“Mumphenteke Mukhw’inyu Ntoko Sinìphentanyu”

“Yoruma yanenli enilikana ni yopacerya t’ila: ‘Mumphenteke mukhw’inyu ntoko sinìphentanyu.’”​—MATH. 22:39.

MWAAROWA WAAKHULA SAI?

Tuuvi tthiri okhanle namwaattamanani ahu?

Xeeni vanaamini ahu wira tivootthuneya tthiri waaphenta atthu akina?

Makhalelo xeeni voohimya sa niphento anihimmwa va 1 aKorinto 13:4-8?

1, 2. (a) Exeeni Yesu aahimmye awe okhala yooruma yuulupalexa ya nenli ya Nlamulo? (b) Makoho xeeni anirowa ahu othokorerya?

NFARISI mmosa yoowo aaphavela omweehererya Yesu aamukonhe so: “Mwixuttihi, mwa soruma sothene yulupalexa pivi?” Ntoko niwehale ahu muru ovinre, Yesu aakhunle so: ‘Mumphenteke Yehova Muluku anyu ni murim’anyu wothene, n’iroho anyu yothene n’usuwela wanyu wothene’ “Ela ti yoruma yulupalexa ni yopajerya”. Yesu aahihimya-tho wira: “Yoruma yanenli enilikana ni yopacerya t’ila: ‘Mumphenteke mukhw’inyu ntoko sinìphentanyuʼ”.​—Math. 22:34-39.

² Yesu aahimyale wira naaphenteke akhwiihu ntoko siniiphenta ahu. Tivonto vanireerela aya wiikohaka so: Mukhwiihu onihimmwa-va ti pani? Nto ninrowa wooniherya sai omphenta namwaaattamanani owo?

MUKHWIIHU TI PANI?

3, 4. (a) Nlikanyiho xeeni Yesu aahimmye awe wira aakhule nikoho noowi: “Mukhwaka onihimmwa-va ti pani”? (b) Musamariya aamukhalihenrye sai mulopwana ole aiyeriwe omanakasiwa khuhiiwa ohalaka okhwa? (Nwehe elatarato yoopacerya.)

³ Hiyo pooti wuupuwelaka wira mukhwiihu ti yoole onikhala vakhiviru ni hiyo onimphenta ahu ni okhanle mpatthani ahu. (Mir. 27:10) Masi nithokorerye ele Yesu aalavunle awe wira omwaakhule mulopwana mmosa aihimya okhala naxariya yoowo aamukonhe so: “Mukhwiihu onihimmwa-va ti pani?” Yesu aahimwaakhula ni nlikanyiho na Musamariya ooreera murima. (Mmusome Luka 10:29-37.) Owehasa wene hiyo ninkupali wira namukuttho mwIsarayeli ni muLevi yaarowa okhala atthu oreera murima ntoko namwaatamanana vaavo yaarowa aya omoona mulopwana ole aiyeriwe, omanakasiwa khuhiiwa ohalaka okhwa. Masi awo yaahimuxerema khuhimukhaliherya. Mulopwana ole aakhaliheriwe ni Musamariya, yoowo aari mutthu a nloko nenlo naattittimiha Nlamulo na Moise masi naahaavirelana ni aYuda.​—Yoh. 4:9.

⁴ Moophavela omukhaliherya mutthu ole openuwa, Musamariya ole aahimuhela makhura ni eviinyu mapuro aavulalihiwe awe mulopwana ole. Nuumala aahihiya musurukhu waaphiyerya idenariyo piili wira okhapeleliwe mahiku manli. (Math. 20:2) Nto yowiiraneya ela enninikhaliherya woona tuuvi woonihenrye okhala mukhwaawe mulopwana ole aavulalihiwe. Nlikanyiho nla na Yesu ninniniixuttiha wira naamooreleke ikharari ni waaphenta atthu akina.

5. Moota xeeni Anamoona a Yehova yoonihenrye aya niphento okathi wa ehasara ya ephattu?

⁵ Ikwaha sinceene ti voovila waaphwanya atthu oreera murima ntoko Musamariya ole. Vaatepa-tho ‘okathi ola wookiserya’ yoola atthu anceene aniixupuwela aya mmansaya paahi, aryaaya oowali ni anivirikanya sooreera sotheene. (2 Tim. 3:1-3) Mwa ntakiheryo pooti okhumelela muxankiho muulupale okathi enikhumela aya ehasara ya ephattu. Muthokorerye ele yaakhumelenle nuumala Munamukhaya Sandy ovira oNova York City wuukiseryani wa mweeri wa Outubro 2012. Mpantta mmosa wa epooma ele wahaareere aya woopa epheyo ele, anamunceene yaahiwiiyerya anammawaani yaale yahaarina maluuxu, ooriiriwa ni yaathoiwale khula etthu. Nto mapuro yaale, Anamoona a Yehova yaahiilokiherya wira yaakhaliherye annaya ni atthu akina. Anna ale yaapanke eyo okhala wira yaanaphenta akhwaaya. Inamuna xeeni sikina sa wooniherya wira ninnaaphenta atthu akina?

NINROWA WOONIHERYA SAI WAAPHENTA ATTHU AKINA?

6. Moota xeeni muteko ahu woolaleerya onooniherya awe wira ninnaaphenta atthu akina?

⁶ Mwaavahe nikhaliheryo na omunepani. Hiyo ninnipaka eyo vaavo ‘vanaahakalaliha ahu ni Solempwa sa Muluku’. (aRom. 15:4) Moohaaniherya, hiyo ninnooniherya waaphenta atthu akina vaavo vanaaleela ahu ekeekhai ya mBiibiliyani okathi onilaleerya ahu. (Math. 24:14) Tthiri eyo eparakha yuulupale wiirela mpantta muteko woolaleya muhupi onikhuma wa “Muluku yowo onnivaha ororomela!”​—aRom. 15:13.

7. Yooruma ya waakhapelela saana atthu enitaphulela exeeni, ni ninreelihiwa sai naattharaka yooruma eyo?

⁷ Mutthare yooruma ya waakhapelela saana atthu akina. Yooruma ela enniiwanyeya saana mmasu yaalavuliwe ni Yesu okathi aalavula awe Mwaha Vamwaako wira: “Sothene sinosivelani wireliwa n’atthu akina, nyuwo-tho nwireleke seiyo akhw’inyu, tthiri, ti siso sinrumaya ikano sa Moisesi ni sa maprofeta”. (Math. 7:12) Vaavo vanaakhapelela ahu atthu akina ntoko Yesu saahimyale awe, nto ninnikhala moovarihana ni “Nlamulo” eyo piiyo okhuma (Maphattuwelo mpakha Otumererya) ni “Maprofeta” (iliivuru sa maprofeta wala Soolempwa sa eHeberi). Soolempwa iyo sinnooniherya wira Muluku onnaareeliha ale anaaphenta atthu akina. Mwa ntakiheryo, omurumaka Yesaya, Yehova aahimyale so: “Mwattittimihe atthu siso simphwanelaya: mutthareke exariya. . . Òreriwa t’ale anìra siso”. (Yes. 56:1, 2) Hiyo ninnireelihiwa tthiri mwaha wa waakhapelelaka atthu akina mwa enamuna yooloka.

8. Xeeni vanitthuneya ahu waaphenta anyokhani ahu, ni exeeni enirowa okhumelela neera siiso?

⁸ Mwaaphenteke awanani anyu. Yesu aahimmye so: “Muhiwa ele ehimmwe wira: “Mumphenteke mukhw’inyu, mmunyokheke nwanan’inyu”. Nto miyo kinnolelani wira: Mwaphenteke awanan’inyu. Mwaavekeleleke ale anolupatthani. Siso munokhala ana Atith’inyu ari wirimu. (Math. 5:43-45) Nave murummwa Paulo aahilavula moonelo mmosaru, vaavo aalempe awe so: “Mwamphwanyá nwanan’inyu onvoliwa etala, munvahe yolya; avoliwa ntthona, munvahe màsi. Mwiraka siso, munùkela makhala a moro vamuru vawe”. (aRom. 12:20; Mir. 25:21) Moovarihana ni Nlamulo na Moise, mutthu aahaana omukhaliherya munyokhani awe onvenyiha mwaamunama awe amorana muritti. (Okhum. 23:5) Akhaliheryanaka moota owo, atthu yaale yaari anyokhani khalai yanwerya okhala apatthani ooloka. Mwaha wa maKristau waaphentaka anyokhani aya, atthu awo annaareerela murima. Akhala wira hiyo ninnaaphenta anyokhani ahu, hata yaale annilupattha vootakhala, ninnihakalala vaavo awo aneemererya aya okhala muKristau!

9. Yesu aalavunle exeeni voohimya sa okhala a murettele ni annihu?

⁹ “Mphaveleke okhalana murettele n’atthu othene”. (aHéb. 12:14) Tthiri eyo enaahela muhina annihu, okhala wira Yesu aalavunle so: “Tivó, mwarowaka ovelela yovah’anyu waltari, weiwo mùpuwelá wira munn’inyu khakhanle sana ni nyuwo, muhiye yovah’anyu oholo w’altari, murowé toko, mwatàne ni munn’iny’uwo, vano-nto muhalé murwaka ovelela yovaha anyu”. (Math. 5:23, 24) Muluku onrowa onireeliha vaavo vanaaphenta ahu annihu ni wiimananiha okhala a murettele ni yaawo.

10. Xeeni vahinitthuneya ahu ophavelasaka soovonya sa atthu akina?

¹⁰ Muhiphaveleke woona soovonya sa akina. Yesu aahimmye so “Muhalamuleké akhw’inyu, siso Muluku khanrowa wolamulani. Tthiri nlamulo ninrowanyu walamulana akhw’inyu, Muluku onrowa wolamulani nyuwó, nave-tho mweryo onrowa anyu waphimela akhw’inyu, Muluku onrowa wophimelani yowo. Munònela-ni ikokhola siri mmanithoni mwa munn’inyu, muhijala muritta ori mmaithoni mwanyu? Walá muntthuna omwirela sai munn’inyu wira: ‘Nkani kokumiheni ekokhola eri munithoni mwanyu’, eriki nyuwo murina muritta mmaithoni mwanyu? Nawothe! Mpajerye okumiha muritta ori mmaithoni mwanyu, moneke orattene: vano-nto, muhalé mukumihaka ekokhola eri munithoni mwa mun’inyu”. (Math. 7:1-5) Tthiri moolumo ala aakhalana owerya wa onooniherya wira nihaalamuleke akhwiihu, owehasa wene hiyo nrineene soovonya sahu suulupale!

ENAMUNA EMOSA YA WOONIHERYA WIRA NINNAAPHENTA ATTHU AKINA

11, 12. Tiivi ekhanle enamuna emosa ya vameekhaaya ya wooniherya wira ninnaaphenta atthu akina?

¹¹ Hiyo nimphavela wooniherya wira ninnaaphenta atthu akina mwa enamuna ya vameekhaaya. Ntoko siira awe Yesu, hiyo nihaana olaleerya ihapari sooreera sa Omwene. (Luk. 8:1) Yesu ohaaruma atthareli awe wira “mwawixuttiheke atthu a ilapo sothene”. (Math. 28:19, 20) Hiyo ninnimananiha ovara muteko owo, vaavo vanilipiherya ahu waakhaliherya atthu wira ahiye otthara ephiro yuulupale yeeyo eniroiha wookhwaani ni okela ephiro eniroiha weekumini. (Math. 7:13, 14) Moohaaniherya Yehova onnireeliha wiimanani iwo.

¹² Nimutakihaka Yesu, hiyo ninnaakhaliherya atthu osuwela wira awo toothoiwa omunepani. (Math. 5:3) Wa atthu ale enaasivela ekeekhai, hiyo ninnaakhaliherya osuwela itthu sinceene vaavo vanaaleela ahu “ehapari” yooreera ya Muluku. (aRom. 1:1) Nto ale aneemererya ekeekhai annitthikela wataana ni Muluku orweela mwa Kristu. (2 aKor. 5:18, 19) Vaavo vanilaleerya ahu ihapari sooreera, ninnooniherya wira hiyo ninnaaphenta atthu akina mwa enamuna yootthuneya.

13. Nyuwo munoonela sai muteko wa okhala anamalaleya a Omwene?

¹³ Mwaha woopaka mikwaha sootthikela sooloka ni wiiriha soosoma sa Biibiliya, hiyo ninniphwanya ohakalala wuulupale mwaha wa osuwela wira ninnaakhaliherya atthu awo okhala moovarihana ni malamulo a Muluku. Eyo ennikumiherya mirukunuxo mweekumini mwa ale aniwiixuttiha ahu Biibiliya. (1 aKor. 6:9-11) Tthiri ti voohakalaliha oweha moota Muluku onaakhaliherya awe ‘othene ale athanleliwe ekumi ehinimala’ anipaka mirukunuxo mweekumini mwaya wira yaataane ni Muluku. (Mit. 13:48) Anamunceene a atthu awo onnaamalela oriipiwa waya murima anarantteliha ni ohakalala, ni oxankiheya waya woohikhalela onnimala okhala wira annipacerya omuroromela Tiithi aya a wiirimu Yehova. Ti vooloka tthiri waaweha ale a niinano arowaka vahoolo momunepani! Nyuwo khamunikupali wira mareeliho awo anikhumelela mwaha wa waaphenta atthu akina mwa enamuna ya vameekhaaya wa okhala anamalaleya a Omwene?

NIPHENTO MOOVARIHANA NI NUULUMO NOOWUUPUXERIWA NA MULUKU

14. Murumeelaka masu anyu, mutthokiherye mikhalelo sa niphento sinihimmwa va 1 aKorinto 13:4-8?

¹⁴ Okathi onaathokorerya ahu atthu akina, navarihela muteko ele Paulo aalempe awe voohimya sa niphento enoonikhaliherya osyaka mixankiho sinceene, oniphwanyiha ohakalala ni oniphwanyiha mareeliho manceene a Muluku. (Mmusome 1 aKorinto 13:4-8.) Vano nrowe nuuluule ele Paulo yaalavunle awe voohimya sa niphento wira noone moota ninrowa ahu ovarihela muteko okathi onaakhapelela ahu atthu akina.

15. (a) Xeeni vanitthuneya ahu okhala oovilela ni ooreera murima? (b) Mathowa xeeni anniiriha osyaka okhala a nrima ni wiihimya ofai?

¹⁵ “Ole omphenta t’òvilela onnarerela murima akhw’awe “. Ntoko siisaale Muluku woonihenrye awe ovilela ni oreera murima ni apinaatamu oohimalela, hiyo nintthuneya okhala oovilela ni ooreera murima vaavo atthu akina annitthekela aya onlavulela moohikalele hata mootakhala. Ole oniphenta “khanakhalela nrima” akwaawe, tthiri mutthu oniphenta khoniramela mireerelo sa atthu akina wala iparakha saya mmulokoni. Tthiri akhala wira hiyo ninniphenta, khinnirowa wiihimyaka ofai wala wiixunuuha. Ekeekhai wira, “maitho òveha, murima wowisona mukhalelo wowosela ti wa mulipa-òttheka”.​—Mir. 21:4.

16, 17. Ninrowa okhala sai moovarihana ni 1  aKorinto 13:5, 6?

¹⁶ Niphento nnooniiriha hiyo waathokorerya atthu akina mwa enamuna yookhalela. Nto hiyo khinnirowa ovonyola malamulo ni sooruma sa Yehova nihiwootothaka, owiiyerya wala opaka etthu ekina yoohiloka ohoolo waya. Niphento ninrowa onikhaliherya-tho osyaka wiiphavelela mureerelo ahu paahi, masi ohiya-vo nihaana ophavelaka mureerelo wa atthu akina.​—aFil. 2:4.

¹⁷ Mutthu orina niphento na ekeekhai khaniviruwa mowaakuveya ni “khanùpuwela sotakhala sìreliwawe” okhalaka ntoko onoolepa khula ekwaha onitthekeliwa awe. (1 aTes. 5:15) Akhala wira ninnivikaniha wuupuwelela etthu yootakhala yiireliwe ahu, tthiri khinaarowa omusiveliha Muluku, nto ohiya-vo naarowa otetheereryaka mooro yoowo waarowa waakumiherya maxakha atthu akina. (Onam. 19:18) Niphento ninniniiriha ohakalala ni ekeekhai, masi khannirowa oneemererya ‘osiveliwa n’itthu sohiloka’ pooti okhala vaavale mutthu yoole onninyokha sinimukhumelela aya mixankiho.​—Musome Miriku 24:17, 18.

18. Exeeni eniixutta ahu voohimya sa niphento nnihimmwa va 1 aKorinto 13:7, 8?

¹⁸ Muthokorerye ele Paulo yaahimmye awe moottharelana ophavelaka otthokiherya niphento. Owo aalavunle wira ole oniphenta “onnakhurunuwela atthu othene”. Akhala wira mutthu onninitthekela masi khiyarwa onivekale musammaha niphento nnooniiriha omukhurunuwela. Ole oniphenta “onnikupali” itthu sotheene siniphwanya ahu Munuulumoni na Muluku ni onnitteeliwa murima ni yoolya yomunepani enaakhala awe. Ole oniphenta “oniroromela vohihiyererya” itthu sotheene silempwale mBiibiliyani ni eyo enooniiriha waaleela atthu akina nlipelelo nahu. (1 Ped. 3:15) Hiyo nave ninnivekela ni ninniwehererya mireerelo sinceene, nto eyo enninikhaliherya oxintta mixankiho sinniphwanya. Ole oniphenta “onnivilela itthu sothene” pooti okhala itthu sinitthekeliwa ahu, olupathiwa wala mixankiho sikina. Tthiri “ophenta khunimala-tho”. Thiri niphento ninrowa wooniheriwaka ni apinaatamu owiiwananeya voohimala.

NVIKANIHE WAAPHENTA AKWIINYU NTOKO SINIIPHENTA ANYU

19, 20. Miruku xeeni sa mBiibiliyani sinirowa onikhaliherya ovikaniha waaphenta atthu akina?

¹⁹ Nihaana ovikaniha waaphenta atthu akina ntoko Biibiliya siniruma awe. Niphento moota owo nnaahela muhina atthu a maloko otheene ohiya amusi ahu paahi. Hiyo nihaana wuupuwelaka-tho wira Yesu aahimmye so: “Mumphenteke mukw’inyu ntoko sinìmphentanyu”. (Math. 22:39) Muluku ni Yesu Kristu, oowanli aya aniphavela wira hiyo naaphenteke atthu akina. Akhala wira khannisuwelexa yoopaka vaavo vanikhumelela aya muxankiho onimuhela muhina mukhwiihu, nihaana onvekela Muluku, wira onooniherye yoopaka orumeelaka munepa awe wootteela. Wira siiso, onooniphwanyiha mareeliho a Yehova, ni onrowa onikhaliherya opaka itthu mwa niphento.​—aRom. 8:26, 27.

²⁰ Yooruma yoowi, mumphenteke mukhwiinyu ntoko siniiphenta anyu, eniitthaniwa “molumo a òmwene”. (Yak. 2:8) Nuumala oromola sooruma vakhaani sa Nlamulo na Moise, Paulo aahimmye so: “Mwaphenteke akhw’inyu ntoko sinìphentanyu’. Ale anaphenta akhw’aya khaniwirela etthu yotakhala; Tivó ale anaphenta akhw’aya annìwelela vomalela soruma sa Muluku”. (aRom. 13:8-10) Tivonto vanitthuneya ahu ovikaniha waaphenta atthu akina.

21, 22. Xeeni nintthuneya ahu omphentaka Muluku ni atthu akina?

²¹ Okathi onitthokelela ahu nthowa ninniiriha waaphenta atthu akina, vanooreerela wuupuwelela masu Yesu aahimyale awe wira Atiithi ‘annakumiherya nsuwa atthu òtakhala murima masá n’ale òrera murima, annarupihela epula anaxariya vamosá n’alipa-òttheka’. (Math. 5:43-45) Nto hiyo nihaana waaphenta atthu akina voohicikha etthu akhala wira awo tooreera murima wala atakhali. Ntoko soonale ahu wanipacerya, enamuna ya wooniherya waaphenta atthu awo ori waalaleerya muhupi wa Omwene. Tthiri atthu awo aasukeriwa mareeliho manceene yakhala wira animwiiwelela ihapari isya sinaalaleerya ahu!

²² Hiyo nookhalana mathowa manceene anniiriha omphenta Yehova ni murima ahu wotheene. Nave-tho aakhala mathowa manceene anniiriha waaphenta atthu akina. Vaavo vanimphenta ahu Muluku ni atthu akina, ninnooniherya ovaha efaita ele Yesu aahimmye awe okhala etthu yootthuneya. Thiri, ninnimuhakalaliha Tiithi ahu oophenta a wiirimu, Yehova.