Koophwanya Okumi Woohakalaliha Mwaha Woomurumeela Yehova

MOOTA KIHUUWALE AKA

Kiyariwe mwaakha wa 1934. Anamuyari aka yaahithaama oSuíça ethaamelaka oTimmins epooma ya wOntário oCanada. Mwaka wa 1939, maama aka aahipacerya osoma erevista Torre de Vigia yeeyo olelo-va enisuweliwa okhala Owehaweha, ni aahipacerya orowela mithukumano sa Anamoona a Yehova. Nuumala-vo, yaahikilattula miyo ni axihima aka 6. Muhoolo mwaya amaama yaahikhala namoona a Yehova.

Paapa aka khaasiveliwe ni yoothanla ya maama aka, masi amaama yaaniphenta ekeekhai ni yaahithanla ohihiya. Yaahipaka eyo hata okathi yoole muteko wa Anamoona a Yehova waakhottihiwa aya oCanada, mwaka wa 1940. Khula okathi maama aka aanimuthokorerya paapa aka mwa nttittimiho ni mooreera murima, nnaamwi aamulavulela moolumo oohiloka. Ntakiheryo nawe nooloka nookikhaliherya miyo ni axihimaka wiixutta ekeekhai. Moohakalaliha, mweettelo wa paapa aka waahiturukeya nave owo aahipacerya onithokorerya mwa enamuna yooloka.

OPACERYA MUTEKO WA OKATHI WOOTHEENE

Elimwe ya 1950, miyo kaahinweha asembeleya Aumento da Teocracia oNova York. Okathi kaasuwenle aka anna a mapuro oovirikana, ni owiriyana soowiiraneya sa anna yaakratuwanri Exikola ya oGileadi, eyo yaahikiiriha ophavela wuuncererya muteko kanvarela aka Yehova! Nto yoolakela aka ya ophavela ovara muteko wa okathi wootheene yaahincerereya ovikana khalai. Nuumala otthikela owaani, kaahiivahererya wiira kikhale pioneero ookilaatheya. Efiliyaali ya oCanada, yaahaakhula wiira kaahaana opatisiwa. Nto kaahipatisiwa 1 a Outubro a 1950. Nuuvira mweeri mmosa, kaahikhala pioneero ookilaatheya ni kaahithanleliwa wiira kavareke muteko wa opioneero oKapuskasing. Muttetthe owo waari woorakamela ni opuro kaakhala aka.

Eyiita ya mwaakha wa 1951, ebeteli yaahivaanela ni Anamoona a Yehova yaalavula Efranses, vakhala wiira yanwerya othaamela elapo yaalavula nttaava nle, oQuebec. Muttetthe ole waanipirisari atthu anceene wiira akhaliherye. Nto kinnunwe kilavulaka Efranses ni enkelexi, nuumala olikareliwa kaahithanleliwa orowa ovara muteko oRouyn. Miyo nkaamusuwela mutthu elapo ele, masi etthu kaasuwela aka paahi yaari opuro kaarowa aka sintoko kihimye aka waanipacerya. Itthu saahikheethela saana. Miyo ni Marcel naahikhala apatthani ooloka, ni kaahihakalala vanceene orowa orumeela oQuebec iyaakha iye 4 saattharelana ntoko pioneero a vameekhaaya.

OGILEADI NI ITTHU KAALIPELELA AKA

Okathi kaari aka oQuebec, kaahihakalala vanceene nuumala waakhela nlattulo ya eturma 26 ya Exikola ya oGileadi oSouth Lansing, oNova York. Naakaratuwanri 12 a Fevereiro a 1956, ni kaahithanleliwa orowa elapo ya oGana,b wÁfrica Ocidental. Masi kihinatthi orowa, kaahaana otthikela oCanada “isumana vakhaani” wiira kalokiherye idukumento sa mukwaha ole.

Kaahaana olipelela idukumento iyo miyeeri 7, oToronto. Okathi wootheene emusi Cripps yaahikaakhela mooreera murima, ni kaahimusuwela mwanaya Sheila. Nto hiyo naahisivelana. Kihinatthi omuleela wiira nithelane idukumento saka saahilikana. Miyo ni Sheila naahivekela vanceene, nave naahilakela wiira kaahaana orowa yoothanleliwa aka. Masi khinaarowa ohiya ovaanela wiira niwehe vakhala wiira muhoolo nanwerya othelana. Khahiyo yaari yoothanla yookhweya, masi naahiwerya othelana.

Kaahiviriha mweeri mmosa keettaka mukwaha ole, nto wiira kiphiye wAccra oGana, kaaninwela komboi, naviyu ni eviyau. Nuumala ophiya oGana, kaarumeela ntoko mutokweene a esirkwiitu. Eyo yaahela muhina oxekurya miloko sootheene sa oGana, nave kaanixukurya elapo yoowatthamela oCosta do Marfim ni oTogoland (olelo-va oTogo). Ikwaha sinceene, kaaneetta mikwaha mekhaka kirumeelaka ekaaro ya obeteli. Kaanihakalala vanceene weetta mikwaha iye!

Wuumalani wa esumana, kaanithanleliwa wiira kaahooleleke asembeleya a esirkwiitu. Nto anna yaaniteka epwaro ya mithala nave yaanitthunyela ni makukhu a mikole wiira okhaleke muuttutthi okathi wa nsuwa. Okhala wiira khinaarina ekonxelatori, inama saahitiwa nihiku nenlo moovarihana ni nummeru na atthu yarwaale waasembeleyani.

Okathi wa asembeleya awo, saanikhala soowiiraneya sootheiha. Nihiku nimosa, munna Herb Jennings,c olavulaka mwaha awe, epooyi emosa yaahitthyawa opuro yaarowa aya ohitiwa. Nto eyo yaahirwa yeemela eriyari ya munna aalavula mwaha ni alipa-oowiriyana. Munna Herb aahimaala olavula ni epooyi ele khiyoona woorowa. Masi anna yaarina ikuru sinceene, yaahirwa ovara epooyi ele attikiherya okosinya, nto alipa oowiriyana yaahoopa makhupi. Okathi naawira ahu asembeleya ale, kaahooniherya eviidiyu ahu eni: A sociedade do Novo Mundo em ação mittetthe iye soowaattamela. Nto wiira nooniherye eviidiyu eyo, hiyo naamurumeela proxetori. Atthu anceene muttetthe ole yaahaasivela. Anamunceene a yaawo yampacerya oweha eviidiyu. Atthu ale yaahimana makuphi ni ohakalala mwaha woowaaweha atthu yaapatisiwa nviidiyuni mme. Mweekeekhai eviidiyu ele yaahaakhaliherya atthu ale yaawenhe osuwela wiira ola waari mutthenkeso woowiirana wa olumwenku wootheene.

Nuumala oviriha iyaakha piili kiri ene wÁfrica, kaahihakalala vanceene, nuumala onweha konkresu internasional oNova York mwaakha wa 1958. Kaahihakalala vanceene otthikela onweha Sheila, yoowo aakhuma oQuebec weiwo aarumeela awe ntoko pioneera a vameekhaaya. Hiyo naalavula nrumeelaka ikarta, masi nuumala okhumana, kaahimuleela wiira kaaphavela omuthela, nto owo aaheemererya. Kaahimulepela ekarta munna Knorr dkimukohaka akhala wiira Sheila vanweryaneya orowa exikola ya oGileadi ni wiira avareke ni miyo wÁfrica. Owo aaheemererya. Moohakalaliha, Sheila aahiphiya oGana. Ekasamento ahu, yiiraneyale 3 a Outubro a 1959 wAccra. Nto nahoona wiira Yehova aaninireeliha mwaha woomuhela nipuro noopacerya mweekumini mwahu.

NIVARAKA HOOTHE OCAMARÕES

Mwaakha wa 1961, naahithanleliwa ovara elapo ya oCamarões. Okathi naalattuliwe ahu wiira nakhaliheryeke efiliyaali esya, miyo kaanaatteliwa miteko. Mwaha wookhala yoothanleliwa esya ya ohoolela muteko woolaleerya oCamarões, miyo kaahaana wiixutta itthu sinceene. Mwaakha wa 1965, Sheila aahirupala. Tthiri khivaanikweelale okupali wiira vano naarowa okhala anamuyari. Masi vaavo naarina ahu muritti ole musya wa omukhapelela mwaana ole ni nuupuwelela ahu otthikela oCanada, yaahikhumelela etthu nahaalipelela ahu.

Mooriipiha murima, mwaana ole aahikhwa mmirimani mwa amamawe. Meediku aahinileela wiira mwaana ole aari mmirimani aari mulopwana. Eyo yiiraneyale iyaakha 50 sivinre, masi khaninkhala-khala niliyalaka. Nnaamwi naaripiwe murima mwaha wa etthu ele yaaniiranenle, khinaahiyale ovara muteko waanisivela.

Anna a oCamarões mwaha woohiirela mpantta myaha sa epoliitika, yaanilupatthiwa vanceene. Olupatthiwa iwe waanitepa okathi wa mwaathanle. Nihiku 13 a Maio a 1970 yaahiiraneya etthu yeeyo yaaniriipihale murima vanceene, okathi anamalamulela yaakhottihenrye aya Anamoona a Yehova ovara muteko aya mootaphuwa. Efiliyaali ele naakhanle ahu miyeeri 5 paahi, kuvernu aahikuxa. Nuumala esumana emosa paahi, mamisionaario ootheene ohela muhina miyo ni mwaaraka naahoomoliwa elapo ele. Khivaanikweelale waahiya anna ni arokora okhala wiira naanixankiheya naawo, maana khinaasuwela etthu yaarowa owiiraneela muhoolo.

Naahiphiya oFrança ni naahikhala weiwo miyeeri 6. Kiri ene oFrança kaanipaka sootheene kaawerya aka wiira kaakhaliherye anna a oCamarões. Mweeri wa Dezembro, naahithanleliwa efiliyaali ya oNigéria, yeeyo yaaweherya muteko woolaleerya oCamarões. Anna ni arokora a oNigéria yahinaakhela mooreera murima. Nave naanihakalala mwaha woorumeela iyaakha sinceene.

YOOTHANLA YOOXANKIHA

Mwaakha wa 1973, naahaana opaka yoothanla yooxankiha. Mwaaraka Sheila aaniwerehiwa vanceene. Okathi naari ahu okongresuni a oNova York, Sheila aahikileela so: “Miyo nkiniwerya-tho! Nkireere otemwa okhala wiira nkireere oviriha okathi munceene kiwereiwaka”. Naahiviriha iyaakha sinivikana 14 nirumeelaka wÁfrica Ocidental. Miyo kaanihakalala mwaha wa muteko ole aavara awe moororomeleya, masi vano kaahoona wiira nahaana opaka marukunuxo. Nto nuumala ovaanela ni opaka mavekelo manceene voohimya sa mwaha ole, naahilakela otthikela oCanada, weiwo kaarowa aka omukhapelelaka mwaaraka. Yoothanla yooxankiha naapanke ahu, yaari ohiya yoothanleliwa ya omisionaario ni muteko wa okathi wootheene.

Nuumala ophiya oCanada, kaahipwanyihiwa muteko ni mpatthani aka a khalai, yoowo aavara muteko empereesa enilokiha ni otumiha ikaaro, epooma ya oNorti ya oToronto. Nahaalukari empa, naahithuma itthu soorumeeliwa nave naahiwerya opaka marukunuxo nihikopha-komphe. Hiyo naaphavela okhalana okumi woohattiheriwa itthu nlipelelaka wiira nihiku nlo naamutthikela muteko wa okathi wootheene. Moohipisa yaahiiraneya etthu naalipelela ahu okathi nahuupuwela ahu.

Kaahipacerya okhaliherya khula eSaabadu muteko wooteka Esalau ya Asembeleya oNorval, wOntário. Nuuvira okathi, kaahithanliwa wiira kikhale muhooleli anweherya asembeleya. Mwaaraka Sheila aahipacerya openuwa eretta awe ele nave nahoona wiira anwerya ovara muteko ole. Nto mweeri wa Junho wa 1974 naahithaamela Esalau ele ya Asembeleya. Naahihakalala vanceene otthikela muteko wa okathi wootheene!

Nuuvira miyaakha miili, naaheemererya yoothanleliwa ya ovara muteko wa esirkwiitu. Naathanleliwe elapo ya oManitoba, eprovinsia ya oCanada yeeyo enisuweliwa okhala eprovinsia yooriirya. Moohaanyiherya, hiyo ninnixukhurela vanceene mwaha wa ophenta wa anna ni arokora a elapo ele. Nihiixutta wiira moohicikha opuro ninrumeela ahu, etthu ya faita yuulupale omurumeela Yehova opuro nthanleliwa ahu.

WIIXUTTA ETTHU YA FAITA YUULUPALE

Nuumala oviriha iyaakha sinceene nrumeelaka osirkwiitu, naahilattuliwa mwaakha wa 1978 wiira nakhaliheryeke eBetheli ya oCanada. Nuuvira okathi, kaahiixutta etthu ni soothanleliwa sooxankiha. Kaahithanleliwa olavula mwaha muthukumano wa vameekhaaya, oMontreal, yoowo waarina ewoora emosa nnimeya. Mooriipiha murima, mwaha aka ole khiwaavanre murima alipa-oowiriyana. Nto munna a etepartamento ya muteko aahikivaha miruku. Mweekeekhai, kaahaana weemererya miruku iye ni osuwela wiira nkaasuwela saana olavula myaha. Masi miyo nkeemerenrye miruku iye. Miyuupuwelo sahu saari soovirikana, nto kaahoona wiira munna ole aamukipwapwela ni khaatonko okittottopela. Nto kaahoona wiira nkaiwelenle miruku iye okhala wiira kaawehexexa enamuna aakivanhe awe.

Nuuvira mahiku vakhaani, munna mmosa a Ekomisau ya Efiliyaali aahirwa olavula ni miyo voohimya sa mwaha ole, kaahiriipiwa murima mwaha wa okhootta miruku iye kaavahiwe aka ni munna ole. Muhoolo mwaya, kaahirowa olavula ni munna ole aakivahale miruku iye. Moohakalaliha munna ole aaheemererya musammaha ole kanvekenle aka. Yoowiiraneya ela, yookiixuttiha efaita erina aya okhala mutthu oowiiyeviha ni nkinkhala-khala kiliyalaka. (Mir. 16:18) Kinninvekela ikwaha sinceene Yehova voohimya sa mwaha owo, nave koolakela weemererya miruku kinivahiwa aka.

Miyo kinirumeela oBeteli ya oCanada iyaakha sinivikana 40. Okhuma mwaakha wa 1985, miyo kookhalana eparakha ya orumeela ntoko munna a Ekomisau ya Efiliyaali. Mwaaraka Sheila okhwiiye Fevereiro a 2021. Ohiya oxankiheya paahi mwaha wa okhweliwa mwaaraka, miyo sinnikiphwanya mixankiho sikina mookumini mwaka, okhala wiira kinniwereiwa. Masi muteko wa Yehova onnikhikhaliherya okhala oohakalala “mpakha kihinasuwela moota okathi onaakuva aya ovira”. (Mus. 5:19) Nnaamwi okhuma khalai sikiphwanyaka mixankiho, ohakalala waka khonivukuwa. Omuhela Yehova nipuro noopacerya mookumini mwaka ni oviriha iyaakha sinivikana 70 kimurumeelaka Yehova ni ovara muteko wa okathi wootheene, eyo ti etthu enikiphwanyiha ohakalala weekeekhai. Kinninvekela Yehova wiira aakhaliheryeke anna ni arokora yaawo ari amiravo wiira nave-tho awo, amuheleke Yehova nipuro noopacerya. Tthiri kinnikupali wiira akhala wiira amiravo awo anoomuhela Yehova nipuro noopacerya mookumini mwaya, awo anookhalana okumi ni ohakalala weekeekhai weiwo onikhumelela paahi mwaha wa omurumeela Yehova.