Outubro

Ikwaha sintxipale hiyo ninnaakhela miruku mmarehereroni mwa Yehova, seiyo sinkhuma wa asitokweene a mmulokoni, asitokweene a esirkwiitu, sinkhuma ofiliyaale, naari Mukuttula Woolamulela onnivahaaya, seiyo sinnikhavihera woona moota woomukokhorela Yehova. Vanonto, nankha wakhala weera ikwaha ikina khanniiwexexa miruku naakhenlaahu? Hiyo pooti opatxera ohovela wakhala weera miruku iyo ti sooreera. Naari hiyo pooti opatxera owehexexa ohimalela wa asinna awo envaha miruku. Vaavo nneettaahu ni nroromelo, ninnaroromela weera Yehova onnawehexexa itthu sootheene ni weera oosuwela itthu ninvirihaahu. yookhumelela aya, ninniiwelela moowaakuveya ni ninnapaka eyo ni moonelo wooreera. (Aheb. 13:17) Ninnasuwela weera wiiwelela wahu onnakumihera wiiraana mmulokoni. (Aef. 4:2, 3) Nnaamweera asinna ennihoolela ereene oohimalela, ninnaroromela weera Yehova onooreeliha wiiwelela wahu. (1 Sam. 15:22) Mwa etempu yooreerela, owo onooreherera itthu sootheene sintthuneya orehereriwa. w25.03 epaax. 23-24 eparag. 13-14

Ninkhala etempu yeeyo sineereyaaya itthu sintxipale! Nenne nxiiye ninnoona iprofesiya sa mBiblyani sikwanelaka. Mwa ntakihero, ninnamoona “mwene a elapo yotá” ni “mwene a elapo yohittó” ewanelaka olamulelo wa elapo yootheene. (Dan. 11:40, enoota) Ninnoona mitthenka sooreera sa Omwene wa Muluku silaleiwaka ni atthu antxipale ennaakhulela mitthenka iyo. (Yes. 60:22; Math. 24:14) Ni ninnaakhela yootxa yoomunepani yintxipale mwa “ehuhu yophwanela.” (Math. 24:45-47) Yehova onnavirelela onikhavihera wiiwexexa nnene sene itthu sitokweene sinrowa okhumelela. (Mir. 4:18) Hiyo pooti ororomela weera vaavo maxupo matokweene enrowaaya opatxera, nnoorowa osuwela itthu sootheene nintthuneyaahu osuwela weera niwere ovilela moororomeleya ni okhala oohakalala mpuwa mwa etempu eyo yooxupa. Nto, onnatthuneya osuwela weera sookhala itthu ikina nihisuwenlaahu woohima sa muhoolo. w24.05 epaax. 8 eparag. 1-2

Davidi ohuuluma voohima sa wootha. Wootha ti heeni? Wootha onhela mpuwa wuuluma itthu soowootha voohima sa mutthu mukina, seiyo sinkela onanariha mikhalelo sawe. Nave-tho Nsalmu 15:3, ninnanuupuxera weera aletto a Yehova khenaapakela itthu soonanara atthu akina naari khenwaaluxa naari owuulihiha muru asinthamwene aya. (Nsal. 15:1) Eyo entthuna ohima eheeni? Apaale moohilakela hiyo pooti opatxera omwaaluxa mutthu nihimaka itthu seethiru voohima sa mutthu owo. Muupuwele itthu iya: (1) murokora mmoha ohiñye okhala pioneira, (2) ntheli nimoha nikhumme oBetheli, naari (3) munna ohiñye okhala mutokweene a mmulokoni ni murumeyi ookhavihera. Waamurowa okhala woonanara wakhala weera hiyo naamukhala nuulumaka weera asinna ala apaale yookhala etthu epankaaya yoonanara, mwaha wa yeeyo yohaakhumelela etthu eyo. Moohihovela, sookhala itthu sintxipale nihinsuwelaahu. Tivawonto, muletto a Yehova toole “ohinamwèrela sonanara mukhw’awe, nari ohinamwàluxa namwattamanan’awe.” w24.06 epaax. 11 eparag. 11-13

Weera ninnuwihere mukhalelo wa omoova wahu Yehova, nintthuneya omusiveliha mwa soothanla sootheene nimpakaahu. Emaara munsomaanyu sooweereya sa mBiblyani, mwiikoheke ha, ‘Waakhanle weera kinnaviriha mukhalelo ola, yoothanla heeni kaarowaaka opaka?’ Mwa ntakihero, muupuwele weera munniiwa mitthenka sookhulumula sa anamahottela ale 10 a wIsraeli yuulumaaya ehottelakaru elapo Yehova alaihenraawe waavaha ana a Israeli. Nyuwo mwaamwaakhulela mitthenka iyo sookhulumula seiyo saahela mpuwa omoova mutthu, naari omusivela wanyu Yehova ni otthuna wanyu omusiveliha waamukhala wa vasuluxa? Muloko wootheene wa ana a Israeli khiwaakhulenle ekhaikhai yeeyo Yehoxuwa ni Kalebi yuulummaaya. Mwaha wa yeeyo, awo yaahiyeleela eparakha yoovolowa elapo yoolaiheriwa. — Nam. 14:10, 22, 23. w24.07 epaax. 10 eparag. 7

Gomeri mwaarawe mprofeti Hoseya, aamuhiya Hoseya anakhala ni mulopwana mukina. Neereke mwaarawe owo khaarowa ophwanya nikhavihero? Yehova, yoowo onweha mirima, aamweerenle ha Hoseya: “Orowe tho ni omutthune muthiyana onamutthuna mulopwana mukina ni onèttela oraruwa, ntoko Yahvéh onàtthunaiye ana a Israeli, nari ala erukunuwelaka miluku sikina.” (Hos. 3:1; Mir. 16:2) Moone weera nlelo amwaarawe Hoseya yeera epakaka yoottheka etokweene. Menento Yehova aamuleela Hoseya weera awaakhelele veeli ni aalevelele nave atthikele okhala oowiiraana naawo. Moolikana ni eyo, Yehova khaanyanyanle atthu awe yaawo yaamurukunuwela. Nnaamweera awo yaapaka soottheka itokweene, owo nlelo annaasivela ni annawaakhela ni waakhavihera weera ettharuwe ni otxentxa iphiro saya. Ntakihero nna nintthuna ohima weera Yehova yoowo ‘onweha mirima’ onoorowa omukhavihera mutthu nlelo ompaka yoottheka etokweene ni omweeriha owo ottharuwa. w24.08 epaax. 10 eparag. 7

Akristu yaakhala oYuda, yaahiviriha maxupo matokweene. Emaara emoharu, aYuda ale yaari atthu oothanliwa ni Yehova. Yerusalemu yaari esidade ya Omwene wa Muluku ni etemplu yaari mathipelo a okokhorela weekhaikhai. Ayuda ootheene oororomeleya yannatthara malamulo a Mose, ntoko yaahimmwaaya ni ahooleli aya a ittiini. Sooxuttiha iyo sannakumihera malamulo a moota yoonelaaya wiineliwa ni moota yaawoonelaaya ale yahaakhanle aYuda. Menento akhwaakaru Yesu, Yehova khaawaakhulela amakeya aYuda yaapakaaya. Awo yaari maxupo aYuda ale yaavirihaaya, mwaha wooweera yaakhovelela otthara malamulo a Mose. (Aheb. 10:1, 4, 10) Nave-tho akristu akina oolipa ntoko murummwa Pedru yannawanano weera yiikhovelelihe matxentxo ale manyowani. (Mit. 10:9-14; Agal. 2:11-14) Mwaha wa sookhovelela saya inyowani, akristu ale yannatthara-tthariwa ni ahooleli a ittiini sa aYuda. w24.09 epaax. 9 eparag. 4

Ikwaha sootheene Yehova onaavahaawe atthu awe muteko, owo onweherera weera muteko owo opakiweke moorehereya. (1 Akor. 14:33) Mwa ntakihero, Muluku taatthunne weera mitthenka iya sooreera silaleiwe elapo yootheene. (Math. 24:14) Nave Yehova oonvaha Yesu muritti woohoolela muteko ola, nave tho Yesu onnawehexexa weera muteko ola ovariweke moorehereya. Eseekulu yoopatxera saahikhala miloko soorehereya ni yaathanliwa asitokweene weera evaheke miruku ni ehooleleke. (Mit. 14:23) Eseekulu yoopatxera, oYerusalemu, egrupu emoha ya arummwa ni asitokweene yannapaka soothanla seiyo saarowa otthariwaka ni miloko. (Mit. 15:2; 16:4) Yookhumelela aya ti yooweera “[miloko] sànalipa mowiwelelani, muloko aya wànatepa wantxerereya nihiku ti nihiku.” — Mit. 16:5. w24.04 epaax. 8 eparag. 1

Nihiku na 16 a Nisani oxeexelo, asithiyana antxipale oororomeleya yaarowa nipuro Yesu aavithinwaawe. (Luka 24:1, 10) Harowe nthokorore yooweereya ya muthiyana mmoha, Maria Madalena. Vaavo Maria aaphiñyaawe omahiye, khaaphwannyewo etthu. Owo moowaakuveya aarowa omuleela Pedru ni Yohani ni alopwana ala eeli yaatthimakela omahiye, nave Maria aahaatthara. Yoonelelakaru weera khiyaakhanlewo etthu omahiye, alopwana ale yaatthikela owaani, mene Maria hooye, owo aahala inlaka. Owo khaasuwela weera Yesu annamoona. Yesu annoona winla wa muthiyana ola oororomeleya ni ammorela ikharari, mwa yeeyo, owo aahiisoonihera wa Maria ni aapakavo etthu yaamulipinhe vantxipale Maria. Owo anvaha muritti wootepa otthuneya, waaleela asinna awe woohima sa ovinyererihiwa wawe. — Yoh. 20:17, 18. w24.10 epaax. 13 eparag. 7

Mose aavara ntoko mprofeti, mphuki, muhooleli ni namathola-thola. Owo aahaahoolela ni waakumiha ana a Israeli wookaporoni wExipitu ni aahoona ni maitho awe miiriira sintxipale sa Yehova. Yehova aahinvarihela weera alepe iliivuru 5 soopatxera sa mBiblyani, onnooneya-tho weera Nsalmu 90 ni 91. Pooti-tho weera ti yoowo olempe eliivuru ya Yobi. Ahalelaka okhwa, vaavo aaraaweno iyaakha 120, Mose aahaawopa ana a Israeli ootheene weera awuupuxere itthu yonnaaya ni yaavirinhaaya. Awo yaahoona miiriira sintxipale seiyo Yehova aapankaawe, ohela mpuwa othorihiwa wa Exipitu. (Ott. 7:4) Awo yaavira mooloko wooxeera yoowo waakawanyinwe maahi, nave yaahoona onyaanyiwa wa anakhotto a Farawo. (Ott. 14:29-31) Weeheweheweni, awo yaahoona moota Yehova aakhaviheraawe. (Ola. 8:3, 4) Vano, weera evolowe elapo yoolaiheriwa, Mose aattottela mureerelo eparakha ela yoomalihera weera alipihe muloko ole. w24.11 epaax. 8-9 eparag. 3-4

Etthu Yesu uulummaawe wa arummwa awe mpuwa mwa eyootxa ya ohiyu ya Apwiya ti yoovirikana vantxipale ni etthu aalenlaawe atthu antxipale oGalileya, weiwo uulumaawe ni muloko mutokotoko wa atthu. Vaavo Yesu aaraawe oGalileya eyaakha ya 32 Kristu awiiyeene, owo uuluma otepaxa wene ni ayuda yaawo yaatthuna epaawu awe. Menento, owo aahuuluma etthu yootepa otthuneya opwaha yootxa yoowooneya, owo aahuuluma etthu yeeyo yaarowa oweeriha ophwanya ekumi yoohimala. Ni Yesu ahaaleela weera atthu ale akhwiiye yaamurowa ovinyererihiwa nihiku noomalihera, ni muhoolo mwaya okhalano ekumi yoohimala. Owo khaiyene aahima ekhurupu ekhaanini ya asinna oothanliwa ntoko aapankaawe muhoolo mwaya vaavo aapakaawe yootxa ya Apwiya. Ohiya opaka eyo, oGalileya owo aahuuluma mareeliho atthu ootheene yaarowaaya okhalano. w24.12 epaax. 11 eparag. 10-11

Yehova khonsiveliwa ni mutthu oowali. (Nsal. 11:5) Owo khonsiveliwa ni alopwana enaahasula asaaraya. (Mal. 2:16) Wakhala weera mulopwana khonaathokorora nnene amwaarawe, onthamwene awe ni Muluku onnavoleeliwa. Yehova khaniiwa mavekelo awe. (1 Ped. 3:7) Alopwana akina ennaahasula asaaraya moorweela mwa masu enuulumaaya noowali ni ooveeha. Mene Yehova khonsiveliwa ni ‘isara, owali, waakhulana naari masu ooveeha.’ (Aef. 4:31, 32) Mulopwana onuuluma ni amwaarawe anyemaka, ohiya paahi onnanariha ntheli nawe, mene-tho onnananariha onthamwene awe ni Muluku. (Yak. 1:26) Pooti ohimmwa emoha-moharu wa mulopwana onweha ifootu sa atthu oohiwara. Owo-tho onnananariha onthamwene awe ni Yehova. Owo-tho khonaasiveliha amwaarawe. Yehova onweherera weera mulopwana avireleleke okhala oororomeleya wa amwaarawe, ohiya paahi moorweela mwa itthu ompakaawe, mene-tho moorweela mwa miyuupuwelo sawe. Yesu ohimme weera mulopwana onanweha muthiyana mukina moohireerela, ooraruwano “vamurimani.” — Math. 5:28, 29. w25.01 epaax. 9 eparag. 6-8

Biblya onhima weera arumeyi a Yehova aakhalihiwa anaxariya. Eyo entaphulela weera Yehova khannikhanyerera oliva mwaha wa soottheka sahu. Menento eyo khentaphulela weera Yehova khampwattha malamulo awe a xariya. Owo khanniitthana anaxariya mwaha wooweera ninnaphwanelela; naari khanwehexexa soottheka nimpakaahu. Mene Yehova ori oolikaneene otxipiha sookopha sahu mwaha wooweera ninnoonihera nroromelo mwa yoowoopola ya Yesu. (Arom. 3:24) Eyo entaphulela eheeni wa mutthu ti mutthu a hiyo? Ale ethanlinwe weera yalamuleleke ni Yesu wiirimu, ahiitthaniwa okhala anaxariya ntoko anamwane a Muluku. (Tito 3:7; 1 Yoh. 3:1) Soottheka saya sooleveleliwa. Onkhala ntoko awo khayintale opaka soottheka, nto ahaakhuleliwa weera yakhale Moomweneni. (Arom. 8:1, 2, 30) Ale erino yooweherera ya okhala elapo ya vathi mahiku ootheene, ahiitthaniwa okhala anaxariya ntoko asinthamwene a Muluku, ni soottheka saya sooleveleliwa. — Yak. 2:21-23. w25.02 epaax. 5 eparag. 17; epaax. 7 eparag. 18

Moone ekwaha emoha yeeyo murummwa Pedru ahoonihenraawe muupuwelo wa Yehova. Yesu aahaaleela arummwa awe weera annatthuneya orowa oYerusalemu weera aveleeliwe mmatatani mwa ahooleli a ettiini, ohaaxiwa ni muhoolo mwaya wiiviwa. (Math. 16:21) Pooti weera Pedru waamuxupa waakhulela weera Yehova ammuhiya Yesu iiviwaka, yoowo aari yooweherera ya ana a Israeli ni Mesiya aalaiherinwe. (Math. 16:16) Mwa yeeyo, Pedru aamwiitthana Yesu okhwipi anamweerela: “Mwiimorele ikharari Pwiya, eyo khenkela oweereelani.” (Math. 16:22) Okhala weera Pedru khoonihenre muupuwelo wa Yehova woohima sa mwaha ole, owo khuupuwela ntoko Yesu uupuwelaawe. Pooti weera Pedru aatthuna mureerelo wa Yesu, mene Yesu khaakhulenle miruku sa Pedru. Yookhala etthu ninxutteraahu. Mwa emaara ene yeele, omukosoopa Yesu khaiyene yaari yootthuna ya Yehova. Mwa yeeyo, Pedru aaxuttera etthu yootthuneya, weera aatthuneya wuupuwelaka ntoko Muluku. w25.03 epaax. 9 eparag. 5-6

Neereke nyuwo munnaxupeya mmuupuweloni mwaha woonyoonyihiwa naari orukunuweliwa ni mutthu yoole mwaamuroromelaanyu? Muhipwatthaka moota mutthu ookosompaaweni, Tiithi anyu a wiirimu onnoosivelani. Vaavo ninrukunuweliwaahu, hiyo pooti ophwanya nimaaliho ni masu oomaaliha a Davidi nimphwanyaahu va yoolepa ya olelo. Ereferensiya emoha, ehimme weera ale a “munepa wopwexiwa” enhimmwa “ale enuupuwela weera khiyaanoono etthu yooreera yooweherera.” Yehova onwoonela hayi ale eniisoonela hiiho mwaha wa maxupo? Ntoko tiithi a nsivelo ni ommulipiha mwanawe emaara ya maxupo, Yehova ‘ori vakhiviru’ ni hiyo, ikwaha sootheene onnanipixera murima ni ori oolikaneene weera anikhavihere wakhala weera ninnaxupeya mwaha woorukunuweliwa naari okhweliwa. Owo onnatthuna vantxipale onilipiha ni omaaliha murima ahu vaavo ninxupeyaahu. Nave owo onnanivaha itthu sintxipale sinnikhavihera ovilela sooweerera viinaano va. — Yes. 65:17. w24.12 epaax. 23 eparag. 13-14

Nave asitokweene a mmulokoni olelo va, onnatthuneya ororomelaka weera Yehova onnoona itthu sootheene awo empakaaya ni onnavaha mwiitti. Ohiya paahi ohoolela, oxuttiha ni olaleera, asitokweene akina ennakhavihera muteko wooteka ni waakhavihera atthu enhaawela nikhavihero. Asitokweene akina ennavara egrupu yoowaaxekura aretta naari ennakhavihera ekomisau enkhavihera ospitaale. Asitokweene enkhala oolikaneene weera evare miteko iya, ennasuwela weera muloko ti wa Yehova. Awo ennapaka ele enweraaya ni ennaroromela weera Yehova onoorowa waatthuvela mwaha wa itthu iyo empakaaya. (Akol. 3:23, 24) Khonwereya asinna ootheene ovaraka ntoko asitokweene a mmulokoni. Mene nnaamweera vareene hiiho, ootheene hiyo nnoowera onvaha etthu Yehova. Muluku ahu onnahakalala vantxipale vaavo nimpaka ahu ele ninweraahu weera nimukokhorele. Owo onnaweha soovaha sahu weera nikhavihere muteko wa Omwene wa elapo yootheene nnaamweera sikhalaka sooyeva. Murima awe onnahakalala vantxipale vaavo onoonaawe weera ninnawera ottuwala etthu yoonanara nipakelinwaahu ni omulevelela munnihu. Muroromeleke weera Yehova onnavaha mwiitti itthu sootheene mumpakaanyu. Owo onnoosivelani vantxipale, nto mwaha wa yeeyo, owo onimootthuvelani nyuwo. — Luka 21:1-4. w24.06 epaax. 23 eparag. 12-13

Yooweereya elempwale ni Salomoni, ennoonihera etthu ekhanle yooweereya ni murumeyi ori poothe a Yehova. Owo pooti opaka yoottheka etokweene ni moottharelana woona weera yeereñye moowaakuveya naari owo pooti ohima weera “konne weera wene.” Mene wakhala weera onimuupuwelela, owo pooti woonelela weera sookhala itthu soohireerela aapankaawe simweerinhe opaka yoottheka ele. Itthu iyo pooti ohela mpuwa onthamwene woohireerela, matthekulelo oohireerela naari orowa mapuro oohireerela mwaneene awe naari anvarelaka muteko internet. Apaale owo aaheemexera omusoma Biblya, ovekela, orowela mithukumano naari muteko woolaleera. Ntoko mmiravo onhimmwa va Miruku, pooti weeraka owo kaapanke yoottheka moowaakuveya. Etthu heeni ninxutteraahu? Nintthuneya osepa ohiya paahi yoottheka, mene-tho itthu sineeriha opaka yoottheka. Salomoni aapaka eyo alepakaru. — Math. 5:29, 30. w24.07 epaax.16 eparag. 10-11

Muhakhu owo ti heeni? Muteko woolaleera yoowo onvuluxa ikumi ni onuuluma woohima sa Omwene wa Muluku. (2 Akor. 4:1) Ankha nto miyaapu sa oloko ti heeni? Iyo sinthoonyera arumeyi a Muluku yaawo enlaleya mitthenka sooreera. Etempu ya murummwa Paulo, alipa anakoso yannavarihela muteko miyaapu sa oloko weera eteexe naari osunkamo itthu sootepa otthuneya, ntoko eyootxa, eviinyu naari musurukhu. Moolikana ni eyo, hiyo miyaapu sa oloko ni Yehova onnanivarihela muteko weera nlaleyeke mitthenka sootepa oreera. Nikhaviheriwaka ni Yehova, hiyo nnoorowa okhalano ikuru ninhaawelaahu weera nivirelele olaleya moororomeleya. Emaara ekina, hiyo pooti omoova mutthu naari woova ohaakheliwa nnene. Nipakeke eheeni eyo yeereya vale? Moone nivekelo arummwa yaapankaaya emaara yaakhoottiheriwaaya olaleera. Ohiya woova, awo yaavekela nikhavihero wa Yehova weera ‘evirelele olaleya nsu na Muluku moolipa murima.’ Yehova aahaakhula nivekelo nne moowaakuveya. (Mit. 4:18, 29, 31) Wakhala weera munnoova olaleera mwaha woomoova mutthu, munvekele Yehova weera ookhavihereni waasivela atthu ohiya owoova. w24.04 epaax. 16 eparag. 8-9

Nsivelo nahu ni Yehova ninnaneeriha otteeliha nsina nawe. Hiyo nookhalano muritti wootteeliha nsina na Yehova mwa soowootha sootheene Satana oothenraawe nsina nno. (Eph. 3:1-5; Yobi 2:4; Yoh. 8:44) Mmutekoni moolaleera, hiyo ninnamwaakiha Muluku ahu, vaavo nnaaleelaahu ekhaikhai woohima sa yoowo atthu ale antthuna wiiwa. Hiyo nintthuna weera atthu ootheene esuwele weera mukhalelo wootepa otthuneya wa Yehova, ti nsivelo, ni weera olamulela wawe ti wa exariya, nave Omwene awe moohipisa va onoorowa omaliha maxupo ootheene ni onoorowa owiiha murettele ni ohakalala wa atthu ootheene. (Nsal. 37:10, 11, 29; 1 Yoh. 4:8) Vaavo nnaakiheraahu olamulela wa Yehova mmutekoni moolaleera, ninnatteeliha nsina nawe nave ninnahakalala mwaha woosuwela weera ninnatteeliha-tho nsina nahu. w24.05 epaax. 18 eparag. 12

Asinna, nyuwo munnoonihera weera ‘munnawaakhela aletto’ vaavo munaapakelaanyu itthu sooreera atthu akina, waahela mpuwa ale muhaasuwenlaanyu. (1 Ped. 4:9) Ereferensiya emoha emuulumaka mutthu oowaakhela aletto, yenre ha: “Mulako wa empaawe ni wa murima awe ontthuneya okhaleke woohuleya wa atthu ohaasuwenlaawe.” Mwiikoheke ha, ‘Kinsuweliwa ni mukhalelo heeni woohima sa owaakhela aletto?’ (Aheb. 13:2, 16) Mutthu oowaakhela aletto onnakawana itthu sawe ni aletto awo, waahela mpuwa ale ehikhanle ni itthu sintxipale naari ale envara ntoko asitokweene a esirkwiitu naari asinna a muloko mukina enwompwa opaka mwaha. — Eph. 18:2-8; Mir. 3:27; Mit. 16:15; Arom. 12:13. w24.11 epaax. 21 eparag. 6

Ntakihero na asimwali, Yesu aawuuluma asimwali 10 yaawo yaarowa okumana ni mulipa oothela. (Math. 25:1-4) Ootheene yannaweherera omwaakhelela mulipa oothela ofeestani wa ekasamentu awe. Yesu aahaahima 5 a yaawo ntoko “a miruku” ni akina 5 ntoko “òlosowa.” Asimwali a miruku yaari oolikaneene onweherera mulipa oothela etempu yeeyo aarowaawe ophiya, naari aarowa ophiya ohiyu eriyari. Awo yaakuxa ixamaniya saya sooheliwa ene makhura weera epattiheke vapiphini. Nave-tho awo yaakuxa makhura makina oowiivarelela, wakhala weera mulipa oothela ampisa ophiya. Mwa mukhalelo ene yoola, awo yaari oowiirehera ene weera ixamaniya saya sivirelele opatta. (Math. 25:6-10) Emaara mulipa oothela aaphiñyaawe, asimwali a miruku, yaahirowa nuuwo ofeestani wa ekasamentu awe. Moolikana ni eyo, akristu oothanliwa enrowa okhala oolikaneene okhala ooweha-weha ni oororomeleya mpaka Kristu otthika, enoorowa othorihiwa ntoko anaxariya ni enoorowa okhala vamoha ni mulipa oothela, Yesu, Moomweneni mwawe wiirimu. — Apok. 7:1-3. w24.09 epaax. 21 eparag. 6

Hiyo ninnavirelela olaleera moowiilipihera vaavo nnoonaahu etthu eneereya elapo yootheene. Yeele eri eyaakha, imiliyawu sintxipale sa atthu enoonihera ntthuno ennoonela Muthukumano wa wuupuwelela okhwa wa Yesu nave ennamusoma Biblya ni hiyo. Atthu antxipale ennapatisiwa nave ennavara muteko woolaleera vamoha ni hiyo. Hiyo khansuwenle atthu akavi ehanle weera yaakhulele muteko ahu woolaleera, mene ninnasuwela weera Yehova oneera othukumanyaka muloko mutokotoko wa atthu, yoowo onrowa ovuluwa mpuwa mwa maxupo matokweene yaawo enaattamela. (Apok. 7:9, 14) Yehova tori mwaneene a muteko woolaleera ni owo onnaroromela weera atthu antxipale enoorowa waakhulela mitthenka sooreera, mwa yeeyo, hiyo onnatthuneya ovirelela olaleera. (Luke 10:2) Ovinyera khalayi atthareli a Yesu ennasuweliwa mwaha wa nthiti naya mmutekoni moolaleera. Vaavo atthu yoonaaya wiilipihera wa arummwa, ‘yaasuwela weera yaaheetta ni Yesu.’ (Mit. 4:13) Hiyo-tho, nintthuna olaleya mitthenka sooreera moolipa murima ni moohakalala. Ni pooti weeraka atthu enimoonelela weera nintthara ntakihero na Yesu. w25.03 epaax. 18 eparag. 15; epaax. 19 eparag. 17-18

MBiblyani hiyo ninnaxuttera weera Yehova onnaapwattha atthu ale enkhala ntoko khempwatthiwa ni atthu akina. Mwa ntakihero, Yehova aahimuruma mprofeti Samuweli orowa owannyawe Yese weera amuthanle mwaana mmoha weera akhale mwene a wIsraeli. Yese aawiitthana anamwane awe 7 wa anamwane awe ale 8 aaraaweno weera yakumane ni Samuweli, mene khaamukunxe mmiravo Davidi. Menento Yehova aamuthanliye Davidi. (1 Sam. 16:6, 7, 10-12) Yehova aahoona omutthu wa mpuwa wa Davidi, weera owo aari mmiravo aavaha mwiitti itthu soomunepani. Nkuupuwelani moota Yehova onooniheraawe weera onnoopwatthani. Owo onnoovahani miruku soovareleya muteko, moovarihana ni mukhalelo munvirihaanyu. (Nsal. 32:8) Eyo enoonihera weera owo onnoosuwelani nnene. (Nsal. 139:1) Vaavo nyuwo munvarihelaanyu muteko miruku sa Yehova ni woona moota onookhaviheraaweni, nyuwo munoororomelaka weera Yehova onnoopwatthani. (1 Sow. 28:9; Mit. 17:26, 27) Yehova onnoona wiilipihera wanyu ni onnoona mikhalelo sanyu sooreera sa mpuwa. Ni onnatthuna wookhaviherani. — Yer. 17:10. w24.10 epaax. 25-26 eparag. 7-9

Moohihovela nyuwo munnamusivela Yehova ni munnatthuna waakhavihera atthu akina. Moota heeni nyuwo munrowaanyu olipiha yootthuna anyu yoovara muteko owo? Muupuweleke ohakalala onkhumelela mwaha woowaavarela asinna ni asirokora. Yesu enre: “Ovaha ti etthu yorera opwaha wakhela.” (Mit. 20:35) Owo annavarihela muteko miruku iya. Owo aaphwanya ohakalala weekhaikhai mwaha woowaavarela atthu akina. Moone ntakihero nimoha nimphwanyeya va Marko 6:31-34. Ekwaha emoha, Yesu ni arummwa awe yaakhulumuwa vantxipale. Awo yeera erowoka nipuro noohikhaliwa weera yiitthuuwe. Mene muloko mutokotoko wa atthu waaphiya ohoolo waya, etthunaka oxuttihiwa ni Yesu. Yesu anwera okhootta. Mwaha wooweera owo ni arummwa awe “khayarino ehuhu yotxa.” Naari Yesu anwera waamwara atthu ale aaxuttinheene ekhaikhai emoha naari piili. Mene mwaha wooweettihiwa ni nsivelo owo “àpatxera wàhusiha yawo” mpaka ‘oxekuwa.” — Mar. 6:35. w24.11 epaax. 16 eparag. 9-10

Asitiithi mmooperere mwaninyu waasaasa iparakha soowaaleela atthu akina woohima sa ikhaikhai sa mBiblyani. (Arom. 10:10) Nyuwo pooti olikanxera wiilipihera wa mwaninyu weera aaleele atthu akina nroromelo nawe ni wiilipihera ontthuneya weera mutthu axuttere orumiha ikaruma sa itxipo. Woopatxerani, naxikola onnarumiha ikaruma sookhweya, mene noovira etempu onnakhala wookhweya owo orumiha ikaruma iyo sa itxipo. Vamoha-moharu, mmiravo mukristu woopatxerani pooti opatxeriha otthekula ni nyaha sookhweya weera aaleele atthu akina soororomela sawe. Mwa ntakihero, owo pooti omukoha koleekaawe ooxikola: “Nyuwo moosuwela weera ma engenheiro vaavo empakaaya itthu entakiha itthu sa mulaponi? Kintthuna owooniherani eviidiyu emoha yootepa oreera.” Noomala owo omoonihera eviidiyu eneera Será Que Houve Um Projeto? Owo pooti omukoha koleekaawe eeraka: “Wakhala weera masiyentista ennavuwihiwa mwaha woopaka itthu etakihaka itthu siri mulaponi, taani omphwanela ovuwihiwa mwaha wa itthu nnoonaahu mulaponi?” Otthekula iwo wookhweya pooti omweeriha koleekaawe owo otthuna oxuttera itthu ikina. w24.12 epaax. 19 eparag. 17-18

Weera anivuluxe wa yoottheka ni okhwa, Yehova oomuruma Yesu weera avahe yoowoopola. Mene moota heeni mukuttho wa mutthu mmoha oomalela onrowaaya waavuluxa atthu antxipale? Murummwa Paulo onniiwanyeiha eeraka: “Khweli sawasawa mwaha wohìwelela wa mutthu mmosaru [Adamu] ekhalihiwaya atthu antxipale anamattheka, siso tho mwaha wowiwelela wa mutthu mmosaru mukina [Yesu], atthu antxipale àkhalihiwa anaxariya.” (Arom. 5:19; 1 Tim. 2:6) Ni masu makina, aari mutthu mmoha oomalela yoowo aahiiwelenle, aneerinhe okhala akaporo a yoottheka ni okhwa. Mene-tho, wannatthuneya mutthu mmoha oomalela ni oowiiwelela weera anivuluxe. Yehova khaarowa paahi olakela weera atthu ale ooreera murima a osuulu wa Adamu ekhaleno ekumi yoohimala? Wa atthu oohimalela, eyo yaarowa okhala ntoko etthu yooreera ni yookhweya opaka. Mene eyo khenhela mpuwa exariya yoomalela ya Yehova. Mwaha wooweera Yehova paahi ti axariya, owo khaarowa othanla ohipwatthela ohiiwelela wa Adamu. w25.01 epaax. 21 eparag. 3-4

Murummwa Paulo aasuwela weera moohipisa aamurowa okhwa, mene aakhalano mathowa oohakalala mweekumini mwawe. Awehaka muttuli, owo aaheera: “Kòmaliha ekwaha aka, kòsunka orattene wiwelela.” (2 Tim. 4:6-8) Paulo aapaka soothanla sooreera mmutekoni mwawe moolaleera, ni annaroromela weera Yehova annahakalala nuuwo. Hiyo-tho naatthunaka waakhuleliwa ni Muluku, nintthuneya opakaka soothanla sooreera. Ninrowa opaka moota heeni eyo? Paulo aahuuluma woohima sa mwaneene ni akristu akina oororomeleya eeraka: “Khweli ninnètta mwaha wa [nroromelo], kahiyene mwaha wowona.” MBiblyani, masu ooweera ‘weetta’ imaara ikina onhimmwa moota mutthu onthanlaawe weettiha ekumi awe. Mutthu oneetta ni nroromelo, owo onnapaka soothanla moovarihana ni omuroromela wawe Yehova Muluku. Soopaka sawe sinnoonihera weera onnaroromela weera Muluku onoomutthuvela ni onoottottela mureerelo miruku sa Yehova simphwanyeya mBiblyani. — Nsal. 119:66; Aheb. 11:6. w25.03 epaax. 20 eparag. 1-2

Ekhaviheriwaka ni munepa wootteela wa Yehova, atthu antxipale khalayi yaari oowoopiha, oowali ni oohiroromeleya, aapaka matxentxo ootthuneya mweekumini mwaya. (Yes. 65:25) Mwaha woowiilipihera vantxipale awo aawera ohiya mikhalelo saya soonanara. (Aef. 4:22-24) Ekhaikhai weera mwaha wookhala oohimalela, ikwaha ikina hiyo ninnapaka soottheka. Mene Yehova oowiiraaniha “atthu othene” yaawo emmusivela ni ensivelana mukina ni mukhwaawe, ni yookhumelela aya ti yooweera hiyo nookhalano murettele weekhaikhai ni wiiraana. (Tito 2:11) Owo mwiiriira pahiru Muluku nanwera sootheene opankaawe! Nave hiyo noosuwela weera soolaihera sa Yehova sinnakwanela. (Yes. 55:10, 11) Naari neere eparaisu yoomunepani ti yeekhaikhai. Yehova ohiiraaniha emusi ya arumeyi awe ehinlikana ni egrupu ekina. Eriyari ya atthu a Yehova ninnakhala ni murettele ntoko khanikhanle elapo ene yeela yoonanara. (Nsal. 72:7) Ti vawonto nintthunaahu waakhavihera atthu antxipale weerela eparte emusi ela ya elapo yootheene. Hiyo nnoopaka eyo niwehexexaka muteko woowaapaka atthareli. — Math. 28:19, 20. w24.04 epaax. 23 eparag. 13, 15

Yesu annamusivela Yehova ni muupuwelo awe wootheene. Owo aasuwela yootthuna ya Yehova wa yoowo ni aari oolikaneene opaka itthu moovarihana ni yootthuna eyo, nnaamweera eyo yaahela mpuwa ohaawa mwaha woopaka etthu yooreera. Awehexexaka opaka yootthuna ya Atiithi awe, Yesu khaakhulenle etthu weera emootxeelihe opaka eyo. Murummwa Pedru ni arummwa akina, yaakhalano eparakha yooviriha etempu ereene ni Yesu ni oxuttera moota owo onuupuwelaawe. Vaavo Pedru aalempaawe ekaarta awe yoopatxera, owo aawooperera makristu weera yaatthuneya wiilipiha ni muupuwelo mmoha wa Kristu. (1 Ped. 4:1) Pedru aavarihela muteko masu a anakhotto vaavo aalempaawe ha: “Mwìlipihe.” Mwa yeeyo, wakhala weera akristu enootakiha moota Yesu onuupuwelaawe, enoorowa okhala oolikaneene ntoko ekaruma yoowera vaavo enwanaayano yootthuna ya ohimalela ni elapo ela enlamuleliwa ni Satana. — 2 Akor. 10:3-5; Aef. 6:12. w25.03 epaax. 8-9 eparag. 1-3

Itthu heeni nyuwo muntthuneyaanyu osuwela woohima sa mutthu owo emaara munnamoraraanyu? Muhaakunveene osiveliwa vantxipale ni mutthu owo, onnatthuneya ovaanela woohima sa itthu sootepa otthuneya, ntoko sooluluwanya sa mutthu owo. Moota heeni nyuwo munrowaanyu osuwela omutthu wa mpuwa wa mutthu mukina? Mukhalelo mukina woopaka eyo, ori omuhulela murima emaara muntthekulaanyu muhikhuwaka etthu, opaka makoho ni okhala owiiwelela. (Yak. 1:19) Weera eyo yeereye, nyuwo pooti ovara miteko vamoha seiyo sinrowa wookhaviherani otthekula, ntoko otxa vamoha, weetta vamoha mapuro oowaattiwa naari olaleera vamoha. Nave-tho nyuwo pooti osuwela itthu ikina woohima sa mutthu owo vaavo munvirihaanyu etempu ni asinthamwene awe ni amusi awe. Opwaha mwa yeeyo, mumpakeke palanu oovara miteko seiyo sinrowa woonihera moota mutthu owo ompakaawe itthu mwa mikhalelo soovirikana ni atthu oovirikana. w24.05 epaax. 27-28 eparag. 6-7

Hiyo voohipisa va nnoorowa oviriha ehuhu yootepa oxupa, nave nneereke otthuneya omuroromela Yehova opwaha khalayi. Sooweereya sa mBiblyani sa arumeyi akhalayi a Yehova, ni sooweereya sa mahiku ahu ala sa asinna ni asirokora yaawo yaakhaviherinwe ni Yehova weera evirelele ovilela sinoonikhavihera wuupuwela moota Yehova aakhavihenraawe arumeyi awe. Mwiihiyereke etempu weera mphimelele sooweereya iyo, wakhala weera munoopaka eyo, nyuwo munimoona nnene sene weera Yehova ti Mwala anyu. Opwaha mwa yeeyo napaka ele ninweraahu nnoorowa waalipiha asinna. Mwa ntakihero, Yesu anvaha Simoni nsina na Kefa (nsina nno nintaphulela “Pedru”) nsina nno nintaphulela ‘Epedaço ya mwala.’ (Yoh. 1:42) Mwa mukhalelo ola Yesu aahiiwanyeiha weera Pedru aamwaamaaliha asinna a mmulokoni ni olipiha nroromelo naya. Asitokweene a mmulokoni ennalikanxeriwa ni “muttuxi wa mwala worakama.” Eyo entaphulela weera asitokweene a mmulokoni ennaakosoopa asinna mmulokoni. (Yes. 32:2) Ekhaikhai weera, otheene ahu ohiya paahi asitokweene a mmulokoni, ninnatthuneya otakiha mikhalelo sa Yehova ni waalipiha asinna a mmulokoni. w24.06 epaax. 28 eparag. 10-11

Mamwene a wIsraeli Yehova aawoonaawe okhala oororomeleya, yannavarexexa okokhorela weekhaikhai. Mamwene mantxipale Yehova aattaruxaawe ntoko oohiroromeleya yaahiya otthara miruku sa Yehova epakaka okokhorela weethiru. (1 Mam. 21:25, 26; 2 Sow. 12:1) Mwaha wa heeni okokhorela waaraaya wootepa otthuneya wa Yehova? Mwaha wooweera mamwene yaakhalano muritti woowaahoolela atthu a Muluku weera epakeke okokhorela weekhaikhai. Opwaha mwa yeeyo, okokhorela weethiru onnaweeriha atthu opaka yoottheka etokweene ni ohixariya. (Hos. 4:1, 2) Opwaha mwa yeeyo, mamwene ni atthu ale yaakhavihera, yanniivaherera wa Yehova. Nto Biblya onnalikanxera wiivoleihera waya okokhorela weethiru ni oraruwa. (Yer. 3:8, 9) Mutthu ommuraruwela mutthu othelannaaweno, khanoonihera ororomeleya wa mutthu owo. Moolikana ni eyo, murumeyi iivaherenre wa Yehova vaavo ompakaawe okokhorela weethiru, khanoonihera ororomeleya wa Yehova. — Ola. 4:23, 24. w24.07 epaax. 22-23 eparag. 12-15