Mwaase itthu soomunepani munrowa anyu ovarihelaka muteko nihiku ti nihiku

Vaavo nimmusomaahu Biblya, hiyo pooti waasa itthu soomunepani nipakaka ipeskisa. Moota heeni ninrowaahu ottottela mureerelo ipeskisa iyo?

Mpeskisariki vantxipale soohimmwa sa mBiblyani. Mwa ntakihero, mwiikoheke ha, taani alempe, yoolepa ela elempwale liini, yaari emaara heeni, eheeni yeereñye ehinaaye olempwa, ni eheeni yeereñye muhoolo mwaya?

Muupuweleke itthu nyuwo munxutteraanyu ni mwiikoheke ha: ‘Moota heeni atthu a yoolepa ela yiisoonelaaya? Mikhalelo heeni awo yooniheraaya? Mwaha wa heeni miyo kintthuneyaaka otakiha mikhalelo iya? Mikhalelo heeni soonanara miyo kintthuneyaaka osepa?’

Nvariheleke muteko itthu munxutteraanyu, mmutekoni moolaleera naari vaavo muntthekulaanyu ni atthu akina nihiku ti nihiku. Mwapaka eyo munimoonihera weera nyuwo mutthu a miruku, ntoko Biblya onhimaawe ariki: “Namiruku ori othene atthokelele seiya.” — Nsal. 107:43.

• Miruku: Moone soohimmwa nimphwanyaahu va eparte eneera, Mihakhu sa masu a Muluku, mmithukumanoni sa eriyari ya esemana moota sinnikhaviheraaya owehexexa ovareleya waya muteko ele ninsomaahu mBiblyani. Eparte eyo ennakhalano makoho yaawo nintthuneyaahu wiipakelaka, ipontu sa itthu nintthuneyaahu wuupuwelelaka, ni ifootu nintthuneyaahu osomaka.