Mutthikiheraka olipiha onthamwene anyu ni Yehova

IYAAKHA soottheene, yaale oosiveleya yaakumihinwe mmulokoni mwa Yehova, ennitthikela mmulokoni mwa ekristu. Muupuwele “ohakalala onkhala wirimu nthowa na namattheka mmosá orukununxe murima” anahokolowela mmulokoni! (Lu. 15:7, 10) Wakhala weera nyuwo mootthikiheriwa mmulokoni, muroromele weera Yesu, malaika, ni mwaneene Yehova ennahakalala vamoha, yawoonani vale mutthikelaka mweekhaikhaini. Mwa yeeyo, vaavo nyuwo muntthikiheraanyu olipiha onthamwene anyu ni Yehova, pooti weera munooviriha maxupo. Maxupo heeni a yaawo, ni eheeni eneera yookhavihereni?

MAXUPO HEENI ENAAPHWANYA ALE ENTTHIKIHERA ONTHAMWENE NI YEHOVA?

Owanano muupuwelo woowiixoopa mulattu emaara muntthikelaanyu mmulokoni. Apaale pooti wuupuwela moota Davidi oonenlaawe. Naari owo aaleveleliweene soottheka sawe, owo eenre: “Sottheka saka tho sòkiphiyera mpaka okikela mmaithoni.” (Nsal. 40:13 [40:12 Tradução do Novo Mundo]; 65:4 [65:3 Tradução do Novo Mundo]) Naari mutthu atthikenleene wa Yehova, muupuwelo woowiixoopa mulattu naari woona wuuliha muru onnavirelela. Isabelle, oomolinwe mmulokoni mpuwa mwa iyaakha 20a. Owo eenre, “Onnakivila waakhulela weera Yehova aamukilevelela.” Wakhala weera mookhulumuwa, muhiittiwale weera nyuwo pooti mukhalelo anyu okhala wootteettheya. (Mir. 24:10) Muhaakhulele eyo yookhumelelakani.

Akinna ennoovelela moota yeeraaya etthikihere onthamwene aya ni Yehova. Antonie emaara aatthikiherinwaawe mmulokoni owo eenre: “kaahoona weera kaattiwala sootheene sa ekumi yeekristu.” Mwaha wa muupuwelo owo, wannitthuneya mweekhaikhai wiilipihera itthu soomunepani.

Weene noonihere, wakhala weera empaahu yoophwateya vantxipale mwaha wa sikoloni, mweekhaikhai wuupuwelela etthu eyo, pooti onilemela vantxipale weera ntthikihere tho opaka. Emohamohamru, wakhala weera onthamwene anyu ni Yehova woophwateya mwaha wa yoottheka etokweene, onnitthuneya weera mwiilipihere vantxipale. Mene nnaamweera vareene hiiho, nikhavihero nookhala.

Veeliveeli Yehova onniniwopa: “Vano nkarwani ni nìwanane vamosà.” (Yes. 1:18) Nyuwo moopaka itthu sintxipale weera “moonihere itthu sintxipale”. Muroromele weera Yehova onnoosivelani vantxipale mwaha woowiilipihera moota owo. Mene muupuwele ha: Nyuwo monvaha Yehova mathowa wookwana owo onvaanyiha Satana mwaha wa soowootha sawe!—Mir. 27:11.

Mwiilipihereke omwaattamela Yehova, mwapaka eyo nyuwo munookhala vakhiviru wa Yehova ni owo onoopaka emoharu. (Yak. 4:8) Eyo envoleihera ohiya paahi osuweliwa ni atthu akina weera munneerela veeli empari ya muloko. Ontthuneya thooni wunnuwihera nsivelo nanyu wa Tiithiinyu ni nthamwenaanyu,Yehova. Munkela opaka hayi eyo?

MMPAKEKE MATXENTXO VAAVO MUTTHIKIHERAANYU ONTHAMWENE ANYU WA YEHOVA

Mweerere opaka matxentxo ootthuneya. Muupuwele weera etthu yootepaxa otthuneya ori mukhalelo anyu woomunepani—osuwela wanyu voohima sa Yehova ni yooweherera anyu yamuhoolo—mweekhekhi itthu iyo khasinttikinyeya. Mene nyuwo ontthuneya otthikela okhalano ekumi ya ekristu, eyo envoliihera olaleya mitthenka sooreera ni okhala vakhiviru ni asinna ni asirokora oomunepani. Muthokorore itthu sinttharelana.

Muulumeke ni Yehova moohihiyerera. Tiithiinyu onnisuwela weera muupuwelo woonyeserereya woowiixoopa mulattu, pooti owootxeelihani onvekela yoowo. (Arom. 8:26) Mwa yeeyo, “muvirelele wiilipihera ovekela” mmuleelaka Yehova weera munnitthuna vantxipale onthamwenaanyu ni yoowo. (Arom. 12:12) Andrej onnuupuwelela: “Miyo kannoona vatxipele wuuliha muru ni wiixoopa mulattu.” Mene nto mwaha woonyeserera opaka mavekelo, muupuwelo owo woowiixoopa mulattu wannivukuwa. Mene kaahoona murettele woomunepani okirweelaka. Vano wakhala weera khamunsuwela etthu yoovekela, muthokorore vamekelo a Mwene Davidi eri va Nsalmu 51 ni 65.

Mmusomeke Biblya veeli veeli. Eyo enkela otxihera mukhalelo anyu woomunepani nave waatxeerera nsivelo nanyu ni Yehova. (Nsal. 19:8-12 [19:7-11 Tradução do Novo Mundo]) “Mwaha woohihela nipuro noopatxera itthu soomunepani yaakeeriha omunyoonyiha Yehova,” oneera ti Felipe. “Miyo nkaatthuna tho opaka yoottheka emoharu wanaaveeli, nto kohiithanlela opaka yoosoma ntoko yoowaakihera aka.” Nyuwo-tho mpakeke emoha-moharu. Vano mwaatthunaka weera mphwanye miruku sa moota woopaka yoosoma yoomwaneenaanyu, ankhanto hayi onvekela nthamwenaanyu ookhomaala moomunepani?

Mutthikihere onthamwene mwaakhalannaanyu naasinna vamoha ni asirokora. Atxipale entthikela mmulokoni ennoovelela ohooniwa nnene ni asinna a mmulokoni. Larissa onnaakhulela: “kaahoona wuuliha muru vantxipale. Kaahoona weera nkaapanke etthu yooreera wa muloko. Muupuwelo owo waakinyeserera mpuwa mwa ehuhu yintxipale.” Mene muroromeleke weera asitokweene a mmulokoni ni asinna ookhomaala moomunepani ennitthuna wookhaviherani otthikihera mukhalelo anyu woomunepani. (Nwehe ekaaxa “Asitokweene a mmulokoni enkela opaka heeni?”) Awo enninlela weera nyuwo mwaatthinke, ni enninlela vantxipale weera mwaapanke eyo mooreera!—Mir. 17:17.

Eheeni eneera ewaattameliheni muloko? Mwiilipihereke opakano itthu asinna empakaaya—murowelaka mithukumano ni olaleya moohihiyerereya. Eyo enkela wookhaviherani hayi? Felix eenre: “Muloko wannihaawela otthikelawaka mmulokoni. Miyo kaahoona oheliwa mwiitti. Ootheenaaya yaakikhavihera opakela empari wanaaveeli emusi yoomunepani, nave ohitthikela otthuli.”—Nwehe ekaaxa “Nyuwo munaapake eheeni?”

MUHITTHIKELE OTTULI!

Mene muroromele weera Satana aneereke ovirelela waarumiha “asikoloni” weera yookhulumuleni vaavo muneereraanyu otthikihera onthamwene anyu ni Yehova. (Lu. 4:13) Mukhale oolikaneene vaanaano vaava weera mulipihe mukhalelo anyu woomunepani.

Nnaamweera iputthiputthi sawe imaara ikina siriheyaka, Yehova onniroromeliha: “Kini kàse eputtiputthi yoriheya, kini kihokoloxe yothwelela, kini kitthuke ni mikhoyi yowinteya metto ni kini kilipihe yoruxiheya.” (Ez. 34:16) Yehova ookhavihera mweekhaikhai iputtiputthi sintxipale seiyo saavirinhe ipheyo itokotoko moomunepani. Muroromeleke weera Yehova, onnitthuna wookhaviherani weera mulipihe onthamwene anyu ni yoowo.