“Muluku Aari Woowi?”

OKATHI WA IHASARA WAANYIHERYASA MUNNIIKOHA SO: ‘XEENI MULUKU EEMERENRYE AWE?’ WALA MOOKHALANA MUXANKIHO ONIWIIRIHANI WIIKOHA AKHALA WIRA TTHIRI MULUKU ONNOOKHAPELELANI?

Waanyiheryasa muupuwelo anyu onoolikana ni wa Sheila yoowo onikhala wEstados Unidos. Owo ohuuwale emusi yooluttuweliwa ni myaha sa etiini. Sheila ohimmye so: “Okhuma enamwane aka, kaanimukupali Muluku maana owo Mpattuxa ahu. Hata vari siiso nkuupuwela wira Muluku aari vakhiviru vaka. Kaanikupali wira owo aanikiweha, masi aakiweha paahi ori ene ottaiwene. Nkaatonko wuupuwela wira Muluku aanikihaaxa, nave-tho nkaatonko wuupuwela wira aanikikhapelela”. Xeeni Sheila aarina awe miyuupuwelo iyo sowaanyiherya? Owo onitthokiherya so: “Emusi aka yaahiviriha mixankiho sinceene, nto nuupuwela wira Muluku khaanikhaliherya sintoko naaphavela ahu”.

Moolikanasa ni Sheila, waanyiheryasa munnikupali wira Muluku ookhala. Masi, woonasa wene munniikoha vakhala wira owo onnookhapelelani. Nave naxariya Yobi yoowo aakupali wira Mpattuxa ookhalana owerya ni ankhili, aaniikoha siiso. (Yobi 2:3; 9:4) Nuumala Yobi omukhumelela ihasara sinceene, mpakha ovelavela, aahimukoha Muluku wira: “Exeni munkihuluwanyu? Exeni munikònanyu ntoko nwanan’inyu?”​—Yobi 13:24.

Biibiliya onihimya exeeni? Niireke Muluku tonikumiherya ihasara? Niireke sookhala itthu sinooniherya wira Muluku onnaathokorerya atthu otheene? Niireke khula mutthu a hiyo pooti osuwela vakhala wira tthiri owo onniniweha, oniwiriyana, onoonela othunku, wala onikhaliherya okathi sinnikhumelela aya mixankiho?

Myaha sinittharelana, ninrowa othokorerya itthu siniixutta ahu ni soopattuxiwa voohimya sa moota Muluku onnithokorerya awe. (aRoma 1:20) Moottharelana, ninrowa woona ele Biibiliya onihimya awe voohimya sa enamuna Muluku onnithokorerya awe. Vakhala wira munimuncererya ‘omusuwela saana Muluku’ nwehaka itthu opattunxe awe ni osoma Nuulumo nawe, munookupalixa wira owo “onnokhapelelani”.​—1 Yohani 2:3; 1 Pedru 5:7.