MMWAATTAMELE MULUKU

Yehova “Khanathanla Atthu”

Niireke nyuwo mootoko ohaawa mwaha wa nthalu? Niireke yootoko okhoottiwa yoovekela anyu, okhoottiheriwa ovara muteko, wala enamuna ekina ya ohithokoreriwa saana mwaha wa ekoore ya erutthu anyu, nloko nanyu, wala mukhalelo anyu wa omutthu? Akhala wira yootoko owiiraneelani, nyuwo khamukhanle mekhinyu. Nnaamwi vari siiso, sookhala ihapari iya sooreera: Onyokhana iwo wuulanne mulaponi, khoniphwanyaneya wiirimu. Murummwa a eKristau Pedru aahilavula moohihoverya masu ala oriki: “Muluku khanathanla atthu”.​—Musome Miteko 10:34, 35.

Pedru aahilavula moolumo awo oryeene nipuro navameekhaaya, owannya awe mmalapo Kornelio. Pedru aari muYuda, ni aakhala okathi yoole aYuda yaaweha aya amalapo ntoko atthu a mwiikho ni yahaareerela wataana. Nto, xeeni Pedru aaryaawe owaannya awe Kornelio? Mmasu oowiiwanyeya, Yehova Muluku taalokihenrye muthukumano owo. Pedru aakhenle yowoonihiwa ya Muluku yeeyo aaleliwa awe wira: “Muhireleké ti sa mwikho itthu sirerihiwe ni Muluku”. Ohisuwelaka Pedru, nihiku nimosa naavinre, Kornelio aahikhalana yowoonihiwa, yeeyo nlaikha nimosa namuthoonyenrye aya opuro Pedru aathukumana awe. (Miteko 10:1-15) Vaavo Pedru asuwenle awe wira yaari yootthuna ya Yehova mmwaha ole, owo khaakhanle ootthikela ottuli ohilavunle etthu.

Pedru aahilavula iiraka: “Vano kosuwela orattene wira Muluku khanathanla atthu”. (Miteko 10:34) Nuulumo na eGriki noowi “othanla” nintaphulela “oweha ethoi ya mutthu”. (The Kingdom Interlinear Translation of the Greek Scriptures) Voohimya sa nuulumo nno, musuweli mmosa oni: “Eyo enimuhimya mulipa oniphuka myaha yoowo oniweha ethoi ya mutthu ni onanvaha ehukhumu, ohiya mwaha woottheka, masi mwaha wooweha ethoi ya mutthu owo”. Muluku khoninvahexa efaita mutthu mmosa onvikana mukina, mwaha wa nloko, opuro wooyareliwa, mukhalelo wa omutthu wala itthu sikina.

Masi, Yehova oniweha ele eri vamurimani vahu. (1 Samuweli 16:7; Miruku 21:2) Moottharelana Pedru aahihimya iiraka: “Tthiri Muluku onnaphenta atthu a nloko ti nloko, yale animuttittimiha, enettela exariya”. (Miteko 10:35) Omoova Muluku onitaphulela omuttittimiha, omulemeliha, ni omuroromela, nisyakaka khuta etthu ehinimusivela. Weettela exariya onihela muhina wiiyeveiha nvaraka etthu eri yooloka vamaithoni va Muluku. Yehova onnisiveliwa ni mutthu yoole murima awe osareyale omuttittimiha weiwo onimwiiriha opaka etthu eri yooloka.​—Otumererya 10:12, 13.

Akhala wira nyuwo mootoko ohaawa mwaha woonyokhiwa wala nthalu, nto masu a Pedru voohimya sa Muluku ahaana woolipihani. Yehova toniwiitthana atthu otheene wira amukokhoreke veekeekhai. (Yohani 6:44; Miteko 17:26, 27) Owo onniwiriyana ni waakhula mavekelo a arumeyi awe moohicikha nloko naya, elapo yooyareliwa, wala makhalelo a omutthu. (1 Mamwene 8:41-43) Hiyo nnoowerya okupali wira vaavo Yehova oniweha awe vathi va oryeene wiirimu, oniweha nloko nimosa paahi—nloko na apinaatamu. Niireke murima anyu khoniphavela wiixutta itthu sikina sa Muluku ohirina nthalu?

Malakiheryo a omusoma Biibiliya Junyo:

Yohani 17-21–Miteko 1-10

[Eponto yuulupale ya epaaxina 8]

Vaavo Yehova oniweha awe vathi va oryeene wiirimu, oniweha nloko nimosa paahi—nloko na apinaatamu