Moota Woorumeela eFormulaario Queira Visitar (S-43-T)

Akhala wira nomphwanya mutthu onikhala muttetthe mukina wala onilavula nttaava nikina, masi onooniherya osiveliwa ekeekhai, nto hiyo pooti orumeela eformulaario Queira Visitar. Nnaamwi khalai narumeela akhala wira namphwanya mutthu onilavula nttaava nikina, hata ophavelaka wala ohiphavelaka ekeekhai, vano nihaana orumeelaka paahi akhala wira oosiveliwa ekeekhai. Eyo ennivirikana akhala wira mutthu onimphwanya ahu tuule ohiniiwa ni ohinilavula. Namphwanya mutthu ohiniiwa ni ohinilavula, pooti ohooniheryaka osiveliwa, hiyo nihaana orumeela eformulaario S-43.

Nto nuumala omaleliherya olepa eformulaario eyo etthu xeeni enitthuneya ahu opaka? Yohaana ovahereriwa mulipa-oolepa a muloko. Akhala wira mulipa-oolepa onnisuwela muloko ene, owo pooti waaroihela atokweene a muloko owo, wira amukhaliherye ole oonihenrye osiveliwa ekeekhai. Mulipa-oolepa a muloko aahisuweleke muloko ene, owo ohaana oroiha ofiliyaali.

Akhala wira ole oonihenrye osiveliwa onilavula nttaava nikina ni onikhala mmuttettheni mwanyu, pooti ovikaniha omuxukurya wira mulipihe ophavela wawe ekeekhai mpakha ophwanyaneya namalaleerya ooreerela a muloko onilavula nttaava nikina.—Nwehe Orummwa Ahu wa Omwene a Novembro 2009, epaaxina 4, ekunya.