Tani Anipaka Yootthuna ya Yehova Olelo-va?
1. Silini ninrowa ahu opacerya othokorerya ebroxura Tani Anipaka Yootthuna ya Yehova Olelo-va?, ni mureerelo xeeni ninrowa ahu ophwanya?
1 Okhuma esumana 28 ya Outubro, ninrowa othokoreryaka ebroxura Tani Anipaka Yootthuna ya Yehova Olelo-va?, mwa yoosoma ya Biibiliya ya Muloko. Ebroxura ela esya yeeyo yaakumiheriwe okongresuni “Mukhapele Mukhalelo wa Murima Anyu”!, epakiwe wira yaakhaliheryeke ale animusoma Biibiliya osuwela nikhuuru nootthokiheya na Yehova. Ebroxura ela enimuncererya ovaha wahu efaita nikhuuru na Yehova, ni onikhaliherya osuwela moota woorumeela saana mmutekoni woolaleerya.—Esal. 48:14.
2. Ninrowa osomaka sai ebroxura Yootthuna ya Yehova mmulokoni?
2 Moota Enrowa Aya Osommwaka: Mulipa oniiriha yoosoma ela, ohaana olokiherya okathi awe wira khula yoosoma ethokoreriwe saana. Ebroxura ela erina soosoma 28. Nto ole oniiriha, onrowa opacerihaka, osomaka nikoho nenno nikhanle muru muulupale wa khula yoosoma. Nuumala-vo, onrowa onvekela mulipa onisoma ittima wira osome ettima yoopacerya. Moottharelana, ohaana opaka nikoho nilokihenrye awe na ettima yoopacerya wira anna avahe ikomentaario saya. Ohiya-vo, khuta ettima enipacerya ni efrase yooriipihiwa wala negrito, ehaana osommwa ni othokoreriwa mekhayaru. Nuumala osommwa ettima eyo, munna oniiriha yoosoma, onrowa waavekela alipa oowiriyana wira ahimye moota enaakhula aya nikoho na muru muulupale. Ebroxura ela ehaana ilatarato sinceene sinireerela okomentari. Nave, soolepa sinttittimiherya iponto suulupale sihaana osommwa okathi wakhala. Ohinatthi opacerya muru mukina muulupale, mulipa oniiriha, ohaana wuuluula yoosoma evinre opakaka makoho ari vathi va epaaxina. Yakhala ekaaxa eni: “Musuwele Itthu Sikina”, ehaana osommwa, ni ovekeliwa anna wira ahimye moota xeeni ale animusoma Biibiliya anrowa aya ottottela mureerelo otthara malakiheryo awo. Okathi wakhala, ole oniiriha yoosoma ohaana orumeela miru suulupale sa soosoma wira opake makoho oowuuluula wanikisa wa yoosoma. Muupuwele wira malakiheryo makina ahimmwale-va, khanivareleya muteko okathi wa yoosoma ya Biibiliya ya vatthokoni.
3. Ninrowa ottottela sai mureerelo osoma ebroxura Yootthuna ya Yehova?
3 Wira muttottele mureerelo, muhaana wiilokiheryaka saana vahinatthi. Mwiimananiheke okomentari. Okathi woothokorerya, muupuweleleke moota mwaha owo okhanle aya oowaakhaliherya ale animusoma Biibiliya. Nto, othokorerya wahu ebroxura ela esya, oniirihe waakhaliherya akina opaka yootthuna ya Muluku; wira naawo akhalane yoolipelela ya okhala mahiku otheene.—1 Yoh. 2:17.