Xeeni Ohaawa Onitepa Aya Molumwenkuni?

Wira niiwexexe nthowa naya ohaawa onitepa aya molumwenkuni, ni apinaatamu ahiniwerya aya omaliha, nihaana osuwela mathowa anikumiherya ohaawa iwo. Nnaamwi akhanle ene mathowa manceene ni ootikiniha, nnoowerya oxukhuru maana Biibiliya onninikhaliherya osuwela mathowa awo. Mmwaha ola, ninrowa othokorerya itthu thanu sinikhumiherya ohaawa vanceene molumwenkuni. Xontte, nwehe saana ele Biibiliya onihimya awe ni moone moota Nuulumo na Muluku ninnikhaliherya aya osuwela saana ele enikumiherya ohaawa.​—2 Timótheyo 3:16.

◼ SOOKHUMELELA SA OLAMULELO WOOTAKHALA

Biibiliya onihimya so: “Vanrumaya atakhali, atthu anjene animunla”.​—Miruku 29:2.

Okhuma khalai apinaatamu annilamuleliwa ni atthu ootakhala, yaawo anikumiherya ohaawa vanceene molumwenkuni. Ekeekhai wira anamalamulela akina khanipaka eyo. Akina anniphavela waakhaliherya ale anaalamulela aya. Masi, okathi anipacerya aya olamulela, awo annoona wira ikwaha sinci wiimananiha waya khonikhumela saana mwaha wa owanela olamulela. Wala anamalamulela awo pooti orumeela mootakhala owerya waya, mwaha woophavela musurukhu nto khiyaahaaxa atthu. Sekretaario a khalai a Estado ya E.U.A Henry Kissinger aahimyale so: “Myaha sa apinaatamu khasireere soohimmwa sa atthu yiimananinhe mwa soophavela saya, masi moohikhumela saana”.

Biibiliya onnincererya oriki: “Mutthu . . . khanwerya wettiha mavalo awe”. (Yeremiya 10:23) Apinaatamu oohimalela kharina miruku ni owerya oniphiyerya wira alokiherye myaha saya mookhalela. Akhala wira atthu khaniwerya weettiha mavalo aya, anrowa owerya sai weettiha mavalo a atthu akina? Niireke munnoona nthowa naya anamalamulela a apinaatamu ahiniwerya aya omaliha ohaawa? Tthiri, ikwaha sinceene, olamulelo wootakhala onnikumiherya ohaawa molumwenkuni!

◼ SOOKHUMELELA SA ETIINI YOWOOTHA

Yesu aahimyale so: “Atthu othene anosuwela wira mwá awixutti aka, mwaphentanaka mukina ni mukhw’awe”.—Yohani 13:35.

Makhulupale a itiini ni makhuuru oovirikana annilaleya ophenta ni wuuraana. Masi awo khaniwerya waakhaliherya atthareli aya okhalana ophenta oniphiyerya wira awerye osyaka onyokhana. Nto, ohiya waakhaliherya atthu wira aphentaneke, ikwaha sinceene etiini ennikumiherya ohiiwanana, onyokhana, ni owana-wana eriyari ya atthu ni igrupu sa atthu. Wanikisa wa eliivuru awe Christianity and the World Religions (eKristau ni itiini sa molumwenkuni) namatokosa mmosa a itiini Hans Küng aalempe so: “Oluttuweliwa vanci woohikhalela, owana-wana wa epoliitika wootakhalexa, onnikhaliheriwa, weettihiwa, ni oreelihiwa ni etiini”.

Ohiya-vo, makhulupale manceene a itiini, anneemererya moolakela orupihana wa atthu ahithelanne, oraruwa, ni orupihana alopwanaru wala athiyanaru. Eyo ennikumiherya omwara-mwareya wa iretta, oyiihiwa irukulu, orupala moohiphavela, ohiiwanana vatthokoni, ni itthu sikina soowereya ni sooriipiha murima.

◼ OHIMALELA WA APINAATAMU NI NRIMA

“Khula mutthu onnehereriwa ni wunlela wawe sotakhala, weiwo onimototha, onamukuxa. Vano, wunlela iwo sotakhala wavahiwa ikuru, onnikumiherya etampi”.​—Yakobo 1:14, 15.

Okhala wira otheene ahu noorava ohimalela, ninnivonya, ottheka ni wiimananiha wira nihipake itthu ‘siniphavelaya makhalelo ahu otakhala’. (aÉfeso 2:3) Masi, vannitepa oxankiha okhootta soophavela soohiloka vaavo ninkumana ahu ni itthu iyo. Akhala wira nnoohiyererya mweettelo woohiloka, hiyo pooti ophwanya maxakha muhoolo mwaya.

Mulipa oolepa mmosa P. D. Mehta, ohimyale so: “Hiyo ninnihaawa vanci mwaha wa ophavelasa wahu opaka itthu sootakhala, ophavela opuha ni wiiwelela sootthuna sahu sa nrima”. Mwaha wa osiveliwa soolema soohiloka ntoko ohapaliwa, orumeela murette onipahula, juku, enoka, ni itthu sikina, ohaahonona atthu anceene yaari “oottittimihiwa”, ni ohaakumiherya maxakha amusi aya, apatthani, ni akina. Okhala wira apinaatamu otheene toohimalela, ninneemererya vaavo Biibiliya onihimya awe so: “Atthu otheene anniwerya woona okathi ola wira soopattuxiwa sotheene sinnuupulela mwaha wa mixankiho sa molumwenkuni”.​—aRoma 8:22, The New Testament in Modern English, by J. B. Phillips.

◼ OWERYA WA MINEPA SOOTAKHALA

Biibiliya onihimya wira Satana ti “muluku a vathí-va”. Nave, hoothe ni yena sihaavo minepa sootakhala soowerya siniitthaniwa axetwani.​—2 aKorinto 4:4; Wisupulula 12:9.

Moolikanasa ni Satana, axetwani aniphavela waalamulela ni owoototha atthu. Murummwa Paulo aahisuwela eyo vaavo aahimyale awe so: “Hiyo khanniwana nivirikanyaka owerya w’atthu; ekhotto ahu ti yovirikana owerya n’ikuru ni makhulupale èlapo ela, eri mwepiphini, nave-tho malaikha òtakhala a musulu”.​—aÉfeso 6:12.

Vanaamwi axetwani vaasivelaka waahaaxa atthu, eyo khahiyo yoolukama aya yoopacerya. Awo aniphavela waahapuxa atthu wira ahimurumeeleke Yehova, Muluku Muulupalexa. (Esalimo 83:19) Wira siwootothe ni waalamulela atthu, minepa sootakhala sinirumeela itthu ntoko iya: maxitta, waaxerya ehako orumeelaka itheneeri, mwaawelo, ni okhwiri. Ti maana aya Yehova onnilopola awe voohimya sa itthu iya sootakhala; nave, onniwaakiherya otheene animutthyawa Satana ni minepa sawe.​—Yakobo 4:7.

◼ NINKHALA MAHIKU ‘OKISERYA’

Etthu yowiiraka iyaakha 2.000 sivinre, Biibiliya aahihimya wira: “Musuwelexe wira, okathi wokiserya, anophiya mahiku òxanka.”

Othoonyaka ele eniiriha okathi ola okhala wooxankiha, Biibiliya onivikaniha oriki: “Atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona . . . òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku”. Tthiri, nthowa nuulupale ninkumiherya ohaawa olelo-va, mwaha woowi ninkhala “okathi wokiserya”.​—2 Timótheyo 3:1-4.

Nuupuwelelaka itthu sithokorenrye ahu, khamunoona nthowa naya apinaatamu ahiniwerya aya omaliha ohaawa, nnaamwi arineene miyuupuwelo sooloka? Nto opuro xeeni ninrowa ahu ophwanya nikhaliheryo? Nihaana omuroromela Mpattuxa, yoowo oleihenrye ‘opwetexa miteko sa Satana’ ni ale animutthara. (1 Yohani 3:8) Mwaha onittharelana onrowa othokorerya ele Muluku onrowa awe opaka wira omalihe itthu sotheene sinikumiherya ohaawa.

[Elatarato epaaxina 4]