Niireke ‘Munnimphenta Mukhw’inyu Ntoko Sinìphentanyu’?
“Mumphenteke mukhw’inyu ntoko sinìphentanyu”.—MATH. 22:39.
MUNOOWERYA WAAKHULA?
Nthowa xeeni nintthuneya ahu otakiha ophenta wa Yehova?
Xeeni niphento nintthuneya aya mukasamentoni?
Waaphenta akhwiihu onivara sai wataana wahu ni annihu ni atthu akina?
1, 2. Biibiliya onooniherya sai otthuneya waya ophenta?
OPHENTA ti mukhalelo wootepexa otthuneya wa Yehova Muluku. (1 Yoh. 4:16) Yoopattuxa yoopacerya ya Yehova ti Yesu, yoowo aakhala wiirimu iyaakha soohikontareya, ni iixuttale moota Yehova onipaka awe itthu moophenta. (aKol. 1:15) Okumi awe wotheene, wiirimu ni elapo ya vathi, Yesu ohooniherya wira Tiithi awe toophenta, nto Yesu onnimutakiha yena. Vano, ninnikupali wira olamulelo wa Yehova ni Yesu onrowa weettihiwaka moophenta.
2 Nuumala okohiwa tiivi yaari yooruma yuulupalexa ya Nlamulo, Yesu aahimmye so: “‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene’. Ela ti yoruma yulupalexa ni yopajerya. Yoruma yanenli, enlikana ni yopajerya, t’ila: ‘Mumphenteke mukhw’inyu ntoko sinìphentanyu’”.—Math. 22:37-39.
3. Ti pani ori ‘mukhw’ihu’?
3 Moone wira Yesu aahimyale wira omphenta mukhwiihu ohaana okhala nipuro na nenli, nuumala omphenta Yehova. Ela ennooniherya otthuneya waya waaphenta apatthani ahu otheene. Masi ti pani ori ‘mukhw’ihu’? Akhala wira noothela wala nootheliwa, mukhwiihu oopacerya tuule othelanne ahu. Nave-tho akhwiihu ti yaale anithukumana ahu vamosa, eyo piiyo, Anamoona a Yehova akhwiihu. Akhwiihu akina taale anaaphwanya ahu mmuteko woolaleerya. Nto arumeyi a Yehova anrowa wooniheryaka sai wira annimphenta mukhwaaya?
OMPHENTA OLE OTHELANNE AHU
4. Vaniweryaneya sai ekasamento okhumela saana, nnaamwi niryeene atthu oottheka?
4 Yehova aahikhaliha ekasamento yoopacerya, vaavo aapattuxale awe Adamu ni Eva, khiwuraaniha. Owo aaphavela wira ekasamento aya ekhaleke yoohakalala okathi wotheene, ni yaayareke anamwane mpakha osareya elapo. (Maph. 1:27, 28) Moothananiha, mwaha woomurukunuwela Muluku, ekasamento ele yoopacerya yaahihononeya, nave apinaatamu otheene aaravihiwa etampi ni okhwa. (aRom. 5:12) Masi Soolempwa sinnitthokiherya moota wookhumela saana moothelanani. Biibiliya ookhalana miruku soolokexa sa ekasamento, seiyo sinikhuma wa Yehova, Mpattuxa a ekasamento.—Mmusome 2 Timótheyo 3:16, 17.
5. Xeeni ophenta oryaaya wootthuneya mukasamentoni?
5 Nuulumo na Muluku ninnooniherya wira ophenta ti wootthuneya wira atthu akhalane opatthani woohakalaliha, okhala wira ophenta onitaphulela osiveliwa vanceene ni mutthu owo. Eyo enniiraneya ni ekasamento. Murummwa Paulo aahilepela epaphelo muloko wa oKorinto, oriki: “Ole omphenta t’òvilela, t’òwarumela akhw’awe, khanakhalela nrima, khanìvuwiha, khanìkuxererya. Ole omphenta onnalemeliha akhw’awe, khamphavela murerelo awe, khaniviruwa, khanùpuwela sotakhala sìreliwawe. Ole omphenta khansiveliwa n’itthu sohiloka, nto onnitteliwa murima n’ikekhai. Ole omphenta onnakhurunuwela atthu othene, onnakupali atthu othene, onniroromela mohihiyererya, onnivilela sothene. Ophenta khummala-tho”. (1 aKor. 13:4-8) Wuupuwelela ni weettela miruku iyo, onnincererya ohakalala mukasamentoni.
6, 7. (a) Biibiliya onitthokiherya sai okhala muhooleli? (b) MuKristau oothela omuthokoreryeke sai mwaarawe?
6 Yehova tomuthanlale ole onireerela ohoolela etthoko. Murummwa Paulo otthokihenrye so: “Nto kintthuna wira musuweleke etthu ila: Kristu ti murú w’atthu othene, mulopwana ti murú wa mwar’awe, vano Muluku ti murú wa Kristu”. (1 aKor. 11:3) Masi Yehova khoniphavela wira ole onihoolela aapuheryeke atthu onahoolela awe. Yehova onnimuhoolela Yesu mooreerela murima, nto Yesu onnimwiiwelela ni murima wotheene. Yesu onnisiveliwa ohooleliwa ni Muluku, maana oohimya wira, “Miyo kinnaphenta Atithi”. (Yoh. 14:31) Woonasa wene, Yesu khaarowa woonela siiso vaakhanle wira Yehova tootakhala wala khonimureerela murima Mwanawe onimphentexa awe.
7 Nnaamwi mulopwana oothela oryeene muru wa mwaarawe, masi Biibiliya onihimya wira mulopwana ohaana ‘omuttittimiha’ mwaarawe. (1 Ped. 3:7) Enamuna emosa alopwana oothela akhanle aya owaattittimiha axaaraya, ori okhapelela sootthuneya saya, ni oweemererya wira ikwaha sikina akhaleke tanipaka soothanla sa emusi. Nuulumo na Muluku nnihimya so: “Nyuwo, alopwana, mumphenteke mwar’inyu, sisale Kristu saphentalyawe ekerej’awe [muloko], khuleva ekumi awe mwaha w’Ekerej’eyo”. (aÉf. 5:25) Aayo, Yesu ooleva okumi awe mwaha wa atthareli awe. Vaavo mulopwana oothela onitakiha awe enamuna Yesu aathokorerya awe muloko, vannikhweya muthiyana omphenta, omuttittimiha ni omwiiwelela iyawe.—Mmusome Tito 2:3-5.
MWAAPHENTEKE ANNINYU A EKRISTAU
8. Namoona a Yehova owooneleke sai Anamoona akhwaawe?
8 Valaponi, aakhala anamakokhorela a Yehova ikonto sinceene yaawo anivaha onamoona voohimya sa nsina nawe ni yoolakela awe. Namoona a Yehova owooneleke sai Anamoona akhwaawe? Nuulumo na Muluku ninnaakhula so: “Tivó, okathi wothene ninweryahu, niwireleke sorera atthu othene, masi vanjenexa amus’ihu òwamini”. (aGal. 6:10; mmusome aRoma 12:10.) Murummwa Pedru olempe so: “Nyuwo muhìreriha mwiwelelaka ekekhai, wira mwaphente akhw’inyu vohothererya; vano, mphentaneke tthiri ni murima worera ni nthiti”. Nave aahaaleela annawe oriki: “Ehinatthi khul’etthu mukhaleleke nthiti ophentana”.—1 Ped. 1:22; 4:8.
9, 10. Exeeni eniwiiriha atthu a Muluku okhala oowiiraana?
9 Mwaha woowi ninniphentana vanceene, nto mulokiheryo ahu khonlikana ni mukina. Ohiya-vo, mwaha woowi ninnimphenta Yehova ni wiiwelela malamulo awe, owo onninikhaliherya ni ikuru suulupalexa sa olumwenku wotheene, eyo piiyo, munepa wootteela. Eyo enninikhaliherya okhala oowiiraana ntoko mulokiheryo wa olumwenku wotheene.—Mmusome 1 Yohani 4:20, 21.
10 Ottittimiheryaka otthuneya waya waaphentaka annihu a eKristau, murummwa Paulo aalempe so: “Mukuxe murima w’othunku, murima worera, wowiyeviha, womàla ni wovilela. Nvilelaneke, mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu. Wovikana sothene iya, mukuxe murima w’ophenta, weiwo ommaleliha orera murima”. (aKol. 3:12-14) Ninnixukhurela okhala wira ophentana moota owo onnivikaniha, nnaamwi nryeene atthu a ilapo ni a makhalelo oovirikana!
11. Moota xeeni ophenta ni wiiraana onisuwanyeiha aya mulokiheryo wa Yehova?
11 Ophenta wekeekhai ni wiiraana, onnaasuwanyeiha Anamoona a Yehova okhala yaale aneettela etiini yekeekhai, maana Yesu ohimyale wira: “Atthu othene anosuwela wira mwá awixutti aka, mwaphentanaka mukina ni mukhw’awe”. (Yoh. 13:34, 35) Nave-tho murummwa Yohani olempe so: “Enimusuweliha mutthu okhala mwana a Muluku walá mwana a Satana t’ila: othene ale ahinvara miteko sa xariya, walá ahinaphenta akhw’aya, awo khahiyó àna a Muluku. Vekekhai, nikano nìwalyanyu okhuma wopajeryani ti nla: niphentaneke”. (1 Yoh. 3:10, 11) Ophenta iwo woolipa, teri ekanyeryo enaasuwanyeiha Anamoona a Yehova okhala maKristau a ekeekhai, yaawo Muluku onaarumeela awe wira alaleyeke Omwene mulaponi motheene.—Math. 24:14.
OTHUKUMANYIWA WA “MUTTITTHI MULUPALEXA”
12, 13. “Muttitthi mulupalexa” onivarani olelo-va, ni exeeni enirowa wiiraneya ni muttitthi owo moohipisa?
12 Arumeyi anceene a Yehova, aniirela mpantta “muttitthi mulupalexa . . . a ilapo sothene ni a maloko othene ni a mahimo othene ni a malavulelo othene”. Awo ‘arimwemela oholo w’ehije [ya Muluku] n’uholo wa mwapwittipwitthi [Yesu Kristu]’. Atthu awo tani? “Ti yale yaharere olupatthiwa n’uhaxiwa. Awo àkattha malay’aya, khutteliha mphomeni mwa mwapwittipwitthi”, mwaha woowi annaamini mukuttho wowoopola wa Yesu. Atthu a “muttitthi mulupalexa” annimphenta Yehova ni Mwanawe ni “khíyamurumela [Muluku] othana n’uhiyu”.—Wis. 7:9, 14, 15.
13 Moohipisa, Muluku onrowa waapwetexa atakhali okathi wa “maxakha malupale”. (Math. 24:21; mmusome Yeremiya 25:32, 33.) Mwaha woowi onnaaphenta arumeyi awe, Yehova onrowa waakhapelela ntoko egrupu, wira akele elapo esya. Ntoko sihimmwale aya vahinatthi, iyaakha 2.000 sivinre, Muluku “onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”. Niireke munniphavela okhala mParayiisu, nuumala ‘olumwenku wa khalai ovira’?—Wis. 21:4.
14. Munnuwelo wa muttitthi muulupale ori sai?
14 Okathi mahiku ookiserya apacenrye aya, 1914, arumeyi a Yehova yaari vakhaani olumwenku wotheene. Mwaha wa waaphenta akhwaaya, ni akhaliheriwaka ni munepa wa Muluku, nikoto naamukhaani na maKristau oowoottihiwa yaahivikaniha ovara muteko woolaleerya, mwa nthiti. Nto mwaha wa yeeyo, muttitthi muulupalexa wa atthu arina nlipelelo na okhala valaponi onnithukumanyeriwa. Olelo-va, aakhala Anamoona anivikana 8.000.000, yaawo anithukumana mmiloko 115.400, olumwenku wotheene, ni nnootepa nincerereyaka. Mwa ntakiheryo, mwaakha wa muteko wa 2014, yaahibatiziwa atthu anivikana 275.500, eyo enitaphulela wira khula esumana annibatiziwa atthu aniphiyerya 5.300.
15. Muhimye moota muteko woolaleerya wuulanne aya vano.
15 Ti voohakalaliha oweha moota muteko woolaleerya wuulanne aya. Vano, sinnikumiheriwa iliivuru sinimutthokiherya Biibiliya, mmattaava anivikana 700. Erevista Owehaweha, teri erevista enitepexa okaiwa olumwenku wotheene. Khula mweeri sinnimpirimiriwa ikoopiya 52.000.000 sa erevista ela, mmattaava 247. Eliivuru Biibiliya Oniixuttiha Exeeni Tthiri? yeeyo enirumeela ahu wira niwiixuttiheke atthu Biibiliya, ehimpirimiriwa nummuru ninvikana 200.000.000, mmattaava anivikana 250.
16. Exeeni eniiriha mulokiheryo wa Yehova valaponi okhumela saana?
16 Itthu iya soohakalaliha sinoona ahu vano, siniiraneya mwaha woowi ninnimuroromela Muluku, ni ninnikupali wira Biibiliya Nuulumo na Yehova. (1 aTes. 2:13) Etthu yootepexa wooneya, ori okhumela saana momunepani wa Atthu a Yehova, nnaamwi alupatthiwaka ni Satana, yoowo ori “muluku a vathí-va”.—2 aKor. 4:4.
MWAAPHENTEKE ATTHU OKATHI WOTHEENE
17, 18. MaKristau awooneleke sai atthu ahinimurumeela Yehova?
17 Arumeyi a Yehova awooneleke sai atthu yaale ahinimurumeela Muluku eekeekhai? Okathi onilaleerya ahu ninnaaphwanya atthu annaakhela saana, akina annilupattha. Hata atthu awo anaakhelaka saana wala nnaari, Biibiliya onninleela enamuna yookhalela ya waathokorerya. Onihimya so: “Okathi p’ukathi molumo anyu ekhaleke òrera ni owèleliwa ni makha: musuwele omwakhula khula mutthu ntoko vanrerelaya”. (aKol. 4:6) Okathi onimwaakhula ahu mutthu onnivaanyiha, hiyo nihaana ‘omwakhula sana’, mwaha woowi ninnaaphenta akhwiihu.—1 Ped. 3:15.
18 Ninnooniherya omphenta mukhwiihu, hata mutthu owo okhoottaka muhupi ahu, wala onikhalelaka owali. Nihaana omutakiha Yesu: “Aruwaniwaka, owo kharuwana; ahaxiwaka owo khupuwenle wunla ikuhu; masi ahìvelela mmatatani mwawe ole [Yehova] onlamula n’ixariya”. (1 Ped. 2:23) Hata nryeene ni annihu wala atthu akina, nihaana wiiyeviha ni otthara miruku sini: “Muhalivelé ni sotakhala ale aniwirelani sotakhala, nnákhala ni maruwano ale anoruwanani: nto mwavekeleleke sorera”.—1 Ped. 3:8, 9.
19. Yesu ohimyale wira naathokoreryeke sai ale anninyokha?
19 Ovikaniha okhala oowiiyeviha, onnaakhaliherya atthu a Yehova otthara nlakiheryo nootthuneya naavahiwe ni Yesu. Mwaha Yesu aalavunle awe vaMwaako, aahimmye so: “Muhìwa ele ehimmwe wira: ‘Mumphenteke mukhw’inyu, mmunyokheke nwanan’inyu’. Nto miyo kinolèlani wira: Mwaphenteke awanan’inyu. Mwavekeleleke ale anolupatthani. Siso munokhala ana Àtith’inyu ari wirimu. Tthiri awo annakumiherya nsuwa atthu òtakhala murima vamosá n’ale òrera murima: annarupihela epula anaxariya vamosá n’alipa-òttheka”. (Math. 5:43-45) Ntoko arumeyi a Muluku, nohaana wiixutta ‘waphenta awananihu’, hata aninyokhaka.
20. Nthowa xeeni omphenta Muluku ni waaphenta atthu akina onrowa aya wuulaana elapo esya?
20 Mwa itthu sotheene, arumeyi a Yehova ahaana wooniherya wira annimphenta Yehova ni akhwaaya. Mwa ntakiheryo, hata akina ahaakhelaka saana muhupi wa Omwene onilaleerya ahu, hiyo ninnaakhaliherya okathi aniphwanyiwa aya mixankiho. Murummwa Paulo olempe so: “Muhaxankiheké akhw’inyu: muteko anyu okhaleke ophenta, mana ale anaphenta akhw’aya annìwelela vomalela molumo a Muluku. Vekekhai, soruma sinihimya wira: ‘Muhiraruwé. Muhimwivé mutthu. Muhiyé. Muhikhalelé nrima itthu s’anene’ ni soruma sikina sothene, sinthukumanyeya mwa nulumo nla wira: ‘Mwaphenteke akhw’inyu ntoko sinìphentanyu’. Ale anaphenta akhw’aya khaniwirela etthu yotakhala. Tivó, ale anaphenta akhw’aya annìwelela vomalela soruma sa Muluku”. (aRom. 13:8-10) Ntoko Anamoona a Yehova, ninnooniherya ophenta wekeekhai, olumwenku ola woohiiwanana, wootakhala ni oneettihiwa ni Satana. (1 Yoh 5:19) Tthiri ophenta tonrowa weettihaka itthu sotheene sinrowa ovariwaka valaponi, nuumala opwetexiwa Satana, malaikha awe ootakhala ni apinaatamu animurumeela. Enrowa okhala etthu yoohakalaliha apinaatamu otheene valaponi omphentaka Yehova ni akhwaaya!