MWAHA WOOPACERYA: XEENI OHAAWA ONITEPA AYA MOLUMWENKUNI? NTO ONIROWA OMALA SILINI?

Tthiri Atthu Anceene Oohittheka Annookhwa!

Noelle aari mwanamwane oohakalala waamusivela vanceene odesenyari. Ohiyu omosa elimwe, owo aamwettakasa ophiro wa enupa nto moohilakela khumorela mpisina yaari vate. Nto owo khukhwa sihalaka isumana piili paahi wira iirihe iyaakha xexe.

Charlotte, Daniel, Olivia, Josephine . . . Ala masina a anaxikola yaale 26 yaarina iyaakha 26 ni 27 yoopeliwe ni kapwitthi exikola ya Connecticut, E.U.A., 14 a Dezembro, 2012. Okathi yuupuweleliwa aya amiravo ala, Presidente Obama aahiromola masina aanaxikola ale 26, ni khwaahimeeryaka atthu ale yaaripiwe murima opuro ole wira: “Ihasara iya sihaana omala”.

Bano a iyaakha 18 aahikhuma wIraque ni emusi awe mwaakha wa 1996 ni khuthaamela oNoruega. Axipatthani awe yaanimwiitthana Sun Rays. Masi, mooriipiha murima, mahiku yeettaka 22 mweeri wa Julyo 2011, Bano vamosa ni atthu 77 aahiiviwa ni terrorista mmosa yoowo aittottompe oriki: “Kiniveka musammaha . . . mwaha woowi kaaniphavela owiiva atthu anceene”.

Mooriipiha murima, sowiiraneya ntoko iya sinimakela ohimmwa olumwenku wotheene. Nkahaya muupuwelele oriipiwa murima onikhumelela mwaha wa ihasara, ikrime, ikhotto, terrorismo, ihasara sa ephattu ni itthu sikina. Nto atthu anci oohittheka annihaawa ni wiiviwa, ikwaha sinceene moohinthowa!

Atthu akina anninvaha nthowa Muluku, yuupuwelaka wira Mpattuxa ahu khonaathokorerya apinaatamu. Akina anihimya wira Muluku onnoona ohaawa wahu masi moolakela khonipaka etthu wira omalihe. Nlelo akina anihimya wira ihasara iyo sinikumiheriwa ni Muluku. Vanikhala wira miyuupuwelo khasinimala mmwaha ola. Nto ninrowa ophwanya woowi waakhuliwa woororomeleya ni woohakalaliha? Mmyaha sinittharelana, nnooweha Nuulumo na Muluku, Biibiliya, wira nisuwele itthu sinikumiherya ohaawa ni moota ohaawa nno onirowa aya omalihiwa.

[Elatarato epaaxina 3]