Sarà che Dio el se preocupa con ti?

COSSA CHE IMPAREMO DELA MANIERA CHE DIO EL NE GA CREÀ?

La prima ora dopo che nasse un tatin la ze tanto importante par lu e so mama. Parché? Parché el amor e i sentimenti che la mare la scomìnsia a gaver par el tatin ndarà giutarlo a vegner su.a

Parché che una mare la dimostra tanto amor al so tatin pena che el nasse? Par causa dela maniera che semo stati creadi. Jeannette Crenshaw, la maestra de una università, la ga dito che, pena che nasse el tatin, el sentimento dela mare par el so fiol resta cada volta pi forte intanto che ela lo ciapa in brasso, lo varda e la ghe dà de ciuciar. Nantra roba che sucede la ze che la mare la scomìnsia a dar sempre de pi atension al so tatin. Cossita, el so amor par lu el resta sempre pi forte. Parché che l’è bel saver de questo?

Ghen’è un forte amor intrà una mare e el so tatin par causa dela maniera che el nostro amoroso Creador, Geovà Dio, el ne ga fato.b El rè Davi el ga dito che l’è stà Dio che ‘lo ga fato nasser’ e che ‘ghe ga fato sentir protession nei brassi dela so mare’. Davi el savea che Geovà lo gavea tendesto de quando lu l’è nassesto. — Salmo 22:9, 10.

PENSAGHE SORA: Dio el ga creà la mare con forti sentimenti par el so tatin par esser sicuro che ela lo tenderia ben. Alora, podemo esser sicuri che Dio el se importa con cada un de noantri, parché semo ‘so fioi’. — Ati 17:29.

COSSA CHE LA BÌBLIA LA INSEGNA?

Gesù Cristo el cognosse tanto ben el Creador. Lu el ga dito: “No se vende due pardai par una moneda de poco valor? Ma, gnanca un de questi el va cascar par tera sensa che el vostro Pare el sàpia. Ma fin tuti i cavei dela vostra testa i ze contadi. Alora no sté gaver paura; valtri valé de pi che tanti pardai.” — Mateo 10:29-31.

Poche persone le ghe bada a cada pìcolo oseleto che ghen’è. Manco ancora quando un de lori el casca in tera. Ma Dio l’è atento a cada un de lori e, par lu, le persone le val de pi che tanti oseleti. Alora, te pol esser sicuro che Dio el se importa con quel che te sì drio infrontar. ‘No stà gaver paura’, parché Dio el se preocupa tanto con ti!

La Bìblia la dise

• ‘Geovà el vede tuto. Lu el vede i rugni e i boni.’ — PROVERBI 15:3.

• “I oci de Geovà i vede quei che i ze giusti, e le so récie le scolta quando i ghe domanda el so aiuto.” — SALMO 34:15.

• “Gavarò una granda alegria par causa del to amor leal, parché ti te vedi la me aflission. Ti te cognossi la me granda tristessa.” — SALMO 31:7.

“MI PENSEA CHE GEOVÀ NO’L ME AMEA”

Dio el ne ama e l’è atento a cada un de noantri. Parché che l’è bon saver de questo? Una dona dela Inglatera, che la ga nome Katia,c la ga dito:

“Tante volte mi sentia che Geovà no’l me amea e no’l scoltea ale me orassion. Mi pensea che l’era cossita parché mi gavea poca fede. Mi catea che Dio no’l se importea con mi, che lu l’era drio castigarme e che el me gavea abandonà.”

Ma adesso Katia la ze sicura che Dio la ama e che el se preocupa con ela. Cossa che la ga giutada? Ela la spiega: “Pin pianeto, go cambià la me maniera de pensar. Me ricordo de un discorso dela Bìblia che go scoltà tanti ani indrio sora el sacrifìssio de Gesù. Questo discorso me ga giutà a esser sicura che Geovà el me ama. E, tante volte, quando mi vedea che Geovà el rispondea ale me orassion, mi scominsiea a piander, parché me assea sicura che Geovà el me ama pròpio. Studiar la Bìblia e ndar ale riunion me ga giutà a imparar de pi sora Geovà, le so qualità e quel che lu el sente par noantri. Adesso mi son sicura che Geovà el ne ama e el vol tanto tender de cada un de noantri.”

Quel che Katia la ga dito ne incoraia tanto. Ma come che te pol esser sicuro che quel che te senti l’è importante par Dio e che lu el te capisse? El pròssimo artìcolo el ndarà risponder a questa domanda.