Silini Onirowa Aya Okhala Olumwenku—Woohinthalu?

“MIYO YOOKHALA yuupuwenle aka”. Mwa iyaakha soowiiraka 50 sivinre, 28 a Agosto 1963, mulopwana a wAmerica aari muhooleli a idireito sa apinaatamu Martin Luther King, Jr., aahilavula masu awo mmwaha awe wootepa ovuwa. Orumeelaka ikwaha sinceene masu awo vasulu-vo, King aahitthokiherya muupuwelo awe wala nlipelelo, noowi wamphiya okathi atthu a elapo yotheene yaarowa aya ohikhalana nthalu. Nnaamwi owo aahimyale masu awo ohoolo wa atthu a wEstados Unidos, masi muupuwelo awe wahaasivela atthu a ilapo sinci.

Myeeri miraru nuuvira mwaha ole wa King, 20 a Novembro 1963, ilapo soovikana 100 saahikumiherya nlamulo niihaniwa United Nations Declaration on the Elimination of All Forms of Racial Discrimination (Nlamulo na Maloko Oowuuraana Wira Nimalihe Onyokhana Wotheene wa Maloko). Iyaakha soottharelana, yaahikumiheriwa malamulo makina olumwenku wotheene yaakhoottiha nthalu. Hata apinaatamu amananihaka omaliha nthalu, nlelo ninnikhumelela nikoho nla: Niireke awo aawerya omaliha nthalu?

21 a Março 2012, Sekretaario Geral a N.U., Ban Ki-moon aahilavula so: “Tthiri sihaavo miyuupuwelo ni itthu sinceene sa faita seiye olumwenku wotheene onivarihela aya muteko; vamosa ni itthu sikina wira nimalihiwe nthalu, waanyookha atthu a elapo ekina, ni ohivilelana voohimya sa atthu a nloko nlo. Hata vari siiso, nthalu ninnivikaniha okumiherya ohaawa wa atthu imilyau sene mwa elapo yotheene”.

Hata ilapo seiye apakiwe malamulo oorowa vahoolo voohimya sa ophavela oxinttiwa nthalu vamosa ni inamuna sikina sa onyokhana, nlelo ninnikhala nikoho nla: Niireke malamulo awo aamala-maliha muupuwelo woohiloka wa atthu awo wala aniwiixuttiha ohooniherya nthalu paahi? Akina anikupali wira malamulo awo anikhaliherya paahi wira ohikhumelele othanyana, masi malamulo awo khaniwerya omaliha nthalu. Nthowa xeeni? Mwaha woowi ohaaxana ti etthu eniweha-wehiwa ni ophukeliwa ni nlamulo. Masi nthalu niri vamurimani ni mmuupuweloni wa mutthu; nto khivanikhweya ovenxa.

Tivonto, wira nimalamalihiwe nthalu khahiyo paahi vanitthuneya omalihiwa ele enikumiherya ohaaxana wala onyokhana, masi-tho atthu anitthuneya orukunuxa muupuwelo aya ni waathokorerya waya atthu a nloko nikina. Niireke eyo enoweryaneya tthiri? Akhala ti siiso, moota xeeni? Nkahaya niwehe sowiiraneya vakhaani sinrowa onikhaliherya woona wira vanniweryaneya atthu orukunuxa muupuwelo aya, ni wira ehaavo etthu enaakhaliherya opaka eyo.

BIIBILIYA OHAAKHALIHERYA OXINTTA NTHALU

Linda: Miyo kiyariwe wAfrica do Sul. Nto khula mutthu a elapo aka ohaakhanle mukunya kaamoona okhala mutthu oohifai, oohisuwela etthu, oohiroromeleya, ni murumeyi a akunya. Miyo kaahikhalana nthalu mmuupuweloni, masi hata vari siiso miyo nkaasuwela. Muupuwelo owo waahipacerya oturukeya vaavo kaapacenrye aka omusoma Biibiliya. Miyo kaahiixutta wira “Muluku khanathanla atthu” ni wira murima tori muulupalexa ovikana ekoore ya erutthu ahu wala nttaava ninlavula ahu. (Miteko 10:34, 35; Miruku 17:3) Yoolepa ya aFilipi 2:3 yaahikikhaliherya woona wira akhala wira miyo kaarowa omuthokoreryaka khula mutthu ntoko muulupale, nto miyo kanwerya oxintta nthalu. Weettela sooruma sa Biibiliya wookikhaliherya oweha itthu sinaasivela akina moohicikha ekoore ya erutthu. Vano kootaphuwa voohimya sa waathanya atthu.

Michael: Miyo kinnuunwe muttetthe woowaatta akunya a elapo ya wAustralia, ni kaahikhalana mukhalelo wootepa onanara voohimya sa waathanya atthu a wAsia, vanceenexa atthu oChina. Khalai okathi keettihaka ekaaro, nto kanweha mutthu aalikana ni mutthu a wAsia, miyo kaanihula ejanela ya ekaaro aka ni kinakhuwela so: “Mutthikele elapo anyu, wAsia!” Masi, okathi kaapacenrye aka omusoma Biibiliya, miyo kaahiixutta moota Muluku onaathokorerya awe atthu. Owo onnaaphenta atthu otheene moohicikha opuro anikhuma aya wala makhalelo aya. Ophenta iwo waahikivara murima, ni kaahipacerya waaphenta atthu yaale kaanyokha aka. Tthiri, opaka mirukunuxo ntoko iyo ti voohakalaliha. Vano miyo onnikisivela wuuraana ni atthu anikhuma ilapo sotheene ni makhalelo. Tthiri ohikhalana nthalu wookiphwanyiha ekumi yooloka ni ohakalala wuulupale.

Sandra: Amamaka yaayariwe epooma ya Umunede muttetthe wa oDelta oNigeria. Amusi aya apaapa, anikhuma muttetthe wa Edo ni anilavula nttaava na Esan. Mwaha wa ovirikana nno, amaama yaanithanyiwa vanceene ni emusi ya apaapa mpakha nihiku akhwiiye aya. Nto miyo kaahilapha wira nkaarowa opaka opatthani ni mutthu onilavula nttaava na Esan wala otheliwa ni mulopwana onikhuma muttetthe wa Edo. Masi okathi kaapacenryaka omusoma Biibiliya, miyo kaahipacerya oweha itthu wa mukhalelo woovirikana. Okhala wira Biibiliya onihimya wira Muluku khanaathanla atthu ni khula mutthu onimoova Muluku onneemereriwa nuuwo, nto kaaniikoha so: Miyo ti pani wira kaanyokheke atthu mwaha wa nloko wala nttaava? Nto kaahirukunuxa muupuwelo aka ni kiphavela wataana ni amusi aya apaapa. Nave-tho ovarihela muteko malakiheryo a Biibiliya wookihakalaliha ni okivaha murettele mmuupuweleloni. Opaka eyo wookikhaliherya wataana ni atthu akina moohicikha makhalelo aya ooyaraniwa, nloko, nttaava, wala elapo aya. Ankhi mulopwana okithenle? Owo oyariwe muttetthe wa Edo ni onilavula nttaava na Esan!

Xeeni Biibiliya owenrye awe waakhaliherya atthu ala ni atthu akina anceene ohikhalana nthalu ni waanyokha akina? Mwaha woowi Biibiliya Nuulumo na Muluku. Biibiliya ookhalana owerya wooturuka muupuwelo wa mutthu ni moonelo awe voohimya sa atthu akina. Ohiya-vo, Biibiliya onnooniherya ele enitthuneya wira nimale nthalu notheene.

OMWENE WA MULUKU ONIROWA OMALIHA NTHALU NOTHEENE

Tthiri miruku sa Biibiliya sinniwerya onikhaliherya wira nikhalane moonelo wooloka ni osyaka miyuupuwelo soohiloka. Nave-tho sihaavo mikhalelo miili sinitthuneya oxinttiwa ehinatthi omala-malihiwa nthalu moomalela. Wanipacerya, voohimya sa yoottheka ni ohimalela wa apinaatamu. Tthiri, Biibiliya onihimya so: “Khavo [mutthu] ohinttheka”. (1 Mamwene 8:46) Tivonto hata niimananihaka moota xeeni, ninnikumana ni muxankiho mmosaru aawanana awe murummwa Paulo, yoowo aalempe iiraka: “Kiphavelaka wira sorera, sotakhala t’inkumanaka”. (aRoma 7:21) Mwekeekhai, okathi t’ukathi, murima ahu woohimalela pooti okhalana “sowupuwela sonanara” seiyo sikhanle ookumiherya nthalu.—Marko 7:21.

Yanenli, mwaha wa olamuleliwa ni Satana Diabo. Biibiliya onnimuhimya Satana okhala “mulipa-òwiva” ni onnihimya-tho wira ‘owo onniwototha atthu othene [mulaponi]’. (Yohani 8:44; Wisupulula 12:9) Eyo ennihimya nthowa naya nthalu nirya aya nowuulaana, ni nthowa naya apinaatamu anikhala aya ntoko wira khaniwerya opaka etthu wira amalihe itthu ntoko: oluttuweliwa woohiloka, nthalu, genocidio, ni inamuna sikina sa onyokhana mwaha wa itiini, ni onyokha makhalelo a atthu.

Vano, nthalu nihinatthi omala-maliha, ehaana omalihiwa toko etampi, ohimalela wa apinaatamu ni eguvernu ya Satana Diabo. Biibiliya onnooniherya wira Omwene wa Muluku tonirowa opaka eyo.

Yesu Kristu aahiwiixuttiha atthareli awe onvekela Muluku ariki: “Omwene anyu onrwele hiyo; otthuna wanyu wireye ntoko wirimu siso vathí-va”. (Matheyo 6:10) Omwene wa Muluku teri ekaruma enirowa omala-maliha ohixariya wotheene, ohela muhina inamuna sotheene sa onyokhana ni nthalu.

Okathi Omwene wa Muluku onirwa awe ni opacerya olamulela elapo, Satana onirowa ‘otthukiwa’ wala ohivara muteko moomalela wira “ahiwotothé-tho atthu”. (Wisupulula 20:2, 3) Nuumala-vo enookhala “elapo esyá” wala mulokiheryo wa atthu, onrowa okhala “exariya”.a​—2 Pedru 3:13.

Atthu anirowa okhala eriyari ya mulokiheryo wa atthu wa xariya anirowa okhalihiwa oomalela, ni woopoliwa mwa yoottheka. (aRoma 8:21) Ntoko atthu a Omwene wa Muluku, awo ‘khanira-tho yonanara’. Nthowa xeeni? Mwaha woowi ‘atthu othene a mulaponi anosareya osuwela w’Apwiya [Yehova]’. (Yesaya 11:9) Okathi owo, apinaatamu otheene anirowa wiixutta malakiheryo a Yehova Muluku ni otakiha mikhalelo sawe soophenta. Tthiri, eyo enirowa otaphulela omala wa nthalu notheene; maana “Muluku khanimuthanla mutthu”.—aRoma 2:11.

[Enoota]

[Ilatarato siri epaaxina 6]

[Elatarato eri epaaxina 5]

Martin Luther King, Jr., olavulaka mwaha awe voohimya sa idireito sa apinaatamu

[Masu a elatarato]

© Bob Adelman/Corbis

[Ilatarato siri epaaxina 6]

[Ilatarato siri epaaxina 6]

“Vano miyo kootaphuwa voohimya sa waathanya atthu”.​—Linda

[Ilatarato siri epaaxina 6]

“Miyo kihiixutta moota Muluku onaathokorerya awe atthu”.​—Michael

[Ilatarato siri epaaxina 7]

“Koorukunuxa muupuwelo aka ni kiphavela okhala a murettele”.​—Sandra

[Ilatarato siri epaaxina 7]