Ovilela

Yoolepa: “Khula nihiku, awo yaaniixuttiha ni olaleya voohihiyererya ihapari sooreera”. — Mit. 5:42.

Etthu Paulo Aapanke Awe

Murummwa Paulo aalaleeryaka atthu, musaala mwa exikola.

EVIIDIYU: Paulo Aahivilela wEefeso

1. Nwehe EVIIDIYU, aahiiso musome Miteko 19:8-10. Nuumala-vo, mwaakhule makoho anittharelana:

Paulo khaatemmwe hata atthu akina yahaaphavela onwiriyana. Aawenrye sai ovilela wiira aakhaliherye ale yaaphavela onwiriyana?
Ivaara kavi Paulo aatthikela awe wiira aaxukurye atthu aalalenrye awe? Nave aavirinhe okathi mikavi opakaka eyo?

Etthu Paulo Onniixuttiha Awe

2. Nihaana orumeela okathi ahu ni ikuru sahu, wiira niwehe mireerelo sinikhumelela okathi nintthikela ahu waaxukurya atthu, ni opacerya waasomiha Biibiliya.

Mmutakiheke Paulo

3. Mulokiheryeke eprokrama anyu, wiira mmuxukuryeke mutthu owo okathi onoona awe oreerela. Mwiikoheke so: ‘Okathi xeeni, woonasa wene kikhanle aka omphwanya mutthu ole? Opuro xeeni ni okathi xeeni onrowa aya omukhweela olavula ni miyo?’ Mweemereryeke omuxukurya mutthu owo, hata ohikhanle okathi wooreerela para nyuwo.

4. Mmukoheke mutthu owo nihiku mukhanle anyu oomuxukurya. Khula okathi munivaanela anyu ni mutthu, muhinatthi omulaxerya, muhaana ovarihana nihiku ni ewoora mukhanle anyu ootthika wiira nvaanele. Mwiimananihe wiira mukumane ni mutthu owo, okathi ni opuro nvarihanne anyu.

5. Mukhalaneke nlipelelo. Muhuupuweleke wiira mutthu owo khoniphavela, mwaha woowi ovila omphwanya vate aahiiso waatteliwa miteko. (1 aKor. 13:4, 7) Masi, mukhalaneke ephoole. Nnaamwi mpirisariki ovilela, murumeeleke okathi anyu mwa miruku. — 1 aKor. 9:26.

NWEHE-THO SOOLEPA IYA:

Mit. 10:42; 1 aKor. 9:22, 23; 2 aKor. 4:1; aGal. 6:9.