Mpantta 1

Niireke Wira Muluku Onninthokorerya Tthiri?

MU OKATHI omosa, waaniheryasa nyuwo mootoko wiikoha so: ‘Akhala wira ookhala Muluku onnithokorerya tthiri, vano nthowa xeeni owo oneemererya awe wira atthu ahaaweke vanceene?’ Otheene ahu ninnihaawa aahiiso ninnimusuwela mutthu onihaawa.

² Mwekeekhai, okhuma khalai, atthu annihaawa ni annoona owereya mwaha wa ekhotto, otakhala, ekrime, ohikhala exariya, osikhini, iretta ni okhwa wa ale anaaphenta aya. Mu eseekulu 20 paahi, ikhotto soowiiva atthu anivikana imilyau emiya emosa. Atthu oowiiraka imilyau imiya sinceene aavulala aahiiso aapweteiwa ipa ni mireerelo saya. Itthu sinceene sootepa otakhala sinniiraneya mahiku ahu ala, sikumiheryaka owereya wuulupale, wunla, ni siwiirihaka atthu anceene ohikhalana nlipelelo na muhoolo.

³Atthu akina anniriipiwa murima, nto annuupuwela wira akhala wi Muluku ookhala, owo khonnithokorerya tthiri. Aahiiso awo pooti woonaka wira Muluku khokhanle. Mwa ntakiheryo, mulopwana mmosa yoowo aahaanwe mwaha wa olupatthana wa maloko weiwo waakumihenrye okhwa wa apatthani ni amusi okathi wa Ekhotto Yoopacerya ya Olumwenku Wotheene, aakonhe so: “Muluku aari woowi okathi ole namphavela ahu?” Mulopwana mukina, yoowo ooponwe wiiviwa wa atthu imilyau sinceene ni maNazista okathi wa Ekhotto ya Nenli ya Olumwenku Wotheene, aahiriipiwa murima vanceene mwaha wa ohaawa woonale awe ni khuhimya wira: “Mwaawerya olata murima aka, nyuwo mwaamuhapaliwa”.

⁴Tthiri, atthu anceene khansuwela nthowa naya Muluku ooreera murima aarowa awe weemererya wira itthu sootakhala siiraneyeke. Awo annikoha akhala wira owo onninthokorerya tthiri aahiiso akhala wira ookhala. Atthu akina anceene anoona wira ohaawa khonikhala-khala omalaka.

[Makoho a Yoosoma]

1, 2. Makoho xeeni atthu anipaka aya voohimya sa Muluku, ni nthowa xeeni?

3, 4. Atthu anceene anoonela sai voohimya sa Muluku weemereryaka wira apinaatamu ahaaweke?

[Elatarato eri epaaxina 2, 3]

Niireke wira elapo esya, yeeyo ehinrowa okhala ohaawa, ehaattamela?