MWAHA WOOPACERYA | XEENI ATTHU OOLOKA SINAAKHUMELELA AYA ITTHU SOOTAKHALA?

Itthu Sootakhala Sinnitepa Waatta!

Smita,a muthiyana mmosa oDhaka, oBangladesh, a iyaakha 35, aanisuweliwa okhala ooreera murima ni oophenta. Atthu yaanimuhimya okhala muthiyana ootheliwa oowiimananiha ni oohakalala yoowo aaphavela waasuweliha akina ele aaxuttale awe voohimya sa Muluku. Nto amusi awe ni apatthani yaahixankiheya vanceene okathi Smita aawereiwale mootutuxerya nto khukhwa ehivinre esumana emosa nuumala ompacerya oretta!

Jaime ni amwaarawe, yaawo yaathelanne niinano ni yaarina iyaakha sowiiraka 30, yaanisuweliwa nave okhala ooreera murima ntoko Smita. Nihiku nimosa, awo yaahirowa waaxukurya apatthani yaakhala Epantte Enikhuma Nsuwa wEstados Unidos. Masi, awo khiyaatthikenle-tho owannyeya oNova York. Mphironi, yaahaakhumelela ehasara ya kaaro ni khukhwaasa. Nto amusi ni apatthani oomutekoni yaahiriipiwa murima vanceene!

Olelo-va, ti vookhweya oweha wira otakhala ni ohaawa onnitepa. Ikhotto sinniwiiva anakhotto ni atthu akina. Ikrime ni ohaaxana sinnaaphwanya atthu oohittheka. Ihasara siniiva vamosa ni iretta sihinivoniwa, khasinimuthanla mutthu. Ihasara sa ephattu sinniwiiva atthu mootakhala. Nthalu ni ohixariya ohuulaana. Waaniheryasa, nyuwo mootoko ohaawa mmwaha owo.

Ti maana aya atthu anikoha aya so:

• Xeeni atthu ooloka sinaakhumelela aya itthu sootakhala?

• Niireke Muluku tonikumiherya itthu iyo?

• Niireke ihasara sinikhumela mekhaya, wala sinikumiheriwa ni atthu?

• Niireke sowiira sahu sa khalai ti sinikumiherya ohaawa mookumi mwahu?

• Akhala wira ohaavo Muluku oowerya sotheene, xeeni onihiya awe itthu sootakhala saakhumelelaka atthu ooloka?

• Nto, niireke ohaawa ni otakhala onoomala?

Wira naakhule makoho awo, nihaana osuwela waakhuliwa wa makoho manli ootthuneya: Xeeni itthu sootakhala sinikhumelela aya? Ni, Muluku onirowa opaka exeeni voohimya sa otakhala?

[Enoota]