Makoho Oowaakhuliwa

◼ Vannireerela anamalaleerya orumeela Interneti wira yaalaleeryeke wala waasomiha Biibiliya atthu ahinaasuwela aya anikhala elapo ekina?

Anamalaleerya akina aatoko orumeela Interneti nto khummphwanya mutthu onimusomiha aya Biibiliya onikhala elapo ekina yeeyo muteko ahu onikhoottihiwa awe wala yoothowa anamalaleerya. Okathi mukina enamuna eyo pooti okumiherya mireerelo. Masi, ti voowoopiha anamalaleerya olepelana e-maili wala olavulihana ni atthu ahinaasuwela aya arumeelaka Interneti. (Nwehe Orummwa Ahu wa Omwene a Julyo 2007 epax. 3.) Nnaamwi orumeela Interneti oweryaka waaphwanyiha atthu ale a murima saana muhupi wa Omwene, ovaanela ni atthu nirumeelaka enamuna eyo pooti omwiiriha munna wala murokora olavula ni atthu oohireerela, waahela muhina anammwareya. (1 aKor. 1:19-25; aKol. 2:8) Ohiya-vo, ilapo seiye muteko ahu onikhoottihiwa awe, woonasa wene guvernu onnisoma mihupi sinilepelaniwa. Orumeela enamuna eyo ya olavulihana pooti waakumiherya maxakha anna ni arokora anikhala elapo eyo. Tivonto, anamalaleerya vahineemereriwa aya orumeela Interneti wira awaavye atthu a elapo ekina aphavelaka waalaleerya ihapari sooreera.

Vahikhanle wira hiyo nilakiheriwe ni efiliyaali ya elapo ahu, khivaareerela omananiha ovikaniha omulaleerya mutthu onikhuma elapo ekina nuumala owo otthikela elapo awe, ohiya-vo, hiyo pooti omulakiherya moota woorumeela esaiti jw.org wira ophwanye soohimmwa sikina wala omooniherya enderesu ya efiliyaali ya elapo awe. Hiyo pooti-tho omutumererya wira arowe Empa ya Omwene aphiya elapo awe. Ekeekhai wira sookhala ilapo sihirina Ipa sa Omwene. Vakhala wira owo onniphavela oxekuriwa ni Namoona a Yehova a muttetthe onikhuma awe, hiyo pooti omaliherya olepa epaphelo eni Queira Visitar (S-43-T) nuumala-vo ninvahereryeke mulipa-oolepa a mmulokoni nto owo onooroiha elapo eyo orumeelaka esaiti jw.org. Efiliyaali enikhapelela muteko muttetthe mutthu owo onikhala awe ennisuwela oratteene moota woowiira wira mutthu owo oxekuriwe ni okhaliheriwa omunepani.​—Nwehe Orummwa Ahu wa Omwene a Junyo 2014, epax. 7, ni wa Novembro 2011, epax. 2.

Vakhala wira ookhala mutthu onimuxekurya ahu nenna-va nto onathaamela elapo ekina wala onimusomiha ahu Biibiliya onkhala elapo ekina ohinimusuwela ahu nirumeelaka Interneti, nihaana otthara malakiheryo ahimmwale osulu iwe. Masi, nihaana ovikaniha omukhaliherya mpakha okhumelela namalaleerya a muttetthe onikhala awe wira omukhaliherye. Nto, vakhala wira mutthu owo onikhala elapo yeele muteko ahu onikhoottihiwa aya, vannireerela okhalana ephoole yuulupale okathi onilavula ahu myaha sa mBiibiliyani ni atthu akina nirumeelaka ipaphelo, telefoni wala Interneti.​—Math. 10:16.