Mwiitthokihe Wira Munnuuherye Muteko Anyu Woolaleerya
1. Okathi wa Wuupuwelela okhwa wa Yesu, etthu xeeni eniphavela ahu wooniherya, nto ninrowa opaka sai?
1 Okathi onuupuwelela ahu okhwa wa Yesu khuta mwaakha, ninnittottela muraarelo ‘omutthapela [Yehova] ni nsu nulupale’. (Esa. 109:30) Nto, muncererye muteko anyu woolaleerya mweeri wa Marso wira mooniherye omuxukhurela Muluku mwaha woovaha eyoopoli. Ola okathi wompaka palano.—Mir. 21:5.
2. Moota xeeni nyuwo ni anna akina, yaattottenle aya muraarelo ovukuliwa wa iwoora sa opioneero wookhaliherya mweeri wa Abril ovinre?
2 Opioneero Wookhaliherya: Mwaakha ovinre, anna yaahihakalala vanceene vaavo yaasuwenle aya wira, vaaniweryaneya orumeela ntoko pioneero ookhaliherya mweeri wa Abril avahaka iwoora vakhaani. Munna mmosa aalempe so: “Nlelo kinsoma Oniversidade, nto nkinaphwanye okathi woorumeela ntoko pioneero ookilaatheya. Masi kinrowa wiilepiha opioneero wa iwoora 30, nuumala-vo kinrowa wiimananiha wira kivare opioneero wa iwoora 50 mweeri wa Abril”. Murokora mmosa onivara muteko wa mulaponi wa okathi wotheene, olempe so: “Ti vootepa okhweya ovaha iwoora 30!” Okathi waalaleiwe aya wira pooti ovaha iwoora 30, murokora mmosa orina iyaakha 80, khalai aari pioneero, aahimmye wira: “Ola okathi kaawehererya aka! Yehova aanisuwela wira opioneero onnikisivela vanceene okhuma khalai!” Anna yahaawerya okhala mapioneero ookhaliherya, yaahimananiha olaleerya vanceene.
3. Exeeni enniiriha ophavelaka wiilepiha opioneero wookhaliherya myeeri sa Marso, Abril ni Maio?
3 Mweeri wa Marso onrowa okhala okathi wooloka orumeela ntoko pioneero ookhaliherya, mwaha woowi anna pooti othanla wiilepiha opioneero wa iwoora 30 wala 50. Nave-tho, okhuma eSaabadu 17 a Marso, ninrowa opaceriha ekampaanya ya waalattula atthu wira arwe Yuupuwelele okhwa wa Yesu 5 a Abril. Anna anceene anoovikaniha wuncererya muteko aya woolaleerya, yiilepihaka opioneero wookhaliherya myeeri sa Abril ni Maio, wira yavahe iwoora 50.
4. Ninrowa wunnuuherya sai muteko ahu woolaleerya, ni mareeliho xeeni ninrowa ahu ophwanya?
4 Okathi wa Omulompa Muluku vatthokoni, pooti othokorerya moota khula mutthu onrowa awe wuncererya muteko awe woolaleerya okathi wa Wuupuwelela okhwa wa Apwiya. (Mir. 15:22) Munvekele Yehova wira ookhaliheryeni. (1 Yoh. 3:22) Mwancererya muteko anyu woolaleerya, munrowa wunnuuherya onvuwiha wanyu Yehova, nave-tho munoohakalala vanceene.—2 aKor. 9:6.