Novembro

Asitokweene a mmulokoni enniilipihera weera ekhale oopixa murima ntoko Yehova vaavo emmuthokororaaya mutthu okumihinwe mmulokoni. Mwa ntakihero, Yehova khaaweherenre weera muloko wa ana a Israeli yoowo waamurukunuwenle opatxerihe omwaasa owo. Ohiya opaka eyo owo aapatxeriha owaasa awo nnaamweera yahaapatxerinhe woonihera mukhalelo woottharuwa. Yehova ohoonihera opixa waawe murima vaavo aamurummaawe mprofeti Hoseya otthikela wiiraana ni amwaarawe, yaawo yaapaka yoottheka. (Hos. 3:1; Mal. 3:7) Emutakihaka Yehova, asitokweene a mmulokoni ennatthuna ni murima aya wootheene weera namattheka atthike, ni awo khenxupiha itthu weera eyo yeereye. Ntakihero na Yesu na mwaana aakhumme vaate va apapawe, atiithi awe ‘yaamutthimakela, yaamukhupaarela ni yanvaha epeexu.’ (Luka 15:20) Moone weera tiithi ole khaaweherenre weera mwanawe avekele nlevelelo. Opwaha mwa yeeyo, owo aapatxeriha opaka eyo, ntoko tiithi ori poothe a nsivelo aarowaawe opaka. w24.08 epaax. 28 eparag. 7-8

Ntoko enooniheraaya masu eri va yoolepa yoolelo, Yehova khanvitha osuwela wawe. Owo onnaavaha atthu akina. Moone-tho weera Yehova onnapaka eyo ‘ahuulumelaka’. Owo khantthuna weera nooveleleke onvekela miruku. Veekhaikhai owo onnanooperera weera ninvekeleke miruku. (Mir. 2:1-6) Nankha hiyo? Neereke hiyo pooti omutakiha Yehova naaxuttihaka atthu akina ele nsuwenlaahu? (Nsal. 32:8) Atthu a Yehova aakhalano iparakha sintxipale soowaaxuttiha atthu akina ele exuttenraaya. Mwa ntakihero, ikwaha sintxipale ninnaaxuttiha anamalaleera anyowani mmutekoni moolaleera. Asitokweene a mmulokoni ennaakhavihera moopixa murima arumeyi ookhavihera opaka nnene soothanleliwa saya mmulokoni. Nave ale erinono osuwela voohima sa muteko wooteka, ennaaxuttiha ale ehisuwenle weera ekhumeleke nnene mmutekoni mmo. w24.09 epaax. 28-29 eparag. 11-12

Asinna weera nyuwo mukhale oolikaneene ovara ntoko mutokweene a mmulokoni, muntthuneya ‘muhikhaleno mulattu,’ naari neere, okhalano mukhalelo wooreera mmulokoni yoowo onrowa oweerihaka asinna owoonakani okhala mutthu a mukhalelo wooreera. (1 Tim. 3:2) Opwaha mwa yeeyo, nyuwo muntthuneya okhaleliwa onamoona wooreera ni atthu oomokoni. Ale ehinanvarela Yehova pooti wuulumaka moohireerela soororomela sanyu, mene awo khontthuneya okhalano nthowa nooreera ninweeriha wuuluma moohireerela ororomeleya wanyu naari mukhalelo anyu. (Dan. 6:4, 5) Mwiikoheke ha, ‘Keereke miyo kookhalano mukhalelo wooreera mmulokoni naari vaate va muloko?’ Wakhala weera nyuwo ‘munnatthuna sooreera,’ nyuwo munnaasa itthu sooreera wa atthu akina ni munnaattottopela mwaha wa mikhalelo saya sooreera. (Tito 1:8) Nyuwo-tho munnahakalala mwaha woowaapakela itthu sooreera atthu akina, nnaamweera ehoovekelakani. (Mwaha wa heeni mukhalelo ola oraaya wootthuneya vantxipale wa asitokweene a mmulokoni? Mwaha wooweera awo ennavarihela nnene sene etempu aya weera ehoolele muloko ni okwanihera soothanleliwa saya. (1 Ped. 5:1-3) Nnaamweera yaatteliwaka, awo ennahakalala mwaha woowaakhavihera atthu akina. — Mit. 20:35. w24.11 epaax. 20-21 eparag. 3-5

Arumeyi ookhavihera ennavara miteko sintxipale mmulokoni. Murummwa Paulo moohihovela annaahela mwiitti alopwana ala oororomeleya. Mwa ntakihero, vaavo aalepelaawe akristu Afilipi, owo aahaavaha isalaamu otepaxa wene arumeyi ookhavihera ni asitokweene a mmulokoni. (Afil. 1:1) Asinna antxipale oopatisiwa nnaamweera ereene amiravo naari oowuuluvala, ennaphwanya ohakalala evaraka ntoko arumeyi ookhavihera. Mwa ntakihero, Devan aathanliwa weera akhale murumeyi ookhavihera areeneno iyaakha 18. Moovirikana ni eyo, munna mmoha oneeriwa Luis aathanliwa areene ni iyaakha 50. Owo onnuuluma mookwasa moota iisoonenlaawe, “Eparakha wa miyo ovara ntoko murumeyi ookhavihera, otepaxa wene vaavo kinuupuwelaaka nsivelo nootheene asinna enkooniheraaya!” Wakhala weera nyuwo mwa munna oopatisiwa ni nlelo muhinvara ntoko murumeyi ookhavihera, munoonela hayi okhala yoolakela anyu? w24.11 epaax. 14 eparag. 1-3

Emaara aaraaweno iyaakha 39, mwene Ezekiya a oYuda, aahoonelela weera aakhalano eretta yeeyo yaarowa omweeriha okhwa. Mprofeti Yesaya aamuleela Ezekiya masu a Yehova weera eretta ele yammweeriha okhwa. (2 Mam. 20:1) Waakhala ntoko Ezekiya khaarinono yooweherera. Axupeñyeene ni ele aaleelinwaawe, Ezekiya aahinla vantxipale. Owo aahinvekela Yehova ni murima awe wootheene. Yehova aahimmorela ikharari Ezekiya mwaha wa nivekelo aapankaawe inlaka, ni mooreera murima, aamweerela: “Kòhìwa wikhupanyera wá ni kòhòna maithori á. Òná, kini kòpenuxe.” Anvarihelaka Yesaya, Yehova aahimmorela ikharari Ezekiya amulaiheraka weera aamwaatxeerera ekumi awe ni onvuluxa Yerusalemu mmatatani mwa Asiria. (2 Mam. 20:4-6) Neereke nyuwo munviriha eretta yeeyo enweerihani woova? Munvekeleke Yehova nnaamweera mwinlaka. Biblya onnanroromeliha weera, “Atithi a ikharari ni Muluku a ohakalalihiwa wothene” anoorowa onimaaliha mwa sooweereriwa sahu sootheene. — 2 Akor. 1:3, 4. w24.12 epaax. 24 eparag. 15-17

Onrowa okhala woohakalaliha owaakhela atthu yaakhwiiye enrowa ovinyererihiwaka! Nkuupuwelani-tho moota nyuwo onrowaaya woosivelani oxuttera itthu sintxipale woohima sa Yehova nwehexexaka miteko sawe sintxipale opankaawe. (Nsal. 104:24; Yes. 11:9) Opwaha mwa sootheene, onrowa okhala woohakalaliha omukokhorela Yehova nihiivahaka nthowa naari vakhaaniini! Nyuwo mwaamurowa otxentxiha mareeliho ala a muhoolo ni “opuha ehuhu vakhani mwa yottheka”? (Aheb. 11:25) Moohihovela, hooye! Mareeliho ala tootepa otthuneyaxa opwaha itthu sootheene nimpakaahu viinaano va. Muupuweleke weera, eparayiisu elapo ela ya vathi, khaiyene enrowa okhala paahi yooweherera ya muhoolo, moohipisa, eyo enoorowa okhala yeekhaikhai. Itthu iya khasaarowa weereya waakhanle weera Yehova khanoonihenre nsivelo mookwanela anivahaka Mwanawe ntoko yoowoopola! w25.01 epaax. 29 eparag. 12

Eliivuru ya Aheberi ennawuuluma atthu antxipale yaawo yaamuroromenle Yehova, mmoha a yaawo ti Mose yoowo oonihenre nroromelo noolipa. (Aheb. 3:2-5; 11:23-25) Nroromelo na Mose khinaatteettheñye, mwaha wooweera Yehova aahaavaha yootxa ni maahi mwa mwiiriira weeheweheweni. (Ott. 15:22-25; Nsal. 78:23-25) Menento nnaamweera Mose aarino nroromelo noolipa, evirakaru eyaakha emoha vaavo ana a Israeli yaavuluxinwaaya mwa miiriira, owo anniikoha wakhala weera Yehova anwera waavaha enama atthu awe. Mose khaawera wuupuwelela woohima sa moota Yehova aarowaawe okumihera enama yaarowa okwanela atthu antxipale yaari weeheweheweni. Yehova aamwaakhula Mose ni nikoho eeraka: ‘Ntata na Yehova apaale ti nookhuveya?’ (Nam. 11:21-23) Mweekhaikhai, waakhala ntoko Yehova aamukoha ha Mose, ‘Nyuwo munuupuwela weera nkiwera opaka etthu yeeyo kilaihenraaka weera kinoopaka?’ w25.03 epaax. 26 eparag. 1-2

Neereke hiyo onnatthuneya oweha yooweereya ya epula ya mirupi ntoko eprofesiya? Waakhula ti wooweera hooye. Mwaha wa heeni? Mwaha wooweera khiyaavo yoolepa ya mBiblyani enhima eyo. Ekhaikhai weera Yesu aahilikanxera “mahiku a Nowa” ni emaara owo onrowaawe otthika. Mene owo khaaxuttinhe weera epula ya mirupi yaari eprofesiya. (Math. 24:37-39) Eheeni Nowa aapankaawe emaara iiwalaawe mitthenka sa othoriha wa Yehova? Owo aahoonihera nroromelo apakaka nikula. (Aheb. 11:7; 1 Ped. 3:20) Moolikana niiyo, atthu ale eniiwa mitthenka sooreera sa Omwene wa Muluku ennatthuneya opaka itthu moovarihana ni ele eniiwaaya. (Mit. 3:17-20) Pedru aahimwiitthana Nowa okhala “namutthenka a exariya.” Olelo-tho hiyo ninnakhavihera muteko woolaleera oneereya elapo yootheene, mene ninnilipihera vantxipale weera nivare muteko ola mwanthiti. Mene nnaamweera niilipiheraka vantxipale, hiyo khaninrowa owera waalaleera atthu ootheene enkhala elapo ela mitthenka sooreera ehaakunveene ophiya emalihero. w24.05 epaax. 9-10 eparag. 3-5

Nintthuneya waasaasera mikhalelo sa woonihera oreera murima ni nttittimiho wa asinthamwene a Yehova. (Arom. 12:10) Moota heeni? Mukhalelo mmoha woopaka eyo, onnahimmwa va Nsalmu 15:4, weera muletto mu ehema ya Yehova “alipelá ahawaka, khantxentxa olipenlaiye.” Emaara hiyo nihinkwaniheraahu ele nlaihenraahu, ninnaavoreiha atthu akina. (Math. 5:37) Mwa ntakihero, Yehova onweherera weera mulopwana oothela ni muthiyana ootheliwa, emukwanihere natiri empankaaya wa mukina ni mukhwaawe emaara yaathelanaaya. Yehova tho onnahakalala vantxipale vaavo asitiithi eniilipiheraaya weera emukwanihere natiri empankaaya wa anamwane aya. Mwaha wa nsivelo nraahuno ni Yehova ni atthu akina, hiyo onnatthuneya wiilipihera weera nikwanihere itthu sootheene nilaihenraahu. Mukhalelo mukina nneeraahu noonihere waattittimiha asinthamwene a Muluku, tivaavo ninsuwelaahu owaakhela nnene aletto ni okhala oovaha. (Arom. 12:13) Oviriha etempu ni asinna ni asirokora ohiya paahi emaara ya mithukumano ni muteko woolaleera, onoonikhavihera olipiha onthamwene ahu naawo ni Yehova. Opwaha mwa yeeyo, emaara ninnwaakhelaahu nnene aletto, ninnamutakiha Yehova. w24.06 epaax. 12 eparag. 15-16

Yehova onnaasuweliha ekhaikhai atthu yaale eri oowiiyeviha. (Math. 11:25) Moowiiyeviha, hiyo ninnaakhulela nikhavihero weera nixuttere ekhaikhai. (Mit. 8:30, 31) Nnaamweera vareene hiiho, hiyo nintthuneya wiikosoopa weera nihikhale atthu oowiisunnuwiha. Mwaha wooweera wiisunnuwiha pooti oneeriha woonaka weera miyuupuwelo sahu ti sootepa otthuneya opwaha miruku sa mBiblyani naari opwaha miruku seiyo sinvahiwa ni mareherero a Yehova.Weera nikhale atthu oowiiyeviha, hiyo nintthuneya wuupuwelelaka weera hiyo atthu ooyeva nalikanxeriwa ni Yehova. (Nsal. 8:4, 5 [8:3, 4, NM]) Nave-tho onnatthuneya onvekela Yehova weera ninnuwihere mukhalelo woowiiyeviha ni wooxuttiha. Yehova onoorowa onikhavihera ohela miruku onnivahaawe moorweela mBiblyani ni mareherero awe nipuro noopatxera opwaha miruku sahu. Mwa yoosomaanyu mwaasaaseke ipontu sa moota Yehova ommusivelaawe mukhalelo woowiiyeviha ni wiitta wiisunnuwiha, owali ni wiikuxerera. Nave-tho mwiikosoopeke weera nvirelele okhala oowiiyeviha emaara munaakhelaanyu miritti soothanleya. w24.07 epaax. 10 eparag. 8-9

Ovinyera eyaakha ya 1919, Yesu onnavarihela muteko egrupu ekhaanini ya alopwana oothanliwa weera ereherereke muteko woolaleera ni yaavaheke yootxa ya omunepani atthareli awe. (Luka 12:42) Onooneya weera Yehova onnareeliha muteko wa egrupu ela. (Yes. 65:13, 14) Waakhanle weera hiyo khanaakhanle oorehereya, khanaarowa owera ovara muteko Yesu onithanlenlaawe. (Math. 28:19, 20) Mwa ntakihero, muupuwele waakhanle weera khanaathanlelinwe mittetthe soolaleera. Mutthu ori poothe aaheereke olaleera nipuro nri poothe eeraawe atthuneke. Mittetthe mikina saamurowa olaleeriwa vantxipale. Neereke munnawera woona mareeliho nimphwanyaahu mwaha wookhala muloko woorehereya? Emaara Yesu aaraawe elapo ya vathi, owo aahaareherera atthareli awe ni owo ni nlelo onnavirelela oreherera muloko awe. w24.04 epaax. 8-9 eparag. 2-4

Kayini aari mwaana oopatxera a Adamu ni Heva. Owo aavala mikhalelo soottheka sa asitiithi awe. Opwaha mwa yeeyo, Biblya onhima weera owo: “Sopanka sawe sàri sonanara.” (1 Yoh. 3:12) Onooneya weera waari mwaha ene yoowo Yehova ‘ahampwantthaawe Kayini ni soovaha sawe’ vaavo anvahaawe mukuttho. Ohiya otxentxa iphiro sawe, ‘Kayini aanyoonyiwa vantxipale ni murima awe waamuriipa.’ Etthu heeni Yehova aapankaawe moottharelana? Owo aahuuluma ni Kayini. (Epha. 4:3-7) Moone weera Yehova aahuuluma mooreera murima ni Kayini ni aamuleela weera ammureeliha wakhala weera ampaka itthu sooreera. Nave-tho Yehova aamuleela Kayini weera onyoonyiwa wawe wammweeriha opaka etthu yoonanara. Mooriipiha murima Kayini khiiwelenle, owo khaamuhiñye Yehova omweeriha ottharuwa. Neereke Kayini ohiiwelela wawe woomweeriha Yehova ohiya wiilipihera waakhavihera anamattheka? Hooye! w24.08 epaax. 10 eparag. 8

Muloko wa ana a Israeli waakhalano yooweherera yooreera. Ereelihiwaka ni Yehova, ana a Israeli yaakhala mwa etempu yintxipale elapo yaalaiherinwaaya. Yaari elapo yooreera ni yoowaattano soowiima! Mose aahaaleela weera: “Mittetthe sitokwene ni sorera weyo ohitenkawe, impa sosareya sorera sothene weyo ohisarihalawe, ihime sihithimpwe ni weyo, imatta sa ivinya ni sa olivera weyo ohiphatteñyawe.” (Ola. 6:10, 11) Mose aahaavaha miruku ana a Israeli seiyo seera saakhavihere ovirelela okhala mwa elapo ele yoolaiheriwa. Awo wannatthuneya wiiwelela malamulo a Yehova. Nave-tho Mose aawooperera weera ‘ethanle ekumi’ emwiiwelelaka Yehova ni ‘yiiphiteerihaka wa yooworu.’ (Ola. 30:20) Nto ana a Israeli yaamukhootta Yehova. Moovira etempu, Yehova aahaakhulela weera Asiria ni maBabiloniya yaakuxere omuthaamiheriwoni. — 2 Mam. 17:6-8, 13, 14; 2 Sow. 36:15-17, 20. w24.11 epaax. 9 eparag. 5-6

Atthu antxipale eniihima okhala makristu, enuupuwela weera enoorowa ovuluwa mwaha wooweera ‘ennamuroromela Yesu’ nave omoona okhala ntoko nvuluxa aya. (Yoh. 6:29) Menento, atthu akina a muloko mutokotoko wa atthu, woopatxerani yannamuroromela Yesu mene muhoolo mwaya yaamuhiya. Mwaha wa heeni? Atthu antxipale Yesu aatxinhaawe, wannaasivela omutthara Yesu wakhala weera owo aamwaavaha itthu seiyo yaahaawelaaya. Itthu atthu ale yaatthunaaya waari olamihiwa mwa mwiiriira, ovahiwa yootxa ya mahala, ni oxuttihiwa itthu seiyo saasivela wiiwa. Menento, Yesu aahoonihera weera atthareli awe yannatthuneya opaka etthu ekina. Owo khaawiiye elapo ya vathi weera akwanihere soohaawela sa atthu sa weerutthuni. Awo yannatthuneya waakhulela nwopelo wa Yesu wa “orwa wa” owo, yaakhulelaka ni wiiwelela itthu sootheene aaxuttihaawe. — Yoh. 5:40. w24.12 epaax. 12 eparag. 12-13

Etthu heeni enrowa omukhavihera mulopwana oothela owina mukhalelo woonanara ni woowuuliha muru? Owo pooti wiilipihera omutakiha Yesu. Moota aathokoronraawe arummwa awe, ntakihero nooreera na moota alopwana entthuneyaaya waathokororaka asaaraya. Nrowe nthokorore etthu alopwana oothela enxutteraaya ni moota Yesu aathokoronraawe arummwa awe ni moota uulumaawe naawo. Yesu annaathokorora arummwa awe mwa mukhalelo wooreerela ni annaattittimiha. Owo khaiyene aari oowuuma murima naari khiisoona okhala a vasuluxa. Yesu khaapaka itthu saarowa oweerihaka arummwa awe omoona okhala ooweraxa. Ohiya opaka eyo, owo annaavarela moowiiyeviha. (Yoh. 13:12-17) Owo aaweerenle ha atthareli awe: “Muxuttere ni miyo, woona weera miyo toomaala ni oowiiyeviha, mwapaka eyo, munoophwanya wiitthuuwa mweekumini mwanyu.” (Math. 11:28-30) Moone weera Yesu aari oomaala. Mutthu oomala khaiyene toolosowa. Opwaha mwa yeeyo, mutthu owo onnawera wiiweha-weha. Vaavo ontannyiwaawe onnavirelela okhala oomaaleleya ni onnawera oweha-weha miyuupuwelo sawe. w25.01 epaax. 10 eparag. 10-11

Vaavo omala wa elapo ela yoonanara onaattamelaaya, hiyo ninnaweherera weera maxupo oothowa musurukhu eneereke waatxeerereya. Maxupo a ipoliitika, ikhotto, irisa sa ephattu, naari iretta inyowani, pooti weeraka inimweeriha oxupiha itthu naari oyeleela muteko ahu, itthu sahu, naari empa ahu. Etthu heeni enrowa onikhavihera opaka soothanla sinoonihera omuroromela wahu Yehova? Etthu yootepa otthuneya, ori omuleela Yehova maxupo anyu. Munvekeleke Yehova miruku weera mpake soothanla sooreera ni weera mukhale oomaaleleya ni weera musepe “okhala ooxupeya vantxipale,” woohima sa mwaha anyu. (Luka 12:29-31) Munvekele weera ookhavihereni okhalano murima wooxukurela itthu muraanyuno mweekumini mwanyu. (1 Tim. 6:7, 8) Muthola-thole mu iliivuru sahu woohima sa moota wooviriha maxupo a othoiwa. Atthu antxipale aattottela mureerelo nyaha simphwanyeya va jw.org woohima sa othoiwa musurukhu. w25.03 epaax. 28-29 eparag. 10-11

Vano, yaaphiya etempu weera atthu ale yahaakhanle ayuda, yeereleke eparte emusi ya Yehova. Murummwa Pedru aathanliwa weera amulaleere Korneliu yoowo ahaakhanle muyuda, yoowo aarowa weerelaka eparte ekhurupu ya akristu oopatxera. Okhala weera ayuda khiyaavarihana ni ale yahaakhanle ayuda, onooneya weera Pedru annahaawela nikhavihero weera iireherere wa yoothanleliwa ele. Vaavo Pedru uupuwelenlaawe yootthuna ya Muluku woohima sa mwaha ole, owo aatxentxa moonelo awe. Yookhumelela aya, Pedru iitthaniwakaru aarowa “vohilekela.” (Mit. 10:28, 29) Owo aamulaleera Korneliu ni emusi awe, ni ootheene yaapatisiwa. (Mit. 10:21-23, 34, 35, 44-48) Sivinreene iyaakha, Pedru aawooperera akristu weera ‘ekhaleno muupuwelo mmoharu.’ (1 Ped. 3:8 enoota) Ntoko atthu a Yehova, hiyo pooti okhalano muupuwelo mmoharu vaavo nnuupuwelaahu ntoko Yehova onuupuwelaawe ntoko enhimmwaaya mBiblyani. w25.03 epaax. 9-10 eparag. 7-8

Muupuwelo ni soopaka sa elapo, ti soovirikana ni moota Yehova onoonelaawe itthu. (Mir. 17:15) Tivawonto, nintthuneya osuwelaka itthu soowootha ni osepa, seiyo sinkumiheriwa ni anamavaanyiha yeereraka onikhulumula naari onihapuxa. Ninnapaka nnene vaavo ninttharaahu miruku sa murummwa Paulo aalepenlaawe Aheberi, weera nivirelele wunnuwa moomunepani. Eyo enhela mpuwa osuwela ikhaikhai soowiixera ni osuwela moota Yehova onuupuwelaawe. Mukhalelo ola ti wootthuneya nnaamweera niivaherenreene ni opatisiwa. Nihipwatthaka etempu nivirinhaahu nreene mweekhaikhaini, ootheene hiyo nintthuneya osomaka masu a Muluku mahiku ootheene. (Nsal. 1:2) Okhalano yookhovelela ya omusoma Biblya mahiku ootheene, onoonikhavihera wunnuwihera mukhalelo mmoha yoowo murummwa Paulo attittimihenraawe va ekaarta aalepenlaawe aheberi: nroromelo. — Aheb. 11:1, 6. w24.09 epaax. 10 eparag. 7-8

Onoorowa okhala wookhweya ovirelela okhala oororomeleya wa Yehova wakhala weera ninnamoona okhala ntoko mutthu. Tiyeeyo yeereñye ni Yosefe. Owo aakhootta okonihana woohireerela mwaha wooweera aasuwela weera eyo yaamurowa omunanara vantxipale Yehova. (Eph. 39:9) Naatthunaka omoona Yehova ntoko mutthu, nintthuneya wiihiyera etempu weera nivaaneleke nuuwo ni osoma masu awe. Napaka eyo onthamwene ahu nuuwo oneereke wunnuwa nihiku nri poothe. Nave hiihaale ntoko Yosefe, nakhalano onthamwene woolipa ni Yehova, khaninrowa opaka etthu eri poothe enrowa ovoreiha murima awe. Ale enttuwala weera Yehova ori ntoko mutthu, vakhaani-vakhaani awo pooti omuhiya Yehova. Moone ele yeereñye ni ana Israeli emaara yaaraaya weeheweheweni. Awo yaasuwela wera Yehova ookhala, mene yaapatxera ohovela wakhala weera owo aamurowa waakosoopa. (Ott. 17:2, 7) Yookhumelela aya tiyooweera, awo yaamurukunuwela Muluku. Menento hiyo khontthuneya okhala ntoko awo nihimwiiwelelaka Yehova. — Aheb. 3:12. w24.06 epaax. 24 eparag. 14-15

Ninkhala mahiku oomalihera, nave pooti weeraka sineereke ovira siriki waatxeerereya itthu sinrowa oneerihaka winla. Yehova onnoona winla wahu nave onnaxupeya ni winla iwo. Owo khanrowa ottuwala winla wahu. Nto vaavo ninvirihaahu itthu sootepa oxupa, nimuhuleleke murima ahu Yehova moorweela mwa nivekelo. Nihirakamelaneke ni asinna ni asirokora a mmulokoni. Nivireleleke ophwanya nimaaliho ni masu oomaaliha elempwale mBiblyani. Nroromeleke weera, navirelela ovilela moororomeleya, Yehova onoorowa onitthuvela. Eyo enhela mpuwa yooweherera yootepa oreera, yooweera, noovira etempu, owo onoorowa omaliha vamaithoni vahu winla wootheene, orukunuweliwa ni woova. (Apok. 21:4) Nto nnoorowa winlaka paahi mwaha woohakalala. w24.12 epaax. 20 eparag. 3; epaax. 25 eparag. 19

Yehova oonithanla hiyo ntoko Anamoona awe, ni owo onroromeliha weera onoorowa onikhavihera okhala oolipa murima. (Yes. 43:10, 11) Vano nrowe noone itthu ixexe sinrowa onikhavihera mwa mukhalelo ene yoowo. Yoopatxera, ikwaha sootheene Yesu onkhala ni hiyo vaavo ninlaleeraahu mitthenka sooreera. (Math. 28:18-20) Yanaaveeli, Yehova oothanla malaika yaawo ennikhavihera muteko ola woolaleera. (Apok. 14:6) Yanaararu, Yehova onnanivaha munepa awe wootteela weera onikhavihereke wuupuwelela ele ninxutteraahu. (Yoh. 14:25, 26) Yanaaxexe, hiyo ninnakhaviheriwa ni asinna vaavo ninlaleeraahu. Nikhaviheriwaka ni Yehova ni nikhavihero na asinna oosiveleya, hiyo nookhalano itthu sootheene ninhaawelaahu weera nikhale oolipa murima ni ovirelela olaleera. Mene wakhala weera nyuwo munnakhulumuwa vaavo munaaphwanyaanyu atthu vakhaaneene naari ohaaphwanyaru mmawannyaya, Mwiikoheke ha: ‘Emaara ela atthu amuttetthe ola eri woowi?’ (Mit. 16:13) ‘Neereke eronwe omutekoni naari omerkatu?’ Wakhala weera ti yeeyo, neereke miyo kinoowera waalaleera atthu antxipale mmuseweni? w24.04 epaax. 17 eparag. 10-11

Wakhala weera nyuwo moothela ni muntthuna okhala oolikaneene ovara ntoko mutokweene a mmulokoni, mikhalelo sa emusi anyu pooti ovoleela yoothanleliwaanyu yookhala mutokweene a mmulokoni. Tivawonto muntthuneyaanyu ‘weettiha oratteene etthoko anyu’. Nyuwo muntthuneya okhalano mukhalelo wookhala muhooleli a emusi a nsivelo ni opaka soothanla sooreera. Eyo enhela mpuwa ohoolela mikhalelo sootheene sa okokhorela wahu. Wakhala weera nyuwo tiithi, muntthuneya okhalano ‘anamwane ooleeleya moowiisuumaalihani mootheene.’ (1 Tim. 3:4) Nyuwo muntthuneya waaxuttiha ni waatxentxeriha mwa nsivelo. Ekhaikhai weera, ntoko anamwane ootheene, owo eneereke ottheela ni otthekula. Mene mwaha wa waaxuttiha wanyu nnene, awo enrowa okhala oowiiwelela, anttittimiho, ni oowiisuumaaliha. Opwaha mwa yeeyo, nyuwo muntthuneya opaka ele munweraanyu weera mwaakhavihere anamwane anyu wunnuwihera onthamwene wooreera ni Yehova, ni okhala moovarihana ni miruku sa mBiblyani, ni okela vahoolo weera epatisiwe. w24.11 epaax. 22 eparag. 10-11

Vaavo munrowaanyu waatxeereraka muteko munanvarelaanyu Yehova, munoorowa woona moota anookhaviheraaweni, ni yookhumelela aya, nroromelo nanyu wa yoowo nnoovirelela olipa. (1 Akor. 3:9) Menento muupuweleke weera Yehova khonweha itthu nyuwo mumpakaanyu alikanxeraka ni itthu atthu akina empakaaya. Owo onweha etthu eri vamurimani vanyu. Yehova onnahakalala vaavo onwehaawe oxukurela wanyu ni murima anyu wootheene yoovaha ela yootepa oreera, yoowoopola. (1 Sam. 16:7; Mar. 12:41-44) Hiyo nookhalano eparakha yooleveleliwa soottheka sahu, okhalano onthamwene woolipa ni Yehova ni okhalano yooweherera ya ekumi yoohimala mwaha wa yoowoopola. Ikwaha sootheene, noonihereke oxukurela wahu nsivelo na Yehova nenno nimweerinhe onivaha mareeliho ala. (1 Yoh. 4:19) Noonihereke-tho omuxukurela wahu Yesu, yoowo onisivenle vantxipale mpaka ovaha ekumi awe mwaha wa hiyo! w25.01 epaax. 31 eparag. 16-18

Moone moota namalepa a Nsalmu 73 iisoonenlaawe. Owo annawoona atthu akina yaawo yaakhala ntoko ekumi aya ti yooreera, ya musurukhu ni yaakhala ntoko khiyaaviriha maxupo. (Nsal. 73:3-5, 12) Vaavo aawehaawe atthu awo yaakhala ntoko tookhumela nnene, owo uupuwela weera wiilipihera wawe onvarela Yehova khiwaavareleya muteko. Owo “[aaxupeya] nihiku noothenene” ni miyuupuwelo iyo sookhulumula. (Nsal. 73:13, 14) Moota heeni owo aawinnaawe miyuupuwelo iyo saamuxupa? Nasalmu aahirowa nipuro noomaaleleya nenno naari nootteela na etemplu. (Nsal. 73:16-18) Owo aahiwera wuupuwelela moomaaleleya. Owo aahoonelela weera nnaamweera atthu akina ekumi aya ekhalaka ntoko ti yookhweya, awo khiyaanoono yooweherera. Mwaha woowiiwexexa eyo, owo aaphwanya murettele ni aasuwela weera onvarela Yehova yoothanla yooreera. Ni yookhumelela aya, owo aari oolikaneene ovirelela onvarela Yehova. — Nsal. 73:23-28. w24.10 epaax. 27 eparag. 11-12

Yehova ooniitthana hiyo weera nikhale ‘anamoona awe.’ (Yes. 43:10-12) Iyaakha vakhaani sa muttuli, ekaarta ya Mukuttula Woolamulela yaahimme ha: “Nttittimiho ntokweene mutthu ori poothe onrowaawe okhalano ni ohakalala ori wiitthaniwa Namoona a Yehova.” Mwaha wa heeni? Moone ntakihero nna. Waakhanle weera nyuwo mwammuhaawela mutthu weera akhale namoona anyu wa etthu enrowa wuulummwa otribunale, nyuwo mwaamurowa omuthanla mutthu mmusuwenlaanyu nnene sene ni mummuroromelaanyu, mutthu yoowo mikhalelo sawe seera soonihere onamoona woororomeleya. Emaara yeeyo Yehova aanithanlaawe weera nikhale Anamoona awe, owo ohoonihera weera oonisuwela nnene ni onnanroromela weera noonihere weera owo Muluku mmoha paahi eekhaikhai. Hiyo ninniisoona okhala atthu oottittimiheya mwaha wookhala Anamoona awe. Nto onnatthuneya ottottela mureerelo iparakha sootheene weera naasuwelihe atthu nsina nno, nave nivaanyihe soowootha sootheene woohima sa Yehova. Emaara nimpakaahu eyo, hiyo-tho ninnatteeliha nsina nraahuno nenno ninneeriha wiiteexa mwaha wookhala Anamoona a Yehova! — Arom. 10:13-15. w24.05 epaax. 18 eparag. 13

Waavarela muteko atthu akina waahimphwanyiha ohakalala Yesu. Emaara emoha vaavo Yesu aalaleeraawe atthu, aapaka-tho etthu ekina ohiya waaxuttiha paahi. Owo-tho annakosoopa soohaawela saya sa weerutthuni. Mwa miiriira, Yesu aahaavaha yootxa ni aahaaruma arummwa awe waakawela atthu ale. (Mar. 6:41) Vaavo aapankaawe eyo, owo aahaaxuttiha arummwa awe weera yaavareleke akina. Owo-tho ohoonihera weera arummwa ookhavihera tootthuneya. Nkuupuwelani moota arummwa a Yesu yaahakalanlaaya ovara vamoha ni Yesu vaavo yaakawelaaya yootxa atthu, yeeyo yaakumiherinwe mwa miiriira mpaka “othene aya yàhotxa, ni evona”! (Mar. 6:42) Ni ela khaiyene ekwaha emoha paahi Yesu aahenlaawe sootthuna sa atthu akina nipuro noopatxera. Emaara aaraawe elapo ya vathi Yesu aavarihela ekumi awe yoothene weera aakhavihere atthu akina. (Math. 4:23) Yesu aahakalala ni woona oreera mwaha woowaaxuttiha atthu akina ni mwaha wookosoopa soohaawela saya moowiiyeviha. w24.11 epaax. 16 eparag. 10-11

Makhalelo a “mahiku òmalihera” eneera enanaraka, moohihovela hiyo nintthuneya okhaviherana. Mene ohiya paahi okhavihera mwa itthu sa weerutthuni, hiyo-tho pooti waavaha nimaaliho ni nsivelo enhaawelaaya. Mukhalelo mmoha woopaka eyo, ori otthekula ni awo omithukumanoni empa ya Omwene. Nto mwaha wa yeeyo, vaavo asinnihu enrowaaya omithukumanoni hiyo nintthuneya opaka ele ninweraahu weera awo yiisooneke okhala oosiveliwa, oolipihiwa ni oovareleleya. Asitokweene a mmulokoni awo pooti okhala ntthawelo wa asinna ale enviriha maxupo oovirikana. Mpuwa mwa erisa ya ephattu naari eretta, asitokweene moowaakuveya ennapaka mareherero weera yaakhavihere asinna awo. Nave-tho ennanvarihela muteko Biblya weera yaavahe miruku ni waalipiha asinna. Ni asinna awo ennakhala ootaphuwa waavekela nikhavihero asitokweene yaawo enaasuwelaaya okhala ansivelo, oowiiwelela ni eniilipihera weera ewiiwexexeke asinna awo moota eniisoonelaaya. Asitokweene enoonihera mikhalelo iya, enoorowa oweeriha asinna wiisoona okhala oosiveleya. Mwa mukhalelo ene yoola, onoorowa okhala wookhweya asinna otthara miruku sa asitokweene seiyo sinkhuma mBiblyani. — 1 Ates. 2:7, 8, 11. w24.06 epaax. 29 eparag. 12-13

Okhala weera Muluku nanwera sootheene, nihuupuweleke weera owo khonanvoreya murima. Hiyo nipakinwe mwa eneneeru awe, Muluku onipanke ni mukhalelo woowoona ovoreya murima, yeeyo enoonihera weera Yehova-tho onnanvoreya murima. Biblya onnahima weera Muluku ‘onnaxupeya’ nave ‘onnamuriipa murima.’ (Nsal. 78:40, 41) Yehova aaxupeya vaavo aamoonaawe Mwanawe ahasuliwaka mpaka wiiviwa ni atthu oonanara murima. Yoowoopola ennanxuttiha weera khaavo mutthu onnisivela vantxipale ompwaha Yehova, naari amusi ahu naari nthamwene ahu oosiveleya. (Arom. 8:32, 38, 39) Moohihovela Yehova onnansivela vantxipale opwaha moota nniisivelaahu asineene ahu. Nyuwo munnatthuna okhalano ekumi yoohimala? Yehova onnatthuna vantxipale opwaha moota nyuwo muntthunaanyu. Nyuwo munnatthuna weera soottheka sanyu sileveleliwe? Yehova onnatthuna vantxipale woolevelelani opwaha moota nyuwo muntthunaanyu. Etthu owo onvekaawe, ori waakhulela yoovaha awe ya mahala, okhala oororomeleya ni oowiiwelela. Mweekhaikhai yoowoopola, yoowoonihera ya nsivelo ntokweene na Muluku. — Koh. 3:11. w25.01 epaax. 22-23 eparag. 8-9

Ootheene hiyo ikwaha ikina ninnapaka soothanla moovarihana ni muupuwelo ahu. Mene wakhala weera nnoopaka soothanla nttharaka paahi ele nnoonaahu, nniiwaahu naari muupuwelo ahu, moovira etempu hiyo nnoorowa opaka etthu ehimmusivela Yehova. (Koh. 11:9; Math. 24:37-39) Vaavo nneettaahu ni nroromelo, nnoorowa opakaka soothanla ‘simmuhakalaliha Yehova.’ Otthara miruku sa Muluku onoorowa oniphwanyiha murettele wa mmuupuweloni ni ohakalala weekhaikhai. (Nsal. 16:8, 9; Yes. 48:17, 18) Nave-tho, navirelela weetta ni nroromelo, nnookhalano ekumi yoohimala. (2 Akor. 4:18) Moota heeni ninrowaahu osuwela waari weera nneetta ni nroromelo naari hooye? Ootheene hiyo ninnatthuneya wiipakela makoho ala: Itthu heeni kinwehexexaaka vaavo kimpakaaka soothanla? Keereke kineettihiwa ni ele kinoonaaka? Naari kineettihiwa ni omuroromela waka ni otthara miruku sa Yehova? w25.03 epaax. 20-21 eparag. 3-4

Mutthu ori poothe a hiyo ookhalano etthu yootepa otthuneya weera aakhavihere atthu akina otthuna ovolowa eparaisu yoomunepani. Hiyo ninnapaka eyo vaavo nimmutakihaahu Yehova. Yehova khommukhanyerera mutthu weerela eparte mareherero awe. Opwaha mwa yeeyo, Yehova ‘onnaapurula’ atthu mwa mukhalelo wooreera. (Yoh. 6:44; Yer. 31:3) Ti vawonto, vaavo mutthu onxutteraawe woohima sa mikhalelo sa Yehova ni omutthu awe, onnamweeriha mutthu owo otthuna okhala nthamwene a Yehova. Mene moota heeni mikhalelo sahu sooreera ni itthu nimpakaahu sinrowaaya waapurulela atthu mparaisu yoomunepani? Mukhalelo mmoha ori waathokorora asinna ni asirokora mwa nsivelo. Vaavo mutthu omphiyaawe ekwaha yoopatxera Empa ya omwene, hiyo nintthuna weera ooneke ntoko yonnaaya ale yoonenle mithukumano khalayi muloko wa oKorinto. Awo yaahiroromela ni yaaheera: “Vekhaikhai Muluku ori ni nyuwo.” (1 Akor. 14:24, 25; Zak. 8:23) Mwaha wa yeeyo, hiyo onnatthuneya ovirelela otthara miruku Siri va yoolepa yoolelo. w24.04 epaax. 23-24 eparag. 16-17