Makoho Oowaakhuliwa

◼ Ti Pani Onireerela Orumeela Ekupon Aahiiso Internet Ovekaka Oxukuriwa Wala Yoosoma ya Biibiliya?

Ikwaha sinceene, iliivuru sahu sinnikhalana opuro oniihaniwa ekupon, yoowo mutthu onimaleliha awe olepa, ni oroiha ofiliyaali wira ovekele iliivuru wala oxukuriwa ni Anamoona a Yehova. Ohiya-vo, epaaxina ahu ya Internet www.watchtower.org, pooti orumeeliwa wira evekiwe yoosoma ya Biibiliya. Itthu iya sinnaakhaliherya atthu anceene wiixutta ekeekhai. Masi, sinnikhumelela mixankiho vaavo anamalaleerya anirumeela aya, aphavelaka wira amusi aya wala atthu akina yiixuttihiwe ekeekhai.

Atthu akina yaawo yaaruuheliwe iliivuru masi ahitonko oveka, yaahooniherya ohisiveliwa; nto khiyahimya wira mulokiheryo ahu onnaanyoonyiha, ni wira onnaaruuhela itthu ahivarihanne. Nave, anamalaleerya yaawo yaakhenle muhupi wira amuxukurye mutthu yoowo ahaatonko oveka oxukuriwa, yahuuliwa muru vaavo mutthu owo ahaasiveliwe awe oxukuriwa iwo. Tivonto, yooveka enipakiwa munternetini aahiiso erumeeliwaka ekupon, yohaana opakiwaka paahi ni atthu yaale anooniherya osiveliwa ekeekhai, ohiya anamalaleerya aphavelaka waakhaliherya akina. Akhala wira efiliyaali enimwaakhela yooveka ya namalaleerya onirumeela ekupon wala Internet, yooveka eyo khenrowa waakhuliwa.

Nto, ninrowa waakhaliherya sai amusi wala atthu akina wira asuwele ekeekhai? Akhala wira munniphavela onvaha mutthu eliivuru, nyuwo pooti onvaha mmansinyu. Vano asiveliwa ekeekhai ni ophavela oxukuriwa ni Namoona, masi nyuwo khihiyasuwela moota woolavulana axitokweene a mapuro awo, muhaana omaleliha olepa ni onvahererya sekretario a muloko anyu eformulaario eni: Queira Visitar (S-43). Vano mutokweene owo onoovarerya ni oroiha ofiliyaali eformulaario eyo. Akhala wira mutthu owo ori mukhatteya wala ori oxipiritali, muhirumeele efiliyaali wira okhaliheriwe. Masi, nyuwo pooti omutumererya wira owo olavule ni anna anixukurya mapuro awo wala owo mmansawe olepela ofiliyaali.