Mpantta 2
Elapo Emosa Yoohikhala Ohaawa
1, 2. Moonelo xeeni woovirikana atthu anceene arina aya?
MASI, atthu imilyau sene olumwenku wotheene aakhalana moonelo woovirikana. Awo annilipelela wira muhoolo apinaatamu anookhalana okumi woohakalaliha. Annihimya wira moohipisa olumwenku wotheene khonrowa okhala-tho otakhala ni ohaawa. Anniroromela wira moohipisa itthu sootakhala sinrowa omalihiwa ni elapo yotheene enrowa okhalihiwa esya. Nave-tho, awo annihimya wira mathipelo a elapo esya anneemexiwa olelo va!
2 Atthu ala annikupali wira mu elapo eyo esya khenrowa okhala ekhotto, otakhala, ekrime, ohikhala exariya ni osikhini. Enrowa okhala elapo ehinrowa okhala iretta, owereya, wunla, hata okhwa. Okathi owo, vakhaani-vakhaani, atthu anookhalihiwaka oomalela wira yakhaleke okathi wotheene mparayiisu valaponi. Hata ale akhwiiye anrowa ohihimuxiwa ni anoovahiwa eparakha ya okhalana okumi woohimala!
3, 4. Nthowa xeeni atthu ale aniroromela aya wira ele anuupuwela aya enimwiiraneya?
3 Niireke wira muupuwelo owo voohimya sa muhoolo ori oloha, aahiiso etthu yowuupuwelela paahi? Nnaari, khahiyo ti siiso. Muupuwelo owo onlipa ni nroromelo arina aya, noowi eParayiisu, yeeyo eri vakhiviru enimoorwa tthiri. (aHéberi 11:1) Exeeni eniwiiriha okupali siiso? Mwaha woowi Mpattuxa ooweryexa a olumwenku wotheene oohimya wira eyo enimwiiraneya.
4 Voohimya sa anatiri a Muluku, Biibiliya onihimya oriki: “Apwiya Muluku anyu àmaliherya molumo othene yahimyalyaya, yorerihakani. Muhìreliwa sothene: khanivo nulumo nihimalelihiwe, nnákhala nimosa”. “Muluku khanotha: owo khanlikana ni mutthu. . . . Khino Muluku otoko olavula, khuhìraka sahimyalyawe?” “Apwiya òwerya sothene àlipela ehimyaka wira: ‘Tthiri sitthokelenlyaka sinimwiraneya: sintthunaka sinokhumelela’”.—Yoxuwa 23:14; Mothakoni 23:19; Yesaya 14:24.
5. Makoho xeeni anitthuneya waakhuliwa?
5 Nto, akhala wira yoolakela ya Muluku ti opaka eparayiisu valaponi, yeeyo ehinrowa okhala ohaawa, vano nthowa xeeni oneemererya awe itthu sootakhala sikhumelelaka? Nthowa xeeni olipelenle awe ovira iyaakha ikonto thanu namosa mpakha vano wira olokiherye itthu sihilonke? Nto niireke wira iseekulu iyo sotheene sinivira nihaawaka sinooniherya wira Muluku khonnithokorerya tthiri, aahiiso owo khokhanle?