa meio. Alora, scoli parte dela Bìblia che le pol giutarte a rivar a questi ogetivi.a

Adesso te sè come scominsiar. Alora, cossa che pol giutarte a assar la to letura ancora de pi interessante? Varda arquante idee nel pròssimo artìcolo.

Come che la sarà la to letura dela Bìblia? Sensa piaser o interessante? Ti te pol far la scòlia. Ndemo veder cossa che ti te pol far par assar la to letura pi bela.

Scoli una tradussion dela Bìblia che te pol fidarte e che la sìpia fàcile de capir. Quasi nissuni i ghe piase leder un testo con parole vecie e difìcile de capir. Alora, va in serca de una Bìblia che la gàpia parole sémplisse che le rive fin el to cuor. Ma stà atento de catar una tradussion che te pol fidarte e che la sìpia giusta.a

Dopera le robe moderne. Ancoi ghemo la Bìblia in papel ma anca in forma eletrònica. Te pol leder la Bìblia nela internet o sbassarla par léderla dopo nte un selular, tablet o computador. Se te ledi la Bìblia nte un formato eletrònico anca te pol far bele peschise. Una dele robe che te pol far l’è leder diversi testi bìblichi che i parla del medèsimo assunto. Nantra roba che te pol far l’è far una comparassion del medèsimo testo in difarente tradussion dela Bìblia. Te piase de pi scoltar invesse che leder? Te pol anca scoltar la gravassion dela Bìblia. Tante persone le ghe piase scoltar la gravassion dela Bìblia quando le viaia o quando le ze drio far qualche laoro in casa. Cossa che te cati de doperar queste idee?

Fà peschise. Ghen’è tanti aiuti par quei che i vol far la so letura dela Bìblia pi bela. Par esémpio, ghen’è mapi dei posti ndove che la Bìblia la ze stata scrita. Lì te pol veder ndove che ga sucedesto le robe che te sì drio leder. Cossita, la letura la resta pi interessante. Nantra roba che pol giutarte l’è i artìcoli che i parla dela Bìblia, come questo, o altri che te pol catarli nela session “Cossa insegna la Bìblia” del jw.org.

Te pol leder la Bìblia de altre maniere. Te resti desanimà sol de pensar de leder la Bìblia intiera? No ocore che te scominsi nel libro de Génesi. Te pol scòlier una parte dela Bìblia che te piaseria saver de pi. Par esémpio, cossa càtito de leder la stòria dele persone che la Bìblia la parla? Te pol catar una idea interessante nel quadro “Cognossi la vita dele persone che la Bìblia la parla”. O te pol leder la Bìblia par assunti. Nantra maniera interessante l’è leder la Bìblia nela òrdine che le robe le ga sucedesto. Cossa che te cati de doperar queste idee?

La Bìblia no la ze come i altri libri. Quel che la dise vien del nostro Creador. (2 Timòteo 3:16) Par quela, el so messàgio el pol giutarne tanto. La Bìblia la dise: “La parola de Dio la ze viva e la ga poder.” (Ebrei 4:12) Gràssie al poder dela Bìblia podemo viver meio de due maniere: la ne dà orientassion par far le robe de tuti i giorni e la ne giuta a cognosser a Dio e le so promesse. — 1 Timòteo 4:8; Tiago 4:8.

La Bìblia la ne dà orientassion par far le robe de tuti i giorni. Questo libro el ga consili che i pol giutarte nela to pròpia vita. Par esémpio:

• Gaver una amicìssia ancora meio coi altri. — Efesi 4:31, 32; 5:22, 25, 28, 33.

• Gaver una bona salute fìsica e emossional. — Salmo 37:8; Proverbi 17:22.

• Saver quel che l’è giusto e quel che l’è sbalià. — 1 Corinti 6:9, 10.

• Gaver quel che ne ocore par viver. — Proverbi 10:4; 28:19; Efesi 4:28.a

Vedi el esémpio de un casal pena maridà dela Àsia che el ghe dà tanto valor ai consili dela Bìblia. Come tanti casai pena maridadi, anca lori i gavea tanta dificoltà de capir le difarense intrà de lori e gaver una bona comunicassion. Cossa che li ga giutadi? Meter in pràtica i consili dela Bìblia. El sposo, Vicent, el ga dito: “Quel che go ledesto nela Bìblia me ga giutà a infrontar le dificoltà del nostro matrimònio de maniera amorosa. Dopo che ghemo scominsià a meter in pràtica i consili dela Bìblia, la nostra vita insieme la ze deventada meio.” La so sposa, Annalou, la ga dito: “I esempi che ghen’è nel Bìblia i ne ga giutà tanto. Adesso semo felici col nostro matrimònio e mi son contenta coi ogetivi che ghemo.”

La Bìblia la te giuta a cognosser a Dio. Vicent el ga capio che la Bìblia no lo ga giutà sol nel so matrimònio. Lu el ga dito: “Leder la Bìblia ne ga giutà a rivar darente de Geovà Dio pi che mai.” Leder la Bìblia va giutarte anca a ti. Seghir i consili de Dio te darà una vita meio adesso e te vè deventar so amigo. Anca, te ndarè imparar sora el futuro: Dio el promete darne la “vera vita” che la ndarà durar par sempre. (1 Timòteo 6:19) Questa la ze una roba che no la catemo mia in nissun altro libro.

Anca ti te pol gaver una vita meio adesso e imparar sora Dio. Par quela te ghè de scominsiar a leder la Bìblia e no fermarte. Intanto che te ledi, pol vegner fora dubi. Questo ga sucedesto con un omo che el ga vivesto intorno de due mila ani indrio. Lu l’era un omo importante dela Etiòpia e el gavea dubi sora quel che l’era drio leder nela Bìblia. Quando i ga domandà a lu se el capia quel che l’era drio leder, lu el ga rispondesto: “Ma come che mi posso capir se no ghen’è qualchedun che me insegne?” Alora, el ga acetà el aiuto de Filipe, un seghidor de Gesù, che el cognossea ben la Bìblia. (Ati 8:30, 31, 34) Quando te ghè dubi, ricòrdate de questo omo importante. Par saver de pi dela Bìblia, domanda un stùdio bìblico nel site jw.org. Ti te pol anca parlar cole Testimònie de Geovà o ndar nte un Salon del Regno pi darente de ndove te sì de star. Alora, ciapa una Bìblia ancoi e assa che la te giute a gaver una vita meio!