MAMMERU

1 Nihiku noopacerya na mweeri wa nenli, eyaakha ya nenli nuumala aisarayeli okhuma elapo ya wExiitu,+ Yehova aahilavula ni Moise moothakoni mwa oSinayi,+ mutentani* mwa muthukumano.+ Owo aahimmye wiira: 2 “Mulepe+ nloko nootheene na Isarayeli,* mutthu mmosa-mmosa, muttharaka masina aamuhavinre aya, emusi aya, mulepaka masina a alopwana ootheene. 3 Nyuwo ni Aroni, muhaana olepa ekurupu ya atthu ootheene arina iyaakha okhuma 20 orowa ohoolo,+ yaawo aniwerya okhala anakhotto a Isarayeli.

4 “Mmukuxe muhooleli mmosa a khula nihimo na Isarayeli.+ 5 Masina a alopwana anrowa wookhaliheryakani taala: a nihimo na Rubeni, Elisuri+ mwaana a Xedewuri; 6 a nihimo na Simeyoni, Xelumiyeli+ mwaana a Surixadayi; 7 a nihimo na Yuda, Naasoni+ mwaana a Aminadabi; 8 a nihimo na Isakari, Netaneli+ mwaana a Suwari; 9 a nihimo na Zabuloni, Eliyabi+ mwaana a Heloni; 10 a nihimo na Efrayimi,+ Elixama mwaana a Amihudi; a nihimo na Manase, Gamaliyeli mwaana a Pedasuri. Efrayimi ni Manase anamwane a Yosefe; 11 a nihimo na Beniyamini, Abidani+ mwaana a Gideyoni; 12 a nihimo na Dani, Ahiyezeri+ mwaana a Amixadayi; 13 a nihimo na Axeri, Pagiyeli+ mwaana a Okarani; 14 a nihimo na Gadi, Eliyasafi+ mwaana a Deweli; 15 a nihimo na Nefetali, Ahira+ mwaana a Enani. 16 Ala ti atthu athanliwe nloko nootheene. Nave tari makhulupale+ a mahimo a axipaapa aya, ahooleli a ikonto sinceene a Isarayeli”.+

17 Vano, Moise ni Aroni yaahaakuxa alopwana ale yaathanliwe ni Muluku. 18 Nihiku noopacerya na mweeri wa nenli, awo yaahithukumanya nloko nootheene. Nto alopwana yaarina iyaakha okhuma 20 orowa ohoolo,+ yaahilempwa masina aya, mutthu mmosa-mmosa, etthariwaka emusi aya ni masina aamuhavinre aya, 19 ntoko siisaale Yehova aamurumme awe Moise. Tivo, Moise aahaalepa woothakoni wa oSinayi.+

20 Anamwane a Rubeni, mwaana oopacerya oyariwa a Isarayeli,+ yaahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa mmosa-mmosa, 21 nto atthu yaalempwale a nihimo na Rubeni yaari 46.500.

22 Osuulu wa Simeyoni+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa mmosa-mmosa, 23 nto atthu yaalempwale a nihimo na Simeyoni yaari 59.300.

24 Osuulu wa Gadi+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto yaahikontariwa, 25 nto atthu yaalempwale a nihimo na Gadi yaari 45.650.

26 Osuulu wa Yuda+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 27 nto atthu yaalempwale a nihimo na Yuda yaari 74.600.

28 Osuulu wa Isakari+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 29 nto atthu yaalempwale a nihimo na Isakari yaari 54.400.

30 Osuulu wa Zabuloni+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 31 nto atthu yaalempwale a nihimo na Zabuloni yaari 57.400.

32 Osuulu wa Yosefe waakhuma wEfrayimi,+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa 33 nto atthu yaalempwale a nihimo na Efrayimi yaari 40.500.

34 Osuulu wa Manase+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 35 nto atthu yaalempwale a nihimo na Manase yaari 32.200.

36 Osuulu wa Beniyamini+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 37 nto atthu yaalempwale a nihimo na Beniyamini yaari 35.400.

38 Osuulu wa Dani+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 39 nto atthu yaalempwale a nihimo na Dani yaari 62.700.

40 Osuulu wa Axeri+ yaahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa, 41 nto atthu yaalempwale a nihimo na Axeri yaari 41.500.

42 Osuulu wa Nefetali+ waahilempwa masina aya, etthariwaka emusi aya ni masina aamuhavinre aya. Alopwana ootheene yaarina iyaakha okhuma 20 orowa ohoolo, yaawo yaawerya okhala anakhotto, yaahikontariwa 43 nto atthu yaalempwale a nihimo na Nefetali yaari 53.400.

44 Atthu ala yaalempwale ni Moise ni Aroni ni makhulupale 12 a Isarayeli, yaawo yaari-tho ahooleli a mahimo aya. 45 Aisarayeli ootheene yaarina iyaakha okhuma 20 orowa ohoolo, yaawo yaawerya okhala anakhotto a wIsarayeli, yaahilempwa atthariwaka masina aamuhavinre aya. 46 Nto atthu ootheene yaalempwale yaari 603.550.+

47 Masi alevi+ khiyaalempwale vamosa ni mahimo makina.+ 48 Yehova aahimuleela Moise wiira: 49 “Muhaalepe atthu a nihimo na Levi, nnakhala muhaatakanxe ni aisarayeli akina.+ 50 Mwaavahe alevi muteko wookhapelela etapernaakulu ya Onamoona,+ ni itthu sootheene sipakaniwe aya.+ Awo ahaana okhapelela etapernaakulu eyo ni itthu sootheene sinirumeeliwa memmo.+ Nave ahaana omaka arukurenrye ene etapernaakulu,+ ni ovara muteko mutapernaakulu-mmo.+ 51 Khula okathi etapernaakulu enrowa aya othaamihiwaka, alevi tanrowa wuukululaka.+ Okathi etapernaakulu enrowa aya weemexiwaka, alevi tanrowa weemexaka. Khula mutthu onrowa waattamela oheemereriwe,* ohaana wiiviwa.+

52 “Khula mwisarayeli, ohaana weemexa etenta* awe nipuro othanleliwe awe. Khula mulopwana ohaana omaka ekurupu awe,* moovarihana ni opuro ekurupu awe ethanleliwa aya.+ 53 Nave alevi ahaana omaka arukurenrye ene etapernaakulu ya Onamoona, wiira Muluku ohinanariwe ni nloko na Isarayeli.+ Alevi ahaana okhapelela* etapernaakulu ya Onamoona”.+

54 Atthu a Isarayeli yaahipaka itthu sootheene Yehova aamurumme awe Moise. Awo yaahiira siisaale ntoko yaarummwale aya.

2 Yehova aahilavula ni Moise ni Aroni, iiraka: 2 “Aisarayeli ahaana omaka opuro othanleliwe ekurupu aya ya mahimo mararu.+ Khula mutthu ohaana omaka waattamela opuro onrowa oheliwa esinaale ya ekurupu ya emusi awe. Awo ahaana weemexa itenta* saya sirukurenrye ene etenta ya muthukumano. Nave, itenta saya sootheene siweheke etenta eyo.

3 “Mpantta onikhuma nsuwa, ninrowa omaka nihimo na Yuda opuro othanleliwe ekurupu aya ya mahimo mararu, moovarihana ni anakhotto aya. Mukhulupale a anamwane a Yuda ti Naasoni,+ mwaana a Aminadabi. 4 Anakhotto alempwale a nihimo na Yuda, ari 74.600.+ 5 Nihimo na Isakari ninrowa omaka mpantta mmosa wa nihimo na Yuda. Mukhulupale a anamwane a Isakari ti Netaneli,+ mwaana a Suwari. 6 Anakhotto alempwale a nihimo na Isakari, ari 54.400.+ 7 Nihimo ninrowa omaka mpantta mukina wa nihimo na Yuda ti na Zabuloni. Mukhulupale a anamwane a Zabuloni ti Eliyabi,+ mwaana a Heloni. 8 Anakhotto alempwale a nihimo na Zabuloni, ari 57.400.+

9 “Anakhotto ootheene alempwale omuttettheni wa oYuda ari 186.400. Okathi aisarayeli anrowa aya othaamaka arowaka nipuro nikina, nihimo na Yuda ti ninrowa opaceryaka othaama.+

10 Mpantta wa osuuli, ninrowa omaka nihimo na Rubeni+ opuro othanleliwe ekurupu aya ya mahimo mararu, moovarihana ni anakhotto aya. Mukhulupale a anamwane a Rubeni ti Elisuri,+ mwaana a Xedewuri. 11 Anakhotto alempwale a nihimo na Rubeni, ari 46.500.+ 12 Nihimo na Simeyoni ninrowa omaka mpantta mmosa wa nihimo na Rubeni. Mukhulupale a anamwane a Simeyoni ti Xelumiyeli,+ mwaana a Surixadayi. 13 Anakhotto alempwale a nihimo na Simeyoni, ari 59.300.+ 14 Nihimo ninrowa omaka mpantta mukina wa nihimo na Rubeni ti na Gadi. Mukhulupale a anamwane a Gadi ti Eliyasafi,+ mwaana a Reweli. 15 Anakhotto alempwale a nihimo na Gadi, ari 45.650.+

16 “Anakhotto ootheene alempwale omuttettheni wa Rubeni ari 151.450. Nihimo na Rubeni ninrowa okhala ekurupu ya nenli enrowa othaamaka.+

17 “Okathi etenta ya muthukumano enrowa aya othaamihiwaka,+ itenta sa alevi sihaana okhala eriyari ya itenta sa mahimo makina.

“Mahimo awo ahaana othaamaka, moovarihana ni opuro anrowa aya omakaka,+ khula mmosa opuro awe, moovarihana ni opuro othanleliwe ekurupu aya ya mahimo mararu.

18 “Mpantta onikela nsuwa, ninrowa omaka nihimo na Efrayimi, opuro othanleliwe ekurupu aya ya mahimo mararu, moovarihana ni anakhotto aya. Mukhulupale a anamwane a Efrayimi ti Elixama,+ mwaana a Amihudi. 19 Anakhotto alempwale a nihimo na Efrayimi, ari 40.500.+ 20 Nihimo na Manase+ ninrowa omaka mpantta mukina wa nihimo na Efrayimi. Mukhulupale a anamwane a Manase ti Gamaliyeli,+ mwaana a Pedasuri. 21 Anakhotto alempwale a nihimo na Manase, ari 32.200.+ 22 Nihimo ninrowa omaka mpantta mukina wa nihimo na Efrayimi, ti na Beniyamini. Mukhulupale a anamwane a Beniyamini ti Abidani,+ mwaana a Gideyoni. 23 Anakhotto alempwale a nihimo na Beniyamini, ari 35.400.+

24 “Anakhotto ootheene alempwale omuttettheni wa Efrayimi, ari 108.100. Awo ahaana okhala ekurupu ya neeraru enrowa othaamaka.+

25 “Onorti, ninrowa omaka nihimo na Dani, opuro othanleliwe ekurupu aya, moovarihana ni anakhotto aya. Mukhulupale a anamwane a Dani ti Ahiyezeri,+ mwaana Amixadayi. 26 Anakhotto alempwale a nihimo na Dani, ari 62.700.+ 27 Nihimo na Axeri, ninrowa omaka mpantta mukina wa nihimo na Dani. Mukhulupale a anamwane a Axeri ti Pagiyeli+ mwaana a Okarani. 28 Anakhotto alempwale a nihimo na Axeri, ari 41.500.+ 29 Nihimo ninrowa omaka mpantta mukina wa nihimo na Dani, ti na Nefetali. Mukhulupale a anamwane a Nefetali ti Ahira,+ mwaana a Enani. 30 Anakhotto alempwale a nihimo na Nefetali, ari 53.400.+

31 “Anakhotto ootheene alempwale omuttettheni wa Dani ari 157.600. Nihimo na Dani ti ninrowa okiserya othaama,+ moovarihana ni opuro othanleliwe ekurupu aya ya mahimo mararu”.

32 Ala aisarayeli yaalempwale atthariwaka masina aamuhavinre aya. Mwaattelo wa atthu ootheene yaalempwale yaawerya okhala anakhotto yaari 603.550.+ 33 Masi alevi khiyaalempwale+ vamosa ni aisarayeli akina,+ ntoko siisaale Yehova aamurumme awe Moise. 34 Aisarayeli yaahipaka itthu sootheene Yehova aamurumme awe Moise. Ti siisa aisarayeli yaamaka aya moovarihana ni opuro othanleliwe ekurupu aya ya mahimo mararu,+ ni moota yaathaama aya,+ etthariwaka emusi aya ni masina aamuhavinre aya.

3 Ola waari osuulu* wa Aroni ni Moise, nihiku Yehova aalavunle awe ni Moise omwaako Sinayi.+ 2 Ala yaari masina aanamwane a Aroni: Nadabi, mwaana oopacerya oyariwa, ni Abihu,+ ni Eleyazari,+ ni Itamari.+ 3 Ala yaari masina aanamwane a Aroni, anamukuttho yiittheliwe makhura ni yaathanliwe* wiira avareke muteko ntoko anamukuttho.+ 4 Masi Yehova aahimwiiva Nadabi ni Abihu, okathi yanvanhe aya Yehova+ etthu yooheemereriwa* omwaako Sinayi. Nave khiyaayanre anamwane axilopwana. Nto Eleyazari+ ni Itamari,+ nlelo yaanivara muteko ntoko anamukuttho ni Aroni, paapa aya.

5 Yehova aahimuleela-tho Moise wiira: 6 “Muhimeerye nihimo na Levi+ wiira naattamele, neemele ohoolo wa namukuttho Aroni, wiira nimukhaliheryeke.+ 7 Awo anrowa ovaraka muteko woomukhaliherya Aroni, ni woowaakhaliherya atthu ootheene, ohoolo wa etenta* ya muthukumano, avaraka miteko saavarihana ni etapernaakulu. 8 Anrowa okhapelelaka itthu sootheene+ sa etenta ya muthukumano, ni miteko sinivarihana ni etenta eyo,+ avaraka muteko aya woowaakhaliherya aisarayeli. 9 Alevi, munvahe Aroni ni anaawe. Awo aathanliwa eriyari ya aisarayeli wiira yaakhaliheryeke.+ 10 Mmuthanle Aroni ni anaawe, wiira avareke miteko sa onamukuttho.+ Mutthu yoole onrowa waattamela ohikhanle namukuttho,* ohaana wiiviwa”.+

11 Yehova aahilavula-tho ni Moise, iiraka: 12 “Mwiiwe, miyo kihaathanla alevi eriyari ya aisarayeli, nipuro na anamwane ootheene oopacerya oyariwa aisarayeli.+ Alevi anrowa okhala awaka. 13 Anamwane ootheene oopacerya oyariwa tawaka.+ Nihiku kaawiivale aka anamwane ootheene oopacerya oyariwa a elapo ya wExiitu,+ kaahaareeriha anamwane ootheene oopacerya oyariwa aisarayeli wiira akhale awaka, ni inama sootheene soopacerya ototholiwa.+ Anamwane awo ni inama iyo sihaana okhala sawaka. Miyo ka Yehova”.

14 Yehova aahilavula-tho ni Moise moothakoni mwa oSinayi,+ iiraka: 15 “Mwaalepe anamwane a Levi, muttharaka masina aamuhavinre aya ni imusi saya. Muhaana waalepa anamwane ootheene axilopwana arina mweeri mmosa orowa ohoolo”.+ 16 Vano Moise aahaalepa anamwane awo, ntoko siisaale aarummwale awe ni Yehova. 17 Masina aanamwane a Levi, taala: Gerisoni, Kehathi, ni Merari.+

18 Masina aanamwane a Gerisoni, yaawo avanhe masina imusi saya, taala: Liibini ni Ximeyi.+

19 Anamwane a Kehathi, yaawo avanhe masina imusi saya, taala: Amurami, Isehari, Hebroni, ni Uziyeli.+

20 Anamwane a Merari, yaawo avanhe masina imusi saya, taala: Mali+ ni Muxi.+

Iya ti saari imusi sa alevi moovarihana ni masina aamuhavinre aya.

21 Nloko na Gerisoni yaahikhuma emusi ya Liibini,+ ni emusi ya Ximeyi. Iya ti saari imusi sa Gerisoni. 22 Mwaattelo wa alopwana ootheene yaalempwale yaarina mweeri mmosa orowa ohoolo, waari 7.500.+ 23 Imusi sa Gerisoni saamaka ottuli wa etapernaakulu,+ mpantta onikela nsuwa. 24 Mukhulupale a imusi sa ekurupu ya Gerisoni aari Eliyasafi, mwaana a Layeli. 25 Muteko anamwane a Gerisoni+ yaavara aya mutentani mwa muthukumano, waari okhapelela etapernaakulu ni etenta,+ itthu saakhuneela etenta eyo,+ ekortiina+ yaari vamukhora va etenta ya mithukumano, 26 ikortiina sa nivate,+ ekortiina+ eri vamukhora va nivate, yeeyo enirukurerya etapernaakulu ni altaari, mikhoyi sa etenta eyo, ni miteko sootheene saareerela.

27 Nloko na Kehathi yaahikhuma emusi ya Amurami, emusi ya Isehari, emusi ya Hebroni, ni emusi ya Uziyeli. Iya ti saari imusi sa Kehathi.+ 28 Mwaattelo wa alopwana ootheene yaarina mweeri mmosa orowa ohoolo, yaari 8.600. Awo ti yaakhapelela nipuro noowaarya.+ 29 Imusi sa anamwane a Kehathi saamaaka osuuli wa etapernaakulu.+ 30 Mukhulupale a imusi sa ikurupu ya Kehathi aari Elisafani, mwaana a Uziyeli.+ 31 Muteko aya waari okhapelela Nivuku,+ meesa,+ muthuko,+ altaari,+ itthu sootheene saarumeeliwa+ wiira avareke muteko nipuro noowaarya, ekortiina,+ ni itthu sootheene saareerela.+

32 Mukhulupale muulupale a alevi aari Eleyazari,+ mwaana a namukuttho Aroni. Ti yoowo aaweherya ale yaakhapelela miteko sa nipuro noowaarya.

33 Nloko na Merari yaahikhuma emusi ya Mali, ni emusi ya Muxi. Iya ti saari imusi sa Merari.+ 34 Nummeru na anamwane ootheene axilopwana yaarina mweeri mmosa orowa ohoolo, yaari 6.200.+ 35 Mukhulupale aamuhavinre a emusi ya Merari aari Suriyeli, mwaana a Abihayili. Awo yaanimaka onorti wa etapernaakulu.+ 36 Anamwane a Merari ti yaakhapelela ithaapwa soolupanyiwa+ sa etapernaakulu, ikopo saya,+ ni maripu aya,+ iyeemexeryo saya, ni itthu sootheene saarumeeliwa mutapernaakulu,+ ni miteko sootheene saavarihana ni etapernaakulu.+ 37 Nave-tho, ti yaakhapelela maripu ootheene yaarukurerya ekintaali eyo, ni ikweeceryo saya,+ ni iyeemexeryo saya, ni mikhoyi sa etenta.

38 Ale yaamaka ohoolo wa etapernaakulu, eyo piiyo, mpantta onikhuma nsuwa, ni ohoolo wa etenta ya muthukumano, aari Moise ni Aroni ni anaawe Aroni. Awo ti yaarina muritti wa okhapelela nipuro noowaarya, ohiya aisarayeli. Mutthu yoole aarowa waattamela nipuro noowaarya oheemereriwe, aamwiiviwa.+

39 Anamwane ootheene axilopwana a nihimo na Levi, yaarina mweeri mmosa orowa ohoolo, yaawo Yehova aamurumme awe Moise ni Aroni waalepa mweemusini mwaya, yaari 22.000.

40 Yehova aahimuleela Moise wiira: “Mulepe masina aanamwane ootheene axilopwana oopacerya oyariwa aisarayeli, arina mweeri mmosa orowa ohoolo,+ ni mwaakontari. 41 Nipuro na anamwane ootheene oopacerya oyariwa aisarayeli,+ mwaakuxe alevi wiira akhale awaka. Miyo ka Yehova. Nave nipuro na axinama ootheene a vate oopacerya ototholiwa aisarayeli, mwaakuxe axinama a vate va alevi wiira akhale awaka”.+ 42 Nto Moise aahaalepa anamwane ootheene oopacerya oyariwa aisarayeli, ntoko siisaale Yehova aamurumme awe. 43 Mwaattelo wa anamwane ootheene axilopwana oopacerya oyariwa yaalempwale masina aya, yaarina mweeri mmosa orowa ohoolo, waari 22.273.

44 Yehova aahilavula-tho ni Moise, oriki: 45 “Nipuro na anamwane ootheene oopacerya oyariwa aisarayeli, mwaakuxe alevi, nave nipuro na axinama a vate aisarayeli, mwaakuxe axinama a vate a alevi. Alevi ahaana okhala awaka. Miyo ka Yehova. 46 Aakhala anamwane axilopwana 273 oopacerya oyariwa aisarayeli, yaawo anaavikana anamwane a alevi.+ Wiira mwaathume anamwane ala ahanle,+ 47 para khula mutthu muhaana oliviwa ixeekele thanu,*+ muttharaka exeekele ya nipuro noowaarya. Exeekele emosa, ehaana okhala ikheera* 20.+ 48 Muhaana onvaha musurukhu ene Aroni ni anaawe, ntoko eperesu ya anamwane ale oopacerya oyariwa, yaawo anaavikana anamwane a alevi”. 49 Vano Moise aahaakhela musurukhu woopolaniwe anamwane ale oopacerya oyariwa, yaawo yaavikana anamwane a alevi. 50 Musurukhu aakhenle awe wa anamwane oopacerya oyariwa aisarayeli, waari ixeekele 1.365, etthariwaka exeekele ya nipuro noowaarya. 51 Moise aahinvaha Aroni ni anaawe musurukhu waaliviwe, ottharaka nuulumo* na Yehova, ntoko siisaale Yehova aamurumme awe Moise.

4 Yehova aahimuleela Moise ni Aroni wiira: 2 “Mwa anamwane a Levi, mwaalepe anamwane a Kehathi,+ muttharihaka imusi saya, moovarihana ni nsina na amuhavinre aya. 3 Mwaalepe atthu ootheene arina iyaakha okhuma 30+ mpakha 50,+ yaawo ari ekurupu ethanliwe wiira evareke muteko mutentani* mwa muthukumano.+

4 “Ola tori muteko wa anamwane a Kehathi mutentani mwa muthukumano.+ Eyo etthu yoowaaryexa. 5 Okathi aisarayeli aniphavela aya othaama, Aroni ni anaawe animoorwa wiira akumihe ekortiina enivalaanya,+ ni anookhuneela Nivuku+ na Onamoona. 6 Vasulu va nivuku nlo, anookhuneela ni esapala ya mwaamunama oniitthaniwa fooka,* nave animwaatalela ekuwo yoorika yooripelela ni anoohela ikopo wiira siteexaniweke.+

7 “Nave-tho, vameesa saaheliwa iphaawu saavahiwa Muluku,+ animwaatalela ekuwo yooripelela, apwehe iparatho, ikoopho, itixela ni mirinki sinirumeeliwa wiira sivahiweke soovaha siniwuriwa.+ Nto iphaawu+ iyo sihaana okhalaka vameesa vaavo. 8 Anookhuneela itthu iyo ni ekuwo yooxeerya, ni esapala ya mwaamunama oniitthaniwa fooka. Nto, anoohela ikopo para oteexaniwaka.+ 9 Nuumala-vo, anookuxa ekuwo yooripelela akhuneele muthuko+ onirumeeliwa para omwaleela, ixamaniiya,+ itisora sinithikilaniwa ntthampo noovya, iparatho siniheliwa makhala a mooro+ ni mirinki sootheene siniheliwa makhura, yaawo anirumeeliwa wiira sipatteke ixamaniiya iyo. 10 Anookuxa esapala ya mwaamunama oniitthaniwa fooka, avitikeelele muthuko ni itthu sootheene apwehe vathaapwani wiira eteexaniweke. 11 Nave, valtaari a eweero+ animwaatala ekuwo yooripelela, akhuneele ni esapala ya mwaamunama oniitthaniwa fooka. Nave, anoohela ikopo wiira oteexaniweke.+ 12 Vano, anookuxa itthu sootheene anirumeela+ aya okathi wootheene anivara aya muteko nipuro noowaarya, ni anoohela vakuwoni yooripelela. Nave anookhuneela ni esapala ya mwaamunama oniitthaniwa fooka, apwehe vathaapwani wiira siteexaniweke.

13 “Ahaana okhupa ettuurwa* valtaari,+ ni waatala-vo ekuwo ya nliinya na ekoore violeeta. 14 Anoopweha-vo itthu sootheene anirumeela aya+ okathi anivara aya muteko valtaari, eyo piiyo, iparatho siniheliwa makhala a mooro, ikarfu, ipoxolo, ni itixela. Nave, anookhuneela ni esapala ya mwaamunama oniitthaniwa fooka, ni anoohela ikopo wiira siteexaniweke.+

15 “Okathi aisarayeli aniphavela aya othaama, Aroni ni anaawe ahaana omaliha okhuneela nipuro noowaarya,+ ni itthu sootheene sinirumeeliwa nipuro nlo. Vano anamwane a Kehathi animoorwa wiira akuxe itthu iyo,+ masi ahivare itthu sa nipuro noowaarya, okhala wiira yavara animookhwa.+ Ola muteko onivarihana ni etenta ya muthukumano, anamwane a Kehathi akhanle aya oovaraka.

16 “Eleyazari,+ mwaana a namukuttho Aroni, tonrowa ovareryaka makhura para ixamaniiya,+ nsenso noowunkhela,*+ yoovaha ya ipyo enivahiwa khula nihiku, ni makhura aniittheliwa atthu oothanliwa.+ Nave, owo ohaana owehaweha etapernaakulu yootheene ni itthu sootheene siri memmo, ohela muhina nipuro noowaarya ni itthu sinirumeeliwa memmo”.

17 Yehova aahilavula-tho ni Moise ni Aroni, iiraka: 18 “Muhaahiye atthu a Kehathi,+ yaawo anikhuma nihimo na Levi, yiiviwaka. 19 Muhaana ovara muteko anyu, wiira awo ahiiviwe mwaha woowaattamela itthu sa nipuro noowaaryexa.+ Aroni ni anaawe ahaana orowa ni onvaha khula mmosa muteko awe ni etthu okhanle awe ooteexa. 20 Awo ahikele wiira awehe itthu soowaarya, hata vakhaani, yiira siiso animookhwa”.+

21 Nuumala-vo, Yehova aahilavula ni Moise, oriki: 22 “Mwaalepe anamwane a Gerisoni,+ muttharaka nsina na amuhavinre aya ni imusi saya. 23 Muhaana waalepa atthu ootheene arina iyaakha okhuma 30 mpakha 50, yaawo ari ekurupu ethanliwe wiira evareke muteko mutentani mwa muthukumano. 24 Itthu sithanleliwe aya ovara ni oteexa imusi sa Gerisoni, tiiya:+ 25 awo ahaana okuxa ikuwo sa etapernaakulu,+ etenta ya muthukumano, ni etthu enikhuneela etenta eyo, esapala ya mwaamunama oniitthaniwa fooka enipwehiwa vasulu,+ ekortiina eri vamukhora va etenta ya muthukumano,+ 26 Ikortiina sa ekintaali ya nivate,+ ekortiina para mukhora wa nivate+ yeeyo enirukurerya etapernaakulu ni altaari, mikhoyi sa etenta, ni itthu sootheene saarumeeliwa mutapernaakulu, ni khula etthu yaarumeela aya wiira avare muteko aya. Ola tori muteko athanleliwa aya. 27 Aroni ni anaawe, ahaana oweheryaka muteko wootheene onrowa ovariwaka, ni itthu sootheene anrowa aya oteexaka anamwane a Gerisoni.+ Mwaakawele itthu akhanle aya ooteexaka. 28 Ola ti muteko onrowa aya ovaraka imusi sa agerisoni mutentani mwa muthukumano.+ Itamari+ mwaana a namukuttho Aroni, tonrowa oweheryaka miteko sinrowa aya ovaraka.

29 “Mwaalepe anamwane a Merari,+ muttharaka imusi saya ni nsina na amuhavinre aya. 30 Muhaana waalepa atthu ootheene arina iyaakha okhuma 30 mpakha 50, yaawo ari ekurupu ethanliwe wiira evareke muteko mutentani mwa muthukumano. 31 Itthu akhanle aya ooteexaka+ sinivarihana ni etenta ya muthukumano, tiiya: ithaapwa piili soolupanyiwa+ sa etapernaakulu, ikopo saya,+ maripu aya,+ iyeemexeryo saya;+ 32 maripu+ anirukurerya nivate, iyeemexeryo saya,+ iyeemexeryo sa etenta,+ mikhoyi sa etenta vamosa ni itthu sootheene sinirumeeliwa, ni khula etthu enivarihana ni muteko owo. Nave muhaana onvaha khula mutthu itthu sikhanle awe ooteexa. 33 Ti siiso imusi sa anamwane a Merari,+ sikhanle aya ovaraka muteko mutentani mwa muthukumano. Itamari mwaana a namukuttho Aroni,+ tonrowa waaweheryaka”.

34 Moise ni Aroni ni makhulupale+ a atthu ootheene yaahaalepa anamwane a Kehathi,+ attharaka imusi saya ni amuhavinre aya. 35 Yaahaalepa atthu ootheene yaarina iyaakha okhuma 30 mpakha 50, yaawo yaari a ekurupu yaathanliwe para ovara muteko mutentani mwa muthukumano.+ 36 Atthu ootheene yaalempwale sitthariwaka imusi saya, yaari 2.750.+ 37 Ala atthu a imusi sa Kehathi yaalempwale, wiira avareke muteko mutentani mwa muthukumano. Moise ni Aroni yaahaalepa atthu awo, attharaka yooruma Yehova anvanhe awe Moise.+

38 Anamwane a Gerisoni+ yaahilempwa sitthariwaka imusi saya, ni amuhavinre aya. 39 Yaahilempwa atthu ootheene yaarina iyaakha okhuma 30 mpakha 50, yaawo yaari ekurupu ethanliwe wiira evareke muteko mutentani mwa muthukumano. 40 Atthu ootheene yaalempwale sitthariwaka imusi saya ni amuhavinre aya, yaari 2.630.+ 41 Ala atthu ootheene a emusi sa anamwane a Gerisoni, yaalempwale wiira avareke muteko mutentani mwa muthukumano. Moise ni Aroni yaahaalepa attharaka yooruma ya Yehova.+

42 Anamwane a Merari yaahilempwa sitthariwaka imusi saya ni amuhavinre aya. 43 Yaahilempwa atthu ootheene yaarina iyaakha okhuma 30 mpakha 50, yaawo yaari ekurupu ethanliwe wiira evareke muteko mutentani mwa muthukumano.+ 44 Atthu ootheene yaalempwale sitthariwaka imusi saya, yaari 3.200.+ 45 Iya imusi sa anamwane a Merari, yaawo Moise ni Aroni yaalempe aya, attharaka yooruma Yehova anvanhe awe Moise.+

46 Moise ni Aroni ni makhulupale a Isarayeli, yaahaalepa alevi ale ootheene, attharaka imusi saya ni amuhavinre aya. 47 Yaahilempwa atthu yaarina iyaakha okhuma 30 mpakha 50, ootheene yaale yaathanliwe wiira avareke muteko ni oteexa itthu sinivarihana ni etenta ya muthukumano.+ 48 Atthu ootheene yaalempwale, yaari 8.580.+ 49 Awo yaahilempwa etthariwaka yooruma Yehova anvanhe awe Moise. Khula mutthu aahivahiwa muteko awe ni itthu aakhanle awe ooteexa. Awo yaahilempwa ntoko siisaale Yehova aamurumme awe Moise.

5 Yehova aahilavula-tho ni Moise, oriki: 2 “Mwaarume aisarayeli wiira amukumiherye ota wa muttetthe, khula mutthu orina oretta wa makokho,+ oninowa,*+ ni okhanle oohiloka mwaha wonvara mutthu okhwa.+ 3 Muhaana omukumiherya ota, okhale mulopwana aahiiso muthiyana. Mwaakumiherye ota wa muttetthe, wiira ahaaravihe atthu akina+ anikhala mmuttettheni-mmo, memmo kinikhala aka”.+ 4 Tivonto, aisarayeli yaahiira siiso ni yaahaakumiherya atthu awo ota wa muttetthe. Aisarayeli yaahipaka ntoko siisaale Yehova aamurumme awe Moise.

5 Yehova aahilavula-tho ni Moise, iiraka: 6 “Mwaaleele aisarayeli wiira: ‘Akhala mulopwana aahiiso muthiyana onimutthekela Yehova, opakaka etthu yoohiloka para mukhwaawe, mutthu owo ookhalana mulattu.+ 7 Owo* ohaana ohimya+ etampi opanke awe,* ni oliverya esisapo yoomalela ya mulattu awe. Nave ohaana wuncererya epantte ya neethanu ya esisapo ya etthu eyo.+ Esisapo eyo ohaana onvaha ole omutthekenle awe. 8 Masi akhala wiira ole otthekeliwe ohookhwa, ni khorina mmusi okhanle oowaakhela, etthu eyo ehaana ovahiwa Yehova wiira ekhale ya namukuttho. Nave ononvaha Muluku epwittipwitthi, wiira mutthu owo oleveleliwe itampi sawe.+

9 ‘“Soovaha sa itthu sooreerihiwa+ aisarayeli anrowa aya onvahaka namukuttho, sihaana okhala sa namukuttho owo.+ 10 Soovaha sooreerihiwa sa khula mutthu sinrowa okhalaka sawawe. Masi ele onrowa awe onvaha namukuttho, enrowa okhala ya namukuttho owo’”.

11 Yehova aahilavula-tho ni Moise, oriki: 12 “Mwaaleele aisarayeli wiira: ‘Ela ti etthu okhanle awe oowiirihiwa muthiyana ootheliwa murima awe onihapuwa, onararuwa, 13 nto mulopwana mukina amurupiha,+ masi iyawe khuhisuwela nave ohikhala mutthu mukina osuwenle, eyo piiyo, akhala wiira muthiyana owo oopaka etthu yoohiloka ohoolo wa Muluku, ohikhala mutthu onwenhe ni ohiphwanyeriwa, ohaana wiirihiwa so: 14 Akhala wiira iyawe onnimukhalela ehace ni onnaanyiherya wiira mwaarawe ooraruwa, aahiiso akhala wiira muthiyana owo oopaka etthu yoohiloka ohoolo wa Muluku, iyawe onamukhalela ehace ni onaanyiherya wiira mwaarawe oopaka etthu yoohiloka, variki ohipanke etthu eyo, 15 mulopwana owo ohaana omuroiha mwaarawe wa namukuttho, okunxe ene yoovaha mwaha wa mwaarawe owo, eyo piiyo, mpantta wa namuloko wa eefa* ya otthu* wa esevaata. Nto, ohihele makhura nnakhala nsenso nootteela,* okhala wiira yoovaha ya ipyo mwaha wa ehace, eyo piiyo, yoovaha ya ipyo enooniherya vakhala wiira muthiyana owo ookhalana mulattu aahiiso nnaari.

16 “‘Namukuttho onoomuruuha muthiyana owo wiira okhale ohoolo wa Yehova.+ 17 Namukuttho, onoorika mmwaapuni maasi ooreerihiwa, nuumala-vo onoohavula ntthupi na mutapernaakulu ohele mmaasini-mmo. 18 Namukuttho onoomwiiriha muthiyana owo weemela ohoolo wa Yehova, ni onootaphula ikharari sa muthiyana owo, ni onoohela mmatatani mwa muthiyana owo yoovaha ya ipyo enuupuxerya mulattu, eyo piiyo, yoovaha ya ipyo mwaha wa ehace.+ Nave-tho, namukuttho onookuxa mmatatani mwawe maasi oowaawa anitakhaliha.+

19 “‘Namukuttho onoomwiiriha muthiyana owo olapha omuleelaka wiira: “Akhala wiira khamurumpe ni mulopwana mukina variki mutheliwe ene,+ ni khamuhapunwe mwiikhaliha oohiloka ohoolo wa Muluku, nto maasi ala oowaawa anitakhaliha ahookumiheryeni maxakha. 20 Masi akhala wiira moohapuwa, mwiinanariha ohoolo wa Muluku variki mutheliwe ene, ni moorupa ni mulopwana mukina+ ohikhanle iyanyu, otakhaliwa iwo onimoophwanyani”. 21 Namukuttho onoomwiiriha muthiyana owo olapha weiwo onihela muhina otakhaliha. Vano namukuttho onrowa omuleela wiira: “Nto Yehova owiiriheni okhala ntakiheryo ninrowa ohimmwaka na olapha onihela muhina otakhaliha, eriyari ya atthu anyu. Akhala wiira mooraruwa Yehova owiiriheni ohiyara, ni erukulu anyu wiipa. 22 Maasi ala anitakhaliha akele mmaruponi mwanyu, yiirihe erukulu anyu wiipa ni awiiriheni ohiyara”. Vano, muthiyana ohaana ohimya wiira: “Amen! Amen!”*

23 “‘Namukuttho ohaana olepa moolumo awo ootakhaliha muliivuruni, ni ottipiha mmaasini-mmo oowaawa. 24 Nuumala-vo, onoomwiiriha muthiyana owo owurya maasi oowaawa anitakhaliha. Nto maasi awo anookela mmirimani mwawe wiira anwereyeke. 25 Namukuttho ohaana okuxa yoovaha ya ipyo mwaha wa ehace,+ yeeyo eri mmatatani mwa muthiyana, eettihe oroihaka ohoolo ni ottuli, ohoolo wa Yehova. Nuumala-vo, onooroiha waattamela valtaari. 26 Namukuttho onoohavula vakhaani yoovaha eyo ya ipyo, ntoko ethoonyeryo ya yoovaha yootheene wiira opahe* valtaari.+ Nuumala-vo, tonrowa awe omuruma muthiyana owurya maasi. 27 Akhala wiira oopaka etthu yoohiloka ohoolo wa Muluku ni oomuraruwela iyawe, amuruma owurya maasi anitakhaliha, maasi awo anookela mmirimani mwawe wiira anwereyeke. Erukulu awe enimwiipa ni khonrowa oyaraka. Muthiyana owo onrowa okhala ntakiheryo ninrowa ohimmwaka na olapha onihela muhina otakhaliha eriyari ya atthu awe. 28 Masi, akhala wiira muthiyana owo khiinanarinhe ohoolo wa Muluku ni tooloka, ehukhumu eyo khenrowa omphwanya, nave onooweryaka orupala ni waayara anamwane.

29 “‘Nla nlamulo mwaha wa ehace,+ akhala wiira muthiyana onoohapuwa ni onimwiinanariha ohoolo wa Muluku, variki otheliwe ene, 30 aahiiso akhala wiira mulopwana onimukhalela ehace ni onnaanyiherya wiira mwaarawe ooraruwa. Mulopwana owo ohaana omuroiha mwaarawe ohoolo wa Yehova, nto namukuttho ohaana otthara nlamulo nna. 31 Mulopwana owo khorina mulattu, masi mwaarawe onimwaakhula mwaha wa mulattu awe’”.

6 Yehova aahilavula-tho ni Moise, oriki: 2 “Mwaaleele aisarayeli wiira: ‘Akhala mulopwana wala muthiyana onimmana natiri wiira okhale ntoko munaziri*+ para Yehova, 3 ohiwurye eviinyu ni soowurya sikina soohapala. Ohiwurye eviinyu yoonyuunya, nnakhala khula etthu eninyuunya enihapala.+ Nave ohiwurye maasi a ewuuva, nnakhala ohikhuure ewuuva ene, ekhale ekithi aahiiso yoowuuma. 4 Okathi wootheene onrowa awe okhala munaziri, ohilye etthu enikhuma mwiri wa ewuuva, nnakhala ewuuva ekithi aahiiso makutuphe aya.

5 “‘Okathi wootheene ommanne awe natiri a okhala munaziri, ohimetthe ikharari sawe.+ Owo ohaana okhala ooreerihiwa ohiyaka ikharari sawe wunnuwa mpakha omala mahiku ootheene iivaherenrye awe wa Yehova. 6 Okathi wootheene onrowa awe wiivahererya wa Yehova, ohimwaattamele mutthu okhwa. 7 Pooti okhwa aka paapa awe aahiiso maama awe, wala munnawe aahiiso murokorawe, owo ohiinanarihe,+ okhala wiira vamuru vawe yookhala esinaale ya munaziri iivaherenrye wa Muluku.

8 “‘Owo tooreerihiwa para Yehova mahiku ootheene ori awe munaziri. 9 Masi vakhala wiira onimookhwa mutthu vootutuxerya vakhiviru vawe,+ nto owo onanariha ikharari sawe, seiyo sinooniherya wiira ohiivahererya wa Muluku, ohaana omettha ikharari sawe+ nihiku oniireeriha awe. Ohaana omettha nihiku na neethanu nenli. 10 Nihiku na neethanu neeraru, ohaana omuroihela namukuttho masiya manli aahiiso ipompa piili mihoro, vamukhora va etenta* ya muthukumano. 11 Namukuttho onrowa onvaha mwaapalame mmosa ntoko yoovaha para oleveleliwa etampi,+ nto mwaapalame mukina ntoko yoovaha para opahiwa. Nave onrowa onvaha mwaapalame owo wiira munaziri owo oleveleliwe etampi awe, mwaha wa omwaattamela mutthu ookhwa. Nuumala-vo, munaziri onimwiireeriha.* 12 Owo ohaana wiivahererya-tho wa Yehova, wiira opacerye vasya okhala munaziri. Nave onooruuha epwittipwitthi emosa yoolopwana ya eyaakha emosa, ntoko yoovaha mwaha wa okhalana mulattu. Masi mahiku avinre khanrowa okontariwa, okhala wiira aahinanariha onaziri awe.

13 “‘Nlamulo para munaziri tinla: Okathi onrowa awe omaleliha mahiku a onaziri awe,+ owo ohaana oroihiwa vamukhora va etenta ya muthukumano. 14 Opuro ole onrowa onvaha Yehova, epwittipwitthi emosa yoolopwana ehiniwereiwa ya eyaakha emosa, ntoko yoovaha para opahiwa,+ epwittipwitthi emosa yoothiyana ehiniwereiwa ya eyaakha emosa, ntoko yoovaha para oleveleliwa etampi,+ epwittipwitthi emosa yoolopwana para mukuttho wa opatthani,+ 15 esestu emosa erina iphaawu ntoko anela, soohiheliwa eferemento, sipakiwe ni otthu wooreerexa* oheliwe makhura, iphaawu soohiheliwa eferemento soophapateya ni soottihiwe makhura, ni yoovaha ya ipyo,+ ni soovaha siniwuriwa.+ 16 Namukuttho onooroiha itthu iya ohoolo wa Yehova. Wanipacerya, onrowa onvaha Muluku yoovaha para oleveleliwa etampi, nuumala-vo onoovaha yoovaha para opahiwa. 17 Ononvaha Yehova epwittipwitthi yoolopwana ntoko mukuttho wa opatthani, ni esestu ya iphaawu soohiheliwa eferemento. Nave namukuttho, onrowa ovaha yoovaha ya ipyo+ ni yoovaha eniwuriwa.

18 “‘Munaziri ohaana omettha ethoonyeryo ya onaziri awe eri vamuru vawe+ ori ene vamukhora va etenta ya muthukumano. Nuumala-vo, onookuxa ikharari sawe, eyo piiyo, ethoonyeryo ya onaziri awe ni onoopweha vamooroni ori vathi wa mukuttho wa opatthani. 19 Nave, namukuttho owo ohaana okuxa nikhata noowaapeiwa+ na epwittipwitthi yoolopwana, ephaawu yoohiheliwa eferemento epakiwe ntoko anela, yeeyo ekumihiwe musestuni, ephaawu yoophapateya yoohiheliwa eferemento, ohele mmatatani mwa munaziri, nuumala owo omettha esinaale ya onaziri awe. 20 Nto namukuttho ohaana weettihaka itthu iyo oroihaka ohoolo ni ottuli, ntoko yoovaha eneettihiwa ohoolo wa Yehova.+ Ela etthu yooreerihiwa para namukuttho, ni epeeto evahiwe ntoko yoovaha eneettihiwa vamosa ni mwetto onivahiwa.+ Nuumala-vo, munaziri owo pooti owurya eviinyu.

21 “‘Nna nlamulo para munaziri+ ommanne natiri: akhala wiira ommana natiri ni onniwerya onvaha Yehova itthu sinivikana iye onivekeliwa munaziri, owo ohaana omutaphula natiri awe ntoko sinihimya aya nlamulo para munaziri’”.

22 Yehova aahimuleela Moise wiira: 23 “Mmuleele Aroni ni anaawe wiira: ‘Ola ti moota mukhanle anyu oowaareeliha+ aisarayeli, muhimyaka wiira:

24 “Yehova ooreeliheni+ ni ookhapeleleni.

25 Yehova ohakalaleke ni nyuwo+ ni ooreereleni murima.

26 Yehova ooreereleni murima ni oovaheeni murettele”’.+

27 Nave awo animwiitthana nsina naka eriyari ya atthu a Isarayeli,+ wiira miyo kaareelihe”.+

7 Nihiku Moise aamalinhe awe weemexa etapernaakulu,+ owo aahiitthela makhura+ ni aahireeriha, vamosa ni itthu sootheene sa mutapernaakulu-mmo, altaari, ni itthu sootheene sa valtaari-vo.+ Okathi iitthenle awe makhura ni oreeriha itthu iya,+ 2 makhulupale a Isarayeli,+ yaawo ari ahooleli a mahimo, yaahiruuha yoovaha aya. Makhulupale ala a mahimo, yaawo yaawehenrye muteko woolempwa atthu, 3 yaahiroiha yoovaha aya ohoolo wa Yehova: ikaaro* 6 saapuruliwa ni inama, ni ipooyi 12. Vano wa makhulupale manli yaahiruuha ekaaro emosa, ni khula mukhulupale aahiruuha epooyi* emosa. Nave yaahiroiha itthu iyo ohoolo wa etapernaakulu. 4 Yehova aahimuleela Moise wiira: 5 “Mweemererye soovaha saya, okhala wiira sinrowa ovareliwa muteko mutentani* mwa muthukumano. Nave mwaavahe alevi, khula mmosa etthu enipirisari awe wiira ovare muteko awe”.

6 Moise aahaakhelela ikaaro iye ni ipooyi iye. Nuumala-vo, aahaavaha alevi. 7 Owo aahaavaha anamwane a Gerisoni ikaaro piili saapuruliwa ni inama, ni ipooyi xexe, moovarihana ni itthu yaapirisari aya wiira avare muteko aya.+ 8 Nave aahaavaha anamwane a Merari, ikaaro xexe ni ipooyi 8, moovarihana ni itthu yaapirisari aya wiira avare muteko aya. Itamari mwaana a namukuttho Aroni,+ taahoolela muteko yaapaka aya anamwane a Gerisoni ni a Merari. 9 Masi owo khaavanhe etthu anamwane a Kehathi, okhala wiira muteko aya waahela muhina ovara muteko nipuro noowaarya,+ ni oteexa mmakhatani mwaya, itthu sooreerihiwa.+

10 Makhulupale yaahiroiha soovaha saya, nihiku ainakurariwe awe+ altaari ni iittheliwe awe makhura. Okathi makhulupale yaaruuhale aya soovaha saya ohoolo wa altaari, 11 Yehova aahimuleela Moise wiira: “Khula nihiku, mukhulupale mmosa onrowa oruuhaka yoovaha awe wiira wiinakurariwe altaari”.

12 Aaruuhale yoovaha awe nihiku noopacerya aari Naasoni,+ mwaana a Aminadabi a nihimo na Yuda. 13 Yoovaha awe yaari ya eparatho emosa ya eparatha, yeeyo yaalemela ixeekele* 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa,* wooheliwa makhura, ntoko yoovaha ya ipyo;+ 14 ekoopho emosa ya eweero, yeeyo yaalemela ixeekele 10 yoosarya nsenso;* 15 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 16 epuri emosa yaamukhaani ntoko yoovaha para oleveleliwa etampi;+ 17 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Naasoni, mwaana a Aminadabi.+

18 Nihiku na nenli, Netaneli,+ mwaana a Suwari, mukhulupale a nihimo na Isakari, aahiruuha yoovaha awe. 19 Owo aavanhe eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 20 ekoopho emosa ya eweero, yeeyo yaalemela ixeekele 10 yoosarya nsenso; 21 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 22 epuri emosa yaamukhaani ntoko yoovaha para oleveleliwa etampi;+ 23 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi ithanu soolopwana sa eyaakha emosa. Ela yaari yoovaha ya Netaneli, mwaana a Suwari.

24 Nihiku na neeraru, Eliyabi,+ mwaana a Heloni, mukhulupale aanamwane a Zabuloni, 25 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 26 ekoopho emosa ya eweero, yeeyo yaalemela ixeekele 10 yoosarya nsenso; 27 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 28 epuri emosa yaamukhaani ntoko yoovaha para oleveleliwa etampi;+ 29 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi ithanu soolopwana sa eyaakha emosa. Ela yaari yoovaha ya Eliyabi,+ mwaana a Heloni.

30 Nihiku na neexexe, Elisuri,+ mwaana a Xedewuri, mukhulupale aanamwane a Rubeni, 31 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 32 ekoopho emosa ya eweero, yeeyo yaalemela ixeekele 10 yoosarya nsenso; 33 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 34 epuri emosa yaamukhaani ntoko yoovaha para oleveleliwa etampi;+ 35 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Elisuri,+ mwaana a Xedewuri.

36 Nihiku na neethanu, Xelumiyeli,+ mwaana a Surixadayi, mukhulupale aanamwane a Simeyoni, 37 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 38 ekoopho emosa ya eweero, yeeyo yaalemela ixeekele 10 yoosarya nsenso; 39 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 40 epuri emosa yaamukhaani ntoko yoovaha para oleveleliwa etampi;+ 41 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Xelumiyeli,+ mwaana a Surixadayi.

42 Nihiku na neethanu namosa, Eliyasafi,+ mwaana a Deweli, mukhulupale aanamwane a Gadi, 43 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 44 ekoopho emosa ya eweero, yeeyo yaalemela ixeekele 10 yoosarya nsenso; 45 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 46 epuri emosa yaamukhaani ntoko yoovaha para oleveleliwa etampi;+ 47 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Eliyasafi,+ mwaana a Deweli.

48 Nihiku na neethanu nenli, Elixama,+ mwaana a Amihudi, mukhulupale aanamwane a Efrayimi, 49 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 50 ekoopho emosa ya eweero, yeeyo yaalemela ixeekele 10 yoosarya nsenso; 51 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 52 epuri emosa yaamukhaani ntoko yoovaha para oleveleliwa etampi;+ 53 nave para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Elixama,+ mwaana a Amihudi.

54 Nihiku na neethanu neeraru, Gamaliyeli,+ mwaana a Pedasuri, mukhulupale aanamwane a Manase, 55 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 56 ekoopho emosa ya eweero, yeeyo yaalemela ixeekele 10 yoosarya nsenso; 57 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 58 epuri emosa yaamukhaani ntoko yoovaha para oleveleliwa etampi;+ 59 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Gamaliyeli,+ mwaana a Pedasuri.

60 Nihiku na neethanu neexexe, Abidani,+ mwaana a Gideyoni, mukhulupale+ aanamwane a Beniyamini, 61 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 62 ekoopho emosa ya eweero, yeeyo yaalemela ixeekele 10 yoosarya nsenso; 63 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 64 epuri emosa yaamukhaani ntoko yoovaha para oleveleliwa etampi;+ 65 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Abidani,+ mwaana a Gideyoni.

66 Nihiku na namuloko, Ahiyezeri,+ mwaana a Amixadayi, mukhulupale aanamwane a Dani, 67 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 68 ekoopho emosa ya eweero, yeeyo yaalemela ixeekele 10 yoosarya nsenso; 69 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 70 epuri emosa yaamukhaani ntoko yoovaha para oleveleliwa etampi;+ 71 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Ahiyezeri,+ mwaana a Amixadayi.

72 Nihiku na namuloko namosa, Pagiyeli,+ mwaana a Okarani, mukhulupale aanamwane a Axeri, 73 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 74 ekoopho emosa ya eweero, yeeyo yaalemela ixeekele 10 yoosarya nsenso; 75 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 76 epuri emosa yaamukhaani ntoko yoovaha para oleveleliwa etampi;+ 77 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Pagiyeli,+ mwaana a Okarani.

78 Nihiku na namuloko ni manli, Ahira,+ mwaana a Enani mukhulupale aanamwane a Nefetali, 79 aahiruuha yoovaha awe ya eparatho emosa ya eparatha, yeeyo yaalemela ixeekele 130, etixela emosa ya eparatha, yaalemela ixeekele 70, yaaphimmwa etthariwaka exeekele ya nipuro noowaarya.+ Sootheene soosareya otthu wooreerexa, wooheliwa makhura, ntoko yoovaha ya ipyo;+ 80 ekoopho emosa ya eweero, yeeyo yaalemela ixeekele 10 yoosarya nsenso; 81 epooyi emosa yaamukhaani, epwittipwitthi emosa yoolopwana, ni epwittipwitthi emosa yoolopwana ya eyaakha emosa, ntoko yoovaha para opahiwa;+ 82 epuri emosa yaamukhaani ntoko yoovaha para oleveleliwa etampi;+ 83 ni para mukuttho wa opatthani,+ aahiruuha-tho ipooyi piili, ipwittipwitthi thanu soolopwana, ipuri thanu soolopwana, ni ipwittipwitthi thanu soolopwana sa eyaakha emosa. Ela yaari yoovaha ya Ahira,+ mwaana a Enani.

84 Makhulupale a Isarayeli yaahiruuha soovaha iya, okathi ainakurariwe awe+ altaari a Muluku, nihiku altaari owo iittheliwe awe makhura. Soovaha sene tiiya: iparatho 12 sa eparatha, itixela 12 sa eparatha, ikoopho 12 sa eweero;+ 85 khula eparatho ya eparatha, yaalemela ixeekele 130, ni khula etixela yaalemela ixeekele 70, olemela wa eparatha yootheene waari wa ixeekele 2.400, yaaphimmwa etthariwaka exeekele ya nipuro noowaarya;+ 86 ikoopho 12 sa eweero soosareya nsenso, khula ekoopho yaalemela ixeekele 10, yaaphimmwa etthariwaka exeekele ya nipuro noowaarya. Olemela wa eweero yootheene ya ikoopho, waari wa ixeekele 120. 87 Inama sootheene saavahiwa ntoko yoovaha para opahiwa, saari: ipooyi saamukhaani 12, ipwittipwitthi 12 soolopwana, ipwittipwitthi 12 soolopwana sa eyaakha emosa, ni soovaha sa ipyo, ni ipuri saamukhaani 12 ntoko yoovaha para oleveleliwa etampi; 88 inama saavahiwe para mukuttho wa opatthani, saari: ipooyi saamukhaani 24, ipwittipwitthi 60 soolopwana, ipuri 60 soolopwana, ipwittipwitthi 60 soolopwana sa eyaakha emosa. Ela yaari yoovaha para ovahereriwa mukuttho Muluku,+ nuumala altaari owo wiittheliwa makhura.+

89 Okathi Moise aakela awe mutentani mwa muthukumano wiira olavule ni Muluku,+ owo aaniiwa nsu naakhuma vasulu va etampa+ ya Nivuku na Onamoona, eriyari ya makerubi manli.+ Ti siisa Muluku aalavula awe ni yena.

8 Yehova aahilavula ni Moise, iiraka: 2 “Mmuleele Aroni wiira: ‘Okathi onipattiha anyu ixamaniiya, ixamaniiya iyo 7 sihaana omwaleela opuro ori ohoolo wa muthuko’”.+ 3 Vano, Aroni aapanke so: aahipattiha ixamaniiya wiira simwaleeleke opuro waari ohoolo wa muthuko,+ ntoko siisaale Yehova aamurumme awe Moise. 4 Muthuko owo waapakiwe ni eweero yoohaniwa ni maritelo. Okhuma metto saya mpakha ifilori saya, saapakiwe ni eweero yoohaniwa ni maritelo.+ Moise aahipaka muthuko owo ntoko Yehova aamoonihenrye awe.+

5 Yehova aahimuleela-tho Moise, wiira: 6 “Mwaavalaanye alevi ni aisarayeli, nuumala-vo mwaareerihe alevi awo.+ 7 Ela ti enamuna munrowa anyu waareeriha: Mukuxe maasi anireeriha etampi, mwaatathele. Nuumala-vo ahaana omettha* manri a erutthu aya yootheene, okattha malaya aya ni wiireeriha.+ 8 Awo anookuxa epooyi yaamukhaani yoolopwana+ ni yoovaha ya ipyo+ ya epooyi eyo, ni otthu* wooreerexa ni wooheliwa makhura. Nto nyuwo munookuxa epooyi ekina yaamukhaani yoolopwana, ntoko yoovaha para oleveleliwa etampi.+ 9 Muhaana waaruuha alevi ohoolo wa etenta* ya muthukumano, nuumala-vo mwaathukumanye atthu a nloko nootheene na Isarayeli.+ 10 Okathi munrowa anyu waaruuha alevi ohoolo wa Yehova, aisarayeli ahaana owiixaatherya matata alevi awo.+ 11 Aroni onimwaavaha alevi ohoolo wa Yehova, ntoko yoovaha eneettihiwa+ ya aisarayeli. Nto alevi anoovaraka muteko wa Yehova.+

12 “Vano, alevi awo animwiixaatherya matata aya vamuru va ipooyi iyo.+ Nuumala-vo, anoovaha epooyi emosa ntoko yoovaha para oleveleliwa etampi. Nto epooyi ekina anoovaha ntoko yoovaha enipahiwa para Yehova, wiira alevi aleveleliwe itampi saya.+ 13 Mwaarume alevi wiira yeemele ohoolo wa Aroni ni anaawe. Vano munvahe* Yehova atthu awo, ntoko yoovaha eneettihiwa. 14 Mwaavalaanye alevi ni aisarayeli. Nto alevi anrowa okhala awaka.+ 15 Nuumala-vo, alevi anrowa ovaraka muteko waattamela etenta ya muthukumano. Ela ti enamuna munrowa anyu waareeriha ni waavaha* ntoko yoovaha eneettihiwa. 16 Tthiri awo ti atthu kivahiwe aka eriyari ya aisarayeli. Miyo kihaathanla wiira akhale awaka, nipuro na anamwane ootheene oopacerya oyariwa a Isarayeli.+ 17 Anamwane ootheene oopacerya oyariwa a Isarayeli tawaka, okhale mwaana mwaamulopwana aahiiso mwaamunama.+ Kihaareeriha para miyo, nihiku khaawiivale aka anamwane ootheene oopacerya oyariwa, elapo ya wExiitu.+ 18 Kinimwakuxa alevi, nipuro na anamwane oopacerya oyariwa a Isarayeli. 19 Wa atthu a Isarayeli, kinimwakuxa alevi wiira kinvahe Aroni ni anaawe, wiira avareke muteko mutentani mwa muthukumano+ para aisarayeli ophwanya mureerelo. Nto animwaakhaliheryaka anamukuttho wiira aisarayeli aleveleliwe itampi saya. Siiso, aisarayeli khenrowa waaphwanya ehukhumu,+ akhala wiira mutthu oheemereriwe onimwaattamela nipuro noowaarya”.

20 Moise, Aroni ni atthu ootheene a Isarayeli yaahiwiiriha alevi, itthu sootheene Yehova aamurumme awe Moise. 21 Tivo, alevi yaahiireeriha ni yaahikattha malaya aya.+ Nuumala-vo, Aroni aahaavaha* ntoko yoovaha eneettihiwa ohoolo wa Yehova.+ Nave aahivaha mukuttho para ovenxa itampi saya, wiira akhale ooreerihiwa.+ 22 Siiso, alevi yaahirwa wiira avareke muteko aya wa etenta ya muthukumano, ahooleliwaka ni Aroni ni anaawe. Eyo ti etthu yiirihiwe aya alevi, ntoko siisaale Yehova aamurumme awe Moise.

23 Vano, Yehova aahilavula ni Moise, iiraka: 24 “Ela ti etthu ekhanle aya oowiirihiwa alevi: ale arina iyaakha 25 orowa ohoolo, ahaana orowa ovara muteko wa etenta ya muthukumano, vamosa ni ale anivara memmo. 25 Masi nuumala opixa iyaakha 50, owo ohaana ohiya ovara muteko ni atthu anivara mutentani-mmo. Nave khontthikela-tho ovara muteko owo. 26 Owo pooti waakhaliherya axinnawe anikhapelela miteko sa etenta ya muthukumano, masi ohivare muteko wa mutentani-mmo. Ela ti etthu ekhanle aya oowiirihiwa alevi ni miteko saya”.+

9 Mweeri woopacerya+ wa eyaakha ya nenli, nuumala aisarayeli okhuma elapo ya wExiitu, Yehova aahilavula ni Moise woothakoni wa oSinayi, iiraka: 2 “Aisarayeli ahaana olokiherya mukuttho wa paasikha+ okathi othanliwe.+ 3 Ahaana olokiherya okathi othanliwe, nihiku 14 na mweeri yoola, nuumala nsuwa okela.* Nave alokiherye attharaka malamulo ni malakiheryo ootheene a Paasikha akumiheriwe”.+

4 Nto, Moise aahaaleela aisarayeli wiira alokiherye mukuttho wa paasikha. 5 Awo yaahilokiherya mukuttho wa paasikha woothakoni wa oSinayi, nihiku 14 na mweeri woopacerya, nuumala nsuwa okela.* Nto aisarayeli yaahipaka sootheene Yehova aamurumme awe Moise.

6 Masi, yaahikhala alopwana yaakhanle oohiloka mwaha wa ovara murutthu,+ ahinawerya olokiherya mukuttho wa paasikha nihiku nle. Nto alopwana awo yaahirowa wa Moise ni Aroni nihiku nenle,+ 7 anamuleela wiira: “Hiyo nookhala oohiloka mwaha woovara murutthu. Exeeni ennikhoottiherya onvaha mukuttho Yehova, okathi othanliwe vamosa ni aisarayeli akina?”+ 8 Vano Moise aahaaleela wiira: “Mukilipelele-vo, kinrowa omukoha Yehova etthu enrowa awe ohimya mwaha wa nyuwo”.+

9 Nuumala-vo, Yehova aahimuleela Moise wiira: 10 “Mwaaleele aisarayeli wiira: ‘Akhala mmosa a nyuwo aahiiso mutthu mukina a osuulu anyu wa muhoolo, onrowa okhala oohiloka mwaha wa ovara murutthu,+ aahiiso weettale mukwaha woorakama, owo ohaana olokiherya mukuttho wa paasikha para Yehova. 11 Ahaana omulokiherya nihiku 14, na mweeri wa nenli+ nuumala nsuwa okela.* Nave-tho, ahaana okhuura iphaawu soohiheliwa eferemento ni makukhu oowaawa.+ 12 Ahihiye etthu mpakha mmeeloni mwaya,+ nnakhala ahipwexe nikhuva na epwittipwitthi eyo.+ Ahaana omwiira paasikha, attharaka malakiheryo ootheene a Paasikha owo. 13 Masi akhala wiira mutthu owo aari ooloka aahiiso kheettale mukwaha, nto ohilokiherya mukuttho wa paasikha, owo ohaana wiiviwa,+ okhala wiira khonvanhe etthu Yehova okathi othanliwe. Mutthu owo onimwaakhula mwaha wa etampi awe.

14 “‘Akhala namurwa onikhala eriyari anyu, owo nave ohaana olokiherya mukuttho wa paasikha para Yehova.+ Olokiherye ottharaka nlamulo na paasikha ni malakiheryo akumiheriwe.+ Okhale namurwa aahiiso mwisarayeli, ohaana otthara nlamulo nimosa-ru’”.+

15 Nihiku yeemexiwe aya etapernaakulu,+ neeku naahikhuneela etapernaakulu eyo, eyo piiyo, etenta ya Onamoona. Masi ohiyu, etthu yaalikana ntoko mooro yaahikhumelela vasulu va etapernaakulu, mpakha mmeeloni mwaya voosiisu.+ 16 Etthu yaamakela wiiraneya tiila: othana etapernaakulu yaanikhuneeliwa ni neeku, nenlo ohiyu, naarya ntoko mooro.+ 17 Khula okathi neeku naavenya aya vatentani, aisarayeli yaanipacerya weetta mukwaha okathi ene yoowo.+ Nave khula opuro neeku neemela aya, aisarayeli yaamaka vaavo.+ 18 Aisarayeli yaanivenya arummwaka ni Yehova, nave yaanimaka arummwaka ni Yehova.+ Okathi wootheene neeku neemela aya vasulu va etapernaakulu, awo yaamaka vaavo. 19 Okathi neeku naakhala aya vasulu va etapernaakulu mahiku manceene, aisarayeli yaanimwiiwelela Yehova, nto khiyaakhanle oovenya.+ 20 Ikwaha sikina, neeku naakhala mahiku vakhaani vasulu va etapernaakulu. Awo yaanimaka arummwaka ni Yehova, nave yaanivenya arummwaka ni Yehova. 21 Ikwaha sikina, neeku neemela okhuma ohiyu mpakha voosiisu paahi. Okathi neeku naavenya aya voosiisu, awo yaahaana weetta mukwaha hata neeku nlo naavenya othana aahiiso ohiyu, awo yaahaana ovenya.+ 22 Okathi neeku naakhala aya vasulu va etapernaakulu, hata naakhala mahiku manli, mweeri mmosa, aahiiso okathi munceene, aisarayeli yaamaka vaavo ni khiyaavenya. Masi okathi neeku nle naavenya aya, awo yaanivenya. 23 Awo yaanimaka arummwaka ni Yehova, nave yaanivenya arummwaka ni Yehova. Nto yaanimwiiwelela Yehova, ntoko Yehova aamurumme awe Moise.

10 Yehova aahimuleela Moise wiira: 2 “Mpake malope* manli,+ a eparatha yoohaniwa ni maritelo, wiira murumeeleke para othukumanya nloko nootheene, ni ovaha esinaale para weetta mukwaha. 3 Okathi anoopiwa aya malope oomanli, nloko nootheene nihaana orwa othukumana ohoolo wanyu, waattamela vamukhora wa etenta* ya muthukumano.+ 4 Noopiwa nlope nimosa, yoothukumaneleni makhulupale paahi,+ eyo piiyo, makhulupale aatthu 1.000 a Isarayeli.

5 “Noopiwa nlope mwa enamuna yoottettemela, ikurupu sa mahimo ari mpantta onikhuma nsuwa,+ ahaana ovenya. 6 Noopiwa nlope mwa enamuna yoottettemela ekwaha ya nenli, ekurupu ya mahimo ari osuuli,+ ahaana ovenya. Khula ekwaha ekurupu emosa ya mahimo awo anivenya aya, malope ahaana woopiwa siiso.

7 “Okathi munithukumanya anyu nloko nootheene, ahaana woopiwa malope,+ masi ohiya mwa enamuna yoottettemela. 8 Malope awo ahaana woopiwa ni anamukuttho, eyo piiyo, anamwane aAroni.+ Woopa malope ninrowa okhala nlamulo na mahiku ootheene para nyuwo ni osuulu anyu.

9 “Mwarowa owana ekhotto ni awanani anyu anoolupatthani mulaponi mwanyu, muhaana woopa malope a ekhotto.+ Nto Yehova Muluku anyu, onoowuupuwelani ni onowoopolani mmatatani mwa awanani anyu.

10 “Nave, mahiku munihakalala anyu,+ eyo piiyo, mahiku a ifesta sanyu,+ ni woopaceryani wa khula mweeri, muhaana woopa malope awo okathi onivaha anyu soovaha sanyu para opahiwa+ ni mikuttho sanyu sa opatthani.+ Malope awo anoomwiiriha Muluku anyu owuupuwelani. Miyo ka Yehova, Muluku anyu”.+

11 Nto nihiku na namuloko nenli, mweeri wa nenli, mwaakha wa nenli,+ neeku naahivenya vasulu va etapernaakulu+ ya Onamoona. 12 Siiso, aisarayeli yaahikhuma moothakoni mwa oSinayi, ntoko yaatthokihiwe aya.+ Vano neeku nle naaheemela woothakoni wa oParani.+ 13 Ela yaari ekwaha yoopacerya aisarayeli yaavennya aya siisa, attharaka malakiheryo Yehova anvanhe awe Moise.+

14 Ekurupu ya mahimo mararu a anamwane a Yuda, ti yaapacenrye okhuma, moovarihana ni anakhotto aya. Vano Naasoni,+ mwaana a Aminadabi, taahoolela anakhotto a nihimo nawe. 15 Netaneli,+ mwaana a Suwari, taahoolela anakhotto a nihimo na Isakari. 16 Eliyabi,+ mwaana a Heloni, taahoolela anakhotto a nihimo na Zabuloni.

17 Okathi etapernaakulu yuukululiwe aya,*+ anamwane a Gerisoni+ ni anamwane a Merari,+ yaawo muteko aya waari oteexa etapernaakulu, yaahivenya.

18 Nuumala-vo, yaahikhuma ekurupu ya mahimo mararu a Rubeni, moovarihana ni anakhotto aya. Nto Elisuri,+ mwaana a Xedewuri, taahoolela anakhotto a nihimo nawe. 19 Xelumiyeli,+ mwaana a Surixadayi, taahoolela anakhotto a nihimo na Simeyoni. 20 Eliyasafi,+ mwaana a Deweli, taahoolela anakhotto a nihimo na Gadi.

21 Vano akehathi, yaawo yaarina muteko wa oteexa itthu saarumeeliwa nipuro noowaarya,+ yaahivenya. Okathi yaarowa aya ophiya, yaahaana ophwanya etapernaakulu yeemexiwe ene.

22 Nuumala-vo, yaahivenya ekurupu ya mahimo mararu ya anamwane a Efrayimi, moovarihana ni anakhotto aya. Nto Elixama,+ mwaana a Amihudi, taahoolela anakhotto a nihimo nawe. 23 Gamaliyeli,+ mwaana a Pedasuri, taahoolela anakhotto a nihimo na Manase. 24 Abidani,+ mwaana a Gideyoni, taahoolela anakhotto a nihimo na Beniyamini.

25 Vano, yaahivenya ekurupu ya mahimo mararu ya anamwane a Dani, moovarihana ni anakhotto aya. Mahimo ala yaavennye moovarihana ni ikurupu saya. Awo ti yaakisenrye ovenya wiira awaakiheryeke atthu a mapuro makina. Nto Ahiyezeri,+ mwaana a Amixadayi, taahoolela anakhotto a nihimo nawe. 26 Pagiyeli,+ mwaana a Okarani, taahoolela anakhotto a nihimo na Axeri. 27 Vano Ahira,+ mwaana a Enani, taahoolela anakhotto a nihimo na Nefetali. 28 Ela ti enamuna aisarayeli yaakhanle aya oovenya, yaattharaka anakhotto aya okathi yaakhuma aya.+

29 Vano Moise aahilavula ni Hobabi, mwaana a Reweli*+ a Midiyani, taata awe Moise wiira: “Hiyo-va nnookhuma nirowaka opuro Yehova onileihenrye awe onivaha.+ Munitthareke,+ ninrowa woothokoreryani saana, okhala wiira Yehova oomuleiherya Isarayeli onvaha itthu sooreera”.+ 30 Masi Hobabi, aahimwaakhula wiira: “Miyo nkinrowa woottharani. Kinrowa otthikela elapo aka, weiwo ori amusi aka”. 31 Moise aahimuleela wiira: “Xontte muhinihiye, okhala wiira nyuwo ti munisuwela mapuro a moothakoni ninrowa ahu omaka. Nto nyuwo pooti onihoolaka.* 32 Tivo, mwanitthara vale,+ itthu sooreera Yehova onirowa awe onivaha, hiyo nnookawanaka ni nyuwo”.

33 Tivonto, yaahikhuma omwaako wa Yehova,+ yeetta mukwaha wa mahiku mararu. Nivuku+ na Nivarihano na Yehova naahihoola mukwaha owo wa mahiku mararu, niphavelaka opuro yaarowa aya ophumurya.+ 34 Othana, neeku na Yehova+ naakhala vasulu vaya, okathi yaavennya aya opuro ole yaamanke aya.

35 Khula okathi Nivuku naathaamihiwa aya, Moise aanihimya wiira: “Khoo Yehova, nvenye,+ awanani anyu amwareye, ale anoonyokhani atthyawe ohoolo wanyu”. 36 Vano okathi yaaphumurya aya, Moise aanihimya wiira: “Khoo Yehova, xontte mukhale ni atthu anceene ahinkontareya* a Isarayeli”.+

11 Vano, atthu yaahipacerya wiikhupanyerya vanceene ohoolo wa Yehova. Okathi Yehova aiwale awe eyo, aahinanariwa vanceene. Nto Yehova aahikumiherya mooro, aapaha atthu akina mukerekhere mwa omuttettheni. 2 Okathi atthu awo yaamukhuwelenle aya Moise, owo aahimuxonttela Yehova,+ nto mooro waahittipha. 3 Tivo, opuro ole waahivahiwa nsina noowi Tabera,* okhala wiira mooro waakhuma wa Yehova waahaapaha.+

4 Eriyari aya waahikhala muttitthi* wa atthu a mikhalelo sootheene,+ yaawo yoonihenrye nrima.+ Nave aisarayeli yaahitthikela-tho wunla, ariki: “Ti pani onrowa onivaha enama wiira nikhuure?+ 5 Sooninkhela ihopa, mixiri, melansia,* isepola ikithi,* isepola, ni aalyo, seiyo naalya ahu mahala wExiitu!+ 6 Vano, hiyo nootemwa. Khiivo etthu enoona ahu ehikhanle emana paahi”.+

7 Emana+ eyo yaakhala ntoko enuku yaamukhaani,*+ ni yaalikana ni esenya eniihaniwa bideeliyu. 8 Atthu yaanimwara-mwareya, anattotta, ni anaxila vanxiloni aahiiso anatthupula muryaweni. Nuumala-vo, yaanaapeya mpanelani aahiiso yaanipaka iphaawu soovilikeya.+ Emana eyo yaasiva ntoko epoolu yoonaya,* yootakaheriwa ni makhura. 9 Okathi okame waakhumelela aya omuttettheni ohiyu, nave emana yaanimorela vookameni-vo.+

10 Moise aahiwiiwa atthu yinlaka ni imusi saya, khula mulopwana vamukhora va etenta* awe. Yehova aahinanariwa vanceene,+ nave Moise aahinanariwa vanceene ni atthu ale. 11 Moise aahimukoha Yehova, iiraka: “Xeeni muhalaka onanariwa ni miyo? Xeeni muhalaka okivaha muteko ola woovila woowaakhapelela atthu ala ootheene?+ 12 Ti miyo kaarupanle atthu ala ootheene? Ti miyo kaayanre, munikiirela anyu wiira: ‘Mwaayare ottuli wanyu, ntoko siisaale murumeyi onimukuxa awe mwaana onaamwa’, mpakha waaroiha elapo muleihenrye anyu waavaha amuhavinre aya?+ 13 Kinrowa ophwanya woowi enama wiira kaavahe atthu ala ootheene? Awo annithipelela wunla ohoolo waka, ahimyaka wiira: ‘Munivahe enama wiira nikhuure!’ 14 Miyo nkinwerya waakuxa atthu ala mekhaka. Muritti ola khoreere para miyo.+ 15 Akhala wiira ti siisa munrowa anyu okithokoreryaka, xontte, mukiive niinaano vaava.+ Mwakireerela murima, muhikihiye kiwehaka maxakha makina”.

16 Yehova aahimwaakhula Moise wiira: “Wa axitokweene a Isarayeli, mwaathukumanye alopwana 70, yaawo muniwoona anyu ophwanelela okhala* axitokweene ni makhulupale a atthu,+ mwaaroihe mutentani mwa muthukumano, wiira yakhale ni nyuwo. 17 Kinimoorwa weiwo+ kilavule ni nyuwo.+ Kinookumiha vakhaani ikuru saka soowaarya+ murina anyu, wiira kaavahe atthu awo. Vano awo animookhaliheryani waakhapelela atthu, wiira muhiteexeke mekhinyu muritti owo.+ 18 Mwaaleele atthu awo wiira: ‘Mwiilokiherye* para meelo.+ Munookhuura enama, okhala wiira Yehova oowiiwani munlaka.+ Nave, moohimya wiira: “Ti pani onrowa onivaha enama wiira nikhuure? WExiitu naanikhala saana”.+ Yehova onimoovahani enama, wiira mukhuureke.+ 19 Nyuwo khamunrowa okhuura nihiku nimosa, aahiiso mahiku manli, nnakhala mahiku mathanu, hata mahiku 10, aahiiso mahiku 20. 20 Masi munrowa okhuura enama eyo mweeri ntero, mpakha wookhumani mphulani ni oweettihani murima,+ okhala wiira moomukhootta Yehova, yoowo ori ni nyuwo. Nave muhinla ohoolo wawe, mwiiraka: “Xeeni nihalaka okhuma wExiitu?”’”+

21 Vano Moise aahaakhula wiira: “Alopwana arina aka, yaawo aneetta mwentto, ari 600.000.+ Nto nyuwo munihimya wiira: ‘Kinimwaavaha enama, ni anrowa okhuura mweeri ntero!’ 22 Hata siiviwaka ipwittipwitthi sinceene ni ipooyi sinceene, niireke saamwaaphiyerya atthu ala? Aahiiso hata saavariwe ihopa sootheene sa mphareya, niireke saamwaaphiyerya?”

23 Vano Yehova aahimwaakhula Moise, iiraka: “Niireke ntata na Yehova ti nookhuveya?+ Nyuwo munimoona akhala wiira ele enihimya aka enimwiiraneya aahiiso nnaari”.

24 Tivo, Moise aahirowa waaleela atthu ale moolumo a Yehova. Nave, aahaathukumanya alopwana 70 eriyari ya axitokweene a atthu ale, ni aahiwiiriha weemela arukurenrye ene etenta.+ 25 Yehova aahikhuruwa muneekuni+ onalavula ni Moise.+ Nto aahihavula ikuru sawe soowaarya vakhaani,+ seiyo saari ni Moise onvaha khula mmosa a axitokweene ale 70. Yaakhelaka-ru ikuru soowaarya, awo yaahipacerya olavula masu yaakhuma wa Muluku,+ masi yaapanke okathi yoole paahi.

26 Alopwana anli yaathanliwe nlelo yaari omuttettheni. Masina aya yaari, Elidadi ni Medadi. Awo yaahaakhela ikuru sa Muluku, okhala wiira yaari ekurupu ya atthu ale yaalempwale, masi khiyaaronwe etenta ya muthukumano. Siiso, awo yaahipacerya olavula ntoko maprofeta omuttettheni weiwo. 27 Mmiravo mmosa aahitthimaka orowaka omuleela Moise wiira: “Elidadi ni Medadi anilavula ntoko maprofeta omuttettheni!” 28 Vano Yooxuuwa,+ mwaana a Nuuni, yoowo ari murumeyi a Moise okhuma omiravo awe, aahimuleela wiira: “Moise, pwiya aka! Mwaakhoottiherye olavula!”+ 29 Masi Moise aahimukoha wiira: “Munaakhalela ehace mwaha wa miyo? Muhaakhalele ehace, miyo kaaniphavela wiira atthu ootheene a Yehova, elavuleke ntoko maprofeta, nave Yehova aavahe ikuru sawe soowaarya!” 30 Nuumala-vo, Moise ni axitokweene a Isarayeli yaahitthikela omuttettheni.

31 Vano, Yehova aahiiriha woopa epheyo, yeeyo yaaruuhale anapiri yaakhuma ophareya, ni yaawiiriha omora mukerekhere wa muttetthe.+ Anapiri awo yaahimwareela mapuro ootheene. Nto mutthu wiira ophiye nipuro yaamalenle aya, aahaana weetta nihiku ntero. Anapiri awo yaahuukelana okhuma vathi orowa osulu, mpakha emeeturu emosa ni isentiimeturu 10.* 32 Tivo, nihiku nle nootheene, ohiyu wootheene ni nihiku nootheene naattharelana, atthu yaahivenya anaattottela anapiri. Khula mutthu aahaattotta anapiri yaavikana ihoomeri 10.* Awo yaahiwaaneya mukerekhere mootheene mwa muttetthe. 33 Masi nlelo enama eri ene mwaano mwaya, ahinatthi otaphwela, Yehova aahinanariwa vanceene ni atthu ale. Nave, Yehova aahaakumiherya eretta yaawiivale atthu anceene.+

34 Awo yaahivaha opuro ole, nsina noowi Kibirothi-Hatawa,+ okhala wiira opuro yoole yaavithiwe aya atthu yoonihenrye nrima.+ 35 Atthu yaahivenya oKibirothi-Hatawa anarowa oHaserothi, khiyakhala oHaserothi+ weiwo.

12 Miriyamu ni Aroni yaahipacerya omwaapa Moise, mwaha woowi aahimuthela muthiyana a oKuxi.+ 2 Awo yaahimya so: “Niireke Yehova onilavula ni Moise paahi? Kiira onnilavula-tho ni hiyo?”+ Masi Yehova aaniwiiwa.+ 3 Moise aari mutthu oowiiyeviha* vanceene, waavikana atthu ootheene+ a mulaponi.

4 Niinaano-ru, Yehova aahimuhimeerya Moise, ni Aroni, ni Miriyamu wiira: “Nyuwosa araru, murowase otentani* wa muthukumano”. Nto ooraaru aya yaahirowasa. 5 Yehova aahikhuruwa muneekuni,+ eemela vamukhora va etenta, onamwiihana Aroni ni Miriyamu. Vano, oowanli aya yaahimwaattamela. 6 Owo aahaahimeerya wiira: “Xontte, nwiriyane moolumo aka. Vaakhanle wiira ookhala profeta mukina a Yehova eriyari anyu, miyo kaarowa wiisuweliha wa yoowo moolohani,+ ni kaarowa olavulaka nuuwo moolohani.+ 7 Masi nkiniira siiso ni murumeyi aka Moise! Konvahererya mmatatani mwawe atthu aka ootheene a Isarayeli.*+ 8 Miyo kinnilavula ni Moise ntoko siisaale mutthu onilavula awe ni mutthu mukhwaawe,+ awehanaka owiitho.* Kinilavula nuuwo mootaphuwa, kirumeelaka moolumo oowiiwanyeya. Nave owo onniweha owiitho wa Yehova. Nto xeeni muhoovaka omwaapa murumeyi aka Moise?”

9 Vano, Yehova aahinanariwa vanceene naawo. Nuumala-vo, aahikhuma ohoolo waya. 10 Okathi ene yoole, neeku naahikhuma vasulu va etenta! Miriyamu yaahimphwanya makokho,* yaawo yaari ootteela ntoko eneevi.+ Okathi Aroni anwenhe awe Miriyamu, aahoona wiira yaahimphwanya makokho.+ 11 Niinaano-ru, Aroni aahimuleela Moise wiira: “Pwiya aka, koovara metto! Xontte, muhinihiye naakhelaka ehukhumu mwaha wa etampi ela! Etthu yiirale ahu, khinuupuwenle saana. 12 Xontte, muhimuhiye Miriyamu olikanaka ntoko mutthu oyariwe ookhwa ene, yoowo mpantta mmosa wa erutthu awe wunttale okhumaka mmirimani mwa maama awe!” 13 Nto Moise aahipacerya omukhuwelela Yehova, iiraka: “Khoo Muluku aka, xontte, mumpenuxe! Xontte!”+

14 Yehova aahimwaakhula Moise wiira: “Vaakhanle wiira paapa awe oomusenela owiitho, niireke khaarowa wuulihiheya muru mpakha mahiku 7? Okumiheriwe ota wa muttetthe mpakha ovira mahiku 7,+ nuumala-vo, ottikihiweke”. 15 Siiso, Miriyamu aahikumiheriwa ota wa muttetthe mpakha mahiku 7.+ Nto atthu khiyaakhumme opuro ole, mpakha Miriyamu ottikihiwa. 16 Nuumala-vo, atthu yaahivenya oHaserothi,+ anarowa omaka woothakoni wa oParani.+

13 Vano, Yehova aahimuleela Moise wiira: 2 “Mwaarume alopwana orowa ohottela* elapo ya oKanaani, yeeyo enrowa aka waavaha aisarayeli. Khula nihimo mmurume mulopwana mmosa, yoowo ori mukhulupale+ a nihimo nawe”.+

3 Ari ene woothakoni wa oParani,+ Moise aahaaruma alopwana ale, ottharaka yooruma ya Yehova. Alopwana awo ootheene, yaari ahooleli aisarayeli. 4 Masina aya taala: nihimo na Rubeni, Xamuwa, mwaana a Zakuri; 5 nihimo na Simeyoni, Xafati, mwaana a Hori; 6 nihimo na Yuda, Kalebi,+ mwaana a Yefune; 7 nihimo na Isakari, Igali, mwaana a Yosefe; 8 nihimo na Efrayimi, Hoxeya,+ mwaana a Nuuni; 9 nihimo na Beniyamini, Paliti, mwaana a Rafu; 10 Nihimo na Zabuloni, Gadiyeli, mwaana a Sodi; 11 nihimo na Yosefe,+ eyo piiyo, nihimo na Manase,+ Gadi, mwaana a Susi; 12 nihimo na Dani, Amiyeli, mwaana a Gemali; 13 nihimo na Axeri, Seturi, mwaana a Mikhayeli; 14 nihimo na Nefetali, Nabi, mwaana a Wofisi; 15 nihimo na Gadi, Geweli, mwaana a Maki. 16 Ala masina a alopwana Moise aarumme awe orowa ohottela elapo. Nave Moise aahinvaha Hoxeya, mwaana a Nuuni, nsina noowi Yooxuuwa.*+

17 Okathi Moise aarumme awe orowa ohottela elapo ya oKanaani, aalenle wiira: “Murowe oNegebi, nuumala-vo, murowe muttetthe wa omiyaakoni.+ 18 Mwawehe moota elapo eri aya,+ ni mwaawehe atthu anikhala memmo akhala wiira toolipa aahiiso toohilipa, yaari vakhaani aahiiso anceene. 19 Nave, mwawehe akhala wiira elapo eyo, ti yooloka aahiiso ti yoohiloka, ni akhala wiira ipooma anikhala aya sookhalana muuru aahiiso khasirina muuru. 20 Mwawehe akhala wiira elapo eyo ti yooruwerya aahiiso ti yoohiruwerya,+ akhala wiira yookhalana miri aahiiso kherina miri. Mulipihe murima,+ ni mwattotte mihokorokho sa elapo eyo”. Ole waari okathi wa mihokorokho soopacerya ottokottha sa ewuuva.+

21 Siiso, awo yaahivenya anarowa ohottela elapo, okhuma woothakoni wa oSini+ mpakha oRehobi,+ waattamela oLebo-Hamati.*+ 22 Okathi yaavinre aya oNegebi, yaahiphiya oHebroni,+ weiwo yaakhala aya Ahimani, Xexayi, Talimayi+ ni osuulu wa Anaki.+ OHebroni waatekiwe iyaakha 7, ohinatthi otekiwa oSowani a wExiitu. 23 Okathi yaaphiyale aya nxepa* na wExikoli,+ yaahiikittha eritta yaarina niphara na iwuuva, yeeyo alopwana anli yaateexale aya vakoponi. Nave yaahikuxa-tho mihokorokho sikina siniitthaniwa roma ni ifiiku.+ 24 Awo yaahiitthana opuro ole nxepa na wExikoli,*+ okhala wiira aisarayeli yaahiikittha vaavale, niphara na iwuuva.

25 Nuuvira mahiku 40+ ahottelaka elapo, awo yaahitthika. 26 Nto yaatthikenle woothakoni wa oParani, oKadexi,+ weiwo aari awe Moise ni Aroni ni nloko nootheene na aisarayeli. Yaahikontari itthu sootheene siiraneyale, ni yaahiwooniherya mihokorokho sa elapo ele. 27 Vano etthu yaamulenle aya Moise tiila: “Nookela elapo mwaanirumme anyu, tthiri elapo yoowaatta eleeti ni oravo.+ Iya, mihokorokho sa elapo eyo.+ 28 Masi atthu anikhala elapo ele toolipa, ipooma saya ti suulupale ni sookhalana muuru woolipa. Nave-tho, nooweha osuulu wa Anaki.+ 29 Atthu a wAmaleki,+ anikhala elapo ya oNegebi.+ Vano ahiti, ayebusi,+ ni amori+ anikhala omiyaakoni. Akanaani,+ anikhala waattamela ophareya,+ ni okerekhere wa muro Yordani”.

30 Kalebi aaheererya waamaaliha atthu ale ohoolo wa Moise iiraka: “Naakuve orowa elapo ele wiira nakuxe, okhala wiira hiyo nnoowerya oxintta”.+ 31 Masi atthu yaarowanne awe yaahimmye wiira: “Nihirowe owana ni atthu ale, okhala wiira awo tootupa onivikana hiyo”.+ 32 Awo yaanithipelela waaleela aisarayeli itthu soohiloka+ sa elapo ele yaaronwe aya ohottela, yiiraka: “Elapo naaronwe ahu ohottela ti yoowoopiha, weiwo nyuwo mukhanle anyu ookhwa, alopwana ootheene naawenhe ahu elapo ele, toorakama ni ta ikuru.+ 33 Nave, nihaaweha manefili, anamwane a Anaki,+ yaawo ari osuulu wa manefili. Nailikanyiha naawo, ninkhala mwa isoope, nave awo annoona ntoko isoope”.

14 Vano, nloko nle nootheene naahithipelela wunla nikhuwelaka ohiyu ole wootheene.+ 2 Aisarayeli ootheene yaahipacerya omukhupanya Moise ni Aroni.+ Nave nloko nootheene naaniwaapa, niiraka: “Fataari naakhwenle elapo ya wExiitu, aahiiso naakhwiiye moothakoni muumu! 3 Xeeni Yehova ohalaka oniruuha elapo ela, wiira niiviwe ni espaata?*+ Awanani ahu animwaakuxa axaarihu ni aniihu.+ Nto xeeni nihitthikelaka wExiitu?”+ 4 Awo yaanihimeeryana wiira: “Nimuthanle muhooleli wiira nitthikele wExiitu!”+

5 Tivo, Moise ni Aroni yaahikokhora, yuurama mpakha vathi, ohoolo wa nloko nle nootheene na aisarayeli naathukumanne. 6 Yooxuuwa+ mwaana a Nuuni, ni Kalebi+ mwaana a Yefune, yaawo yaari ekurupu ya atthu ale yaaronwe ohottela elapo, yaahikhera malaya aya. 7 Nave yaahihimeerya nloko nle nootheene na aisarayeli wiira: “Elapo naaronwe ahu ohottela ti yootepa oreera.+ 8 Akhala wiira nnoomwiiwelela Yehova, owo onooneemererya, ni onoonikeliha elapo ele ni onoonivaha. Elapo ele ti yoowaatta eleeti ni oravo.+ 9 Masi muhimurukunuwele Yehova, ni muhiwoove atthu a elapo ele,+ vanookhweya waaxintta. Atthu awo khanilipana etthu. Yehova ori ni hiyo.+ Tivo, muhiwoove”.

10 Masi, nloko nootheene naalavula wiira naamwaavonyakasa maluku.+ Vano ovuwa wa Yehova waahikhumelela vatentani* va muthukumano, ohoolo wa atthu ootheene a Isarayeli.+

11 Vano, Yehova aahimuleela Moise wiira: “Atthu ala khanrowa okittittimiha mpakha silini?+ Khanrowa okaamini mpakha silini, hata kipanke ene itthu sootheene sootikiniha ohoolo waya?+ 12 Kinimwaakumiherya eretta wiira kaapwetexe. Nave kinimookhalihani nyuwo nloko noowaatta ni noowerya waavikana ale”.+

13 Masi Moise aahimuleela Yehova wiira: “Atthu a wExiitu, weiwo waakuminhe anyu atthu ala ni owerya wanyu, animwiiwa etthu ela.+ 14 Nto awo animwaleela atthu a elapo ela ya oKanaani. Nave-tho, ahiiwa wiira nyuwo Yehova, munnikhala ni atthu ala+ ni munnikhumelela ohoolo waya.+ Ahiiwa-tho wiira nyuwo mwa Yehova, ni muhiiriha neeku okhala vasulu omuttettheni waya. Nave othana munniweettiha murumeelaka neeku, vano ohiyu munniweettiha murumeelaka mooro.+ 15 Akhala wiira munoowiiva atthu ala ootheene okathi omosa,* maloko yiiwale ovuwa wanyu anrowa ohimyaka wiira: 16 ‘Yehova khowenrye waaroiha atthu ala elapo aaleihenrye awe waavaha, tivonto owiivale awe woothakoni’.+ 17 Xontte Yehova, mooniherye owerya wanyu, ntoko mwaaleihenrye anyu wiira: 18 ‘Miyo ka Yehova, oopisa onanariwa ni onooniherya vanceene ophenta woororomeleya,+ onaalevelela ale ahiniiwelela ni ooveeha. Masi onnaahukhumu atthu ootakhala murima. Nave onnaahukhumu axipaapa aya, anaaya, mpakha osuulu aya wa neeraru, ni osuulu aya wa neexexe.+ 19 Xontte, mwaalevelele atthu ala itampi saya, mwaha wa ophenta wanyu wuulupale woororomeleya, ntoko siisaale mwaalevelenle anyu atthu ala okhuma wExiitu mpakha vano”.+

20 Yehova aahimuleela wiira: “Miyo kinimwaalevelela ntoko muhimye anyu.+ 21 Masi kinnilaphela okumi aka wiira, elapo yootheene enooweha owerya wa Yehova.+ 22 Khuuvo mutthu oonale ovuwa waka ni itthu sootikiniha+ kipanke aka wExiitu, ni moothakoni, ni onithipelela okeehererya+ ikwaha 10, ni onikhootta okiiwelela,+ 23 onrowa oweha elapo kilamphe aka wiira kinimwaavaha axipaapa aya. Tthiri, khuuvo mutthu mmosa ohinikittittimiha, onrowa oweha.+ 24 Masi okhala wiira murumeyi aka Kalebi+ aahivirikana ni atthu akina, ni okathi wootheene onnikiiwelela ni murima awe wootheene. Mweekeekhai miyo kinoomwiiriha okela elapo ele aaronwe awe ohottela, ni osuulu awe onookhala axineene elapo ele.+ 25 Okhala wiira amaleki ni akanaani+ anikhala oxepani,* meelo muhaana ohokolowela woothakoni, nviraka ephiro enroiha ephareya Yooxeerya”.+

26 Nuumala-vo, Yehova aahimuleela Moise ni Aroni wiira: 27 “Nloko nla nootakhala ninrowa othipelela okikhupanya mpakha silini?+ Miyo koowiiwa aisarayeli akikhupanyaka.+ 28 Mwaaleele wiira, Yehova onihimya so: ‘“Kinnilaphela okumi aka wiira kinoowiirelani itthu sootheene kiwiiwalyaakani mulavulaka!+ 29 Tthiri ootheene yaarina iyaakha 20 orowa ohoolo, yaawo yaalempwale ni yaakikhupannye,+ animookhwa moothakoni-mu.+ 30 Khuuvo mutthu a nyuwo onrowa okela elapo koolaphenlyaakani* woovahani wiira mukhaleke-mo,+ ohikhanle Kalebi, mwaana a Yefune, ni Yooxuuwa, mwaana a Nuuni.+

31 “‘“Nave aniinyu yaawo muhimyale anyu wiira anookuxiwa,+ kinimwaakeliha ni waasuweliha elapo yeeyo nyuwo mukhontte anyu.+ 32 Masi nyuwosa munimookhwa moothakoni muumu. 33 Vano aniinyu anookhala amakampusi iyaakha 40+ moothakoni-mu, nyuwo munimwaakhula mwaha wookitthekela,* mpakha okhwa mutthu ookiserya a nyuwo moothakoni.+ 34 Nyuwo mwaahihottela elapo mahiku 40.+ Siiso, munimwaakhula mwaha wa itampi sanyu iyaakha 40.+ Nihiku nimosa kinrowa olikanyiha ni eyaakha emosa. Nto munoosuwela mixankiho sinikhumelela mwaha wa okikhootta.*

35 “‘“Miyo Yehova, kilavunle. Etthu enrowa aka wiiriha nloko nla nootheene nootakhala niiwananne ohikiiwelela, tiila: Anrowa okhwa, ni omala-mala moothakoni muumu.+ 36 Alopwana Moise aarumme awe wiira yahottele elapo, ni yiirinhe nloko nle nootheene omukhupanya Moise, okathi yaatthinke aya ahimyaka itthu soohiloka sa elapo ele,+ 37 eyo piiyo, alopwana yaale yaahimmye itthu soohiloka sa elapo ele, animwaakhela ehukhumu ni animookhwa ohoolo wa Yehova.+ 38 Masi Yooxuuwa, mwaana a Nuuni, ni Kalebi, mwaana a Yefune, yaawo yaari ekurupu ya atthu ale yaaronwe ohottela elapo, nlelo anookhala akumi”’”.+

39 Okathi Moise aalavunle awe moolumo ala, aaleelaka aisarayeli ootheene, atthu ale yaahiriipiwa murima vanceene. 40 Nave-tho, yaahivenya voosiisu aphavelaka owela vasulu va mwaako, anahimya wiira: “Vano hiyo nnoorowa elapo Yehova ohimmye awe wiira onoonivaha, okhala wiira noomutthekela Muluku”.+ 41 Masi Moise aahimmye wiira: “Xeeni muhiniiwelela anyu etthu Yehova onihimya awe? Itthu khasinrowa oweettelani saana. 42 Muhirowe! Yehova khokhanle ni nyuwo. Nave awanani anyu animooxinttani.+ 43 Amaleki ni akanaani animootuphelani,+ nave nyuwo munimwiiviwa ni espaata. Okhala wiira khammwiiwelenle Yehova, nto Yehova khonrowa okhala ni nyuwo”.+

44 Masi moowiikuxererya, awo yaahiwela vasulu va mwaako.+ Masi Nivuku na Nivarihano na Yehova khinaakhumme, nnakhala Moise khaakhumme omuttettheni.+ 45 Vano amaleki ni akanaani yaawo yaakhala mwaako ole, yaahikhuruwa yaatuphela, ni yaamwarya-mwarya mpakha oHorma.+

15 Yehova aahimuleela-tho Moise, wiira: 2 “Mwaaleele aisarayeli wiira: ‘Okathi munrowa anyu okela elapo kinoovahaakani wiira mwakhaleke,+ 3 nave munanvaha Yehova epooyi, epwittipwitthi wala epuri, ntoko yoovaha para opahiwa,+ ekhale enipahiwa aahiiso mukuttho wa omutaphula natiri, wala yoovaha yoohikhanyereriwa,+ aahiiso yoovaha enivahiwa okathi wa ifesta sa mahiku athanliwe vamwaakhani,+ wiira ekhale yoovaha yoowunkhela para Yehova,+ 4 mutthu onivaha inama iyo, ohaana onvaha-tho Yehova yoovaha ya ipyo ya otthu wooreerexa,*+ mpantta wa namuloko wa eefa* emosa ya otthu wooreerexa, wootakaahiwa ni mpantta wa neexexe wa ehiini* emosa ya makhura. 5 Nave-tho, muhaana ovaha mpantta wa neexexe wa ehiini emosa ya eviinyu, ntoko yoovaha eniwuriwa, vamosa ni yoovaha para opahiwa+ aahiiso mukuttho wa khula epwittipwitthi yaamukhaani yoolopwana. 6 Para epwittipwitthi yoolopwana, muhaana ovaha vamosa ni yoovaha ya ipyo, eyo piiyo, iliituru xexe nnimeya* na otthu wooreerexa otakaahiwe ni mpantta wa neeraru wa ehiini emosa ya makhura. 7 Nave-tho, muhaana ovaha mpantta wa neeraru wa ehiini emosa ya eviinyu, ntoko yoovaha eniwuriwa, ni yoowunkhela enimusivela* Yehova.

8 “‘Masi akhala wiira munivaha epooyi emosa yaamukhaani yoolopwana, ntoko yoovaha para opahiwa+ aahiiso mukuttho wa omutaphula natiri,+ wala mikuttho sa opatthani para Yehova,+ 9 epooyi eyo muhaana ovaha vamosa ni yoovaha ya ipyo+ sa mipantta miraru sa namuloko wa eefa ya otthu wooreerexa, otakaahiwe nnimeya na ehiini ya makhura. 10 Nave, muhaana ovaha nimeya na ehiini na eviinyu, ntoko yoovaha eniwuriwa,+ ni ntoko yoovaha yoopahiwa, yoowunkhela enimusivela* Yehova. 11 Ela ti etthu ekhanle oowiirihiwa khula epooyi, khula epwittipwitthi yoolopwana, khula epwittipwitthi yaamukhaani yoolopwana, ni khula epuri. 12 Hata nvahaka inama sinceene, muhaana ovaha para khula enama otthu wootakaaheriwa makhura ni yoovaha eniwuriwa. 13 Ti siisa aisarayeli ootheene akhanle aya oovaha yoovaha aya yoopahiwa, ntoko mukuttho woowunkhela onimusivela* Yehova.

14 “‘Akhala namurwa onikhala ni nyuwo, aahiiso mutthu onikhala ni nyuwo okathi munceene, ohaana ovaha-tho yoovaha awe yoopahiwa, ntoko mukuttho woowunkhela onimusivela* Yehova. Owo ohaana opaka ntoko munipaka anyu.+ 15 Nyuwo mwisarayeli ni namurwa onikhala ni nyuwo, muhaana otthara nlamulo nimosa-ru. Nla nlamulo na mahiku ootheene para osuulu anyu wootheene. Namurwa ohaana olikanaka ni nyuwo ohoolo wa Yehova.+ 16 Nihaana okhala nlamulo nimosa-ru ni maphukelo mamosa-ru, para nyuwo ni para namurwa onikhala ni nyuwo’”.

17 Yehova aahimuleela Moise wiira: 18 “Mwaaleele aisarayeli wiira: ‘Mwakela elapo kinooroihakani, 19 ni munalya eyoolya* ya elapo eyo,+ muhaana onvaha etthu Yehova. 20 Muhaana ovaha iphaawu sipakiwe ntoko anela, seiyo sipakiwe ni otthu woopacerya* wa ipyo soopacerya ohemphwa.+ Yoovaha ela, muhaana opaka ntoko enipakiwa aya yoovaha enikhuma nipuro nneepetthiwa ipyo. 21 Maloko anyu ootheene, ahaana onvaha Yehova yoovaha epakiwe ni otthu woopacerya* wa ipyo soopacerya ohemphwa.

22 “‘Mwapaka etampi ni mwahiya wiiwelela sooruma iya sootheene Yehova omulenle awe Moise, 23 itthu sootheene Yehova aamurumme awe Moise, okhuma nihiku Yehova aalavunle awe para maloko anyu ootheene, 24 nave akhala wiira etthu eyo epakiwe voohilakela, ni nloko nihisuwela, nto nloko nootheene nihaana ovaha epooyi emosa yaamukhaani yoolopwana, ntoko yoovaha para opahiwa yoowunkhela enimusivela Yehova,* vamosa ni yoovaha ya ipyo, ni yoovaha eniwuriwa, ni epuri yaamukhaani yoolopwana ntoko yoovaha para oleveleliwa etampi,+ muttharaka malakiheryo.+ 25 Namukuttho onooreeriha nloko nootheene na aisarayeli, nto awo anooleveleliwa itampi saya,+ maana apanke etthu eyo voohilakela. Nave aaruuha yoovaha aya yoopahiwa enivahiwa Yehova ni yoovaha para oleveleliwa etampi ohoolo wa Yehova, mwaha wa etthu apanke aya voohilakela. 26 Nloko nootheene na Isarayeli ni namurwa onikhala eriyari aya anooleveleliwa, okhala wiira atthu awo apanke etthu eyo voohilakela.

27 “‘Akhala wiira mutthu oopaka etampi voohilakela, ohaana oruuha epuri yoothiyana ya eyaakha emosa, ntoko yoovaha para oleveleliwa etampi.+ 28 Namukuttho onoovaha epuri eyo wiira mutthu owo oleveleliwe itampi sawe, okhala wiira oomutthekela Yehova voohilakela. Namukuttho onoovaha epuri eyo wiira mutthu owo oleveleliwe itampi sawe, nto onooleveleliwa.+ 29 Nihaana okhala nlamulo nimosa-ru para mutthu onipaka etthu voohilakela,+ okhale mwisarayeli aahiiso namurwa onikhala eriyari aya.

30 “‘Masi mutthu yoole onipaka etampi voolakelela,+ okhale mwisarayeli aahiiso namurwa onikhala eriyari anyu, onveeha Yehova, nto ohaana wiiviwa. 31 Okhala wiira oothanya nuulumo na Yehova ni khiiwelenle yooruma awe, mutthu owo ohaana wiiviwa.+ Onimwaakhula mwaha wa etampi awe’”.+

32 Nlelo aisarayeli ari ene moothakoni, awo yaahimphwanya mutthu mmosa othayaka ikhuni nihiku na saabadu.+ 33 Atthu ale yaaphwannye mutthu ole othayaka ikhuni yaahimuroiha wa Moise ni Aroni ni wa nloko nootheene. 34 Okhala wiira khiyaasuweliwa etthu yaarowa awe wiirihiwa mutthu ole, awo yaahimutthukwela.+

35 Yehova aahimuleela Moise wiira: “Mulopwana owo ohaana wiiviwa.+ Vano, nloko nootheene nihaana onvonyakasa maluku, ota wa muttetthe”.+ 36 Tivo, nloko nootheene naahimukumiherya mutthu ole ota wa muttetthe, ni naahinvonyakasa maluku mpakha okhwa, siisaale ntoko Yehova aamurumme awe Moise.

37 Yehova aahimuleela Moise wiira: 38 “Mwaaleele aisarayeli wiira, awo ni osuulu aya wootheene, ahaana ottotthela maliinya mukerekhere mwa malaya aya,+ ni ahele etthu yooripelela ntoko mukhoyi, vasulu va maliinya awo. 39 ‘Malaya anyu ahaana okhalana maliinya awo, wiira okathi oniweha anyu awuupuxeryekeni sooruma sootheene sa Yehova ni mwiiweleleke.+ Muhitthareke mirima sanyu, nnakhala maitho anyu, yaawo aniwiirihani oraruwa ni amuluku akina.*+ 40 Ela enimookhaliheryani wuupuwela sooruma saka sootheene. Nto nyuwo munrowa wiiwelelaka ni munookhala oowaarya para Muluku anyu.+ 41 Miyo ka Yehova, Muluku anyu. Ti miyo kookuminheni elapo ya wExiitu, wiira kooniherye wiira ka Muluku anyu.+ Miyo ka Yehova, Muluku anyu’”.+

16 Vano Kora,+ ahivenya otakaahana ni Datani ni Abirami ni Oni. Kora aari osuulu wa Levi. Nto Levi+ aahimuyara Kehathi,+ vano Kehathi aahimuyara Isehari, nto Isehari+ aamuyanre Kora. Datani, Abirami ni Oni, yaari osuulu wa Rubeni.+ Datani ni Abirami yaari anamwane a Eliyabi.+ Vano Oni aari mwaana a Pelethi. 2 Awo vamosa ni aisarayeli 250, yaahimurukunuwela Moise. Atthu awo yaari makhulupale a nloko, yaathanliwe eriyari ya maloko, ni yaari alopwana ookupaliwa. 3 Nto yaahithukumana,+ anarowa wa Moise ni Aroni, anaaleela wiira: “Hiyo noophweeleya ni nyuwo! Nloko nootheene noothanliwa ni Muluku.+ Nave, Yehova ori eriyari aya.+ Nto, xeeni muniihela anyu vasulu va nloko na Yehova?”

4 Okathi Moise aiwale awe eyo, aahikokhora niinaano-ru, uurama mpakha vathi. 5 Nuumala-vo, aahimuleela Kora ni atthu ootheene yaamukhaliherya Kora owo, iiraka: “Meelo voosiisu, Yehova onoomooniherya ole ori awawe,+ ole ori oowaarya, ni okhanle oomwaattamela.+ Mutthu yoole onrowa awe omuthanla,+ tonrowa omwaattamela. 6 Nyuwo Kora ni atthu ootheene anookhaliheryani,+ mwiire so: Mukuxe etthu enipahiwa-mo nsenso,*+ 7 nto meelo voosiisu muhele-mo makhala a mooro ni nsenso, mpwehe ohoolo wa Yehova. Mulopwana Yehova onrowa awe omuthanla,+ yoowo tori oowaarya. Nyuwo anamwane a Levi,+ etthu ela ehaana omala!”

8 Nuumala-vo, Moise aahimuleela Kora wiira: “Xontte, nyuwo anamwane a Levi, nwiriyane: 9 Niireke wiira munoona okhala etthu yaamukhaani Muluku a Isarayeli woovalaanyani eriyari ya nloko na aisarayeli,+ ni oweemereryani omwaattamela wiira nvareke muteko mutapernaakulu mwa Yehova, ni mwaavareleke muteko aisarayeli?+ 10 Nyuwo anamwane a Levi, munoona wiira etthu yaamukhaani Muluku oweemereryani wiira mmwaattameleke vamosa ni axinninyu? Muniphavela-tho okhala anamukuttho?+ 11 Tivonto, nyuwo ni atthu ootheene anookhaliheryani, yaawo athukumanne, munninvirikanyasa Yehova. Aroni opanke-ni, wiira mmwaapeke?”+

12 Nuumala-vo, Moise aahiruma wiitthaniwa Datani ni Abirami,+ anamwane a Eliyabi. Nto awo yaahaakhula wiira: “Hiyo khaninrowa! 13 Munoona wiira etthu yaamukhaani onikumiha elapo yoowaatta eleeti ni oravo, wiira muniirihe okhwa moothakoni-mu?+ Muniphavela-tho wiikhaliha namalamulela ahu?* 14 Nyuwo khamuniruuhale elapo yoowaatta eleeti ni oravo,+ nnakhala khamunivanhe ematta ya ewuuva ntoko yoohiyeriwa. Munuupuwela wiira atthu ala khanoona? Hiyo khaninrowa!”

15 Moise aahinanariwa vanceene, onamuleela Yehova wiira: “Muhaakhele yoovaha aya ya ipyo. Nkinamukuxe puuru aya, nnakhala nkinawiirihe etthu yootakhala atthu ale”.+

16 Nuumala-vo, Moise aahimuleela Kora wiira: “Nyuwo ni Aroni ni atthu ootheene anookhaliheryani, murwe meelo voosiisu ohoolo wa Yehova. 17 Khula mutthu ohaana okuxa etthu onipaha awe nsenso* ni ohele-mo nsenso. Nave khula mutthu ohaana oroiha etthu eyo ohenle awe nsenso ohoolo wa Yehova. Itthu iyo sihaana okhala 250. Nyuwo ni Aroni, khula mmosa okuxe yawawe”. 18 Tivo, khula mutthu aahikuxa etthu aahela awe nsenso, ohela makhala a mooro ni nsenso. Nto atthu awo yaaheemela vamukhora va etenta* ya muthukumano, vamosa ni Moise ni Aroni. 19 Nuumala Kora waathukumanya vamukhora va etenta ya muthukumano ale yaamukhaliherya+ wiira anvaanyiheke Moise ni Aroni, ovuwa wa Yehova waahikhumelela nloko nootheene.+

20 Yehova aahimuleela Moise ni Aroni wiira: 21 “Nvalaane ni ekurupu ela, wiira miyo kiwiive niinaano-va”.+ 22 Vano, Moise ni Aroni yaahikokhora yuurama mpakha vathi, anahimya wiira: “Khoo Muluku, ti nyuwo munaavaha okumi atthu ootheene.+ Niireke munrowa onanariwa ni nloko nootheene, mwaha wa etampi ya mutthu mmosa paahi?”+

23 Nuumala-vo, Yehova aahimuleela Moise iiraka: 24 “Mwaaleele aisarayeli wiira: ‘Muhaattamele etenta ya Kora, ya Datani, ni ya Abirami!’”+

25 Vano Moise aahivenya, onarowa wa Datani ni Abirami. Nave makhulupale+ a Isarayeli yaahirowa nuuwo. 26 Moise aahaaleela atthu ootheene wiira: “Xontte murakamele itenta sa alopwana ala ootakhala ni muhivare etthu eri yawaya. Siiso, nyuwo khamunrowa wiiviwa mwaha wa itampi saya”. 27 Moowaakuveya, atthu yaahirakamela etenta ya Kora, ya Datani, ni ya Abirami. Vano, Datani ni Abirami yaahikhumela ota yeemela ohoolo wa itenta saya, vamosa ni axaaraya, ni anaaya aalupale ni acikhaani.

28 Nto Moise aahihimya wiira: “Itthu sinrowa wiiraneya niinaano-va, sinoowooniheryani wiira Yehova tokirumme, ni wiira khahiyo kinimwiikuxererya:* 29 Vakhala wiira atthu ala anrowa okhwa enamuna enikhwa aya atthu ootheene, ni vakhala wiira ehukhumu aya enrowa okhala emosa-ru ntoko ehukhumu ya atthu ootheene, weeso Yehova khokirumme.+ 30 Masi vakhala wiira Yehova onoopaka etthu yootikiniha, ni etthaya khihuleya,* khaamirya alopwana ala ni itthu saya sootheene, nave yakhuruwela Mmahiye* ari ene akumi, weeso munoosuwela tthiri wiira atthu ala khamuttittiminhe Yehova”.

31 Omalaka-ru olavula, etthaya yaahihuleya.+ 32 Etthaya yaahihuleya ni yaamirya, vamosa ni itthoko saya ni atthu ootheene yaamukhaliherya Kora+ ni mireerelo saya sootheene. 33 Tivo, awo ni atthu ootheene yaakhaliherya, yaahirowa Mmahiye* ari ene akumi, etthaya yaakhuneela. Siiso awo yaahirimeela.*+ 34 Okathi yanla aya akhuwelaka, aisarayeli ootheene yaawaattamenle yaahitthyawa, ahimyaka wiira: “Ni hiyo-tho ninnoova omiriwa ni etthaya!” 35 Vano waahikhuma mooro wa Yehova,+ waapaha alopwana 250 yaavaha nsenso.+

36 Yehova aahimuleela Moise wiira: 37 “Mmuleele Eleyazari, mwaana a namukuttho Aroni, wiira okumihe vamooroni itthu sinipahiwa-mo nsenso,+ okhala wiira ti soowaarya. Nave-tho mmuleele wiira oyiiherye mooro owo ottaiwene. 38 Itthu saapahiwa-mo nsenso yaakunxe aya atthu ale akhwiiye mwaha woottheka, sihaana opakaniwa ilaamina sa elaata wiira siheliwe valtaari.+ Okhala wiira aavahererya ohoolo wa Yehova, iyo sookhalihiwa soowaarya. Sihaana okhala esinaale enaalopola aisarayeli”.+ 39 Tivonto, namukuttho Eleyazari aahikuxa itthu sa ekoopiri saapahiwa-mo nsenso, seiyo saavahiwe ni ale yaapahiwe ni mooro, opaka ilaamina wiira ohele valtaari, 40 ntoko siisaale Yehova aamurumme awe, omurumeelaka Moise. Eyo yaaniwuupuxerya aisarayeli wiira khuuvo mutthu mukina, ahaakhanle a osuulu wa Aroni, eemereriwa ovaha nsenso ohoolo wa Yehova.+ Nave, khuuvo mutthu aakhanle oomutakiha Kora ni ale yaamukhaliherya.+

41 Nihiku naattharelana, nloko nootheene na aisarayeli naahipacerya omwaapa Moise ni Aroni,+ ariki: “Ti nyuwo oowanli nwiivale atthu a Yehova”. 42 Okathi nloko nle naathukumanne aya wiira ninvaanyihe Moise ni Aroni, naahiweha etenta* ya muthukumano, ni naahiweha wiira neeku naahikhuneela etenta eyo, ni ovuwa wa Yehova waahipacerya okhumelela.+

43 Moise ni Aroni yaahirowa ohoolo wa etenta ya muthukumano.+ 44 Vano Yehova aahimuleela Moise wiira: 45 “Mukhumase eriyari ya nloko nla wiira kipwetexe voohipisa-va”.+ Tivo, awo yaahikokhora, yuurama mpakha vathi.+ 46 Moise aahimuleela Aroni wiira: “Mukuxe etthu enipahiwa-mo nsenso, muhele makhala a mooro+ ni nsenso, murowe moowaakuveya opuro ori atthu, wiira aleveleliwe itampi saya,+ okhala wiira Yehova oonanariwa. Atthu aapacerya okhwa mwaha wa ehukhumu!” 47 Niinaano-ru, Aroni aahikuxa etthu enipahiwa-mo nsenso, ntoko Moise aamulenle awe, otthimakela eriyari ya atthu!* Masi atthu yaahipacerya okhwa mwaha wa ehukhumu. Aroni aahipweha nsenso munipahiwa aya, wiira atthu aleveleliwe itampi saya. 48 Aroni aaheemela eriyari ya atthu ookhwa ni atthu akumi. Vano ehukhumu ele yaahimaala. 49 Atthu yaakhwiiye mwaha wa ehukhumu yaari 14.700, ohaakontari ale yaakhwiiye mwaha wa Kora. 50 Okathi Aroni aahokolowenle awe wa Moise vamukhora va etenta ya mithukumano, ehukhumu ele yiira emanle ene.

17 Vano, Yehova aahimuleela Moise wiira: 2 “Mwaaleele aisarayeli wiira khula mukhulupale a nihimo+ oruuhe ekopo emosa. Sihaana okhala ikopo 12. Khula ekopo mulepe nsina na khula mukhulupale. 3 Ekopo ya Levi muhaana olepa nsina na Aroni, okhala wiira eri ekopo emosa para khula mukhulupale a nihimo. 4 Muhele ikopo iyo mutentani* mwa muthukumano ohoolo wa nivuku na Onamoona,+ opuro yoowo kinimakela aka wookhumelelani.+ 5 Ekopo ya mulopwana kinrowa aka omuthanla,+ tenrowa ophuwa. Nave kinoowiiriha aisarayeli yaawo anookhupanyani,+ ottharuwa okikhupanya”.+

6 Tivonto, Moise aahaaleela moolumo awo aisarayeli ni makhulupale ootheene yanvanhe ikopo, eyo piiyo, ikopo 12, khula mukhulupale a nihimo para ekopo emosa. Vano ekopo ya Aroni yaari eriyari ya ikopo iye. 7 Moise, aahihela ikopo iye ohoolo wa Yehova mutentani mwa Onamoona.

8 Mmeeloni mwaya, Moise aahikela mutentani mwa Onamoona. Nto aahiweha wiira ekopo ya Aroni, yeeyo yaaruuhiwe ni nihimo na Levi, yaahiphuwa ithutu, ifilori, ni amentowa oottokottha. 9 Vano Moise aahikumiha ikopo iye sootheene ohoolo wa Yehova, onaroiha vate yaari atthu ootheene a Isarayeli. Awo yaahiweha ikopo iye, nto khula mukhulupale aahikuxa ekopo awe.

10 Yehova aahimuleela Moise wiira: “Muttikiherye ekopo ya Aroni+ ohoolo wa nivuku na Onamoona yakhaleke vaavo, ntoko esinaale+ para ale ahiniiwelela.+ Siiso, awo anoohiya okikhupanya miyo wiira ahikhwe”. 11 Niinaano-ru, Moise aahipaka siisaale ntoko Yehova aamurumme awe. Owo aahiira siisaale ntoko aarummwale awe.

12 Nto aisarayeli yaahimuleela Moise wiira: “Vano hiyo nnimookhwa. Tthiri hiyo nnimookhwa. Ootheene ahu ninrowa okhwa! 13 Khula mutthu onrowa waattamela etapernaakulu ya Yehova, hata okhalaka vakhaani, onimookhwa!+ Niireke ootheene ahu nihaana okhwa siisa?”+

18 Nuumala-vo, Yehova aahimuleela Aroni wiira: “Nyuwo ni aniinyu ni osuulu anyu, munimwaakhula mwaha wa itthu sootakhala sininanariha nipuro noowaarya.+ Nave nyuwo ni aniinyu, munimwaakhula mwaha wa itthu sootakhala siniiraneya okathi munivara anyu muteko wa onamukuttho.+ 2 Nave-tho, nwiihane axinninyu a nihimo na Levi, eyo piiyo, nihimo na amuhavinre anyu, wiira akhale ni nyuwo, yookhaliheryekeni nyuwo+ ni aniinyu, ohoolo wa etenta* ya Onamoona.+ 3 Awo ahaana ovara muteko mwaathanlenle anyu, ni ahaana ovara itthu sinivarihana ni miteko sootheene sa mutentani.+ Masi ahaattamele itthu sa nipuro noowaarya ni sa valtaari, wiira awo ahikhwe nnakhala nyuwo muhikhwe.+ 4 Awo anookhala ni nyuwo ni anoovaraka miteko saya sa okhapelela etenta ya muthukumano. Nave ohikhale mutthu oheemereriwe* onrowa owaattamelasani.+ 5 Nyuwo paahi munrowa ovaraka miteko sa onamukuttho nipuro noowaarya+ ni valtaari.+ Siiso, miyo nkinrowa onanariwa+ ni aisarayeli. 6 Miyo kihaavalaanya axinninyu, eyo piiyo, alevi, eriyari ya aisarayeli wiira koovaheeni.+ Awo atthu avahiwe awe Yehova wiira avareke muteko wa okhapelela etenta ya muthukumano.+ 7 Nyuwo ni aniinyu ti mukhanle oovaraka miteko sa onamukuttho sinivarihana ni altaari ni itthu siri Nipuro Noowaaryexa,* ottuli wa ekortiina.+ Nave muhaana ovaraka muteko ola.+ Miyo kihoovahani muteko wa onamukuttho. Khula mutthu oheemereriwe* onrowa waattamela, ohaana wiiviwa”.+

8 Nave-tho, Yehova aahimuleela Aroni wiira: “Miyo kihoovahani muteko wooweherya itthu kivahiwe aka.+ Kihoovahani nyuwo ni aniinyu mpantta wa itthu sootheene sooreerihiwa aisarayeli avanhe aya.+ Nla nlamulo na mahiku ootheene. 9 Itthu sooreerihiwa soopahiwa ni mooro, seiyo sinrowa okhala sawinyu, tiiya: itthu sootheene aisarayeli akiruuhenle aya, ohela muhina soovaha saya sa ipyo,+ soovaha saya para oleveleliwa itampi,+ ni soovaha saya mwaha wa okhalana mulattu.+ Iya itthu soowaaryexa para nyuwo ni aniinyu. 10 Muhaana olya nipuro noowaaryexa.+ Alopwana ootheene pooti olya. Sihaana okhala soowaarya para nyuwo.+ 11 Nave-tho, itthu sikina sawinyu tiiya: itthu aisarayeli anivaha aya+ vamosa ni soovaha sootheene sineettihiwa.+ Kihoovahani nyuwo ni aniinyu axilopwana, ni aniinyu axithiyana. Nla nlamulo na mahiku ootheene.+ Atthu ootheene a etthoko anyu areerihiwe, pooti olya.+

12 “Kinnoovahani+ mihokorokho soopacerya ohemphwa,+ seiyo aninvaha aya Yehova, eyo piiyo, makhura ootheene ooreerexa ni eviinyu yootheene esya yooreerexa, ni ipyo. 13 Mihokorokho sootheene soopacerya ottokottha sinikhuma elapo aya, seiyo aninvaha aya Yehova, sinrowa okhala sawinyu.+ Atthu ootheene a etthoko anyu areerihiwe, pooti olya.

14 “Itthu sootheene aisarayeli anvanhe aya Muluku* sinrowa okhala sawinyu.+

15 “Anamwane ootheene axilopwana oopacerya oyariwa aahiiso inama sootheene soopacerya ototholiwa,+ seiyo anrowa aya onvaha Yehova, sihaana okhala sawinyu. Masi muhaana owoopola anamwane awo oopacerya oyariwa,+ ni woopola inama soohiloka soopacerya ototholiwa.+ 16 Anamwane awo ahaana woopoliwa nuumala ovira mweeri mmosa. Esisapo aya enrowa okhala ya ixeekele thanu,*+ etthariwaka exeekele ya nipuro noowaarya. Exeekele emosa, ehaana okhala ikheera* 20. 17 Muhoopole epooyi yoolopwana yoopacerya ototholiwa, ni epwittipwitthi yoolopwana yoopacerya ototholiwa, nnakhala epuri yoolopwana yoopacerya ototholiwa.+ Inama iyo ti sooreerihiwa. Ephome ya inama iyo muhaana otathela valtaari+ ni opaha ekortuura aya ntoko yoovaha yoopahiwa, yoowunkhela enimusivela* Yehova.+ 18 Enama aya ehaana okhala yawinyu. Eyo ehaana okhala yawinyu, vamosa ni epeeto ya yoovaha eneettihiwa ni mwetto woolopwana.+ 19 Miyo kinoovahani nyuwo, ni aniinyu axilopwana, ni aniinyu axithiyana, soovaha sootheene sooreerihiwa aisarayeli aninvaha aya Yehova.+ Nla nlamulo na mahiku ootheene,+ ni nivarihano na maakha,* nenlo Yehova opanke awe ni nyuwo ni osuulu anyu”.

20 Yehova aahimuleela Aroni wiira: “Elapo ya wIsarayeli, nyuwo khamunrowa ovahiwa etthaya+ wiira mwaahiyerye aniinyu mwakhwa vale. Miyo kinrowa wookhapelelani, ni kinimoovahani itthu munipirisari anyu eriyari ya aisarayeli.+

21 Vano atthu a nihimo na Levi, miyo kihaavaha mpantta wa namuloko+ wa itthu siniruweriwa wIsarayeli, ntoko etthu anihiyeriwa aya mwaha wa muteko anivara aya mutentani mwa muthukumano. 22 Ohikhale mutthu a wIsarayeli, onrowa-tho waattamela etenta ya muthukumano. Akhala wiira onimwiira siiso, onoottheka ni onimookhwa. 23 Alevi tanrowa ovaraka muteko mutentani mwa muthukumano. Nave tanrowa waakhulaka mwaha wa itampi saya.+ Awo ahaakhele etthaya mulaponi mwa Isarayeli.+ Nla nlamulo na mahiku ootheene para osuulu anyu wootheene. 24 Miyo kihaavaha alevi mpantta wa namuloko wa itthu aisarayeli aninvaha aya Yehova. Eyo eri ntoko etthu ehiyeriwe aya. Tivonto, kihimyale aka wiira: “Mulaponi mwa aisarayeli, awo ahivahiwe etthaya ntoko etthu ehiyeriwe aya’”.+

25 Yehova aahimuleela Moise wiira: 26 “Mwaaleele alevi wiira: ‘Aisarayeli animoovahani epantte ya namuloko ya itthu kinoovahaakani wiira ekhale etthu ehiyeriwe anyu.+ Nto nyuwo muhaana ohavula mpantta wa namuloko wa itthu iyo, wiira munvahe Yehova.+ 27 Muluku onrowa woonaka itthu munivaha anyu ntoko ti sawinyu, eyo piiyo, ipyo sanyu sinikhuma nipuro muneepettha anyu ipyo,+ eviinyu anyu aahiiso makhura anyu. 28 Ti siiso munrowa anyu onvaha Yehova ipantta sootheene sa namuloko, munivahiwa anyu ni aisarayeli. Muhaana onvaha namukuttho Aroni, itthu muninvaha anyu Yehova. 29 Wa itthu munaakhela anyu, muhaana othanla epantte yootepexa oreera wiira munvahe Yehova.+ Eyo enrowa okhala etthu yooreerihiwa’.

30 Nave mwaaleele alevi wiira: “Okathi nyuwo alevi muninvaha anyu Muluku itthu sootepexa oreera wa itthu nvahiwe anyu, owo onrowa woonaka ntoko ti sawinyu, eyo piiyo, ipyo sanyu, eviinyu anyu, ni makhura anyu. 31 Nyuwo ni etthoko anyu pooti olya itthu iyo khula opuro, okhala wiira eyo etthu muniliviwa anyu mwaha wa muteko munivara anyu mutentani mwa muthukumano.+ 32 Mwanvaha Muluku itthu sootepa oreera, nyuwo khamunrowa okhalana mulattu. Nave muhinanarihe itthu sooreerihiwa sa aisarayeli. Mwiira siiso, munimookhwa’”.+

19 Yehova aahimuleela-tho Moise ni Aroni, iiraka: 2 “Nlamulo Yehova orumme awe tinla: ‘Mwaaleele aisarayeli wiira aruuhe epooyi yoothiyana yooxeerya, ehiniwereiwa, yoohirakala+ ni ehitonko ovarihiwa muteko. 3 Nyuwosa muhaana onvahererya epooyi eyo namukuttho Eleyazari. Nto owo onooroiha ota wa muttetthe, wiira ehitiwe ohoolo wawe. 4 Vano Eleyazari onoonaaniha ekatha awe mphomeni mwa epooyi eyo, ni onootathela ephome aya ikwaha 7, ohoolo wa mukhora wa etenta* ya muthukumano.+ 5 Nto epooyi eyo enoopahiwa ohoolo wa namukuttho owo. Esapala aya, ni enama aya, ni ephome aya vamosa ni mavi aya, sinoopahiwa.+ 6 Nave namukuttho onookuxa matera a eseeturu, ni mutathi oniihaniwa isopo,*+ ni ekuwo yooxeerya, orihele vaikho, opuro onipahiwa epooyi eyo. 7 Namukuttho onookattha malaya awe ni onoorapa. Nuumala-vo, pooti orowa omuttettheni. Masi onrowa okhala oohiloka mpakha vahalaka wiila.

8 “‘Ole opanhe epooyi eyo, ohaana okattha malaya awe ni orapa. Nave onrowa okhala oohiloka mpakha vahalaka wiila.

9 “‘Mulopwana oreerihiwe, onookhupa ettuurwa ya epooyi eyo epahiwe,+ ni onoopweha opuro wooloka, ota wa muttetthe. Nloko na aisarayeli nihaana osuka ettuurwa eyo wiira nitakaaheke ni maasi, yaawo anrowa orumeeliwaka para oreeriha.+ Ela yoovaha para oleveleliwa etampi. 10 Ole okhumpe ettuurwa ya epooyi eyo, ohaana okattha malaya awe, ni onrowa okhala oohiloka mpakha vahalaka wiila.

“‘Nla ninrowa okhala nlamulo na mahiku ootheene, para aisarayeli ni namurwa onikhala eriyari aya.+ 11 Ole onrowa ovara murutthu, onrowa okhala oohiloka mpakha mahiku 7.+ 12 Mutthu owo ohaana wiireeriha ni maasi nihiku na neeraru. Nto nihiku na neethanu nenli tonrowa awe okhala ooloka. Masi akhala wiira khoniireeriha nihiku na neeraru, khonrowa okhala ooloka nihiku na neethanu nenli. 13 Ole onivara murutthu, ohinaireeriha, onnihonona etapernaakulu ya Yehova.+ Mutthu owo ohaana wiiviwa munlokoni mwa Isarayeli.+ Okhala wiira khotatheliwe maasi anireeriha,+ owo khoreerihiwe, nave onrowa okhala oohiloka.

14 “‘Nlamulo nikhanle ootthariwaka okathi mutthu onikhwela awe mutentani, tinla: Khula mutthu onikela mutentani-mmo ni khula mutthu ori mutentani memmo, onrowa okhala oohiloka mpakha mahiku 7. 15 Miyaapu sootheene sihikhuneeliwe ni sihirina etampa, sinookhala soohiloka.+ 16 Khula mutthu ori vate onrowa omukwannya mutthu iiviwe ni espaata* aahiiso okwannya murutthu, wala nikhuva na mutthu aahiiso mahiye, onrowa okhala oohiloka mpakha mahiku 7.+ 17 Wiira oreerihiwe mutthu owo, awo ahaana okuxa ettuurwa vakhaani ya yoovaha para oleveleliwa etampi, ahele mmwaapuni. Nuumala-vo, ahele mmwaapuni-mmo maasi arikiwe muro onivira 18 Nto mutthu ohiinanarinhe,+ onookuxa mutathi oniihaniwa isopo,+ oxuweye mmaasini ni otathele etenta ni miyaapu sootheene. Nave-tho, onimwaatathela atthu yaari opuro ole, ni onoomutathela mutthu ovanre nikhuva na mutthu ookhwa aahiiso onvanre mutthu iiviwe, wala ovanre murutthu aahiiso ovanre mahiye. 19 Nihiku na neeraru ni nihiku na neethanu nenli, mutthu yoole ohiinanarinhe onoomutathela maasi mutthu ole iinanarinhe. Nave, nihiku na neethanu nenli onoomureeriha etampi awe.+ Vano ole iinanarinhe onookattha malaya awe ni onoorapa. Nto vahalaka wiila, owo onookhala ooloka.

20 “‘Masi mutthu yoole iinanarinhe ohinaphavela oreerihiwa, owo ohaana wiiviwa munlokoni mwa aisarayeli,+ okhala wiira oonanariha nipuro noowaarya na Yehova. Mutthu owo khotatheliwe maasi, tivo onookhala oohireerihiwa.

21 “‘Nla nlamulo na mahiku ootheene. Ole onitathela maasi para omureeriha mutthu,+ ohaana okattha malaya awe. Nave khula mutthu onivara maasi awo, onrowa okhala oonanara mpakha vahalaka wiila. 22 Khula etthu evariwe ni mutthu ole iinanarinhe, enrowa okhala yoonanara. Nave khula mutthu onivara etthu eyo, onrowa okhala oonanarihiwa mpakha vahalaka wiila’”.+

20 Mweeri woopacerya, nloko nootheene na aisarayeli naahiphiya woothakoni wa oSini. Atthu yaahimaka oKadexi.+ Ti weiwo Miriyamu+ aakhwiiye awe, ni aavithiwe awe.

2 Vano, khiyaakhanle maasi para nloko nne.+ Tivo, awo yaahithukumana ananvirikanya Moise ni Aroni. 3 Atthu yaaninyakulihana ni Moise,+ ahimyaka wiira: “Fatari naakhwiiye okathi axinnihu yaakhwiiye aya ohoolo wa Yehova! 4 Xeeni muruuhale anyu nloko na Yehova moothakoni-mu, wiira hiyo ni inama sahu nikhwele muumu?+ 5 Nave xeeni muhalaka onikumiha elapo ya wExiitu muniruuhaka opuro ola woohiloka?+ Opuro ola khaninwerya waala etthu, nave khasikhanle miri sa efiiku, miri sa ewuuva, miri sa muhokorokho oniihaniwa roma, nnakhala maasi oowurya”.+ 6 Vano Moise ni Aroni yaahikhuma ohoolo wa nloko nle. Nuumala-vo, yaahikela vamukhora wa etenta* ya muthukumano ekokhora yuuramaka mpakha vathi. Nto ovuwa wa Yehova waahaakhumelela.+

7 Yehova aahimuleela Moise wiira: 8 “Mmukuxe ttootto ni mwaathukumanye atthu ootheene. Vano nyuwo ni munninyu Aroni, mwalavulihe mwala ole mooniwaka ni atthu ootheene, wiira akhume maasi vamwala vale. Nyuwo munimwaavaha maasi, wiira atthu awo ni inama saya awurye”.+

9 Vano Moise aahimukuxa ttootto aari ohoolo wa Yehova,+ siisaale ntoko Muluku aamurumme awe. 10 Moise ni Aroni yaahaathukumanya atthu ohoolo wa mwala, nto Moise aahaaleela wiira: “Nwiriyane, nyuwo atthu oohiiwelela! Muniphavela wiira nikumihe maasi para nyuwo vamwala-va?”+ 11 Tivo, Moise aahookola ntata nawe, omana mwala ni ttootto awe ikwaha piili. Yaahikhuma maasi manceene, nto atthu ale ni inama saya yaahipacerya owurya.+

12 Nuumala-vo, Yehova aahimuleela Moise ni Aroni wiira: “Okhala wiira khamukaaminni, ni khamukivuwihale* ohoolo wa atthu a Isarayeli, khamunrowa waahoola atthu a nloko nna, elapo kinrowa aka waavaha”.+ 13 Ala maasi a oMeriba,*+ opuro yoole aisarayeli yaanyakulihanne aya ni Yehova, okathi owo aavuwinhe awe nsina nawe ohoolo wa atthu.

14 Ari ene oKadexi, Moise aahaaruma anamitthaka orowa olavula ni mwene a wEdomi+ wiira: “Axinninyu aisarayeli+ anihimya wiira: ‘Nyuwo moosuwela mixankiho sootheene sinikhumelenle. 15 Amuhavinre ahu yaahirowa wExiitu,+ ni hiyo naahikhala wExiitu iyaakha* sinceene.+ Nave, atthu a wExiitu yaaninihaaxa hiyo ni amuhavinre ahu.+ 16 Hiyo naahimuxonttela Yehova,+ nto owo aahiniwiriyana ni aahiruma nlaikha nawe.+ Nlaikha nlo noonikumiha wExiitu, vano nri oKadexi, epooma eri mmukanoni mwa muttetthe anyu. 17 Xontte, munihiye nivire mulaponi mwanyu. Khaninrowa ovira mmatta mwanyu aahiiso ematta ya ewuuva, ni khaninrowa owurya maasi a ehime anyu. Hiyo ninrowa oviraka estaraata eniihaniwa estaraata ya mwene. Nto khaninrowa ohapuwela moono woolopwana nnakhala moono woothiyana, mpakha ovira mulaponi mwanyu’”.+

18 Masi, mwene a wEdomi aahiwaakhula wiira: “Muhivire mulaponi mwaka. Mwiira siiso, kinimootuphelani ni espaata”.* 19 Aisarayeli yaahimuleela wiira: “Ninrowa ovira mustaraatani, nto akhala wiira hiyo ni inama sahu nnoowurya maasi anyu, nnooliva.+ Hiyo nimphavela ovira paahi”.+ 20 Masi mwene a wEdomi aahiwaakhula wiira: “Muhivire”.+ Nto, mwene ole aahikhuma ni muttitthi muulupale ni anakhotto oowerya,* onarowa okumana naawo. 21 Mwene a wEdomi aahaakhoottiherya aisarayeli ovira muttetthe awe. Tivonto, aisarayeli yaahivira ephiro ekina.+

22 Nloko nootheene na aisarayeli, naahikhuma oKadexi niphiya omwaako Hori.+ 23 Ari ene omwaako Hori, waattamela mukano wa elapo ya wEdomi, Yehova aahimuleela Moise ni Aroni wiira: 24 “Aroni animookhwa ni anrowa ovithiwa siisaale ntoko avithiwe aya amuhavinre aya.*+ Nave, khanrowa okela elapo kinrowa aka waavaha aisarayeli, okhala wiira nyuwosa mookivirikanya ni khamwiiwelenle moolumo aka maasi a oMeriba.+ 25 Mmukuxe Aroni ni mwanawe oniihaniwa Eleyazari, nwelane vamwaako Hori. 26 Mmurule Aroni malaya awe+ a onamukuttho ni munwarihe Eleyazari.+ Vano Aroni onimookhwa weiwo”.*

27 Tivonto, Moise aahipaka siisaale ntoko Yehova aamurumme awe. Awo yaahiwela vamwaako Hori awehiwaka ni nloko nootheene. 28 Moise aahimurula Aroni malaya awe a onamukuttho, onwariha Eleyazari, mwaana a Aroni uwo. Nuumala-vo, Aroni aahikhwa vasulu vamwaako ole.+ Nto Moise ni Eleyazari yaahikhuruwa vamwaako. 29 Okathi nloko nootheene naasuwenle aya wiira Aroni aahikhwa, atthu ootheene a aisarayeli yaahimunlela Aroni mpakha mahiku 30.+

21 Mwene mukanaani a wAradi,+ yoowo aakhala oNegebi, aahiiwa wiira aisarayeli yaanirwa aviraka ephiro ya wAtarimi. Nto aahirowa owana ni aisarayeli ni aahaavara akina a yaawo, aatthukwela. 2 Vano aisarayeli yaahimmanela natiri Yehova, yiiraka: “Mwanivahererya atthu ala mmatatani mwahu, nnoopwexa ipooma saya”. 3 Yehova aahaawiriyana aisarayeli ni aahaavahererya akanaani, nto aisarayeli yaahiwiiva awo ni yaahipwexa ipooma saya. Tivonto, yaahivaha opuro ole nsina noowi oHorma.*+

4 Aisarayeli yaahikhuma omwaako Hori,+ aviraka ephiro eniroiha ephareya Yooxeerya, wiira ahuluwe elapo ya wEdomi.+ Nto atthu yaahivela weetta mukwaha. 5 Nave atthu yaanimukhupanya Muluku ni Moise,+ yiiraka: “Xeeni munikuminhe anyu wExiitu wiira nikhwe moothakoni-mu? Opuro ola khekhanle eyoolya nnakhala maasi,+ nave emana* ela yoohisiva yooniphweela”.+ 6 Nto Yehova aahaakumiherya atthu ale inowa sootakhala. Inowa iyo saahaaluma. Tivo, aisarayeli anceene yaahikhwa.+

7 Nuumala-vo, atthu yaahirowa olavula ni Moise, anamuleela wiira: “Noottheka mwaha wa omukhupanya Yehova, ni wookhupanyani nyuwo.+ Munvekele Yehova wiira okumihe inowa iya”. Vano Moise aahaavekelela atthu ale.+ 8 Nuumala-vo, Yehova aahimuleela Moise wiira: “Mpake elatarato ya enowa yootakhala, muthomeye vanripuni. Mutthu yoole onrowa olummwa, ohaana oweha enowa eyo wiira okhale mukumi”. 9 Niinaano-ru, Moise aahipaka enowa ya ekoopiri,+ ohela vanripuni.+ Okathi mutthu aalummwa awe ni enowa, owo aanikhala mukumi nuumala oweha enowa ele ya ekoopiri.+

10 Nuumala-vo, aisarayeli yaahikhuma opuro ole anarowa omaka Obothi.+ 11 Awo yaahikhuma Obothi anarowa omaka wIye-Abarimi,+ moothakoni, onikhala oluluwanya ni oMowabi, mpantta onikhuma nsuwa. 12 Yaahikhuma opuro ole enarowa omaka nxepa na oZeredi.+ 13 Yaahikhuma oZeredi anarowa omaka muttetthe wa Arinoni,+ yoowo ori moothakoni. Othako owo onipacerya mmukanoni mwa amori, okhala wiira Arinoni onivahana mukano ni Mowabi, eriyari ya Mowabi ni amori. 14 Eliivuru ya Ikhotto sa Yehova ennilavula sa “nipuro nniihaniwa Wahebi, nenno niri oSufa, ni maxepa a Arinoni. 15 Maxepa awo annikhuruwela epooma ya wAri, anarowa mpakha omukanoni wa oMowabi”.

16 Vano aisarayeli yaahivenya arowaka oBeeri. Ti weiwo eri aya ehime Yehova aamulenle awe Moise wiira: “Mwaathukumanye atthu wiira kaavahe maasi”.

17 Okathi owo, aisarayeli yaahiipa nsipo nla:

“Nyuwo ehime, mukhume maasi! (Mwaakhulele!*)

Nuumala-vo, aisarayeli yaahikhuma woothakoni, enarowa oMatanahi. 19 Yaakhumale aya oMatanahi, yaahirowa oNahaliyeli. Vano yaahikhuma oNahaliyeli arowaka oBamothi.+ 20 Yaahikhuma oBamothi, anarowa nxepa nri muttetthe wa oMowabi,+ waattamela muttetthe woorakamela osulu wa Pisiga.+ Vasulu va muttetthe owo, mutthu aaniweha muttetthe wa oYesimoni.*+

21 Aisarayeli yaahaaruma anamitthaka orowa okumana ni Sihoni, mwene a amori omuleela wiira:+ 22 “Munihiye nivire mulaponi mwanyu. Khaninrowa ohapuwela mmatta mwanyu aahiiso ematta ya ewuuva. Khaninrowa owurya maasi a ehime anyu. Hiyo ninrowa ovira mmuttettheni mwanyu, nittharaka estaraata ya mwene”.+ 23 Masi Sihoni khaaweemerenrye aisarayeli ovira mulaponi mwawe. Ohiya-vo, owo aahaathukumanya anakhotto awe ootheene, onarowa owana ni aisarayeli woothakoni. Nto yaahiphiya oYahasa, enapacerya owana ni aisarayeli.+ 24 Masi aisarayeli yaahimuxintta Sihoni okhottoni,+ akuxa elapo awe,+ okhuma wArinoni+ mpakha oYaboki,+ waattamela muttetthe wa Amoni. Masi khiyaavikanne muttetthe wa oYazeri, okhala wiira oYazeri+ onivahana mukano ni muttetthe wa Amoni.+

25 Siiso, aisarayeli yaahikuxa ipooma iyo sootheene, enakhala ipooma sootheene sa Amori,+ ni oHexeboni, ni mittetthe sootheene saattamenle* oHexeboni weiwo. 26 Hexeboni yaari epooma ya Sihoni, mwene a Amori, yoowo aawanne ni mwene a oMowabi, khimwaakha mittetthe sawe sootheene mpakha wArinoni. 27 Ti siiso atthu yaapacenrye aya oramusa yiiraka:

“Nrowe oHexeboni.

Epooma ya Sihoni, etekiwe ni elipihiwe.

28 Okhala wiira oHexeboni wookhuma mooro, muttetthe wa Sihoni aakhuma malumi a mooro.

Mooro owo woopaha muttetthe wa Ari, mulaponi wa oMowabi, ohaapaha axineene mapuro oorakamela osulu a wArinoni.

29 Mootakhaliwa nyuwo Mowabi! Nyuwo atthu a Kemoxi,+ munrowa opwetexiwa!

Owo onniwiiriha anaawe axilopwana otthyawa, ni onniwiiriha anaawe axithiyana ovariwa ni Sihoni, mwene a Amori.

31 Siiso, aisarayeli yaanikhala mulaponi mwa Amori. 32 Vano, Moise aahaaruma alopwana wiira yahottele muttetthe wa oYazeri.+ Awo yaahikuxa mittetthe saattamenle* oYazeri iwo, ni yaahiwoomola Amori yaakhala memmo. 33 Nuumala-vo, aisarayeli yaahirukunuwa, enarowa mukwaha aya ettharaka Ephiro eniroiha oBaxani. Vano Oogi,+ mwene a oBaxani, aahirwa ni anakhotto awe ootheene wiira yawane ekhotto ni aisarayeli wEdreyi.+ 34 Nto Yehova aahimuleela Moise wiira: “Muhimoove,+ okhala wiira kinimoovahereryani mmatatani mwanyu mwene owo, anakhotto awe ootheene ni elapo awe.+ Nyuwo munoomwiiriha etthu emosa-ru mwaamwiirihale anyu Sihoni, mwene a amori, yoowo aakhala oHexeboni”.+ 35 Aisarayeli yaahimwiiva owo, vamosa ni anaawe, ni anakhotto awe ootheene, mpakha ohihala mutthu mukumi.+ Nuumala-vo, yaahikuxa elapo awe.+

22 Vano aisarayeli yaahikhuma muttetthe ole, anarowa omaka moothakoni mwa oMowabi okhopela wa muro Yordani, oluluwanya ni oYeriko.+ 2 Balaki,+ mwaana a Sipori, aahiweha itthu sootheene aisarayeli yaawiirihale aya amori. 3 Nto amowabi yaaniwoova vanceene aisarayeli, okhala wiira awo khiyaareere. Amowabi yaahixanka vanceene mwaha wa owoova aisarayeli.+ 4 Tivo, atthu a oMowabi yaahaaleela makhulupale a oMidiyani+ wiira: “Muttitthi ola wa atthu onoohonona elapo ahu yootheene, siisaale ntoko epooyi enilya malaxi a mutakhwani”.

Okathi ole Balaki mwaana a Sipori, taari mwene a oMowabi. 5 Owo aahaaruma atthu awe orowa okumana ni Balaamu, mwaana a Beyori, oPetori,+ waattamela muro Eufrate. Ti weiwo Balaamu aayariwe awe. Balaki aahimulattula Balaamu, oriki: “Aakhala atthu anikhuma wExiitu. Awo aasareya mulaponi mootheene.+ Vano amanke waattamela muttetthe aka. 6 Xontte, murwe mwaatakhalihe atthu ala,+ okhala wiira awo toowerya okivikana miyo. Woonasa wene, kinoowerya waaxintta ni owoomola mulaponi mwaka. Miyo koosuwela oratteene wiira mutthu munimureeliha anyu onnireeriwa, nave mutthu munimutakhaliha anyu onnitakhaliwa”.

7 Makhulupale a oMowabi ni a oMidiyani, yaahirowa okumana ni Balaamu+ akunxe ene mmatatani mwaya musurukhu waaliviwa para waaxerya ehako. Nuumala-vo, yaahimuleela Balaamu moolumo a Balaki. 8 Vano Balaamu aahaaleela wiira: “Murupe vaava ohiyu ola. Nto miyo kinimoohimeeryani moolumo Yehova onrowa awe okileela”. Siiso, makhulupale a oMowabi yaahikhala ni Balaamu.

9 Vano Muluku aahilavula ni Balaamu, onamukoha oriki:+ “Atthu ala ari ni nyuwo, tani ala?” 10 Balaamu aahimwaakhula Muluku eekeekhai oriki: “Balaki, mwaana a Sipori, mwene a oMowabi, ohaaruma atthu okihimeerya wiira: 11 ‘Aakhala atthu anikhuma wExiitu, yaawo asanrye mulaponi mootheene. Murwe mwaatakhalihe.+ Woonasa wene, kinoowerya owanana ni kinoowoomola’”. 12 Masi Muluku aahimuleela Balaamu wiira: “Muhaatthare alopwana ala. Muhaatakhalihe atthu awo, okhala wiira miyo kihaareeliha”.+

13 Balaamu aahivenya voosiisu, onaahimeerya makhulupale a Balaki wiira: “Mutthikele elapo anyu, okhala wiira Yehova ookikhoottiherya woottharani”. 14 Siiso, makhulupale a oMowabi yaahikhuma, anatthikela wa Balaki, amuleela wiira: “Balaamu ookhootta onitthara”.

15 Masi Balaki aahaaruma-tho makhulupale makina, oowaatta ni oottittimiheya waavikana ale oopacerya. 16 Nto awo yaahirowa wa Balaamu, amuhimeerya wiira: “Balaki, mwaana a Sipori, onihimya wiira: ‘Xontte, ehikhale etthu enrowa wookhoottiheryani orwa nno, 17 okhala wiira kinimoovahani itthu sinceene sooreera ni kinoopaka khula etthu munrowa anyu okiruma. Xontte, murwe mwaatakhalihe atthu ala’”. 18 Masi Balaamu aahiwaakhula arumeyi a Balaki oriki: “Hata Balaki okivahaka empa awe esareyale ene eparatha ni eweero, miyo nkaawerya opaka etthu ekina ehikhanle ele Yehova Muluku aka yaakirumme awe, ekhale etthu yaamukhaani aahiiso yuulupale.+ 19 Xontte, ohiyu ola murupe-tho vaava, wiira kisuwele etthu Yehova onrowa awe okileela”.+

20 Muluku aahilavula ni Balaamu ohiyu, onamuleela wiira: “Okhala wiira atthu ala ahoorwa owiitthanani, nvenye mwaatthareke. Masi muhaana olavula moolumo kinooleelaakani paahi”.+ 21 Tivo, Balaamu aahivenya voosiisu omulikanyiha puuru* awe, onaatthara makhulupale a oMowabi.+

22 Masi Muluku aahinanariwa vanceene ni Balaamu, mwaha woowi owo aanirowa. Nlaikha na Yehova naaheemela mustaraatani wiira nimukhoottiherye. Balaamu iira omweettihaka puuru awe, ori ene ni arumeyi awe anli. 23 Okathi puuru aawenhe awe nlaikha na Yehova neemenle ene mustaraatani, nivarenle ene espaata* mmatatani mwaya, puuru owo aaheererya okhuma mustaraatani wiira okele mutakhwani. Masi Balaamu aahipacerya ommana puuru ole wiira otthikele mustaraatani. 24 Vano nlaikha na Yehova naaheemela ephiro yoophunyeya yaavira eriyari ya imatta piili sa ewuuva. Ephiro eyo yaahikhalana ixiri piili sa maluku ninno-ninno. 25 Okathi puuru ole aawenhe awe nlaikha na Yehova, aahipacerya ohaamela exiri. Vano puuru ole aahiphiteerya nnawu na Balaamu vaxirini. Nto Balaamu aahitthikela-tho ommana.

26 Nlaikha na Yehova naahirowa weemela opuro mukina woophunyeya, wahaaweryaneya ohapuwela moono woolopwana, nnakhala moono woothiyana. 27 Okathi puuru aawenhe awe nlaikha na Yehova, aahimmaathi vathi. Tivo, Balaamu aahinanariwa vanceene, onathipelela ommana puuru ole ni ekopo awe. 28 Vano Yehova aahimwiiriha puuru ole olavula.*+ Owo aahimukoha Balaamu wiira: “Kiwiirihaleni exeeni wiira mukimaneke ikwaha iya tthaaru?”+ 29 Balaamu aahimwaakhula puuru oriki: “Mwaha woowi nyuwo mookiiriha okhala ntoko mulolo. Vaakhanle wiira kookuxa espaata, miyo kanwiivani!” 30 Vano puuru aahimukoha Balaamu wiira: “Kiira miyo ka puuru anyu yoole munimweettiha anyu okhuma khalai mpakha olelo-va? Kootoko owiirihani siisa?” Owo aahaakhula wiira: “Nnaari!” 31 Nuumala-vo, Yehova aahihula maitho a Balaamu.+ Nto owo aahiweha nlaikha na Yehova neemenle ene mustaraatani, nivarenle ene espaata mmatatani mwaya. Niinaano-ru, Balaamu aahikokhora, uurama mpakha vathi.

32 Nto nlaikha na Yehova naahimukoha Balaamu niiraka: “Xeeni muhalaka ommana puuru anyu ikwaha iya tthaaru? Miyo kihoorwa wookhoottiheryani, okhala wiira nyuwo mookivirikanya+ mwaattharaka atthu ala. 33 Puuru ola ookiweha, eererya okihapuwa ikwaha iya tthaaru.+ Vaakhanle wiira puuru ola khokihapunwe, kaarowa wiiraka saano kiwivaleni. Masi kammuhiya owo ori ene mukumi”. 34 Nto Balaamu aahaakhula nlaikha na Yehova, oriki: “Koottheka, okhala wiira nkaasuwenle wiira ti nyuwo mweemenle mustaraatani wiira mukikhoottiherye ovira. Vakhala wiira mukwaha aka ola khiwoosivenleni, miyo kinootthika”. 35 Nlaikha na Yehova naahimuleela Balaamu wiira: “Mwaatthareke atthu ala, masi muhaana olavula moolumo kinrowa aka wooleelani paahi”. Siiso, Balaamu aahitthikela waatthara makhulupale a Balaki.

36 Okathi Balaki aiwale awe wiira Balaamu aahiphiya, aahaakuvela orowa okumana nuuwo epooma ya oMowabi, yeeyo eri mukerekhere mwa nxepa na Arinoni, enivahana mukano ni muttetthe awe. 37 Balaki aahimukoha Balaamu wiira: “Miyo kaahaaruma atthu owiihanani. Xeeni muhalaka ohirwa? Munoona wiira nkiniwerya woovahani itthu sinceene sooreera?”+ 38 Balaamu aahimwaakhula Balaki oriki: “Vano miyo kihoorwa. Masi nkikhanle oolavula etthu kiniphavela aka. Kinrowa olavulaka paahi moolumo Muluku onrowa awe ohela mwaano mwaka”.+

39 Nto Balaamu aahimutthara Balaki, aphiya oKiriyathi-Husothi. 40 Balaki aahiiva ipooyi ni ipwittipwitthi, khuvaha mukuttho. Nave, aahinvaha enama ekina Balaamu ni makhulupale yaari nuuwo. 41 Voosiisu aya, Balaki aahimukuxa Balaamu omuroiha nipuro noorakamela osulu na oBamothi-Bayaali. Nto opuro ole, aaniwerya waaweha atthu ootheene a Isarayeli.+

23 Balaamu aahimuleela Balaki wiira: “Mwaateke altaari 7 opuro yoola,+ ni mukilokiherye ipooyi 7 soolopwana ni ipwittipwitthi 7 soolopwana”. 2 Niinaano-ru, Balaki aahiira siisaale ntoko Balaamu aamuhimenrye awe. Nto, khula altaari, Balaki ni Balaamu yaahivaha mukuttho wa epooyi emosa ni epwittipwitthi emosa.+ 3 Balaamu aahimuleela Balaki wiira: “Muhale vaava vari yoovaha anyu para opahiwa. Miyo kinookhuma vakhaani. Woonasa wene, Yehova onookikhumelela. Nto khula etthu onrowa awe okisuweliha, miyo kinimooleelani”. Vano, Balaamu aahirowa vatturuuruni.

4 Muluku aahimukhumelela Balaamu.+ Nto Balaamu aahimuleela Muluku wiira: “Kihaalokiherya altaari 7, ni khula altaari koovaha mukuttho wa epooyi emosa yoolopwana ni epwittipwitthi emosa yoolopwana”. 5 Yehova aahimuleela Balaamu+ etthu aarowa awe ohimya oriki: “Mutthikele wa Balaki, ni mwamuleele etthu kinrowa aka woohimeeryani”. 6 Siiso, Balaamu aahitthika, onweha Balaki ni makhulupale ootheene a oMowabi, yeemenle ene opuro waari yoovaha awe para opahiwa. 7 Nto Balaamu aahihimya muhupi ola:+

‘Murwe mmutakhalihe Yakobe.

Aayo, murwe mmulaphele itthu sootakhala Isarayeli’.+

 8 Kinrowa owerya sai waatakhaliha ale Muluku ohaatakhalinhe awe?

Kinrowa owerya sai waalaphela itthu sootakhala ale Yehova ohaalaphenle awe?+

10 Ti pani oniwerya okontari muttitthi wa Yakobe, yoowo waattale ntoko ntthupi?+

Aahiiso oniwerya okontari nnakhala epantta ya neexexe ya Isarayeli?

11 Nto Balaki aahimuleela Balaamu wiira: “Exeeni ela mukiirenle anyu? Miyo kihooruuhani wiira mwaatakhalihe awanani aka, masi nyuwo murimwaareeliha”.+ 12 Balaamu aahaakhula oriki: “Miyo kihaana olavula etthu Yehova okihimenrye awe paahi”.+

13 Vano Balaki aahimuleela Balaamu wiira: “Xontte murwe ni miyo nipuro nikina, nenlo munrowa anyu owoona atthu awo. Nyuwo munrowa waaweha mpantta mmosa paahi. Khamunrowa waaweha ootheene. Nto mwaatakhalihe atthu awo muri ene nipuro nenlo”.+ 14 Siiso, Balaki aahimukuxa Balaamu, omuroiha ematta ya oSofimu, yeeyo eri nipuro noorakamela osulu nniihaniwa Pisiga,+ aateka altaari 7. Khula altaari, aahivaha mukuttho wa epooyi emosa yoolopwana ni epwittipwitthi emosa yoolopwana.+ 15 Balaamu aahimuleela Balaki wiira: “Muhale vaava vari yoovaha anyu para opahiwa. Miyo kinrowa iwe kalavule ni Muluku”. 16 Nto Yehova aahikumana ni Balaamu, omuleela etthu aakhanle awe oolavula.+ Owo aamulenle so: “Mutthikele wa Balaki, ni mwamuleele etthu kinrowa aka woohimeeryani”. 17 Balaamu aahitthika, onweha Balaki olipelelaka vaari yoovaha awe para opahiwa. Makhulupale a oMowabi yaari nuuwo. Balaki aahimukoha Balaamu oriki: “Yehova oohimenryeni exeeni?” 18 Nto Balaamu aahimuleela muhupi ola:+

“Nvenye Balaki, ni mukiwiriyane.

Mukiiwe, nyuwo mwaana a Sipori.

Niireke wiira Muluku onnihimya etthu, ohinapaka yeeyo?

Niireke owo aleiherya etthu, kheniiraneya?+

22 Muluku taakumihale wExiitu.+

Owerya wawe onnaakhaliherya siisaale ntoko manyaka a epooyi ya mutakhwani.+

Okathi ola atthu anoomuhimyaka Yakobe ni Isarayeli wiira:

‘Nkawehani etthu Muluku opanke awe!’

25 Nto Balaki aahimuleela Balaamu wiira: “Vakhala wiira khamuniwerya waatakhaliha atthu ala, weeso muhaareeliheke”. 26 Balaamu aahimwaakhula Balaki, oriki: “Kiira kihooleelani wiira kinrowa opaka itthu sootheene Yehova onikileela awe?”+

27 Balaki aahimuleela Balaamu wiira: “Xontte, mukitthare nipuro nikina. Woonasa wene, Muluku onooweemereryani wiira mwaatakhalihe atthu ale muri ene vaavo”.+ 28 Vano Balaki aahimukuxa Balaamu, omuroiha vasulu va nipuro noottukhuwa nniihaniwa Peyori. Mutthu aaniwerya oweha othako wa oYesimoni, ori ene vasulu vaavo.+ 29 Nto Balaamu aahimuhimeerya Balaki wiira: “Mwaateke altaari 7 opuro yoola, ni mukilokiherye ipooyi 7 soolopwana ni ipwittipwitthi 7 soolopwana”.+ 30 Tivonto, Balaki aahiira siisaale ntoko Balaamu aamuhimenrye awe. Nto khula altaari, Balaki aahivaha mukuttho wa epooyi emosa ni epwittipwitthi emosa.

24 Okathi Balaamu oonale awe wiira Yehova aaniphavela* omureeliha Isarayeli, Balaamu khaamulamphe.+ Masi aahirukunuwa onaweha woothakoni. 2 Okathi Balaamu aawenhe awe aisarayeli amanke ene moothakoni, akawanyiwe ene mahimo aya,+ Balaamu aahaakhela ikuru sa Muluku.+ 3 Balaamu aahilavula muhupi ola:+

“Muhupi wa Balaamu, mwaana a Beyori.

Muhupi wa mulopwana yoowo ahuliwe maitho awe.

10 Vano, Balaki aahinanariwa vanceene ni Balaamu. Nto Balaki aahimana makuphi onyoholelaka, ni aahimuleela Balaamu wiira: “Miyo kihooruuhani wiira mwaatakhalihe awanani aka,+ masi ikwaha iya tthaaru nyuwo murimwaareeliha paahi. 11 Mukhumeke-va, mutthikeleke elapo anyu. Miyo kaaphavela woovahani itthu sinceene sooreera,+ masi Yehova ohookhoottiheryani”.

12 Balaamu aahimwaakhula Balaki, iiraka: “Miyo kaahaaleela anamitthaka anyu wiira: 13 ‘Hata Balaki okivahaka empa awe esareyale ene eparatha ni eweero, miyo nkaarowa opaka etthu ekina ehikhanle ele Yehova, Muluku aka okirumme awe, ekhale etthu yooreera aahiiso yootakhala. Kinrowa olavulaka paahi etthu Yehova onrowa awe okileela’.+ 14 Vano kinoohokolowela wa atthu aka. Masi kihinatthi kinimooleelani etthu atthu ale anrowa aya owiiriha atthu anyu muhoolo”.* 15 Nto Balaamu aahilavula muhupi ola:+

“Muhupi wa Balaamu, mwaana a Beyori.

Muhupi wa mulopwana yoowo ahuliwe maitho awe.+

20 Okathi aawenhe awe amaleki, aahilavula-tho muhupi awe iiraka:

21 Okathi aawenhe awe akenewu,+ aahilavula-tho muhupi awe iiraka:

“Nipuro ninkhala anyu ti noolipihiwa, ninlikana ni epuru etekiwe vamwala.

22 Masi ookhala onrowa opaha nihimo na akenewu.*

Asiiria anrowa wookhalihani silini ipottha?”

23 Owo aahitthikela-tho olavula oriki:

“Ti pani onrowa woopowa, okathi Muluku onrowa awe opaka etthu eyo?

Masi owo onoopwetexiwa voomalela”.

25 Vano Balaamu+ aahivenya, onatthikela elapo awe. Nave-tho, Balaki aahirowa ephiro awe.

25 Okathi aisarayeli yaakhala aya oXitimi,+ atthu a nloko na Isarayeli yaahipacerya orupihana voohiloka ni athiyana a oMowabi.+ 2 Nto athiyana a oMowabi yaahipacerya waalattula atthu a wIsarayeli, wiira yaavaheke mikuttho amuluku aya.+ Vano atthu a wIsarayeli yaahipacerya olya mikuttho iyo, ni waakokhorela amuluku awo.+ 3 Siiso, aisarayeli yaahitakaahana ni atthu a oMowabi, anamukokhorela Bayaali a oPeyori.+ Nto Yehova aahinanariwa vanceene ni aisarayeli. 4 Yehova aahimuleela Moise wiira: “Mwaavare makhulupale ootheene a atthu, nwiive, ni muthomeye mirutthu saya ohoolo wa Yehova, wiira sooniweke ni atthu ootheene. Siiso, miyo Yehova, kinoohiya onanariwa ni aisarayeli”. 5 Moise aahaaleela alipa-oophuka milattu a wIsarayeli, wiira:+ “Khula mmosa a nyuwo ohaana owiiva atthu yaale yaatakaahanne ni atthu a oMowabi, wiira amukokhorele Bayaali a oPeyori”.+

6 Okathi ene yoole, mwisarayeli mmosa aahimuruuha muthiyana a oMidiyani,+ waattamela opuro waari axinnawe, ooniwaka ni Moise ni aisarayeli ootheene. Okathi owo, atthu yiira yinlaka waattamela vamukhora va etenta* ya mithukumano. 7 Okathi Pineha,+ mwaana a Eleyazari, mwaana a namukuttho Aroni, aawenhe awe etthu ele, aahivenya voowaakuveya eriyari ya atthu, okuxa nivaka. 8 Nto aahimutthara mulopwana ole a wIsarayeli mutentani mwawe, aahoma oowanli aya, mulopwana ole a wIsarayeli vamosa ni muthiyana, athorolaka erukulu* ya muthiyana. Siiso, ehasara ele yaakhumelenle aisarayeli yaahimala.+ 9 Atthu yaakhwiiye mwaha wa ehasara, yaari 24.000.+

10 Nuumala-vo, Yehova aahimuleela Moise wiira: 11 “Mwaha wa etthu opanke awe Pineha,+ mwaana a Eleyazari, mwaana a namukuttho Aroni, miyo koohiya onanariwa ni aisarayeli. Owo kheemerenrye wiira atthu ahiye okhala oororomeleya para Muluku awe.+ Tivonto, miyo nkaapwetenxe aisarayeli ootheene, nnaamwi kiphavelaka wiira kikokhoreliweke miyo paahi.+ 12 Tivo, mmuleele wiira kinnipaka nivarihano na murettele nuuwo. 13 Nave, ninrowa okhala nivarihano na onamukuttho na mahiku ootheene, para owo ni osuulu awe,+ okhala wiira kheemerenrye wiira atthu ahiye okhala oororomeleya para Muluku awe.+ Mwaha wa yeeyo, owo oowiiriha aisarayeli oleveleliwa itampi saya’”.

14 Mwisarayeli aiviwe vamosa ni muthiyana a oMidiyani, aihaniwa Zinri, mwaana a Salu. Zinri owo, aari mukhulupale a nihimo na Simeyoni. 15 Muthiyana a oMidiyani aiviwe, aihaniwa Kozibi, mwaana a Suri.+ Nto Suri owo, aari mukhulupale a nihimo nimosa na oMidiyani.+

16 Nuuvira okathi, Yehova aahimuleela Moise wiira: 17 “Mwaatuphele amidiyani ni nwiivakase,+ 18 okhala wiira yaahootthekihani, yoowokakani mwaha wa muluku Peyori,+ ni mwaha wa Kozibi, mwaana mwaamuthiyana a mukhulupale a nihimo nimosa na oMidiyani, yoowo aiviwe+ nihiku naakhumelenle ehasara, mwaha wa muluku Peyori”.+

26 Nuumala ehasara,+ Yehova aahimuleela Moise ni Eleyazari, mwaana a namukuttho Aroni, wiira: 2 “Mulepe nloko nootheene na aisarayeli, okhuma atthu arina iyaakha 20 orowa ohoolo, muttharaka masina a amuhavinre aya. Mwaakontari atthu ootheene aniwerya okhala anakhotto a Isarayeli”.+ 3 Moise ni namukuttho Eleyazari+ yaahilavula ni atthu moothakoni moowaataleya mwa oMowabi,+ oluluwanya ni muro Yordani, waattamela oYeriko,+ yiiraka: 4 “Mwaalepe atthu awo arina iyaakha okhuma 20 orowa ohoolo, siisaale ntoko Yehova omurumme awe Moise”.+

Anamwane a Isarayeli, yaawo yaakhumme elapo ya wExiitu yaari ala: 5 Rubeni,+ mwaana oopacerya oyariwa a Isarayeli. Anamwane axilopwana a Rubeni+ yaari ala: Hanoki, a nihimo na Hanoki; Palu, a nihimo na Palu. 6 Esironi, a nihimo na Esironi; Karmi, a nihimo na Karmi. 7 Ala ti yaari mahimo a Rubeni. Nto atthu yaalempwale a nihimo na Rubeni yaari 43.730.+

8 Mwaana a Palu aari Eliyabi. 9 Nave anamwane a Eliyabi yaari ala: Nemuweli, Datani, ni Abirami. Datani ni Abirami, yaari alopwana oothanliwa a nloko. Ti yaala yaamurukunuwenle Moise+ ni Aroni, okathi yaatakaahanne aya ni ekurupu ya Kora+ anawana ni Yehova.+

10 Etthaya yaahihuleya yaamirya. Nto Kora ni anamakhaliherya awe 250, yaahikhwa okathi yaapahiwe aya ni mooro.+ Etthu ele yaakhumelenle, yaahikhala ntakiheryo nnaalopola atthu akina.+ 11 Masi anamwane a Kora khiyaakhwiiye.+

12 Anamwane a Simeyoni,+ sitthariwaka imusi saya, yaari ala: Nemuweli, a nihimo na Nemuweli; Yamini, a nihimo na Yamini; Yakini, a nihimo na Yakini. 13 Zerahi, a nihimo na Zerahi; Xawuli, a nihimo na Xawuli. 14 Ala ti yaari mahimo a Simeyoni. Nto atthu yaalempwale a nihimo na Simeyoni yaari 22.200.+

15 Anamwane a Gadi,+ sitthariwaka imusi saya, yaari ala: Sefoni, a nihimo na Sefoni; Hagi, a nihimo na Hagi; Xuni, a nihimo na Xuni. 16 Osini, a nihimo na Osini; Eri, a nihimo na Eri. 17 Arodi, a nihimo na Arodi; Areli, a nihimo na Areli. 18 Ala ti yaari mahimo a Gadi. Nto atthu yaalempwale a nihimo na Gadi yaari 40.500.+

19 Anamwane a Yuda,+ yaari ala: Eri ni Onani.+ Masi, Eri ni Onani yaakhwiiye elapo ya oKanaani.+ 20 Anamwane a Yuda, sitthariwaka imusi saya, yaari ala: Xela,+ a nihimo na Xela; Peresi,+ a nihimo na Peresi; Zerahi,+ a nihimo na Zerahi. 21 Anamwane a Peresi, yaari ala: Esironi,+ a nihimo na Esironi; Hamuli,+ a nihimo na Hamuli. 22 Ala ti yaari mahimo a Yuda. Nto atthu yaalempwale a nihimo na Yuda yaari 76.500.+

23 Anamwane a Isakari,+ sitthariwaka imusi saya, yaari ala: Tola,+ a nihimo na Tola; Puwa, a nihimo na Puwa. 24 Yaxubi, a nihimo na Yaxubi; Ximironi, a nihimo na Ximironi. 25 Ala ti yaari mahimo a Isakari. Nto atthu yaalempwale a nihimo na Isakari yaari 64.300.+

26 Anamwane a Zabuloni,+ sitthariwaka imusi saya, yaari ala: Seredi, a nihimo na Seredi; Eloni, a nihimo na Eloni; Yaheleyeli, a nihimo na Yaheleyeli. 27 Ala ti yaari mahimo a Zabuloni. Nto atthu yaalempwale a nihimo na Zabuloni yaari 60.500.+

28 Anamwane a Yosefe,+ sitthariwaka imusi saya, yaari ala: Manase ni Efrayimi.+ 29 Anamwane a Manase,+ yaari ala: Makiri,+ a nihimo na Makiri. Makiri aahimuyara Xileyaadi. Vano Xileyaadi,+ ari a nihimo na Xileyaadi. 30 Ala yaari anamwane a Xileyaadi: Iyezeri, a nihimo na Iyezeri; Heleki, a nihimo na Heleki; 31 Asiriyeli, a nihimo na Asiriyeli; Sikhemi, a nihimo na Sikhemi; 32 Xemida, a nihimo na Xemida; Heferi, a nihimo na Heferi. 33 Vano Selofehadi,+ mwaana a Heferi, khaarina anamwane axilopwana, masi aayanre anamwane axithiyana paahi.+ Masina aya anamwane awo taala: Mahala, Nowa, Hogla, Milika ni Tirsa. 34 Ala ti yaari mahimo a Manase. Nto atthu yaalempwale a nihimo na Manase yaari 52.700.+

35 Anamwane a Efrayimi,+ sitthariwaka imusi saya, yaari ala: Xutela+ a nihimo na Xutela; Bekeri; a nihimo na Bekeri; Tahani, a nihimo na Tahani. 36 Anamwane a Xutela, yaari ala: Erani, a nihimo na Erani. 37 Ala yaari mahimo a anamwane a Efrayimi. Nto atthu yaalempwale a nihimo na Efrayimi yaari 32.500.+ Ala yaari anamwane a Yosefe, sitthariwaka imusi saya.

38 Anamwane a Beniyamini,+ sitthariwaka imusi saya, yaari ala: Bela,+ a nihimo na Bela; Axibeli, a nihimo na Axibeli; Ahirami, a nihimo na Ahirami; 39 Xefufami, a nihimo na Xupami; Hufami, a nihimo na Hufami. 40 Anamwane a Bela, yaari ala: Aridi ni Naamani.+ Aridi, a nihimo na Aridi; Naamani, a nihimo na Naamani. 41 Ala yaari anamwane a Beniyamini, sitthariwaka imusi saya. Nto atthu yaalempwale a nihimo na Beniyamini yaari 45.600.+

42 Ala yaari anamwane a Dani,+ sitthariwaka imusi saya: Xuhami, a nihimo na Xuhami. Ala yaari atthu a nihimo na Dani. 43 Atthu ootheene a nihimo na Xuhami yaalempwale yaari 64.400.+

44 Anamwane a Axeri,+ sitthariwaka imusi saya, yaari ala: Imina, a nihimo na Imina; Ixivi, a nihimo na Ixivi; Beriya, a nihimo na Beriya. 45 Anamwane a Beriya, yaari ala: Heeberi, a nihimo na Heeberi; Malikiyeli, a nihimo na Malikiyeli. 46 Nsina na mwaana mwaamuthiyana a Axeri, naari Sera. 47 Ala yaari anamwane a Axeri. Nto atthu yaalempwale a nihimo na Axeri yaari 53.400.+

48 Anamwane a Nefetali,+ sitthariwaka imusi saya, yaari ala: Yaheseeli, a nihimo na Yaheseeli; Guni, a nihimo na Guni; 49 Yeseri, a nihimo na Yeseri; Xilemi, a nihimo na Xilemi. 50 Ala yaari atthu a nihimo na Nefetali, sitthariwaka imusi saya. Nto atthu yaalempwale a nihimo na Nefetali yaari 45.400.+

51 Alopwana ootheene a nloko na Isarayeli yaari 601.730.+

52 Nuumala-vo, Yehova aahimuleela Moise wiira: 53 “Etthaya ehaana okaweliwa mahimo otthariwaka waatta wa atthu a khula nihimo. Eyo enrowa okhala yoohiyeriwa aya.+ 54 Ekurupu yuulupale muhaana ovaha mpantta muulupale, nave ekurupu yaamukhaani muhaana ovaha mpantta mwaamukhaani.+ Khula ekurupu muhaana ovaha muttharaka mwaattelo wa atthu alempwale. 55 Masi etthaya ehaana okaiwa etthariwaka onimorela aya esoorti.+ Awo ahaana waakhela etthaya sitthariwaka masina a mahimo a amuhavinre aya. 56 Khula mpantta wa etthaya ohaana ovahiwa etthariwaka onimorela aya esoorti. Nave sihaana okaweliwa ikurupu suulupale ni saamukhaani”.

57 Ala atthu a nihimo na alevi yaalempwale+ sitthariwaka imusi saya: Gerisoni, a nihimo na Gerisoni; Kehathi,+ a nihimo na Kehathi; Merari, a nihimo na Merari. 58 Imusi sa alevi saari iya: emusi ya Liibini,+ emusi ya Hebroni,+ emusi ya Mali,+ emusi ya Muxi,+ ni emusi ya Kora.+

Kehathi aamuyanre Amurami.+ 59 Nsina na mwaarawe Amurami naari Yokebedi,+ mwaana mwaamuthiyana a Levi, yoowo aayareliwe awe wExiitu. Yokebedi aahimuyarela Amurami anamwane ala: Aroni, Moise, ni murokoraya Miriyamu.+ 60 Aroni aahimuyara Nadabi, Abihu, Eleyazari, ni Itamari.+ 61 Masi Nadabi ni Abihu, yaahikhwa mwaha woopaha nsenso* ahittharaka ele Yehova aarumme awe.+

62 Alopwana ootheene a alevi yaalempwale yaarina mweeri mmosa orowa ohoolo yaari 23.000.+ Awo khiyaalempwale vamosa ni aisarayeli akina,+ okhala wiira khiyaarowa waakhela mpantta wa etthaya yaakhela aya aisarayeli akina.+

63 Ala atthu yaalempwale ni Moise ni namukuttho Eleyazari, okathi yaalempe aya aisarayeli moothakoni moowaataleya mwa oMowabi, oluluwanya ni muro Yordani, waattamela oYeriko. 64 Masi khuuvo a yaawo aalempwale ni Moise ni namukuttho Aroni, okathi yaalempwale aya aisarayeli woothakoni wa oSinayi.+ 65 Nto Yehova aahaaleela wiira: “Awo animookhwa moothakoni-mu”.+ Tivonto, khaahanle nnakhala mutthu mmosa ohikhanle paahi Kalebi, mwaana a Yefune, ni Yooxuuwa, mwaana a Nuuni.+

27 Vano yaahirwa anamwane axithiyana a Selofehadi,+ mwaana a Heferi, mwaana a Xileyaadi, mwaana a Makiri, mwaana a Manase. Manase owo aari mwaana a Yosefe. Masina a anamwane a Selofehadi yaari ala: Mahala, Nowa, Hogla, Milika ni Tirsa. 2 Awo yaaheemela ohoolo wa Moise ni wa namukuttho Eleyazari, ni ohoolo wa makhulupale,+ ni ohoolo wa nloko nootheene, vamukhora va etenta* ya muthukumano, anahimya wiira: 3 “Paapa ahu okhwiiye moothakoni. Masi owo khaakhanle ekurupu ya atthu yaamukhaliherya Kora,+ yaawo yanvirikannye Yehova. Owo okhwiiye mwaha wa etampi awe. Masi khaarina anamwane axilopwana. 4 Niireke wiira nsina na paapa ahu nihaana omala-mala mweemusini mwawe, mwaha woowi khaarina mwaana mwaamulopwana? Munivahe etthaya ntoko mwaavanhe anyu axinnaya apaapa”. 5 Tivo, Moise aahirowa omuleela Yehova mwaha ole.+

6 Yehova aahimuleela Moise wiira: 7 “Anamwane a Selofehadi aakhalana erasau. Muhaana waavaha etthaya, ntoko mwaavanhe anyu axinnaya apapaya. Mwaahiyerye mireerelo sa apapaya.+ 8 Nave, mwaaleele aisarayeli wiira: ‘Akhala mutthu onikhwa ohimuhiyale mwaana mwaamulopwana, muhaana onvaha mireerelo sawe mwanawe mwaamuthiyana. 9 Akhala wiira owo khorina mwaana mwaamuthiyana, muhaana waavaha mireerelo sawe axinnawe. 10 Aahikhalane axinnawe, muhaana waavaha mireerelo sawe axinnaya apapawe. 11 Akhala wiira apapawe kharina axinnaya, muhaana onvaha mireerelo saya mmusi aya ookhuveela a nihimo naya, wiira ohalane itthu iyo. Nla ninrowa okhala nlamulo para aisarayeli, siisaale ntoko Yehova omurumme awe Moise’”.

12 Nuumala-vo, Yehova aahimuleela Moise wiira: “Nwele mwaako ola Abarimi,+ nwehe elapo kinrowa aka waavaha aisarayeli.+ 13 Nuumala oweha elapo eyo, nyuwo munimookhwa,+ siisaale ntoko munninyu Aroni okhwiiye awe.+ 14 Khamunikela elapo ele, okhala wiira okathi atthu yaanyakulihana aya ni miyo woothakoni wa oSini, nyuwo khimwaakivuwinhe* ohoolo wa atthu, okathi kaakuminhe aka maasi.+ Maasi awo ti yaale a oMeriba,+ oKadexi,+ woothakoni wa oSini”.+

15 Vano, Moise aahimuleela Yehova wiira: 16 “Nyuwo Yehova, mwa Muluku onaavaha okumi atthu ootheene. Nto, mmuthanle mulopwana mmosa wiira aahooleleke atthu ala. 17 Owo onrowa okhala muhooleli aya mwa itthu sootheene, wiira aahooleleke miteko saya sootheene. Siiso, nloko na Yehova khaninrowa okhalaka ntoko ipwittipwitthi sihirina makampusi”. 18 Tivonto, Yehova aahimuleela Moise wiira: “Mmwiitthane Yooxuuwa, mwaana a Nuuni, yoowo ori oophwanelela, ni mmwiixaatherye ntata nanyu.+ 19 Mmweemexe ohoolo wa namukuttho Eleyazari ni ohoolo wa atthu ootheene. Mmukhalihe muhooleli ohoolo waya.+ 20 Munvahe okhulupale* anyu vakhaani,+ wiira atthu ootheene a Isarayeli anwiriyaneke.+ 21 Owo onimweemela ohoolo wa namukuttho Eleyazari. Nto namukuttho owo onoomukohererya Yehova omurumeelaka Urimi,+ wiira osuwele etthu Muluku oniphavela awe. Okathi Yooxuuwa onrowa awe orumaka etthu, atthu ootheene a Isarayeli anrowa omwiiwelelaka”.

22 Tivo, Moise aahiira siisaale ntoko Yehova aamurumme awe. Aahimwiitthana Yooxuuwa, ni aahimweemexa ohoolo wa namukuttho Eleyazari ni ohoolo wa atthu ootheene. 23 Aahimwiixaatherya matata awe, omukhaliha muhooleli,+ siisaale ntoko Yehova aamulenle awe Moise.+

28 Nuumala-vo, Yehova aahimuleela Moise wiira: 2 “Mwaaleele aisarayeli wiira: ‘Mukhalane ephoole wiira muhooceele okivaha mikuttho saka, eyo piiyo, ephaawu aka. Muhaana okivaha mikuttho saka soopahiwa, okathi othanleliwe aya.+ Iyo sinrowa okhala etthu yoowunkhela enikisivela’.*

3 “Mwaaleele-tho wiira: ‘Yoovaha para opahiwa enrowa anyu onvahaka Yehova, tiila: khula nihiku muhaana ovaha ipwittipwitthi piili soolopwana saamukhaani, sa eyaakha emosa ni sihiniwereiwa. Eyo enrowa okhala yoovaha para opahiwa enivahiwa voohihiyererya.+ 4 Epwittipwitthi emosa yaamukhaani nvaheke voosiisu, nave epwittipwitthi ekina nvaheke nuumala nsuwa okela.*+ 5 Nave-tho, nvaheke mpantta wa namuloko wa eefa* emosa wa otthu wooreerexa,* wootakaahiwa ni mpantta wa neexexe wa ehiini* emosa ya makhura a olivera. Eyo enrowa okhala yoovaha ya ipyo.+ 6 Eyo yoovaha para opahiwa enivahiwa voohihiyererya,+ yeeyo Muluku aarumme awe omwaako Sinayi, wiira evahiweke Yehova, ntoko yoovaha yoowunkhela ni enimusivela. 7 Okathi munivaha anyu khula epwittipwitthi, nvaheke-tho yoovaha eniwuriwa, eyo piiyo, mpantta wa neexexe wa ehiini emosa ya eviinyu.+ Eviinyu eyo, muyiiheryeke nipuro noowaarya ntoko yoovaha eniwuriwa para Yehova. 8 Epwittipwitthi ya nenli, muhaana ovaha nuumala nsuwa okela.* Nvaheke vamosa ni otthu wa ipyo simosa-ru ni yoovaha eniwuriwa, ntoko siniira anyu voosiisu. Ela yoovaha onipaheriwa awe Yehova, yoowunkhela ni enimusivela.+

9 “‘Masi nihiku na saabadu,+ muhaana ovaha ipwittipwitthi piili soolopwana sa eyaakha emosa ni sihiniwereiwa, vamosa ni iliituru ixexe nnimeya* sa otthu wooreerexa otakaahiwe ni makhura, ntoko yoovaha ya ipyo. Nave-tho, nvahe yoovaha eniwuriwa. 10 Eyo ti yoovaha para opahiwa enivahiwa esaabadu, ohela muhina yoovaha para opahiwa enivahiwa khula nihiku, ni yoovaha eniwuriwa.+

11 “‘Woopaceryani wa khula mweeri, muhaana onvaha Yehova yoovaha para opahiwa ya ipooyi piili saamukhaani, ni epwittipwitthi emosa yoolopwana, ni ipwittipwitthi 7 soolopwana sa eyaakha emosa, ni sihiniwereiwa.+ 12 Wa khula epooyi, nvahe etthu yoowiiraka iliituru 6 nnimeya sa otthu wooreerexa oheliwe makhura, ntoko yoovaha ya ipyo.+ Nave, wa khula epwittipwitthi yoolopwana, nvahe iliituru ixexe nnimeya sa otthu wooreerexa oheliwe makhura, ntoko yoovaha ya ipyo.+ 13 Vano, wa khula epwittipwitthi yoolopwana ya eyaakha emosa, nvahe iliituru piili sa soovaha sa otthu wooreerexa oheliwe makhura, ntoko yoovaha ya ipyo. Eyo yoovaha yoopahiwa enivahiwa Yehova, yeeyo eri yoowunkhela ni enimusivela.+ 14 Muhaana ovaha soovaha iya siniwuriwa: wa khula epooyi munivaha anyu, nvaheke-tho nimeya na ehiini na eviinyu.+ Wa khula epwittipwitthi yoolopwana munivaha anyu, nvaheke-tho epantta ya neeraru ya ehiini ya eviinyu.+ Wa khula epwittipwitthi yoolopwana ya eyaakha emosa munivaha anyu, nvaheke-tho epantta ya neexexe ya ehiini ya eviinyu.+ Eyo teri yoovaha para opahiwa enivahiwa khula mweeri, wa khula eyaakha. 15 Nave-tho, muhaana onvaha Yehova epuri emosa yaamukhaani ntoko yoovaha para oleveleliwa etampi, vamosa ni yoovaha para opahiwa, enivahiwa khula nihiku, ni yoovaha eniwuriwa.

16 “‘Nihiku 14 na mweeri woopacerya, onookhala paasikha a Yehova.+ 17 Nave nihiku 15 na mweeri yoowo, enookhala efesta. Sinrowa okhuuriwaka iphaawu soohiheliwa eferemento, mpakha mahiku 7.+ 18 Nihiku noopacerya, onrowa okhala konkereesu para Muluku. Muhivare muteko woolipa nihiku nlo. 19 Muhaana onvaha Yehova yoovaha para opahiwa ya ipooyi piili saamukhaani, ni epwittipwitthi emosa yoolopwana, ni ipwittipwitthi 7 soolopwana sa eyaakha emosa. Nyuwo muhaana ovaha inama sihiniwereiwa.+ 20 Muhaana ovaha itthu iyo, vamosa ni soovaha saya sa ipyo sa otthu wooreerexa wooheliwa makhura.+ Wa khula epooyi munivaha anyu, nvaheke ni iliituru 6 nnimeya sa otthu. Nave wa khula epwittipwitthi yoolopwana, nvaheke-tho iliituru ixexe nnimeya sa otthu. 21 Wa khula epwittipwitthi munivaha anyu wa iye 7 sa eyaakha emosa, nvaheke-tho iliituru piili sa otthu. 22 Nave-tho, nvaheke epuri emosa ntoko yoovaha para oleveleliwa etampi, wiira muleveleliwe itampi sanyu. 23 Muhaana ovaha soovaha iya, ohiya paahi yoovaha para opahiwa enivahiwa voosiisu, yeeyo eniirela mpantta soovaha para opahiwa sa khula nihiku. 24 Soovaha iya muhaana ovaha mwa enamuna emosa-ru khula nihiku, mpakha mahiku 7. Sihaana okhala ntoko eyoolya* enivahiwa Yehova, eyo piiyo, yoovaha para opahiwa yoowunkhela ni enimusivela.* Eyo ehaana ovahiwa vamosa ni yoovaha para opahiwa enivahiwa khula nihiku, ni yoovaha eniwuriwa. 25 Nto nihiku na neethanu nenli, muhaana ompaka konkereesu para Muluku.+ Muhivare muteko woolipa.+

26 “‘Nihiku munivaha anyu mihokorokho soopacerya ottokottha,+ eyo piiyo, okathi muninvaha anyu Yehova ipyo sa niinaano,+ muhaana omwiira konkereesu para Muluku, okathi wa Efesta ya Ohepha.*+ Muhivare muteko woolipa.+ 27 Munvaheke Yehova ipooyi piili saamukhaani, ni epwittipwitthi emosa yaamukhaani, ni ipwittipwitthi soolopwana 7, sa eyaakha emosa.+ Iyo sinrowa okhala soovaha soowunkhela ni sinimusivela yena. 28 Muhaana ovaha itthu iyo vamosa ni yoovaha aya ya ipyo ya otthu wooreerexa wooheliwa makhura. Wa khula epooyi munivaha anyu, nvaheke ni iliituru 6 nnimeya sa otthu. Nave, wa khula epwittipwitthi yoolopwana munivaha anyu, nvaheke-tho iliituru ixexe nnimeya sa otthu. 29 Wa khula epwittipwitthi munivaha anyu wa iye 7 sa eyaakha emosa, nvaheke-tho iliituru piili sa otthu. 30 Nave-tho, nvaheke epuri emosa yaamukhaani ntoko mukuttho wa etampi, wiira muleveleliwe itampi sanyu.+ 31 Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha aya ya ipyo. Inama iyo sihaana okhala soohiwereiwa.+ Nvaheke vamosa ni soovaha siniwuriwa.

29 “‘Nihiku noopacerya na mweeri wa neethanu nenli, muhaana omwiira konkereesu para Muluku. Muhivare muteko woolipa.+ Nlo ti nihiku munrowa anyu woopa nlope.+ 2 Muhaana onvaha Yehova yoovaha para opahiwa yoowunkhela ni enimusivela.* Yoovaha eyo ehaana okhala ya epooyi emosa yaamukhaani, epwittipwitthi emosa yoolopwana, ni ipwittipwitthi 7 soolopwana sa eyaakha emosa, ni soohiwereiwa. 3 Muhaana ovaha yoovaha aya ya ipyo vamosa ni soovaha sa otthu wooreerexa,* wooheliwa makhura. Okathi munivaha anyu epooyi yoolopwana, nvaheke ni iliituru 6 nnimeya sa otthu. Nave, okathi munivaha anyu epwittipwitthi yoolopwana, nvaheke-tho iliituru xexe nnimeya sa otthu. 4 Nave wa khula epwittipwitthi munivaha anyu wa iye 7 sa eyaakha emosa, nvaheke-tho iliituru piili sa otthu. 5 Nave-tho nvaheke epuri emosa yoolopwana yaamukhaani ntoko yoovaha para oleveleliwa etampi, wiira muleveleliwe itampi sanyu. 6 Ohiya soovaha iyo paahi, nvaheke-tho yoovaha para opahiwa enivahiwa khula mweeri, vamosa ni yoovaha ya ipyo.+ Nave, nvaheke yoovaha para opahiwa enivahiwa khula nihiku, vamosa ni yoovaha ya ipyo.+ Yoovaha eyo para opahiwa nvaheke ni soovaha siniwuriwa,+ ntoko siniiriwa aya. Eyo enrowa okhala yoovaha yoopahiwa enivahiwa Yehova, yoowunkhela ni enimusivela.*

7 “‘Nihiku 10 na mweeri ola wa neethanu nenli, muhaana omwiira konkereesu para Muluku,+ ni muhaana wooniherya oriipiwa murima.* Nave muhivare muteko.+ 8 Muhaana onvaha Yehova yoovaha para opahiwa yoowunkhela ni enimusivela.* Yoovaha eyo ehaana okhala ya epooyi emosa, epwittipwitthi emosa yoolopwana, ni ipwittipwitthi 7 soolopwana sa eyaakha emosa, ni soohiwereiwa.+ 9 Muhaana ovaha yoovaha eyo vamosa ni yoovaha ya otthu wooreerexa wooheliwa makhura. Okathi munivaha anyu epooyi yoolopwana, nvaheke ni iliituru 6 nnimeya sa otthu. Nave okathi munivaha anyu epwittipwitthi yoolopwana, nvaheke-tho iliituru xexe nnimeya sa otthu. 10 Nave, wa khula epwittipwitthi yoolopwana munivaha anyu wa iye 7 sa eyaakha emosa, nvaheke-tho iliituru piili sa otthu. 11 Nave nvaheke epuri emosa yaamukhaani ntoko yoovaha para oleveleliwa etampi. Nvaheke-tho yoovaha enivahiwa nihiku na oleveleliwa itampi,+ yoovaha para opahiwa ya khula nihiku, yoovaha ya ipyo, vamosa ni soovaha siniwuriwa.

12 “‘Nihiku 15 na mweeri wa neethanu nenli, muhaana omwiira konkereesu para Muluku. Muhivare muteko woolipa. Nave muhaana opaka efesta ya mahiku 7 para omuttittimiha Yehova.+ 13 Muhaana onvaha Yehova yoovaha para opahiwa+ ni yoowunkhela enimusivela. Yoovaha eyo ekhale ya ipooyi saamukhaani 13, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 14 Muhaana ovaha yoovaha eyo vamosa ni otthu wooreerexa wooheliwa makhura. Wa khula epooyi munivaha anyu wa iye 13, nvaheke ni iliituru 6 nnimeya sa otthu. Nave wa khula epwittipwitthi yoolopwana munivaha anyu wa iye piili, nvaheke-tho iliituru xexe nnimeya sa otthu. 15 Wa khula epwittipwitthi munivaha anyu wa iye 14 soolopwana, nvaheke-tho iliituru piili sa otthu. 16 Nave-tho nvaheke epuri emosa yaamukhaani ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

17 “‘Nihiku na nenli ya efesta eyo, nvaheke ipooyi 12 saamukhaani, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 18 Muhaana ovaha yoovaha eyo ya ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 19 Nave-tho nvaheke epuri emosa yaamukhaani ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni soovaha siniwuriwa.+

20 “‘Nihiku na neeraru, nvaheke ipooyi 11, ipwittipwitthi soolopwana piili ni ipwittipwitthi soolopwana 14 sa eyaakha emosa ni soohiwereiwa.+ 21 Muhaana ovaha yoovaha eyo ya ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 22 Nave-tho nvaheke epuri emosa ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

23 “‘Nihiku na neexexe, nvaheke ipooyi 10, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 24 Muhaana ovaha soovaha iyo sa ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 25 Nave-tho nvaheke epuri emosa yaamukhaani ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

26 “‘Nihiku na neethanu, nvaheke ipooyi 9, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 27 Muhaana ovaha soovaha iyo sa ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 28 Nave-tho nvaheke epuri emosa ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

29 “‘Nihiku na neethanu namosa, nvaheke ipooyi 8, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 30 Muhaana ovaha soovaha iyo sa ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 31 Nave-tho nvaheke epuri emosa ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni soovaha siniwuriwa.+

32 “‘Nihiku na neethanu nenli, nvaheke ipooyi 7, ipwittipwitthi soolopwana piili ni ipwittipwitthi soolopwana 14 sa eyaakha emosa, ni soohiwereiwa.+ 33 Muhaana ovaha soovaha iyo sa ipyo ni soovaha siniwuriwa, vamosa ni ipooyi, muttharaka nummeru na inama iyo, ntoko siniiriwa aya. 34 Nave-tho nvaheke epuri emosa ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

35 “‘Nihiku na neethanu neeraru, muhaana opaka muthukumano muulupale. Muhivare muteko woolipa.+ 36 Muhaana onvaha Yehova yoovaha para opahiwa yoowunkhela ni enimusivela. Yoovaha eyo ehaana okhala ya epooyi emosa, epwittipwitthi emosa yoolopwana, ni ipwittipwitthi soolopwana 7 sa eyaakha emosa, ni soohiwereiwa.+ 37 Muhaana ovaha soovaha iyo sa ipyo ni soovaha siniwuriwa, vamosa ni epooyi, muttharaka nummeru na inama iyo, ntoko siniiriwa aya. 38 Nave-tho, nvaheke epuri emosa ntoko yoovaha para oleveleliwa etampi. Muhaana ovaha soovaha iya, ohiya paahi yoovaha para opahiwa enivahiwa khula nihiku, vamosa ni yoovaha ya ipyo, ni yoovaha eniwuriwa.+

39 “‘Iya ti itthu mukhanle anyu onvaha Yehova okathi wa ifesta sanyu,+ vamosa ni soovaha sanyu para omutaphula natiri,+ ni itthu munivaha anyu voohikhanyereriwa,+ ni soovaha sanyu para opahiwa,+ ni soovaha sanyu sa ipyo,+ ni soovaha sanyu siniwuriwa,+ ni mikuttho sanyu sa opatthani”’.+ 40 Moise aahaaleela aisarayeli itthu sootheene Yehova aamurumme awe.

30 Vano, Moise aahilavula ni ahooleli+ a mahimo a Isarayeli, iiraka: “Etthu Yehova orumme awe tiila: 2 Akhala mulopwana onimmanela natiri+ Yehova aahiiso onilapha+ wiikhoottiherya etthu, ohaana omaliherya moolumo awe.+ Nave ohaana opaka itthu sootheene oleihenrye awe.+

3 “Akhala muthiyana onimmanela natiri Yehova aahiiso onilapha wiikhoottiherya etthu, nlelo ori ene mwaaruusi ni okhalaka vatthokoni va paapa awe, 4 nto paapa awe omusuwela natiri ommanne awe, ni etthu iikhoottihenrye awe, nave ohimukhoottiherya, anatiri awo ootheene anoomaliheriwa. Siiso, itthu sootheene iikhoottihenrye awe nlelo sinnivara muteko. 5 Masi, akhala wiira paapa awe onoomusuwela natiri mwaaruusi ole ommanne awe ni itthu iikhoottihenrye awe, vano paapa awe omukhoottiherya, itthu iyo khasirina-tho muteko. Okhala wiira paapa awe oomukhoottiherya, Yehova onoomulevelela mwaaruusi owo.+

6 “Masi atheliwa vale ohinatthi omutaphula natiri awe aahiiso etthu oleihenrye awe opaka, ohinatthi wuupuwela saana, 7 nto iyawe ohimukhoottiherya nihiku onisuwela awe, natiri a muthiyana owo ni itthu iikhoottihenrye awe nlelo sinnivara muteko. 8 Masi iyawe amukhoottiherya nihiku onrowa awe osuwela, mulopwana owo pooti ommaliha natiri aahiiso etthu mwaarawe oleihenrye awe ohinatthi wuupuwela saana.+ Vano Yehova onoomulevelela muthiyana owo.

9 “Masi akhala muthiyana naamukhweli wala omwalanne ni iyawe onimmana natiri, muthiyana owo ohaana opaka itthu sootheene oleihenrye awe.

10 “Akhala muthiyana onimmana natiri aahiiso wiikhoottiherya etthu okhalaka vatthokoni va iyawe, 11 nto iyawe omusuwela natiri a mwaarawe, masi ohihimya etthu nnakhala ohimukhoottiherya, weeso muthiyana owo ohaana waamaliherya anatiri awe ootheene ni itthu sootheene iikhoottihenrye awe. 12 Masi akhala wiira iyawe onommala-maliha natiri aahiiso itthu iikhoottihenrye awe mwaarawe, itthu iyo khasirina-tho muteko.+ Okhala wiira iyawe oomala-maliha itthu oleihenrye mwaarawe, Yehova onoomulevelela muthiyana owo. 13 Iyawe pooti omulipiha aahiiso ommala-maliha natiri ommanne awe wala etthu iikhoottihenrye awe. 14 Masi akhala wiira annivira mahiku iyawe ohihimmye etthu, owo onnaalipiha anatiri ootheene a mwaarawe aahiiso itthu sootheene oleihenrye awe wiikhoottiherya. Mulopwana owo onnilipiha itthu iyo, okhala wiira khaahimmye etthu nihiku aiwale awe. 15 Masi akhala wiira mulopwana owo onnimala-maliha itthu iyo ovinre ene okathi nuumala wiiwa, owo tonrowa okhalana mulattu mwaha wa etampi ya mwaarawe.+

16 “Ala ti malamulo Yehova aamurumme awe Moise, animuhimya mulopwana ni mwaarawe, paapa ni mwanawe mwaaruusi nlelo onikhala vatthokoni vawe”.

31 Yehova aahimuleela Moise wiira: 2 “Mwaavahe ehukhumu+ atthu a oMidiyani, mwaha wa etthu yaawiirenle aya aisarayeli.+ Nuumala-vo, nyuwo munimookhwa”.+

3 Vano Moise aahaaleela atthu wiira: “Mwaalokiherye alopwana murina anyu, wiira yawane ekhotto ni atthu a oMidiyani. Mwiira siiso, munoopaka etthu Yehova orumme awe, eyo piiyo, munimwaavaha ehukhumu atthu a oMidiyani. 4 Wa mahimo ootheene a Isarayeli, khula nihimo mwaathanle atthu 1.000 wiira erowe okhottoni”. 5 Nto, wa mahimo a Isarayeli,*+ yaahithanliwa atthu 1.000 khula nihimo. Siiso, atthu 12.000 yaahilikana wiira yawane ekhotto.

6 Khula nihimo, Moise aahaaruma alopwana 1.000 orowa okhottoni. Awo yaahihooliwa ni Pineha,+ mwaana a namukuttho Eleyazari. Pineha owo, aahikuxa itthu sooreerihiwa sa mutapernaakulu ni malope a okhottoni.+ 7 Awo yaahiwana ekhotto ni atthu a oMidiyani, siisaale ntoko Yehova aamurumme awe Moise. Yaahiwiiva alopwana ootheene. 8 Waahiya alopwana awo, yaahiwiiva-tho mamwene mathanu a oMidiyani, eyo piiyo, Evi, Rekemi, Suri, Huri, ni Reba. Nave-tho, yaahimwiiva Balaamu,+ mwaana a Beyori ni espaata.* 9 Masi aisarayeli yaahaavara athiyana ni anamwane a oMidiyani. Yaahikuxa-tho inama saya sootheene sa vate ni mireerelo saya sootheene. 10 Awo yaahipaha ipooma sootheene ni maxaxa ootheene oMidiyani. 11 Yaahikuxa mireerelo sootheene sa atthu, ni inama saya sootheene. Nave-tho yaahaavara atthu. 12 Yaahaakuxa atthu ale yaavanre aya, vamosa ni mireerelo saya, ni inama saya, amuroihela Moise ni namukuttho Eleyazari, ni atthu ootheene a Isarayeli, yaawo yaari moothakoni moowaataleya mwa oMowabi,+ waattamela muro Yordani, oYeriko.

13 Vano, Moise ni namukuttho Eleyazari ni makhulupale ootheene a nloko, yaahirowa okumana ni atthu awo ota wa muttetthe. 14 Masi Moise aahinanariwa vanceene ni makhulupale ale a anakhotto, eyo piiyo, makhulupale a anakhotto 1.000 ni makhulupale a anakhotto 100, yaawo yaakhuma okhottoni. 15 Moise aahaakoha oriki: “Xeeni muhalaka waahiya athiyana ootheene ari ene akumi? 16 Ti yaala yaatumereriwe ni Balaamu waawoka aisarayeli, wiira amukhootte Yehova+ ni amukokhoreleke muluku Peyori.+ Tivonto, yaahaakhumelela ehasara atthu ootheene a Yehova.+ 17 Muhaana owiiva anamwane ootheene axilopwana, nave athiyana ootheene atonko orupa ni mulopwana. 18 Masi mwaahiye ari ene akumi aximwali ootheene ahitonko orupa ni mulopwana.+ 19 Muhaana omaka mahiku 7 ota wa muttetthe. Nto ootheene ale amwiivale mutthu aahiiso avanre murutthu,+ ahaana wiireeriha+ nihiku na neeraru ni nihiku na neethanu nenli, vamosa ni ale mwaavanre anyu. 20 Nave, mureerihe malaya ootheene, ni itthu sootheene sipakiwe ni esapala, ni itthu sootheene sipakiwe ni manri a epuri, ni itthu sootheene sipakiwe ni matera”.

21 Nto namukuttho Eleyazari aahaaleela anakhotto yaaronwe owana ekhotto wiira: “Nlamulo Yehova omurumme awe Moise, tinla: 22 “Paahi eweero, eparatha, ekoopiri, eyuuma, estaanyu, ni exumpu, 23 eyo piiyo, itthu sootheene sihinivya ni mooro, muhaana oreeriha nvirihaka vamooroni. Nave, muhaana-tho oreeriha itthu iyo ni maasi anirumeeliwa para oreeriha.+ Nto itthu sootheene sinivya ni mooro, muhaana orapiha ni maasi. 24 Nave, muhaana okattha malaya anyu nihiku na neethanu nenli. Siiso, munookhala ooreerihiwa. Nuumala-vo, pooti otthikela omuttettheni’”.+

25 Vano, Yehova aahimuleela Moise wiira: 26 “Nyuwo vamosa ni namukuttho Eleyazari, ni ahooleli a mahimo a nloko, mulepe itthu siruuhiwe okhottoni, mukontari itthu sikuxiwe, ni atthu avariwe, ni inama sivariwe. 27 Mukawanye itthu iyo mipantta miili. Mpantta mmosa mwaavahe atoropa yaaronwe owana ekhotto, nto mpantta mukina mwaavahe atthu ootheene a nloko yahaaronwe okhottoni.+ 28 Wa khula itthu 500 sa atoropa yaaronwe okhottoni, mukuxe etthu emosa wiira munvahe mpoosito Yehova, akhale atthu, sikhale ipooyi, apuuru, ipuri aahiiso ipwittipwitthi. 29 Nave-tho, muhavule itthu iyo eriyari, munvahe namukuttho Eleyazari, ntoko yoovaha para Yehova.+ 30 Mpantta ovahiwe aisarayeli, wa khula itthu 50 mukuxe emosa, okhale mutthu, sikhale ipooyi, akhale apuuru, sikhale ipuri aahiiso ipwittipwitthi, eyo piiyo, khula enama ya vate, mwaavahe alevi,+ yaawo anikhapelela miteko sinivarihana ni etapernaakulu ya Yehova”.+

31 Tivo, Moise ni namukuttho Eleyazari yaahiira siisaale ntoko Yehova aamurumme awe Moise. 32 Mireerelo saahanle, seiyo saakuxiwe ni alopwana yaaronwe owana ekhotto, saari ipuri ni ipwittipwitthi 675.000, 33 ipooyi 72.000, 34 ni apuuru 61.000. 35 Athiyana yahaarumpe ni alopwana+ yaari 32.000. 36 Nimeya na ipwittipwitthi ni ipuri saavahiwe atthu yaaronwe okhottoni, saari 337.500. 37 Mpoosito waavahiwe Yehova, saari ipwittipwitthi ni ipuri 675. 38 Nave saahikhala ipooyi 36.000. Nto mpoosito waavahiwe Yehova, saari ipooyi 72. 39 Yaahikhala apuuru 30.500. Nto mpoosito waavahiwe Yehova, yaari apuuru 61. 40 Yaahikhala atthu 16.000. Nto mpoosito waavahiwe Yehova, yaari atthu 32. 41 Vano Moise aahinvahererya namukuttho Eleyazari,+ mpoosito waavahiwe Yehova, siisaale ntoko Yehova aamurumme awe Moise.

42 Nimeya yaavahiwe aisarayeli, nenno Moise aakawannye awe ni nimeya yaavahiwe atthu yaaronwe okhottoni, saari itthu iya: 43 ipwittipwitthi ni ipuri 337.500, 44 ni ipooyi 36.000, 45 ni apuuru 30.500, 46 ni atthu 16.000. 47 Vano, wa khula itthu 50 sa nimeya yaavahiwe aisarayeli, Moise aahikuxa emosa, akhale atthu aahiiso inama, aavaha alevi,+ yaawo yaakhapelela miteko saavarihana ni etapernaakulu ya Yehova,+ siisaale ntoko Yehova aamurumme awe Moise.

48 Alopwana yaathanliwe, yaawo yaari makhulupale a atoropa 1.000,+ ni makhulupale a atoropa 100, yaahimwaattamela Moise, 49 anamuleela wiira: “Hiyo arumeyi anyu, nihaakontari alopwana ootheene nnaahoolela ahu, yaawo yaaronwe okhottoni. Khuuvo orimenle, nnakhala mmosa.+ 50 Nto munihiye wiira khula mmosa a hiyo onvahe Yehova itthu oruuhale awe: itthu sa eweero, ipulseera siniwariwa mukosani, ipulseera siniwariwa mmoononi, anela, ipirinku, ni itthu sikina, wiira nivekele oleveleliwa itampi sahu ohoolo wa Yehova”.

51 Siiso, Moise ni namukuttho Eleyazari yaahaakhelela eweero ni itthu sootheene yaaruuheliwe aya. 52 Eweero yootheene makhulupale a anakhotto 1.000 ni makhulupale a anakhotto 100 yanvanhe aya Yehova, yaari ixeekele* 16.750. 53 Khula mulopwana aaronwe okhottoni aahikuxa mpantta awe wa mireerelo saakuxiwe. 54 Moise ni namukuttho Eleyazari yaahaakhelela eweero yaaruuhiwe ni makhulupale a anakhotto 1.000, ni makhulupale na anakhotto 100. Awo yaahiroiha itthu iyo mutentani mwa mithukumano, wiira atthu aisarayeli yuupuweleke moota Yehova aakhalihenrye awe.

32 Anamwane a Rubeni+ ni anamwane a Gadi,+ yaahikhalana inama sinceene. Vano, awo yaahoona wiira elapo ya oYazeri+ ni oXileyaadi, yaari yooreera para ohuwa inama. 2 Tivo, anamwane a Gadi ni anamwane a Rubeni yaahimwaattamela Moise, ni namukuttho Eleyazari, ni makhulupale a nloko, anahimya wiira: 3 “Elapo ya wAtarothi, oDiboni, oYazeri, oNimira, oHexeboni,+ wEleyale, oSebami, oNebo,+ ni oBeyoni,+ 4 mittetthe seiyo Yehova onikhalihenrye awe hiyo aisarayeli okuxa,+ ti sooreera para ohuwa inama. Nave arumeyi anyu khareerane inama”.+ 5 Awo yaahihimya-tho wiira: “Akhala wiira munneemererya, elapo eyo ekhale yawihu, hiyo arumeyi anyu. Nto muhinihiye nrowaka mpantta mukina wa muro Yordani”.

6 Vano, Moise aahiwaakhula anamwane a Gadi ni anamwane a Rubeni, iiraka: “Muniphavela ohimya wiira okathi axinninyu anirowa aya okhottoni, nyuwo munrowa ohalaka vaava? 7 Xeeni muniphavela anyu waakhulumula atthu a Isarayeli? Mwiira siiso, munoowiiriha woova orowa elapo Yehova onrowa awe waavaha. 8 Eyo ti etthu yaapanke aya amuhavinre anyu, okathi kaarumme aka orowa oweha elapo ya oKadexi-Barneya.+ 9 Okathi yaaphiyale aya oxepani* wa wExikoli,+ aweha elapo, awo yaahaakhulumula atthu a Isarayeli. Nave yaahiwiiriha woova orowa elapo Yehova aarowa awe waavaha.+ 10 Nihiku nle, Yehova aahinanariwa vanceene ni aahilapha, iiraka:+ 11 ‘Alopwana arina iyaakha okhuma 20 orowa ohoolo, yaawo yaakhumme wExiitu, khanrowa oweha elapo+ kammanenle aka natiri Abrahamu, Isaakhi, ni Yakobe,+ okhala wiira khakiiwelenle ni murima aya wootheene, 12 ohikhanle paahi Kalebi,+ mwaana a Yefune, a oKenisi, ni Yooxuuwa,+ mwaana a Nuuni, okhala wiira aamwiiwelela Yehova ni murima aya wootheene’.+ 13 Tivonto, Yehova aahinanariwa vanceene ni aisarayeli, nave aahiwiiriha weetta moothakoni iyaakha 40,+ mpakha okhwa atthu ootheene a nloko nle, yaawo yaapanke itthu soohiloka vamaithoni va Yehova.+ 14 Vano, nyuwo anatampi munipaka siisaale ntoko yaapanke aya amuhavinre anyu, munaphavela omwiiriha Yehova otepa onanariwa ni aisarayeli. 15 Akhala wiira munoohiya omwiiwelela, owo onimoohiyani mukhalaka moothakoni muumu. Nave, nyuwo munoowiiriha atthu ala ootheene opweteya”.

16 Nuumala-vo, awo yaahimwaattamela Moise, anahimya wiira: “Munihiye nipake masisi* a maluku para inama sahu ni niteke ipooma para aniihu. 17 Hiyo noolikana wiira niwane ekhotto.+ Nave nnoorowa ohoolo wa aisarayeli mpakha waakhaliherya ophiya opuro aya. Nto aniihu anoohala ipooma soolipihiwa, wiira ahixankihiwe ni atthu a elapo ela. 18 Khaninrowa otthikela owaani, mpakha aisarayeli ootheene waakhela elapo anrowa aya ovahiwa.+ 19 Hiyo khaninrowa waakhela etthaya mpantta ole iwe wa muro Yordani, okhala wiira nihaakhela etthaya mpantta ola nno onikhuma nsuwa wa muro Yordani”.+

20 Moise aahiwaakhula wiira: “Vakhala wiira ti siiso, mukuxe ikaruma sanyu sa ekhotto mwawane para Yehova.+ 21 Nave mulapuwe muro Yordani ohoolo wa Yehova. Nto okathi onrowa awe owoomola awanani anyu ohoolo wawe,+ 22 elapo enooxinttiwa ni Yehova. Vano nyuwo pooti otthika+ ni khamunrowa okhalana mulattu ohoolo wa Yehova ni ohoolo wa Isarayeli. Nave, elapo ela enookhala yawinyu mukhaliheriwaka ni Yehova.+ 23 Masi mwaahipake eyo, munoomutthekela Yehova. Nave musuweleke wiira munimwaakhula mwaha wa etampi anyu. 24 Tivonto, mwaatekele aniinyu ipooma ni mpake masisi para inama sanyu.+ Masi muhaana opaka etthu muleihenrye anyu”.

25 Anamwane a Gadi ni anamwane a Rubeni, yaahimuleela Moise wiira: “Hiyo arumeyi anyu, nnoopaka siisaale ntoko munniruma anyu. 26 Aniihu, axaarihu, ni inama sahu sootheene, sinoohala ipooma sa oXileyaadi.+ 27 Masi hiyo arumeyi anyu nnoolapuwa muro, eyo piiyo, alopwana ootheene akunxe ene ikaruma saya wiira yawane ekhotto para Yehova,+ siisaale ntoko nyuwo, pwiya ahu, munihimya anyu”.

28 Siiso, Moise aahimuruma namukuttho Eleyazari, ni Yooxuuwa, mwaana a Nuuni, ni aahaaruma ahooleli a imusi sa mahimo a Isarayeli, 29 iiraka: “Akhala wiira anamwane a Gadi ni anamwane a Rubeni anoolapuwa muro Yordani ni nyuwo, eyo piiyo, alopwana ootheene akunxe ene ikaruma saya wiira yawane ekhotto para Yehova, muhaana waavaha elapo ya oXileyaadi wiira ekhale yawaya, nuumala nyuwo okuxa elapo eyo.+ 30 Masi yaahilapuwe ni nyuwo akunxe ene ikaruma saya sa ekhotto, awo ahaana okhalaka ni nyuwo elapo ya oKanaani”.

31 Nto, anamwane a Gadi ni anamwane a Rubeni, yaahaakhula yiiraka: “Hiyo arumeyi anyu, nnoopaka etthu Yehova olavunle awe. 32 Nnookuxa ikaruma sahu, ni nnoolapuwa muro nrowaka elapo ya oKanaani wiira nawane ekhotto para Yehova.+ Masi etthaya ninrowa ahu waakhela, enrowa okhala ekhopela yeela wenno ya muro Yordani”. 33 Siiso, Moise aahaavaha awo, eyo piiyo, anamwane a Gadi, anamwane a Rubeni,+ ni nimeya na nihimo na Manase,+ mwaana a Yosefe, omwene wa oSihoni,+ mwene a amori, ni omwene wa Oogi,+ mwene a oBaxani. Aahaavaha elapo yootheene ni ipooma sootheene saarukurerya elapo eyo.

34 Anamwane a Gadi yaahiteka ipooma iya: Diboni,+ Atarothi,+ Aroweri,+ 35 Atirothi-Xofani, Yazeri,+ Yogoboha,+ 36 Bethi-Nimira,+ ni Bethi-Harani.+ Iyo saari ipooma soolipihiwa. Nave-tho, yaahiteka masisi* a maluku para inama saya. 37 Anamwane a Rubeni yaahiteka ipooma sa Hexeboni,+ Eleyale,+ Kiriyatayimi,+ 38 Nebo,+ ni Bayaali-Mewoni,+ seiyo yaaturunke aya masina aya. Yaahiteka-tho, epooma ya Siibima. Nave-tho, yaahipacerya ovaha masina makina ipooma yaatenke aya.

39 Anamwane a Makiri,+ mwaana a Manase, yaahirowa oXileyaadi, akuxa muttetthe owo. Nave, yaahiwoomola amori yaakhala weiwo. 40 Moise aahinvaha Makiri mwaana a Manase, muttetthe wa oXileyaadi. Nto owo aahipacerya okhala weiwo.+ 41 Nto Yayiri mwaana a Manase, aahituphela mittetthe saamukhaani sa oXileyaadi. Nave-tho, aahivaha mittetthe iyo nsina noowi Hawothi-Yayiri.+ 42 Nobahi aahituphela muttetthe wa Kenathi, ni ipooma saattamenle muttetthe owo. Nto aahipacerya wiitthanela nsina nawe, eyo piiyo, Nobahi.

33 Ala yaari mapuro aisarayeli yaavinre aya, okathi yaakhuma aya elapo ya wExiitu,+ yeettihiwaka ni Moise ni Aroni.+ Awo yeetta akawanyiwe ene ikurupu.*+ 2 Moise aanilepa mapuro atthu yaavenya aya, ntoko aarummwale awe ni Yehova. Nto mapuro atthu awo yaavira aya taala:+ 3 Nihiku 15, na mweeri woopacerya,+ yaahikhuma oRamese.+ Awo yaakhumme mmeeloni mwaya nuumala Paasikha.+ Aisarayeli yaahikhuma ahoovaka etthu, yooniwaka ni atthu ootheene a wExiitu. 4 Masi atthu a wExiitu yiira yaavithaka anamwane ootheene oopacerya oyariwa, yaawo Yehova aawiivale awe,+ okhala wiira Yehova aahaaphukela amuluku aya.+

5 Siiso, aisarayeli yaahikhuma oRamese anarowa omaka oSukothi.+ 6 Yaahikhuma oSukothi, anarowa omaka wEtami,+ waattamela woothakoni. 7 Nuumala-vo, yaahikhuma wEtami, anatthikela ottuli, arowaka oPi-Hahirothi, weiwo onikhala ohoolo wa oBayali-Sefoni.+ Nto yaahimaka waattamela oMigdoli.+ 8 Vano, yaahikhuma oPi-Hahirothi, aviraka eriyari ya ephareya,+ anarowa woothakoni.+ Nave yaaheetta mukwaha wa mahiku mararu moothakoni wa Etami,+ anarowa omaka oMara.+

9 Yaahikhuma oMara, aphiya wElimi. Vano wElimi saahikhala ihime 12 sa maasi ni mikole 70. Nto yaahimaka weiwo.+ 10 Nuumala-vo, yaahikhuma wElimi, anarowa omaka waattamela ephareya Yooxeerya. 11 Nuumala-vo, yaahikhuma ephareya Yooxeerya, anarowa omaka moothakoni mwa oSini.+ 12 Yaahikhuma moothakoni mwa oSini, anarowa omaka oDofoka. 13 Nuumala-vo, yaahikhuma oDofoka, anarowa omaka wAluxi. 14 Vano yaahikhuma wAluxi, anarowa omaka oRefidimi.+ Opuro owo, khiyaakhanle maasi para atthu owurya. 15 Yaahikhuma oRefidimi, anarowa omaka moothakoni mwa oSinayi.+

16 Nuumala-vo, awo yaahikhuma moothakoni mwa oSinayi, anarowa omaka oKibirothi-Hatawa.+ 17 Yaahikhuma oKibirothi-Hatawa, anarowa omaka oHaserothi.+ 18 Vano, yaahikhuma oHaserothi, anarowa omaka oRitima. 19 Nuumala-vo, awo yaahikhuma oRitima, anarowa omaka oRimoni-Peresi. 20 Yaahikhuma oRimoni-Peresi, anarowa omaka oLibina. 21 Yaahikhuma oLibina, anarowa omaka oRisa. 22 Nuumala-vo, awo yaahikhuma oRisa, anarowa omaka oKehelata. 23 Yaahikhuma oKehelata, anarowa omaka omwaako Saferi.

24 Vano, yaahikhuma omwaako Saferi, anarowa omaka oHarada. 25 Yaahikhuma oHarada, anarowa omaka oMakelothi. 26 Nuumala-vo, awo yaahikhuma+ oMakelothi, anarowa omaka oTahathi. 27 Yaahikhuma oTahathi, anarowa omaka oTerahi. 28 Vano, awo yaahikhuma oTerahi, anarowa omaka oMitika. 29 Yaahikhuma oMitika, anarowa omaka oHasimona. 30 Nuumala-vo, yaahikhuma oHasimona, anarowa omaka oMosera. 31 Yaahikhuma oMosera, anarowa omaka oBene-Yaakani.+ 32 Yaahikhuma oBene-Yaakani, anarowa omaka Hori-Hagidigadi. 33 Nuumala-vo, awo yaahikhuma Hori-Hagidigadi, anarowa omaka oYotabata.+ 34 Nuuvira okathi, yaahikhuma oYotabata, anarowa omaka wAbirona. 35 Vano, awo yaahikhuma wAbirona, anarowa omaka wEsiyoni-Geberi.+ 36 Nuumala-vo, awo yaahikhuma wEsiyoni-Geberi, anarowa omaka moothakoni mwa oSini,+ eyo piiyo, oKadexi.

37 Vano, awo yaahikhuma oKadexi, anarowa omaka omwaako Hori,+ weiwo oniira mukano ni elapo ya wEdomi. 38 Namukuttho Aroni, aahiwela omwaako Hori, ntoko Yehova aahimmye awe. Nto aahikhwa weiwo, nihiku noopacerya na mweeri wa neethanu, iyaakha seettaka 40 nuumala aisarayeli okhuma elapo ya wExiitu.+ 39 Okathi Aroni aakhwiiye awe omwaako Hori, aarina iyaakha 123.

40 Vano mwene Aradi,+ mukanaani, yoowo aakhala oNegebi, elapo ya oKanaani, aahiiwa wiira aisarayeli yaanirwa.

41 Nuumala-vo, aisarayeli yaahikhuma omwaako Hori,+ anarowa omaka oSalimona. 42 Yaahikhuma oSalimona, anarowa omaka oPunoni. 43 Nuumala-vo, awo yaahikhuma oPunoni, anarowa omaka Obothi.+ 44 Yaahikhuma Obothi, anarowa omaka wIye-Abarimi, omukanoni wa oMowabi.+ 45 Nuumala-vo, awo yaahikhuma wIyimi, anarowa omaka oDiboni-Gadi.+ 46 Yaahikhuma oDiboni-Gadi, anarowa omaka wAlimoni-Diblatayima. 47 Nuumala-vo, yaahikhuma wAlimoni-Diblatayima, anarowa omaka omiyaakoni wAbarimi,+ ohoolo wa oNebo.+ 48 Wookiseryani waya, yaahikhuma omiyaakoni wAbarimi, anarowa omaka moothakoni woowaataleya mwa oMowabi, okherekhere wa muro Yordani, waattamela oYeriko.+ 49 Nlelo yaakhala okherekhere wa muro Yordani, okhuma oBethi-Yeximothi mpakha wAbeli-Xitimi,+ moothakoni moowaataleya mwa oMowabi.

50 Yehova aahilavula ni Moise, moothakoni moowaataleya mwa oMowabi, mukerekhere mwa muro Yordani, muttetthe wa oYeriko, iiraka: 51 “Mwaaleele aisarayeli wiira: ‘Nyuwo munrowa olapuwa muro Yordani murowaka elapo ya oKanaani.+ 52 Nwoomole atthu ootheene anikhala elapo eyo, mpwexakase ilatarato saya sootheene sipakiwe ni maluku,+ ni munyaanye ilatarato saya sootheene sipakiwe ni eyuuma,+ ni muhonone mapuro ootheene anaakokhorela aya amuluku aya.+ 53 Nyuwo muhaana okuxa elapo eyo wiira mukhaleke memmo, okhala wiira miyo kinimoovahani elapo eyo wiira ekhale yawinyu.+ 54 Muhaana okawa elapo muttharaka nihimo ni emusi enimorela aya esoorti.+ Ekurupu yuulupale, muhaana ovaha mpantta muulupale, ekurupu yaamukhaani, muhaana ovaha mpantta mwaamukhaani.+ Khula nihimo ninrowa waakhela etthaya enrowa aya omorela esoorti aya. Khula mutthu onrowa waakhelaka etthaya evahiwe nihimo nawe.+

55 “‘Nto mwaahiwoomole atthu anikhala elapo eyo,+ atthu anrowa ohala memmo anrowa okhalaka ntoko ikokhola mmaithoni mwanyu, ni miiwa mweerutthuni mwanyu. Nave, animoohaaxani elapo munrowa anyu okhalaka.+ 56 Kinimoovahani ehukhumu kaaleihenrye aka waavaha awo’”.+

34 Yehova aahilavula-tho ni Moise, oriki: 2 “Mwaavahe aisarayeli malakiheryo ala: ‘Okathi munrowa anyu okela elapo ya oKanaani,+ iya ti mikano sa elapo eyo munrowa anyu ovahiwa wiira ekhale yawinyu.+

3 “‘Mukano wa osuuli onrowa okhuma moothakoni mwa oSini, waattamela wEdomi. Mpantta onikhuma nsuwa, mukano wa osuuli wa muttetthe anyu onrowa opacerya mukerekhere mwa ephareya ya Maakha.*+ 4 Mukano owo onoohapuwa oviraka osuuli, etturuuru ya wAkarabimi,+ orowaka mpakha oSini. Nave onrowa omalela osuuli wa oKadexi-Barneya.+ Nuumala-vo, onoophiya oHasari-Adari+ mpakha wAsimoni. 5 Okhuma wAsimoni, mukano owo onoohapuwa orowaka nxepa* na wExiitu. Nto onrowa omalela mukerekhere mwa ephareya.*+

6 “‘Mpantta onikela nsuwa, mukano anyu onrowa okhala ekerekhere ya Ephareya Yuulupale.* Ola tonrowa okhala mukano anyu mpantta onikela nsuwa.+

7 “‘Vano mukano anyu wa onorti onrowa okhala ola: Onrowa okhuma Ephareya Yuulupale mpakha omwaako Hori. 8 Okhuma mwaako Hori, mukano onrowa ovira oLebo-Hamati,*+ wamaleleke oSedadi.+ 9 Nave-tho, onoorowa mpakha oZiforoni, wamaleleke oHasari-Enani.+ Ola tonrowa okhala mukano anyu wa onorti.

10 “‘Vano, mpantta onikhuma nsuwa, mukano anyu onrowa okhuma oHasari-Enani mpakha oXefani. 11 Mukano owo onookhuma oXefani mpakha oRibla, mpantta onikhuma nsuwa wa Ayini. Onookhuruwa oviraka mukerekhere mwa ephareya Kinerethi.*+ 12 Mukano owo onoorowa mpakha muro Yordani. Nto onrowa omalela ephareya ya Maakha.+ Ela tenrowa okhala elapo anyu+ ni mikano saya’”.

13 Siiso, Moise aahaavaha malakiheryo ala aisarayeli, iiraka: “Ela elapo munrowa anyu okaweliwa wiira ekhale yawinyu, etthariwaka onimorela aya esoorti,+ siisaale ntoko Yehova aarumme awe ovahiwa mahimo 9, ni nimeya na nihimo na Manase. 14 Vano, nihimo na Rubeni, nihimo na Gadi, nimeya nikina na nihimo na Manase, aakuxa mpantta avahiwe aya.+ 15 Mahimo manli ni nimeya na nihimo nihaakhela mpantta avahiwe aya, muttetthe mukina wa muro Yordani, waattamela oYeriko, mpantta onikhuma nsuwa”.+

16 Yehova aahimuleela-tho Moise wiira: 17 “Masina a alopwana anrowa wookawelakani etthaya, taala: namukuttho Eleyazari,+ ni Yooxuuwa,+ mwaana a Nuuni. 18 Nave muhaana omukuxa mukhulupale mmosa a khula nihimo wiira ookhaliheryekeni okawa etthaya.+ 19 Masina a alopwana awo, taala: Kalebi,+ mwaana a Yefune, a nihimo na Yuda;+ 20 Xemuweli, mwaana a Amihudi, a nihimo na Simeyoni;+ 21 Elidadi, mwaana a Kisiloni, a nihimo na Beniyamini;+ 22 mukhulupale Buki, mwaana a Yogli, a nihimo na Dani;+ 23 mukhulupale Haniyeli, mwaana a Eefodi, a nihimo na Manase,+ mwaana a Yosefe;+ 24 mukhulupale Kemuweli, mwaana a Xifatani, a nihimo na Efrayimi;+ 25 mukhulupale Elisafani, mwaana a Parnaki, a nihimo na Zabuloni;+ 26 mukhulupale Palitiyeli, mwaana a Azani, a nihimo na Isakari;+ 27 mukhulupale Ahihudi, mwaana a Xelomi, a nihimo na Axeri;+ 28 mukhulupale Pedaheli, mwaana a Amihudi, a nihimo na Nefetali”.+ 29 Ala alopwana Yehova aarumme awe waakawela etthaya aisarayeli, elapo ya oKanaani.+

35 Yehova aahilavula-tho ni Moise moothakoni moowaataleya mwa oMowabi, mukerekhere mwa muro Yordani,+ muttetthe wa oYeriko. Owo aahimmye so: 2 “Mwaaleele aisarayeli wiira: mwa mittetthe seiye anrowa aya ovahiwa,+ yaavahe alevi ipooma sikina wiira akhaleke-mo. Nave-tho, yaavahe mittetthe sikina sirukurenrye ipooma iyo, para olyihaka inama saya.+ 3 Alevi anrowa okhalaka ipooma seiyo. Vano, inama saya sa vate sinrowa okhalaka mittetthe sinilyihiwa inama. Nave-tho, inama saya sikina sinrowa okhalaka mmuttettheni memmo. 4 Mittetthe para olyiha inama seiyo sirukurenrye ipooma, munrowa anyu waavaha alevi, sihaana okhalana imeeturu 445,* mukontariki okhuma exiri ya epooma eyo. 5 Mphime ota wa epooma eyo, imeeturu 890* mpantta onikhuma nsuwa, imeeturu 890 mpantta wa osuuli, imeeturu 890 mpantta onikela nsuwa, imeeturu 890 mpantta wa onorti. Nto epooma ekhale eriyari. Iyo ti sinrowa okhala mittetthe sa ipooma sa alevi, para olyiha inama.

6 “Ipooma sa ntthyawelo munrowa anyu waavaha alevi, sinrowa okhala 6.+ Ti weiwo onrowa awe otthyawelaka mutthu onimwiiva mukhwaawe.+ Munimwaahava-tho ipooma sikina 42. 7 Nto, ipooma sootheene munrowa anyu waavaha alevi sinrowa okhala 48, vamosa ni mittetthe saya para olyiha inama.+ 8 Ipooma munrowa anyu waavaha alevi, sinrowa okhuma muhina mwa mittetthe aisarayeli anrowa aya waakhela.+ Mahimo maalupale, muhaana okuxa ipooma sinceene. Nave mahimo macikhaani, muhaana okuxa ipooma vakhaani.+ Khula nihimo ninrowa waavaha alevi ipooma saya, otthariwaka munnuwelo wa muttetthe nihimo nlo ninrowa aya waakhela”.

9 Yehova aahitthikela-tho olavula ni Moise, oriki: 10 “Mulavule ni aisarayeli, mwaaleele wiira: ‘Nyuwo munrowa olapuwa muro Yordani, murowaka oKanaani.+ 11 Muhaana othanla ipooma sookhuvenleni, wiira sikhale ipooma sa ntthyawelo, seiyo okhanle awe ootthyawela mutthu onimwiiva mukhwaawe ohilakenle.+ 12 Ipooma iyo sinrowa okhala ipooma sa ntthyawelo wiira muhiphwanyiwe ni mulipa-oowunla ikuhu.*+ Siiso, mutthu yoole onrowa omwiiva mukhwaawe, khonrowa wiiviwa ohinatthi ophukiwa mulattu awe, ohoolo wa alipa-oophuka milattu.*+ 13 Mittetthe 6 sa ntthyawelo munrowa anyu ovaha, sinrowa orumeeliwaka para yeeyo. 14 Ipooma tthaaru sa ntthyawelo sihaana okhala mpantta ola nno wa muro Yordani.+ Nave ipooma sikina tthaaru sihaana okhala mulaponi mwa oKanaani.+ 15 Ipooma iya 6 sinrowa okhala sa ntthyawelo para aisarayeli, ni anamurwa anikhala ni aisarayeli.+ Nto khula mutthu onrowa omwiiva mukhwaawe ohilakenle, otthyaweleke weiwo.+

16 “Akhala mutthu onimmana mukhwaawe ni eyuuma, khumwiiva, owo nawiive. Vano nawiive owo, ohaana wiiviwa.+ 17 Nave ammana ni nluku nikhanle oomwiiva, vano mutthu owo khukhwa, owo nawiive. Nto nawiive owo, ohaana wiiviwa. 18 Ammana ni etthu epakiwe ni matera, ekhanle oomwiiva, vano mutthu owo khukhwa, owo nawiive. Nto nawiive owo, ohaana wiiviwa.

19 “‘Mulipa-oowunla ikuhu tonrowa omwiiva nawiive owo. Tonrowa omwiiva amphwanya vale. 20 Akhala mutthu onimunyokha mukhwaawe, khimukakha aahiiso khimurihela etthu ni murima wootakhala,*+ nto mutthu owo khukhwa, 21 aahiiso onimmana mukhwaawe ni ntata nawe mwaha wa omunyokha, nto mutthu owo khukhwa, ole ommanne mukhwaawe ohaana wiiviwa. Owo nawiive. Mulipa-oowunla ikuhu onoomwiiva nawiive owo amphwanya vale.

22 “‘Masi vakhala wiira omukankhe voohilakela ni khaamunyokha, aahiiso oomurihela etthu ni murima woohitakhala,*+ 23 wala ommoroxela nluku ohinwenhe, nave khahiyo nwanani awe aahiiso khaaphavela omooniha owereya, nto mutthu owo khukhwa, 24 alipa-oophuka milattu* ahaana ophuka mulattu wa mulopwana owo ni mulipa-oowunla ikuhu, atthariwaka malakiheryo yaala.+ 25 Nto alipa-oophuka milattu ahaana omoopola nawiive owo mmatatani mwa mulipa-oowunla ikuhu, ni amuttikiherye epooma ya ntthyawelo, yeeyo aatthyawenle awe. Nawiive ole ohaana okhala memmo mpakha okhwa namukuttho muulupale, yoowo aittheliwe makhura ooreerihiwa.+

26 “‘Masi nawiive owo akhumela ota wa epooma ele ya ntthyawelo aakhala awe, 27 nto mulipa-oowunla ikuhu amphwanya ori ene ota wa epooma eyo ya ntthyawelo, khumwiiva, owo khonrowa okhalana mulattu mwaha wa omwiiva mutthu. 28 Nawiive ohaana okhala epooma ya ntthyawelo mpakha okhwa namukuttho muulupale. Masi nuumala okhwa namukuttho muulupale, nawiive ole pooti otthikela owannyawe.+ 29 Ala ti malakiheryo munrowa anyu ottharaka okathi munrowa anyu ophukaka myaha, mapuro ootheene munrowa anyu okhalaka, okhuma olelo-va orowa ohoolo.

30 “‘Khula mutthu onimwiiva mukhwaawe, ohaana wiiviwa mwaha wa omwiiva mutthu,+ yakhumelela anamoona.+ Masi ohikhale mutthu oniiviwa ni moolumo a namoona mmosa paahi. 31 Muhaakhele etthu enikumihiwa para woopola okumi wa nawiive, yoowo oniphwanela wiiviwa. Owo ohaana wiiviwa.+ 32 Muhaakhele etthu eniliveriwa mutthu otthyawenle epooma ya ntthyawelo. Muhimweemererye otthikela elapo awe, ohinatthi okhwa namukuttho muulupale.

33 “‘Muhinanarihe etthaya munikhala anyu, okhala wiira ephome enninanariha etthaya.+ Nave khivaniweryaneya oreeriha etthaya enanarihiwe ni ephome emwarexiwe, vahikhanle ni ephome ya mutthu ole omwarenxe.+ 34 Muhinanarihe elapo munikhala anyu, yeeyo-tho miyo kinikhala aka, okhala wiira miyo Yehova, kinikhala ni atthu a Isarayeli’”.+

36 Ahooleli a imusi sa nihimo na Xileyaadi, mwaana a Makiri,+ mwaana a Manase, yaawo yaari a imusi sa anamwane a Yosefe, yaahimwaattamela Moise, ni makhulupale a Isarayeli. 2 Awo yaahimuleela wiira: “Pwiyaka, Yehova ohoorumani waavaha etthaya aisarayeli, muttharaka onimorela aya esoorti,+ wiira ekhale etthu enrowa aya ohiyeriwa. Nave-tho, Yehova ohoorumani wiira mireerelo sa munnihu Selofehadi, mwaavahe anaawe axithiyana.+ 3 Akhala wiira axithiyana awo anootheliwa ni alopwana a nihimo nikina na Isarayeli, mireerelo sihiyeriwe aya sinoovalaanyiwa ni mireerelo sa axipaapa ahu. Vano mireerelo saya sinrowa wuncereriwa ni mireerelo sa nihimo ninrowa aya okhala. Siiso, hiyo nnoopweteiwa mpantta wa mireerelo saavahiwe ahu, etthariwaka onimorela aya esoorti. 4 Vano, yaphiya eyaakha ya Yubileyo+ para atthu a Isarayeli, mireerelo sihiyeriwe aya axithiyana awo sinrowa wuncereriwa ni mireerelo sa nihimo ninrowa aya okhalaka. Siiso, mireerelo saya sinrowa ovenxiwa nihimo na axipaapa ihu”.

5 Moise aahaaleela aisarayeli etthu Yehova aamurumme awe, oriki: “Atthu a nihimo na anamwane a Yosefe anihimya ekeekhai. 6 Etthu Yehova orumme awe aahimyaka anamwane a Selofehadi, tiila: ‘Awo pooti otheliwa ni mulopwana animutthuna aya. Masi ahaana otheliwa ni mutthu a nihimo na paapa aya. 7 Mireerelo sihiyeriwe aya aisarayeli sihivahiwe atthu a nihimo nikina, okhala wiira aisarayeli ahaana ohalana mireerelo sa nihimo na amuhavinre aya sihiyeriwe aya. 8 Nave khula mwaana mwaamuthiyana orina itthu sihiyeriwe awe sa mahimo a aisarayeli, ohaana otheliwa ni osuulu wa nihimo na paapa awe,+ wiira aisarayeli nlelo ahalane mireerelo sihiyeriwe aya sa amuhavinre aya. 9 Itthu sihiyeriwe nihimo nimosa, sihivahiwe nihimo nikina, okhala wiira mahimo a Isarayeli ahaana ohalana itthu ahiyeriwe aya’”.

10 Anamwane axithiyana a Selofehadi, yaahiira siisaale ntoko Yehova aamurumme awe Moise.+ 11 Tivo, anamwane a Selofehadi, eyo piiyo, Mahala, Tirsa, Hogla, Milika ni Nowa,+ yaahitheliwa ni anamwane a axinnawe paapa aya. 12 Awo yaahitheliwa ni alopwana a emusi ya Manase, mwaana a Yosefe, wiira mireerelo yaahiyeriwe aya nlelo sikhaleke nihimo na emusi ya paapa aya.

13 Iya sooruma ni maphukelo Yehova aavanhe awe aisarayeli omurumaka Moise, moothakoni moowaataleya mwa Mowabi, mukerekhere mwa muro Yordani, muttetthe wa oYeriko.+