Ekampaanya ya Okawa Ihapari sa Omwene N.° 38, muNovembro!
1. Makoho xeeni atthu anipaka aya voohimya sa okhwa, ni moota xeeni makoho awo anrowa aya waakhuliwa muNovembro?
1 Okhwa ori nwanani a atthu otheene, hata awo arina ene sookupali soovirikana. (1 aKor. 15:26) Nto anamunceene anniikoha so: ‘Alipa ookhwa ari woowi? Niireke nnimwaaweha-tho?’ Tivonto, olumwenku wotheene, enrowa okhala ekampaanya ya vameekhaaya ya okawa Ihapari sa Omwene N.° 38, sini: Niireke Alipa-ookhwa Anookhala-tho Akumi Tthiri? Ekampaanya ela enipacerya 1 a Novembro. Nuuvira mweeri owo, Ihapari sa Omwene N.° 38, sinrowa orumeeliwaka okathi woolaleerya ntoko etratato.
2. Ihapari sa Omwene N.° 38 sitthokihiwe sai?
2 Moota Epakiwe Aya: Etratato Ihapari sa Omwene N.° 38 ehaana okhuniwa mwa enamuna onooneya aya saana muru muulupale woovara murima ori ohoolo wa etratato, vamosa ni masu ani: “Niireke munaakhula wira . . . aayo? nnaari? woonasa wene?” Vaavo mutthu onikhunula awe Ihapari sa Omwene, onniweha moota Biibiliya onaakhula awe nikoho na muru muulupale, ni ele yooleiherya ya Biibiliya enitaphulela aya wa mutthu owo. Nave, owo onimoona nthowa naya vanitthuneya awe omukupali Biibiliya. Mpantta mukina wa etratato ela, nookhala nikoho nimmwiiriha mutthu owo wuupuwelela, ni omulattula wira aixutte sikina.
3. Ihapari sa Omwene N.° 38 sinrowa okaiwaka sai?
3 Moota Wookawa: Ekampaanya ela enrowa olikanaka ni ikampaanya sa okawa ikonvite sa Wuupuwelela okhwa wa Yesu wala kongresu. Axitokweene anoovaha malakiheryo a moota wookawa itratato iya mmuttettheni, moovarihana ni ewarakha ya 1 a Abril, 2013. Miloko sirina muttetthe mwaamukhaani pooti okhaliherya miloko sikina sookhuveela seiyo sirina muttetthe muulupale. Xontte, muhaana okuxaka paahi itratato seiye munrowa anyu okawa esumana yeeyo. Okathi wa ekampaanya, itratato iyo sihaana okaiwa khuta enupa. Masi, akhala wira muttetthe wotheene sookaiwa, pooti okaiwaka mapuro makina aniphwanyaneya atthu. Akhala wira itratato sotheene sookaiwa mweeri ohinatthi omala, nto pooti orumeeliwa iliivuru sa mweeri wa Novembro. Esaabadu yoopacerya ya Novembro, khaninrowa opaceriha soosoma sa Biibiliya, masi ninrowa oluttuweliwa ni ekampaanya ela. Woomalani wa khula esumana, nnookawaka-tho irevista, vaaphwanelelaka. Niireke munniilokiherya wira mwiirele mpantta ekampaanya ela ya vameekhaaya?