MWAHA WOOPACERYA: VANNIWERYANEYA OKHALANA OKUMI WOOHAKALALIHA

Vanniweryaneya Okhalana Okumi Woohakalaliha?

‘Iyakha miloko mithanu na mili [tolekela waya] ekumi ahu, nakhalana ikuru sinjene, nnophiya iyakha miloko mithanu na miraru. Vano olekela waya, ovelavela n’uhawa pahi’.​—Esalimo 90:10.

TTHIRI masu awo ahooneya okhala ekeekhai! Olumwenku ola okumi woosareya ni “ovelavela n’uhawa pahi”. Woonasa wene munnikoha so: ‘Vanniweryaneya okhalana okumi woohakalaliha?’

Nkawehani ntakiheryo na Maria. Khalai aanivara miteko sinci, masi, vano orina awe iyaakha 84, khoniwerya okhuma vapuwani. Murima ni muupuwelo awe onniphavela ovara itthu sinci, masi erutthu awe kheneemya. Nto onrowa woona sai wira okumi awe ti woohakalaliha?

Sai voohimya sa nyuwo? Woonasa wene munnitikinihiwa akhala wira tthiri okumi anyu ti woohakalaliha tthiri. Pooti wira omutekoni munimakela ovara etthu emosaru yowonyoonyani ni yookhulumula. Pooti wira khuuvo onivaha efaita wiimananiha wanyu ovara muteko saana. Nnaamwi okumi anyu oryeene saana vano, pooti wira munnixanka muupuwelaka sa muhoolo. Okathi mukina pooti woonaka wira muri mekhinyu paahi, aahiiso okhala oriipiwa murima. Waaniheryasa vatthokoni vanyu munoonyakulihana ni owana-wana. Wala mookhweliwa muthu aatepa anyu omphenta. Mulopwana mmosa oniitthaniwa Andre, aanitepa omphenta Paapa awe, masi mootutuxerya paapa awe aahiwereiwa khukhwa. Andre, oona okhala etthu yootepexa otakhala yaamwiiranenle, ni oona wira khaarowa owerya oliyala ohononeya wa paapa awe.

Nnaamwi nikumananaka itthu sootepexa otakhala, ehaavo etthu enitepa ahu ophavela osuwela: Nireke vanniweryaneya okhalana okumi woohakalaliha? Nnoowerya ophwanya waakhuliwa waya nivareryaka okumi wa Yesu Kristu, yoowo aakhanle khalaixa etthu yowiiraka iyaakha 2000 sivinre. Nnaamwi aakumananne mixankiho sinci, Yesu aahikhalana tthiri okumi woohakalaliha. Natthara ntakiheryo nawe, hiyo-tho nnoowerya okhalana okumi woohakalaliha.

[Elatarato epaaxina 3]