Moohipisa Ohaawa Wotheene Onoomala!
Muupuwelele muryeene olumwenku ohikhanle ohaawa, eyo piiyo, olumwenku ohikhanle ekrime, ekhotto, iretta, ni ihasara sa ephattu. Muupuwelele ovenya khula voosisu muhixankaka voohimya sa nthalu, ohaaxiwa wala othowa wa yoolya. Niireke eyo enikhala ntoko etthu ehinrowa wiraneya? Ekeekhai wira khuuvo pinaatamu wala nikhuuru nitthokihiwe ni atthu nikhanle ooruuha makhalelo awo. Masi Muluku ooleiherya omaliha itthu sotheene sinikumiherya ohaawa wa apinaatamu, ohela muhina iye nithokorenrye ahu mmwaha woopacerya. Mwaawehe anatiri anittharelana anikhuma mBiibiliyani, Nuulumo na Muluku:
◼ OLAMULELA WA EGUVERNU YOOLOKA
“Muluku a wirimu onokumiherya omwene ohinrowa omala, nnákhala oweriwa n’mwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”.—Daniyeli 2:44.
Omwene wa Muluku ori eguvernu ya wiirimu. Nave-tho oothanliwa Namalamulela, Yesu Kristu, onirowa waaranttela anamalamulela a apinaatamu otheene ni onirowa waakhwaniherya wiiraneya wa yootthuna ya Muluku ohiya paahi wiirimu masi-tho valaponi-va. (Matheyo 6:9, 10) Nave-tho eguvernu ela khenrowa orantteliwa ni eguvernu yotheene ya apinaatamu mwaha woowi owo ti ‘omwene wohimala mwa Yesu Kristu, Pwiy’ ahu ni Mòpoli ahu’. Nto onirowa okhala murettele woohimala.—2 Pedru 1:11.
◼ OHIKHALA-THO ETIINI YOOWOKA
“Satana onnìtatuxa wira òneye ntoko nlaikha nowarya. Tivó, khivo-tho yotepa anamuteko a Satana yaìtatuxaka, wira yoneye ntoko anamuteko àxariya. Emalelo aya enolikana ni miteko saya”.—2 aKorinto 11:14, 15.
Etiini yoowoka enirowa opwetexiwa vamosa ni miteko sa Satana valaponi-va. Nave-tho onoomala omwarexiwa wa ephome vamosa ni ahooleli a etiini yoowootha. Ela enirowa oweemererya atthu otheene animphenta “Muluku mukumi ni èkekhai” wira amukokhorele yena arina ene “wamini ori omosaru” ni “eroho [munepa] y’ekekhai”. Tthiri ela enitaphulela murettele ni wuuraana!—1 aTesalonika 1:9; aÉfeso 4:5; Yohani 4:23.
◼ OHIMALELA WA APINAATAMU KHONIROWA-THO OKHALA
“Muluku onrowa okhalaka vamosá ni yawo. Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.—Wisupulula 21:3, 4.
Yehova Muluku ohiiriha ela wiiraneya orweela wa Mwanawe, Yesu, yoowo ovanhe okumi awe wa olumwenku wa apinaatamu. (Yohani 3:16) Alamuleliwaka ni Yesu, apinaatamu anirowa otthikela okhala oomalela. Nto khonirowa okhala-tho ohaawa mwaha woowi “Muluku onrowa okhalaka vamosá ni yawo” ni onirowa opuputtha “maithori aya othene”. Ohimalela wa apinaatamu ni ohaawa, moohipisa va enirowa okhala etthu yoovira. “Anaxariya animwakhela elapo yohiyeriw’aya: anrowa okhalaka-mo mahiku othene”.—Esalimo 37:29.
◼ OHIKHALA-THO MINEPA SOOTAKHALA
‘[Yesu Kristu] ahivara enow’ele yulupalexa ya khalai, eyo p’iyo, Nwanani (onìhaniwa-tho Satana), khumutthuka mpakha iyakha ekonto emosá. Nlaikha nlo nahimurihela Satana mowixani, nahitthuka ni muhulelo nipuro nlo n’epiphi, khuhela ekanyeryo wira ahiwotothé-tho atthu’.—Wisupulula 20:2, 3.
Olamulela wotheene woohiloka onirowa omala vaavo Satana ni axetwani awe anirowa aya otthukiwa ni oriheliwa “wepiphini”, eyo piiyo, mukhalelo woohivara-tho muteko. Awosa khanrowa-tho opaka itthu sootakhala molumwenkuni. Tthiri onirowa okhala omaaleleya wuulupale vaavo olumwenku wotheene onrowa aya omala mixankiho sinikumiheriwa ni Satana ni minepa sootakhala!
◼ MAHIKU OOKISERYA ANROWA OMALA
Mahiku ‘okiserya’ anirowa omala okathi wa “maxakha malupale” yaahimmwale ni Yesu. Owo aahimmye so: “Tthiri, okathi yowo, anokhala maxakha malupale, ehinákhumelele okhuma wopajeryani w’olumwenku mpakha vano, nnákhala ahinrowa-tho okhumelela”.—Matheyo 24:21.
Maxakha awo anirowa okhala maalupale mwaha woowi sinirowa okhumelela ihasara suulupale. Awo anirowa omala ni “ekhotto ya nihiku nulupale na Muluku òwerya sothene”, yoosuwelexiwa ntoko ‘Harmagedoni’.—Wisupulula 16:14, 16.
Atthu a olumwenku wotheene aniphenta ele eri yooloka, annilipelela opwetexiwa wa olumwenku ola wootakhala. Muthokorerye mareeliho vakhaani anilipelela aya ovahiwa ni Omwene wa Muluku.
MULUKU ONOOPAKA ITTHU SINCEENE!
‘Muttitthi mulupale’ onirowa woopoliwa wira okele elapo esya ya murettele: Nuulumo na Muluku ninhimya wira ‘muttitthi mulupale’ wa atthu woohikontareya onirowa woopowa okathi wa maxakha maalupale ni ovahiwa ekumi mwa elapo esya ya xariya. (Wisupulula 7:9, 10, 14; 2 Pedru 3:13) Awo anirowa okupali wira woopoliwa waya onirwa wa Yesu Kristu, “Mwapwittipwitthi a Muluku, onttipiha yottheka y’lapo”.—Yohani 1:29.
Anookhala mareeliho manceene mwaha wa wiixuttihiwa ni Muluku: Mwa elapo esya, “atthu othene a mulaponi anosareya osuwela w Apwiya [Yehova]”. (Yesaya 11:9) Wiixuttihiwa nno ni Muluku onihela muhina malakiheryo wa moota wookhala ni murettele ni atthu otheene, moovarihana ni mapuro anikhaliwa. Muluku ooleiherya iiraka: ‘Ti miyo Apwiya [Yehova] Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara’.—Yesaya 48:17.
Ale nnaaphenta ahu akhwiiye anirowa okumihiwa mmahiye: Vaavo aaryaawe valaponi, Yesu aahiwerya omuhihimuxa mpatthani awe Laazaro mookhwaani. (Yohani 11:1, 5, 38-44) Tthiri owo ohooniherya ele onirowa awe opaka mwa enamuna yoowaattexa wa mareheryo a Omwene wa Muluku.—Yohani 5:28, 29.
Onookhala murettele ni exariya wa mahiku otheene: Mwa olamulelo wa Kristu, ale anivirikanya nlamulo khanirowa okhala. Ninsuwela sai? Mwaha woowi Yesu, onniwerya osoma mirima. Nto onirowa orumeela owerya wawe wira ophuke eriyari ya anaxariya ni atakhali. Ale anikhootta orukunuxa makhalelo aya ootakhala khanirowa weemereriwa okhala elapo esya ya Muluku.—Esalimo 37:9, 10; Yesaya 11:3, 4; 65:20; Matheyo 9:4.
Iye nithokorenrye ahu siri itthu vakhaani paahi wa iprofesia sinceene sa Biibiliya seiyo sinooniherya okathi woohakalaliha onirwa. Vaavo Omwene wa Muluku onirowa awe opacerya olamulela valaponi “murettele womalela” onirowa okhala okathi woohimala. (Esalimo 37:11, 29) Itthu sotheene sinikumiherya owereya ni ohaawa wa apinaatamu sinirowa omalihiwa. Nuulumo na Muluku ninleiherya so: “Mone: itthu sothene miyo kokhaliha isyá! . . . Molumo aka t’òroromeleya ni t’èkekhai”.—Wisupulula 21:5.
[Elatarato epaaxina 6]
[Masu a elatarato]
© Silke Woweries/Corbis